“Ədəbiyyat və incəsənət” portalının Güneydən gələn səslər rubrikasında gedən şeirlərdən ən bəyənilənlərin təqdimatında Sevər Şəhabi həftəsi başlayır. Bu gün o, “Rəngli cücələr” deyəcək. 

RƏNGLİ CÜCƏLƏR

Yumurtanın ağ divarın,

Ana eşqiylə dəldiniz.

Sizlər də ananız kimi,

Yetim dünyaya gəldiniz.

Ananızı qınamayın,

Sanmayın sizi atdılar.

Onları da atanız tək,

Buğda ilə aldatdılar.

Atanızın ayaqların,

Qarmaqlara bağladılar.

Yerə baxan başlarını,

Biçaq ilə dağladılar.

Onun səhər avazıyla,

Narın-narın süzmədiniz.

Mahnımızın kölgəsində,

Məğrur-məğrur gəzmədiniz.

Saxta ana qucağında,

Uyumadan, oyandınız.

Boyaqçının qarşısında,

Öksüz-öksüz dayandınız.

Əlvan-əlvan boyalarla,

Kimliyizi dəyişdilər.

Boyaqçılıq sənətilə,

Səadətə yetişdilər.

«Ədəbiyyat və incəsənət”

(14.08.2023)

“Ədəbiyyat və incəsənət” portalı “Qiraət saatı”nda Fəxrəddin Qasımoğlunun “Son gecə” detektiv romanının dərcini yekunlaşdırdı. Böyük oxucu marağını və istəyini nəzərə alıb romanın davamı olan “On ikiyə işləmiş” romanının dərcinə başlayırıq.

Özü polis orqanlarında çalışan, ən dəhşətli, tükürpədici cinayətlərdən bilavasitə xəbər tuta bilən müəllifin bu romanı da sizləri sonadək gərginlik içində saxlayacaq.

42–ci dərc

Layiqə diqqətlə məni dinləməyində idi.

-Hələ qapıdan girərkən görüşmək üçün əlini sıxanda Qılıncın necə bir fiziki gücə malik olduğunu başa düşdüm. Elə görüşəndə bir şey də diqqətimi çəkdi. Onun barmaqlarının üstündə spesifik qabar izləri vardı. Fəhləliklə məşğul olan birinin ovuclarının qabar bağlaması normaldır. Ancaq barmaqların üstündəki qabarlar ya əlbəyaxa döyüş növləri ilə məşğul olanlarda, ya da hər an döyüşməyə hazır olmaq üçün özünü fiziki formada saxlayanlarda əmələ gəlir. Hər an döyüşə hazır olmaq heç kimin işi olmayan bir dəlinin nəyinə lazım idi? Dəli demişkən, Matvey Semyonoviç sağlam kimi xəstəxanaya yerləşdirdiyi adamda sonradan doğrudan da psixi pozğunluğun olduğunu aşkar etdiyini demişdi mənə. Diaqnozu isə, çox nadir rast gəlinən bir diaqnoz imiş. Həmin xəstəliyin əlamətləri də müşahidələrimdə mənə çox kömək oldu o iki gündə. Məsələ belə idi ki, əslində mən özünü dəliliyə vurmuş birinin heç də dəli olmamasını, bu adla yaşayıb rahatca cinayətlərini edib şübhələrdən kənarda qaldığını sübut etməliydim. Ancaq Matvey Proxorovun onun diaqnozu barədə dediklərini nəzərə alıb, məhz həmin diaqnozun nadir əlamətlərini tutuşdurmağı qərara aldım. Bu əlamətlərin müşahidə olunması Qılıncın bizə lazım olan adam olmasının daha bir sübutu olacaqdı. Ayrıca, elə həmin psixoloqlara istinadən, Qılıncın mənə lazım olan şəkil albomuna baxmayacağı ehtimalı da var idi. Qoy lap bir faiz olsun. Buna görə də, həmişəki kimi, işimi möhkəm tutub sübutları bir neçə istiqamətdən toplayırdım. Beləcə, Qılınc bağı belləməyə, mən isə altdan-altdan onu müşahidə etməyə başladım. Elə ilk dəqiqələrdən, beli tutmağından onun solaxay olduğu məlum oldu. Axşam yeməyində demək olar ki, kəlmə kəsməyən Qılınc yeməyini qurtaran kimi otağına çəkildi. Onda mən də otağıma qalxıb gizli kameranın monitoru qarşısında oturdum. Bu izləmə gecə saat 3-ə qədər çəkdi. Gecənin yarısına qədər yatmayan Qılınc əvvəlcə rəfdə qoyduğum kitablara baxmağa başladı. Demək olar ki, hər mövzuda olan o kitabları xüsusilə seçib oraya yığmışdım. Mənə onun kitablara diqqət yetirib-yetirməyəcəyi maraqlı idi. Əgər maraqlanarsa, məhz hansı kitabı seçəcəyi isə xüsusilə maraq doğururdu. Bir neçə kitabı vərəqləyən Qılınc, nəhayət, seçimini etdi və yerini rahatlayıb əlindəki kitabı oxumağa başladı. Layiqə, heç vaxt təsəvvür edə bilməzsən ki, o hansı kitabı seçdi. Qılınc, ümumtürk mədəniyyəti xəzinəsində «Tüzüki-Teymuri» - «Teymurun qanun kitabı» kimi məşhurlaşan «Əmir Teymurun vəsiyyətləri»ni seçdi. Ancaq bu məni təəccübləndirmədi. Sonrasını gözlədim. İki dəfə siqaret çəkmək üçün fasilə verməklə üç saat kitabı əlindən yerə qoymadı. Sonra televizoru işə saldı. Kanalları dəyişdikcə onun bu dəfəki seçiminin nə olacağını maraqla izləyirdim. Rusiyanın Birinci kanalında əl saxladı. Orada uzun illərdir gedən bir elmi veriliş var. «Həqiqətlər, müəmmalar» adlanır. O verilişə sona qədər baxdı. Razılaş ki, bu da çox maraqlı seçim idi. İllər əvvəl verilmiş saxta diaqnozu mənə maraqlı olmasa da, onun həqiqətən əziyyət çəkdiyi diaqnozunun əlamətlərini Matvey Semyonoviçdən soruşub yadımda saxlamışdım. Bu əlamətlər təxminən belə idi: «Şizofreniyanın «Hebefrenik» adlanan bu növü on beş-iyirmi beş yaş arasında ortaya çıxır. Belə xəstələr fəlsəfi mövzulara, təcrid olunmağa və heç bir məqsədi olmayan davranışlara  yönəlməyə meyilli olurlar. Davranışları boş və qeyri-sabitdir. Adi həyatda onlar heç nə ilə fərqlənmirlər. Belə adamlar bir ömür yaşayarlar və ətrafdakılar şizofrenik pozğunluqlarının olmasını duymaya bilərlər. Ancaq ayrı-ayrı vəziyyətlərdə onların hərəkətlərini proqnozlaşdırmaq çətin olur». Solaxay olması ilə yanaşı, xəstəliyinə xas xüsusiyyətlər də artıq müşahidə olunmuşdu. Matvey Proxorovun dediyi çox az rast gəlinən xəstəliyin bütün əlamətləri Qılıncda var idi. Belə təsadüflər də az olur. Qılınc ilk cinayətini iyirmi yaşında törətmişdi. Bu, xəstəliyin başlanma dövrünə uyğun gələn yaş idi. Çox güman ki, artıq o zaman o xəstəliyə tutulubmuş. Orta təhsilli olduğu halda, bu qədər kitabın içindən məhz tarixə düşmüş dahi bir insanın fəlsəfi fikirlərə söykənən kitabını seçib saatlarla oxudu. Elmi məzmunda olan verilişə baxdı. Mənimlə ünsiyyətdən yayındı. Ancaq bunlar hər biri ayrı-ayrılıqda ondan şübhələnmək, məhz bizə lazım olan adam olmasını düşünmək üçün birbaşa yox, dolayısı ilə olan arqumentlər idi. Onun qatil olduğuna tam əmin olacağımız əsas məsələ hələ irəlidə idi. Səbrlə Qılıncın nə vaxt göz qabağında olan albomu götürüb vərəqləyəcəyini gözləyirdim. Albom məsələsində özünü doxsan doqquz faiz doğrultmuş psixoloji rəylərə əsaslansam da, belə adamların davranışlarını proqnozlaşdırmağın xeyli çətin olduğu barədə qocaman həkimin dedikləri yadımda idi. Hər-halda nədənsə, uğura çox inanırdım.

