Super User
"Özünü səhv yerdə axtaranlar və ya həyatın açması"
Kubra Cəfərzadə, “Ədəbiyyat və incəsənət”
Qədim zamanlarda, amma həqiqətən ən qədim zamanlarda insanlar yaradılıb, ya da var olub. Birdən birə yaranan bu varoluş anında bir sıra insanlar yarandıqları yerdən başqa yerlərə razı halda köç ediblər, ya var olduqları yerdə məskən salıblar, ya da məcbur qalıb qaçıblar. Bəzən gedilməli yolun əksinə, bəzən də gedilməməli yola tərəf gediblər. Bəzən nə etməli olduqlarını bilmədən sürü şüurunun arxasınca düşüblər. Bəzən məsuliyyət hissini, vicdan ağırlığını çəkmək istəməyiblər. Bəzən heç kimin arxasınca getməyib öz yollarıyla gediblər. Ya bilərək, ya da bilməyərək.
Düzü, insanlığı ilbizə bənzədirəm. İlbiz kimi gedərkən arxalarında iz qoyurlar deyə. İzlər görünməyə bilər. Bəziləri iz buraxdığından xəbərsiz, bəziləri necə iz buraxdığından xəbərsizdir. Bəziləriysə heç buraxdığı izin dərdində də deyil. Nəticə olaraq o izlə rastlaşan hansısa bir həşərat ya yolunu dəyişdirər, bəlkə izdə sıxışıb qalar ( boğular), bəlkə də başqa bir həşərat o izi izləyib öz yolundan ayrılar.
İnsan da elədir. Birisi özsevgi nədir bilməz, dərk etməz. Çünkü özsevginin məlumat kitabçası onun şüuraltında yoxdur, qeyd olunmayıb. Kimilərində qərar, istək düyməsi işləməz, çünki mükəmməliyyətçi və tələbkar insanlar əhatəsində böyüyüb və ya ünsiyyətdə olmaq məcburiyyətində qalıb. Kimiləri də vecsiz. "Uzağı, vaxtı çatanda ölüb gedəcəm də, nə olacaq ki, niyə nəyinsə dərdini çəkim? " deyə düşünüb yaşayanlardır. Bunlar da tənbəl və günü günə satan insanlar əhatəsində var olanlardır.
Doğrudur. Hər kəs, hər şey kimlərəsə, nəyəsə görə daim dəyişir. Heç nə sabit qalmır. Ya da bəziləri özünü yaxşıca manipulyasiya edir, ya da manipulyasiya edən insanlara məruz qalır. Amma bəzən də bu, yaxşı nəticə verir. Çünki bəzi insanlar qərarsızdırlar.
Eyni fikri dəfələrlə deməyə hövsələm də çatmır. Buna səbəb ailə, mühit, maraq dairəsidir. Lakin belə insanlar da cəmiyyətin üzvü olduqlarından, dözüm göstərməlisən, çiban deyillər ki, sıxıb partladasan, sonra yerinin sağalmağını gözləyəsən. Belə insanları da motivasya kouçları, psixoloq, ekstrasens, rejissor, yazıçı və.s idarə edir. Lakin bu, uğur da gətirə bilər. Əgər həmin öncü olan kəs xarakteri müsbət və dünyaya faydalı biridirsə həmin kəslərə də xeyri dəyəcəkdir. Başıboş ortalıqda gəzməklərindənsə, onun - bunun pəncərəsinə daş atmaqdansa, bəlkə də özlərinə, həyatlarına, vərdişlərinə xeyirləri dəyəcək. Kim bilə bilər ki.
