Bu gün Azərbaycan Milli Xalça Muzeyində “Geyimin cazibəsi: Belqrad Etnoqrafiya Muzeyinin sərgisi” açılacaq.

Azərbaycanla Serbiya arasında diplomatik münasibətlərin qurulmasının 25-ci ildönümünə həsr edilmiş sərgidə Belqrad Etnoqrafiya Muzeyinin kolleksiyasından 64 eksponat nümayiş olunacaq. Serb xalqının mədəni irsini, onların keçmiş həyat tərzini özündə ehtiva edən bu nümunələr Balkan yarımadası və Orta Dunay düzənliyi ərazisində istifadə olunan, XIX-XX əsrlərə aid qadın və kişi geyimləridir. Əsasən gödəkcə və jiletlərdən ibarət olan eksponatların zəngin bədii tərtibatı, nəbati motivli rəngarəng naxışları Orta Dunay ərazisində kənd təsərrüfatının inkişafını, torpaqlarının zənginliyini, məhsuldarlığını simvolizə edir. Bunlar naxış elementlərinin, rənglərinin, biçiminin, formasının harmoniyasına görə yüksək zövqlə hazırlanmış, şəhər və kəndlərə məxsus gündəlik, həmçinin bayram geyimləri kimi xarakterizə olunan nümunələrdir.

Azərbaycan Respublikası Mədəniyyət Nazirliyi, Serbiya Respublikası Mədəniyyət və Media Nazirliyi, Azərbaycan Milli Xalça Muzeyi və Belqrad Etnoqrafiya Muzeyinin təşkilatçılığı, Serbiyanın ölkəmizdəki səfirliyinin dəstəyi ilə keçirilən sərgi oktyabrın 16-dək davam edəcək.

Sərgi çərçivəsində uşaqlar və böyüklər üçün serb xalqına aid ənənəvi tikmə naxışlarının tətbiqi ilə “özün rənglə”, fetr üzərində qaytanla sancma və sanama tikmələri üzrə ustad dərsləri keçiriləcək.

Məlumat üçün bildirək ki, Azərbaycan Milli Xalça Muzeyi və Belqrad Etnoqrafiya Muzeyi arasında 2016-cı ildən başlanan qarşılıqlı əməkdaşlıq əlaqələri çərçivəsində bir neçə layihə reallaşdırılıb, sərgilər keçirilib.

Özbəkistandakı Heydər Əliyev adına Azərbaycan Mədəniyyət Mərkəzində “İpək Yolu dürdanəsi” XIV Daşkənd kinofestivalı çərçivəsində Daşkənd və Buxara şəhərlərində keçirilən “Azərbaycan kinosu günləri”nin açılışından sonra festivalın növbəti günündə Özbəkistan Kinematoqrafiya Agentliyi ilə əməkdaşlıq edən ölkələrin film təqdimatları keçirilib.

“Ədəbiyyat və incəsənət” portalı AzərTAC-a istinadən xəbər verir ki, Azərbaycan Mədəniyyət Nazirliyi, “Özbəkkino” Milli Agentliyi, eləcə də Azərbaycan Mədəniyyət Mərkəzinin birgə təşəbbüsü və dəstəyi ilə keçirilən tədbirdə iştirakçılar əvvəl ulu öndər Heydər Əliyevin mərkəzin qarşısındakı abidəsi önünə, həmçinin şəhidlər bağına əklil və çiçək dəstələri düzüblər.

“Azərbaycan kinosu günləri”nin açılışı qardaş ölkədə böyük maraqla qarşılanıb. Festivalda Azərbaycan da nümayəndə heyəti ilə təmsil olunur. 

Əvvəlcə Ermənistanın son günlər Azərbaycanla sərhəddə təxribatı nəticəsində həlak olan şəhidlərimizin əziz xatirəsi bir dəqiqəlik sükutla yad edilib. 