Layiqə böyük maraqla məni dinləyirdi, elə təəssürat yaranırdı ki, nəfəsini belə dərmir.

-Qılınc növbəti siqaretini yandırıb ayaqlarını divana uzatdı. Tavana baxa-baxa tüstülətdiyi siqareti çəkib qurtaranda qalxıb yenə oturdu. İşləyən televizorun kanallarını bir neçə dəfə dəyişib maraqlı bir şey tapmayıb söndürdü. Sonra köynəyini çıxardı. Saat 1-i keçmişdi. Onun yatmağa hazırlaşdığını düşündüyüm anda birdən əlini uzadıb albomu götürdü. Bütün diqqətimi cəmlədim. İndi, monitorun heç də iri olmayan görüntülərində onun sifətinin hər əzasının tərpənişini, hər sinirinin belə titrəyişini sezməli idim. Qılınc albomu açdı. Bir qədər baxıb vərəqi çevirdi. Xeyli ikinci vərəqdəki şəkillərə baxdı. İnanmazsan Layiqə, ancaq mən, həmin anda onun bezib albomu bir kənara qoymaması üçün dua edirdim. Albomu axıra qədər vərəqləməsi çox vacib idi. Dediyim şəkillər növbəti, üçüncü vərəqdə idi. Qılınc isə gözlərini alboma dikib vərəqi çevirmirdi. Saniyələr keçirdi. Gözlərimi bir an da monitordan ayırmırdım. Onun bu anda verəcəyi reaksiya ilə yanaşı, sonradan olduqca vacib olan bir şeyi də yoxlayacaqdıq. Alboma qoyduğum şəkilləri görən Qılınc, bağı tərk etdikdən sonra mütləq hərəkətə keçməli idi. Onun ilk görüşəcəyi adam isə, cinayətlərin ən azı birində onunla əlbir olan biri, böyük ehtimalla isə qətlin sifarişçisi olmalı idi. «Bağ əməliyyatı» əsas bu iki şeyin üzərində qurulmuşdu. Nəhayət Qılınc sol əlini uzadıb vərəqi çevirdi. Hər şey indi məlum olacaqdı. Doğru yoldaydımsa, indi hər şey bir anda dəyişəcəkdi. Vərəqi çevirən Qılıncın sol əli göydə donub qaldı. Bir müddət belə qaldıqdan sonra albomu bir qədər də özünə yaxınlaşdırdı və sanki gözlərinə inanmırmış kimi daha diqqətlə baxmağa başladı. Sonra qeyri-ixtiyari əli siqaret qutusuna getdi. Son üç saatda cəmi üç siqaret çəkən Qılınc, sonuncu siqaretin arasından beş-altı dəqiqə keçməmiş birini də yandırdı. Albomu bağlamadan kənara qoyub siqaretinə dalbadal qullablar vurmağa başladı. Onun hərəkətlərini diqqətlə müşahidə edirdim. Qılınc nə baş verdiyini anlamağa çalışırdı. Fikirləşməyi cəmi bir dəqiqə çəkdi. Siqaretini söndürüb yenə albomu açdı və tez-tez vərəqləməyə başladı. O vərəqlədikcə, mən vərəqləri sayırdım. Yeddinci vərəqdə yenə dayandı. Əmirxanın şəkillərindən birini məhz bu vərəqdə qoymuşdum. Bundan sonra albomu axıra qədər vərəqləyib, başqa tanış şəkil tapmayanda yenə kənara qoydu və növbəti siqareti yandırdı. Gizli kamera ilə izləndiyini bilməyən soyuqqanlı qatil hisslərini cilovlamağı lazım bilməyib özünü ələ vermişdi. Planımı baş tutmuş hesab edə bilərdim. Albomdakı digər şəkillərdəkilər kimi, mərhum Əmirxanı və gənc Salamı tanımayan biri, bu albomu sadəcə maraqlı olduğu üçün vərəqləyib bir kənara qoyacaqdı. Qılınc isə, belə etmədi. Məhz lazımi şəkilləri «yem» kimi yerləşdirdiyim üçüncü və yeddinci vərəqlərdə dayandı, gəldiyi andan üzündə və davranışlarında müşahidə etdiyim soyuqqanlılığını itirdi, otaqda tək olduğunu düşünərək hisslərini büruzə verdi. Bir muzdlu qatil üçün belə sadə bir tələyə düşmək bağışlanmaz səhv idi. Heç mənim onu bağışlamaq fikrim də yox idi. Beləcə, qatil müəyyən olundu.

