Super User
Şirvanşahlar Sarayı Kompleksində “Leyli və Məcnun” tamaşası səhnələşdirilib
Bakı Uşaq və Gənclər Teatrının “Günay” Teatr-Studiyası tərəfindən İçərişəhərin tarixi məkanı Şirvanşahlar Sarayı Kompleksində böyük Azərbaycan şairi Nizami Gəncəvinin anadan olmasının 880 illiyinə həsr olunmuş “Leyli və Məcnun” tamaşası səhnələşdirilib.
Bu il “Günay” Uşaq Teatr-Studiyasının gənc aktyorları “Rus Evi”nin təşkil etdiyi müsabiqədə iştirak edib və fəxri fərmanla təltif olunublar. Teatrın gənc aktyorları, həmçinin Azərbaycanlıların Yerli Milli - Mədəni Muxtariyyəti tərəfindən Orenburqda təşkil olunan “Nizami – iki dünyanın əzəməti” adlı müsabiqədə iştirak edib və yer tutub.
Teatrın bədii rəhbəri və rejissoru - Azərbaycan Teatr Xadimləri İttifaqının üzvü Larisa Viktorovna Tarusovadır. Mahmud Hüseynov Nizami, Zlata Marina Leyli, Riyad Hüseynov isə Məcnun rolunu ifa ediblər. Tamaşanın xoreoqrafı Fərid Kazakovdur.
Xose Risal niyə şeirini kerosin lampasında gizlədi?
Bu günə təsədüf edən əsas əlamətdar hadisələri diqqətinizə çatdırırıq. Qeyd etdiyimiz kimi, bu gün görkəmli xanəndəmiz Əbülfət Əliyevin anadan olmasının 95 illiyidir. SSRİ adlı keçmiş vətənimizin də qurulmasının bu gün 30 illik yubileyidir. Bu iki hadisə barədə ayrıca qeydlərimiz var, odur ki, digər hadisələrə keçək.
30 dekabr
Kerosin lampasındakı şeir
Bu gün Filippində Risal günüdür. Xose Risal Filippinin ən məşhur milli qəhrəmanıdır. O, 19-cu əsrin sonlarında Filippini müstəmləkəyə çevirmiş ispanlara qarşı xalq azadlıq hərəkatının başında duran şəxs olub, 1896-cı ilin 30 dekabrında onu ispanlar edam ediblər. Son saatlarında Risal “Əlvida, mənim doğma vətənim” adlı ürəkdağlayan bir şeir yazaraq kerosin lampasında gizlədib, sonradan bu şeir üzə çıxıb, dillər əzbəri olub. Filippin azad olunandan sonra Risalın adını qədirbilən xalqı əbədiləşdirib, hər ilin 30 dekabrını da xatirə günü kimi onu şərəflə anırlar.
Bu gün Slovakiya ruhani azadlıq barədə deklorasiya imzalanması gününü, Madaqaskar Respublikası isə Milli dövlət gününü qeyd edəcək. Mətbəxsevər amerikalıların bu gün iki bayramı bir-birinə qarışacaq. Milli bekon günü (donuz ətindən xüsusi kəsimlər) və Milli məişət sodası günü. Düzü bilmirəm, bekonun üstünə soda səpib yemək mümkündürmü.
Səddamdan Həbibədək
2006-cı ilin bu günündə Bağdadda son 24 ildə ölkəyə prezidentlik etmiş Səddam Hüseyni yeni hökumət dar ağacından asaraq edam edib. 1916-cı ildə başqa bir siyasi lider – bu dəfə çar Rusiyasında parlayan 44 yaşlı Qriqori Rasputin sui-qəsd nəticəsində öldürülüb. 1616-cı ildə Kiyevdə müasir Rusiya və Ukraynanın ilk çap olunmuş kitabı hesab edilən “Çasoslav” işıq üzü görüb.
Tanınmış alimimizin yubileyi
30 dekabra bir tanınmış Azərbaycan aliminin də doğum günü təsadüf edir. Filoloq Həbib Babayevin 95 illiyidir. Oğuz rayonunun Bucaq kəndində doğulan, valideynlərinin vəfatı ilə əlaqədar Şuşa Şəhər 1 saylı uşaq evində təhsil və tərbiyə alan Həbib Babayev 1951-1955-ci illərdə Moskvada M.Qorki adına Dünya Ədəbiyyatı İnstitutunun aspiranturasında ali təhsil alib. Əmək fəaliyyətinə anadan olduğu Bucaq kəndində müəllimliklə başlayıb, 1956- 1958-ci illərdə M.Qorki Adına Dünya Ədəbiyyatı İnstitutunda elmi işçi, 1958- 1970-ci illərdə Azərbaycan Elmlər Akademiyasında Nizami adına Ədəbiyyat İnstitutunda baş elmi işçi vəzifələrində işləyib, 1970-ci ildən ömrünün sonunadək indiki Bakı Slavyan Universitetində kafedra müdiri vəzifəsində çalışıb. Həbib Babayev 1970- ci ildə professorluğa yüksəlib, 12 monoqrafiyanın, 120-dən artıq məqalənin müəllifidir. Azərbaycan Ali Soveti Rəyasət Heyətinin Fəxri Fərmanına, “Əməkdar elm xadimi” fəxri adına layiq görülüb, ölümündən sonra Oğuz şəhərindəki 1 saylı tam orta məktəbə onun adı verilib.