Festivalın ilk günündə “Özbəkfilm” ilə “Azərbaycanfilm” nümayəndə heyəti arasında ikitərəfli görüş keçirilib. Görüşdə 2021-ci ildə kino sahəsində iki ölkənin təmsilçiləri arasında imzalanmış memorandumun nəticələrindən bəhs olunub. Qeyd edək ki, memorandumda Xalq artisti, kinorejissor Vaqif Mustafayevin ssenari müəllifi və rejissoru olduğu “Molla Nəsrəddin və yaxud çətin günlərimin dostu” film layihəsinin müştərək istehsal planı yer alırdı. Hazırda filmin üzərində artıq iş başlayıb. Görüşdə filmin müştərək istehsalı üzərində növbəti müzakirələr aparılıb. İkili görüşdə iştirak edən “Azərbaycanfilm”in direktoru Nazim Hüseynov, kinorejissor Vaqif Mustafayev və kinoşünas Ayaz Salayev iki ölkə arasında mədəni əlaqələrin inkişafında kino sahəsinin önəmindən söz açıblar. Tanıtım mərasimində ilk olaraq “Özbəkfilm” və “Azərbaycanfilm” kinostudiyasının birgə əməkdaşlığı ilə ərsəyə gələcək “Molla Nəsrəddin və yaxud çətin günlərimin dostu” bədii filmi haqqında məlumat verilib. Layihəni Xalq artisti, kinorejissor Vaqif Mustafayev və “Azərbaycanfilm” kinostudiyasının direktoru Nazim Hüseynov təqdim ediblər. Ekran əsərinin təsvir rejissoru Rusiya və Özbəkistanın məşhur kino mütəxəssisi Uluqbek Həmrayevdir.

Özbəkistandakı Heydər Əliyev adına Azərbaycan Mədəniyyət Mərkəzinin direktoru Samir Abbasov Azərbaycanla Özbəkistan arasında bütün sahələrdə əməkdaşlığın durmadan inkişaf etdiyini, dövlət başçımız Prezident İlham Əliyevin Özbəkistana səfəri və keçirilən görüşlərin, imzalanan müqavilələrin ölkələrimiz arasında əməkdaşlıqda yeni imkanlar açdığını qeyd edib. O, iki ölkə arasında mədəniyyət sahəsində əlaqələrdən danışaraq, həm ötən il, həm də bu il Özbəkistanda keçirilən beynəlxalq kinofestivalda Azərbaycan Mədəniyyət Nazirliyinin dəstəyi ilə ölkəmizin geniş təmsil olunduğunu, eləcə də Azərbaycan kinolarının Özbəkistanda böyük maraq və sevgi ilə qarşılandığını söyləyib. 

Diplomat 30 ilə yaxın işğal altında qalan Vətən torpaqlarının 2020-ci ildə azad olunduğunu, həmçinin bu gün kinematoqrafiyamızın azad Qarabağımızdan, Şərqi Zəngəzurumuzdan filmlər yaratmasının qürurverici olduğunu qeyd edib. 

“Özbəkkino Milli Agentliyi”nin rəsmisi, “Gənclik” kinostudiyasının rəhbəri Adxam Nurkulov ölkədə son vaxtlar kinematoqrafçılara yaradılan şərait haqqında məlumat verib, Özbəkistanda keçirilən kinofestival və Azərbaycan kinematoqrafçıları ilə əməkdaşlıqdan danışıb. O, beynəlxalq kinofestivalda dünyanın 40 ölkəsindən gələn 500-dən artıq kinematoqrafçı, rejissor, tanınmış artist və kino sahəsinin mütəxəssislərinin iştirak etdiyini qeyd edib. 

Tədbirdə çıxış edən Xalq artisti Gülyanaq Məmmədova Özbəkistanın Xalq artisti adına layiq görüldüyü üçün özbək xalqına və dövlət başçısı Şavkat Mirziyoyevə minnətdarlıq edib, eləcə də festivalın işinə uğurlar arzulayıb. 