-Bəs sonra?, -Layiqə soruşdu.

-Saat 3-ə qədər siqaret çəkib var-gəl edən Qılınc yatmağa uzanandan sonra otağımın qapısını arxadan bərk-bərk bağlayıb mən də yuxuya getdim. Ancaq həmin gecə çox oyaq yatdım. Hərəkətləri qeyri-adekvat olan bu adamdan hər şey gözləmək olardı. Hər şey təsdiqləndiyindən səhəri gün planın ikinci hissəsini işə saldıq. Qılıncı həbs etdirmək hələ tez idi. Onun ilk görüşəcəyi adamın kimliyini öyrənmək bizim üçün çox vacib idi. Əgər həmin adam, araşdırma dövründə bizim diqqət mərkəzimizə düşənlərdən biri olardısa, bu onun birbaşa qətlin sifarişçisi olması anlamına gələcəkdi. Niyə ilk görüşəcəyi adam deyirəm, bilirsənmi? Mən Qılıncı tarazlıqdan çıxarmağa nail olmuşdum. Bu psixoloji gediş idi və ona qarşı effekt vermişdi. Qılınc sadəcə muzdlu qatildir və kiminsə sifarişi ilə işləyir. Deməli o, sərbəst qərar qəbul etmək səlahiyyətinə malik deyil. Bu halda, ilk növbədə rastlaşdığı anlaşılmaz vəziyyəti bölüşməyə və məsləhət almağa çalışacaqdı. Kiminlə, yəqin ki, özün başa düşürsən. Planın ikinci hissəsi də eynilə müsbət effekt verdi. Bağdan qayıdan Qılınc, elə həmin gecə taksi çağıraraq birbaşa Rəmzinin evinə sürdürdü. Daha qatığın həqiqətən də ağ olduğunu sübut etməyə ehtiyac yox idi. Tarazlıqdan çıxardığım Qılınc, buraxdığı növbəti səhvlə əlbir olduğu adamı ələ vermiş oldu. Onun kimliyini, yaşadığı ünvanı müstəntiq Cavadova ötürməklə işimizi bitirmiş olduq bu məsələdə. «Karat»ın işində nöqtə qoyuldu. Əslində isə, artıq Qılıncın hər iki qətli şəxsən törətdiyi sübuta yetmişdi. Elə Rəmzinin də bu qətllərin sifarişçisi olması daha bəlli idi. «Karat»ın məsələsində, əsas məqsədim əsil qatili tapıb Salamı azadlığa çıxarmaq idi. Buna da nail oldum. Qalan şeylərin axırına istintaqçılar çıxacaqlar. Məsələ bundadır ki, Arif müəllimi məhz dostu İsfəndiyarın oğlunun qətlinin sifarişçisi maraqlandırır. Mənim üçün də təbii ki, də onun mövqeyi prioritetdir. Polkovnik isə, araşdırmanın bu məqamında məni şəhərdən uzaqlaşdırdı. Düşünürəm ki, bu məsələdə, onun mənimlə bölüşmədiyi, ancaq əmin olduğu bəzi şeylər var.

-Mən də elə düşünürəm, şef. Həm də o bildiyi şeyə əsasən atacağı addım, məncə çox təhlükəli bir addım imiş. Ona görə də sizi oraya qatmaq istəməyib.

-Bilirəm, Layiqə, bilirəm. Ancaq sözündən çıxardımsa, Arif müəllim bunu mənə bağışlamazdı. Xasiyyətini bilirəm. Sonra da ki, o mənə atacağı addımlar barədə nə isə deməyəcəkdisə, mənim şəhərdə olmağım nəyi dəyişəcəkdi ki? Hər şeydən xəbərsiz oturub gözləyəcəkdim. O, məni uzağa göndərməklə sadəcə sığortaladı. Mən də çıxılmaz vəziyyətdə qalıb şəhəri tərk etdim. Yaxşı ki, hər şey yaxşılıqla qurtarıb. Arif müəllimin mesajından belə çıxır ki, təhlükə geridə qalıb.

-Şef, mesaj demişkən, bəs Səttarın mesajındakı şifri necə açdınız?

Elə bərk sürməsəm də, xeyli yol gəlmişdik. Şabran rayonunun ərazisi qurtarmaq üzrə idi. Bir azdan Siyəzən rayonunun ərazisinə girəcəkdik. Yolda içmək üçün götürdüyüm plastik qabdakı sudan bir qədər içib davam etdim.

-Səttar ağıllı adam idi. Mesajını da, vəsiyyətini də çox incəliklə seçib hazırlamışdı. Onun, bunları oğlu Teymuru qorumaq üçün etdiyini bilirsən. Teymura etdiyi vəsiyyəti isə təxminən belə idi: «Nə vaxtsa gələcək adama deyərsən ki, mən məni hər gün öldürən sirrimi özümlə qəbirə apardım. Qoy onu yağış, qar yusun, günəş şüaları yandırsın».Bilirsənmi burada hansı gizli məna var?

-Maraqlıdır şef, hansı?

