Mərkəzi icra hakimiyyəti orqanları və digər idarəetmə qurumları rəhbərlərinin şəhər və rayonlarda vətəndaşların qəbulu cədvəlinə əsasən, mədəniyyət naziri Adil Kərimli avqustun 29-da Tovuz rayonunda vətəndaşları qəbul edib. 

“Ədəbiyyat və incəsənət” portalı Mədəniyyət Nazirliyinə istinadən xəbər verir ki, qəbuldan öncə nazir Adil Kərimli və Tovuz Rayon İcra Hakimiyyəti başçısının birinci müavini Rəşad Zeynalov Ümummilli lider Heydər Əliyevin Tovuz rayonunda ucaldılmış abidəsi önünə gül dəstələri qoyaraq xatirəsini ehtiramla yad ediblər.  

Tovuz rayon Nizami adına Mədəniyyət evində keçirilən qəbulda əsasən Tovuz, Ağstafa, Qazax, Şəmkir və Gədəbəy rayonlarından olan vətəndaşlar iştirak ediblər. 

Mədəniyyət Nazirliyinin məsul əməkdaşlarının da iştirakı ilə keçirilən görüşdə vətəndaşların müxtəlif mövzularda müraciətləri dinlənilib. Müraciətlər əsasən işlə təmin olunma, tarixi abidələrin vəziyyəti ilə bağlı təklif, ortaya çıxan problemlərin həlli və digər məsələlərlə bağlı olub. 

Vətəndaşları ayrı-ayrılıqda dinləyən nazir bütün müraciətlərin araşdırılması, qaldırılan məsələlərin qanunvericiliyə uyğun həlli barədə müvafiq tapşırıqlar verib. 

Görüşdə şəhid ailələri və qazilərin qaldırdıqları məsələlərə xüsusi həssaslıqla yanaşılması, vaxtında və obyektiv baxılması məqsədilə hər bir müraciət qeydiyyata alınaraq nəzarətə götürülüb.

“Ədəbiyyat və incəsənət”

(30.08.2023)

Nazirlik Ədəbiyyat Fondu ilə birgə “Ədəbiyyatın kinoya transferi” mövzusunda dinləmə keçirib

Xəbər verdiyimiz kimi, avqustun 29-da Azərbaycan Respublikası Mədəniyyət Nazirliyi və Azərbaycan Ədəbiyyat Fondu “Ədəbiyyatın kinoya transferi” mövzusunda dinləmə keçirib. 

“Ədəbiyyat və incəsənət” portalı xəbər verir ki, Azərbaycan Yazıçılar Birliyinin Natəvan klubunda keçirilən tədbirin məqsədi keyfiyyətli filmlərin ərsəyə gətirilməsi üçün yazıçıların kino industriyasına daha yaxından cəlb edilməsi olub. 

Mədəniyyət nazirinin müşaviri, Əməkdar incəsənət xadimi Orxan Fikrətoğlunun məruzəçisi olduğu tədbirdə Xalq şairi Sabir Rüstəmxanlı, Azərbaycan Ədəbiyyat Fondunun Baş direktoru Varis, Azərbaycan Yazıçılar Birliyinin katibləri İlqar Fəhmi, Elçin Hüseynbəyli, Xəyal Rza, birliyin dramaturgiya seksiyasının müdiri Firuz Mustafa, Azərbaycan Kino Agentliyinin şöbə müdiri Rəşad Qasımov, Ultra production şirkətinin rəhbəri Pərviz Məmmədov, “Azərbaycan” jurnalının baş redaktoru İntiqam Qasımzadə, yazarlardan Yunus Oğuz, Yaşar, Rüstəm Dastanoğlu, Kənan Hacı, Firudin Qurbansoy, Aysel Fikrət, gənc yazarlardan Fərid Hüseyn, Ülviyyə Heydərova, Habil Yaşar, Uraqan Abdullayev və digərləri iştirak ediblər. 

Öncə ədəbiyyatla kinonun vəhdətindən, yaxşı filmlərin çəkilməsi ilə yaxşı dramaturji materialın mövcud olması asılılığından bəhs edilib. Mədəniyyət naziri Adil

Kərimlinin kinodakı durğunluğu aradan qaldırmaq üçün atdığı zəruri tədbirlərə diqqət çəkilib, kino industriyasının əvvəlki dönəmlərdə yazıçılar üçün bağlı olan qapılarının taybatay açıldığı bəyan edilib. 