Bütün insanlığa yüklənən xüsusiyyət olan müqayisələndirmək, özü elə bəşəriyyətin məhvinə səbəb ola bilər. Yeridilən düşüncə isə budur. Yaradıcılıq, qabiliyyət yaradılışından varsa vardır, yoxsa yoxdur. Ya da genetikdir. Mən isə heç birinə qatılmıram. Qəbul edilən demək olar ki, çox düşüncəni də rədd edirəm. Hazırkı, şüur vəziyyətimə gələnədək də şüuraltı kassama nə qədər düşüncə yığmışdım. Lakin indi başa düşürəm ki, bu dünyada niyə qonağıq. Çünkü tum çırtlayaraq ətrafda və içimizdə baş verənləri izləyirik, sadəcə. Varoluşdan ölənədək bu belədir. Belə də olacaq.
Qeyri-ixtiyari bir şeylər hiss edəcək, eşidəcək, görəcək, yığacaq, paylaşacayıq. Həyatın açması budur.
Bu, bəzilərinə ağırlıq, bəzilərinə yüngüllük bəzilərinə də boşluq hissi verəcək.
“Ədəbiyyat və incəsənət”
(23.08.2023)
\
Rumıniyanın “Ultima ora” qəzetində Nizami Gəncəvi yaradıcılığı barədə geniş məqalə dərc olunub
Rumıniyanın nüfuzlu “Ultima ora” (Son saat) qəzeti Azərbaycanın Rumıniyadakı səfiri Hüseyn Nəcəfovun “Nizami Gəncəvi - Azərbaycanın görkəmli şairi və mütəfəkkiri” sərlövhəli məqaləsini dərc edib.
AzərTAC xəbər verir ki, məqalədə Nizami Gəncəvinin Azərbaycan, Şərq və dünya ədəbiyyatındakı yeri və mövqeyi, böyük şairin həyatı, yaradıcılığı, xüsusilə dünyada məşhur olan poemalar toplusu “Xəmsə” haqqında ətraflı məlumat verilir. Görkəmli şairin Yaxın və Orta Şərqin ən böyük mədəniyyət və ticarət mərkəzlərindən, Qafqazın ən qədim şəhərlərindən biri olan Gəncə şəhərində anadan olduğu qeyd olunur.
Bildirilir ki, Avropada XV və XVI əsrin əvvəllərində diqqəti cəlb edən dəyərlər Nizami Gəncəvi yaradıcılığının əsas mehvəri olub. Qadının cəmiyyətdə yeri, gender bərabərliyi məsələsi, ədalət, təbiətə hörmət, düşünmək azadlığı kimi dəyərlər Nizami yaradıcılığında Avropadan bir neçə əsr əvvəl yer alıb.
Məqalədə, Nizami Gəncəvi yaradıcılığı və onun əsərlərinin Avropa ədəbi məktəbləri ilə müqayisəli təhlili təqdim olunub. Bildirilib ki, Nizami Gəncəvi humanizmi xalqlar arasında harmoniyaya yönəlib. Nizami Gəncəvi əsərləri gender bərabərliyinin, sivilizasiyanın güzgüsüdür. İnsanları cəhalətdən, bir-birinə qarşı münaqişədən çıxarıb, birliyə, barışığa çağırır.
Müəllif vurğulayır ki, Nizami Gəncəvinin əsərləri bir çox dillərə tərcümə olunub, onun əsərlərinin əlyazmalarının nadir surətləri dünyanın nüfuzlu kitabxanalarında və muzeylərində saxlanılır.
Yazıda, həmçinin diqqətə çatdırılıb ki, Nizami Gəncəvinin yubileyləri ölkəmizdə hər zaman təntənə ilə keçirilib. Dahi şairin 800 illik yubileyi onun irsinin tədqiqi və təbliğində əsaslı dönüş yaratmışdır. Azərbaycanın klassik ədəbi-mədəni irsinə həmişə milli təəssübkeşlik və vətənpərvərlik mövqeyindən yanaşan Ümummilli Lider Heydər Əliyev Nizami irsinə də xüsusi diqqət yetirib. Heydər Əliyevin təşəbbüsü ilə 1979-cu ildə qəbul olunmuş “Azərbaycanın böyük şairi və mütəfəkkiri Nizami Gəncəvinin irsinin öyrənilməsini, nəşrini və təbliğini daha da yaxşılaşdırmaq tədbirləri haqqında” qərar Nizami yaradıcılığının tədqiqi və təbliği üçün yeni perspektivlər açıb. Ölməz sənətkarın 1981-ci ildə Ulu Öndərin bilavasitə təşəbbüsü və iştirakı ilə keçirilən 840 illik yubiley mərasimləri ölkənin mədəni həyatının əlamətdar hadisəsinə çevrilib.
