“Ədəbiyyat və incəsənət” portalı şair Yusif Nəğməkarın hikmət boxçasından növbəti kəlamları dərc edir. 

*Ağıllı kasıb varlı, ağılsız varlı kasıb görünər...

*Vara yox demək -- hiyləgərlik, 

Yoxa var demək -- hünərvərlik...

*Yuxarı mərtəbəyə qalxmaqla aşağıya enmək arasında bəzən bir nəfəs dərimi qədər zaman məsafəsi olur...

*Alimlər etiraz etməsəydilər, kainatda yeganə hərarət mənbəyinin Günəş olması faktına mən sevən insan qəlbini də əlavə edərdim...

*Cahildən də artıq cahil varsa, o da aqillə cahili bərabər tutan kəsdir...

*Əsası hörmətlə qoyulan sevgini ayrılıq da bitirə bilməz...

*Yamana yaxşılıq edib yaxşılığı yaman etmə...

*Yaxşılıqla olunan pislik pisliklə olunan yaxşılıqdan yaxşıdır...

*Yaltaqlıqla ofis rəhbəri, filial müdiri, müavin də, müşavir də, qəyyum da olmaq olar, amma sənətkar yox...

*Gəlişin, gülüşün, sevincin bir yana, qəzəbini belə sevməyənin sevgisinə inanma...

*Gülüşlərinə gülümsədiyinin göz yaşlarını da öpməlisən...

*Səndən qaçanın nə arxasınca düş, nə də qabağına qaç...

*Könlünü sındırdığının könlünü almaq neçə-neçə Kəbə ziyarətinə bərabərdir...

*Vicdanlı və ədalətli kəs bütün səhv addımlarının səbəbini özündə axtarandır...

*Hətta haqlı olsa belə, incidən inciyəndən daha çox əzab çəkir...

*Hər şeyə hakim olan zaman təkcə sevgiyə hökm edə bilmir...

*Adını münasib siyahıdan çıxaran çıxdaşların sənin möhtəşəmliyindən qorxduqlarına əmin ol...

*Günah səni görməyənlərdə yox, sənin görə bilməyənləri görə bilməyindədir...

*Ömür qısa olsa da, əməl uzundur...

*Ümid xəyalın tanışı, məqsədin dostudur...

*Təsəlli real istəkdən doğulan layiqli köməkdir...

*Ən böyük güc də peşimanlıq qarşısında acizdir...

*Məqamında əsəbini cilovlaya bilən adamın sağlamlığına şübhə yoxdur...

*Vətən eşqi Allah eşqidir!..