Super User
Tik-tak günü, elmli monqollar və Əliağanın makintoşu
Kənan Məmmədli, “Ədəbiyyat və incəsənət”
Bu da 29 dekabrın təqvimi. Hər vaxtınız xeyir! Beləcə, 2023-cü ilin son üç gününə gəlib çatdıq. Yeni il ərəfəsi dünya hansı bayramları, əlamətdar günləri qeyd edəcək?
“Tik Tak” günü
Bu bayram insanları bu müddət ərzində qarşılarına qoyduqları və həll etmədikləri planları həyata keçirmək üçün zamandan maksimum istifadəyə çağırır. Atalarımız gözəl deyiblər, bu günün işini sabaha qoyma. Biz bu günün onlarca işini sabaha qoyuruq, üst-üstə qalaqlanırlar, problemlərə çevrilirlər, sonra da altında qalıb inləyirik. Odur ki, təqvim başbilənlərinin elan etdikləri bu Tik-Tak günündən tam yararlanmağa çalışaq gəlin.
İndi isə tik-tak sözünün mənşəyindən danışım. Tik-takı çoxunuz tik-tokla qarışdırdınız, amma elə söz olaraq tik-tok da tik-takdan əmələ gəlib. Bir yaddaşınızı qurdalayın, marketlərdə görün nə qədər “Tik-tak” adlanan məhsulla rastlaşmısınız indiyənətən. Qigiyenik vasitələr, uşaq sabunları, əl kremləri, dünyaca məşhur İtaliya qənnadı brendi Ferreronun yumru şokoladları...
Tik-tak sözü saatın işlədikcə çıxardığı səsdir, bügünkü bayramın da əsil adı “vaxtın, zamanın qədrini bilin!”dir, əziz dostlar.
Monqolustanın müstəqilliyi günü
Sovetlərdən üzübəri gələn ənənə ilə kimlərəsə “tupoy manqol” deyib keylikdə qınayırıq, aşağılayırıq, əlbəttə ki bu, yanlış bir hərəkətdir, heç bir xalqı aşağılamaq olmaz. Və üstəlik, bu “tupoy manqol” dediklərimiz əsrlərlə dünyanın ən böyük imperiyalarına sahib olan, ən güclü dövlətləri belə çökdürüb öz itaəti altında saxlayan monqol-tatarların varisləridir. Monqol sərkərdəsi Çingiz xan dünya tarixinə ən böyük imperiyanın qurucusu kimi düşüb, o, 25 ildə Roma İnperiyasının 400 ildə qazandığından çox torpaq sahələri qazanıb.
Milliyyətcə monqol olan yazıçı dostum, “Minilliyin şairi” titulunu daşıyan Xaada Sendonu bu bayram münasibəti ilə təbrik edərək ondan monqollar və Monqolustan barədə o qədər maraqlı bilgilər aldım ki. Məsələn, Çingizxanın harda dəfn olunması bilinmir. Kitabələrin yazdığına görə, onu həddən artıq çox sevən əsgərləri dünyaya qan uddurması səbəbindən öləndən sonra qəbrinin açılacağı, murdarlanacağı qorxusu yaşayıblar, bu səbəbdən dəfnə gələn adamların hamısını Çingizxanın harada basdırıldığı sirrini açmasınlar deyə öldürüblər, sonra isə özləri də bu sirri açmasınlar deyə intihar ediblər. Maraqlıdır, deyilmi?
Keçək digərlərinə. İndiki monqolların əcdadları Monqolustanda eradan 85 min il əvvəl məskunlaşıblar; Dünyaca məşhur Orxon abidələri də bu ərazidə yerləşir;
Sahəsinə görə dünyanın ən böyük 16-cı dövləti olmasına baxmayaraq, ərazinin məskunlaşma baxımından əlverişsiz olması səbəbilə əhalisinin sayı cəmi 2,8 milyon nəfərdir, Monqolustan dünyada ən az əhali sıxlığı olan lider dövlətdir; Dənizə çıxışı olmayan dövlətlər arasında sahəsinə görə Monqolustan Qazaxıstandan sonra ikinci ən böyük dövlətdir; Dini baxımdan əhali buddistdir, monqollar induslardan sonra heç bir dinə etiqad etməyən ikinci ən böyük xalqdır; Dünyanın sahəsinə görə ən isti 3-cü səhrası Qobi Monqolustanda yerləşir; Ulan-Bator dünyanın ən soyuq paytaxt şəhəridir; Dünyada ən böyük abidə də Monqolustanda, patyaxtdan 54 kilometr aralıda qərarlaşıb. Bu, atını şahə qaldıran Çingizxanın abidəsidir. Postament 10 metr, abidənin hündürlüyü isə 40 metr olmaqla bu əllimetrlik abidənin ən yüksək hissəsində - atın başında seyrangah yaradılıb, insanlar həmin hündürlükdən ətrafa açılan gözəl panoramı seyr edirlər.