Qeyd olunur ki, 1991-ci il UNESCO tərəfindən şairin 850 illik yubileyi şərəfinə “Nizami İli” elan edilib. Həmçinin 2011-ci ildə Azərbaycan Prezidenti İlham Əliyev Nizami Gəncəvinin 870 illik yubileyinin təntənəli qeyd edilməsi haqqında Sərəncam imzalayıb və Birinci vitse-prezident Mehriban Əliyevanın rəhbərlik etdiyi Heydər Əliyev Fondu şairin əsərlərini daha çox xarici dillərə tərcümə olunmuş şəkildə nəşr edib. Bununla yanaşı, 2012-ci ildə Azərbaycan Respublikasının Prezidenti İlham Əliyevin Sərəncamı ilə dahi Azərbaycan şairi Nizami Gəncəvi irsinin dünyaya tanıdılması məqsədilə Beynəlxalq Şuranın nəzdində beynəlxalq mərkəz yaradılıb.
Müəllif, həmçinin qeyd edib ki, Nizami Gəncəvinin anadan olmasının 880-ci ildönümü ilə əlaqədar Prezident İlham Əliyev 2021-ci ilin Azərbaycanda "Nizami Gəncəvi İli" elan edilməsi haqqında Sərəncam imzalayıb.
“Ədəbiyyat və incəsənət”
(23.08.2023)
Azərbaycanlı rejissor Lendok kinofestivalında münsiflərin sədri seçilib
Kinorejissor Fariz Əhmədov “Lendok” Beynəlxalq Film Festivalının münsiflər heyətinin sədri seçilib. Bu barədə o, mediaya açıqlama verib.
Həmin festival avqustun 25-də Sankt-Peterburqda start götürəcək.
Azərbaycan, Rusiya, Qazaxıstan, Özbəkistan, Qırğızıstan və digər ölkələrdən olan rejissorların 40-dan çox bədii və sənədli filmlərinin nümayiş olunacağı festival sənədli və bədii filmlər olmaqla iki istiqamətdə keçirilir. Sənədli filmlərin münsiflər heyətinin sədri rejissor və prodüser Fariz Əhmədov, bədii filmlərin münsiflər heyətinin sədri özbəkistanlı rejissor, ssenarist Əli Xamrayevdir.
“Ədəbiyyat və incəsənət”
(23.08.2023)
“Bu həsrətlər şəhərindən çox sevgilər uzaqdadı...” – Doğum günündə Taleh Mansurun şeirləri
Bu gün gənc şair Taleh Mansurun doğum günüdür. “Ədəbiyyat və incəsənət” portalı onu təbrik edir və bir neçə şeirini oxucularının ixtiyarına verir.
Taleh Mansur 1987-ci il avqust ayının 22-də Qazaxda doğulub. “Azərbaycan” Universitetinin məzunudur.
Poeziyaya erkən yaşlarından maraq göstərib. 2012-ci ildə Azərbaycan Respublikası Gənclər və İdman Nazirliyi tərəfindən maliyyələşdirilən və Dünya Gənc Türk Yazarlar Birliyi tərəfindən həyata keçirilən “Bölgələrdə yaşayan yaradıcı gənclərlə görüşlər” adlı layihə çərçivəsində “Bölgələrdən səslər” kitabında şeirləri dərc olunaraq ilk dəfə ölkə səviyyəsində geniş oxucu kütləsinin nəzərinə çatdırılıb. Hazırda dövri mətbuat səhifələrində şeirləri ilə mütəmadi çıxış edir.
