Super User
POETİK QİRAƏTdə Əkbər Qoşalının “Yazıram” şeiri
“Ədəbiyyat və incəsənət” portalının Poetik qiraət rubrikasında bu gün sizlərlə sevilən şair Əkbər Qoşalı görüşür. Yeni il ərəfəsində şair “yazıram” deyir, necə yazdığını bəyan edir və ortaya yeni bir gözəllik qoyur.
Yenə əldə qələməm,
Şeir yazıram yenə,
Şeirə sən yazıram;
Sənə gözüm deyirəm,
Gözümə nəm yazıram.
Gəl, nə gəlsin xəyala,
Gün ələnsin xəyala;
O bir əlçim xəyala,
Gah sən gah mən yazıram.
Dəniz kimi qalxan mən,
Gəmiləri yaxan mən;
İndi baxıb sahildən,
“Geri dönməm!” yazıram.
Sahil deyil hər sahil,
Qağayılar da daxil…
Xatirələr lillənir,
Suya həmdəm yazıram…
Gəl, nə gəlsin xəyala,
Nur çilənsin xəyala;
Dalıb gülçin xəyala,
Necə sərsəm yazıram…
Yenə əldə qələməm,
Gah nəşə gah ələməm,
Sənə dözüm deyirəm,
Söz verirəm…
Yazıram…
“Ədəbiyyat və incəsənət”
(28.12.2023)
Komitə sədri qəbul keçirdi
Millət vəkili, Milli Məclisin Mədəniyyət Komitəsinin sədri Fazil Mustafa növbəti vətəndaş qəbulu günündə bir qrup incəsənət xadimi, mədəniyyət işçisi və yazarla görüşüb. Bu barədə “Ədəbiyyat və incəsənət” portalına Milli Məclisin Mədəniyyət Komitəsindən məlumat verilib.
Milli Məclisdə baş tutan görüşdə, incəsənət xadimləri, mədəniyyət işçiləri və yazarlar öz yeni yaradıcılıq uğurları, qayğıları, planları ilə bağlı danışıb, onları maraqlandıran müxtəlif məsələlərlə bağlı suallar verib.
Xalq artisti Mərahim Fərzəlibəyov, Əməkdar artist Şəbnəm Tapdıq, Əməkdar artist Vaqif Mirzəyev, Əməkdar mədəniyyət işçisi, tanınmış yazıçı-publisist Fazil Rəhmanzadə, 50 ilə yaxın Şirvanşahlar Sarayı, Qız Qalası, Atəşgah və b. dövlət qoruqlarının rəssamı olmuş Böyükxanım Dadaşova, pedaqoq-tarzən Cəbrayıl Göyüşov, miniatürçü rəssam Pərinisə Əskərova, müğənni Cəmilə Hüsiyeva, Heydər Əliyev Sarayının keçmiş direktor müavini İlqar Dadaşov, tanınmış araşdırmaçı jurnalist Ulduzə Qaraqızı, Bakı Bələdiyyə Teatrının aktyoru İsmayıl Atakişiyev, aktyor, müğənni Topfiq Hacıyev, mədəniyyətyönümlü QHT rəhbərləri – jurnalist Vüsalə Qələndərli, xanəndə Fəridə Mirişova və Kərəm Nəbiyev, yeni yaradılmış özəl “Qədim Zəngəzur” Teatrının direktoru Firudin Əliyev, teatrın bədii rəhbəri, kino, dublaj və teatr aktyoru Ramil Zeynalov, rəssam Mehriban Xəlilzadə, gənc şair Roma Xosrov, gənc filoloq Həmidə Mehbalıyeva, məktəbli yazar Sevindik Nəsiboğlu və başqaları (toplam 27 nəfər) ilə görüşən Fazil Mustafa, onları ətraflı dinlədikdən sonra, toxunulan mövzularla bağlı fikirlərini bölüşüb, həllivacib məsələlərlə bağlı əlaqədar dövlət orqanları ilə müzakirə aparacağını, müvafiq müraciət məktubları yazacağını bildirib.