-Heç bir qəbrin içinə nə yağış, qar düşür, nə də günəş şüaları keçir. Səttar vəsiyyətinin mətni ilə sirrin yağışın da, qarın da, günəşin də düşdüyü başdaşında olduğuna işarə verib. Bunu dərhal başa düşdüm. Xudatda olarkən qəbirlərin şəklini çəkmişdim. Başdaşındakı şeirin mətninə Sərdarlı ailəsinin yan-yana düzülmüş dörd qəbrindən birindəki tarixləri düzməklə nə isə əldə edəcəyimi düşünürdüm. Çünki mərhumun həmin şeiri götürdüyü Ömər Xəyyamın kitabında, ayrı-ayrı şeirlərin sətirləri arasında, bəzi hərflərin altında qələmlə nöqtələr, xətlər qoyulmuşdu. Səttar həqiqətən də, məzar daşlarındakı doğum və ölüm tarixlərindən istifadə etməklə xəbər yollamağa cəhd edibmiş. Bu dəqiqdir. Sadəcə alındıra bilməyib. Təəssüf ki, mən də rəqəmlərin üstündə üç gün baş sındırandan sonra bunu anladım. Doğru yolda deyildim və üç günüm boşa getmişdi. Ən sadə bir həqiqəti başa düşməyim üçün üç gün vaxt itirmişdim, Səttar nə qədər ağıllı adam olsa da, xüsusi biliklər tələb edən şifrəçilikdən anlayışı olmayıb və bunu edə bilməzdi. Onda bir gün ara verib növbəti gün yenə şifrin üzərində işlədim. Bu dəfə bütün diqqətimi şeirin mətninə yönəltdim. Ümumilikdə şeirin mətnindən Səttarın həm narahatçılığına, həm də nəyəsə ümid etdiyinə eyham vurduğunu müəyyən etdim. Bunu şifrdən əvvəl də, başqa təhlillərimlə başa düşmüşdüm qismən. Ancaq bu öyrəndiklərim cinayətkarların izinə düşmək üçün heç bir ipucu vermirdi. Onda yenə baş sındırmağa başladım və nəhayət ki, sirri tapdım. Şifrdə Rəmziyə birbaşa işarə var idi.

Söhbətin bu yerində marağı ona güc gələn Layiqə mənə tərəf çevrilib iki əlini də aramızdakı qoltuğa söykədiyim qolumun üstünə qoydu. Ancaq heç nə deməyib söhbətin davamını gözlədi. Gözlərini mənə necə zillədiyini görüb onu çox intizarda qoymamaqçün davam etdim.

-Şeirdə üç yerdə «könül» sözü işlənir, birinci, ikinci və dördüncü sətirlərin sonunda. Əvvəlki günlər bütün diqqətimi rəqəmlərə yönəltdiyim üçün buna əhəmiyyət verməmişdim. Mətni təhlil etməyə başlayanda isə, nəhayət ki, bu məqam diqqətimi çəkdi. Hər şey də bundan sonra yerini aldı. Səttarın çoxdan dünyasını dəyişdiyi həyat yoldaşının adı Könül olub. Bu şeiri seçməklə, narahatçılıq və ümid barədə deyilənlər ilə yanaşı, o diqqəti həm də həyat yoldaşının məzarına yönəldib. Bunu başa düşəndan sonra, onun başdaşını kənara qoyub, həyat yoldaşının başdaşını təhlil etməyə başladım. İlk baxışdan qeyri-adi bir şey yox idi. Adi, hamı kimi, ad, soyad, ata adı, doğum və ölüm tarixləri həkk olunmuş köhnə bir başdaşı idi. Artıq sirrin burada olduğunu müəyyən etmişdim. Ancaq hələ də Səttarın nə demək istədiyini tapa bilmirdim. Yazıları dəfələrlə oxudum və birdən barmağımı dişlədim. Nəhayət, hər şey aydın idi.

Layiqə, hələ də buraxmadığı qolumu iki əli ilə möhkəm sıxdı.

-Yadındadırsa, sənə bütün dahiyanə şeylərin açıqlamasının ən sadə şeylərə söykəndiyini demişdim, Layiqə. Burada da hər şey çox sadə idi. Səttarın həyat yoldaşı Könülün atasının adı Rəmzi imiş. Bu ad, Arif müəllimin ilk gündən yoxlamaq üçün mənə verdiyi siyahıdakı səkkiz nəfərdən birinin adı idi. Neçə yuxusuz gecə baş sındırdığım şifrin açması gözümün qarşısında imiş. Ancaq mən bunu başa düşmək üçün beş gün vaxt sərf etdim.

-Elə deyil, şef. Başqası bunu heç əlli beş günə də tapa bilməzdi.

Layiqənin bu sözünə dodağım qaçdı.

 “Ədəbiyyat və incəsənət”

(14.08.2023)

Bu gün Gülüş klubuna qazi şair Emin Piri öz “Radioda bir gün” monoloqu ilə qonaq gəlib. Günümüzdə bu cür hadisə hər birimizin başına gələ bilər. 

Radioların birindən zəng etdilər ki, Emin bəy, həm şair, həm də müharibə iştirakçısı kimi istərdik verilişimizin qonağı olasınız. 

Şou, ailə-məişət mövzulu verilişlərə getmədiyimdən hansı veriliş olduğuna önəm verirəm. Bir saat olacaqdı. Qonaqsa mən. Özüm-özümə düşünürəm ki, bir saat nə danışacam?

Nə isə, getdim, veriliş başladı. Saat tamamı olduğundan öncə saatın xəbərləri təxminən beş dəqiqə çəkdi. Bundan sonra aparıcı Vətən müharibəsi, şeir, ədəbiyyat və.s haqqında 6-7 dəqiqə danışdı. Daha sonra “bu gün bizim gözəl qonağımız var və.s.i. amma qonağımızı sizə reklamlardan sonra təqdim edəcəyik” dedi.

Reklam da bir neçə dəqiqə çəkdi. Baxdım ki, artıq verilişin 20 dəqiqəsi bitib. Bu dəfə aparıcı nəhayət məni təqdim etdi. Daha sonra bildirdi ki, qonağımıza suallarımız olacaq, inanırıq ki, verilişimiz gözəl keçəcək. Ardıyca bir neçə vətənpərvərlik şeiri oxudu. Hardasa beş dəqiqə də bu çəkdi. Sonrasa bildirdi ki, əməkdaşları hanısa muzeydən reportaj hazırlayıblar, onu dinləyək. 4-5 dəqiqə də bu sujet çəkdi. 

Nəhayət, verilişin yarsında mənə çönərək Emin bəy, “qələbə necə hisdir?” sualını verdi.

Mənsə ağzımı açıb nəsə demək istəyirdim ki, aparıcı anidən, “Emin bəy, gözəl müğənnimiz filankəs telefon bağlantısına qoşulub” dedi.