Varisin “Həftənin təqvimi” yazısından
SSRİ-nin yaranması gününü qeyd edənlərin menyüsünə
Bu günü uzun illər SSRİ-nin tərkibində olarkən Azərbaycanda bayram ediblər. Dünyanın quru ərazisinin 6-da 1-ni tutun, guya insan rifahına hesablanmış, əslində totalitar quruluş olan SSRİ ilə bağlı bizdə heç də xoş olmayan ovqat var, çünki bu ölkə Rusiya imperiyasının yeni məzmunlu davamı olub. 1918-ci ildə çar Rusiyasından qopub müstəqillik qazanan Azərbaycanımız 1920-ci ildə bu dəfə bolşevik Rusiyasının işğalına məruz qalıb. Müxtəlif adlar altında fəaliyyət göstərən sovet imperiyası 1922-ci ilin 30 dekabr günündə Ümumittifaq Sovetlərinin 1-ci qurultayında SSRİ adlı bir dövlət şəklində qurulub, onun ilk subyektləri Rusiya, Ukrayna, Belorusiya və Zaqafqaziya respublikaları olublar.
Bu gün Rusiyada, eləcə də onun əsas əlaltısı Belorusda geniş bayram ediləcək. SSRİ-nin, rusların nostaljisi ilə yaşayan bizim bəzi sakinlər də bu gün əlli-əlli vodka vurasıdırlar. Rusiya bu gün də bölgədə öz hökmranlığını yeritməyə çalışır, yeni məzmunlu daha bir imperiya qurmaq çabası göstərir, onlara züy tutanlarımız da yetərincədir, amma qəlbi istiqlalla döyünən həmyerlilərimiz, xüsusən də gəncliyimiz, bilsin ki, bu bayram bizim üçün deyil.
Varisin “Həftənin təqvimi” yazısından
Bu gün məşhur xanəndə Əbülfət Əliyevin 95 illik yubileyidir
Qızıl səsə malik insanlar harada doğulur? Əlbəttə Qarabağda. Əbülfət Əliyev də Şuşada anadan olub, kiçik yaşlarından musiqi ilə maraqlanıb, 1 saylı şəhər məktəbinin musiqili dram dərnəyinə yazılıb. 1938-1939-cu illərdə Ağdam Müəllimlər evində Xan Şuşinski muğam sinfi açanda kənd-kənd gəzib istedadlı uşaqlar axtarırmış, Əbülfəti dinləyib bəyənərək onu da məktəbə yazıb. 1942-ci ildə Böyük Oktyabr Sosialist İnqilabının 25-ci ildönümü münasibətilə Əbülfəti həmyaşıdları ilə birgə Bakıya - Opera və Balet Teatrında keçirilən konsertə dəvət ediblər. Konsertdə onu məşhur tarzən Qurban Pirimov müşayiət eləyib. Bu konsertdə iştirak ona böyük uğur gətirib, 16 yaşından başlayaraq o, tarzən Məşədi Nərimanla, kamançaçı Elman Bədəlovla Qarabağın toylarına çağırılıb.
Sonra Əbülfət Bakıya gəlib, Respublika radiosunda solist işləyib, radiodakı çıxışları onu bir xanəndə kimi məşhurlaşdırıb. 1945-ci ildən o, Azərbaycan Dövlət Filarmoniyasında solist kimi Xan Şuşinski, Şövkət Ələkbərova, Sara Qədimova, Fatma Mehrəliyeva, Tükəzban İsmayılova kimi məşhur müğənnilərlə birgə çalışmağa başlayıb. Onun repertuarında 400-ə qədər xalq və bəstəkar mahnıları var idi. Xanəndənin ifasında səslənən “Segah-zabul”, “Rast”, “Şur”, “Hümayun”, “Bayatı Şiraz”, “Çahargah”, “Zabul” muğamları radio və televiziyanın fonotekasında qiymətli irs kimi saxlanılır.
Əbülfət Əliyev Azərbaycan Dövlət Opera və Balet Teatrının solisti kimi də fərqlənib, o, 75 dəfə “Leyli Məcnunda”, 25 dəfə “Əsli və Kərəm”də, 2 dəfə “Şah İsmayıl”da baş rollarda məharət və istedadını nümayiş etdirib. “Leyli və Məcnun” operası Ə.Əliyevin iştirakı ilə lentə alınaraq Azərbaycan Respublikası radiosunun qızıl fondunda saxlanılır.
Ə.Əliyev YUNESKO-nun döş nişanına və diplomuna layiq görülüb, ona 1958-ci ildə Azərbaycanın “Əməkdar artisti”, 1964-cü ildə isə “Xalq artisti” fəxri adları verilib. Məşhur xanəndə 1990-cı il dekabr ayının 27-də vəfat edib, ruhu şad olsun.
Anar Kərimov: “Fəxr edirik ki, ölkəmizin inkişaf prosesindən kənarda qalmadıq və öz töhfələrimizi verdik”
Xəbər verdiyimiz kimi, dekabrın 28-də Beynəlxalq Muğam Mərkəzində Mədəniyyət Nazirliyinin birillik fəaliyyətinə həsr olunan mətbuat konfransı keçirilib. Eyni zamanda nazirliyin rəsmi "Facebook" səhifəsi üzərindən canlı yayımlanan konfrans “Mədəniyyət Nazirliyi: 2021-ci il üzrə hədəflər və nəticələr” mövzusuna həsr edilmişdi. “Ədəbiyyat və incəsənət” portalı Mədəniyyət Nazirliyinin internet səhifəsinə istinadən tədbir barədə geniş icmalı oxuculara təqdim edir:
Mətbuat Konfransını nazirliyin Media və kommunikasiya şöbəsinin müdiri Məryəm Qafarzadə açaraq KİV nümayəndələrini salamladı. İl ərzində Mədəniyyət Nazirliyinin fəaliyyəti barədə ictimaiyyətin məlumatlandırılması, nazirlik tərəfindən həyata keçirilən layihə və tədbirlərin işıqlandırılmasında göstərilən dəstəyə və əməkdaşlığa görə media nümayəndələrinə təşəkkürünü bildirdi: “Nazirliyin məqsədlərindən biri də mədəniyyət sahəsindəki yenilikləri operativ şəkildə ictimaiyyətə çatdırmaqdır. Bu yolda körpü yaratdığınız üçün hər birinizə minnətdarıq”.