Taleh Mansur həm də bacarıqlı naşirdir, “Ulduz” jurnalında çalışır, Baş redaktor Qulu Ağsəs demiş, jurnalın sütunlarından biridir.
Qalmır
Üzürəm taleyin, bəxtin əksinə,
Xəyalım düşüncə selində qalmır.
Ahımı küləklər çəkir köksünə,
Nəfəsim dünyanın yelində qalmır.
Ömür nə haydadı, dünya nə hayda?
Özüm daxmadayam, adım sarayda.
Qorxağın kəməri olsa nə fayda,
Onsuz da şalvarı belində qalmır.
Tikanlı söz demə, batır kağıza.
Ürəyin hər sözü çatır kağıza.
Gec, ya tez özünü atır kağıza,
Yaxşı söz şairin dilində qalmır.
Gedənlər Tanrının özüylə gedir.
Bir kəlmə "Gəl mənə" sözüylə gedir.
Ocaq da qoşulub közüylə gedir,
İstisi, tüstüsü külündə qalmır.
Uduzur axırda söz udan adam.
Kor olur gözünü unudan adam.
Neynəsin gül tutan, əl tutan adam? -
Əl ətri, gül ətri əlində qalmır.
Dənizin, torpağın tanış damlası,
Məhəbbət damlası, barış damlası.
Tanrıdan gəlsə də yağış damlası,
Süzülür, bəndənin telində qalmır.
Sözdü də, qalacaq...
Bəlkə də, yağışlar yağmamalıydı,
Buludlar könlünə dəydi ki, yağsın.
Damcılar ovcuma sığmamalıydı,
Uşaq paltarını geydi ki, sığsın.
Bir eşqin haqqını min insan verər,
Ən doğru cavabı düz susan verər.
İldırım düşdüyü yerdə can verər,
Neynəsin, ay bulud, göydü ki, çaxsın?
Dağların zirvəsi düzə baxmadı,
Baxışı buz tutdu bizə baxmadı.
Gözləri bir yerdə sözə baxmadı,
Axırda birini qıydı ki, baxsın.
Ağrılar sonuncu mənzilə qalmaz,
İçər göz yaşını, bir gilə qalmaz.
Dünyanın gecəsi hamilə qalmaz,
Zülməti qısırdı, Aydı ki, doğsun?
Sevdalı adamın izləndi eşqi,
Gizlənqaç oynadı, sözləndi eşqi,
Yumdu gözlərini gizləndi eşqi,
Bir ömür günləri saydı ki, çıxsın.
Xərclədi bu adam ömrü, qədəri,
Qazancı nə oldu, yoxdu qədəri...
Gah saçı töküldü, gah alın təri,
Başından tökülən nəydi ki, yığsın?
Şeirimi işıq bil, çıraqda saxla,
Gələr qara günlər, bük, ağda saxla.
Dilində saxlama, dodaqda saxla,
Sözdü də, qalacaq, meydi ki, axsın?
Yaz
Ay doğma daş, yad daşımı,
Barmaq dözməz, biləklə yaz.
Başdaşıma yaddaşımı
Yağışla yaz, küləklə yaz.
Qədəh dolu, misra yarı.
Ürək simdi, misra sarı.
Quşqanadlı misraları,
Qələmlə yox, lələklə yaz.
Görmə gözlə seziləni.
Düzmə hər cür düzüləni,
Barmağından süzüləni,
Xəlbir götür, ələklə yaz.
Yersiz olma, yerinə düş,
Sərin olma, sərinə düş.
Dərdin varsa, dərinə düş,
Dərin dərdi fələklə yaz.
Bir ah çəkməz min ah yazan.
Danış barı, din, ah yazan.
Ay boynuma günah yazan,
Yazdığını mələklə yaz.
Eşidirəm kar qışı da,
Boranı da qar, qışı da.
Məni tutan qarğışı da
Xoş arzuyla, diləklə yaz.
Allah, məni qınıma çək,
Yetim dərdi canıma çək,
Əvvəlimi sonuma çək,
Kəfənimi bələklə yaz.