Daha sonra Orxan Fikrətoğlu Mədəniyyət Nazirliyinin kino siyasətini tam olaraq tədbir işçilərinə açıqlayıb. 

Bəs bu siyasət nədən ibarətdir? 

Tədbirdən sonra “Ədəbiyyat və incəsənət” portalının əməkdaşı Orxan Fikrətoğludan suala cavab alıb. 

Orxan Fikrətoğlu aşağıdakıları açıqlayıb: 

-Mədəniyyət Nazirıiyinin yeni komandasının kino siyasətində Kino Agentliyinin yaradılması, Kino Forumunun keçirilməsi, filmlərin məhz ən yaxşılar tərəfindən çəkilməsi üçün ədaləti bərqərar etməklə müsabiqə elan edilməsi gözlə görünən əsas nəticələrdir. Yeni kino strategiyasının ilk bəhrəsi olan müsabiqə özündə filmlərin 5 xətt üzrə  maliyyələşəcəyini ehtiva edir:

-Dövlət sifarişi ilə çəkilən filmlər - ilk öncə milli-mənəvi və sənət dəyərlərinə xidmət edəcək filmlər;

-Kommersiya filmləri - daha çox gəlir əldə etməyə hesablanan, bir sözlə, “kassa filmləri”;

-Sənət filmləri (art-hauslar) –istedadlı rejissorlarımızın öz seçim və istəkləri ilə çəkdikləri, beynəlxalq kinofestivallarda təmsil olunacaq yüksək zövq filmləri;

-Debüt filmlər – gənc rejissorların debüt işləri;

-Tələbə filmləri - İncəsənət Universitetinin və digər kino təhsili verən ali məktəb tələbələrinin çəkdikləri filmlər.

Beləliklə, peşəkar və həvəskar hər bir kəs kino çəkmək şansı əldə edir. 

Onu da əlavə edim ki, qısa müddətdə bu müsabiqənin elan edilməsi ilə yanaşı parçalanmış və iki kinematoqrafçılar ittifaqında cəmləşən kino cameəsi birləşdirilib, “Debüt studiyası” bərpa edilib,  mediasının maliyyələşdirilməsinə başlanılıb. 

Bu gün Mədəniyyət Nazirliyi ən əvvəl prodüsser mərkəzlərinin çoxalmasında və təkmilləşməsində maraqlıdır. İkinci - bazarın və rəqabətin yaranmasında maraqlıdır. Seleksiya yolu ilə tələbələr arasından, gənc istedadlar arasından yeni rejissorlar, ssenaristlər, operatorlar, aktyor və aktrisaların müəyyənləşdirilməsində maraqlıdır. Və bu sahələrdə artıq canlanma hiss edilməkdədir.

Ölkəmizdə kino festivallarının keçirilməsi ənənəvi hal alacaq. Beynəlxalq anima, doko və kiçikhəcmli filmlər festivallarını maliyyələşdirməklə mədəniyyət nazirliyi eyni zamanda ölkəmizə təşrif buyuran tanınmış əcnəbi kino mütəxəssilərini panel müzakirələrinə cəlb etmək, Azərbaycan kinosu barədə bilgiləri dövriyyəyə buraxmaq fikrindədir. Tədricən A kateqoriyalı festivallara çıxmaq, ölkədə kino pavilyonları tikmək məqsəd kimi götürülür.

Mədəniyyət Nazirliyi dünyaçaplı studiyaların gəlib Azərbaycanda filmlər çəkməsində maraqlıdır. Hətta onları maliyyələşdirməkdə də. Azərbaycan ərazisində film çəkən bütün xarici şirkətlərdən yalnız bir şey tələb olunacaq: 60-70 faiz yerli işçilərdən – azərbaycanlı mütəxəssilərdən istifadə etsinlər. Nəticədə yeni kadrlar hazırlanacaq, hazır kadrların isə kino təcrübəsi artacaq.