Daha sonra mədəniyyət naziri Anar Kərimov səhnəyə dəvət edildi. Nazir mətbuat konfransına qatılan KİV nümayəndələri və mədəniyyət və incəsənət xadimlərini salamlayaraq qarşıdan gələn Dünya Azərbaycanlılarının Həmrəylik Günü və Yeni il münasibətilə təbrik etdi.
Nazir diqqətə çatdırdı ki, 2021-ci il ölkəmiz üçün Ali Baş Komandan İlham Əliyevin rəhbərliyi ilə Vətən müharibəsində Qələbənin birinci ildönümü və Qarabağa böyük qayıdışın ilk addımları kimi yadda qaldı: “Mədəniyyət Nazirliyi olaraq fəxr edirik ki, bu prosesdən kənarda qalmadıq və öz töhfələrimizi verdik”.
2021-ci ilin əvvəlində nazirlik tərəfindən 9 hədəf üzrə fəaliyyət planının bəyan edildiyini bildirən Anar Kərimov dedi: “Hədəfimiz bu bəndləri sözdə deyil, əməldə icra etmək idi. Bu gün artıq nəticələri elan etmək vaxtıdır. Mədəniyyət Nazirliyi xalqımızın yaratdığı zəngin mədəniyyəti və maddi-mənəvi irsi qorumaq, inkişaf etdirmək, məzmununu zənginləşdirmək və gələcək nəsillərə layiqincə çatdırmaq, eləcə də dünya miqyasında onu təbliğ etmək, habelə bu sahədə dövlət siyasətini səmərəli şəkildə həyata keçirmək istiqamətində fəaliyyət göstərib”.
İdarəetmə sistemində islahatlar
Mədəniyyət sahəsində və idarəetmə sistemində islahatların aparılması hədəfi ilə bağlı 2030-cu ilədək “Azərbaycan Respublikasının mədəniyyət strategiyası”nın hazırlanması ilə bağlı işlərin görüldüyünü diqqətə çatdıran nazir qeyd etdi ki, bu sahədə 5 istiqamət üzrə (mədəni irsin qorunması, insan kapitalının inkişafı, yaradıcı sənayeyə dəstək, Azərbaycan mədəniyyətinin beynəlxalq səviyyədə təşviqi, mədəniyyətin Qarabağa, Qarabağın mədəniyyətə qayıdışı) prioritetlər elan edilib. Həmçinin hüquqi bazanın yenidən qurulması da nəzərdən keçirilir. Bu hədəf üzrə Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin fəaliyyətinin təkmilləşdirilməsi məqsədilə 5 yeni regional idarə yaradılıb.
Bildirildi ki, mədəniyyət və yaradıcılığın inkişafı məzmununun zənginləşdirilməsi hədəfi üzrə Azərbaycan Film Komissiyasının yaradılması, “Azərbaycanfilm” Kinostudiyasında aparılan islahatlar, 12-ci Beynəlxalq Qısametrajlı Filmlər Festivalı, IV “Animafilm” Beynəlxalq Animasiya Festivalı, “Böyük qayıdış” qısametrajlı bədii, sənədli və animasiya film layihələri müsabiqəsi və digər layihələri qeyd etmək olar. Məhz bu hədəf üzrə il ərzində 40-dək bədii, sənədli və animasiya filmi çəkilib. Filmlərimiz beynəlxalq festivallarda iştirak edərək mükafatlara layiq görülüb.
29 ildən sonra azad Şuşada “Xarıbülbül” musiqi festivalı, XVI Beynəlxalq Bakı Caz Festivalı, Qəbələ Musiqi Festivalı, Üzeyir Hacıbəyli Beynəlxalq Musiqi Festivalı, Vətən müharibəsində Qələbəyə həsr olunmuş bəstəkarlıq müsabiqəsi və digər layihələr ilin musiqi mənzərəsinin zənginliyindən xəbər verir.
Pandemiya şərtləri daxilində 2021-ci ildə teatr sahəsində də müəyyən uğurlar oldu. “4.4” Qısa Tamaşalar Festivalı, “Qalib olan Azərbaycan” tamaşalar festivalı, habelə Mədəniyyət Nazirliyinin teatr təhsili sahəsində islahatların aparılması, kadr potensialının yüksəldilməsi məqsədilə “Gənc teatr prodüserləri üçün laboratoriya” layihəsi üzrə Rusiya Dövlət Teatr Sənəti İnstitutu (QİTİS) ilə birgə təşkil etdiyi prodüserlər üçün laboratoriya bu sahənin inkişafı məqsədi daşıyırdı.
* * *
Bakıda keçirilən VII Bakı Beynəlxalq Kitab Sərgi kitab və nəşriyyat sahəsində bu ilin ən əlamətdar hadisəsi oldu. Builki sərgi “Nizami Gəncəvi İli”nə həsr olunmuşdu. Sərgi çərçivəsində maraqlı təqdimatlar, tanınmış yazarlarla görüşlər təşkil olundu. İl ərzində həmçinin Mədəniyyət Nazirliyi və Milli Kitabxananın birgə təşkilatçılığı ilə işğaldan azad olunmuş ərazilərdə yaradılacaq kitabxanalar üçün “Qarabağa kitabla gedək” layihəsi üzrə kitab toplama kampaniyası davam etdirilib.
