“Yazarın söz mətbəxi” rubrikasında gənc şair Ümid Naccarinin ustad şair Məmməd İsmayıl barədəki qeydləri təqdim olunur.

Azərbaycanın görkəmli şairi, mənəvi atam Məmməd İsmayıl ilə Ruminiyaya çox möhtəşəm bir səfərimiz oldu. Məmməd  müəllimi yaxından tanıdığıma və şəxsiyyətinə bələd olduğuma görə çox sevinirəm. 

"Mən şair taleyinə inanan adamam!"- deyir o və həqiqətən də şair ömrü sürən insandır. “Dostu tanımaq istəyirsənsə səfərə çıx” - demiş atalar... 

Ədəbiyyat üzrə beynəlxalq müstəvidə böyük uğurları olan Məmməd İsmayıl həm də xaraktercə bütöv və misilsiz şəxsiyyətdir və bu uğurlar heç də təsadüfi deyil. Bu, illərlə formalaşan şairlik həyatının və istedadın səmərəsidir. 

Bu səfərdə illərini ədəbiyyata, sənətə həsr etmiş Məmməd müəllim qızıldan dəyərli olan təcrübələrini mənə bir övladı kimi öyrətdi. 

Sizə cansağlığı və səfərlərimizin davamını arzulayıram, əziz Məmməd müəllim!

Günün fotosu: Odessa vilayətinin bombalanması acı nəticələr verib

Rus işğalçı ordusunun artilleriyası ötən gün Ukraynanın kurort şəhəri Odessanı bombalayıb, ən azı 18 nəfər həlak olub.

Foto: Euronews

A.Şaiq adına Azərbaycan Dövlət Kukla Teatrı sabah - iyulun 3-də rusdilli tamaşaçılar qarşısında maraqlı səhnə əsəri ilə çıxış edəcək.

Sənət ocağının kollektivi rus xalq nağılı əsasında hazırlanan “Durna balığı” tamaşası ilə teatrsevərlərin görüşünə gələcək. Tamaşanın quruluşçu rejissoru Anar Məmmədov, quruluşçu rəssamı Əfşan Əsədovadır.

Müxtəlif kukla mexanizmləri və canlı aktyor oyununun sintezindən ərsəyə gələn tamaşada balaca teatrsevərlər əsl nağıllar aləminə düşəcəklər.

Rolları teatrın rus bölməsinin aktyorları Rauf Babayev, Lina Məmmədova və Araz Həsənli ifa edirlər. Onu da qeyd edək ki, bu üçlük tamaşada 7-dən artıq personajı canlandırmaqla, eyni zamanda, iki kuklanın oyununu ustalıqla təqdim etməyə müvəffəq olub.

Azərbaycan diasporu öz nailiyyətləri ilə tarixi Vətəndəki soydaşlarını sevindirir. Diaspor nümayəndələri arasında yaradıcı insanlar – bəstəkarlar, rəssamlar, yazıçılar, heykəltəraşlar az deyil. Xaricdə yaşayan azərbaycanlıların növbəti uğuru barədə hər bir xəbər xalqımızın istedadına və yaradıcı təbiətinə görə qürur hissi doğurur. 

Ramin Quliyev Çexiyada yaşayan azərbaycanlı bəstəkar, Heyran Mustafazadə isə həmin ölkənin paytaxtında yaşayan istedadlı rəssamdır.

“Ədəbiyyat və incəsənət” portalı AzərTAC-a istinadən  xəbər verir ki, onlar birlikdə “Yellow Man” (“Sarı adam”) adlı yeni musiqi albomu yaradıblar. 

Müəlliflər məhz bu adı seçmələrini onunla izah edirlər ki, onların nəzərdə tutduğu sarı adam musiqi rəngləri vasitəsilə duyğular və emosiyalar yaradır. Əslində belə bir albom yazdırmaq ideyası eyniadlı “Yellow Man” əsəri bəstələnəndən sonra meydana çıxıb. Məhz həmin anda bəstəkar belə bir albom üzərində işləməyi qərara alıb. 

