Super User
Bu gün köşklərdən “Ədəbiyyat qəzeti” almağı unutmayın!
“Ədəbiyyat və incəsənət” portalı bugünkü “Ədəbiyyat qəzeti”nin anonsunu təqdim edir. Qəzet həmişəki kimi yenə də gözəl yazılarla boldur:
Asif Rüstəmli – İki əsrə sığmayan 20 il
Azər Turan – Türkün Fələstin tərəfi
Tərlan Quliyev – Milliləşən əruz
Cavanşir Yusifli – Ədəbi konsept üfüqü
Rüstəm Kamal – Qars metafora kimi: Koroğlu, Aleksandr Puşkin və Orxan Pamuk
Elnarə Akimova – “Balalara hədiyyə” – Firidun bəy Köçərlinin hekayəsi
Füzuli internet əsrində yaşasaydı... – İsgəndər Pala ilə Məhəmməd Füzulinin “Su” qəsidəsi haqqında söhbət (Söhbətləşdi: Fərid Hüseyn)
İntiqam Qasımzadə - Bakı səni heç zaman unutmayacaq, əziz dost! (Aleksandr Qriçin xatirəsinə)
Nadir Yalçın – Yazıçı Anarın vətənində... (Xalq yazıçısı Anarla gənclərin görüşündən qeydlər)
Buker mükafatı qalibi Lidiya Deyvisdən qısa hekayələr - Banuçiçək Qasımzadənin tərcüməsində
Hədiyyə Şəfaqət – “Elnur” (Hekayə)
Nərgiz Cabbarlı – Roman təkamülünə bir baxış
Nicat Məmmədov – Əbədi Əlef (Səlim Babullaoğlunun “İlk hərfi itmiş cümlə” kitabı barədə)
Qulu Ağsəs, Zeynal Vəfa, Abuzər Turan – Şeirlər
Elçin İsgəndərzadə - “Mənim Şuşa dastanım” (Zəfər poeması)
Oğuz Ayvaz – Mən ona xəyanət edə bilmərəm...
Əli bəy Azəri – “Əmzikli sərhədpozan” (Hekayə)
İsmayıl Kazımov – Mənzər Niyarlının “Qızıl qaval” və “Vətəndən vətənə” əsərlərinin dil xüsusiyyətləri
İmir Məmmədli – “Şimşək” (Hekayə)
Turan Uğur – Məmməd İsmayıl poetikasının özəlliyi
Əfşan Yusifqızı – Müqəddəs yolçuluq
Sara Osmanlı – “Yaddaşlardakı xatirələr danışanda...” (Gülbəniz Qocayevanın “Yaddaşlardan vərəqlənən xatirələr” kitabı haqqında)
Kənan Hacı – Dəniz onun yazı masasıdır (Şair Damət Salmanoğlunun “Seçilmiş əsərləri” üzərinə bir neçə söz)
Ay Bəniz Əliyar – Güzgü yazı (Şair Nəcməddin Mürvətovun 70 illiyinə)
Əlövsət Bəşirli – “Ömüryolu” (Xatirə-povestdən səhifələr)
Günel Məlikli – Azərbaycan kinosunun tarixi
Rəşid Faxralı – Üç büst haqqında ballada.
“Ədəbiyyat və incəsənət”
(04.11.2023)
SUAL-CAVAB: UNESCO-nun Yaradıcı Şəhərlər Şəbəkəsində neçə Azərbaycan şəhəri var?
Kənan Məmmədli, “Ədəbiyyat və incəsənət”
Hörmətli redaksiya. UNESCO-nun Yaradıcı Şəhərlər Şəbəkəsinə daha 55 şəhərin qoşulması barədə mediada məlumat yayıldı. Çox maraqlıdır, orada Azərbaycan şəhərlərindən hansısa yer alıbmı?