* * *
Nazir yeni mədəni dəyərlərin yaradılması, yaradıcı sənayelərin inkişafı hədəfi üzrə Azərbaycan Dizaynerlər Assosiasiyası, Azərbaycan Çağdaş İncəsənət İnstitutu və Azərbaycan Yaradıcı Sənayelər Federasiyasının yaradılmasını da 2021-ci ilin uğurları kimi səciyyələndirdi. Anar Kərimov Lənkəran şəhərinin qastronomiya tematikası üzrə UNESCO-nun Yaradıcı Şəhərlər Şəbəkəsinə daxil edilməsinin də ilin uğurlarından olduğunu dedi. UNESCO ilə əməkdaşlıqda yeni pilot layihələr hazırlandığını bildirən nazir təşkilatla əlaqələrin inkişafında Birinci vitse-prezident Mehriban xanım Əliyevanın xidmətlərini xüsusi vurğuladı. Bildirdi ki, gələn il UNESCO-nun Bəşəriyyətin qeyri-maddi mədəni irsi üzrə Reprezentativ Siyahısına salınması ilə bağlı “İpəkçilik və toxuculuq üçün ənənəvi ipək istehsalı”, “Sədəf sənəti”, “Pəhləvan – ənənəvi zorxana oyunları və idman növləri”, “Molla Nəsrəddin şifahi xalq ədəbiyyatı”, “Çay mədəniyyəti” və “Balaban sənətkarlığı və ifaçılıq sənətləri” nominasiya faylları üzrə müraciət ediləcək. Həmçinin 2022-ci ildə Fikrət Əmirovun 100, 2023-cü ildə Hacı Zeynalabdin Tağıyevin 200 illik yubileyləri UNESCO-da qeyd ediləcək.
Mədəniyyətin Qarabağa qaytarılması
Anar Kərimov il ərzində mədəniyyətin Qarabağa qaytarılması, işğaldan azad edilmiş ərazilərin mədəni irsinin və infrastrukturunun bərpası istiqamətində dövlətimiz tərəfindən ardıcıl işlərin həyata keçirildiyini bildirdi. Qeyd etdi ki, işğaldan azad olunmuş Şuşa, Cəbrayıl, Füzuli, Zəngilan, Xocavənd, Qubadlı, Laçın və Kəlbəcər rayonları ərazisində Mədəniyyət Nazirliyi tərəfindən ilkin monitorinqlər aparılıb. Dövlət qeydiyyatında olan 403 tarixi mədəniyyət abidəsinə baxış keçirilib. Eləcə də 162 dövlət qeydiyyatında olmayan tarixi, memarlıq, arxeoloji mənşəli obyektin monitorinqi aparılıb. Şuşada yerləşən 45 abidənin üzərinə məlumat lövhəsi quraşdırılıb, həmçinin abidələrin elektron xəritələri hazırlanıb. Bundan əlavə, il ərzində ölkə üzrə 110 mədəniyyət abidəsinin pasportu və abidələrin mühafizə zonası üzrə 72 layihə təsdiq edilib.
Nazirlik Şuşada Bülbülün Ev-Muzeyinin bərpasına dəstək verib, “Böyük Qayıdış – mədəniyyətin dirçəlişi” beynəlxalq konfransını təşkil edib. Eləcə də Heydər Əliyev Fondu ilə birlikdə Vaqif Poeziya Günləri, “Xarıbülbül” musiqi festivalı, Milli Musiqi Günü və Üzeyir Hacıbəyli Beynəlxalq Festivalının Şuşada da qeyd edilməsi, həmçinin “Qarabağın bərpası: yenidənqurma və inkişaf” sərgisində iştirak nazirliyin bu proseslərin mərkəzində yer alması deməkdir.
“Nizami ili”nin yaddaqalan tədbirləri
Dövlət başçısının müvafiq sərəncamı ilə 2021-ci ilin dahi şair və mütəfəkkir Nizami Gəncəvinin anadan olmasının 880 illiyi şərəfinə “Nizami Gəncəvi İli” elan edilməsi Azərbaycan mədəniyyət və ədəbiyyatının bayramı oldu. Əlamətdar il çərçivəsində Mədəniyyət Nazirliyinin dəstəyi və iştirakı ilə respublikamızda və ölkə xaricində, beynəlxalq təşkilatlarda müxtəlif tədbirlər, təqdimatlar keçirildi. Nizami Gəncəvi Beynəlxalq Festivalı, bu festival çərçivəsində gerçəkləşən Nizami Gəncəvi Beynəlxalq Forumu, “İşıq festivalı. Nizami Gəncəvi” adlı audiovizual layihə, həmçinin tamaşa nümayişləri, konsert və sərgilər əlamətdar ilin yaddaqalan tədbirləri oldu. Eyni zamanda Mədəniyyət Nazirliyinin dəstəyi ilə mütəfəkkir şairin beş poemasının yer aldığı nəşr – “Nizami Gəncəvi. Xəmsə” kitabı Türkiyədə çap edildi.
Beynəlxalq mədəni əməkdaşlıqda yeni uğurlar
İl ərzində Azərbaycan mədəniyyətinin dünyada təbliği istiqamətində işlərin davam etdirildiyini bildirən nazir dedi ki, həmçinin beynəlxalq əməkdaşlığın dərinləşdirilməsi də diqqətdə saxlanılıb. Azərbaycan mədəniyyətinin müxtəlif sahələri üzrə xarici ölkələrdə keçirilən festival və müsabiqələrdə iştirak təmin edilib. İstedadlı uşaq və gənclər beynəlxalq incəsənət layihələrində uğurlara imza atıblar.
