Super User
Gəncədə “Azərbaycan kəlağayılarının təbliği" adlı konsert keçirildi
Könül, “Ədəbiyyat və incəsənət”
Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə "Mirvarid Dilbazi Poeziya Məclisi" İctimai Birliyinin 2024-cü il kiçik qrant müsabiqəsində həyata keçirdiyi ''Azərbaycan kəlağayılarının təbliği'' layihəsi çərçivəsində kəlağayıdan bəhs edən konsertlərə start verilib.
Mirvarid Dilbazi Poeziya Məclisi İctimai Birliyinin sədri, Kəlağayı Muzeyinin direktoru, layihə rəhbəri Güllü Eldar Tomarlıya müraciət edərək ondan layihənin icrası ilə bağlı aşağıdakı məlumatı aldıq:
-Layihə əsasında rellaşan ilk konsert 7 iyul 2024-cü ildə Gəncə şəhərindən start götürüb. Layihə çərçivəsində “Azərbaycan kəlağayılarının təbliği" adlı konsert tamaşaçılara təqdim olunub.
Konserti giriş sözü ilə İctimai Birliyin sədri və layihə rəhbəri olaraq açaraq qonaqları salamladım. Torpaqlarımızın azadlığı, ərazi bütövlüyü uğrunda canlarından keçən şəhidlərimizin əziz xatirəsi bir dəqiqəlik sükutla yad edildi.
Sonra mən layihənin mahiyyəti haqqında ətraflı məlumat verərək Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinə maliyyə dəstəyinə görə təşəkkür etdim. "Mirvarid Dilbazi Poeziya Məclisi" İctimai Birliyinin 2024-cü il kiçik qrant müsabiqəsində həyata keçirdiyi ' Azərbaycan kəlağayılarının təbliği'' layihəsi çərçivəsində Bakı, Gəncə, Qazax, Şəki və Şamaxı rayonlarında kəlağayıdan bəhs edən konsertlərin keçiriləcəyini bildirdim.
Qeyd etdim ki, Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyevanın misilsiz xidmətləri, yorulmaz səyləri nəticəsində ölkəmizin 23 qeyri-maddi mədəni irs nümunəsi YUNESKO-nun Qeyri-maddi Mədəni İrs üzrə Reprezentativ Siyahısına daxil edilmişdir. Onlardan biri də ənənəvi 24-28 noyabr 2014-cü il tarixdə Parisdə keçirilən Qeyri-maddi Mədəni İrsin Qorunması üzrə Hökumətlərarası Komitəsinin 9-cu siyahısında Kəlağayı sənəti və simvolizmi, qadın ipək baş örtüklərinin hazırlanması və istifadə olunması UNESCO-nun Qeyri-maddi Mədəni İrs üzrə reprezentativ siyahısına daxil edilmişdir. Bu münasibətilə 26 Noyabr – Azərbaycan Kəlağayısı Günü kimi qeyd olunur. Kəlağayı tariximiz, mədəniyyətimiz, yaraşığımızdır! Kəlağayı – Azərbaycanda qadınlara məxsus, ipək sapdan toxunmuş dördkünc formalı baş örtüyüdür. Ölkəmizin qərb zonasında buna “çarqat” da deyilir. Bu örtük gözəllik, ismət, ləyaqət, ehtiram, sədaqət rəmzi olmaqla yanaşı, özündə Odlar Yurdu Azərbaycanın qədim tarixini, mədəniyyətini, adət-ənənələrini yaşadır. Kəlağayı istehsalı Azərbaycanda qədimdən məlumdur. Təbriz, Gəncə, Şamaxı, Şəki, Naxçıvan şəhərlərində yüksək keyfiyyətli kəlağayılar hazırlanırdı. Bu baş örtüyünün bir çox bölgələrdə istehsal olunmasına baxmayaraq, kəlağayı şimal qərbdə yerləşən İsmayıllı rayonun Basqal qəsəbəsində və Şəki şəhərində daha geniş yayılmışdır. ''Azərbaycan kəlağayılarının təbliği'' layihəsi çərçivəsində kəlağayıdan bəhs edən ədəbi-bədii gecələrin təşkil olunmasında da əsas məqsəd milli atributlarımızdan olan, analarımızın ismət rəmzi sayılan kəlağayını, kəlağayı sənətini yaşatmaq, təbliğ etməkdir.