Hələ davamı da var. Monqolustanda insanların daimi qeydiyyatı aparılmır, belə ki, insanlar indinin özündə də köçəri həyat keçirir, paytaxt Ulan-Bator istisna olunmaqla digər yerlərdəkilər öz mal-qaralarını otara-otara tez-tez yerlərini dəyişirlər; Monqolustan adambaşına düşən mal-qara sayına görə dünyanın lider dövlətidir, burada 45 milyon mal-qara var; Əhali ilə bağlı Monqolustanın ən böyük problemi kişilərin sayının az olmasıdır. Sovetlər dönəmində SSRİ-nin təsir dairəsində olan sosialist Monqolustanında kişilərinin böyük qismini spirtli içkilərə aludə etməklə sanki ruslar onlardan tarix boyu yaşanan işğal olaylarına görə qisas alıblar, kişilər xroniki alkoqolizmdən əziyyət çəkiblər, sürətlə sayları azalıb. Kişilərin sayı az olduğu üçün bu ölkədə qızlar deyil, evlənəcək kişilər üçün başlıq pulu istənilir, Monqolustanda başlıq üçün mal-qara verilir.
Monqolların qəribə adət-ənənləri də var. Bir adamın ayağını taptalayanda onun əlini sıxmaq ənənəsi də dünyaya monqollardan gəlib. Qədim monqol inancına görə, sən ayağını taptadığın adamın əlini sıxıb onunla dostlaşmasan mütləq düşməninə çevriləcəksən; Monqollar fit çalmırlar, çünki miflərə görə fit çalınanda qəddar ruhlar gəlirlər; Hər yerdə qonağı duz-çörəklə qarşılayırlar, amma monqollar qonağı isti südlü çayla və duzla qarşılayırlar; Hər il Monqolustanda Min dəvə festivalı keçirilir. Məqsəd dünyaya sübut etməkdir ki, əsl dəvə ikihürgüclü olmalıdır. Halbuki indi dünyada yalnız birhürcüclü dəvələr yayılmaqdadır.
Monqolustanda ən populyar idman növü Bex adlanan güləş növüdür. Güləşçilər xüsusi kostyumlarda xalça üzərinə çıxıb güləşirlər, sinələri də açıq olur. Bunu ona görə ediblər ki, qabaqlar monqol qadınlarının Bex yarışmalarına qatılıb kişilərə qalib gəldiyi də olub, bu isə kişilik adına bir utancdır, ona görə də qadınlar yarışmalara qatılmasınlar deyə onların qadınlığını izhar edəcək sinəsiaçıq libas tətbiq olunur.
Və ən önəmlisi və təəccüblüsü: dünyada təhsilə ən çox diqqət yetirən monqol xalqı hesab edilir, belə ki, əhalisi köçəri həyat sürsə belə hakimiyyət köçəri təhsil proqramı yeridərək köçəri məktəblər və müəllimlər praktikasından istifadə etməklə uşaqların savadlanması qayğısına qalır, savadlıların sayına görə (98 faiz) Monqolustan dünya liderləri sırasında qərarlaşıb. Bu da sizin üçün “tupoy manqol”.
Xalq yazıçısı Əzizə Çəfərzadənin doğum günü
İcazənizlə, Əzizə xanım barəsində nisbətən geniş danışacağıq. Amma növbəti yazıda. Ədəbiyyat tariximizdə iz qoyan yazıçılardan biri, tarixi romanları ilə sevilən, şəxsiyyəti ilə ziyalılığa nümunə olan Əzizə Cəfərzadə ayrıca bəhs edilməyə layiqdir.
Xalq şairi Nüsrət Kəsəmənlinin doğum günü
Bizim yeniyetməlik illərimizin sevgi şairi, şeirlərini əzbərlədiyimiz, o şeirlərdən saf sevgi duyğuları aşıladığımız Nüsrət Kəsəmənli barədə necə qısa danışasan? Onun barəsində də ayrıca yazı olacaq.
Makintoş günü
29 dekabrda ukrainlərdə ordunun informasiya-media strukturları, İrlandiyada Konstitusiya, ABŞ-da isə Milli ətlə və tərəvəzlərlə ədvalı şorba günü qeyd olunacaq.
1891-ci ildə Tomas Edison Radionu ixtira edərək patentləşdirib. 1845-ci ildə Texas Meksikadan müstəqillik alaraq ABŞ-a ştat kimi birləşib. 1791-ci ildə Rusiya imperiyası Krımı işğal edib. 1775-ci ildə indiki Sankt-Peterburqdakı ən gözəl binaları tikmiş italiyalı memar Karl Rossi doğulub. 1766-cı ildə hazırkı makintoş adıyla məşhur parçanı kəşf edən şotland kimyaçısı Çarlz Makintoş dünyaya gəlib. Bu yerdə ölməz aktyorlarımız Bəşir Səfəroğlu ilə Əliağa Ağayevin ifasındakı məşhur səhnəcik yadıma düşdü. Kabibetinin yanmasından təşviş keçirən Əliağa Ağayev soruşur ki, bəs yanğın zamanı mənim təzə makintoş plaşım nə oldu? Bəşir Səfəroğulu da cavab verir ki, hamısı yavaş-yavaş yandı, amma sənin makintoş plaşın birdən yandı.