Yeni kadrların hazırlanması prosesində tələbələrin xaricdə təhsil almasına önəm veriləcək, ssenaristlərin təkmilləşdirilməsində xeyli işlər görüləcək. Animasiya Akademiyası açılacaq, milli animasiya filmlərinin çəkilməsi prioritet sayılacaq.

Kinoaktyor truppası bərpa ediləcək, texniki heyət üçün hər 6 aydan bir kvalifikasiya kursları keçiriləcək, dünyanın qəbul etdiyi ən yüksək avadanlıqlarla işləyən peşəkarlar dəvət ediləcək ki, bizdəki texniki heyətə ustad dərsləri keçsinlər. Bu dərsləri mənimsəyənlər müvafiq sertifikatlar alacaqlar.

Kinoteatrlarda göstərilən əcnəbi filmlərin dublyaj keyfiyyəti məsələsi də önəm daşıyır, buna görə dublyaj studiyaları yaradılacaq, yüksək səviyyədə tərcümə mətnlərindən istifadə ediləcək.

Kinoteatrlarda Azərbaycan filmlərinin nümayişinə üstünlük veriləcək və bu filmlər üçün üstün prokat şərtləri müəyyənləşəcək. Bir sözlə, Azərbaycan kinosu reanimasiyadan çıxıb sağlam həyata qovuşacaq. 

“Ədəbiyyat və incəsənət”

(29.08.2023)

Avqustun 29-da Azərbaycan Respublikası Mədəniyyət Nazirliyi və Azərbaycan Ədəbiyyat Fondu “Ədəbiyyatın kinoya transferi” mövzusunda dinləmə keçirib. 

“Ədəbiyyat və incəsənət” portalı xəbər verir ki, Azərbaycan Yazıçılar Birliyinin Natəvan klubunda keçirilən tədbirin məqsədi keyfiyyətli filmlərin ərsəyə gətirilməsi üçün yazıçıların kino industriyasına daha yaxından cəlb edilməsidir. 

Mədəniyyət nazirinin müşaviri, Əməkdar incəsənət xadimi Orxan Fikrətoğlunun məruzəçisi olduğu tədbirdə Xalq şairi Sabir Rüstəmxanlı, Azərbaycan Ədəbiyyat Fondunun Baş direktoru Varis, Azərbaycan Yazıçılar Birliyinin katibləri İlqar Fəhmi, Elçin Hüseynbəyli, Xəyal Rza, birliyin dramaturgiya seksiyasının müdiri Firuz Mustafa, Azərbaycan Kino Agentliyinin şöbə müdiri Rəşad Qasımov, Ultra production şirkətinin rəhbəri Pərviz Məmmədov, rejissor Adil Azay, “Azərbaycan” jurnalının baş redaktoru İntiqam Qasımzadə, yazarlardan Yunus Oğuz, Yaşar, Adəm İsmayıl Bakuvi, Rüstəm Dastanoğlu, Kənan Hacı, Firudin Qurbansoy, Aysel Fikrət, gənc yazarlardan Fərid Hüseyn, Ülviyyə Heydərova, Habil Yaşar, Uraqan Abdullayev və digərləri iştirak ediblər. 

Öncə ədəbiyyatla kinonun vəhdətindən, yaxşı filmlərin çəkilməsi ilə yaxşı dramaturji materialın mövcud olması asılılığından bəhs edilib. Mədəniyyət naziri Adil Kərimlinin kinodakı durğunluğu aradan qaldırmaq üçün atdığı zəruri tədbirlərə diqqət çəkilib, kino industriyasının əvvəlki dönəmlərdə yazıçılar üçün bağlı olan qapılarının taybatay açıldığı bəyan edilib. 

Daha sonra Orxan Fikrətoğlu Mədəniyyət Nazirliyinin kino siyasətini tam olaraq tədbir işçilərinə açıqlayıb. 

Kino Agentliyinin yaradılması, Kino Forumunun keçirilməsi, filmlərin məhz ən yaxşılar tərəfindən çəkilməsi üçün ədaləti bərqərar etməklə müsabiqə elan edilməsi gözlə görünən əsas nəticələrdir. 