Azərbaycanın müqəddəs atributlarından biri olan, analarımızın, nənələrimizin yaraşığı olan kəlağayı haqqında keçirilən tədbirlərin sevgilərlə, heyranlıqla, alqışlarla qarşılandığından qürur duyduğumu qeyd etdim. Çıxışımda kəlağayımıza Cənab Prezident İlham Əliyev, Birinci vitse-prezident Mehriban xanım Əliyeva tərəfindən dövlət səviyyəsində qiymət verildiyini, dünyada tanıdılması istiqamətində məqsədyönlü işlər görüldüyünü vurğuladım.
Azərbaycan xalqının milli-mənəvi dəyərlər sistemində və adət-ənənələrimizdə ən mühüm mədəniyyət nümunələrimizdən olan kəlağayının əvvəlki şan şöhrətini özünə qaytarmaq üçün təbliğinə böyük ehtiyac vardır. Belə təbliğ formalarından ədəbi-bədii gecələrin, konsertlərin, festivalların təşkilidir. Təklif etdiyimiz layihə çərçivəsində Bakıda və dörd regonda Azərbaycan kəlağayısının beynəlxalq səviyyədə tanınmasının 10 illiyi münasibətilə konsert proqramları və qədimi kəlağayıların sərgisi keçiriləcək. Hesab edirik ki, belə təbliğat vasitəsi kəlağayımızın əvvəlki şan-şöhrətini özünə qaytarmaqla yanaşı yeniyetmə və gənclər arasında istifadəsini daha da artıracaqdır.
Sonra isə söz, Əməkdar mədəniyyət işçisi, aşıq Solmaz Kosayevaya verildi. O, kəlağayının təbliği, yaşadılması, gələcək nəsillərə ötürülməsi üçün bu layihənin çox önəmli və vacib olduğunu bildirdi. Tədbirdə Mirvarid Dilbazi Poeziya Məclisinin üzvləri- şair Brilyant Atəş, Mələk İsmayıl, Gəncə şəhər 10 saylı məktəbin müəllimi Aybəniz Murğuzova kəlağayı haqqında yazdııqları şeirləri söylədilər.
Aşıq Elbrus Hüseynov, aşıq Firəddin Mehdiyev, balabançı Yaşar Abbasov, Gəncə İncəsənət məktəbinin şagirdləri İlahə Əliyeva, Nicat Abişov, Gəncə-Daşkəsən Regional Mədəniyyət idarəsinin Gəncə Uşaq İncəsənət məktəbinin ''Gəncə Qönçələri'' rəqs ansamblının üzvləri Amin Əliyev və Ümid Məmmədli çıxışları ilə tamaşaçılara xoş ovqat bəxş etdilər. Kəlağayıdan bəhs edən Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə "Mirvarid Dilbazi Poeziya Məclisi" İctimai Birliyi tərəfindən hazırlanmış “Azərbaycan kəlağayısının təbliği” adlı konsert tamaşaçılar tərəfindən sevgilərlə, alqışlarla qarşılandı.
"Mirvarid Dilbazi Poeziya Məclisi" İctimai Birliyinin sədr müavini Vüsal Sehranoğlu çıxış edərək, tədbir iştirakçılarını salamlayaraq, Gəncədə olmaqdan məmnunluq hissi duyduğunu söylədi. Vüsal Sehranoğlu kəlağayı sənətinin yaranma tarixindən söz açaraq bu sənətin qədim sənət olduğunu söylədi. "Mirvarid Dilbazi Poeziya Məclisi" İctimai Birliyi olaraq kəlağayının yaşadılması, tanıdılması, gələcək nəsillərə ötürülməsi üçün təqdirəlayiq işlər həyata keçirildiyini bildirdi. “Azərbaycan kəlağayısının təbliği” adlı layihənin də həmin silsilə tədbirlərin davamı olduğunu qeyd etdi və maliyyə dəstəyi üçün Azərbaycan Respublikasının Qeyri Hökumət Təşkilatları Dövlət Dəstəyi Agentliyinə minnətdarlığını bildirdi.
