Super User
Nəyə görə futbol ədəbiyyatdan daha üstündür?
Uraqan Abdullayev, “Ədəbiyyat və incəsənət”
"Prime"(ən parlaq) dönəmini bitirən bütün məşhur futbolçular yaşlandıqca Ərəbistan liqasına axın edirlər. Həm də 100, 200 və ya 300 milyon dollar kimi fantastik qiymətə transfer olurlar. Məntiqlə düşündüyün zaman top qovalayan bir insanın futbol oynamasına görə 300 milyon kimi fantastik məbləğlər xərclənməsi hansı dərəcədə ədalətlidir? Bu pulları kasıblar və ya Afrikada susuzsuzdan əziyyət çəkən insanlar üçün xərclənsəydi daha ədalətli olmazdımı?
Amma bu gün mövzumuz bu deyil. Nəyə görə yaxşı futbolçular milyon dollarlar qazanarkən yaxşı yazıçıların böyük bir qismi bu dünyadan səfalət içində ayrılırlar? Həqiqətən futbol incəsənətdən daha üstün sayılmalıdır, yoxsa bir futbolçu yaradıcı insandan daha yuxarda hesab edilir?
Reallıq budur ki, idmançılar hər daim üzərlərində disiplinlə çalışıb özlərini inkişaf etdirdikcə yaradıcı insan öz eqoizminə bürünərək özünü hamıdan daha dərində olduğunu zənn edir. Təbii ki, futbol konktet idman növü olduğu üçün, bəlli qaydalar və şərtlər əsasında oynanıldığı üçün oyunçunun göstəricilərini qiymətlərdirmək olur. Ədəbiyyatda isə 32 hərflə sonsuz sayda dünyalar qurub bütün sərhədləri aşmaq mümkündür. Bəlkə də bu yaradıcılıq iddiası bir yazıçını zaman keçdikcə daha da paslandırır.
Bir yazıçı 4-5 il oxuyub təhsil aldıqdan sonra dünyanın bütün elmlərinə vaqif olduğunu zənn etdiyi halda bir idmançı həftədə 6 dəfə komanda ilə birlikdə məşq edir, daima öz bacarıqlarını inkişaf etdirmək üçün öz üzərində çalışır. Çünki rəqabətdə olduğu şəxsləri görərkən, kimsə onun sütətini keçsə bunun fərqinə vara bilir. Buna görə futbol inkişaf etdikcə edir, yaxşı futbolçunun maaşı isə gün keçdikcə artmağa davam edir.
Yazıçı isə çox gözəl bir əsər ortaya qoyduqdan sonra özünü dünyanın ən dahi şəxsi hesab edir, düşünür ki, bəsirət gözü açılıb və istədiyi hər şeyi istədiyi hər zaman yaza bilər. Buna görə də tükəndiyinin fərqinə varmır, yaradıcılığa olan hərisliyi o qədər güclənir ki, daxilində bir rahatlıq hissi yaranır. O qədər rahat olur, gözləri o qədər tutulur ki, ondan daha yaxşı yazan yeni yazıçıları görmək bacarıqlarını itirir. Tükəndiyinin fərqinə varmadan yaddaşlardan yox olub gedir.
Sonra başlayır günahkar axtarmağa bəhanələr uydurmağa ki, "futbol bəsit insanların işidir", "insanlar məni anlamır və ya qısqanır deyə bəyənmir" və ya "kitabları hər adam başa düşmür" deməyə.
Su axmayanda bulandığı kimi disiplin də olmadığı zaman insanı çürüdür. Təbii ki, yalnız başına disiplinlə çalışmaq da mümkündür. Lakin komanda şəklində çalışmaqda birliyin tərkibində ikən sağlam rəqabətin gücünü gördüyün zaman insan gücləndikcə güclənmək istəyir.
Bəlkə də bir olmağımızı istəmirlər, çünki inkişaf etmək onların işinə gəlmir. Çünki tükəndiklərinin fərqinə varsalar sağlam rəqabətdə ən arxada qaldıqlarını hiss edə biləcəklər.
“Ədəbiyyat və incəsənət”
(29.08.2023)
"Mədəniyyət/Culture" jurnalının yeni nömrəsi işıq üzü görüb
Jurnal “Qarabağ Azərbaycandır” rubrikasında “Ədalət naminə. Milli iradəmizin zəfər çaldığı gün” və 1918-ci il Quba soyqırımı haqqında məqalələrlə açılır.