Həsrət
Bu şəhərə gələn gündən şirin yuxum acı olub,
Bal yuxumun ləzzətini
Kəndimizdə arıların pətəyində unutmuşam.
Yadaşımda xatirəsi dağdan uca
Yastı-yastı təpələrin ətəyində unutmuşam,
Ya da arxın üstündəki
Salxım söyüd kötüyündə unutmuşam.
Bu şəhərə gələn gündən
kəndimizin gecələri gəlib girir yuxuma.
Görürəm ki, xəlvət bilib
Ay işığında çimir kəndin zil qaranlıq gecəsi...
Hamı yatıb yuxuları şipşirindi, nabat kimi,
qənd kimi,
Adamların yuxuları bərq vurur
Ay işığında bir nağıllı kənd kimi.
Görürəm ki, bağımızda ağacların budaqları
bir anadil nəğməsini çiçəkləyib.
Ah anadil!
Bezmədinmi min illərin ağrısına-acısına
nəğmə qoşub oxumaqdan?
Bir gecə də şair balan
düzüb-qoşan sözdən oxu.
Ah çəkirəm dərin-dərin,
Ürək dözmür, bəsdi dərin oxuduğun,
Qurban olum, o nəğməni
bir dəfə də üzdən-üzdən oxu.
Aman Allah, yuxuya bax!
Bir gör mənim ürəyimindən nələr keçir?
Gündüz məni uşaq kimi ağlar qoyan xatirələr,
Gecə gəlib yuxularda xəyalımdan
üzü-gözü gülər keçir.
Çoxu bilmir ömrüm-günüm necə keçir?
Yaşadığım gecələri
Səhərlərdə qocalıram.
Mən bir kənddə göz açmışdım,
O kəndə də ölməliydim,
Nə oldu ki, indi gəlib yad şəhərdə qocalıram?
Nədir məni qaçaq salan bu şəhərdən?
Kəndimizin əl çatmayan
sıldırımlı yuxusuna çəkilmişəm?
Nə çıxacaq bu gördüyüm yuxulardan,
Qatar-qatar yuxulara əkilmişəm?
Bir kimsəyə üzüm gəlməz,
Ürəyinin döyündüyü
kəndimizə qurban olum, ay ana,
Bilirsənmi bu buz şəhər kəndimizdən
neçə sevgi uzaqdadı?
Bilirsənmi bu həsrətlər şəhərindən
çox sevgilər uzaqdadı?
Doğma deyil buraların küləkləri,
Sənin kimi sığal çəkmir saçlarıma
Nə yağışı, nə soyuğu,
nə də qarı.
Sızıldatmır ruhumdakı kövrək-kövrək duyğuları
İstəmirəm sovqat-filan,
Kənddən mənə yağış göndər bir buludluq,
Külək göndər bir udumluq.
Qar yağanda qar payımı göndər mənim.
Yığ beşiyə oxşamanı,
Körpə vaxtı şirin-şirin uyuduğum,
Bərbəzəkli çarpayımı göndər mənim.
Düşür
Görünmür yanaqda xalın qarası,
İzn ver telini qaldırım, düşür.
Sənin saçlarına yağış damlası,
Mənim ürəyimə ildırım düşür.
Yanıma-yörəmə uzaq dəyəndə,
Qara gözlərimə üz ağ dəyəndə.
Sənin yanağına sazaq dəyəndə
Mənim dağlarıma ilk qarım düşür.
Məhəbbət dolusu ürək istəsən,
Saçını dağıdan külək istəsən,
Tanrıdan nə zaman kömək istəsən,
Göydən qollarına qollarım düşür.
Astagəl könlünə yeyin düşürəm,
Sən gəlin olanda bəyin düşürəm.
Desələr, kiminəm, nəyin düşürəm?
Denən ki, doğmaca öz yarım düşür.
Oluramdan olarama...
Ürəyim dünyanın içində deyil,
Köçüm adamların köçündə deyil,
Yuxuda şərabı içəndə deyil,
Yuxumu yozanda sərxoş oluram.