Daha sonra filmlərin nümayişinə başlanılıb. Kinorejissorlar Ayaz Salayevin “Torpaq”, həmçinin İlqar Nəcəfin “Suğra və onun oğulları” filmləri nümayiş etdirilib. Hər iki rejissor yaradılan filmlər haqqında danışaraq, öz fikirlərini bölüşüblər. 

Azərbaycan Mədəniyyət Nazirliyinin layihəsi ilə hazırlanmış “Torpaq” filmində azərbaycanlıların öz ata-baba yurdlarından qovulması, deportasiyası, onların acı xatirələri və tarixi faktlar öz əksini tapır. Digər “Suğra və onun oğulları” filmi də nümayiş olunub. İkinci Dünya müharibəsi dövrünün bütün keşməkeşlərini özündə cəmləşdirən filmdə sevgi və nifrətlə dolu həyat öz əksini tapıb. Hər iki film festival iştirakçılarının böyük marağına səbəb olaraq, alqışlarla qarşılanıb. 

Qeyd edək ki, Beynəlxalq Kino Festivalın davamı olaraq sentyabrın 17-də filmlərimiz Buxara şəhərində nümayiş olunacaq

Azərbaycan Kinematoqrafçılar İttifaqı və “Visla” Film Festivalının birgə təşkilatçılığı ilə keçirilən “Polşa kino günləri” davam edir.

“Ədəbiyyat və incəsənət” portalı AzərTAC-a istinadən xəbər verir ki, “Polşa kino günləri” çərçivəsində nümayiş olunan növbəti film - “Məsihin bədəni” ekran əsəri olub.

Rejissor Yan Komasanın 2019-cu ildə real hadisələr əsasında çəkdiyi film 20 yaşlı Danielin həyatından bəhs edir. O, islah əmək müəssisəsində olduğu zaman mənəvi transformasiya keçirir ki, nəticədə də keşiş olmaq arzusunu hamıdan gizlədir. Azadlığa çıxandan sonra onun arzusu cəmiyyətlə sərt konfliktlərə gətirib çıxarır.

Tədbirdə çıxış edən, kinotənqidçi Sevda Sultanova müasir Polşa kinosunun əsas mövzularından birinin dinin, kilsənin cəmiyyətə olan təsiri üzərində qurulması olduğunu qeyd edib: “Rejissorların bu mövzuya diqqət ayırmasının əsas səbəblərindən biri Polşada dinin cəmiyyətə təsiri, siyasətə müdaxiləsidir. Kilsənin təzyiqi ilə ölkədə abortun qadağan edilməsi, din xadimlərinin seksual xarakterli zorakılıqlar törətməsi faktları gənclər arasında dinin nüfuzdan düşməsinə səbəb olub. Ona görə yeni nəsil rejissorlar filmlərində dini mövzuya daha çox tənqidi rakursdan yanaşırlar”.

S.Sultanova daha sonra rejissor Yan Komasa barədə məlumat verib. Qeyd edib ki, filmləri müxtəlif festivallarda nümayiş olunan Komasa xüsusən, virtual dünyanın yeniyetmələrinin həyatına təsirindən danışan “İntiharedənlər zalı” əsəriylə tanınıb: “O, bu əsərdə maraqlı montaj həlli sayəsində real dünya ilə virtual məkan arasında sərhədləri silir. “Məsihin bədəni” filminə gəlincə, burada rejissor göstərir ki, din formaldır, onun həyatla bağlılığı yoxdur. Daniel isə öz fəaliyyətində dinə həyatilik gətirir”.

Xatırladaq ki, Polşa Kino Sənəti Məktəbi tərəfindən dəstəklənən “Məsihin bədəni” filmi “Oskar” və “Avropa kino mükafatları”na nominant olub.