Fazil Mustafa Azərbaycan ali dövlət rəhbərliyinin, Heydər Əliyev Fondunun mədəniyyətə, incəsənətə yüksək diqqət-qayğısından söz açıb, Mədəniyyət Nazirliyinin yeni rəhbərliyinin təşkil etdiyi tematik forumlara, digər məsələlərə diqqət çəkib. Qanunvericilik orqanında mədəni irslə, mədəniyyət, incəsənət fəaliyyəti ilə bağlı aparılmış müzakirələr, qəbul edilmiş qanunlar yaxud qanunlara əlavələr haqqında danışan Fazil Mustafa, qəbula gələnlərə Mədəniyyət Komitəsinin fəaliyyəti barədə də bilgi verib.
Görüş iştirakçılarından bir qismi öz əsərlərini Komitə sədri üçün imzalayıb.
“Ədəbiyyat və incəsənət”
(28.12.2023)
GÜNEY AZƏRBAYCAN POEZİYASI ANTOLOGİYASInda Sevər Şəhabinin “Kimliyizi dəyişdilər” şeiri
“Ədəbiyyat və incəsənət” portalının Güney Azərbaycan Poeziyası Antologiyası layihəsində portalımızın Güney təmsilçisi Əli Çağla bu dəfə sizlərə Sevər Şəhabinin şeirlərini təqdim edir.
Sevər Şəhabi kimi tanınan şair, etimoloq və Güneydə muasir məşhur mahnıların müəllifi 1983-cü ildə Təbrizdə doğulmuşdur. O, şeirdən çox, illərdir ki, etimoloji və lüğətlər qonusunda çalışır.
Yumurtanın ağ divarın
Ana eşqiylə dəldiniz.
Sizlər də ananız kimi,
Yetim dünyaya gəldiniz.
Ananızı qınamayın,
Sanmayın sizi atdılar.
Onları da atanız tək,
Buğda ilə aldatdılar.
Atanızın ayaqların,
Qarmaqlara bağladılar.
Yerə baxan başlarını,
Biçaq ilə dağladılar.
Onun səhər avazıyla,
Narın-narın süzmədiniz.
Mahnımızın kölgəsində,
Məğrur-məğrur gəzmədiniz.
Saxta ana qucağında,
Uyumadan, oyandınız.
Boyaqçının qarşısında,
Öksüz-öksüz dayandınız.
Əlvan-əlvan boyalarla,
Kimliyizi dəyişdilər.
Boyaqçılıq sənətilə,
Səadətə yetişdilər.
“Ədəbiyyat və incəsənət”
(28.12.2023)
POEZİYAMIZIN QIZIL FONDUNDAN - Vahid Əziz, “Gülü hanı o yerlərin...”
Könül, “Ədəbiyyat və incəsənət”
Xalq şairi Vahid Əziz! Lirikanın ən dərinliyini, fikir yükünün ən ağırlığını, poetik gözəlliyin ən təkrarsızını ortaya qoyan bir şairimizdir Vahid Əziz.
Onun bütün yaradıcılığı gözəldir, bizsə son illər yazdığı şeirlərindən seçmələr edəcəyik.
Gülü hanı o yerlərin...
Gülü hanı o yerlərin,
hansı torda yaz qarıdı?
Davaya gedən ərlərin
yaşıdları “qız qarıdı”.
Özgəyə boyun əymədi –;
düymə – yar açan düymədi,
dizim daşına dəymədi,
bulaqda yarpız qarıdı.
Əlim gözlərini silib,
qəlbim dərdlərini bilib,
neçəsi şəkilnən ölüb,
neçəsi yalqız qarıdı!
Daşan yağdı, yanan baldı;
sevən könül kardı, laldı,
cavan gedən cavan qaldı,
yazdığı kağız qarıdı.