Canımda can verir, Ya Rəbb, duyğular,
Qızılgül qoxulu-gülab duyğular,
Ruhumu axmalı şərab duyğular
Yolunu azanda sərxoş oluram.
Məni seçən sözü seçib yazmıram,
Hər sözün başından keçib yazmıram,
Mən heç vaxt şeiri içib yazmıram,
Mən şeir yazanda sərxoş oluram.
Məni unudanın gəlməz yadına
Mən ona doğmaydım, döndüm yadına.
Şərab atəşinə, şərab oduna
Badələr qızanda sərxoş oluram.
Göz yaşı üzümə güləndə içdim,
Ayılıb özümü biləndə içdim,
Şərabı dünyaya gələndə içdim,
Qəbrimi qazanda şərxoş olaram.
“Ədəbiyyat və incəsənət”
(22.08.2023)
Mədəniyyət nazirinin Tovuzda vətəndaşları qəbul edəcəyi tarix dəyişdirilib
Mədəniyyət naziri Adil Kərimli tərəfindən avqust ayının 23-də Nizami adına Mədəniyyət Evində (Tovuz rayonu, Bəhram Əsgərov küçəsi, 3) keçirilməsi nəzərdə tutulan Tovuz, Ağstafa, Qazax, Şəmkir və Gədəbəy rayonlarından olan vətəndaşların qəbulu tarixi dəyişdirilib.
Bu barədə Mədəniyyət Nazirliyi məlumat bildirib.
Nazirlikdən verilən məlumata görə, qəbulun avqustun 29-da keçirilməsi planlaşdırılır.
“Ədəbiyyat və incəsənət”
(22.08.2023)
Günün fotosu: Mədəniyyət Nazirliyindən daha bir nəcib təşəbbüs
Günün fotosu: Mədəniyyət Nazirliyindən daha bir nəcib təşəbbüs
Mədəniyyət Nazirliyi illərdir unudulub qalmış bir ənənəni dirçəldib. Azərbaycan mədəniyyəti tarixində iz qoymuş ustadların doğum və vəfat tarixlərində qəbirlərini ziyarət etmək, xatirələrini anmaq! Bu, həm o böyük şəxsiyyətlər üçün, həm də ədəbiyyatımız üçün zəruridir.
Xəbər verdiyimiz kimi, nazirliyin təşəbbüsü ilə muğam sənətimizin böyük ustadı, məşhur xanəndə, Xalq artisti Xan Şuşinskinin (1901-1979) anadan olmasının 122-ci ildönümündə II Fəxri xiyabanda məzarı ziyarət olundu. Mədəniyyət Nazirliyinin nümayəndələri və incəsənət xadimləri sənətkarın məzarı üstünə güllər düzüb, xatirəsini yad etdilər.
Unutmamaq borcumuzdur!
“Ədəbiyyat və incəsənət”
(22.08.2023)
O, həqiqətən gözəlliklər yaradırdı
“Ədəbiyyat və incəsənət” portalı Sumqayıtın tanınan jurnalisti Ramil Yaqub Zeynallının növbəti təqdimatını təqdim edir: Sumqayıtda adına küçə olan, yaşadığı binaya xatirə lövhəsi vurulan və 30 il baş həkim işləyən İzzət Sadıxov kimdir?
Məşhur insanları tanımaq hər kəsin ümdə borcudur. Təbii ki, biz müğənniləri, idmançıları yaxşı tanıyırıq. Bəs həkimləri necə?
İzzət Sadıxov 15 yanvar 1926-cı ildə doğulub. 1949-cu ildə Moskva Tibb İnistitutunu bitirib. 1951-1954-cü illərdə Yevlax rayonunda həkim–cərrah kimi fəaliyyət göstərib. 1949-cu ildən 1955-ci ilə kimi Moskva şəhərində cərrah işləyib. O,1955-1965-ci illərdə Sumqayıt şəhər poliklinikasında baş həkimin müavini, 1965-1967-ci illərdə Şəhər xəstəxanasında cərrahiyə şöbəsinin müdiri, 1967-ci ildən 1997-ci ilə kimi Sumqayıt şəhər Təcili Tibbi Yardım xəstəxanasının baş həkimi vəzifəsində çalışıb. 1957-ci ildə tibb elmləri namizədi elmi dərəcəsini alıb. 20 elmi işin müəllifidir.