(Gövhər Səlimi, Bakı şəhəri)
Gövhər xanım, nəzərinizə çatdıraq ki, Azərbaycandan 3 şəhər - Lənkəran (2021, “qastronomiya” tematikası üzrə), Şəki (2017, “sənət və sənətkarlıq” tematikası üzrə) və Bakı (2019, “dizayn” tematikası üzrə) Yaradıcı Şəhərlər Şəbəkəsinə daxildir.
Və düz buyurursunuz, bugünlərdə, daha dəqiqi, oktyabrın 31-də - Ümumdünya Şəhərlər Günündə daha 55 şəhər UNESCO-nun Baş direktoru Odri Azulay tərəfindən təsdiq olunduqdan sonra bu təşkilatın Yaradıcı Şəhərlər Şəbəkəsinə (UCCN) qoşulub.
Bu yeni şəhərlər inkişaf strategiyalarının bir hissəsi kimi mədəniyyət və yaradıcılıqdan istifadə etmək və insan mərkəzli şəhərsalmada innovativ təcrübələr nümayiş etdirmək üçün güclü öhdəliklərinə görə qəbul edilib. Ən son əlavələrlə Şəbəkə hazırda yeddi yaradıcı sahəni - sənətkarlıq və xalq sənəti, dizayn, film, qastronomiya, ədəbiyyat, media və musiqini təmsil edən yüzdən çox ölkədən 350 şəhəri əhatə edir. Türkiyənin Şanlu Urfa və Gürcüstanın Kutaisi şəhərləri də siyahıya daxil edilib.
2008-ci ildən bəri media incəsənətinin Yaradıcı Şəhəri olan Lion şəhərinə yaradıcılıq sahəsini dəyişdirmək tələbindən sonra Yaradıcı Ədəbiyyat Şəhəri statusu verilib.
UNESCO bildirib ki, iqlim dəyişikliyi, artan bərabərsizlik, eləcə də 2050-ci ilə qədər dünya əhalisinin 68 faizinin şəhərlərdə yaşayacağı proqnozlaşdırılan sürətli urbanizasiya kimi inkişaf edən təhlükələrə qarşı dayanıqlığını gücləndirmək üçün Şəbəkə üzvləri ilə sıx əməkdaşlıq edəcək.
Yeni təyin olunmuş yaradıcı şəhərlər 2024-cü ilin iyulunda Portuqaliyanın Braqa şəhərində "Növbəti onillikdə gəncləri masaya gətirmək" mövzusunda keçiriləcək UCCN-in illik konfransında iştirak etməyə dəvət olunublar.
Şəkildə: Şəki sənətkarlığında şəbəkə xüsusi yer tutur.
“Ədəbiyyat və incəsənət”
(04.11.2023)
“Bir ovuc fındıq” - MİNİATÜR
Pərviz Yəhyalı, “Ədəbiyyat və incəsənət” üçün
-Mən insan yox, ağac ola bilsəydim və seçimim öz əlimdə olsaydı söyüd ağacı olardım. Bilirsən necə xoşum gəlir söyüd ağacından? Harda salxım söyüd görürəmsə məni ağlamaq tutur. Elə bilirəm kədər yağır budaqlarından qulac-qulac. Uşaqlığım düşür yadıma. Mənim də söyüd salxımları kimi hörüklərim vardı. Maraqlıdı bəs sən nə ağacı olmaq istəyərdin?
-Çətin sulal oldu. Düzü bu barədə heç fikirləşməmişdim- deyə çiyinlərini çəkdi. Telefonu sağ əlindən sol əlinə keçirib susdu.
-Heç mən də səni hansısa ağac təki təsəvvür etmirəm. Amma…
-Amma nə?
Ucadan güldüyü telefonda aydın eşidilirdi. Bu gülüşdən çox şaqaraq qəhqəhəyə bənzədi. Heç gülüşünə ara vermədən əlavə etdi:
-Amma başqa canlı kimi təsəvvür edirəm səni.
-Nə?
-İlan!
-ilan?
- Hə! Bilirsən…
-Çox sağ ol!
-Bilirsən, hamı ilanlardan qorxur. Əslində ilanların insanlarla işi yoxdur. Quyruğunu tapdalayan olmazsa. Biçarələr özlərini qorumaq üçün sancırlar.