“Muzeyi peşəkardan öyrənək” adlı layihə üzrə növbəti təlim-seminar Bərdə Regional Mədəniyyət İdarəsinin əhatə etdiyi Bərdə, Tərtər və Yevlax rayonlarında, o cümlədən Mingəçevir şəhərində fəaliyyət göstərən tarix-diyarşünaslıq muzeyləri, rəsm qalereyaları və Heydər Əliyev mərkəzlərinin direktorları, baş fond mühafizləri və elmi işçiləri üçün Bərdə rayon Mədəniyyət Mərkəzində keçirilib. Layihədə ümumilikdə 10 mədəniyyət müəssisəsindən 40-dan çox əməkdaş iştirak etmişdir.

“Ədəbiyyat və incəsənət” portalı xəbər verir ki, Azərbaycan Musiqi Mədəniyyəti Dövlət Muzeyinin direktoru, sənətşünaslıq üzrə fəlsəfə doktoru, Əməkdar mədəniyyət işçisi Alla Bayramova və muzeyin ekspozisiya şöbə müdiri Ülviyyə Şəmmədovanın iştirakı ilə “Muzey sahəsində müasir çağırışlar”, “Fond və mühafizə işi”, “Dünya muzeyləri” mövzuları üzrə təlim-seminar keçirilib.

Azərbaycan Musiqi Mədəniyyəti Dövlət Muzeyinin elmi nəşrləri təlim iştirakçılarına təqdim edilmişdir. Sonda təlim iştirakçılarının sualları ətrafında fikir mübadiləsi aparıldı.

Qeyd edək ki, Azərbaycan Respublikasının Mədəniyyət Nazirliyi tərəfindən start verilmiş “Muzeyi peşəkardan öyrənək” adlı lahiyə regional muzeylərinin və əməkdaşlarının fəaliyyətini aktivləşdirmək, müasir çağırışlara cavab verən muzey mühitini formalaşdırmağa xidmət edir.

Layihənin digər regionlar üzrə fəaliyyət göstərən muzey müəssisələrinin əməkdaşları üçün təşkili də nəzərdə tutulur.

Mədəniyyət naziri Anar Kərimov Rusiya Federasiyası Prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoyla görüşüb.

“Ədəbiyyat və incəsənət” portalı xəbər verir ki, 15 sentyabr tarixində mədəniyyət naziri Anar Kərimov Rusiya Federasiyası Prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoyla görüşüb.

Tərəflər Azərbaycan və Rusiya mədəni əlaqələrinin yüksək səviyyədə olduğunu vurğulayıb.

Görüşdə gələcəkdə mədəniyyət sahəsində əməkdaşlığın genişləndirilməsi ilə bağlı həyata keçiriləcək layihə və planlar müzakirə olunub.

“Şuşa İli” çərçivəsində Azərbaycan İstiqlal Muzeyi tərəfindən həyata keçirilən “Şuşa - Qarabağın dünəni, bu günü, sabahı” adlı layihə çərçivəsində təqdimatlardan biri Azərbaycanın görkəmli şəxsiyyəti, alimi, sənətkarı, xalça ustası, “Azərbaycan xalçası” kimi fundamental əsərin müəllifi Lətif Kərimova həsr olunur.

Muzey məlumat yayıb ki, təqdimatda görkəmli xalçaçı-rəssamın həyat və yaradıcılığı haqqında məlumat verilir. 

Lətif Kərimov 1906-cı ildə Azərbaycanın qədim diyarlarından biri olan Şuşa şəhərində anadan olub.

Gənc Lətif Təbriz, Ərdəbil kimi məşhur xalça mərkəzlərini gəzib, hər sənətkardan, hər toxucudan bir təkrarsız ilmə vurmaq, bir naxış salmağı öyrənib.

Şuşa şəhərində "Qarabağxalça" artelində 1928-ci ildə təlimatçı kimi fəaliyyət göstərən Lətif Kərimov başqa rayonlarda da yerli xalçatoxuma işinin sirlərini öyrənirdi. O, 1930-cu ildən xalça sənəti mütəxəssisi kimi "Azərbaycanxalça" birliyində rəssam-təlimatçı vəzifəsində fəaliyyət göstərib. 

