Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanasının oxucusu Afət Ruhan Arslanın “Sünbüllər saralanda” kitabının təqdimatı keçirilib.

Qeyd edək ki, kitabın redaktoru Vahid Əhəd, “Ön söz”ün müəllifi isə şair-publisist, “Qızıl qələm” mükafatı laureatı Sakit Məmmədovdur.

Tədbirdə çıxış edən şair Sakit Məmmədov kitab haqqında məlumat verərək bildirib ki, təqdim edilən roman əsasən bir ailənin, təxminən 30 ilə yaxın müddətdə həyatını təsvir edir. Romanın süjeti əsasən 5 personajın üzərində qurulub.

Yazıçı Esmiralda Şükürova, Yasamal rayon MKS-nin şöbə müdiri Yeganə Qafarova və digər çıxışçılar kitab haqqında təəssüratlarını bölüşərək müəllifə yaradıcılıq uğurları arzulayıblar. Bildiriblər ki, kitab oxucuların rəğbətini qazanacaq.

Sonda müəllif təşkilatçılığa görə Yasamal rayon Mərkəzləşdirilmiş Kitabxana Sisteminin M.Ş.Vazeh adına Mərkəzi Kitabxanasına və Yasamal rayon Heydər Əliyev Mərkəzinə öz minnətdarlığını bildirib.

Mədəniyyət Nazirliyi tərəfindən tabeliyindəki kitabxanaların kitab fondlarını yeni nəşrlərlə zənginləşdirmək və komplektləşdirmək məqsədilə 5 aprel 2022-ci il tarixində elan olunmuş “Nəşrlərin satınalınması müsabiqəsi”nin nəticələri müəyyənləşib.

“Ədəbiyyat və incəsənət” portalı Mədəniyyət Nazirliyinə istinadən bildirir ki, “Nəşrlərin satınalınması müsabiqəsi”nin təşkilində şəffaflığı, səmərəliliyi və obyektivliyi təmin etmək məqsədilə müsabiqəni nazirlik tərəfindən yaradılan Nəşr Planının Tərtibi və Nəşriyyat Məhsullarının Satınalınması üzrə Komissiya həyata keçirib.

Müəlliflər və müəlliflik hüququ sahibləri tərəfindən müsabiqəyə təqdim olunan kitablar Komissiya tərəfindən qiymətləndirilmiş, eyni zamanda nəşrlərin dəyərləndirilməsi zamanı kitabxanaların təqdim etdiyi oxucuların sorğu kitabçasına əsasən hazırlanmış statistik məlumatlar da nəzərə alınmışdır.

Komissiya tərəfindən müsabiqəyə təqdim olunan nəşrlər arasından dəyəri 498174 manat olan 454 adda kitabdan 50465 nüsxəsinin satınalınması qərara alınmış, seçilən nəşrlər kitabxana fondlarının komplektləşdirilməsi baxımından məqsədəuyğun hesab edilmişdir.