Bir-birindən rəngarəng musiqi töhfələri, saz havaları, kəlağayı haqqında şeirlər, rəqslər alqışlarla qarşılandı.
Sonda Azərbayycan Respublikasının Qeyri Hökumət Təşkilatlarına Dövlət Dəstəyi Agentliyinə maddi dəstək üçün, Gəncə şəhəri İcra Hakimiyyətinə, Gəncə- Daşkəsən Regional Mədəniyyət idarəsinə, Gəncə Dövlət Kukla Teatrının direktoru Fərmail Paşayevə təşkilati dəstək üçün təşəkkürümüzü bildirdik.
Növbəti aəfərimiz Qazağadır.
“Ədəbiyyat və incəsənət”
(09.07.2024)
Cəlil Məmmədquluzadə yaradıcılığı Avstriya ədəbiyyat portalında
Avstriyanın “Gedichtesammlung.net” ədəbiyyat portalı Dövlət Tərcümə Mərkəzinin “Azərbaycan ədəbiyyatı beynəlxalq virtual aləmdə” layihəsi çərçivəsində görkəmli Azərbaycan yazıçısı və dramaturqu Cəlil Məmmədquluzadənin alman dilinə tərcümə edilmiş “Poçt qutusu” hekayəsinin yayımına başlayıb.
“Ədəbiyyat və incəsənət” portalı xəbər verir ki, bu barədə Tərcümə Mərkəzi məlumat yayıb. Məlumata görə, yazıçının yaradıcılığı haqqında məlumatla təqdim olunan hekayənin alman dilinə tərcümə müəllifləri tanınmış Avstriya tərcüməçisi, filoloq Andreas Kriber və alman dili mütəxəssisi Cəfər Cəfərovdur.
Qeyd edək ki, geniş oxucu auditoriyası tərəfindən izlənən portal mütəmadi olaraq səhifələrində Yohann Volfqanq Höte, Fridrix Şiller, Fyodor Dostoyevski, Frans Kafka, Erix Kestner, Pablo Neruda kimi dünyaşöhrətli yazıçı və şairlərin yaradıcılığına yer ayırır.
“Ədəbiyyat və incəsənət”
(09.07.2024)
Elza Seyidcahan bu dəfə uşaqlar üçün
İyulun 9-da Azərbaycan Dövlət Kukla Teatrında Əməkdar artist, bəstəkar və ifaçı Elza Seyidcahanın 55 illiyinə həsr olunmuş “Elza və kuklalar” adlı tədbir keçiriləcək.
Teatrdan AzərTAC-a bildirilib ki, bəstəkarın yubiley görüşündə onun uşaq və yeniyetmələr üçün yazdığı mahnılar səslənəcək.
Populyar estrada mahnıları səhnəmizin tanınan simaları ilə yanaşı “Oyuq” Sənət Məktəbi yetirmələrinin ifasında solo və xor nömrələri kimi təqdim olunacaq.
Yubiley gecəsi E. Seyidcahanın bəstəkarı olduğu “Şəngülüm, Məngülüm” tamaşasının nümayişi ilə bitəcək.
Xatırladaq ki, Mikayıl Müşfiqin yazdığı “Şəngülüm, Şüngülüm və Məngülüm” adlı kiçik poema əsasında hazırlanan tamaşa yeni səhnələşdirmədə “Şəngülüm, Məngülüm” kimi (2017) təqdim olunub. Teatrın baş rejissoru Anar Məmmədovun quruluş verdiyi tamaşanın quruluşçu rəssamı İqbal Əliyev, bəstəkarı Əməkdar artist Elza Seyidcahandır. Ümumilikdə 12 mahnının yer aldığı tamaşanın ifaçısı Akademik Musiqili Teatrın aktrisası Ülviyyə Əliyevadır.