Yeni kino strategiyasının ilk bəhrəsi olan müsabiqə özündə filmlərin 5 xətt üzrə  maliyyələşəcəyini ehtiva edir:

-Dövlət sifarişi ilə çəkilən filmlər - ilk öncə milli-mənəvi və sənət dəyərlərinə xidmət edəcək filmlər;

-Kommersiya filmləri - daha çox gəlir əldə etməyə hesablanan, bir sözlə, “kassa filmləri”;

-Sənət filmləri (art-hauslar) –istedadlı rejissorlarımızın öz seçim və istəkləri ilə çəkdikləri, beynəlxalq kinofestivallarda təmsil olunacaq yüksək zövq filmləri;

-Debüt filmlər – gənc rejissorların debüt işləri;

-Tələbə filmləri - İncəsənət Universitetinin və digər kino təhsili verən ali məktəb tələbələrinin çəkdikləri filmlər.

Beləliklə, peşəkar və həvəskar hər bir kəs kino çəkmək şansı əldə edir. 

Nəzərə çatdırılıb ki, qısa müddətdə bu müsabiqənin elan edilməsi ilə yanaşı parçalanmış və iki kinematoqrafçılar ittifaqında cəmləşən kino cameəsi birləşdirilib, “Debüt studiyası” bərpa edilib,  mediasının maliyyələşdirilməsinə başlanılıb. 

Bu gün Mədəniyyət Nazirliyi ən əvvəl prodüsser mərkəzlərinin çoxalmasında və təkmilləşməsində maraqlıdır. İkinci - bazarın və rəqabətin yaranmasında maraqlıdır. Seleksiya yolu ilə tələbələr arasından, gənc istedadlar arasından yeni rejissorlar, ssenaristlər, operatorlar, aktyor və aktrisaların müəyyənləşdirilməsində maraqlıdır. Və bu sahələrdə artıq canlanma hiss edilməkdədir.

Ölkəmizdə kino festivallarının keçirilməsi ənənəvi hal alacaq. Beynəlxalq anima, doko və kiçikhəcmli filmlər festivallarını maliyyələşdirməklə mədəniyyət nazirliyi eyni zamanda ölkəmizə təşrif buyuran tanınmış əcnəbi kino mütəxəssilərini panel müzakirələrinə cəlb etmək, Azərbaycan kinosu barədə bilgiləri dövriyyəyə buraxmaq fikrindədir. Tədricən A kateqoriyalı festivallara çıxmaq, ölkədə kino pavilyonları tikmək məqsəd kimi götürülür.

Mədəniyyət Nazirliyi dünyaçaplı studiyaların gəlib Azərbaycanda filmlər çəkməsində maraqlıdır. Hətta onları maliyyələşdirməkdə də. Azərbaycan ərazisində film çəkən bütün xarici şirkətlərdən yalnız bir şey tələb olunacaq: 60-70 faiz yerli işçilərdən – azərbaycanlı mütəxəssilərdən istifadə etsinlər. Nəticədə yeni kadrlar hazırlanacaq, hazır kadrların isə kino təcrübəsi artacaq.

Yeni kadrların hazırlanması prosesində tələbələrin xaricdə təhsil almasına önəm veriləcək, ssenaristlərin təkmilləşdirilməsində xeyli işlər görüləcək. Animasiya Akademiyası açılacaq, milli animasiya filmlərinin çəkilməsi prioritet sayılacaq.

Kinoaktyor truppası bərpa ediləcək, texniki heyət üçün hər 6 aydan bir kvalifikasiya kursları keçiriləcək, dünyanın qəbul etdiyi ən yüksək avadanlıqlarla işləyən peşəkarlar dəvət ediləcək ki, bizdəki texniki heyətə ustad dərsləri keçsinlər. Bu dərsləri mənimsəyənlər müvafiq sertifikatlar alacaqlar.

Kinoteatrlarda göstərilən əcnəbi filmlərin dublyaj keyfiyyəti məsələsi də önəm daşıyır, buna görə dublyaj studiyaları yaradılacaq, yüksək səviyyədə tərcümə mətnlərindən istifadə ediləcək.

Kinoteatrlarda Azərbaycan filmlərinin nümayişinə üstünlük veriləcək və bu filmlər üçün üstün prokat şərtləri müəyyənləşəcək.