-Bəs onda niyə el arasında deyirlər ilanın ağına da lənət bozuna da
-Nə bilim. Yəqin kor-koranə qorxduqları üçün. -sonra əlavə etdi:-İncidin?
-Bilmirəmki…
-Yaxşı incimə, Bax mən də digər canlı ola bilmək şansına malik olsaydım dələ olardım.
-Hm. Dələ niyə?
-Nə bilim… Yaxşı xüdafisləşək. Hələlik.
-Hələlik.
* * *
-Bura bax, azı 10 dəfə zəng etmişəm. Açmırsan telefonu. Məcbur qalıb ismarıc yazmalı oldum. Hardasan?…
-…
-Aaa bu nədi, oxuyub da cavab vermirsən. Kimlə danışırsan?
-…
-Yaxşı, yaxşı sən həmişə mənə belə diqqətsizsən. Allah bilir kimlə danışırsan. Danış! Mane olmayacam.
-…
-Bu nədi? 3 saatdı yoxa çıxmısan. Nə zəngimə cavab verirsən, nə də mesajıma.
-Fındıqdı bir ovuc. Tez yetişən. Yay fındığı.
-Mənim başımı tovlayırsan? Uşağam?
Elə bilirsən diqqətsizliyini bağışlayacam? Mənə zəng etmə, mesaj da yazma!
-Yadındadı, yazda sənə söyüd ağacının şəklini çəkib göndərmişdim.
-Hə, nə olsun. Tutaq ki yadımdadı
-O söyüd ağacı bizim evdən xeyli aralıdadır. Amma yolumun üstüdü deyə yanından keçirəm hər gün.
-Bu sənin mənim zəngimə cavab verməməyinə əsasdı?
-Qulaq as da bir. Mən o söyüd ağacının budaqlarında dələlərin oynaşdığını görmüşdüm. Bağımızdan bir ovuc fındıq yığıb aparıb qoydum ağacın dibinə. Dələlər sevinsin deyə.
-Dəli.
-Amma nə bilim sən dələ beləcə hirslənəcəksən.
-Dəli.
-Çox istəyirəm səni!
“Ədəbiyyat və incəsənət”
(04.11.2023)
BİZİMKİLƏR - Cüdo üzrə Amerika çempionu
Elman Eldaroğlu, “Ədəbiyyat və incəsənət”
2007-ci ildə ABŞ-ın Kaliforniya ştatının Ontario şəhrində keçirilən "Qış milli cüdo çempionatı"nda erməni güləşçini məğlub edərək, finala çıxmasına imkan verməyib. Hətta həmin güləşçinin erməni məşqçisi də onun əlini sıxaraq təbrik edib…
Evinin harasına baxsan orada Azərbaycanla bağlı, Azərbaycanı xatırladan nəsə görəcəksən. 16 ildir ki, ABŞ-da yaşayır, zərrəcə dəyişilməyib. Nə görkəmində, nə də dilində yad heç nə hiss olunmur…
"Səmimi sözümdür, Azərbaycanda idmana verilən dəyər dünyanın heç bir yerində verilmir. Yaxşı idmançının necə deyərlər, hamının gözü üstə yeri var."- söyləyir...
Haqqında söhbət açdığım Zaur Cəlilin atası Telman Cəlilov Azərbaycan Dövlət İncəsənət İnstitutunda "Səhnə hərəkəti kafedrası"nda müəllim işləyib, eyni zamanda Sumqayıt Dövlət Teatrının baş baletmestri olub. 1998-ci ildən ABŞ-da yaşayır. Hazırda "Nyu York Azərbaycan Mədəniyyət Mərkəzi"nin prezidentidir.