Baş daşında dilək gördüm,
havalanmış külək gördüm,
məzarlıqda mələk gördüm,
dedilər: “Şəhid yarıdı”.
Qızlar sevmək həvəsində,
məktəb gözəl töhfəsində,
şəkli “Şəhid lövhəsində”;
oğlanlar şagird qarıdı...
“Ədəbiyyat və incəsənət”
(28.12.2023)
Abşeron tənhalığı - RAMİL ƏHMƏD YAZIR
“Ədəbiyyat və incəsənət” istedadlı gənc yazar, ədəbiyyatşünas Ramil Əhmədin öz yeni “Abşeron yarımadamı” kitabına yazdığı sözönünü, yaxud p.s-i təqdim edir. Bu, həm də kimlik krizi barədə düşüncələrdir.
Tənhalıq insanın həyatında başqa bir adamın olub-olmamasından asılı deyil. İnsan onu dinləyib-anlayacaq adamların az olmasından tənhalaşır. Bu ruhsal tənhalıqdır. Qəribədir ki, çoxlu adamların içində tənhalıq daha da dərinləşir.
“Abşeron yarımadamı” kitabımda vurğulanan məna yaşadığımız çağda insanın tənhalığı və ünsiyyətsizliyidir. Bu gün ünsiyyət üçün sosial şəbəkələr var, amma ünsiyyətin özü yoxdur. Mənə elə gəlir, biz dəyərlərimizi yaxşı mənimsəməmişik. Özümüzü başqalarıyla müqayisə edirik. Məsələn, deyirik, Bakı monoton şəhərdir, ruhsuzdur və s. Halbuki yaradıcı adam üçün rəngsizliyin, ruhsuzluğun özü də yaradıcılığa çevrilməlidir və mən düşünmürəm ki, Bakı rəngsiz şəhərdir. Abşeron həm ədəbiyyat, həm rəssamlıqda böyük mövzudur. Axı bu şəhərdə sevir, darıxırıq, insanı, insanlığı burada tanıyırıq. Bu duyğuları bu coğrafiyada yaşayırıq.
Çağımızın ən ciddi məsələlərindən biri kimlik krizidir. Üstəlik, buna Şərq-Qərb konteksində baxanda önümüzdə başqa bir mənzərə açılır. Məncə, Qərb istəyir ki, bizim milli rənglərimiz solsun və hamı bomboz qloballaşma deyilən şeyin içində əriyib getsin. Qərbin birrəngli modelindən deyil, Şərqin çoxrəngliliyi, çoxsəsliliyindən yanayam. Əslində, kütlə Qərbə yox, Qərbin bizə özünü təqdim etdiyi və həqiqəti əks etdirməyən Qərb modelinə aşiqdir. Bu gün idellaşdırdığımız Qərb illuziyadır. Yüz il bundan qabaq türk aydınları Fransada bunu gördülər və qayıdıb Osmanlı kültürünə sahib çıxdılar. Bizim aydınlarımız - Əli bəy Hüseynzadə, Əhməd bəy Ağaoğlu, Nəsib bəy Yusifbəyli və s. da bunun fərqinə vardılar və milli kimliyimizi qorumaq uğrunda mübarizə apardılar. Bu gün isə məlum olur ki, qələm adamlarımız, fikir adamlarımız kütləvi fikrin, çoxluğun diktəsi ilə yaşayırlar və onları forma, bəzəklə aldatmaq asandır. Dərk edənlərimizin səsini eşidən, eşitmək istəyən yoxdur...
“Ədəbiyyat və incəsənət”
(28.12.2023)
“Söz kibrit kimidir, ocaq da qalayar, yanğın da törədər” - HÜMBƏT HƏSƏNOĞLUDAN 10 AFORİZM
“Ədəbiyyat və incəsənət” portalı statusman Hümbət Həsənoğlunun növbəti 10 aforizmini təqdim edir.