Ramin etiraf edib ki, bu əsərin adı meşədə gəzərkən ağlına gəlib. O deyib: “Biz hamımız müəyyən emosiyalar yaşayırıq. Bəzən özümüz də hiss etmədən bu duyğular qəlbimizdə yer alır. Sanki sürətlə gedən bir qatardayıq və pəncərədən o tərəfdə olanları görməyə macal tapmırıq. Hər bir gülü, çiçəyi ağacı, daşı, insanı görməyə çalışmaq lazımdır. Bizim həyatımız və həyat barədə təəssüratımızı bu anlar və duyğular əsasında formalaşır. İnsan təkcə həyati vurnuxmalarla kifayətlənməməlidir, axı bu həyatda gözəlliklər çoxdur. Sadəcə onları görmək lazımdır”. 

Albomun yazılması konsepsiya ilə sıx bağlıdır. Royal eyni vaxtda yeddi mikrofona yazılıb. Onlardan altısı royalın daxilində müxtəlif yerlərdə, biri isə royalın altında qoyulmuşdu. Bəstəkarın sözlərinə görə, burada məqsəd ondan ibarət idi ki, dinləyici özünü royalın daxilində hiss etsin, simlərin, ağacın rezonansını, klavişlərin, mexanizmin və pedalın səslərini duysun. Bəstəkar deyib: “Bütün bu səslər bizim əsərin tərkib hissələridir. Dinləyicinin diqqəti təkcə melodiya üzərində deyil, həm də başqa səslər üzərində cəmləşir. Məsələn konsert salonlarında dinləyicilər bu imkandan məhrumdurlar, onlar yalnız olduqları məkanın səslərini eşidirlər”. 

Heyran Mustafazadə albomum cildinin yaradılması prosesi barədə fikirlərini bölüşüb. Rəssam deyib: “Ramin öz kompozisiyasından qısa bir hissəni mənə göndərəndə mənim fikrimdə onun musiqi vasitəsilə ifadə etdiyi hissləri vizual şəkildə çatdırmaq ideyası yarandı. Mən bu təklifimi ona bildirdim. Bir müddətdən sona Ramin yazdı ki, albom olacaq, albomun adı artıq məlumdur, qalan məsələlərin həlli üçün əsəri özümün dinləməyimi təklif etdi. “Sarı adam” rəsmi üzərində işin nə qədər davam etdiyini dəqiq deyə bilmərəm. Lakin bir məsələni qəti deyə bilərəm ki, “bu dalğaya köklənmək”, nəyə görə, məsələn, “göy adam” və ya “qırmızı adam” deyil, məhz “sarı adam” variantını seçməyimizi anlamaq üçün xeyli vaxt lazım gəldi. 

Bu rəngin xüsusiyyəti nədən ibarətdir? Bu xüsusiyyət müəyyən xarakterlə, fərdi münasibətlə bağlı deyil, bəlkə də tam əksinə - ən ümumi, mücərrəd və ekspressiv xarakter daşıyır. Bu, konkret insanın portreti deyil, musiqinin özünün, dinləyicini cəlb edən, onun sanki əriyib getdiyi sehrli axının portretidir”. 

Əlavə olaraq bildirək ki, Ramin Quliyevin elektron, kamera və orkestr əsərləri 2018-ci ildən Yanaçek adına Musiqi və İfaçılıq Sənəti Akademiyasının layihələri çərçivəsində Niderlandda və Çexiyada ifa edilir. 

Ramin Quliyev festivalların treylerləri, animasiya filmləri və teatr pyesləri üçün musiqi yazır. Bəstəkar həm də “AnimaFilm” studiyasının seçim komissiyasının üzvüdür. 

2020-ci ildə Ramin Quliyevin “Dream” adlı ilk albomu işıq üzü görüb. “Yellow Man” (“Sarı adam”) bəstəkarın sayca ikinci albomudur. Hazırda Ramin Quliyev özünün üçüncü albomu üzərində işə başlayıb.

Mədəniyyət Nazirliyi tərəfindən həyata keçirilən “Mədəni gənclik” layihəsi başa çatıb.

Bu münasibətlə iyulun 1-də Bakı Dövlət Universitetində (BDU) mədəniyyət nazirinin birinci müavini Elnur Əliyev və universitetin rektoru Elçin Babayevin tələbələrlə görüşü keçirilib. 