Bu il eyni zamanda beynəlxalq mədəni əməkdaşlıq sahəsində də uğurlarla müşayiət olunub. İCESCO Baş direktorunun ölkəmizə səfəri zamanı işğaldan azad edilmiş ərazilərimizdə olması, Mədəniyyət Nazirliyi tərəfindən irəli sürülən “Mədəniyyət naminə sülh” qlobal kampaniyası, Şuşa şəhərinin qarşıdakı illərdə islam və Türk dünyasının mədəniyyət paytaxtları elan edilməsi ilə bağlı İCESCO və TÜRKSOY-la səmərəli əməkdaşlıq davam etdirilib. Bu il həmçinin UNESCO Baş Konfransının 41-ci sessiyası gedişində Azərbaycan Respublikası 2022-2025-ci illər üzrə təşkilatın İcraiyyə Şurasına üzv seçilib. Ölkəmiz həm də UNESCO-nun Silahlı münaqişələr zamanı mədəni mülkiyyətin qorunması üzrə Komitəsinə də üzv olub. Bütün bunlar ölkəmizin beynəlxalq mədəni əməkdaşlıqda etibarlı tərəfdaş kimi tanınmasının bariz nümunəsidir.
Layihələr, yubileylər
Anar Kərimov qeyd etdi ki, mədəniyyətimizin ölkə daxilində təbliği məqsədilə il ərzində müxtəlif layihələr həyata keçirilib, tədbirlər təşkil olunub. Nazirliyin reallaşdırdığı “Mədəniyyətimizin simaları”, “Xristian irsimizi tanıyaq”, “İslam irsimizi tanıyaq”, “Mədəni yenilənmə”, “Səhnədən səngərə”, habelə Vətən müharibəsinə həsr edilən sənədli filmlərin çəkilişi gənc nəslin maariflənməsinə töhfə vermiş oldu.
Həmçinin görkəmli mədəniyyət xadimlərinin yubiley və xatirə gecələrinin keçirilməsi də mədəniyyətimizin ölkə daxilində təbliğinə xidmət edir. Bu sırada Aşıq Ələsgərin 200, Xan Şuşinskinin 120, Mikayıl Abdullayev və Kamil Əliyevin 100, Tofiq Bakıxanovun 90 və başqa əlamətdar yubiley tədbirləri ictimaiyyət tərəfindən böyük maraqla qarşılandı.
* * *
Nazir COVİD-19 pandemiyası ilə əlaqədar mədəniyyət sahəsində yaranan çağırışların həll edilməsinin də diqqətdə saxlanıldığını bildirdi. Qeyd etdi ki, kitabxana, qalereya və muzeylər, eləcə də teatr və kino nümayişi müəssisələri ilin əvvəlində fəaliyyətini əsasən onlayn formatda qurdu. Sonralar karantin şərtlərindəki yumşalmalarla müəyyən qaydalara əməl etməklə intensiv fəaliyyət təmin edildi.
Anar Kərimov həmçinin “Davranış mədəniyyəti” layihəsi haqqında da söz açdı. Qeyd etdi ki, layihə mədəni irsimizin qorunması, saxlanılması, dünyaya təbliği, gənc nəslin Azərbaycan mədəni irsindən xəbərdar olması və milli ruhda tərbiyəsi işində Mədəniyyət Nazirliyinin rolunun yenidən formalaşdırılması ilə bağlı strateji göstərişin icrası məqsədi daşıyır. Nazirliyin bu istiqamətdə fəaliyyəti üçün əsas platforma rolunu oynayacaq “Davranış Mədəniyyəti Konsepsiyası”nın hazırlanması üzrə də işlər davam etdirilir.
Daha sonra Anar Kərimov ictimaiyyəti maraqlandıran məsələlərə dair media nümayəndələrinin və nazirliyin rəsmi "Facebook" hesabından canlı yayım vasitəsilə daxil olan sosial media istifadəçilərinin suallarını cavablandırdı.
Mətbuat konfransının sonunda xatirə fotosu çəkdirildi.
Vaqif Bəhmənlinin “Əsərlər” çoxcildliyinin 1-ci və 2-ci cildləri işıq üzü görüb
Tanınmış şair Vaqif Bəhmənli Facebook sosial şəbəkəsində yeni kitabının çıxması barədə xəbər paylaşıb və bir yeni şeirini oxuculara təqdim edib. Statusu diqqətinizə çatdırırıq:
Əziz dostlar, 2021-ci ilin sonunda “Əsərlər” çoxcildliyimin 1-ci və 2-ci cildləri işıq üzü gördü. İkinci cilddən bir şeiri ixtiyarınıza verir, qarşıdan gələn gözəl bayramlar münasibəti ilə hər birinizi təbrik edir, uzun ömür, can sağlığı və sonsuz uğur arzulayıram. Həyatınız işıqla dolsun, orada qaranlığa zərrəcə yer qalmasın!
İŞIQMAN
Qapıdan qovanda girib bacadan
Gün Tanrı böyrümə yan alaydı kaş.
Göz açıb-yumunca söküləydi dan,
Gecənin uzunu an olaydı kaş...
İşıq dolduraydı dalan-tinləri,
Gecələr zülmətlə dolan tinləri...
Üstü xətlənəydi yalan dinlərin
Sübh çağı ən doğru din olaydı kaş.