1.Verən ala da bilir, ona görə də özünün olanlarını dəyərləndir.
2.Ən çətin şey sehrində olduğun insanın sehrindən azad olmaqdır.
3.Qadın küsüşməyə layiq kişi arzulayar.
4.Tənbəlliyin rəqiblərinə verdiyin əlavə şansdır.
5.Qadın qəzəl kimidir, bəzi şeyləri anlamasan da, ümumən fikri tutub zövq almaq olur.
6.Öz təkliyi ilə ünsiyyət qura bilən tək qalmaz.
7.İnsan kölgəsi pis həmsöhbət kimidir, bütün hərəkətləri yalnız təkrar etməyi bacarır.
8.Allahın necə yaradıldığını düşünməsən, Allahın yaratdıqlarını düşünmək asandır.
9.Sifətlərini idarə edə bilənlər çox şeyləri də edə bilərlər.
10.Söz kibrit kimidir, ocaq da qalayar, yanğın da törədər.
“Ədəbiyyat və incəsənət”
(28.12.2023)
Açar” bədii filmi Bolqarıstanda beynəlxalq festivalda ölkəmizi təmsil edəcək
“Açar” qısametrajlı bədii filmi gələn ilin yanvarın 12-18-də Bolqarıstanda keçiriləcək 16-cı Sofia Menar Film Festivalının qısametrajlı filmlər proqramına seçilib.
AzərTAC xəbər verir ki, proqramda Azərbaycanla yanaşı Yaponiya, ABŞ, İran, Tunis, Misir, Pakistan kimi ölkələrdən təqdim olunan filmlər yer alıb.
Qeyd edək ki, premyerası 2023-cü ilin aprel ayında Niderland Krallığında “Oscar”, BAFTA və Avropa Film mükafatlarına klassifikasiyalı 14-cü “Go Short” Beynəlxalq Qısa Filmlər Festivalında baş tutan “Açar” filmi ötən müddət ərzində dünyanın müxtəlif ölkələrində keçirilən beynəlxalq festivallarda ölkəmizi təmsil edib.
“OB Film” və “Epic Production” şirkətlərinin birgə istehsal etdiyi “Açar” filmi Qarabağda işğal olunmuş evinin sonuncu yadigarı və nişanəsi olan açarları 26 il qoruyub saxlayan Ümid kişinin hekayəsindən bəhs edir.
Filmin ssenari müəllifi və quruluşçu rejissoru Elşad Əliyev (ELsevƏR), görüntü rejissoru Cavid Oruclu (Delee), quruluşçu rəssamı Arif Niftiyev, montaj rejissoru Elşad Rəhimov, səs rejissoru Mehman Nadirov, prodüserləri Orxan Behbid, Senur Əhədov və Mətin Ələkbərlidir.
Ekran əsərində Qurban İsmayılov, Rasim Cəfər, Reyhan Cəfər, Hüseyn İsgəndərov, Yusif Şeyxov, Zemfira Əbdülsəmədova, Arif Kərimov, Rövşən Ağayev, Eldar Cəbrayıl, Selin Cəbrayıl və başqaları çəkiliblər.
“Ədəbiyyat və incəsənət”
(28.12.2023)
Beynəlxalq Muğam Mərkəzinin 15 illiyi qeyd olunub
Dekabrın 27-də Beynəlxalq Muğam Mərkəzinin (BMM) fəaliyyətə başlamasının 15 illiyinə həsr olunmuş tədbir keçirilib.
AzərTAC xəbər verir ki, tədbirdə çıxış edən BMM–in direktoru Sahib Paşazadə və yazıçı-dramaturq İlqar Fəhmi Mərkəzin fəaliyyəti barədə qonaqlara məlumat veriblər. Qeyd edilib ki, Beynəlxalq Muğam Mərkəzi öz fəaliyyəti ilə ulu xəzinənin təbliği, şanlı mənəvi irsin saxlancı və milli dəyərin təbliğat mərkəzi funksiyasını yerinə yetirir.