“İstedad sorağında” elan-məqaləsi Uşaq İncəsənət Festivalı haqqında məlumatı ehtiva edir.
Görkəmli tədqiqatçı, filologiya üzrə fəlsəfə doktoru Akif Azalpın böyük maraqla qarşılanan “Maddeyi-tarixlər müjdəsi (Yaxud Dədə Qorqudun doğum ili öz dilindən)” yazısı müəllifin “Kəsişən əbcədlər” kəşfinin daha bir uğuru sayıla bilər.
“Ədəbi vicdanın zühuru, əbədi ləyaqətin himni” yazısında görkəmli Xalq şairimiz Cabir Novruz anılır.
“Musiqi” bölümündə “Tədqiqatçı “Qara Kürd” zərb-muğamına yeni həyat verdi” yazısı musiqi tədqiqatçısı Rauf Bəhmənlinin kitabı haqqında geniş məlumatdır.
“Aşiq oldum sehr simli rübabə” yazısı görkəmli xanəndə Rübabə Muradovanın 90 illik yubileyindən gəzişmələrdir.
Birinci Bakı Müasir Musiqi Günləri Festivalı haqqında geniş yazı musiqisevərləri tədbirin gedişi ilə yaxından tanış edir.
İki mühüm tədbir – mədəniyyət Nazirliyinin keçirdiyi Teatr və Kino forumları haqqında yazını bu forumların müfəssəl təhlili hesab etmək olar.
“Rəngkarlıq” bölməsi “Xalq rəssamı Arif Hüseynovun yaradıcılığına qısa səyahət”lə açılıb, “Kətanda bərq vuran günəş işığı” ilə davam edir.
“Anım” bölümündə Mədəniyyət Nazirliyinin əməkdaşı Günay Sabir qızı Əliyevanın işıqlı xatirəsi yad edilir.
“Portret” guşəsində “Azərbaycan kulturologiya elmində tanınmış sima” adlı yazı ilə professor Mübariz Süleymanlının 60, “Hamıya gərəkli insan” oçerki ilə görkəmli bərpaçı memar Tofiq Şəkixanovun 80 illik yubileyləri qeyd olunur.
“Bizə yazırlar” rubrikası “Gələcəyə istiqamət keçmişə nəzərdən başlanır”, “Ədəbiyyatımızın, mədəniyyətimizin təbliğatçısı” və “Memorial komplekslər nə üçün lazımdır” yazıları ilə diqqəti cəlb edir.
Jurnalın “Mədəni irsimiz” qismi istedadlı sənətkar, daş üzərində oyma rəssamı Ədalət Elmanın yaradıcılığından bəhs edən “Daşlar üzərində möcüzə” adlı yazı ilə təmsil olunub.
“Elm” bölməsi yenə də tədqiqatçı və alimlərin elmi axtarışlarının nəticələri ilə zəngindir.
“Ədəbiyyat və incəsənət”
(29.08.2023)
Bu gün Mədəniyyət Nazirliyi və Ədəbiyyat Fondu birgə layihə təqdim edəcəklər
Azərbaycan Respublikası Mədəniyyət Nazirliyi və Azərbaycan Yazıçılar Birliyi Ədəbiyyat Fondu bu gün - avqustun 29-da, saat 15.00-də AYB-nin Natəvan klubunda “Ədəbiyyatın kinoya transferi” mövzusunda dinləmə keçirəcək.
“Ədəbiyyat və incəsənət” portalı xəbər verir ki, məqsəd keyfiyyətli filmlərin ərsəyə gətirilməsi üçün yazıçıların kino industriyasına daha yaxından cəlb edilməsidir. Bu, həm də yazıçıların maddi durumlarının yaxşılaşmasına xidmət edəcək bir layihədir.
Tədbiri Ədəbiyyat Fondunun Baş direktoru Varis aparacaq. Məruzəçi mədəniyyət nazirinin müşaviri, Əməkdar incəsənət xadimi Orxan Fikrətoğlu olacaq.
Görüşə həm kino sahəsində öz sözünü demiş ssenaristlər, həm də bu sahəyə marağı olan yazıçılar, xüsusən gənc yazıçılar dəvət olunur.