Diskussiya şəklində davam edən tədbir olduqca səmərəli keçib. 

“Ədəbiyyat və incəsənət”

(29.08.2023)

Azərbaycanın Qarabağ bölgəsinin mahir tar ifaçıları barədə belə bir deyim var, “o ifa edəndə tarına bülbül qonur”. Bax belə bir ifaçılardan biri də Xalq artisti, əfsanəvi tarzən Qurban Pirimovdur ki, bu gün onun anım günüdür.

“Ədəbiyyat və incəsənət” portalı xəbər verir ki, bu gün tanınmış tarzən Qurban Pirimovun vəfatından 58 il ötür.

Azərbaycan musiqisi tarixində özünəməxsus yeri olan Qurban Pirimov 1880-ci ilin oktyabr ayında Ağdamın Abdal Gülablı kəndində anadan olub. O, məşhur aşıq Valehin nəticəsidir. Q.Pirimov on beş yaşında ikən müəllimi, müasir Azərbaycan tarının yaradıcısı Sadıqcanın xeyir-duası ilə Qarabağ toylarında seçilən xanəndələri müşayiət edib. Belə toyların birində xanəndə İslam Abdullayev Qurbanın tarda ifasını bəyənib və onu özünə tarzən götürüb.

1905-ci il gənc tarzən üçün uğurlu olub. Belə ki, Gəncə toylarının birində Cabbar Qaryağdıoğlu onun ifasını bəyənib və İslam Abdullayevin razılığı ilə gənci özü ilə Bakıya gətirib. Məşhur xanəndələri müşayiət edən tarzən onların arasında ən çox Xan Şuşinskiyə bağlanır. 

Arxivlərə nəzər yetirəndə Şuşinskinin  xatirələrində onu belə yad etməsi diqqət çəkir:

“Qurban Pirimovu sonuncu dəfə 1965-ci il avqustun 10-da M.Maqomayev adına Azərbaycan Dövlət Filarmoniyasında çıxış edərkən görmüşəm. Konsertdə gənc ifaçılarla bərabər, 85 yaşlı qocaman tarzən də iştirak edirdi. O, "Rahab" ifa edirdi. Sənət yollarında saç ağartmış tarzən öz sədəfli tarını sinəsinə, barmaqlarını simlərə gənclik ehtirası ilə toxundurduqca tellərdən qopan xoş, ürək oxşayan səda dinləyicilərin ruhunu oxşayırdı. Tarzən "Rahab"ı 23 dəqiqə çaldı. Dinləyicilər hərarətli təbrik sədaları altında qocaman tarzəni üç dəfə səhnəyə dəvət etdilər”. 

Razılaşın ki, adətən qısa olan musiqi nömrələrinə alışmış dinləyici 23 dəqiqə bir ifanı nəfəs dərmədən dinləyirsə, bu çox şey deməkdir. 

Q.Pirimovu tanıyanlar onun həm də çox zarafatcıl bir insan olduğunu xatırlayırlar. Həmişə zarafatla tarzənlərə deyərmiş ki, birdən yolla gedəndə sizə daş atarlar, tez əllərinizi gizlədin. Bircə əllərinizi qoruyun. Qurban Pirimov haqlı idi. Bizləri heyrətə salan, möcüzələr yaradan məhz həmin əllər idi. Həmin əllərin sehrindən süzülən musiqi hər kəsin qəlbini fəth edə bilirdi.

Tarzənlər bu gün böyük sənətkarın yolunu davam etdirərək öz sələflərini unutmağa qoymurlar. Ancaq Qurban Pirimovun öz sözləri ilə desək, "öyrənmək ustad olmaqda ümdə şərtdir. Amma gərək hər bir ustadın öz barmaqları olsun".