“Bildiyiniz kimi müğənnilərmizin müharibə dövrü böyük fəaliyyəti olub, istər təbliğat  fəaliyyəti, istərsə hərbi vətənpərvərlik mövzularda mahnılarıyla xalqımıza, ordumuza dəstək olublar” deyimləri.

Beləcə xanım müğənni ilə 10 dəqiqə telefon bağlantısı oldu.

Bunun ardıyca aparıcı bildirdi ki, sponsorlar olmadan belə gözəl verilişlər ərsəyə gəlməz və.s. Sponsorlar haqqında bir neçə dəqiqə bəh-bəhli təqdimatdan sonra verilişin bitməsinə 15 dəqiqə qalmışdı.

Aparıcı bildirdi ki, növbəti saatda radionun qonağı bir müğənni olacaq. Onun haqqında, onun dəyərləri, əxlaqı, möhtəşəmliyi haqqında verilişə necə qoşalmaq olar, sual vermək olar və.s mövzusunda beş-altı dəqiqə danışdı.

Mənsə gözləyirəm nə vaxt ağzımı açıb danışmaq bir yana, salam deyəcəm.

Növbəti 4-5 dəqiqəni isə artıq dinləmədiyim mövzuda danışdı. 55dəqiqədən artıq vaxt keçmişdi...

Aparıcı:

-Emin bəy, dəvətimizi qəbul edib gəldiyinizə görə təşəkkür edirik. İnanıram ki, həm sizin, həm də dinləyicilərin ürəyincə oldu. İndisə reklamlara bağlanırıq, ardıyca isə həm Azərbaycan, həm də dünyada baş verən ən son xəbərləri dinləyə bilərsiniz....

İki gün sonra həmin aparcı zəng etdi:

-Emin bəy, sizə hörmət etdik,qonaq çağırdıq. Zəng demirəm, heç olmasa Allahın bir çox sağolunu belə yaza bilərdiniz...

“Ədəbiyyat və incəsənət”

(14.08.2023)

Təbii ki, kriminal mövzular daha çox oxunur. “Ədəbiyyat və incəsənət” portalının əməkdaşları ən çox hallanan kriminal hadisəsi barədə sizləri bilgiləndirmək istədilər. Burada söhbət ölüm gətirmiş sevgidən gedəcək.                                                                                                                                                                                                                                                                                                                                                                                                                 2018-ci il oktyabrın 22-də Daxili İşlər Nazirliyinin “102” xidmətinə Qubanın Tülər kəndi ərazisində üzərində xəsarətləri olan kişi meyitinin tapılması barədə məlumat daxil olur.  Dərhal hadisə yerinə çıxan polis əməkdaşları orada 1992-ci il təvəllüdlü Elşad Əsədovun meyitini aşkar edirlər. Araşdırma zamanı, onun qisas niyyəti ilə qətlə yetirilməsi məlum olur. Belə ki, hadisədən 3 gün əvvəl qarşılıqlı razılaşma əsasında Elşad Əsədov yaxın qohumunun arvadı Aynur Əsədovanı qaçırıbmış. Hadisə yerinə toplaşan kənd sakinləri bildiriblər ki, Elşad Əsədov öz əmisi gəlinini qaçırdığı üçün öldürülüb. Faktla bağlı Quba rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.

Elə həmin gün cinayəti törətməkdə şübhəli bilinən Sadıq Dadaşov, Şahmar Əsədov, Pərviz Əsədov, oktyabrın 25-də Mətləb Muradov və Zabit Yolçuyev, noyabrın 1-də isə Nazim Mikayılov tutularaq istintaqa cəlb ediliblər.

Media məlum cinayət işinin istintaq materiallarını əldə edib.

Mərhumun atası istintaqa bildirib ki, 25 yaşlı Elşad qonşuluqda yaşayan Aynuru, qızın öz təkidi ilə qaçırıb: “Bir-birini sevirdilər. Onların ulu babaları əmioğlu olublar.Oğlumun öldürüldüyünü səhər bildim.Oğlum evli olmayıb.Bununla bağlı deyilənlər yalandır. O, subay olub. Dəfnində kənd sakinlərindən heç kim iştirak etməyib”.

İstintaqla müəyyən edilib ki, Aynur Əsədova 2009-cu ildən rəsmi nikahda olmasına baxmayaraq, əri Şahmar Əsədovun qohumu Elşad Əsədovla aralarında yaranmış sevgi münasibətlərinə görə, qarşılıqlı razılaşma əsasında, gələcəkdə ailə qurmaq məqsədilə heç kimə məlumat vermədən 2018-ci il oktyabrın 19-da evdən çıxıb, gediblər.

Qızının qaçmasını eşidən Sadıq Dadaşov qohum və tanışlarının köməkliyi ilə gizlənə biləcəklərini ehtimal etdiyi ünvanlarda onları axtarmağa başlayıb. Bakı şəhərinə getmiş kürəkəni Şahmar Əsədovun qohumları Elman Muradov, Qabil Mikayılov, Mətləb Muradov, Pərviz Muradov, Şahid Əsədov və David Mikayılovdan ayın 21-də Aynurla Elşadın paytaxtda, müvəqqəti məskunlaşdıqları ünvanı müəyyən etmələri barədə məlumat alıb və onları kəndə gətirmələrini tapşırıb. Həmin şəxslər heç bir qanunsuz hərəkətə məruz qalmayacaqlarını bildirərək Elşad Əsədovu və Aynur Əsədovanı Quba şəhərinə gətiriblər.Qabil Mikayılov Aynur Əsədovanı öz evinə aparıb.Elman Muradovla Şahid Əsədov isə oktyabrın 22-si gecə saat 1 radələrində Elşad Əsədovu Quba şəhərindən Tülər kəndinə gətiriblər.Bundan sonra Şahmar Əsədov, qardaşı Pərviz Əsədov, qohumu Nazim Mikayılov kəndin mərkəzində, «Pir» adlanan ərazidə avtomobilin qarşısını kəsiblər.Elşad Əsədovun kəndə gətirilməsini biləndən sonra Sadıq Dadaşov qeyd olunan yerə gedib.Elşad Əsədovun hərəkətlərini namusunu ləkələməsi kimi qəbul edərək, şalvarının arxa cibindən açılıb-qatlanan məişət təyinatlı bıçağı çıxarıb və onun döş qəfəsinə 2 dəfə zərbə vurub.Sonra qisas almaq niyyəti ilə Şahmar Əsədov və qeyriləri, ölümünü tezləşdirməkdən ötrü, rəhm göstərmədən, əlləri və ayaqları ilə Elşad Əsədovun başına və bədəninin müxtəlif nahiyələrinə çoxsaylı, güclü zərbələr vurublar.Bu hərəkətləri ilə, təqsirləndirilən şəxslər qrup halında zərərçəkmişi qəsdən həyatdan məhrum ediblər.