İlk dəfə olaraq Bakıda və Qubada (1932-1936) xalça məktəblərinin açılmasında Lətif Kərimovun böyük zəhməti olub. Lətif Kərimov təkcə xalçaçılıq sahəsində deyil, dekorativ tətbiqi sənətin başqa sahələrində də fəaliyyət göstərib.

O, min illərdən başlayaraq Azərbaycan xalçaçılarının müxtəlif növlərinə aid kompozisiya və naxışları toplanmış və beləliklə Quba, Şirvan, Bakı, Qazax, Gəncə, Qarabağ, Təbriz və Borçalı xalça qruplarına daxil olan 150-dən artıq xovlu və xovsuz xalça məmulatı çeşidlərini yığıb, onların rəngli reproduksiyasını hazırlayıb.

Lətif Kərimov 1991-ci ildə Bakı şəhərində vəfat edib.

Londonda “Leylanın skripkası” qısametrajlı filminin təqdimat mərasimi keçirilib. 

AzərTAC xəbər verir ki, Diasporla İş üzrə Dövlət Komitəsinin sponsorluğu və Azərbaycanın Böyük Britaniyadakı səfirliyinin Amerika Yəhudi İcmasının dəstəyi ilə keçirilən tədbir İngiltərə paytaxtının tarixi məkanlarından biri olan “Regent Street Cinema”da keçirilib. 

Təqdimat mərasimində Azərbaycanın Böyük Britaniyadakı səfirliyinin əməkdaşları, bu ölkədə fəaliyyət göstərən Azərbaycan təşkilatlarının nümayəndələri və müxtəlif universitetlərdə təhsil alan tələbələr iştirak ediblər. Təqdimat mərasimində Azərbaycana aid kitablar da sərgilənib.

Tədbiri giriş sözü ilə açan Diasporla İş üzrə Dövlət Komitəsinin şöbə müdiri Səlhət Abbasova gələn qonaqları salamlayaraq film haqqında fikirlərini bildirib. O, söyləyib ki, “Film Azərbaycanın multikultural ənənələrini əks etdirir. Azərbaycan xalqı tarix boyu müxtəlif etnik qruplar və xalqlar üçün birgə yaşamaq şəraitini təmin edib. O cümlədən Azərbaycan dövləti də bu mədəniyyəti ən səmərəli şəkildə dəstəkləyir”.

Səlhət Abbasova çıxışı zamanı bildirib ki, Ermənistan silahlı qüvvələrinin bölmələri sentyabrın 12-si gecə saatlarından başlayaraq Azərbaycan-Ermənistan dövlət sərhədinin Daşkəsən, Kəlbəcər, Laçın və Zəngilan istiqamətlərində genişmiqyaslı təxribatlara başladılar. Həmin rayonların ərazisində ordumuzun mövqeləri müxtəlif çaplı silahlar, o cümlədən minaatanlardan intensiv atəşə tutulub. Nəticədə Azərbaycan Silahlı Qüvvələrinin 71 hərbi qulluqçusu şəhid olub.

Daha sonra Azərbaycanın Böyük Britaniya və Şimali İrlandiya Birləşmiş Krallığındakı səfiri Elin Süleymanov çıxış edib. Azərbaycan və yəhudi icması arasında yaxın münasibətlər olduğunu qeyd edən səfir, filmdəki baş qəhrəmanın da Kaliforniya Ştatından gəldiyini, özünün də həmin illərdə orada çalışdığını və Azərbaycanın dostları ilə mehriban münasibətləri olduğunu söyləyib. O, ABŞ-da yaşadığı 10 il ərzində də yəhudi icması ilə sıx əlaqədə olduqlarını bildirib.

Süleymanov son günlər Azərbaycan və Ermənistan sərhədində erməni təxribati nəticəsində şəhid olan azərbaycanlı zabit və əsgərlərin və Böyük Britaniya Kraliçası II Elizabetin xatirəsinin 1 dəqiqəlik sükutla yad edilməsini xahiş edib. O, Azərbaycan Prezidenti İlham Əliyevin Böyük Britaniyanın Azərbaycandakı səfirliyinə gedərək, Böyük Britaniya və Şimali İrlandiyanın Kraliçası Ülyahəzrət II Elizabetin vəfatı ilə əlaqədar başsağlığı verməsinin ikitərəfli münasibətlərin nə qədər əhəmiyyətli və inkişaf etdiyinin göstəricisi olduğunu qeyd edib. 