Azərbaycan SSR xalq artisti fəxri adını ilk dəfə məhz məşhur tarzən Qurban Pirimov alıb. Tarzənin 1931-ci ildə aldığı fəxri ad Azərbaycan mədəniyyətində ilk idi. Həmin ildən sonra II Dünya Müharibəsi başlayana qədər bir neçə mədəniyyət xadimi bu mükafata sahibləndi: 1932-ci ildə Hüseynqulu Sarabski ilə Hacıağa Abbasov, 1933-cü ildə aktyor Mirzağa Əliyev Azərbaycan SSR xalq artisti adını qazandılar. 
Ümumiyyətlə, Azərbaycanda hər il əsasən, bir, maksimum isə, iki mədəniyyət xadiminə bu mükafat verilirdi. Ona görə də, 1934-cü ildə Şövkət Məmmədova, 1935-də Cabbar Qaryağdıoğlu, 1936-cı ildə Abbas Mirzə Şərifzadə və Mərziyyə Davudova, 1937-ci ildə isə böyük Üzeyir bəy Hacıbəyli Azərbaycan SSR xalq artistləri oldular. 

Ustad sənətkar Qurban Pirimov 1965-ci il avqustun 29-da Bakıda vəfat edib.

Ruhu şad olsun!

“Ədəbiyyat və incəsənət”

(29.08.2023)

Elman Eldaroğlu, “Ədəbiyyat və incəsənət”

Haqqında söhbət açmaq istədiyim Yadigar Məmmədli Bakı Dövlət Universitetinin Jurnalistika fakültəsini bitirəndə 22 yaşında idi. Gənc jurnalist kimi, əmək fəaliyyətinə Sumqayıt “Kimyasənaye” İstehsalat Birliyinin radio verilişləri redaksiyasının redktoru kimi başlayıb. Və qırx ilə yaxın mətbuatda çalışıb. Azərbaycanda mətbuatın inkişafında rolu var, özünəməxsus iz buraxıb. Xidməti dövlətimiz tərəfindən mükafatlandırılıb, “Tərəqqi” medalına layiq görülüb. Hazırda Bakı Beynəlxalq Multikulturalizm Mərkəzinin şöbə müdiri vəzifəsində çalışır...

Deyir ki,- "Mən jurnalist kimi fəaliyyətə başladığım illərdə meydan hərəkatı var idi. Bu yolda hər kəs öz qabiliyyətini ortaya qoymağa çalışırdı. Vətən sevgisi, milli kimlik, müstəqillik məsələləri çox önəmli idi. Həmin dövdrə bəzi insanlar öz peşəsindən uzaqlaşıb siyasətçi oldular. Zorən siyasətçi. Çox şükür ki, mən siyasətçi kimi yox, öz peşəmlə tanındım, jurnalist kimi fəaliyyətimi davam etdirdim. Nə etdimsə, jurnalist kimi etdim. Cəmiyyətdəki mövqeyimi, insanların mənə qarşı müsbət fikirlərini məhz jurnalist kimi qazanmışam. Düşünürəm ki, bəlkə başqa sahədə olsaydım, bu qədər tanınmazdım. Jurnalistika mənə çox şey verdi. Təbii ki, mən də jurnalistikada müəyyən işlər görməyə çalışdım, bunun üçün mücadilə apardım. Ortada görülən işlər var. Düzdür, fəaliyyət göstərdiyim jurnalistika sahəsində də bir çox problemlərlə, çətinliklərlə qarşılaşmışam. Həbs olunmuşam. Amma heç zaman usanmamışam, məqsədimdən, düz yolumdan dönməmişəm. Jurnalist kimi fəaliyyətimi davam etdirmişəm, gördüyüm işlər və nailiyyətlərimlə fəxr edirəm..."

Jurnalist işlədiyi müddətdə başına maraqlı hadisələr çox gəlib. 90-cı illərdə həbsdən yenicə azad olunanda, bir gün işlədiyi redaksiyada ona deyirlər ki, səni İngiltərə səfirliyinə vacib bir iş üçün çağırırlar. Əvvəlcə elə düşünüb ki, onunla zarafat edirlər. Növbəti dəfə zəng gələndən, səfirliyin nümayəndəsi ilə danışandan sonra inanıb ki, həqiqətən də onu İspaniyanın ölkəmizdəki səfiri iqamətgahına dəvət edir. O vaxt İspaniya ilə diplomatik əlaqələrimiz İngiltərə səfirliyi vasitəsilə həyata keçirilirdi. Səfir bildirib ki, İspaniya vətəndaşı olan bir azərbaycanlı ona məktub yazıb. Soyadı Yadigarovdur. Məktubda yazılmışdı: "Bəlkə də biz qohumuq. Mən sənin həbs olunmağından çox pis olmuşam. Səni İspaniyaya dəvət edirəm". O da birtəhər səfiri başa salıb ki, soyadı yox, adı Yadigardır...