Yanıb qaralaydı günəşdə dərim –
ya işıq, ya heç nə... Allaha kərim!
İşığa düşəydi fanar gözlərim,
işığa baxmaqdan qan olaydı kaş!
Aşiqlər işığa aşiq olaydı,
işığı içməyə qaşıq olaydı...
Dünyanın Allahı işıq olaydı –
qurbanı qoyun yox, mən olaydım kaş!
Nurdu qibləgahım, sabahdı yönüm;
deyim mətləbimi, başına dönüm –
hamıya dönəydim işığa dönüb,
hamı işıqlanıb mən olaydı kaş!
İşğaldan azad olan ərazilərimizdə mədəniyyət ocaqları bərpa edilməkdədir
44 günlük Vətən müharibəsində Ali Baş Komandan, Prezident İlham Əliyevin rəhbərliyi ilə Azərbaycan Ordusu 30 ilə yaxın işğal altında olan əzəli yurd yerlərimizi azad etdi. İşğal müddətində Ermənistan tərəfindən bəşəri dəyərlər, beynəlxalq konvensiyalar heçə sayılaraq xalqımızın çoxəsrlik maddi mədəni mirasına qarşı vandalizm, talançılıq siyasəti həyata keçirilib. Sosial infrastrukturlarla yanaşı, dini-mədəni abidələrə qarşı da soyqırımı törədilib.
Ərazi bütövlüyümüzün bərpasından ötən bir il müddətində Azərbaycanın mədəniyyət və sənət beşiyi sayılan Qarabağda mədəniyyət abidələrinin bərpası istiqamətində mühüm işlər görülüb.
İşğaldan azad edilmiş ərazilərdə Mədəniyyət Nazirliyi tərəfindən ilkin monitorinqlər aparılıb. Şuşa, Cəbrayıl, Füzuli, Zəngilan, Xocavənd, Qubadlı, Ağdam, Tərtər, Laçın və Kəlbəcər rayonlarını rayonlarında həyata keçirilmiş monitorinqlər zamanı dövlət qeydiyyatında olan 403 tarix-mədəniyyət abidəsinə baxış keçirilib. Bundan əlavə həmin ərazilərdə yerləşən dövlət qeydiyyatında olmayan tarixi, memarlıq, arxeoloji əlamət daşıyan 162 obyektin monitorinqi aparılıb. Aparılan ilkin monitorinqlər zamanı 864 mədəniyyət müəssisəsi aşkar edilib ki, onlardan 462-si kitabxana, 348-i klub müəssisəsi, 20-si muzey, 26-sı uşaq musiqi məktəbi, 1-i kinoteatr, 2-si teatr, 2-si qalereya, 3-ü kinoklubdur. Monitorinqlərin nəticələri göstərir ki, işğaldan azad olunmuş ərazilərdə 95%-ə yaxın tarix-mədəniyyət abidələri dağıdılmış vəziyyətdədir.
Azərbaycanın mədəniyyət paytaxtı elan olunan Şuşada tarixi abidələrin bərpası işləri davam edir. Dahi şəxsiyyətlərimizin – Xan qızı Natəvanın, Üzeyir Hacıbəylinin, Bülbülün vaxtilə erməni vandalları tərəfindən güllələnmiş, daha sonra xaricə satılarkən Azərbaycan dövləti tərəfindən əldə edilən büstləri yanvarın 14-də əzəli məkanına, qədim Şuşaya qaytarılıb.
12-13 may tarixlərində vaxtilə Şuşanın Cıdır düzündə təşkil olunan ənənəvi Xarıbülbül musiqi festivalı 29 ildən sonra böyük coşqu ilə yenidən keçirilib. Festivalda ölkəmizin müxtəlif bölgələrində yaşayan ayrı-ayrı xalqların musiqi qrupları və ifaçıları öz çıxışları ilə Azərbaycanın millətindən, dinindən asılı olmayaraq hər bir kəsin vahid Vətəni olduğu mesajını bütün dünyaya çatdırıb.
Avqustun 29-da Şuşada görkəmli şair və dövlət xadimi Molla Pənah Vaqifin məqbərə muzey kompleksinin təmir-bərpa və yenidənqurmadan sonra açılışı keçirilib. Avqustun 30-da isə ənənəvi Vaqif Poeziya Günlərinin açılışı gerçəkləşib. Şəhərdə Natəvan bulağı və Bülbülün Ev-Muzeyinin açılışı olub. Vaqif Poeziya Günləri çərçivəsində Heydər Əliyev Fondu tərəfindən təşkil edilən “Qarabağ Azərbaycan mədəniyyətinin incisidir” və “Yenidən doğma diyarda. Qarabağın sənət inciləri” sərgiləri keçirilib. Şuşadakı Xalçaçılıq Qalereyasında təşkil olunan “Yenidən doğma diyarda. Qarabağın sənət inciləri” sərgisində Mədəniyyət Nazirliyinin tabeliyində fəaliyyət göstərən Azərbaycan Milli Xalça Muzeyi tərəfindən xovlu və xovsuz xalçalar, xalça məmulatları, milli tikmə və geyim dəstləri, bədii metal nümunələri təqdim edilib.
2021-ci ildə Şuşadakı Yuxarı Gövhər ağa məscidi bərpa edilib. Hazırda Aşağı Gövhər ağa və Saatlı məscidlərinin, habelə Mehmandarovların evinin bərpası istiqamətində işlər davam etdirilir.