1709-cu ildə isə 1-ci Pyotrun qızı, rus impetatritsası Yelizaveta doğulub.
“Ədəbiyyat və incəsənət”
(29.12.2023)
Yazı makinasına “sevgilim” deyərmiş...
Bu gün Xalq yazıçısı Əzizə Çəfərzadənin doğum günüdür
Könül, “Ədəbiyyat və incəsənət”
Ədəbiyyat tariximizdə iz qoyan yazıçılardan biri, tarixi romanları ilə sevilən, şəxsiyyəti ilə ziyalılığa nümunə olan Əzizə Cəfərzadə əslən şamaxılıdır, 1921-ci il dekabr ayının 29-da Bakı şəhərində anadan olub. Qara gələn 1937-ci ildə əski əlifba ilə yazılan kitabların yandırılması əmri veriləndə Əzizə Cəfərzadə evlərindəki kitabları kisəyə yığaraq aparıb basdırıb ki, ələ keçməsinlər.
İlk gəncliyində pilot olmaq istəyib, aviasiya klubuna yazılıb, orada gələcək həyat yoldaşı ilə tanış olub. Müharibə başlayan ildə - 1941-ci ildə gənclər ailə qurublar, bir qızları dünyaya gəlib. Tale Əzizə Cəfərzadəyə qarşı amansız olub, uşaq qundaqda ikən Əzizənin əlindən düşüb, baş zədəsi alaraq tələf olub. Bir daha övladı olmayan qadın məcbur qalıb qardaşı oğlu Turanı oğulluğa götürüb.
Dövlət Universitetinə qəbul olan Əzizə əmək fəaliyyətinə çox erkən başlayıb, təhsil ala-ala müharibə illərində Ağsu rayonundakı Çaparlı kəndində müəllimlik edib. 1945-ci ildə o, növbəti zərbəni alıb, əlində ərəb əlifbası ilə çap olunan türk ədəbiyyatına aid kitab olduğuna görə universitetdən xaric edilib. Amma sonradan hər halda ekstern yolla universiteti bitirə bilib. Müharibəyə görə kişi kadrların çatışmadığı dönəm idi, Əzizə kimi savadlı xanımlara da zəruri ehtiyac yaranmışdı, 1944-1946-cı illərdə Əzizə C.Cabbarlı adına “Azərbaycanfilm” kinostudiyasında Ssenari şöbəsinin rəisi, sonra 1947-1949-cu illərdə teatr texniki məktəbinin müdiri, 1950-1955-ci illərdə Azərbaycan Pedaqoji İnstitutunda kafedra müdiri olub. İki il respublika xaricində çalışıb, uzaq Kamçatkada Pedaqoji İnstitutda dosentlik edib, 1957-1974- cü illərdə Azərbaycan EA Əlyazmalar İnstitutunda şöbə müdiri, 1974-cü ildən isə BDU-nun professoru olub.
Əzizə xanım ədəbi fəaliyyətə 16 yaşında başlayıb, 1937-ci ildə “Əzrayıl” adlı ilk hekayəsi “Ədəbiyyat” qəzetində çap edilib. Və çox maraqlı bir detal. Əzizə Cəfərzadə Azərbaycan Sovet ədəbiyyatında azadfikirli kimin tarixə düşən azsaylı yazarlardan biridir. Onun 1948-ci ildə nəşr edilmiş ilk kitabı Moskvanın xüsusi qərarı ilə satışa çıxmamışdan əvvəl qadağan olunaraq yandırılıb. O, Anna Axmatova kimi “burjua lirikasını” tərənnüm etməkdə günahlandırılıb.
Əzizə Cəfərzadənin əsərləri Azərbaycan dilinin saflığı və təmizliyi uğrunda mübarizənin bariz nümunəsinə çevrilmişdi, yüzlərlə oçerk, elmi tədqiqat və publisistik məqalələri dövri mətbuatda çap edilirdi. Klassik Azərbaycan ədəbiyyatının, xüsusilə də şifahi ədəbi irsimizin öyrənilməsi sahəsində elmi tədqiqat işləri də aparırdı bu fədakar insan.
1979-cu ildə Hacıqabulun Tağılı kəndində məktəb tikdirib. Bunun üçün Moskvada çap olunan kitablarının bütün qonorarını xərcləyib. Tikintinin sonuna az qalmış qiymətli mirvari boyunbağısını da satası olub.
Həyat yoldaşı Qana prezidentinin baş pilotu təyin olunanda Əzizə xanımın ömrünün Afrika dönəmi başlayıb, o zaman o, “Qızıl səyahət” adlı kitab yazıb. Ona yazıçı kimi şöhrəti isə Seyid Əzim Şirvaninin həyatından bəhs edən “Aləmdə səsim var” romanı gətirib. “Vətənə qayıt”, “Bakı-1501”, “Cəlaliyyə”, “İşığa doğru” kimi tarixi roman və povestləri də məşhur olub. Əsərləri bir çox xarici dillərə - rus, fars, tacik, ərəb, qazax və s. tərcümə edilib.