İş üzrə dindirilmiş Şahmar Əsədov bildirib ki, Aynur Əsədova ilə 2009-cu ildə ailə həyatı qurub, nikahdan 2 övladları dünyaya gəlib. 2018-ci il oktyabrın 19-da axşam arvadı uşaqlarını qayınatasıgildə qoyub, evdən çıxıb və geri qayıtmayıb. Aynurun və evdə olan qızılların yoxa çıxdığını görüb, bu barədə polisə məlumat verib.Kənd sakinləri ilə birlikdə qadını axtarsalar da, tapa bilməyib.Ayın 21-də Elşad Əsədovun guya, Bakıda, Cəzaçəkmə Müəssisəsində cəza çəkən Ceyhun adlı əmisi oğlunun yanına getməsini eşidəndə, ondan şübhələnib.Bibisinin əri Elmana zəng vurub, Elşadın kənddən çıxıb Qubaya getməsini və onu izləməsini tapşırıb.Elşad Quba avtovağzalından taksi ilə Bakıya yollandıqda, Elman, dayıları Qabil və David, dostu Mətləb başqa avtomobilə əyləşərək, onun arxasınca gediblər.

Həmin gün saat 16 radələrində tanımadığı mobil nömrədən zəng edən Aynur, xarici ölkə vətəndaşı ilə qaçdığını, xoşbəxt olduğunu, onu axtarmamalarını, qızılları Quba şəhərində satdığını və pulları ona göndərəcəyini deyib. Yaxşı etməsini, amma qızı Yağmuru niyə qoyub, qaçdığını söylədikdə, Aynur telefonu söndürüb. O, dərhal Quba Rayon Polis Şöbəsinin əməliyyat müvəkkili Ramin Qasımova zəng vurub və 1-2 saatdan sonra onunla görüşəndə, arvadının zəng etdiyi nömrəni ona göstərib. Əməliyyatçı yoxlayaraq, həmin nömrənin Bakıda, «Qara Qarayev» metrosu yaxınlığında olan taksofona məxsus olmasını müəyyən edib.Ramin Qasımova qohumlarının Elşadın arxasınca Bakıya getmələrini deməyib.Əmisi oğlu Şahid və yeznəsi Pərviz də paytaxta gediblər.Dayısı Qabil Mikayılov ona məlumat verib ki, hər birini tanıdığından, onlar Qubadan Bakıya gəldikləri Vüsal adlı taksi sürücüsündən Elşadın hara getməsini izləməsini xahiş ediblər.Taksi sürücüsü 5-10 dəqiqədən bir onlara zəng edib.Növbəti dəfə əlaqə saxlayanda, Elşadın metroya mindiyini, stansiyaların birindən qadın ayaqqabısı aldığını xəbər verib.Elşadın qadın ayaqqabısı alması onlarda şübhəni daha da artırıb.Taksi sürücüsü Elşadı axıra kimi izləyib, zəng edib, onun Bakıxanov qəsəbəsində, doğum evinin qarşısında yerləşən 5 mərtəbəli yataqxanaya girdiyini deyib.Buna görə həmin binanın qarşısına gəliblər.Şahid, Pərviz, Mətləb, Elman, Qabil və David 2-ci mərtəbəyə qalxıb, Elşadın girdiyi mənzilin qapısını döyüblər.Elşad qapını açan kimi içəri daxil olublar.Dayılarından biri ona zəng edərək, Elşadla Aynuru tapdıqlarını, onların bir yerdə olduqlarını xəbər verəndə, o hər ikisini kəndə gətirməsini tapşırıb.Qabil Mikayılov Aynura camaatın narahat olduğunu, ona görə də mütləq rayona getməli olduğunu deyəndə o, öldürüləcəyindən qorxduğundan, əvvəl getmək istəməyib. Amma Qabil söz verəndə ki, heç kim ona əl vurmayacaq, razılaşıb. Qubadan Bakıya gətirdiyinə, həm də izləyərək onlara Elşadın tapılmasında köməklik etdiyinə görə dayısı taksi sürücüsünə 100 manat pul verib.Bakıxanov qəsəbəsindən «Şamaxinka» adlanan əraziyə gəliblər və ayrı-ayrı avtomobillərlə Qubaya qayıdıblar.