Tədbirdə filmin rejissoru Ella Leya da çıxış edərək doğulub boya-başa çatdığı Azərbaycan haqqında film çəkdiyi üçün xoşbəxt olduğunu dilə gətirib. 

Təqdimat mərasimində tanınmış azərbaycanlı skripkaçı, Böyük Britaniyada fəaliyyət göstərən “Natavan Qrup”un İdarə Heyətinin üzvü Sabina Rakçeyeva çıxış edib ifa edib.

Film Azərbaycan və Amerika bəstəkarı, musiqiçisi və yazıçısı Ella Leyanın rejissorluğu ilə çəkilib. Filmin quruluşçu operatoru Nadir Mehdiyev, geyim rəssamı Mehriban Əfəndidir. "Leylanın skripkası” Kaliforniyada yaşayan Leyla adlı qızın anasını axtarmaq üçün onun doğulduğu yerə - Azərbaycana, Qubada dağ yəhudilərinin qədim yaşayış məskəninə səyahət etməsindən bəhs edir.

Filmdə baş rolları Sabina Rakçeyeva və gənc Hollivud aktrisası Sofiya Rossinski canlandırıblar.

Film izləyicilər tərəfindən maraqla qarşılanıb. 

Xatırladaq ki, “Leylanın skripkası” qısametrajlı filmi Monako Film Festivalında “Mələk” (“Angel”) mükafatının qalibi olub.

Azərbaycan Respublikasının Mədəniyyət Nazirliyi və Elm və Təhsil Nazirliyi İqtisadiyyat İnstitutunun birgə təşkilatçılığı ilə 18-20 sentyabr tarixlərində Şuşa və Bakı şəhərlərində “Azərbaycanda mədəniyyət iqtisadiyyatı: Şuşadan inkişaf impulsları” adlı beynəlxalq elmi-praktik konfrans keçiriləcək.

“Şuşa İli” çərçivəsində #think4culture çağırışı ilə gerçəkləşəcək tədbir ölkəmizdə mədəniyyət iqtisadiyyatının inkişaf perspektivlərinə həsr olunub.

Birinci hissəsi Şuşada, ikinci hissəsi isə Bakıda keçiriləcək beynəlxalq konfransda 15-ə yaxın ölkədən sahə üzrə ekspertlər, eləcə də yerli mütəxəssislər mədəniyyət iqtisadiyyatı ilə bağlı aktual məsələləri müzakirə edəcək və bu istiqamətdə öz təkliflərini təqdim edəcəklər.

Tədbirin əsas məqsədi mədəniyyət sahəsində gəlirliliyin,  yaradıcı sənayelərin ölkə iqtisadiyyatında payının artırılması, yaradıcı sənayelərin ixrac potensialının gücləndirilməsi kimi məsələlərin müzakirəsi və bu sahəyə ictimai marağın təşviq olunmasıdır.

Konfransa dəvət olunan xarici ekspertlər mövzu üzrə beynəlxalq təcrübəni bölüşəcək və yerli iştirakçılarla qlobal tendensiyalara dair fikir mübadiləsi aparacaqlar.

Beynəlxalq elmi-praktik konfrans eyni zamanda Şuşa şəhərinin Azərbaycanın mədəniyyət paytaxtı kimi statusunun beynəlxalq aləmdə təbliğinə, işğaldan azad edilmiş ərazilərdə Azərbaycan tərəfindən artıq qısa müddət ərzində aparılmış bərpa və yenidənqurma işlərinin beynəlxalq aləmdə tanınmasına xidmət edəcək, həmin ərazilərdə mədəni və yaradıcı sənayelərin inkişafına töhfə olacaq.    

