Super User
Təsviri sənət istiqamətini seçən abituriyentlər “İmtahana buraxılış vərəqəsi”ni çap edə bilərlər
Azərbaycan Dövlət Rəssamlıq Akademiyasında 10, 11 və 12-ci komissiyalara aid rəsm fənni üzrə keçirilmiş qabiliyyət imtahanından müvəffəq qiymət almış abituriyentlər rəngkarlıq (10 və 11-ci komissiya) və yapma (12-ci komissiya) imtahanında iştirak etmək üçün “İmtahana buraxılış vərəqəsi”ni çap edə bilərlər.
Bu barədə Dövlət İmtahan Mərkəzi (DİM) məlumat yayıb. Bildirilib ki, təsviri incəsənət müəllimliyi (13-cü komissiya) və 9 illik təhsil bazasında 211-ci komissiya üzrə qeydiyyatdan keçmiş abituriyentlərin də “İmtahana buraxılış vərəqəsi” qeydiyyatdan keçdikləri səhifələrində yerləşdirilib.
Qabiliyyət imtahanlarının qrafiki ilə DİM-in saytında tanış olmaq mümkündür.
“Ədəbiyyat və incəsənət”
(17.07.2023)
Mədəniyyət məktəbləri və mərkəzlərinə işə qəbul üzrə imtahan keçirilib
Dövlət İmtahan Mərkəzi (DİM) Mədəniyyət Nazirliyi ilə birgə uşaq musiqi, incəsənət, rəssamlıq, muğam, aşıq məktəb və mərkəzlərinə direktorların, direktor müavinləri və müəllimlərin işə qəbulu üzrə test imtahanı keçirib.
“Ədəbiyyat və incəsənət” portalı DİM-ə istinadən xəbər verir ki, imtahan müddəti direktor və direktor müavinlərinin işə qəbulu imtahanında 3 saat, müəllimlərin işə qəbulu imtahanında isə 2 saat olub.
Direktor və direktor müavinlərinin imtahanında namizədlərə 100, müəllimlərin imtahanında isə 70 test tapşırığı təqdim olunub. Hər düzgün cavab bir balla qiymətləndirilib. Səhv cavablar ümumi nəticəyə təsir göstərməyib.
İmtahan kağız daşıyıcılar vasitəsilə Bakı şəhərində 5 binada təşkil olunub. İmtahanda iştirak etmək üçün 1134 namizəd (86 nəfər direktor, direktor müavini, 1048 nəfər isə müəllim vəzifəsinə işə qəbul) qeydiyyatdan keçib. İmtahanın keçirilməsi üçün 5 ümumi imtahan rəhbəri, 14 imtahan rəhbəri, 106 nəzarətçi müəllim, 14 buraxılış rejimi əməkdaşı ayrılıb. İmtahanda 7 nəfər fiziki məhdudiyyətli (I qrup gözdən əlil) namizəd də iştirak edib. Bu namizədlərin rahat şəkildə imtahan verməsi üçün zallar ayrılıb, gözdən əlillər üçün tapşırıqların oxunması, cavab kartının doldurulması və s. işlər üçün fərdi nəzarətçilər təyin edilib.
İmtahan nəticələrinin yaxın 2-3 gün ərzində elan olunması nəzərdə tutulur.
İmtahanlar haqqında ümumi məlumat və müsabiqə şərtləri ilə DİM-in saytında tanış olmaq olar.
“Ədəbiyyat və incəsənət”
(17.07.2023)
Tanış olun: Gənc rəssam Aysu Abdullayeva
“Ədəbiyyat və incəsənət” portalının əməkdaşı Habil Yaşarın yeni rubrikası təqdim edilir. O, bu dəfə incəsənət sahəsində bir sıra uğurlara imza atmış gənc istedadlarla sizləri tanış edəcək.
Aysu Abdullayeva Abdulla qızı 2009-cu ildə Bakı şəhərində anadan olmuşdur. Sabunçu rayonu Xavər Vəliyev adına 75 saylı tam orta məktəbin 9 b sinif şagirdidir. Bununla yanaşı Xəzər rayonunda yerləṣən 4 nömrəli uşaq incəsənət məktəbinin Rəssamlıq bölməsinin 4-cü sinfində təhsil alır. Müəllimləri Əməkdar incəsənət xadimi Rafael Muradov ve Fərqanə Muradlıdır.
5 yaşından Rəssamlıqla məşğuldur. Dəfələrlə Respublika Rəsm sərgi və müsabiqələrində iştirak etmiş və 1, 2, 3-cü yerlərə layiq görülmüşdür. O, həmçinin Azərbaycanı beynəlxalq sərgilərdə təmsil edərək diplom və sertifikat qazanmışdır.
“Ədəbiyyat və incəsənət”
(17.07.2023)
Uşaqlar üçün yeni nağıl kitabı
Uşaq yazıçısı Mehriban Nağıyevanın yeni kitabı çap olunub.
“İncinin nağıl dünyası” adlı kitabda kiçik yaşlı oxucular üçün bir-birindən maraqlı nağıllar yer alıb.