Zaurun həyat yoldaşı Leyla Rəhimova(Cəlil) muğam ifaçısıdır. 1998-ci ildə Türkiyədə keçirilən "Dədə Qorqud festivalı"nın, 1999-cu ildə "Pöhrə- 99" muğam müsabiqəsinin laureatı olub. 2000-ci ildə muğam müsabiqəsində 3-cü yerə çıxıb. 2002-ci ildə isə müsabiqənin "Qram Pri" mükafatına layiq görülüb. "O səs Türkiyə" telemüsabiqəsində iştirak edib. Cənnət adlı bir qızları var. Onu da qeyd edim ki, Zaur da həyat yoldaşı ilə birlikdə mahnılar ifa edir və artıq bu cütlük duet ifası ilə tanınır...
Zaur Cəlil 1985-ci ildə Sumqayıt şəhərində dünyaya gəlib. 2003-cü ildə şəhərin 5 saylı məktəbində orta təhsilini başa vurub. Bir il sonra hərbi xidmətə çağrılıb. Ordudan təxris olunandan sonra, 2006-cı ildə ABŞ-a gəlib. Hazırda Minnesota ştatının Minneapolis şəhərində yaşayır…
O, 1991-ci ildən, 6 yaşından idmanın cüdo növü ilə məşğul olur. İlk vaxtlar Əhəd Rəcəblinin, 1995-1997-ci illərdə Zaur Rəcəblinin, 1999-cu ildə isə Tofiq Məmmədovun yanında məşqlərə qatılıb. Arada məşğul olduğu idman növünü roma-yunan güləşiylə dəyişib. Burada onun məşqçiləri Qərib və Tahir Əliyevlər olub. 2000-ci ildən yenidən Rəcəbli qardaşlarının yanında cüdo ilə məşğul olub…
2006-cı ildə ABŞ-a gəldikdən sonra, Nyu York şəhərində cüdo yarışlarına qatılaraq 60 kq çəki üzrə ştat çempionu olub və Roçester şəhərində keçiriləcək olimpiadaya vəsiqə qazanıb. Həmin yarışda da yüksək nəticə göstərərək, olimpiadanın qızıl medalına layiq görülüb. Ümumiyyətlə, 2006-cı ildən bugünədək 100-ə yaxın medalla təltif olunub və xeyli kubok alıb. Yaşadığı Minnesota ştatının ardıcıl olaraq 11 dəfə çempionu olub.
2015-ci ildə Texasda keçirilən Amerika çempionatının bürünc, 2016-cı ildə isə gümüş medalını qazanıb. 2017-2018-ci illərdə iki dəfə dalbadal qızıl medala layiq görülüb. Beləliklə, yeganə azərbaycanlı olaraq bir neçə ildir ki, cüdo üzrə Amerika çempionudur. Amerika Cüdo Federasiyası tərəfindən M-1 dərəcəsi və sertifikatla təltif olunub. Zəfər çaldığı bütün yarışlarda Azərbaycan bayrağına bürünərək azərbaycanlı olduğunu fəxrlə nümayiş etdirir…
Deyir ki,- "Master Cüdo uzrə dunya çempionatının iştirakçısı olmuşam. İnşəallah bu il yenidən yarışlara qatılıb bir azərbaycanlı olaraq yüksək pilləyə yiyələnməyə çalışacam. Amerikada MMA- qaydasız döyüş üzrə bir çox yarışlarda vuruşub qalib gəlmişəm. Hətta dünya şöhrətli Mayk Taysonla görüşümüz də olub. 2018-ci ildə öz vəsaitim hesabına "CHAMPIONS Gym" idman zalını açmışam. Və çalışacam ki, davamlı məşq edib daha da yüksək nəticələr əldə edim, tələbələr yetişdirib dünyada imzamı tanıdım..."
Doğrusu, dilindən Allahın adı düşməyən, hər kəlməsindən təvazökarlığı hiss olunan, milli kimliyini unutmayan, içində Azərbaycan sevdası gəzdirən bu gənclə tanışlığımdan qürur duyuram…
Azərbaycan! Doğma məmləkətim, nə qədər ki, belə oğulların var, başın həmişə uca olacaq…
“Ədəbiyyat və incəsənət”
(04.11.2023)
Qara Qarayev adına Azərbaycan Dövlət Kamera Orkestri Filarmoniyada çıxış edib
Zövqlü musiqini kim xoşlamaz ki. Bu klassik musiqidirsə, xüsusən.