Sonra Beynəlxalq Muğam Mərkəzinin fəaliyyətindən bəhs edən videoçarx nümayiş etdirilib. Ardınca səhnəyə “Xarıbülbül” ansamblı dəvət olunub.
Tədbirdə Xalq artisti Arif Babayevin videotəbriki təqdim edilib.
Gecə Xalq artistləri Gülyaz Məmmədova, Nəzakət Teymurova, Zabit Nəbizadə, Elçin Həşimov, Elnur Əhmədov, Teyyub Aslanov və Əməkdar incəsənət xadimi Aqil Məlikovun çıxışları ilə davam edib.
Qeyd edək ki, 2008-ci il dekabrın 27-də Bakıda, Dənizkənarı Milli Parkda qədim musiqi alətimiz olan tarın quruluşunda, eyni zamanda, modern memarlıq üslubunda tikilmiş Beynəlxalq Muğam Mərkəzinin açılışı ilə Azərbaycanda muğam ifaçılarının və tədqiqatının təbliğini ehtiva edən ilk rəsmi mərkəz yaradıldı.
Ötən müddət ərzində Beynəlxalq Muğam Mərkəzində bir sıra mühüm layihələr reallaşdırılıb, saysız-hesabsız konsertlər keçirilib, korifey sənətkarlarımızın yubileyləri təşkil olunub. BMM-in böyük maraqla gözlənilən “Muğam axşamları” layihəsi çərçivəsində silsilə konsertlər keçirilir. Bundan əlavə, mərkəzin musiqinin müxtəlif janrlarını əhatə edən “Aşıq musiqisi axşamları”, “Vokal musiqi axşamları”, “Muğamat var olan yerdə”, “Unudulmayanlar” və digər layihələrinin konsertləri tamaşaçılar tərəfindən maraqla izlənilir.
Qeyd edək ki, Heydər Əliyev Fondunun milli-mənəvi dəyərlərimizin qorunması və dünyada geniş təbliği ilə bağlı reallaşdırdığı möhtəşəm layihələr sırasında xüsusi əhəmiyyəti olan bu mərkəzin inşası Fondun prezidenti Mehriban xanım Əliyevanın təşəbbüsü ilə həyata keçirilib.
“Ədəbiyyat və incəsənət”
(28.12.2023)
“Gördüm ki, Hacıbala Abutalıbovla işləyə bilməyəcəyəm…”
Elman Eldaroğlu, “Ədəbiyyat və incəsənət”
Qəribədir, müğənnilər, aktyor və yazarlar daha tez tanınsalar da memarların məşhurlaşması üçün bəzən insan ömrü bəs etmir. Gecəsini gündüzünə qatıb ərsəyə gətirdikləri gözəl tikililərin müəlliflərindən nədənsə çoxları xəbərsiz olur…
Deyir ki;- “2001-ci ildə Hacıbala Abutalıbov Bakı şəhərinin icra başçısı təyin olunandan sonra gördüm ki, onunla işləyə bilməyəcəm. Çünki o, dediklərimi başa düşmürdü və mən məcbur olub vəzifəmi tərk etdim. Hacıbala müəllim bir qədər qeyri-standart düşüncəli insan idi. Bir dəfə bir layihə ilə bağlı mübahisəmiz olmuşdu. Mən dedim ki, şəhərin baş memarı olduğum üçün hesab edirəm ki, bu layihə bu cür olmalıdır. Hacıbala müəllim də cavab verdi ki, Bakının başçısı da mənəm, memarı da, hakimi də. Mən də ona siz çox böyük adamsınız deyib, çıxıb getdim. Bizim necə ayrılmağımızı hamı bilir. Hətta bu hadisəni o vaxt Heydər Əliyevə də məruzə etmişdilər. Bu hadisədən bir ay sonra mənə “Şöhrət” ordeni verildi...”