Aynur yolda Elşadı sevdiyini, öz istəyi ilə onunla Bakıya gəldiyini söyləyib.Quba şəhərinə çatandan sonra dayısı Aynuru Heydər Əliyev prospektində yerləşən evinə aparıb.Saat 22 radələrində Sadıq Dadaşov zəng edib, harada olmasını soruşub.Evdə olduğunu söyləyəndə qayınatası ona qeyrətsiz olmasını, Elşadın kəndə gətirilməsini və evdən çölə çıxmasını bildirib. Atası Nəbi, qardaşı Pərviz, əmisi Rövşən, dayısı Nazim və daha 6 nəfərlə birlikdə 4 avtomobillə kəndin mərkəzinə yollanıblar. 100 nəfərə yaxın kənd sakininin pirin qarşısına, etdiyi namussuz hərəkətə görə Elşadı döymək üçün yığışdıqlarını görüblər. 5 dəqiqə sonra boz rəngli «Mercedes», arxasınca həmkəndlisi Zabitin sürdüyü «VAZ 21015» və Mətləbin sürdüyü «VAZ 2107» markalı avtomobillə pirin qarşısından keçəndə, kənd sakinlərindən kimsə Elşadın «Mercedes»də olduğunu deyib. Elman camaata yolu açmalarını, Elşadı aparıb atasına təhvil vermək istədiyini bildirib.Amma sakinlər avtomobili mühasirəyə alıblar.Qayınatası Sadıq maşının sol arxa qapısını açaraq, yumruqla Elşadı vurub.Düşüb qaçmaq istəyəndə, kənd sakinləri Elşadı tutub, döyməyə başlayıblar.Özü də onun başına, üzünə və bədəninin digər nahiyələrinə təpiklə çoxlu sayda zərbələr vurub.Onu nalayiq ifadələrlə təhqir ediblər.Qayınatası və qardaşı da ona zərbələr endiriblər.Bıçağın kimdə olmasını görməyib.Elşadı vurmaqda məqsədi ondan qisas almaq olub, öldürmək istəsə də, təpik zərbələrindən onun öləcəyini düşünməyib.Elşad müqavimət göstərməyib, əli ilə başını tutaraq, yalnız zərbələrdən özünü qorumağa çalışıb.Kənd sakinləri 10-15 dəqiqə ərzində onu təpikləyəndən sonra, xırıldadığını görüb, öldüyünü fikirləşiblər və kənara çəkiliblər.Zabit Yolçiyev hadisədən sonra uca səslə orda olan kütləyə müraciət edərək, bu məsələnin tək qayınatası Sadıqa deyil, bütün kənd sakinlərinə aid olduğunu deyib.

Şahmar Əsədov qeyd edib ki, arvadını qaçırmaqla, namusuna toxunduğu üçün, Elşad Əsədovun ölməsinə peşman  deyil. Düşünür ki, o cür əqidədə olan adamın yaşamağa haqqı yoxdur.

İş üzrə dindirilmiş qızın atası Sadıq Dadaşov qeyd edib ki, hadisədən yarım il əvvəl qızı ilə əri arasında narazılıq yaranıb. Özünü pis hiss edən Aynur ağrıkəsici dərmanlar qəbul edib və zəhərləndiyinə görə xəstəxanaya yerləşdirilib. Bundan sonra qızını öz evinə gətirib və Şahmar Əsədovla boşanmasını istəyib.Dəfələrlə qudası gəlib, Aynuru evə aparmaq istəsə də, razılıq verməyib.Təxminən 20 gündən sonra qızı uşaqları üçün darıxdığını deyib, öz evinə qayıdıb. 2018-ci il oktyabrın 19-da Mürvətə zəng edib, harada olduğunu soruşduqda, kiçik oğlu Şahmargildə olduğunu və bacısının yoxa çıxdığını deyib. “102” xidmətinə zəng edib, məlumat verdikdən yarım saat sonra polis şöbəsinin əməkdaşları kəndə gəliblər.Kənd sakinləri ilə birlikdə səhərə qədər Aynuru axtarsalar da, tapa bilməyiblər. Bu xəbəri bilən kürəkənin dayısı Qabil Mikayılov oktyabrın 20-də yaşadığı Rusiyanın Nijni Tagil şəhərindən təyyarə ilə Bakıya, oradan da Qubaya gəlib.Aynurun yoxa çıxmasında Elşad Əsədovdan şübhələndikləri üçün, onu izləməyi qərarlaşdırıblar.Bundan sonra Şahmarın dayıları Elşadın Bakıda olduğu yeri müəyyən ediblər.Saat 19 radələrində Qabil zəng vurub Aynurla Elşadı tapdığını xəbər verəndə, ona orada gözləməsini, gəlib, ikisini də öldürəcəyini və basdıracağını bildirib.Amma Qabil etiraz edərək, hər ikisini rayona gətirəcəyini söyləyib.3 saatdan sonra Qabil, David, Elman və İntiqam onun yanına gəliblər.Qızının harada olduğunu soruşduqda, Qabil Aynuru polis şöbəsinə təhvil verdiklərini deyib.Atası qızını öldürməyə imkan vermədiklərinə görə Qabilgilə kəskin narazılığını bildirib.Elşadı cəzalandırmaq üçün öz maşını ilə kəndə gedib. Yolda olarkən əməliyyat müvəkkili Ramil Qasımov zəng vurub, kəndin mərkəzində xeyli adam yığışdığını, xoşagəlməz hadisə baş verə biləcəyini və ona görə də onu gözləməsini söyləyib. Təxminən 10 dəqiqədən sonra görüşüblər.Ramil iki nəfər yoldaşı ilə qabaqda, o isə arxada kənddə yollanıblar.Bir qədər yol getdikdən sonra polis əməkdaşı maşını döndərib, geri qayıdıb.Səbəbini soruşduqda, Ramil şöbədən zəng vurub onu geri çağırdıqlarını deyib.Kəndin mərkəzinə çatanda, təxminən 100-ə yaxın insanın toplaşdığını görüb.Maşını saxlayıb Elşadı soruşanda, sakinlər sonuncunun «Mercedes» markalı avtomobildə olduğunu və düşmək istəmədiyini bildiriblər. Qapını açıb arxa oturacaqda əyləşən Elşada: «bu nə alçaqlıqdır elədin?» deyərək, maşından düşməyini tələb etdikdə, o, saymazyana şəkildə: «yaxşı eləmişəm. Mən bu barədə Şahmara demişdim» deyə cavab qaytarıb.Elşadın onu qeyrətsiz hesab etdiyini və nalayiq ifadələrlə danışdığını eşidib, özündən çıxıb.Özünə tərəf dartıb, sol əli ilə üzünə 2 dəfə zərbə vurub.Avtomobildən düşmək istəmədiyini görüb, şalvarının arxa sol cibindən açılıb-qatlanan bıçağı çıxardıb. Sağ əli ilə saçından tutub, sol əlindəki bıçaqla boğazına zərbə vurmaq istəyəndə, Elşad müqavimət göstərib. Buna görə bıçaq onun qulağını və üzünü cızıb.Elman Muradov onu arxadan tutub dartdığı üçün, yerə yıxılıb və bıçaq əlindən yerə düşüb.Bundan sonra Elşadı maşından düşürdüblər və orda olan şəxslər təpikləməyə başlayıblar.Hava qaranlıq olduğundan Elşada kimlərin zərbələr vurduğunu görməyib. Pərviz Əsədovun kiməsə: «vur bıçağı ürəyindən» deməsini eşidib. 5-10 dəqiqə Elşada zərbələr vurandan sonra onun, tam hərəkətsiz vəziyyətdə qaldığını görüblər. Yoldan maşınlar hərəkət etdiyinə görə meyitini bir az kənara çəkiblər. Yerə düşən bıçağı tapıb, maşınının baqaj hissəsinə qoyub.Bir müddətdən sonra hadisə yerinə polis əməkdaşları gəliblər.