“Ədəbiyyat və incəsənət”
(09.07.2024)
Tovuzda kitab təqdimatı
İyulun 8-də Tovuz rayonunda, Azərbaycan Aşıq Sənəti Dövlət Muzeyində- Azərbaycan Respublikası Mədəniyyət Nazirliyi, Qazax-Tovuz Regional Mədəniyyət idarəsi və Mirvarid Dilbazi Poeziya Məclisi İB-nin birgə təşkilatçılığı ilə AJB-nin üzvü, şair, publisist Brilyant Atəşin ''Nənəmin kəlağayısı'' kitabının təqdimatı keçirildi.
“Ədəbiyyat və incəsənət” portalına Mirvarid Dilbazi Poeziya Məclisi İB-dən verilən məlumata görə, kitab Mirvarid Dilbazi Poeziya Məclisinin mənəvi dəstəyi ilə işıq üzü görüb. Kitabın redaktoru Güllü Eldar Tomarlı, məsləhətçi Barat Vüsal, rəyçilər- Xatirə Dilbazi, Vüsal Sehranoğludu.
Tədbiri giriş sözü ilə Mirvarid Dilbazi Poeziya Məclisinin sədri, Kəlağayı Muzeyinin direktoru Güllü Eldar Tomarlı açdı , vətənimizin azadlığı, suverinliyi, bütövlü uğrunda canından keçən şəhidlərimizin əziz xatirəsi bir dəqiqəlik sükutla yad edildi. Dövlət himnimiz səsləndirildi.
Söz AYB-nin Qazax filialının sədri, ictimai xadim, şair, publisist Barat Vüsala verildi. O, şairin şeirlərinin milli, mənəvi dəyərlərə söykəndiyindən, vətənpərvərlik ruhunda yazmağından danışdı və şeirlərdən nümunələr səsləndirdi.
Tədbirdə şairlərdən- Nazim Əhmədli, Bilal Qoca, Tamam Yaralı, Telman Akınçı, Azərbaycan Aşıq Sənəti Dövlət Muzeyinin bələdçisi Pakizə Abbasova, Novruz Mizani, aşıq Novruz Kamiloğlu və müəllifin ailə üzvləri çıxış etdilər.
Sonda xatirə şəkili çəkildi.
“Ədəbiyyat və incəsənət”
(09.07.2024)
“Biz keçə bilmədik bu imtahandan…” - TƏRANƏ DƏMİRİN ŞEİRLƏRİ
“Ədəbiyyat və incəsənət” portalı Təranə Dəmirin yeni şeirlərini təqdim edir.
ALDATDI MƏNİ
İtirdi dumanda, çəndə,
Yollarım aldatdı məni.
Qucaq açdı hər yetənə,
Qollarım aldatdı məni.
Düşdüm zamanın dalınca,
Kaşın, gümanın dalınca,
Baş qoymadım gül balınca,
Kollarım aldatdı məni.
Ruhumu görən olmadı,
Könlümü dərən olmadı,
Dərdimdən ölən olmadı,
Ollarım aldatdı məni.
Adam çıxmadı rastıma,
Qəlb qızdırmadım “dost"uma,
Duam qayıtdı üstümə,
Əllərim aldatdı məni.
Sevdim, həsrətə tuş oldum,
Çiçəkdim, döndüm daş oldum,
Nə tez payıza qoşuldum,
İllərim aldatdı məni.
BU AXŞAM DƏYMƏYİB HƏLƏ
Bu axşam dəyməyib hələ,
Ulduzu kal, ayı kaldı.
Buludu kal, yağışı kal,
Sükutu kal, hayı kaldı.
Hər tərəf həsrət içində,
Hər yan töhmətin altında.
Yuxu da qaçıb gizlənib
Göyün yeddinci qatında.
Yarı işıq, yarı zülmət,
Bilmirsən hardan baxasan.
Yoxdu qapısı, bacası
Durub gecədən çıxasan.
SEVGİLİLƏR GÜNÜNƏ
Sevməyin yüz yolu, bərəsi varmış,
Qaydası, qanunu, törəsi varmış,
Alçağı, çökəyi, dərəsi varmış,
Biz keçə bilmədik bu imtahandan.
Gah qaçıb gizləndik, gah üzə çıxdıq,
Gah sükut axtardıq, gah səsə çıxdıq,
Bütün qaranlıqlar gündüzə çıxdı,
Biz keçə bilmədik bu imtahandan.