“Ədəbiyyat və incəsənət” portalı xəbər verir ki, Mədəniyyət nazirinin birinci müavini Elnur Əliyev çıxışında deyib ki, hər bir gəncin uğurlu olması üçün özünü tanıması vacibdir: “Sizlər BDU-da təhsil alaraq öz düşüncə qabiliyyətinizi aşkarlayırsınız. Peşəkar dünyada ən vacib tələb olunan keyfiyyət düşüncə tərzidir. Artıq elə bir dövrdəyik ki, məlumatlı olmaq üstünlük təşkil etmir. Yəni dünyanın hər hansı bir yerində nə isə icad olunursa, dərhal qlobal səviyyədə məlum olur. Bu dövrdə əsas üstünlük öz unikal düşüncə qabiliyyəti ilə bəlli olan məlumatları, faktları fərqli cür təqdim etməkdir. Məsələn, eyni məlumata sahib olan bir azərbaycanlı və amerikalı eyni faktı oxuyub fərqli cür nəticəyə gələ bilərlər. Bu fərqlilik isə mədəniyyətdən irəli gəlir. Burada da kim daha zəngin mədəniyyətə sahibdirsə, o üstünlük qazanır. Bildiyiniz kimi, dünyanın bəlli bir coğrafi xəritəsi var. Biz düşünürük ki, göstəricilər üzərində işləyərək dünyanın mədəniyyət xəritəsini tərtib edək. Bu xəritə coğrafi xəritə ilə üst-üstə düşməyəcək. Bu xəritə millətin, xalqın dünya mədəniyyət tarixində oynadığı rola, verdiyi töhfəyə əsaslanacaq. Düşünürəm ki, bu xəritədə biz böyük ölkələrdən biri olacağıq. “Mədəni gənclik” layihəmizin əsas məqsədlərindən biri də odur ki, gənclərimiz Azərbaycanın həmin mədəniyyət xəritəsini görə bilsinlər”.

Daha sonra Elnur Əliyev tələbələrin layihə haqqında təkliflərini dinləyib, onları maraqlandıran sualları cavablandırıb.

Bu cür layihələrinin davamlı olmasını arzulayan BDU-nun rektoru Elçin Babayev “Mədəni gənclik” layihəsinin təşkilinə görə Mədəniyyət Nazirliyinə, layihədə iştirak edən tələbələrə və universitetin Tələbə Həmkarlar İttifaqı Komitəsinə təşəkkürünü bildirib. 

Tədbirin sonunda tələbələr arasında layihə üzrə keçirilən sorğunun (ən çox bəyənilən tamaşa, artist və s.) nəticələri elan olunub. Layihədə fəal iştirak edən tələbələrə sertifikatlar təqdim edilib.

Qeyd edək ki, bu ilin may ayından həyata keçirilən “Mədəni gənclik” layihəsinin məqsədi gənclərin incəsənətə marağının artırılması, onların ölkənin mədəni proseslərinə cəlb edilməsi, Azərbaycan gənci və mədəniyyətimiz arasında körpü salmaq, mədəni dəyərlərimizə sahib çıxacaq nəslin yetişdirilməsinə töhfə verməkdir. İki ay davam edən layihəyə BDU-dan 300 nəfər könüllü tələbə qatılıb. Tələbələr 5 mədəniyyət ocağında – Azərbaycan Dövlət Akademik Milli Dram, Azərbaycan Dövlət Akademik Opera və Balet, Azərbaycan Dövlət Akademik Musiqili, Azərbaycan Dövlət Akademik Rus Dram teatrlarında və Azərbaycan Dövlət Akademik Filarmoniyasında tamaşa və konsertlərə sərbəst baxmaq imkanı əldə ediblər.

Azərbaycan Respublikası Mədəniyyət Nazirliyi və Veysəloğlu Şirkətlər Qrupuna daxil olan "Araz" supermarketlər şəbəkəsinin birgə təşkilatçılığı ilə "Şuşa İli" çərçivəsində Şuşa Dövlət Musiqili Dram Teatrı M.F.Axundzadənin "Sərgüzəşti-vəziri-xani-Lənkəran" tamaşası ilə ilk dəfə Şuşada çıxış edib.