Dəfələrlə həkim–cərrah ixtisası üzrə və sosial gigeyena və səhiyyənin təşkili üzrə Dövlət Həkimlərin təkmilləşdirmə İnstitutunda kurslar keçərək ali dərəcəli həkim adı verilib.
1991-ci ildə Azərbaycan Milli Yaradıcılıq Akademiyasının tibb doktoru, dəfələrlə Sumqayıt şəhər sovetinin deputatı seçilib.
O, 1997-ci ildə vəfat edib.
İzzət Sadıqov Sumqayıt və sumqayıtlılar üçün çox xeyir verib, bunu danmaq olmaz.
İ. Sadıxovun oğlu Rauf Sadıxov atasının yolunu davam etdirir. O, hazırda Sumqayıt Tibb Mərkəzinin Təcili Tibbi Yardım Xəstəxanasının baş həkimidir.
Digər oğlu Camal Sadıxov "Azəravtoyol"da çalışır.
Başqa bir oğlu Sadıq Sadıxov isə Mənzil İnşaatı Dövlət Agentliyi İdarə Heyətinin sədridir.
Məşhur şəxs və onun ailəsi barədə bu qədər.
“Ədəbiyyat və incəsənət”
(22.08.2023)
“YAŞAT” düşərgəsinin 6-cı həftəsinə başlanılıb
“YAŞAT” Fondunun və “ASAN Könüllüləri” Təşkilatının birgə təşkilatçılığı, “PMD Hospitality”nin tərəfdaşlığı ilə həyata keçirilən və Ulu Öndər Heydər Əliyevin 100 illik yubileyinə həsr olunan 3-cü “YAŞAT” düşərgəsinin 6-cı həftəsinə start verilib.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin ictimaiyyətlə əlaqələr şöbəsinin verdiyi məlumata görə, Şamaxı Safari Parka təşkil olunan ekskursiyadan sonra düşərgənin açılış mərasimi keçirilib, iştirakçılara həftəlik proqram barədə ətraflı məlumat verilib.
İkinci gün psixoloqlarla ilkin görüşlərlə başlayıb və “Faceart” tədbiri ilə davam edib.
Günün ikinci yarısında “Digital Umbrella” şirkətinin “StartSmart” layihəsi çərçivəsində təlim proqramı baş tutub.
Ardınca teleaparıcı Jalə Həsənli ilə keçirilən görüşdə qonaq uşaqlara nitq mədəniyyəti və düzgün ünsiyyət qaydaları barədə məlumat verib.
Düşərgənin tərəfdaşları “PMD Hospitality” şirkəti, “Shamakhi Palace Sharadil” oteli, baş sponsor: Bakcell, sponsorlar “Nar”, “PAŞA Bank” ASC, “BRAVO” supermarketlər şəbəkəsi, dəstəkçilər “İnnovasiyalar Mərkəzi”, “Azərbaycan Hava Yolları” QSC, “PAŞA Həyat Sığorta” ASC, “Gənc Psixoloqlar” İctimai Birliyi, “Digital Umbrella” şirkəti, Şamaxı Safari Park, “DeFacto” mağazalar şəbəkəsi, “Panda Kids” mağazalar şəbəkəsi, “Elm Galaxy'” MMC, “Libraff” kitab mağazaları şəbəkəsi, “Happy Day Cake”, “Booo.az”, “Milla”, “Gədəbəy Mineral Suları” MMC, “Bilim Bakı” mərkəzi, “INNOLAND Inkubasiya və Akselerasiya Mərkəzi”, Şamaxı Astrofizika Rəsədxanası; “AL Market” mağazalar şəbəkəsi, “Şokki Mokki” markası media dəstəkçiləri Azərbaycan Televiziyası (AzTV), İctimai Televiziya (İTV), ASAN Radiodur.