Qınaqdan qaçdıqca günaha düşdük,
Yaxına gəldikcə uzağa düşdük,
Yalan həqiqətdən qabağa düşdü,
Biz keçə bilmədik bu imtahandan.
Yordu sazaq bizi, yordu qar bizi,
Yordu abır bizi, yordu ar bizi,
İtirib batırdı qorxular bizi,
Biz keçə bilmədik bu imtahandan.
“Ədəbiyyat və incəsənət”
(09.07.2024)
Dövlət Akademik Filarmoniyasının konsert mövsümünün bağlanışı olub
M.Maqomayev adına Azərbaycan Dövlət Akademik Filarmoniyasının uzun fasilədən sonra fəaliyyəti bərpa olunan "Yay zalı"ında Ü.Hacıbəyli adına Azərbaycan Dövlət Simfonik Orkestrinin mövsümün bağlanışına həsr olunmuş “Yay axşamı” adlı konserti keçirilib.
Filarmoniyadan AzərTAC-a bildirilib ki, bədii rəhbər və baş dirijor, Əməkdar artist Fuad İbrahimovun rəhbərliyi ilə Ü.Hacıbəyli adına Azərbaycan Dövlət Simfonik Orkestri və solistlər - Əməkdar artist Ramil Qasımov (tenor), Aytac Şıxəlizadə (mezzo-soprano), Nəzrin Aslanlı (violin), Məmməd Rəcəbli (klarnet) musiqisevərlər qarşısında çıxış ediblər.
Konsertdə dinləyicilərə dünyaşöhrətli bəstəkarkar G.Rossini, J.Strauss, G.Bizet, Z.Abreu, M.Ponce, D.Şostakoviç, A.Shaw, Niyazi, T.Quliyev, A.Márquez, və E.Mansurovun əsərləri təqdim olunub.
“Ədəbiyyat və incəsənət”
(09.07.2024)
Mədəni və yaradıcı sənayelərin təşviqi üzrə qrant müsabiqəsi ilə bağlı infosessiya keçiriləcək
Mədəniyyət Nazirliyi tərəfindən qeyri-hökumət təşkilatları üçün mədəni və yaradıcı sənayelərin təşviqi üzrə elan olunmuş qrant müsabiqəsi ilə bağlı açıq infosessiya keçiriləcək.
Bu barədə “Ədəbiyyat və incəsənət” portalı Mədəniyyət Nazirıiyinə istinadən məlumat verir.
Məlumata görə, infosessiya iyulun 10-da saat 16:00-da Mədəni və Yaradıcı Sənayelərin İnkişaf Mərkəzində təşkil olunacaq.
İnfosessiya çərçivəsində nazirlik nümayəndələri və Müsabiqə komissiyasının üzvləri tərəfindən iştirak şərtləri, prioritet istiqamətlər və alt mövzular, layihə təklifi ilə bağlı tələblər barədə ətraflı məlumat veriləcək. Tədbirdə müsabiqə ilə maraqlanan qeyri-hökumət təşkilatlarının nümayəndələri iştirak edə bilərlər.
Qeyd edək ki, Mədəniyyət Nazirliyi tərəfindən iyulun 4-də qeyri-hökumət təşkilatları üçün mədəni və yaradıcı sənayelərin təşviqi üzrə qrant müsabiqəsi elan olunub. Müsabiqəyə müraciət üçün son tarix avqustun 2-sidir.
Sənədlərin qəbulu grants.culture.az internet resursu üzərindən elektron formada həyata keçirilir.
“Ədəbiyyat və incəsənət”
(09.07.2024)
Oksford Universitetinin tələbələri “ASAN xidmət”də təcrübə proqramı keçəcəklər
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev “ASAN xidmət”də təcrübə keçən Birləşmiş Krallığın Oksford Universitetinin tələbələri ilə görüşüb.
Bu barədə “Ədəbiyyat və incəsənət” portalına “ASAN xidmət”dən məlumat verilib.
Tələbələr ölkəmizdə olmaqdan məmnunluqlarını ifadə edərək yaradılmış şəraitə görə Dövlət Agentliyinin sədrinə təşəkkürlərini bildiriblər.