Əzizə Cəfərzadə biz tələbələrinə Azərbaycanı işğal etmiş Çar Rusiyası, Sovet imperiyası barədə həqiqətləri açıb söyləməkdən belə usanmırdı, hətta məlumat var ki, xüsusi orqanlar onun dərslərini izləmək üçün auditoriyalarda səsyazma cihazları gizlədirmişlər.
1981-1989-cu illərdə Əzizə xanım Respublika Qadınlar Şurasının sədri vəzifəsində çalışıb, “Xalqlar dostluğu” ordeni və müstəqil Azərbaycanın ali mükafatı olan “Şöhrət” ordeni ilə təltif edilib, 2001-ci ildə “Azərbaycan anası” və “Xalq yazıçısı” fəxri adına layiq görülüb, Azərbaycan Respublikası Prezidentinin fərdi təqaüdçüsü olub.
Yazı makinasına “sevgilim” deyərmiş. Ömrünün axırlarında yazı makinası ilə yaza bilmirmiş, barmaqları gücdən düşübmüş. Ona makinaçı tapsalar da, sonralar bundan imtina edib. Səsini diktafona yazdırıb sonra üzünü köçürtdürürmüş. Son Füzuli haqqında “Eşq sultanı” adlı romanını da diktofona diktə etmişdi.
Ürək çatışmazlığı varı idi, amma ailə üzvlərindən bunu gizlərdi. Sonralar bədəninə su yığılıb, 2003-cü il sentyabrın 4-də 82 yaşında vəfat edib. Onu vəsiyyətinə əsasən Hacıqabulun Tağılı kəndində - bir vaxtlar məktəb inşa etdirdiyi həmin kənddə dəfn eləyiblər.
Ruhu şad olsun bu böyük, aləmdə səsi qalan ziyalımızın!
“Ədəbiyyat və incəsənət”
(29.12.2023)
Vəfatından sonra Xalq şairi adı niyə verilməsin ki... - Nüsrət Kəsəmənlinin doğum gününə
Kənan Məmmədli, “Ədəbiyyat və incəsənət”
Həqiqətən də Nüsrət Kəsəmənli barədə saatlarca danışmaq olar. Şeirləri dillər əzbəri olub onun. Xüsusən sevgi şeirləri.
1946 -cı il dekabr ayının 29-da Qazaxda, Kəsəmən kəndində anadan olan Nüsrət Kəsəmənli bədii yaradıcılığa XX əsrin 60-cı illərində başlayıb, şeirlərinin əsas mövzusu məhəbbət olsa da, insanpərvərliyə, yеr üzərində əminamanlığa, vətənə, torpağa aid müxtəlif əsərlər yaradıb. Onun “Dəli bir ağlamaq kеçir könlümdən”, “Biri vardı, biri yox”, “Oğru olmaq istəyirəm” kimi şeirlərinin dillər əzbəri olması fenomenini isə heç kəs aça bilmir, Nüsrət Kəsəmənli Səməd Vurğundan sonra şeirlərini dillər əzbəri etmək missiyasını uğurla davam etdirib.
Nüsrət Kəsəmənlinin lirikası o qədər axıcı, gözəldir ki, hər şeiri özlüyündə bir mahnıdır sanki, təsadüfi deyil ki, “Dünya köhnə dünyadır”, “Unut kədərini”, “Allahım, ayırma bizi”, “Unuda bilməyəcəksən”, “Özümü aldadıram”, “Biri vardı, biri yox...” kimi yüzlərlə şeirinə musiqi bəstələnib.
Fəal ictimaiyyətçi olan Nüsrət Kəsəmənli 1981- 1984-cü illərdə Azərbaycan Yazıçılar İttifaqında Həmkarlar Komitəsinin sədri, Azərbaycan Tarix və Mədəniyyət Abidələri Mühafizə Cəmiyyətinin üzvü, Azərbaycan Yazıçılar İttifaqının VI, VII qurultayında idarə heyətinin üzvü, Poeziya şurasının sədri seçilib, 1985-ci ildən C.Cabbarlı adına “Azərbaycanfilm” kinostudiyasında baş redaktor kimi çalışıb, 1982-ci ildə respublika Lenin komsomolu mükafatı laureatı olub.
Əfsuslar olsun ki, böyük şair çox az ömür yaşayıb, 2003-cü il oktyabr ayının 16-da 57 yaşında müalicə aldığı Təbriz şəhərində vəfat edib.
Nüsrət Kəsəmənli yüz minlərin yaddaşındadır, ədalətsizlik edib xalq şairi titulunu ondan əsirgəsələr də o, həqiqətən xalqın şairidir. Əminik ki, ədalət haçansa bərpa ediləcək, ona ölümündən sonra Azərbaycanın Xalq Şairi fəxri adı veriləcək. Çox inanırıq!
Könlünə dəydiyim, incitdiyim qız,
Vüqar kölgəsində yatdığım bəsdir,
Odlu yanağından su içdiyim qız,
Bu qədər günaha batdığım bəsdir.