“Mən öz missiyamı həyata keçirmək üçün uzun bir yol keçmişəm. Bundan sonra qarşıya qoyduğum hədəflərim bu günədək gəldiyim yolun davamıdır. Yarımçıq qalan işlərimi tamamlamaq istəyirəm. Jurnalistika sahəsi ilə bağlı arzularım çoxdur. İstəyirəm ki, ölkədə aparılan köklü islahatlar kimi, media sahəsində mövcud olan problemlər də tədricən həllini tapsın, aradan qalxsın. Jurnalistikadakı peşəkar insanlara geniş imkanlar yaradılsın."- söyləyir...

Sevincli günlərilə yanaşı dərdli, qəmli, günləri də olub. Heç zaman sınmayıb, müvazinətini itirməyib. Əksinə, taleyi ona müqavimət göstərdikcə bərkiyib, polad kimi sərt olub...

Deyir ki,- “Mən atamı erkən gəncliyimdən itirmişəm. O, 56 yaşında dünyasını dəyişib. Mən o zaman elə fikriləşirdim ki, atam qocalıqdan rəhmətə gedib. Görüntüsü elə idi. Amma indi özüm ondan daha yaşlıyam və baxıb görürəm ki, o, çox erkən dünyasını dəyişib. Atamdan sonra ən böyük itkim kiçik qardaşımın 30 yaşında yol qəzasında həlak olması oldu. Qardaşım Qamət hərbçi idi. Akademiyanı bitirdikdən sonra ön cəbhədə zabit kimi xidmət edib. Çox çətinliklərdən, ağır vəziyyətlərdən çıxıb. Təəssüf ki, adi bir yol-nəqliyyat hadisəsindən dünyasını dəyişdi. Onun ölümü taleyin bir istehzası idi elə bil, uzun illər düşmənlə üz-üzə qalıb sağ çıxasan, burnun da qanamaya, amma adi qəzada avtomobildəki 4 nəfərdən hamı sağ qala, sən isə öləsən...

Bəli, ötən 61 ilim kəşməkeşli olub. Narahat, amma mənalı ömür yaşamışam. Təskinliyim də ondadır ki, bu həyatı mən özüm seçmişəm, buna düçar olmamışam. Gileyli də deyiləm. Milli hərəkata gizli dövrlərindən, gənc yaşlarımdan qoşulmuşam. 1980-ci ildən isə jurnalist olaraq ardıcıl fəaliyyət göstərmişəm. Sovet dövründə, hər şeyin qadağan olunduğu bir dövrdə mən evimdə "samizdat" qəzet çıxarmışam. Sonra qəzet redaktoru olaraq fəaliyyətimi davam etdirmişəm. "Cümhuriyyət" qəzetinin baş redaktoru olmuşam. Uzun müddət AXC İnformasiya Mərkəzinin direktoru vəzifəsində işləmişəm. Bu illərdə mənim fəaliyyətim sırf jurnalistika ilə bağlı olub. Bu da məni çox sevindirir, daim öz peşəmlə cəmiyyətə töhfə verməyə çalışmışam. Nə dərəcədə bu işin öhdəsindən gəlmişəm, alınıb, ya alınmayıb, bunu artıq ətrafımda, hadisələrə şahidlik edən insanlar deyə bilərlər..."

Sadə, təvazökar, zəhmətkeş insandır. Aydın, işıqlı keçmişi var. Davranışında təbiidir. Necə deyərlər, sevinəndə də, kədərlənəndə də ürəkdən sevinib, ürəkdən kədərlənir. Hələ də saflığını qoruyub saxlaya bilir...

Bu gün- avqustun 29-u Yadigar Məmmədlinin növbəti ad günüdür, 62 yaşı tamam olur. Onu bu münasibətlə təbrik edir, möhkəm cansağlığı, firəvan həyat arzulayırıq.

Yeni yaşınız mübarək, Yadigar bəy!

“Ədəbiyyat və incəsənət”

(29.08.2023)