Bildiyiniz kimi, Mədəniyyət naziri Adil Kərimli reanimasiyada olan Azərbaycan kinosunu xilas etmək missiyasına start verib.
Uğurlu olsun!
“Ədəbiyyat və incəsənət”
(29.08.2023)
Tovuzda Ustad aşıqların yubileyləri qeyd olunub
Tovuz Rayon İcra Hakimiyyəti, Qazax-Tovuz Regional Mədəniyyət İdarəsi, Azərbaycan Aşıqlar Birliyi və Tovuz Xeyriyyə Cəmiyyətinin təşkilatçılığı ilə ustad aşıqlar Əkbər Cəfərovun 90, Əlixan Niftəliyevin isə 80 illiyinə həsr olunmuş “Sənətə bağlı ömür” adlı yubiley tədbiri keçirilib.
“Ədəbiyyat və incəsənət”AzərTAC-a istinadən xəbər verir ki, Tovuz rayon Nizami adına mədəniyyət evində reallaşan tədbirdə görkəmli folklorşünas alim, Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı hər iki ustadın bənzərsiz sənətkarlıq xüsusiyyətlərindən söz açıb. O deyib: “Bu gün unudulmaz tarixi bir gündür. Bugünkü tədbirin təqdimatı da qeyri-adidir. Əməkdar mədəniyyət işçiləri Ə.Cəfərov və Ə.Niftəliyevin yubileyi bərabər qeyd olunur. Bu iki böyük sənətkar Azərbaycan aşıq sənətini təkcə Tovuz və ölkəmiz miqyasında deyil, bütövlükdə Türk dünyasında, beynəlxalq miqyasda çox ləyaqətlə təmsil ediblər. Əkbər Cəfərov böyük bir ənənənin içərisindən gəlirdi. O, Mirzə Bayramov və Əsəd Rzayev kimi böyük ustadların sənət ənənəsini davam etdirib. Eləcə də Əlixan Niftəliyev də Azərbaycan aşıqlığını hər yerdə ləyaqətlə təmsil edib”.
Tovuz Rayon İcra Hakimiyyətinin başçısı Məmməd Məmmədov son zamanlar ölkəmizdə aşıq sənətinə göstərilən qayğı və diqqətdən danışaraq, aşıq sənətinin milli mədəniyyətimizin incisi olduğunu qeyd edib. “Bu il anadan olmasının 100 illiyini qeyd etdiyimiz Ümummilli Lider Heydər Əliyev hakimiyyətdə olduğu bütün dövrlərdə milli-mənəvi dəyərlərimizin qorunmasına, o cümlədən aşıq sənətinə xüsusi diqqət yetirib. Heydər Əliyevin təməlini qoyduğu siyasət Prezident İlham Əliyev tərəfindən layiqincə davam etdirilir. 2019-cu ildə möhtərəm Prezidentimiz rayonumuzda aşıq sənəti muzeyinin tikintisi barədə Sərəncam imzalamış, 2020-ci ildə isə rayona səfəri çərçivəsində ölkəmizdə ilk və yeganə olan bu muzeyin açılışını etmişdir. Eyni zamanda aşıq Əkbərin yaratmış olduğu böyük ifaçılıq məktəbi xüsusilə qeyd olunmalıdır. Bu məktəbdən bəhrələnənlərin miqyası çox-çox uzaqlara şaxələnib. Onlar bilavasitə aşıq Əkbərdən dərs almasalar da, böyük ustadın sənəti onlarla gənclərə sirayət edib. İndi də Əkbər yolu gedənlərin, onun sənətinə tapınanların sayı heç də az deyil. Bununla belə, aşığın ustadlıq statusu həm də onun bilavasitə yetirmələri ilə ölçülüb. Aşıq Əkbər ustadlar yetirən ustad idi. Onlardan biri də 80 illik yubileyini qeyd etdiyimiz aşıq Əlixan Niftəliyevdir”, - deyə M.Məmmədov vurğulayıb.
Daha sonra Milli Məclisin deputatı Arzu Nağıyev, Əməkdar elm xadimi, professor Qəzənfər Paşayev, həmçinin Tovuz Xeyriyyə Cəmiyyətinin sədri Musa Süleymanov və digər tədbir iştirakçıları çıxış edərək saz-söz sənətkarları Ə.Cəfərov və Ə.Niftəliyevin Azərbaycan aşıq sənətinə verdikləri töhfələrdən danışıblar.