М.Maqomayev adına Azərbaycan Dövlət Akademik Filarmoniyasında Q.Qarayev adına Azərbaycan Dövlət Kamera Orkestrinin konserti olub.
Seçmə repertuarlı konsertdə bədii rəhbər və baş dirijor, Azərbaycan Respublikasının Xalq artisti Fəxrəddin Kərimovun rəhbərliyi ilə Q.Qarayev adına Azərbaycan Dövlət Kamera Orkestrinin ifasında J.S.Bachın “Çakona” (işləyəni Ü.Məmmədov), V.Lutoslavskinin xalq melodiyaları (Bakıda ilk ifa), P.İ.Çaykovskinin “Qardələn”, “Payız mahnısı”, J.Sukun Simlilər üçün serenada əsərləri səslənib.
Qeyd edək ki, Azərbaycan Dövlət Kamera Orkestri 1964-cü ildə görkəmli Azərbaycan bəstəkarları Fikrət Əmirov və Qara Qarayevin təşəbbüsü ilə yaradılıb. Orkestr bir çox xarici dirijorlar ilə çıxış edib. 2007-ci ildə dünyada Azərbaycan klassik musiqisinin təbliğinə görə orkestr “Humay” milli mükafatına layiq görülüb.
“Ədəbiyyat və incəsənət”
(04.11.2023)
Məmməd Araz yaradıcılığı Argentinanın ədəbiyyat portalında işıqlandırılıb
Argentinanın populyar “Poemas del Alma” ədəbiyyat portalı Dövlət Tərcümə Mərkəzinin “Azərbaycan ədəbiyyatı beynəlxalq virtual aləmdə” layihəsi çərçivəsində Azərbaycanın Xalq şairi Məmməd Arazın ispan dilinə tərcümə edilmiş “Dünya sənin, dünya mənim…”, “Əlvida, dağlar!”, “Azərbaycan – dünyam mənim” şeirlərinin dərcinə başlayıb.
Dövlət Tərcümə Mərkəzindən verilən məlumata görə, şairin yaradıcılığı haqqında məlumatla təqdim olunan şeirlərin ispan dilinə tərcümə müəllifləri – İspaniya filoloqları Raul Poggi Alexandro, Eva Kontreras və ispan dili mütəxəssisləri Tutuxanım Yunusova və Aysel Əliyevadır.
Azərbaycanın Xalq şairi Məmməd Araz “İstiqlal” ordeni, Əməkdar mədəniyyət işçisi, Dövlət mükafatı laureatı kimi fəxri adlara layiq görülüb.
Qeyd edək ki, geniş oxucu auditoriyası tərəfindən izlənilən “Poemas del Alma” portalı səhifələrində mütəmadi olaraq Aleksandr Puşkin, Aleksandr Düma, Xorxe Luis Borxes, Anna Axmatova, Marina Svetayeva, Xulio Kortasar, Alberto Moravia kimi dünyaşöhrətli yazıçı və şairlərin yaradıcılığına yer ayırır.
“Ədəbiyyat və incəsənət”
(04.11.2023)
İordaniya portalı ərəb turistlərə qış mövsümündə Azərbaycana səyahəti tövsiyə edib
İordaniyanın “Nabd” portalı ərəb turistlərə qış mövsümündə Azərbaycana səyahətə yollanmağı tövsiyə edib.
AzərTAC xəbər verir ki, ərəb turistlər üçün nəzərdə tutulmuş geniş məqalədə Azərbaycan paytaxtının ən yaxşı məkanları barədə məlumat və fotoşəkillər yerləşdirilib.