Vaxtilə Qarabağın ən böyük yaşayış məntəqəsi olan Ağdam şəhəri işğal zamanı yerlə yeksan edilib, bütün sosial-mədəni infrastruktur dağıdılıb. Yağıdan qurtulmuş Ağdamda da geniş yenidənqurma işləri həyata keçirilir. Ağdamda İşğal muzeyi və Zəfər muzeyi inşa olunacaq. Bu muzeylər kompleksinin konsepsiyası İtaliya şirkəti tərəfindən hazırlanıb. Muzeylər həm 30 illik işğal dövründə Azərbaycan xalqının keçdiyi çox çətin yolu göstərəcək, eyni zamanda 44 gündə 30 illik işğala son qoyan müzəffər Azərbaycan Ordusunun qüdrətini nümayiş etdirəcək. Kompleksin ümumi ərazisi 22,5 hektar olacaq.
Düşmən tərəfindən yerlə yeksan edilən Cəbrayıl şəhərinə də yeni həyat qayıdır. Oktyabrın 4-də Cəbrayılda həm yaşayış binasının, həm də Cəbrayıl Memorial Kompleksinin təməli qoyulub. Memorial Kompleks Bayraq meydanı, İşğal muzeyi və Ermənistanın işğalçılıq siyasətinin ümumi mənzərəsini əks etdirən dağıntıların nümayiş etdiriləcəyi sahədən ibarət olacaq. Həmçinin Cəbrayılda düşmən işğalına son qoyan qüdrətli Azərbaycan Ordusuna həsr olunan Zəfər pavilyonu və hərbi texnikaların açıq səma altında nümayiş olunacağı Döyüş muzeyi yaradılacaq. Cəbrayıl şəhərində Türkiyə-Azərbaycan Dostluq Parkı da salınacaq.
Prezident İlham Əliyev oktyabrın 17-də Füzuli Memorial Kompleksinin layihələndirilməsi və tikintisi ilə bağlı tədbirlər haqqında sərəncam imzalayıb.
Oktyabrın 18-də Füzuli şəhərinin bərpasının və Füzuli Memorial Kompleksinin təməli qoyulub. Şəhərin mərkəzi hissəsində yaradılacaq Füzuli Memorial Kompleksi İşğal muzeyi və Memorial parkı, Zəfər muzeyi, Zəfər abidəsi və Bayraq meydanını əhatə edəcək.
Vətən müharibəsində erməni işğalından azad olunmuş bölgələrdə kitabxanaların fondlarının bərpası işinə dəstək məqsədilə “Qarabağa kitabla gedək!” layihəsi təqdim edilib və layihə çərçivəsində artıq 60.000-dən çox kitab toplanıb.
Noyabrın 24-də Vətən müharibəsində şanlı Zəfərimizin birinci ildönümünə həsr olunmuş “Böyük Qayıdış: mədəniyyətin dirçəlişi” adlı beynəlxalq konfrans keçirilib. Tədbir çərçivəsində işğaldan azad edilmiş ərazilərdə yerləşən tarix və mədəniyyət abidələrinə qarşı Ermənistan Respublikası tərəfindən həyata keçirilmiş dağıntı, vandallıq və mənimsəmə faktlarını özündə əks etdirən “Azadlıqda olan abidələr” adlı fotosərgi təşkil edilib.
Cari ilin aprel ayında Mədəniyyət Nazirliyi tərəfindən “Mədəniyyət naminə sülh” (Peace4Culture) qlobal kampaniyası irəli sürülüb. Yeni platforma mədəni irsin qorunması, dinc və dayanıqlı sülhsevər cəmiyyətlərin qurulması və beynəlxalq sülh sistemlərinin gücləndirilməsi, eləcə də sülhün əldə olunmasında mədəniyyətin rolu ilə yanaşı, mədəniyyətin inkişafında sülhün rolunun öyrənilməsi məqsədi daşıyır. İyunun 23-də qlobal kampaniyanın təqdimatı, dekabrın 2-də Tərəfdaşlar Forumu keçirilib.
Parisdə 31 Dekabr-Dünya Azərbaycanlılarının Həmrəylik Gününə həsr edilmiş konsert olub
Fransadakı səfirliyimizin təşkilatçılığı və Azərbaycan Diasporuna Dəstək Fondunun dəstəyi ilə Parisdə “Temple protestant de l’Oratoire du Louvre” protestant kilsəsində əsası ümummilli lider Heydər Əliyev tərəfindən qoyulmuş Dünya Azərbaycanlılarının Həmrəylik Gününə həsr edilmiş “Balaban cazla görüşür” (Balaban meets jazz) adlı konsert olub.
AzərTAC xəbər verir ki, konsertdə Azərbaycanın Fransadakı səfiri Rəhman Mustafayev, Azərbaycan Diasporuna Dəstək Fondunun icraçı direktoru Əkrəm Abdullayev, Fransadakı diasporumuzun və yerli ictimaiyyətin üzvləri, mədəniyyət nümayəndələri iştirak ediblər.
Konsertdən əvvəl səfir Rəhman Mustafayev və icraçı direktor Əkrəm Abdullayev çıxış edərək, 31 Dekabr-Dünya Azərbaycanlılarının Həmrəylik Gününün tarixindən söz açıblar. Dünyanın müxtəlif ölkələrində yaşayan azərbaycanlıların həmrəyliyi ideyasını, onun təşkilatlanmasını daim diqqət mərkəzində saxlayan ümummilli lider Heydər Əliyevin bu istiqamətdə misilsiz xidmətlərini vurğulayıblar.