Böyük maraqla qarşılanan yubiley tədbiri aşıqların ifaları ilə davam edib.
Sonda rəssam Fərman Hüseynov aşıq Əkbər Cəfərovun portretini onun ailəsinə hədiyyə edib. Aşıqların ailə üzvləri aşıq sənətinə, mədəniyyətə, xalq yaradıcılığına və folklora verilən yüksək qiymətə görə ölkə Prezidentinə və Birinci vitse-prezident Mehriban xanım Əliyevaya dərin minnətdarlıqlarını bildiriblər.
“Ədəbiyyat və incəsənət”
(29.08.2023)
Vaqif Mustafayev 2-ci dərəcəli “Əmək” ordeni ilə təltif edildi
Azərbaycan mədəniyyətinin inkişafında uzunmüddətli səmərəli fəaliyyətinə görə Vaqif Behbud oğlu Mustafayev 2-ci dərəcəli “Əmək” ordeni ilə təltif edilib.
Prezident İlham Əliyev bununla əlaqədar olaraq avqustun 28-də Sərəncam imzalayıb.
“Ədəbiyyat və incəsənət”
(29.08.2023)
Azərbaycan Həştərxanda keçirilən beynəlxalq festivalda uğurla təmsil olunub
Mədəniyyət Nazirliyinin dəstəyi ilə Həştərxan vilayətində tarzən Arslan Növrəsli və onun “Ethno-jazz” qrupu “Kaspiyskie sezonı” adlı klassik incəsənət üzrə beynəlxalq festival çərçivəsində keçirilən “Azərbaycan günü”ndə ölkəmizi uğurla təmsil ediblər.
AzərTAC xəbər verir ki, festival Xəzəryanı dövlətlər arasında humanitar sahədə mədəni dialoq və əməkdaşlığın inkişafı üçün səmərəli layihəyə çevrilmək məqsədi daşıyır.
Azərbaycan çağdaş tar ifaçılıq sənətinin təmsilçisi Arslan Növrəsli və onun “Ethno–jazz” qrupunun (tarda Arslan Növrəsli, pianoda Nicat Aslanov, bas gitarada Səlim Məmmədov, zərb alətlərində Həsən Bilalov) Həştərxan Dövlət Filarmoniyasında keçirilən konserti böyük maraqla qarşılanıb. Repertuara daxil edilən nömrələr həm klassik caz standartları, həmçinin Azərbaycan bəstəkarlarının əsərlərinin mövzuları əsasında yazılmış kompozisiyalardan ibarət olub.
Qeyd edək ki, gecənin xüsusi ifası “Ay Laçın” xalq mahnısı ölkəmizin işğaldan azad edilmiş əraziləri üzrə şəhər günlərinin təsis edilməsi haqqında Azərbaycan Respublikası Prezidentinin Sərəncamına əsasən 26 avqust “Laçın Şəhəri Günü” kimi qeyd olunması ilə əlaqədar repertuara daxil edilib.
“Ədəbiyyat və incəsənət”
(28.08.2023)
Bakıda “Koreya serialları dünyası” təqdim olundu
Gözlənilən şou baş tutdu. Heydər Əliyev Sarayında “BN Team Orchestra” simfonik orkestri “Koreya serialları dünyası” adlı konsert proqramı ilə çıxış etdi.
Konsertdə orkestrin ifasında "Boys Over Flowers," "All In", "Scarlet Heart: Ryeo", "Full House" və s. kimi məşhur seriallardan musiqilər səsləndirildi.
Qeyd edək ki, tamaşaçılar konsertdə xor, solistlər və böyük ekranda nümayiş etdirilən ekran görüntülərinin müşayiəti ilə sevimli seriallardan ən gözəl parçaları izləmək imkanı əldə etmişdilər.
“Ədəbiyyat və incəsənət”
(28.08.2023)
“Azərkitab”ın qurucusu vəfat edib
Dərin hüznlə bildiririk ki “Azərkitab Kitab Mərkəzi”nin layihə rəhbəri Mirisrafil Sabir Həsənov 27 avqust 2023-cü il tarixində vəfat etmişdir. Mərhum ata yurdu Biləsuvar rayonu Ağalıkənd kəndinə dəfn olunmuşdur, 3 məclisi də orada keçiriləcəkdir.