Kitabxana fondlarının oxucuların tələbatına uyğun komplektləşdirilməsi məqsədilə komissiyanın seçiminə əsasən “Teas Press” nəşriyyat evindən dəyəri 117177,5 (yüz on yeddi min yüz yetmiş yeddi manat əlli qəpik) manat olan 8270 nüsxə kitabın, “Qanun” nəşriyyatından dəyəri 111960 (yüz on bir min doqquz yüz altmış) manat olan 9560 nüsxə kitabın, “Təhsil nəşriyyat-poliqrafiya” MMC-dən dəyəri 56850 (əlli altı min səkkiz yüz əlli) manat olan 2075 nüsxə kitabın, “Altun kitab” nəşrlər evindən dəyəri 27628 (iyirmi yeddi min altı yüz iyirmi səkkiz) manat olan 8150 nüsxə kitabın, “Güvən” nəşriyyatından dəyəri 26000 (iyirmi altı min) manat olan 2400 nüsxə kitabın, “Əli və Nino”-dan dəyəri 19880 (on doqquz min səkkiz yüz səksən) manat olan 1575 nüsxə kitabın, “Xan” nəşriyyatından dəyəri 18925 (on səkkiz min doqquz yüz iyirmi beş) manat olan 4100 nüsxə kitabın, “Parlaq İmzalar” nəşriyyatından dəyəri 17823,50 (on yeddi min səkkiz yüz iyirmi üç manat əlli qəpik) manat olan 1725 nüsxə kitabın, “Alatoran” nəşriyyatından dəyəri 17680 (on yeddi min altı yüz səksən) manat olan 1980 nüsxə kitabın, “Mücrü” nəşriyyatından dəyəri 16813 (on altı min səkkiz yüz on üç) manat olan 2490 nüsxə kitabın, “Başla” nəşriyyatından dəyəri 8240 (səkkiz min iki yüz qırx) manat olan 980 nüsxə kitabın, “Qələm” nəşriyyatından dəyəri 5750 (beş min yeddi yüz əlli) manat olan 800 nüsxə kitabın, “Jeko Print” nəşriyyatından dəyəri 5850 (beş min səkkiz yüz əlli) manat olan 950 nüsxə kitabın, “MİMTA” yayınlarından dəyəri 4718,20 (dörd min yeddi yüz on səkkiz manat iyirmi qəpik) manat olan 680 nüsxə kitabın, “Apastrof - A” nəşriyyatından dəyəri 4650 (dörd min altı yüz əlli) manat olan 475 nüsxə kitabın, “Qələm Çingizoğlu” nəşriyyatından dəyəri 4262,5 (dörd min iki yüz altmış iki manat əlli qəpik) manat olan 400 nüsxə kitabın, “Çapar Yayınları”ndan dəyəri 4600 (dörd min altı yüz) manat olan 500 nüsxə kitabın, “Ağıllı bala” MMC-dən dəyəri 4000 (dörd min) manat olan 800 nüsxə kitabın, “Bookzone Group”-dan dəyəri 3519,30 (üç min beş yüz on doqquz manat otuz qəpik) manat olan 390 nüsxə kitabın, “Aspoliqraf”-dan dəyəri 3400 (üç min dörd yüz) manat olan 200 nüsxə kitabın,“Qədim Qala” nəşriyyat evindən dəyəri 2000 (iki min) manat olan 200 nüsxə kitabın, “Fabula” MMC-dən dəyəri 1800 (bir min səkkiz yüz) manat olan 200 nüsxə kitabın, “Libra kitab”-dan dəyəri 1737,50 (bir min yeddi yüz otuz yeddi manat əlli qəpik) manat olan 400 nüsxə kitabın, “Köhlən” nəşriyyatından dəyəri 1430 (bir min dörd yüz otuz) manat olan 170 nüsxə kitabın, “Everest” nəşriyyat evindən dəyəri 1110 (bir min yüz on) manat olan 75 nüsxə kitabın, Xalq şairi Vahid Əzizdən dəyəri 1125 (bir min yüz iyirmi beş) manat olan 75 nüsxə kitabın, Əməkdar incəsənət xadimi Vidadi Babanlıdan dəyəri 1200 (bir min iki yüz) manat olan 150 nüsxə kitabın, uşaq yazıçısı Çinarə Köçərlidən dəyəri 1200 (bir min iki yüz) manat olan 75 nüsxə kitabın, ədəbi tənqidçi Əsəd Cahangirdən dəyəri 1000 (bir min) manat olan 50 nüsxə kitabın, yazıçı-publisist Şirxan Aranlıdan dəyəri 1750 (bir min yeddi yüz əlli) manat olan 50 nüsxə kitabın, tarix üzrə fəlsəfə doktoru Pərinaz Sadıqlıdan dəyəri 800 (səkkiz yüz) manat olan 80 nüsxə kitabın, folklorşünas Faiq Şükürbəylidən dəyəri 1200 (bir min iki yüz) manat olan 80 nüsxə kitabın, şair Fərid Hüseyndən dəyəri 2450 (iki min dörd yüz əlli) manat olan 315 nüsxə kitabın alınması həyata keçiriləcəkdir.

Müsabiqə çərçivəsində müəlliflər və müəlliflik hüquqi sahiblərindən alınacaq kitabların siyahısı aşağıdakı cədvəldə təfərrüatlı şəkildə qeyd olunub.

Siyahıda qeyd edilən hüquqi və fiziki şəxslərdən kitabların alışını təmin etmək üçün müvafiq sənədləri qısa zamanda Mədəniyyət Nazirliyinə təqdim etmələri xahiş olunur.