Tələbələr dövlət xidmətləri və dövlət idarəetməsi sahəsində “ASAN xidmət” təcrübəsini öyrənərək elmi işlərini yazacaqlar.
Təcrübəçilər 6 həftə müddətində “ASAN xidmət”də və Dövlət Agentliyinin müxtəlif şöbələrində təcrübə keçəcəklər.
“Ədəbiyyat və incəsənət”
(08.07.2024)
Daşınmaz mədəni sərvətlərin müəyyən edilməsi üzrə Ekspert Şurası tərəfindən həyata keçirilmiş işlər müzakirə edilib
İyulun 8-də Azərbaycan Milli Kitabxanasında Mədəniyyət Nazirliyi yanında Daşınmaz Mədəni Sərvətlərin Müəyyən edilməsi üzrə Ekspert Şurasının iclası keçirilib.
AzərTAC xəbər verir ki, Ekspert Şurasının sədri, Azərbaycan Memarlıq və İnşaat Universitetinin rektoru, professor Gülçöhrə Məmmədova iclas çərçivəsində Şura tərəfindən həyata keçirilmiş işlərə və qarşıda duran məsələlərə dair məlumat verib.
Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Səbinə Hacıyeva gündəlikdə duran digər məsələləri diqqətə çatdırıb.
Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Abidələrin qorunmasına nəzarət sektorunun müdiri Pərviz Nəcəfov müzakirə üçün təqdim olunan materiallara baxılma müddətləri və bu istiqamətdə operativliyin artırılması məsələsi barədə danışıb.
O, müvafiq siyahıya daxil edilməsi üçün müzakirəyə çıxarılan mədəni irs dəyərinə malik obyektlərin işğaldan azad olunmuş ərazilərdə və Bakı şəhərində yerləşdiyini deyib.
P.Nəcəfov bildirib ki, 3 mərhələdə cəmi 145 abidə və tarixi, memarlıq və arxeoloji əhəmiyyətli obyekt daşınmaz tarix-mədəniyyət abidələrinin siyahısına daxil edilməsi üçün müvafiq addımların atılması məqsədilə şura üzvlərinin müzakirəsinə təqdim olunub.
"Bakı şəhəri üzrə 6 və işğaldan azad edilmiş ərazilər üzrə 51 obyektlə bağlı şura üzvləri tərəfindən verilən təkliflər ümumiləşdirilərək Azərbaycan Milli Elmlər Akademiyasına göndərilib. Akademiya tərəfindən 48 obyektin siyahıya daxil edilməsinə müsbət rəy verilib. Abidələr siyahısına daxil edilməsi üçün Qərar layihəsi hazırlanıb və razılaşdırılması üçün müvafiq orqanlara göndərilmə mərhələsindədir", - deyə P.Nəcəfov diqqətə çatdırıb.
O qeyd edib ki, dövlət qeydiyyatında olan 9 abidənin adı, tarixi və ünvanlarında dəqiqləşdirmə aparılaraq siyahıda düzəliş olunması təklif olunub, 12 tarixi-memarlıq əhəmiyyətli tikiliyə dair məlumatlar hazırlanaraq Şura üzvləri tərəfindən baxılıb. 8 obyektin abidələr siyahısına daxil edilməsi məqsədəuyğun hesab olunub. Şura üzvləri tərəfindən verilən təkliflər ümumiləşdirilərək Azərbaycan Milli Elmlər Akademiyasına göndərilib.
P.Nəcəfov, həmçinin 63 binaya dair hazırlanmış materiallara da Şura üzvləri tərəfindən baxıldığını bildirib. Qeyd edib ki, onlardan 49-nun abidələr siyahısına daxil edilməsi məqsədəuyğun sayılıb. Beləliklə, Şura üzvləri tərəfindən verilən təkliflər ümumiləşdirilərək Azərbaycan Milli Elmlər Akademiyasına məktub hazırlanıb.
Sonra şura üzvlərinin həyata keçirilən işlərlə bağlı irad və təklifləri dinlənilib.