Daha dodaqların titrəməsin qoy,
Mən sənin qarşında titrəyim, əsim,
Səndən dünyaları istəmirəm, yox,
Məni bağışlasan, bəsimdir, bəsim.
Yan desən, alışıb yana bilərəm.
Don desən, yerimdə dona bilərəm!
İndi bilmişəm ki, ömür-gün gedir,
Ən gözəl hisslərim keçir könlümdən,
Qayıt! Sən ömrümə təzəlik gətir;
Dəli bir ağlamaq keçir könlümdən.
“Ədəbiyyat və incəsənət”
(29.12.2023)
Rus Dram Teatrı 2024-cü ilin ilk premyerasına hazırlaşır
Azərbaycan Dövlət Akademik Rus Dram Teatrı 2024-cü ilin ilk premyerasına hazırlaşır, sənət ocağı yanvarın 13-də rus ədəbi Valentin Krasnoqorovun eyniadlı pyesi əsasında hazırlanan “Üç gözəl” lirik komediyası ilə teatrsevərlərin görüşünə gələcək.
Pyesin məzmunu belədir ki, adi axşamların birində üç rəfiqə qərara alırlar ki, həyatlarında dönüş etsinlər – əsl məhəbbətin axtarışına çıxsınlar. Müxtəlif xarakterli fərqli taleli üç rəfiqə, üç gözəl qadın öz həyatını kökündən dəyişməyə qərar verir.
Tamaşanın quruluşçu rejissoru Xalq artisti Aleksandr Şarovskidir. Əməkdar mədəniyyət işçiləri Aleksandr Fyodorov (dekorasiya üzrə rəssam), Olqa Abbasova (geyim üzrə rəssam) və Vladimir Neverov (musiqi tərtibatçısı) tamaşanın ərsəyə gəlməsinə əmək sərf ediblər.
Tamaşada teatrın üç gözəl aktrisasını – Xalq artisti Ayan Mirqasımova, Əməkdar artist Mələk Abaszadə və aktrisa Mədinə Mullayeva rol alıb.
“Ədəbiyyat və incəsənət”
(29.12.2023)
“ASAN xidmət” “Vəkilliyin dostu” mükafatı ilə təltif edilib
28 Dekabr - Vəkil Günü peşə bayramı münasibətilə Vəkillər Kollegiyasının iclası keçirilib. Tədbirdə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, Konstitusiya Məhkəməsinin sədri Fərhad Abdullayev, Milli Məclisin Sədrinin 1-ci müavini Əli Hüseynli, Baş prokurorun müavini Heydər Məmmədov, bir sıra təhsil müəssisəsinin nümayəndələri, vəkil qurumlarının rəhbərləri, hüquq müdafiəçiləri və media nümayəndələri iştirak ediblər.
“Ədəbiyyat və incəsənət” portalına “ASAN xidmət”dən daxil məlumata görə, qurum vətəndaşlara hüquqi yardım və vəkillik xidmətlərini təmin etdiyinə görə “Vəkilliyin dostu” mükafatı ilə təltif edilib.
Mükafat Dövlət Agentliyinin sədri Ülvi Mehdiyevə təqdim edilib.
“Ədəbiyyat və incəsənət”
(28.12.2029)
“YAŞAT” Fondu tərəfindən dəstək tədbirləri davam edir
Müharibə əlilləri Hüseyn və Həsən Həmidovlar Vətən müharibəsində ölkəmizin suverenliyi uğrunda vuruşub və ağır yaralanıblar. “Cəsur döyüşçü”, “Füzulinin azad olunmasına görə”, “Xocavəndin azad olunmasına görə” medalları ilə təltif olunan qazilərimizin tibbi xərcləri “YAŞAT” Fondu tərəfindən qarşılanıb. Bu barədə “Ədəbiyyat və incəsənət” portalına “YAŞAT” Fondundan məlumat daxil olub.
Allah şəfa versin!
“YAŞAT” Fondunun hesabatları və xərclənən vəsaitlərlə bağlı ətraflı məlumatı yashat.gov.az rəsmi internet saytının “Hesabatlar” (https://yashat.gov.az/report/tableau) bölməsindən əldə edə bilərsiniz.
"Youtube" keçid: https://youtu.be/5-9diU8Hti0
Televiziyalarda yayımlanması üçün yüksək keyfiyyətli formada link: https://we.tl/t-tVf2DBcDzU
“Ədəbiyyat və incəsənət”
(28.12.2023)
Beynəlxalq Kino Günü münasibətilə təbrik
Milli Məclisin Mədəniyyət Komitəsi bu gün qeyd edilən Beynəlxalq Kino Günü münasibətilə kino ictimaiyyətinə təbrik mətni ünvanlayıb. Mətndə deyilir:
“Bu gün Yer üzündə Beynəlxalq Kino Günü qeyd olunur.