Əlaqələndirici şəxs: Xəyal Məmmədov

Tel: (+99412) 493 06 80

Ötən gün Şuşa Dövlət Musiqili Dram Teatrının fəaliyyətindən bəhs edən “Ən uzun qastrol” sənədli filmi İctimai Televiziyada (İTV) yayımlanaraq geniş ictimaiyyətə təqdim olunub.

Sözügedən filmdə Şuşa Dövlət Musiqili Dram Teatrının tarixi, Şuşanın işğalından sonra teatrın üzləşdiyi çətinliklər, buna baxmayaraq yaradıcı kollektivin fədakarlıqları sayəsində bu mədəniyyət ocağının fəaliyyətini 30 il ərzində davam etdirməsi, nəhayət, yenidən doğma Şuşaya qayıda bilməyin onlara verdiyi sevinc və qurur hissi nümayiş olunur.

Film Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Azəri Yurdu” Gənclər İctimai Birliyi tərəfindən icra olunan “İşğal nəticəsində dağıdılan mədəniyyət ocağının tanıdılması” layihəsi çərçivəsində hazırlanıb.

Ekran işi “Azərbaycan Jurnalistlər Şəbəkəsi” İctimai Birliyinin yaradıcı heyəti tərəfindən istehsal edilib. Filmin ssenaristi və redaktoru Ayaz Mirzəyev, rejissoru – Zəka Qulu, operatoru isə Emin Hüseynovdur.

Sənədli film Şuşa Dövlət Musiqili Dram Teatrının 4 aktyorunun müsahibəsi əsasında çəkilib. Filmin əsas süjet xətti 1990-cı ildə dövlət statusu alan Şuşa teatrının doğma şəhərində tamaşa qoymaq arzusunun müharibə səbəbindən reallaşa bilməməsi, ilk səhnəni Bakıda reallaşdırması ilə son 30 ildə “ən uzun qastrol”a çıxmasına həsr olunub.

Həmçinin filmdə teatrın direktoru Yadigar Muradovun 30 il sonra Şuşa şəhərinə getməsi nümayiş olunur və o, teatrın dağıdılmış binasının yerinə çatarkən gözünün qarşısında Şuşada teatrın ilk səhnələşdirmək istədiyi “Arşın mal alan” tamaşasından Vəli və Tellinin dueti canlanır.

“Şuşa İli” münasibətilə Mədəniyyət Nazirliyi tərəfindən həyata keçirilən “Şuşa mədəniyyətinin inciləri” layihəsi davam edir. 

“Ədəbiyyat və incəsənət” portalı Mədəniyyət Nazirliyinə istinadən xəbər verir ki, layihənin “Şuşanın ədəbi həyatı” bölməsi üzrə növbəti təqdimat “Məclisi-fəramuşan” ədəbi məclisə həsr olunub.

Muğam-sənət beşiyi Şuşada ədəbiyyatın inkişafında mühüm rol oynayan məşhur poetik məclislərdən “Məclisi-üns” haqqında məlumat verilmişdi. Bu dəfə “Məclisi-üns”dən səkkiz il sonra yaradılan “Məclisi-fəramuşan” (“Unudulmuşlar məclisi”) barədə söz açılıb.

“Məclisi-fəramuşan” həm də “Məclisi-xamuşan” (“Dinməz, sakit adamlar məclisi”) adı ilə tanınıb. 1872-ci ildə Abdulla bəy Asi, Mirzə Əbülhəsən Şəhid, Mirzə Əbdül Şahin, Fatma xanım Kəminə, Həsənəli xan Qaradaği və başqaları Mir Möhsün Nəvvabın rəhbərliyi altında bu ədəbi məclisdə bir araya gəliblər.

Mənbələrdə başqa məclislər kimi “Məclisi-fəramuşan”ın da üzvlərinin adları da tam əhatə olunmayıb. Onların adı daha çox Şuşa şairlərinin şeirlərindən, digər şəhərlərdəki şairlərlə məktublaşmalardan müəyyən edilib. 

“Məclisi-fəramuşan”da şairlər müşairə zamanı deyilən qəzəli onun bəhr və təqtisinə müvafiq olaraq oxuyar və həmin ahənglə ayaqlarını yerə vurub ona uyğun səs çıxardıblar. Məclisdə şairlərlə yanaşı, musiqiçilər də yaxından iştirak ediblər. Məşhur Qarabağ xanəndə və tarzənlərindən Xarrat Qulu, Mirzə Sadıqcan, Hacı Hüsü, Məşədi İsi məclisin şöhrətinə şöhrət qatıblar.