Kitabdakı şəkillərin müəllifi rəssam İnci Mirzəyevadır. İnci Nizami Gəncəvi adına Xankəndi şəhər 4 nömrəli məktəbin 3-cü sinif şagirdidir.
Kitabda “Dastana dönən Xudayar”, “Ana südü”, “Xeyirxah kirpi”, “Yatmağı sevməyən ayı balası”, “Mahnı oxuyan toyuq”, “Sevimli Bobi”, “Dəcəl dovşan”, “Xeyirxah su damlası”, “Diş həkimi” və “Fəridənin yalanı” nağılları yer alıb.
“Ədəbiyyat və incəsənət”
(17.07.2023)
Tarixi abidəyə edilən müdaxilənin qarşısı alınıb
Yasamal rayonu, Tolstoy küçəsi 131 ünvanında yerləşən 3753 inventar nömrəli yerli əhəmiyyətli memarlıq abidəsinə müdaxilə olunduğu aşkar edilib.
Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Bakı Regional idarəsinin əməkdaşları tərəfindən abidəyə baxış keçirilən zaman aşkar olunan müdaxilə faktının qarşısı dərhal alınıb. Abidənin fasadına vurulan rəng təmizlənib, əlavə qurğular sökülüb, tarixi tikili ilkin görkəminə qaytarılıb.
Bu barədə “Ədəbiyyat və incəsənət” portalı Mədəniyyət Nazirliyinə istinadən məlumat verir.
Diqqətə çatdırılıb ki, abidələrin üzərində bərpa, konservasiya, təmir, rekonstruksiya, regenerasiya və digər işlər onların layihələri Azərbaycan Milli Elmlər Akademiyasının müvafiq institutlarının rəyi nəzərə alınmaqla, Mədəniyyət Nazirliyi tərəfindən təsdiq edildikdən sonra aparılmalıdır. Əks halda aparılan hər hansı təmir-bərpa işləri tarixi abidəyə müdaxilə kimi qiymətləndirilir və abidələrin qorunması haqqında Azərbaycan Respublikası qanunvericiliyinin pozulması Azərbaycan Respublikasının qanunvericiliyinə uyğun olaraq cinayət, inzibati, intizam və mülki məsuliyyət yaradır.
Faktla bağlı qanuna müvafiq tədbirlər görülməkdədir.
“Ədəbiyyat və incəsənət”
(17.07.2023)
Azərbaycan Kinematoqrafçılar İttifaqının “KinoLab” layihəsinin qalibi bəlli olub
Azərbaycan Kinematoqrafçılar İttifaqının (AKİ) növbəti “KinoLab” layihəsinin pitçinq mərhələsi başa çatıb.
AKİ-dən AzərTAC-a verilən məlumata görə, builki layihədə 8 gənc rejissor öz film layihələri ilə iştirak ediblər. İttifaqın layihələrində iştirak etmiş gənc rejissor Murad Allahverdi özünün “Kür” sənədli film layihəsi ilə builki proqramın münsif heyəti tərəfindən qalib seçilib.
“KinoLab” layihəsində sənədli filmə yeni başlayanlar və ya film ideyası olanlar, bu layihəni necə reallaşdırmaq və gələcəkdə necə maliyyələşdirmək proseslərindən hali olmaq istəyən gənc rejissorlar üçün yaradılan kino emalatxanasının kursunda iştirak etmək ödənişsizdir. Bundan başqa, seçilən hər bir iştirakçıya sonda öz yeni və ya ilk film tizerini çəkmək üçün mümkün bütün mentorluq proqramı təşkil edilir.
Qeyd edək ki, Murad Allahverdi eyni zamanda Azərbaycan Kinematoqrafçılar İttifaqının təşkil etdiyi “Qəlbdən qələmə” ssenarisinin inkişafı üzrə yay məktəbi və “Kino istehsalı A-dan Z-yə” intensiv kinorejissorluq kursları layihələrinin iştirakçısı olub.
“Ədəbiyyat və incəsənət”
(17.07.2023)
Dövlət Kukla Teatrı teatr mövsümünü başa vurub
Azərbaycan Dövlət Kukla Teatrı özünün 91-ci teatr mövsümünü uğurla başa vurub.
Teatrın rəhbərliyi və kollektivi teatrsevərlər, sevimli və tələbkar tamaşaçılar üçün bu son günü də yaddaqalan etmək üçün əlindən gələni edib.
Cari mövsümdə hazırlanan maraqlı və baxımlı səhnə nümunələrimizdən olan “Üç donuz balası” (quruluşçu rejissor Saida Haqverdiyeva) tamaşası balacaların böyük marağına səbəb olub. Beləcə mövsümün son tamaşası da ənənəyə uyğun olaraq anşlaqla keçib.
Nümayişin ardınca mövsüm ərzində məhsuldar fəaliyyəti ilə seçilən teatr əməkdaşları – aktyorlar, rejissor və texniki işçilər müxtəlif nominasiyalar üzrə təşəkkürnamələrlə təltif olundular.