Söhbət Elbay Qasımzadədən gedir. O, 1948-ci ildə Bakı şəhərində anadan olub, Ənvər Qasımzadənin oğludur. 1971-ci ildə Azərbaycan Politexnik İnstitutunun memarlıq fakültəsini bitirib. 1989–2001-ci illərdə Bakı şəhərinin baş memarı, Bakı Şəhər İcra Hakimiyyətinin Memarlıq və Şəhərsalma üzrə Baş İdarəsinin rəisi vəzifələrində çalışıb. Azərbaycan Memarlıq və İnşaat Universitetinin memarlıq fakültəsinin professorudur. 150-dən artıq layihənin, o cümlədən “Azadlıq prospekti” metrostansiyasının memarıdır. 1998-ci ildə "El&En" memarlıq şirkətini təsis edib və hal-hazırda da ona başçılıq edir və Azərbaycan Memarlar İttifaqının sədridir…
Sevinir ki, Qarabağın işğaldan azad olunmasına şahidlik edib. Qorxurdu ki, birdən ömrü yetməz…
“Qarabağda görüləcək işlər çoxdur. Bəzi uzağı görməyən adamlar deyir ki, beş ilə yenidən hər şeyi bərpa edəcəyik. Bu, düzgün söhbət deyil, məsuliyyətsiz sözdür. Buna xeyli vaxt lazımdır. Beş ilə hər şey düzələ bilməz. Oranı 30 ilə viran qoyublar. Əgər ermənilərin Qarabağda qalmaq niyyəti olsaydı, dağıtmazdılar, qurub-yaradardılar. Onlar bilirdilər ki, gec-tez torpaqların əsl sahibləri gələcək və oradan çıxacaqlar…”- söyləyir.
İşlədiyi dövrdə başına xeyli maraqlı hadisələr gəlib.
Deyir ki;- “Bakının baş memarı işlədiyim dövrdə Milli Bankın təzə binasının tikintisi başladı. Halbuki mən bankın binasının Tbilisi prospektində tikilməsini istəyirdim və o cür sənədləşdirmişdim də. Ancaq mənim razılığım olmadan binanın tikintisinə başladılar. Güclü adamlar idilər. Açılış mərasimi zamanı rəhmətlik Heydər Əliyev çıxışında dedi ki, bu binanın tikintisində baş memar səhvə yol verib, əslində, bu bina burada tikilməli deyildi. Bu çıxış xronikada da, dövrün qəzetlərində də var. Bir dəfə Heydər Əliyev şəhəri seyr edərkən mən də yanında idim. İmkan tapıb dedim ki, cənab prezident, icazə verirsinizmi bir söz deyim? Dedi, buyurun. Dedim;- “Mən nə bu binanın tikintisinə, nə də layihəsinə icazə vermişdim, icazəsiz tikdilər.”
İnanın ki, uzun müddət Rəşid Behbudov küçəsindən keçəndə Milli Bankın binası tərəfə baxmırdım. Artıq zaman ötüb, yaxşı ku, bina mühitə uyğunlaşıb…”
Çox baməzə adamdır. İncə yumor hissi var. Şirin Bakı ləhcəsiylə adamı məftun edir. Necə deyərlər, əsl “qədeş”lərə məxsus dialekti var.
“Bakının ruhu təkcə onun daşlarında deyil, Bakının ruhu orada yaşayan insanlardadır. Altmışıncı illərdə deyirdilər ki, İçərişəhərin əhalisini köçürmək, bəzi abidələri söküb yeniləmək lazımdır. Nə yaxşı ki, o vaxt başa düşən adamlar bu layihəni yaxın buraxmadılar və dedilər ki, İçərişəhərdə əhali yaşamasa, İçərişəhər də yaşamaz. Cansız daşlarda nə ruh ola bilər? Heç bir şey. Onu ruhlandıran orada yaşayan insanlardır. İçərişəhərin də əlbəttə ruhu dəyişib. Mən ora tez-tez gedirəm. Orada mənə yaşlı içərişəhərlilər hələ də “qədeş” deyirlər. Bu söz pis söz deyil ha. Onlar qədeş sözünü hörmət etdikləri adamlara deyirlər. Həyatdır da…”- söyləyir.