“Ədəbiyyat və incəsənət” portalı Mədəniyyət Nazirliyinə istinadən xəbər verir ki, Şuşa Şəhəri Dövlət Qoruğu İdarəsinin dəstək olduğu tədbirdə ictimaiyyət nümayəndələri, görkəmli teatr xadimləri və media təmsilçiləri iştirak edib.

Şuşa Dövlət Musiqili Dram Teatrı 1943-cü ildə təsis edilib və ona dahi Üzeyir Hacıbəylinin adı verilib, lakin bir neçə ildən sonra teatr bağlanıb. Azərbaycan müstəqillik qazandıqdan sonra Mədəniyyət Nazirliyi tərəfindən Şuşa Dövlət Musiqili Dram Teatrının fəaliyyəti bərpa edilib. Qarabağın işğalı səbəbilə Şuşada fəaliyyət göstərə bilməyən teatr uzun müddət Bakıda məskunlaşmalı olub.

Xatırladırıq ki, bərpa olunmasının ardından bu il fəaliyyətinin 30 illik yubileyini qeyd edən teatr indiyədək heç vaxt Şuşada tamaşa göstərməyib. İlk tamaşasını (Ü.Hacıbəylinin “Arşın mal alan”) məcburi köçkünlük dövründə Bakıda Azərbaycan Dövlət Gənc Tamaşaçılar Teatrında oynayıb.

“Sönməz Məşəl” Mədəni Əlaqələr İctimai Birliyi Qeyri-hökumət Təşkilatlarına Dövlət Dəstəyi Agentliyinin yardımı ilə “Şuşanın dağları, başı dumanlı” adlı layihə çərçivəsində film çəkilişlərini başa çatdırıb.

İctimai birliyin sədri, Azərbaycan Dillər Universitetinin dosenti Şəhla Nağıyeva AzərTAC-a bildirib ki, layihə üzərində üç aydan çox iş gedib. 

O, bədii-sənədli filmin ərsəyə gəlməsində Qeyri-hökumət Təşkilatlarına Dövlət Dəstəyi Agentliyinin yardımını, layihənin ərsəyə gəlməsində agentliyin tövsiyələrini, eyni zamanda layihənin reallaşmasında agentliklə yanaşı İctimai Televiziya və Radio Yayımları Şirkətinin xüsusi əməyi olduğunu qeyd edib. Belə ki, teleşirkət nəinki filmin çəkilişləri üçün texniki dəstək göstərib, həm də filmin çəkilişlərinə peşəkar aktyorların cəlb edilməsinə, eləcə də kütləvi səhnələrin quraşdırılmasına vəsait ayırıb.

Film Şuşa şəhərinin salınması tarixindən bəhs edir və həmin tarixin keşməkeşli səhifələri vərəqlənir. Ayrı-ayrı dövrlərdə Şuşaya hücumlar, bu hücumlar nəticəsində şəhərin başı üstünü alan təhlükə xüsusi qabardılır, törədilən dağıntılar barədə söhbət açılır.

Filmdə Şuşanın salınma tarixi ilə bağlı arxiv sənədlərinə, eləcə də bir çox məşhur rus və ingilis tarixçilərinin əsərlərinə istinad olunub. Çəkilişlər Şuşada, Ağdamda, Qəbələdə, Qala Dövlət Qoruğu ərazisində və İçərişəhərdə aparılıb.

Şuşa həqiqətlərinin tamaşaçıya çatdırılması üçün aktyor oyunundan, quraşdırılmış səhnələrdən geniş istifadə edilib.

Filmin ssenari müəllifi Müsəllim Həsənov, quruluşçu rejissoru Nəsimi Məmmədli, quruluşçu operatoru İsmayıl Eyvazi, quruluşçu rəssamı Valeh Davudov, geyim üzrə rəssam Şahin Həsənlidir.

Layihənin elmi məsləhətçisi tarix elmləri doktoru, professor Kərim Şükürovdur.

“Şuşanın dağları, başı dumanlı” bədii-sənədli filmi yaxın vaxtlarda tamaşaçılara təqdim olunacaq.