“Ədəbiyyat və incəsənət”
(17.07.2023)
Riyaziyyat dahisi Sidiq Əfqanın açıqladığı ən təhlükəli tarix məhz 17 iyuldur
Kənan Məmmədli, “Ədəbiyyat və incəsənət”
Mən şəxsən mövhumatçı deyiləm, sizləri də mövhumatdan uzaq durmağa çağırıram. Amma və lakin…
Bəzi proqnoz-xəbərlər hansısa dahilərin hansısa dəqiq hesablamaları əsasında aparılır və ortaya çıxarılır, nəticə yüzəyüz düz olur. Biz keçmişin Nostradamusunu, Mir Mövsüm Nəvvabı, günümüzün Vanqasını, “Simpsonlar” cizgi fiımini nümunə gətirə bilərik. Növbəti etibarlı mənbə dəqiq elmlər sahəsində alim, əfsanəvi əfqan riyaziyyatçısı və filosofu Məhəmməd Sidiq Əfqandır. 21-ci əsrin Nostradamusu adlandırılan bu şəxs günlər öncə xüsusi bir düstur əsasında hesablamalar aparıb və bu yay baş verəcək və insanların daha diqqətli olmaları lazım olan tarixi açıqlayıb. Bu tarixin detonatoru isə Rusiya olacaq.
Bu xəbər bomba kimi partlayıb və yəqin ki, çoxlarınız onu eşitmisiniz.
Hazırda dünyada sülhün bir nömrəli təhlükə mənbəyi hesab edilən, o cümlədən bizim Qarabağ probleminin də açarını əlində saxlayan Rusiya təbii ki, hamının diqqət mərkəzindədir.
Beləliklə, alimin hesablamalar apardığı bu düstura görə, bu ilin yayında - yəni bu vədələrdə ruslar çox diqqətli və yenə də diqqətli olmalıdırlar, çünki bu gün ən təhlükəli tarixi hadisə baş verəcək.
Qeyd edək ki, riyazi dahinin proqnozlarına etibar etmək və ya etibar etməmək hər kəsin şəxsi işidir. Və burada fakt budur ki, alimin bir neçə proqnozu artıq öz təsdiqini tapmışdır. Xüsusilə, Əfqan Sidiq SSRİ-nin dağılmasından iki il əvvəl bu hadisəni proqnozlaşdırırdı. Həm də o, ABŞ-da əkiz qüllələrin dağıdılması və Ukraynadakı Euromaidan-ın düşməsi ilə bağlı gerçək proqnozların müəllifidir.
Sidiq Əfqanın dediyi kimi, həm ruslar, həm də bütün dünya üçün ən dəhşətli tarix 17 iyul günü - yəni bu gün olacaq. Alimin fikrincə, bu gün dünyanı nüvə fəlakətinə apara biləcək bir növ təxribat baş verə bilər. Hər halda, onun proqnozuna görə, dünya gücləri bir-birlərinə qarşı nüvə şantajından qaça bilməyəcəklər.
Bu gün məhz həmin gündür - 17 iyuldur. Və gəlin ümid edək ki, Sidiq Əfqan bu dəfə yanılacaq, heç bir nüvə təxribatı baş verməyəcək.
Bizə bir ömür verilib, onu xoşbəxt yaşamaq hər kəsin haqqıdır.
“Ədəbiyyat və incəsənət”
(17.07.2023)
Rey Bredberidən kitabın tərifi
Səidə Sübhinin güşəsi
Xoş gördük, istəkli oxucular. Bu dəfə Amerika yazıçısı Rey Duqlas Bredberinin təzə kitablar barədə dediyi gözəl bir fikri səsləndirmək istəyirəm:
“Siz bilirsinizmi, yeni kitabların qoxusu necədir? Cildin, kağızın qoxusu, şriftin rəng qoxusu? Bu, ac adam üçün təzə çörək kimi bir şeydir.”
“Ədəbiyyat və incəsənət”
(17.07.2023)
“Yad dildə danışırıq doğmaların yasında” - Əlizadə Nuri
“Ədəbiyyat və incəsənət” portalının Poetik qiraət rubrikasında bu gün sizlərə şair Əlizadə Nurinin şeirini təqdim edirik.
Küçədən nəğmə keçir…
Təzə hava çalınır,
Qəmin köhnə sazında.
Yad dildə danışırıq
Doğmaların yasında.
Qocalıram deyəsən,
Söz içimdə paslanır.
Bir şimal şəhəriyəm-
Günəş mənə nazlanır…
Qıfılbəndmiş göy üzü-
Tanrı vermir açarı.
Küçədən nəğmə keçir
Çağır gəlsin içəri…
Yıxılıram, ilahi
Ümid də yox tutmağa.
Neçə eşq həsr etmişəm,
İlk eşqi unutmağa.
Bu bacasız evlərə,
Tanrı, barı divar ver.
Yanına gəlmək üçün
Mənə bir nərdivan ver…
Bəlkə yaşamamışam,
Amma ömür sürmüşəm.
Bir dilənçi ovcuna
Yüz dəfə hönkürmüşəm…
… Qucaqlamaq öyrədin,
Bu kəsilmiş qollara.
Yolu düz çəkmədiniz-
Düşdük əyri yollara…
Ədəbiyyat və incəsənət”
(17.072023)