28.12.1895-ci ildə Lui və Oqyust Lümyer qardaşları Parisin Kapusin bulvarındakı kiçik kafedə ilk dəfə özlərinin çəkdiyi qısametrajlı filmlərin ödənişli nümayişini təşkil edib. Filmlərin arasında 46 saniyəlik “Fəhlələrin Lümyer fabrikindən çıxması” ekran əsəri də vardı.
Lümyer qardaşları hesab edirdi ki, kino həyat səhnələrinin nümayişindən başqa bir şey deyil (və olmayacaq). Qardaşlar belə hesab edirdi ki, kinoya maraq tezliklə sönüb keçəcək; lakin belə olmadı... Qardaşlar kino nümayişində nə qədər doğru iş görmüşdülərsə, bu işin gələcəyi haqqında bir o qədər yanılmışdı... - Kino körpə uşaq kimi, öncə "danışa bilmir"di... Tamaşaçılar aktyorların hərəkətləri, üz-gözünü büzməsi ilə əylənirdi.
Ayrıca, bir çoxları belə düşünürdü, kino teatrı sıradan çıxaracaq. - Bu təsəvvür də doğrulmadı.
Parisdəki ilk kinoseansdan təqribən iki il sonra – 02.08.1898-ci ildə Bakı Elmi-Foto Dərnəyinin katibi, naşir və fotoqraf Aleksandr Mişon özünün lentə aldığı “Bibiheybətdə neft fontanı yanğını”, “Əlahəzrət Buxara əmirinin yolasalma mərasimi”, “Qafqaz rəqsi” xronikal sənədli və “İlişdin” adlı bədii süjetlərini nümayiş etdirdi. Beləliklə, bu ilin avqustunda Azərbaycanda milli kinonun yaranmasının 125-ci ildönümü tamam oldu.
Ötən yüzilliyin əvvəllərində “Pate”, “Pirone”, “Filma” kimi xarici kino şirkətləri Bakıda öz filiallarını açaraq, film istehsalı ilə məşğul oldu.
1916-cı ildə “Neft və milyonlar səltənətində” (İbrahim bəy Musabəyovun eyniadlı povesti əsasında), 1917-ci ildə isə “Arşın mal alan” (Üzeyir bəy Hacıbəylinin eyniadlı operettası əsasında) qısametrajlı bədii filmi çəkildi.
Azərbaycan Xalq Cümhuriyyəti dönəmində hökumət bir çox mədəni-siyasi islahatlar həyata keçirdi. Dünya kinosunun ilk örnəkləri Bakıya gətirildi, ictimai baxışlara təkan verildi; bununla da Bakıda kinematoqrafiya həvəskarlarının sayı artmağa başladı və onlar 1918-ci ildə “Kinematoqrafiya və teatr qulluqçuları şurası”nda birləşdi.
Azərbaycanda sovet hakimiyyəti qurulduqdan sonra (1923-cü ildə) respublikamızda Azərbaycan Foto-Kino İdarəsi (AFKİ) yaradıldı və az sonra Birinci Dövlət Kinofabriki açıldı. Həmin fabrikdə çəkilən ilk film xalq əfsanəsinin motivləri əsasında araya-ərsəyə gətirilmiş “Qız qalası” bədii filmi oldu.
Sonra kinostudiya “Azdövlətkino”, “Azərkino”, “Azərfilm”, “Azdövlətkinosənaye”, “Bakı kinostudiyası” və “Azərbaycanfilm” adı ilə öz fəaliyyətini davam və inkişaf etdirdi. 1960-cı ildən isə “Azərbaycanfilm” kinostudiyası (Azərbaycan dramaturgiyasında sosial realizmin yaradıcısı, görkəmli dramaturq, şair və nasir, teatrşünas, kinoşünas, tərcüməçi, rejissor, Əməkdar incəsənət xadimi) Cəfər Cabbarlının adını daşıyır.
“Azərbaycanfilm”də indiyədək 2000-dən çox (fərqli növ və janrda) film istehsal olunub. Onların bir bölümü, o cümlədən “Arşın mal alan”, “Şərikli çörək”, “Ad günü”, “Sevinc buxtası”, “İstintaq”, “Yaramaz” və b. Dövlət mükafatlarına, bir çox film, o cümlədən “Ögey ana”, “Uzaq sahillərdə”, “Arşın mal alan”, “Bizim Cəbiş müəllim”, “Axırıncı aşırım”, “Nəsimi”, “Özgə vaxt”, “Sarı gəlin”, “Ovsunçu”, “Buta”, “Çölçü”, “Nabat”, “Axınla aşağı” və d. beynəlxalq və digər kinofestivalların ödüllərinə layiq görülüb.
Bu il 125-ci ildönümünü qeyd etdiyimiz Azərbaycan kino sənəti ötən müddətdə əlamətdar hadisələrlə zəngin özünəxas inkişaf yolu keçərək, xalqımızın mədəni-mənəvi həyatında önəmli rol oynayıb.
Azərbaycan kinosunun 120 illiyinin qeyd olunması haqqında Prezident İlham Əliyevin 31.01.2018-ci ildə imzaladığı Sərəncam əsasında ölkəmizin hər yerində silsilə tədbirlər keçirilib.