Yazıda qədim tarixi olan İçərişəhərin əcnəbi turistlərin ən sevimli məkanı olduğu qeyd edilib. Oxucuların diqqətinə çatdırılıb ki, buradakı müxtəlif əsrlərə aid nadir tarixi-memarlıq abidələri Azərbaycan xalqının qiymətli xəzinəsi kimi qorunub saxlanılır, həmçinin “İçərişəhər” Dövlət Tarix-Memarlıq Qoruğu UNESCO-nun Dünya İrsi Siyahısına daxil edilib.
Məqalədə Dənizkənarı Bulvar, Dağüstü park, turistlərin sevimli məkanı olan Nizami küçəsi, müasir Bakının rəmzlərindən biri olan “Alov qüllələri”, Şirvanşahlar sarayı, Milli Azərbaycan Tarixi Muzeyi, Qız qalası, Azərbaycan Təbabəti Muzeyi barədə ətraflı məlumat verilib. Qeyd olunub ki, hələ 1909-cu ildə Xəzər dənizinin ətrafında salınan bulvar paytaxt sakinlərinin və şəhərin qonaqlarının istirahət yeridir. Burada Bayraq meydanı, müxtəlif attraksionlar, restoran və kafelər, ticarət obyektləri yerləşir.
Ərəb ölkələrindən olan potensial turistlərin diqqətinə çatdırılıb ki, Bakıdan kənarda – Azərbaycanın Qəbələ, Quba, İsmayıllı, Şəki və digər rayonlarında da görməli yerlər, qədim tarixi abidələr var. Bölgələrdə turistlərin istirahəti üçün yüksək şərait yaradılıb, təbiətin qoynunda ən müasir standartlara cavab verən komfortlu otellər fəaliyyət göstərir.
“Ədəbiyyat və incəsənət”
(04.11.2023)
“Səsin sehrində bitən gül” - HEKAYƏ
Pərviz Yəhyalı, “Ədəbiyyat və incəsənət” üçün
İlıq payız günəşinin şəfəqləri maşının bağlı şüşələrindən içəri keçməyə israrlı idi. Yolun hər iki tərəfi göz işlədikcə şoranlıq və kimsəsizliyi ilə yorucu təsir bağışlayırdı. Göylə yerin birləşdiyi üfüq xəttinə diqqət yetirdikcə ona elə gəlirdi ki, dünya elə beləcə bomboz düzənlikdən ibarətdir.
Zaman elə bir uçur. Dostunun atasının dəfininə getdiyi gündən düz bir il ötürdü. Yaddaşında bir il əvvəlki gün elə bil dünən olubmuş kimi bütün təfərrüatı ilə qalmışdı. Dəfndən qayıdarkən edilən zəngə görə maşını saxlayıb, yerə düşdüyü və onun üçün bir göz qırpımı anına bərabər, əsilində isə yarım saat danışdığı yeri yadında dəqiq saxlamışdı. Bütün ətraf ağappaq şoran torpaq üstə adda-budda kiçik yovşan kollarından ibarət olsa da, bir neçə yulğun ağacı diqqət çəkirdi. Gedəcəyi ünvana hələ 60 klometr qaldığını yol kənarı göstəricidən oxudu. Dəqiq buradır. Yulğun ağaclarını görcək yəqin etdiyini qəti əminliklə xatırladı. Sürəti azaldıb, maşını saxladı.
Bu bir ildə heç nə dəyişməyib. Ucsuz-bucaqsız düzənlik kədərli və kimsəsiz görkəmi ilə günəşlə göz-gözə idi. İlk ağlına gələn buraların qaranlıq gecələrinin vahiməli səssizliyindəki mənzərənin necə olduğu oldu. Yəqin dilsiz-ağızsız şoran düzənlik dan doğuşunda hər səhər çox sevinir. Axı ona bu dünyada tək gülümsəyən yalnız günəşdir.
Ayaq ləpirləri qar üstündə düşən iz təki açıq-aydın qalırdı. Susuzluqdan çat-çat olmuş şoran yəqin ki, dərinliyində gizlətdiyi torpağa yorğanlıq edir. Ya da burda torpaq ölüb deyə şoranlıq onu dəfn edib.