“Məclisi-fəramuşan”ın nəzdində M.M.Nəvvab və Hacı Hüsünün rəhbərliyi altında “Xanəndələr məclisi” adlı bir musiqi məclisi də fəaliyyət göstərib. 

Başqa ədəbi məclislərdə olduğu kimi, “Məclisi-fəramuşan”ın üzvləri də ancaq klassik üslubda-əruz vəznində yazmaqla məhdudlaşmayıb. Heca vəznində də gözəl şeirlər yaradıblar. 

1910-cu ilədək fəaliyyət göstərən “Məclisi-fəramuşan” da Şuşanın ədəbi-mədəni həyatında mühüm rol oynayıb, ədəbi prosesin şaxələnməsinə öz töhfəsini verib.

İndiki zamanda hədiyyə verənlərin sayı kəskin şəkildə azalıb, odur ki, kimsə kiməsə hədiyyə verəndə bu, dərhal diqqət çəkir. Biri də var, birdən-birə 400 adama hədiyyə verəsən. “Libraff” kitab mağazaları şəbəkəsi kimi.

“Ədəbiyyat və incəsənət” portalı xəbər verir ki, “Libraff” kitab mağazaları şəbəkəsi “Azərbaycan Dəmir Yolları” QSC ilə birgə maraqlı bir layihə həyata keçirib. Sumqayıt-Bakı elektrik qatarının 400-ə yaxın sərnişini qatara daxil olanda oturacaq üzərində ona ünvanlanmış hədiyyə kitab görərək ona sahib olub.

Səhər ertə belə sürpriz kimə xoş gəlməz ki?!

Kitabı təbliğ edənlər əsl alqışlara layiqdirlər!

Azərbaycan Dövlət Akademik Musiqili Teatrının 112-ci mövsümü artıq başa çatmaq üzrədir. Bununla əlaqədar bu gün saat 12:00-da teatrda mükafatlandırma mərasimi olacaq. 

Teatrdan bildirilib ki, 2015-ci ildən teatrda hər mövsümün sonunda keçirilən ənənəvi mükafatlandırma mərasimində bu dəfə də “Mövsümün sevilən aktyoru”, “Mövsümün sevilən aktrisası”, “Mövsümün perspektivli aktyoru”, “Mövsümün perspektivli aktrisası”, “Mövsümün ən məhsuldar aktyoru”, “Mövsümün ən məhsuldar aktrisası”, “Mövsüm ərzində teatrın dostu”, “Mövsümün ən yaxşı balet artisti”, “Mövsümün ən yaxşı xor artisti”, “Mövsümün ən yaxşı musiqiçisi”, “Mövsümün ən yaxşı texniki işçisi”, “Mövsüm ərzində kişi rolunun ən yaxşı ifasına görə”, “Mövsüm ərzində qadın rolunun uğurlu ifasına görə”, "Mövsümün ən işgüzar əməkdaşı”, “Mövsümün ən cəsarətli qadın obrazının ifasına görə” və başqa nominasiyalar üzrə qaliblər bəlli olacaq. Onlara mükafatlar və hədiyyələr təqdim ediləcək.

Mərasimdə, həmçinin mövsümün seçilən aktyorlarına Xalq artisti Hüseynağa Sadıqovun ailəsinin təsis etdiyi Hüseynağa Sadıqov adına “Büllur alma” mükafatı da təqdim olunacaq.

Günün fotosu: Luqanoda bu gün Ukrayna konfransı açılacaq

İsveçrənin cənubundakı Lugano şəhəri  bu gün açılacaq Ukrayna konfransı ərəfəsində təhlükəsizliyin təmin edilməsi üçün bərk hazırlıqlar keçib. Onlarla ölkənin və beynəlxalq təşkilatların liderləri Ukraynanın müharibədən sonrakı bərpası məsələlərini Luqanoda müzakirə edəcəklər.

Avropa Komissiyasının rəhbəri Ursula fon der Liayen Aİ-yə üzvlüyün Ukrayna üçün "əlçatan həddə" olduğunu bildirib.

Foto: Euronews