Azərbaycan kinosu böyük tarixə malikdir. Bu illər içində respublika həyatının müxtəlif sahələrinə aid filmlər çəkilib. Bu gün gənclərimiz bir sıra yaxın-uzaq ölkədə kino sahəsində təhsil alır; eyni zamanda, ölkəmiz müxtəlif ölkələrdə keçirilən film festivallarında uğurla iştirak edir.
Beynəlxalq Kuno Günü ilə bağlı bütün kino işçilərimizi, bu sahədə xidmətlər göstərmiş sənətkarlarımızı təbrik edir, yeni sənət uğurları diləyirik!”
“Ədəbiyyat və incəsənət”
(28.12.2023)
“Avronun atası" vəfat elədi
98 yaşı olan və "avronun atası" adlandırılan Avropa Komissiyasının keçmiş prezidenti Jak Delor vəfat eləyib. Bu barədə xəbəri “Ədəbiyyat və incəsənət” portalı bu saatda Euronews-dan iqtibas edib.
Avropa Komissiyasının keçmiş prezidenti Jak Deloron ötən gün 98 yaşında vəfat etməsi xəbərini qızı Martina Aubrey bildirib.
O, “bu səhər atam Parisdəki evində yuxuda ikən öldü" deyib.
Delor 1985-1995-ci illərdə Avropa Komissiyasının sədri olub. Onun rəhbərliyi altında hazırlanmış Delor Planı vahid Avropa valyutasının - avronun tətbiqinə başlamağa imkan verib.
1995-ci ildə sosialistlər Deloru Fransadakı prezident seçkilərində irəli sürmək istədilər, lakin yeni partiya lideri Henri Emmanuelli ilə fikir ayrılıqları səbəbindən o, namizədliyini geri götürdü. Delor daha sonra gələcək seçki qalibi, mərkəz sağçı Jak Şirakın rəy sorğularında üstünlüyünə görə seçkilərdən yan keçdi. Halbuki o, ölkə prezidenti olmağa yaxın idi.
Fransa prezidenti Emmanuel Makron Delorun ölümünü belə şərh edib: “Fransız taleyi olan dövlət xadimi, Avropamızın yorulmaz yaradıcısı, insan ədaləti uğrunda mübarizə aparan dahi".
“Jak Delor Avropamızı daha da gücləndirən vizyoner idi. Onun həyat amalı vahid, dinamik və çiçəklənən Avropa Birliyi idi. O, mən də daxil olmaqla avropalıların bütün nəsillərini formalaşdırdı. Gəlin Avropamızı daim yeniləyərək bu şəxsin irsinə hörmət edək", - bu isə Avropa Komissiyasının hazırkı sədri Ursula fon der Leyenin fikirləridir.
Fransa Azərbaycana qarşı sərt təpki göstərir, indi də bizə aid abidələrə qarşı dözülməzlik nümayiş etdirirlər.
Amma biz mərd və ədalətli xalqıq. Biz vəfat etmiş bir məşhur fransalının adını çəkməyə özümüzdə güc hiss etdik.
“Ədəbiyyat və incəsənət”
(28.12.2023)
Moskvada azərbaycanlılar “Vətən” şeir müsabiqəsi keçiriblər
Moskvada Azərbaycan Mədəniyyətinin İnkişafı Fondu (AMİF) ilə Yenises.ru portalının birgə layihəsi olan “Vətən” şeir müsabiqənin yekunlarına həsr olunmuş təntənəli tədbir keçirilib.
İctimai Təşkilatların Moskva Evi-Kovorkinq Mərkəzində keçirilən tədbiri jurnalist Cəfərsadıq Abbasov açıb. AzərTAC-ın Moskva müxbirinin verdiyi məlumata görə, sonra çıxış edən AMİF-in rəhbəri Şamil Qurbanov Fondun Dünya Azərbaycanlılarının Həmrəyliyi Günü ərəfəsində Ulu Öndər Heydər Əliyevin 100 illik yubileyi münasibətilə keçirdiyi müsabiqənin “Vətən” adlandırılmasının təsadüfi olmadığını qeyd edib. O, Rusiya -Azərbaycan, mədəni-ədəbi əlaqələrinin inkişafına təkan verən bu səpkili tədbirlərin gənc nəslə Vətənə, ədəbiyyata sevgi aşılamaq yönündə faydasından danışıb.
Tədbirdə iştirak edən Moskva şəhəri Ryazanski bələdiyyə dairəsi Deputatlar Şurasının deputatı Nikolay Porodin Rusiya-Azərbaycan dostluğu çərçivəsində təşkil olunmuş müsabiqəyə yüksək qiymət verərək, Moskva şəhəri, Ryazansk rayon icra hakimiyyətinin başçısı Anatoli Yevseyevin təbrik məktubunu oxuyub.