“Ədəbiyyat və incəsənət”
(22.08.2023)
Diqqət! “Təbiətin sovqatı” adlı uşaq rəsm müsabiqəsinə əsər qəbulu başa çatıb
Bu müsabiqəni daim gündəmdə saxlayırdıq. “Zeytun bağları” brendi və Bakı Xətai Sənət Mərkəzinin təşkilatçılığı və dəstəyi ilə yeniyetmə və gənclərin yaradıcılığını stimullaşdırmaq, gənc nəsildə ekoloji təfəkkürün inkişafı və ekoloji maarifləndirməyə xidmət məqsədilə elan olunmuş “Təbiətin sovqatı” adlı respublika uşaq rəsm müsabiqəsinə əsər qəbulu başa çatıb.
Xətai Sənət Mərkəzinin məlumatlna görə, mövzusu “Necə bir təbiəti qoruma nişanı asardım” olan müsabiqəyə respublikamızın müxtəlif guşələrindən yaşı 10-17 olan 700-ə yaxın yeniyetmə və gənc 800-dən çox əsər göndərib.
Nəzərdə tutulduğu kimi, təqdim olunan əsərlər arasından müəllifin yaşı nəzərə alınmaqla mövzu, düzgün kompozisiya, rəng seçimi və uşaqların öz düşüncələri ilə işlənmiş əsərlərə üstünlük verməklə 152 əsər seçilib.
“Təbiətimizin sovqatı” adlı respublika uşaq rəsm müsabiqəsinin yekun sərgisi avqustun 28-də saat 14:00-da Xətai Sənət Mərkəzində açılacaq.
Seçilən əsərlər avqustun 25-dək Xətai Sənət Mərkəzində təhvil verilməlidir.
Sərgilənən əsərlərin müəlliflərinə sertifikat təqdim olunacaq və “Zeytun bağları” brendinin məhsulundan hədiyyə alacaqlar.
Sərgidən seçilmiş 30 əsərin müəllifi xüsusi hədiyyə ilə mükafatlandırılacaq və həmin əsərlər “Zeytun bağları” brendinin ofisinin ekspozisiyasını bəzəmək üçün istifadə olunacaq.
“Ədəbiyyat və incəsənət”
(22.08.2023)
Pianoçu Riad Məmmədov Moskvada yeni konsert proqramı ilə çıxış edib
Azərbaycan və Rusiya pianoçusu, bəstəkarı Riad Məmmədov “Live at The Pushkin Museum” albomunun işıq üzü görməsi münasibətilə xüsusi hazırlanmış yeni konsert proqramı ilə çıxış edib.
AzərTAC xəbər verir ki, konsert Moskvada “Muzeon” parkında təşkil olunub. “For All We Know” (“Bildiyimiz qədər”) adlı konsert proqramında musiqiçinin həm pianoçu, həm bəstəkar kimi axtarışları, eləcə də müxtəlif əsrlərin klassik bəstələrinin günümüzün musiqisində, o cümlədən kinofilmlər üçün musiqidə öz əksini necə tapması barədə düşüncələri ifadə olunub.
Riad Məmmədov konsertin birinci hissəsində İohann Sebastyan Baxın əsərlərini öz transkripsiyasında və bu əsərlərə improvizələri təqdim edib. Daha sonra proqram caz standartlarının ifası ilə davam edib.
Caz standartları, muğam, eləcə də Riad Məmmədovun öz pyesləri bir daha nümayiş etdirib ki, musiqi çox müxtəlif ola bilər, lakin o, həmişə insanları birləşdirir.
Konsert proqramına İohann Sebastyan Bax, Vaqif Mustafazadə, Con Kuts, Riçard Rocers və digər bəstəkarların əsərləri daxil edilib.
“Ədəbiyyat və incəsənət”
(22.08.2023)