Dünyanın belə səssiz və yetim qalmış yerində havadan belə kədər süzülür. Gülümsədi. Günəş şüalarının bayaq maşının icərisinə keçmək istədiyi təkidini indi başa düşürdü. Günəş də yəqin bu şoran düzənliklərə boylanmaqdan yorulur deyə.
İki gün idi ki, əməlli-başlı küsüşmüşdülər. Bir-birlərinə ərkləri payızın bu vədəsi yaz yağışı kimi yaxşıca islatmışdı onları. Hər ikisi də özünə söz vermişdi ki, daha barışmayacaqlar. Səsini eşitməsə sabahı açılmaz bildiyi, amma sabahın açılmağı o yana, hələ bir səfərə də çıxıb. Düzdür yuxusuz gecəsinin qaranlığı çəkilsə də milyon illərin günəşi bu səhər çox sönük və parıltısiz idi. Bəlkə də acığından onu bütün yol boyu şüşə arxasında qoymuşdu.
- Aaa bu nədir? -deyə lap ucadan qışqırdı. Təəccüblü səsi bütün ətrafa yayıldı. Az qala tapdalayacağı süpürgəgülü çiçəyinə sığal çəkmək üçün dizləri üstə çökdü. Süpürgəgülünün kiçiçik çıçəklərini qoxuladı. Çox ətirli idi. Ağappaq şoranlıqda çiçək açmış bu balaca fidan möcüzə idi. Susuz, torpaqsız, duzu dizə çıxan şoranlıqda kiçicik gözəllik onu məftun etmişdir. Qanırılıb özündən bir neçə metr aralıdakı yulğunlara baxdı.
Bu o yer idi ki, bir il əvvəl burda dayanıb indi iki gündüz bir gecə “küsülü” olduğu ilə telefon söhbəti etmişdi. Onun səsinin sehri çatdığı şoranlıqda belə gül bitirib. Nəhayətsiz üfüq xəttinə boylandı. Şoran düzənlik ona o qədər döğma gəldi ki…
“Ədəbiyyat və incəsənət”
(04.11.2023)
Bu gün Tolga Çevikin Bakı performansı olacaq
Onun yumoru Azərbaycanda çox sevilir.
“Arkadaşım” obrazı ilə milyonları güldürən Tolga Çevik “Tolgshow” adlı şousu ilə bu gün - noyabrın 4-də Bakıda tamaşaçıların qarşısına çıxacaq.
“Yönetmen” obrazını canlandıran Fırat Parlak və “Minik” ləqəbli musiqiçi Özer Atikin müşayiəti ilə tamamilə improvizasiya edilən şou Bakı Konqres Mərkəzində baş tutacaq.
Biletləri şəhərin kassalarından və iticket.az saytından əldə etmək olar.
“Ədəbiyyat və incəsənət”
(04.11.2023)
Sabah Emmanuil Vitorqan Bakıda “Həyat davam edir” adlı monotamaşa təqdim edəcək
Rusiyanın Xalq artisti Emmanuil Vitorqan sabah - noyabrın 5-də Heydər Əliyev Sarayında çıxış edəcək.
Rusiyalı aktyor “Həyat davam edir” adlı yeni yubiley monotamaşasını təqdim edəcək.
Vitorqanın bakılı tamaşaçılar önündə oynayacağı bu tamaşa onun mərhum həyat yoldaşı – 60 yaşında xərçəng xəstəliyindən dünyasını dəyişmiş Rusiyanın Xalq artisti Alla Balterə həsr olunub.
Rusiyanın teatr və kino aktyoru olan Emmanuil Vitorqan ekran əsərlərində parlaq obrazlar yaradıb. O, bu gün də səhnədə və kinoda yeni koloritli, dərin məzmunlu yaradıcılığı ilə fərqlənən aktyorlardan biridir.
Tamaşaya biletləri Iticket.az saytında və şəhərimizin kassalarında əldə etmək olar.
“Ədəbiyyat və incəsənət”
(04.11.2023)