Mərhumun 7 və 40 məclisləri Bakı şəhərində təşkil olunacaq, yeri və vaxtı barədə ailəsi məlumat verəcəkdir.
“Ədəbiyyat və incəsənət” portalı xəbər verir ki, Mirisrafil Həsənov bütün ömrünü Azərbaycanda kitabın təbliğatı işinə həsr etmiş, bu yolda “Azərkitab” brendini yaradaraq böyük nəticələr ortaya qoymuşdu. O, insanlarda kitab sevgisi oyatmaq üçün mütəmadi olaraq məktəblərə kitab hədiyyələri, kitabların endirimli qiyməylərlə satışı aksiyalarını həyata keçirirdi.
Son illər qaraciyər serrozundan əziyyət çəkirdi. Xəstəlik xərçəng mərhələsinə keçdikdən sonra vəfat etdi.
Allah rəhmət eləsin!
“Ədəbiyyat və incəsənət”
(28.08.2023)
Paytaxt və region teatrlarının nəzdində teatr-studiyaları yaradılır
Prezident İlham Əliyevin “Azərbaycan peşəkar milli teatrının 150 illik yubileyinin qeyd edilməsi haqqında” Sərəncamının icrası ilə əlaqədar Gəncə Dövlət Dram Teatrı, Şəki Dövlət Dram Teatrı, Lənkəran Dövlət Dram Teatrı, Naxçıvan Dövlət Milli Dram Teatrı və Naxçıvan Dövlət Kukla Teatrlarında kadr problemini aradan qaldırmaq məqsədilə həmin teatrların nəzdində teatr-studiyaları yaradılıb.
Bu barədə “Ədəbiyyat və incəsənət” Mədəniyyət Nazirliyinə istinadən məlumat verir.
Məlunatda qeyd edilir ki, hazırda Azərbaycan Dövlət Akademik Rus Dram Teatrının nəzdində “Mən aktyoram”, Azərbaycan Dövlət Kukla Teatrının nəzdində isə “Oyuq” teatr-studiyası fəaliyyət göstərir.
Xatırladaq ki, bu ilin aprel ayının 11-12-də Ümummilli Lider Heydər Əliyevin 100 illik yubileyi çərçivəsində Azərbaycan peşəkar milli teatrının 150 illiyi ilə əlaqədar ilk Teatr Forumu keçirilib. Forumda teatr sahəsinin inkişaf perspektivləri ilə bağlı bir çox məsələlər, o cümlədən region teatrlarının mövcud problemləri də müzakirə edilib. Regiondan paytaxta gəlib təhsil alan rejissor və aktyorların sonradan peşəkar kadr kimi regionlara geri dönməməsi və bunun nəticəsində də yerli teatrlarda yaranan kadr çatışmazlığı probleminin həlli istiqamətində müxtəlif təkliflər irəli sürülüb. Bu işdə respublikamızın akademik və aparıcı teatrlarının təcrübəsindən istifadə edərək müxtəlif bölgələri və fərqli sosial təbəqələri təmsil edən əhalinin teatr sənəti ilə bağlı tələbatlarının eyni səviyyədə ödənilməsi üçün əlverişli şəraitin yaradılması nəzərdə tutulub. Ümumiyyətlə, bu an regionlarda bölgə teatrlarının inkişafına da xüsusi diqqət yetirilir, teatrın nüfuzunun və tamaşaçı marağının artırılması istiqamətində Mədəniyyət Nazirliyi tərəfindən məqsədyönlü işlər aparılır.
“Ədəbiyyat və incəsənət”
(28.08.2023)
Kukla Teatrı Laçında “Məlikməmməd” tamaşası ilə çıxış edib
Laçında reallaşan “Şəhər Günü” tədbirləri çərçivəsində mənzərəli terrasda A. Şaiq adına Azərbaycan Dövlət Kukla Teatrının təqdimatında “Məlikməmməd” tamaşası nümayiş olunub.
Bu barədə Mədəniyyət Nazirliyi məlumat yayıb.
Qeyd edilib ki, quruluşçu rejissoru Anar Məmmədov, quruluşçu rəssamı İqbal Əliyev olan səhnə əsərində rolları İqbal Əliyev, Aygül Ağayeva, Elnur Xəlilov və Elgün Həmidov ifa ediblər.
“Ədəbiyyat və incəsənət”
(28.08.2023)