Bildiriblər ki, bu il dünya azərbaycanlıları Həmrəylik Gününü böyük ruh yüksəkliyi ilə qarşılayırlar. Müzəffər Ali Baş Komandan İlham Əliyevin rəhbərliyi altında dəmir yumruğa çevrilmiş xalqımız və rəşadətli Ordumuzun sayəsində Azərbaycanın əzəli torpaqları işğaldan azad edilərək, ölkəmizin ərzi bütövlüyü bərpa edilib. Xaricdə yaşayan soydaşlarımız 44 günlük Vətən müharibəsi dövründə doğma Azərbaycana bağlılıqlarını nümayiş etdirdilər. Milli birlik, həmrəylik göstərərək, dəyərli töhfələrini verdilər və qalibiyyət qürurunu birgə yaşadıq. Amma torpaqlarımız erməni işğalından azad edilmiş olsa da, hələ də bəzi çətinliklərin olduğu diqqətə çatdırılıb. Qeyd edilib ki, azad olunmuş ərazilərin erməni minalarından təmizlənməsi, məcburi köçkünlərin doğma yurdlarına qayıdışı, birinci Qarabağ müharibəsi dövründən itkin düşmüş 4 min azərbaycanlının taleyi qarşıda duran çağırışlardandır.
Natiqlər xaricdə yaşayan soydaşlarımız arasında birlik və həmrəyliyin gücləndiriliməsinin vacibliyi vurğulayıblar.
Azərbaycan musiqi mədəniyyətindən söz açılaraq, azərbaycanlı gənc və istedadlı musiqiçilər -Ələfsər Rəhimov (zurna, balaban, tütək) və Etibar Əsədli (piano) haqqında məlumat verilib. Onların musiqimizi dünyada layiqincə təmsil və təşviq etdikləri diqqətə çatdırılıb.
Sonra “Balaban cazla görüşür” (Balaban meets jazz) konserti başlayıb. Balabançı Ələfsər Rəhimov ilə pianoçu Etibar Əsədlini gitarada Kevin Lazakis, elektrik bassda Gi Bernfeld və zərb alətlərində Noam İsraeli müşayiət ediblər.
Ələfsər Rəhimov UNESCO-nun Ümumdünya Qeyri-Maddi Mədəni İrsin Qorunması üzrə Reprezentativ Siyahısına daxil edilmək üçün təqdim edilmiş milli musiqi alətimiz balabanda caz musiqisini ifa edib. Konsertdə “Sarı gəlin”, “Qara qaşın vəsməsi” kimi xalq mahnıları, eləcə də Üzeyir Hacıbəylinin, türk Neset Ertaşın əsərləri ifa edilib. Gənc balabançı Ələfsər Rəhimov və pianoçu Etibar Əsədlinin bəstələri də səsləndirilib.
Ramzan Kadırovun qızı yüksək titul aldı
RİA Novosti agentliyinə istinadən portalımız məlumat verir ki, Çeçenistan prezidenti Ramzan Kadırovun böyük qızı - Çeçenistanın mədəniyyət naziri Ayşat Kadırovaya Çeçenistanın Əməkdar Mədəniyyət işçisi adı verilmişdir.
Ötən həftə isə Çeçenistanın ambudsmanı Nurdi Nuxadjiev Ayşat Kadırovaya “İnsan hüquqlarının fəal müdafiəçisi” medalını təqdim etmişdi.
Təbii ki, Ayşat prezidentin qızıdır deyə mədəniyyət naziri olub, bu fəxri adı, bu medalı da məhz bu səbəbdən qazanıb. Çeçenistan sivil dünyaya aid deyil. Burası postsovet reallığının hələ də qaldığı bir məmləkətdir. Postsovetlərin əksəriyyətində vəziyyət bu cürdür.
“Ulduz” jurnalı tələbə oxucularının naminə qiymətini ucuzlaşdırdı
Oxunan və sevilən “Ulduz” jurnalının redaksiyası oxucularına müraciət ünvanlayıb. Müraciətdə deyilir:
“Əziz dostlar! Çoxsaylı tələbə oxucularımızın rəyini nəzərə alaraq, dərgimizin qiymətini ENDİRDİK.
Növbəti ildən "Ulduz" jurnalının satış qiyməti və aylıq abunə haqqı 2 AZN deyil, cəmi 1 AZN təşkil edəcək.
Abunəçilərimiz 6 aylıq abunə haqqı üçün 6 AZN, illik abunə haqqı üçün isə cəmi 12 AZN ödəməklə dərginin müvafiq saylarını əldə etmiş olacaqlar. Abunə yazılmaq üçün aşağıdakı mətbuat yayımı birliklərinin telefon nömrələri ilə əlaqə saxlaya bilərsiniz:
●"Azərmətbuatyayımı" Açıq Səhmdar Cəmiyyəti.
Tel: (012)441-19-91
(012)440-16-26
●"Qaya" Mətbuat Yayımı.
Tel: (012)566-77-80
●"Qasid" MMC .
Tel: (012)493-14 - 06
☆Dərgini pərakəndə əldə etmək üçün aşağıdakı kitab mağazalarına müraciət edə bilərsiniz:
●"Kitabevim.Az
(Ünvan: Nəsimi r., Puşkin k., 32a "AK center" II mərtəbə, "28 May" metrosunun yaxınlığı1.
Tel: 498-79-89 ) 055-877-24-44
●"Bayatı" kitab mağazası (Ünvan: Səbail r., Xaqani k. 53, "Sahil" metrosunun yaxinlığı.
Tel: 055-264-75-52 )”
Əlbəttə ki, hər şeyin bahalaşdığı bir zamanda “Ulduz” jurnalı redaksiyasının oxucuları naminə atdığı bu addım təqdirəlayiqdir. Biz də oxuculara səslənirik: “Ulduz” alın, “Ulduz” oxuyun!