Azərbaycan və Avrasiya Yazıçılar birliyinin üzvü, şair, tərcüməçi Afaq Şıxlı, Azərbaycan Yazıçılar Birliyinin üzvü, tanınmış yazıçı-şair Südabə Sərvi, tanınmış psixoloq, Rusiya İctimai Komitəsinin üzvü, şair Zirəddin Rzayev, Rusiya Yazıçılar Birliyinin üzvü, jurnalist Cəfərsadıq Abbasov və Yenises.ru informasiya portalının rəhbəri, jurnalist Tünzalə Vəliqızının təmsil olunduğu münsiflər heyəti tədbir boyu ilk onluğa düşən qalib şeirləri səsləndiriblər.
Gecənin ən həlledici və həyəcanlı məqamı isə qaliblərin adının elan edilməsi olub. Qaliblərin adını Zirəddin Rzayev, Afaq Şıxlı və Azərbaycanın Rusiyadakı səfirliyinin müşaviri Orxan Hacıyev açıqlayıblar.
Onu da qeyd etmək yerinə düşər ki, müsabiqəyə Azərbaycan, Rusiya, Türkiyə, Belarus, Çexiya və bir çox digər ölkələrdən poeziyasevərlər öz şeirlərini göndəriblər.
Müsabiqənin ən kiçik iştirakçısı isə Belorusun Minsk şəhərindən olan Lyubov Mixonskaya idi. Onun İkinci Dünya müharibəsi qəhrəmanı, həmyerlimiz Nəcəfqulu Rəfiyev haqqında yazdığı şeir “Münsiflərin rəğbəti” mükafatına layiq görülüb.
Müsabiqənin 7 qalibi pul mükafatı və Azərbaycan Mədəniyyətinin İnkişafı Fondunun diplomuna layiq görülüb.
“Ədəbiyyat və incəsənət” portalının əldə etdiyi məlumata görə, qaliblər arasında istedadlı gənc şairlər İntiqam Yaşar və Ruslan Dost Əli də var.
“Ədəbiyyat və incəsənət”
(28.12.2023)
Buzlaşma, Daş dövrləri olub, indi də "Tədbirlər" dövrüdür
Sadıq Qarayev yazır
“Ədəbiyyat və incəsənət”in Gülüş klubunda bu gün alim və romançı kimi tanıdığımız, amma həm də güclü satirik qələmi olan Sadıq Qarayevdir. Gileyimiz isə səngimək bilməyən tədbirlərdəndir.
Çöx qəribədir, elə bil buzlaşırıq, daşlaşırıq bu tədbirlərdə, ömürümüzü, günümüzü, əsas da iş saatlarını itiririk.
Bəlkə də müasir zamanda heç kim işləmir, hamı tədbir keçirir, tədbirdə olur, bir də maşın sürür, ya maşında olur.
Günün günorta çağı Bakının hansı küçəsinə, prospektinə baxırsan, tıxacdır. Taksiləri, avtobusları, yük daşıyan maşınları anladıq, bəs bu xarici, bahalı avtomobillər hara gedir, hardan gəlir? Bəs bunlar haradasa işləmir? İşləmirsə bu maşınları necə alıblar, işləyirlərsə yollarda nə edirlər?
5 gün əvvəl AYB-də tədbir keçirəcəkdik. Onunla əlaqəli bir sıra şəxsləri dəvət edən zaman qəribə mənzərə ilə rastlaşdım. Ən zəifinin həmn gün 2 tədbiri var idi. O deyir tədbirdə olacam, bu deyir konfransdayam, digəri deyir iclasda olacam, ordan tədbirə keçəcəyəm, ordan da qutultaya qatılacağam…
VALLAH məttəl qaldım. Bu qədər tədbir olar?
İndi bu tədbirlərin çox maraqlı tərəfləri də var e...
3-4 yerdən tədbirə çağırılanlar başlayır götür-qoy etməyə, hansı pristijlidir, kim çağırıb, orada mənə söz veriləcək, ya yox? Kimlərlə şəkil çəkdirə biləcəm və s.
Başlayırlar tədbir haqqında tədbir tökməyə.
Məsələnin bu tərəfi də var ki, sual yaranlr: mənim, bizim tədbirə kimlər, nəçilər gəlmişdir? Məni tədbirə çağıran mənim tədbrimdə iştirak etmişdimi?
O yollardakı maşınların da çoxu iş vaxtlarında ola bilsin ki, tədbirlərə adam daşıyırlar. Yekə tədbirlərə sürətlə, balacalara ehmalla gedirlər.
Bilmək olmur ki...
Tədbirlərin ən yaxşısı sonu yeyib- içməklə bitən sayılır.
Ən pisi baş işlədilən, sorğu-sual olunanıdır.
Amma bir şeyi unutmaq olmaz ki, ən gözəl tədbir faydalı işlə məşğul olmaqdır.
Şəkil çəkdirmək, boş-boş sözlər danışıb camaatı dəng etməklə xidmət etmək olmaz.
Ortaya dəyər, zəhmətin nəticələrini qoymaq lazımdır.
Tədbirlər haqqında tədbir görmək lazımdır bir sözlə!
“Ədəbiyyat və incəsənət”
(28.12.2023)