Beynəlxalq elmi-praktik konfrans barədə daha ətraflı məlumatlar aşağıda qeyd olunan sosial media hesablarında mütəmadi olaraq yayımlanır:

Facebook: Culture Economy in Azerbaijan: Development impulses from Shusha (https://bit.ly/3Bgzw4R)

İnstagram: culture_economy_az (https://bit.ly/3eLvPwz)

Azərbaycan Respublikasında elm və təhsil sahəsində idarəetmənin təkmilləşdirilməsi ilə bağlı bəzi tədbirlər haqqında” Azərbaycan Respublikası Prezidentinin 2022-ci il 28 iyul tarixli 1769 nömrəli Fərmanının 5-ci bəndinə əsasən Azərbaycan Milli Elmlər Akademiyasının Milli Azərbaycan Tarixi Muzeyi, Nizami Gəncəvi adına Milli Azərbaycan Ədəbiyyatı Muzeyi və Hüseyn Cavidin ev-muzeyi əmlakları ilə birlikdə Azərbaycan Respublikasının Mədəniyyət Nazirliyinin tabeliyinə verilməsi ilə əlaqədar Mədəniyyət Nazirliyi tərəfindən görülən zəruri tədbirlər çərçivəsində nazir Anar Kərimov, nazir müavini Sevda Məmmədəliyeva və Nazirliyin Aparatının Muzey, qalereya və sərgilər şöbəsi Milli Azərbaycan Tarixi Muzeyini ziyarət etdilər.

Milli Azərbaycan Tarixi Muzeyinin baş direktoru akademik Nailə Vəlixanlı Nazirlik nümayəndələrini qədim zamanlardan başlayaraq bu günədək Azərbaycan tarixini əks etdirən 300 minədək eksponatın qorunub saxlanıldığı muzeyin fondları ilə tanış etdi. Eyni zamanda, muzeyin nəşrləri və ekspozisiyada sərgilənən dəyərli eksponatlar barədə məlumat verdi. O, həmçinin muzeydə fəaliyyət göstərən bərpa laboratoriyası və burada həyata keçirilən bərpa və konservasiya işlərindən danışdı.

Nazir Anar Kərimov çıxış edərək Milli Azərbaycan Tarixi Muzeyinin elmi-tədqiqat müəssisəsi kimi fəaliyyətinin davam etdirilməsinin zəruriliyindən bəhs etdi. O, həmçinin zəngin tariximizin daha düzgün təqdim edilməsinə, bu tarixdə indiyədək yol verilən bütün təhriflərin düzəldilməsinə ehtiyac olduğunu vurğuladı. Nazir qeyd etdi ki, muzeydə tədqiqat işinə böyük diqqət ayrılmalı, bu sahədə çalışan əməkdaşların peşəkarlığı artırılmalı və araşdırmaların xarici dillərə tərcüməsi təmin olunmalıdır. Bununla da Azərbaycanla bağlı tarixi həqiqətlərin dünya ictimaiyyətinə çatdırılmasına, mədəni dəyərlərimizin tanınmasına, tariximizin qorunmasına töhfə verə biləcəyimizi muzey əməkdaşlarının diqqətinə çatdırdı.

Nazir Azərbaycan xalqının tarixi və mədəni ənənələrini tədqiq və təşviq etdirən, habelə Azərbaycan tarixinin bütün dövrlərinə aid maddi mədəniyyət nümunələrinin toplanması, öyrənilməsi, nümayişi və təbliği istiqamətində xidmətlər göstərən Milli Azərbaycan Tarixi Muzeyinin Mədəniyyət Nazirliyinin tabeliyində fəaliyyət göstərməsinin daha səmərəli işlərin həyata keçirilməsinə imkan verəcəyini vurğuladı.

Görüş çərçivəsində muzey əməkdaşları ilə tanışlıq və muzeyin gələcək fəaliyyəti ilə bağlı müzakirələr aparıldı.