Qeyd edək ki, Ekspert Şurası “Azərbaycan Respublikası ərazisində dövlət mühafizəsinə götürülmüş daşınmaz tarix və mədəniyyət abidələrinin əhəmiyyət dərəcələrinə görə bölgüsünün təsdiq edilməsi haqqında” Nazirlər Kabinetinin 2001-ci il 2 avqust tarixli Qərarına müvafiq əlavə və dəyişikliklər edilməsi məqsədilə təsis olunub. Şurada Mədəniyyət Nazirliyi, nazirlik yanında Mədəni İrsin Qorunması, İnkişafı və Bərpası üzrə Dövlət Xidməti, Dövlət Şəhərsalma və Arxitektura Komitəsi, komitənin Bakı Şəhər Memarlıq və Şəhərsalma Baş İdarəsi, Bakı Şəhər İcra Hakimiyyəti, İqtisadiyyat Nazirliyi yanında Əmlak Məsələləri Dövlət Xidməti, Dövlət Turizm Agentliyi, Azərbaycan Memarlıq və İnşaat Universiteti, Azərbaycan Memarlar İttifaqı, AMEA-nın Arxeologiya və Antropologiya İnstitutu, “İçərişəhər” Dövlət Tarix-Memarlıq Qoruğu İdarəsi, Şuşa Şəhəri Dövlət Qoruğu İdarəsi və Naxçıvan MR Mədəniyyət Nazirliyi təmsil olunur.
“Ədəbiyyat və incəsənət”
(08.07.2024)
İtaliya mediası Akstafada aşkarlanan 3500 illik ritual ibadətgah yerindən yazıb
İtaliyanın “Ansa” və “Rai” informasiya agentlikləri Azərbaycanın Ağstafa rayonundakı “Tava təpə” abidəsində aşkarlanan 3500 il əvvələ aid Qafqazda ilk ritual ibadətgah yeri haqqında məqalə dərc edib.
AzərTAC xəbər verir ki, yazılarda ritual ibadətgah yerinin Azərbaycan-İtaliya arxeoloji ekspedisiyasının üç ildir apardığı arxeoloji tədqiqat işləri nəticəsində tapıldığı bildirilib. Qeyd edilir ki, araşdırmalar zamanı son tunc, ilk dəmir dövrünə aid abidədəki ibtidai ritual tikili qalığı olan ibadətgah öz unikallığına görə təkcə Azərbaycanda deyil, bütövlükdə Qafqazda ilk tapıntı hesab olunur.
İtaliyanın Kataniya Universitetinin arxeoloqlar qrupunun fikrincə, bura Qafqazda hələlik aşkar edilən ilk ibadətgah yeridir. Ritual ibadətgah yerindən Cənubi Qafqazın köçəri əhalisi istifadə edib.
Kataniya Universitetinin və Florensiyadakı Qədim Aralıq dənizi və Yaxın Şərq Araşdırmaları Mərkəzinin (CAMNES) mütəxəssislərinin fəaliyyət göstərdiyi İtaliyadan olan arxeoloji ekspedisiyaya Nikola Laneri rəhbərlik edir. Onun fikrincə, abidə öz unikallığı ilə fərqlənir və bu maraqlı tapıntı ritual xarakterlidir.
“İnsanlar 3500 il əvvəl bura gəlib, yemək yeyiblər. Bura bir növ yeməkxana kimi fəaliyyət göstərib. Amma bütün Qafqaza xidmət edib”, - deyə arxeoloq bildirib.
Qeyd edək ki, 3500 illik yaşı olan “Tava təpə” abidəsi Ağstafa rayonunun Aşağı Kəsəmən kəndində, Kür çayından 1,5 kilometr aralıda yerləşir. Son tunc, ilk dəmir dövrünə aid abidə Xocalı-Gədəbəy mədəniyyətinə məxsus tayfaların məskunlaşdığı ərazi olub.
“Tava təpə” abidəsi unikal coğrafi yerləşmə mövqeyinə görə də diqqəti cəlb edir. Strateji əhəmiyyətli abidənin Kür çayına yaxın olması bura insanların daha çox gəliş-gedişi üçün səbəblərdən biri olub.
“Ədəbiyyat və incəsənət”
(08.07.2024)