Zəngin kitabxanası var. Bu kitabxanada texniki kitablarla yanaşı, ümumilikdə doqquz minə yaxın bədii kitab da toplayıb. On iki yaşından şeir yazır, amma şeirlərini heç vaxt üzə çıxarmayıb.
Nə isə, Elbay Qasımzadə haqqında çox danışmaq olar, məqsədim, onu 75 illik yubileyi münasibətilə təbrik etmək olduğu üçün hələlik burada saxlayıram. Axı dekabrın 26-sı onun ad günü idi.
Ömrünüz uzun olsun, Elbay müəllim!
“Ədəbiyyat və incəsənət”
(28.12.2023)
Yatmış cahillər - AKTUAL
Xədicə Əliyeva, “Ədəbiyyat və incəsənət”
Fikir vermisinizmi? Eyni kitabları oxuyur, eyni filmlərə baxır, eyni musiqiləri dinləyir, eyni yerlərə gedib-gəlir, qısacası, düşüncələrimizi eyniləşdirmişik. Az izlənməsi, az dinləyicisi olan film-mahnıları sınayıb, bəyənməkdən qorxuruq. Dillərdən "mən azad fikirliyəm" sözləri, gözlərdən "mən fərqliyəm" baxışları əks olunur və iddia edilir. Amma heç kim özünü dinləyəcək cəsarəti tapmır. Hissləri danışmaq istəyib dilə gəldikdə, həmin o dili, kəsir yavaş-yavaş beyindəki məntiq.
Daima bir-birləri ilə məsləhət alış-verişi edir, sanki biz qarşı fikirlə, qarşımızdaki isə bizim fikrimizlə özünü qarantiya altına alır. Hərkəs azad fikrə sahib olub, sürü psixologiyası ilə gedir, istəklərini isə susdurub, ruhunda dustaq edir. Hərkəs eyniləşmiş düşüncələr zəncirinə tutunub gedir. Kiçikkən beyin və düşüncələrimiz istədiyimiz kimi yox, istədikləri kimi formalaşdırılır, eyniləşdirilir. Sanki gözlərimizi bağlayıb, cahillik yolundaki karvana qoşurlar. Biz isə, o qədər kor oluruq ki, əllərimizin olduğundan xəbərsiz qalırıq. Gözlərimizin görməsinin nə xeyri, başqa əllər bizi həqiqətə kor etdikdən sonra?
Yolunu itirmiş bir insanın qarşısına iki yol çıxır. Bir yolda insanlar baş alıb, karvantək ard-arda, "gözləri bağlı" şəkildə gedir. Digər yolda isə heç kim olmur. Həmin insan heç düşünmədən sürüyə qoşulub gedəcək. Qaranlıq yolun sonunu aydınlıq, aydınlıq yolun sonunun qaranlıq ola bilmə ehtimalını düşünmədən gedəcək. Yolun hara aparacağını bilmədən. Bəlkə də o qorxduğu yol, onu "özünə aparacaqdı." Lakin o, özündən qorxurdu. Çünki o, özünü tanımırdı, çünki o, özünə yad idi. İnsan çox qorxaq varlıqdır əslində. Daima "əsl özündən qorxub." Tək qərar verməyə, tək düşünməyə, tək addım atmağa, tək yaşamağa, bir şeyləri tək başına bacarmaqdan qorxub.
Hər məsələdə özünə hər daim "yol yoldaşı" axtarıb.
“Ədəbiyyat və incəsənət”
(28.12.2023)