Sadıq Dadaşov əlavə edib ki, maşının salonunda bıçaqla Elşadın ürək nahiyəsinə zərbə vurmayıb. Onun ölümünə səbəb olmuş xəsarətlərin kim və ya kimlər tərəfindən yetirildiyini bilmir. Maşından düşürüləndən sonra Elşadın döyülməsində iştirak etməyib.Baş verənlərə görə təəssüflənir və əməlindən peşmandır.

Zərərçəkmiş şəxsin hüquqi varisi Yaqut Əsədov ifadəsində göstərib ki, Elşad Əsədov onun oğlu, Aynur Əsədova isə əmisi nəvəsi Nəbi Əsədovun gəlini olub.Oktyabrın 19-u saat 20 radələrində Elşad evdən çıxarkən kənddə bir nəfərlə görüşəcəyini deyib.Növbəti gün arvadı Aygün gəlib, Şahmarın arvadının axşam yoxa çıxmasını eşitdiyini deyəndə, onlar Elşadın Aynurla birlikdə qaçmasından şübhələniblər.Aygün Elşada zəng edib, harada olduğunu soruşduqda, o şəhərdə, «Asan Xidmət»in yanında olduğunu deyib.Anası ona Aynurun bir gün əvvəl gecə yoxa çıxdığının bildirəndə, Elşad təəccüblənib. Ayın 20-də evə qayıdan oğlu ötən gün Gültəpə kəndində olmasını və sabah Bakıya gedəcəyini deyib. Bunu eşidən anası həbsdə olan qardaşı oğlu Ceyhuna sovqat aparıb, verməsini xahiş edib.Oktyabrın 21-də Elşad evdən çıxıb və bir daha qayıtmayıb.Həmin axşam bacısı Rəfiqə ona oğlunun Aynuru qaçırdığını və arxalarınca Bakıya 6 nəfərin getdiyini barədə məlumat verib. Gecə sakinlərin kəndin mərkəzinə yığışıb,  Elşadı gözlədiklərini bilib. Bir müddətdən sonra «Pir» adlanan ərazidən səs-küy səsləri eşidib, dözməyib və həmin istiqamətdə gedib.Amma yolun yarısında qabağına çıxan bacısının əri onu qaytararaq, ora getməyin mənasının olmadığını deyib.

Şahid Aynur Əsədova bildirib ki, 16 yaşında Şahmar Əsədovla ailə həyatı qurub, babası onu məcburi ərə verib.Şahmarı heç vaxt sevməyib.Əri onunla çox kobud davranıb, bu səbəbdən də atası onların boşanmasını istəyib.Şahmarın qohumu Elşad Əsədov Ukraynada yaşayıb, təhsil alıb.İlk dəfə onu 2014-cü ilin yayında kənddə görüb və ondan xoşu gəlib.Evli olduğundan bunu heç kimə deyə bilməyib.Hadisədən 1 ay əvvəl Elşada qarşı olan hisslərini bildirmək qərarına gəlib, bu məqsədlə onu sevməsi barədə məktub yazıb.Axşam Elşad həyətlərinə gəlsə də, utandığı üçün çıxıb, onunla görüşməyib.Amma növbəti gün həyətdəki bağın aşağısında görüşüb, söhbət ediblər.Bundan sonra həftədə 3 dəfə görüşüblər, lakin aralarında hər hansı yaxınlıq olmayıb. 2018-ci il oktyabrın 15-də Elşad ondan borca bir həftəyə qaytarmaq şərti ilə 500 manat pul istəyib. Pulu olmadığını deyərək, əvəzinə ona 2 cüt qızıl sırğa, 1 ədəd qızıl boyunbağı, qızıl qolbaq və 4 ədəd qızıl üzük verib. Səhəri gün Elşad qızılları Quba şəhərində 2400 manata satdığını deyib.Ayın 18-də Elşada zəng edib, Şahmarın qızılların evdə olmadığını biləcəyini və problem yaranacağını deyib.Oktyabrın 19-da telefonla danışanda evdən getmək barədə fikrinin ciddi olduğunu bildirib. Saat 19:30-da Elşad ona zəng edərək, kəndin aşağı yolunda taksidə onu gözlədiyini bildirib. Uşaqları qayınanasına verərək, saçını yuyub 15-20 dəqiqəyə qayıdacağını söyləyib və Elşadın dediyi yerə gedib.Qubada «Köhnə avtovağzal»da başqa taksiyə minib, Bakıya gəliblər.Oktyabrın 21-də axşam Bakıxanov qəsəbəsində qaldıqları evə yoldaşının dayıları və digər qohumları gələrək, onları rayona qayıtmağa məcbur ediblər.Həmin gecə onu Quba Rayon Polis Şöbəsinə aparıblar, Elşadı isə Tülər kəndində öldürüblər.

Şahid qismində dindirilmiş Quba Rayo Polis Şöbəsinin əməliyyat müvəkkili Ramin Qasımov ifadəsində göstərib ki, oktyabrın 21-də Tülər kəndinə çatanda, mərkəzdə təxminən 50-60 nəfər kənd sakininin toplaşdığını və Elşad Əsədovun meyitinin yolun qırağında olduğunu görüb. Toplaşanlardan hadisənin kim tərəfindən törədildiyini soruşanda, kənd sakini Zabit Yolçiyev qabağa çıxaraq Elşadı öldürdüyünü, kəndin namusunu təmizlədiklərini, ona görə də heç nədən qorxmamalarını deyərək, mərhumun barəsində nalayiq ifadələr işlədib. Zabitin danışığından və camaatın da onun dediklərinə əməl etməsindən, onun hər şeyi idarə etməsini hiss edib.Hadisə yeri müayinə olunduqdan sonra, orda olan 30-40 nəfər şöbəyə aparılaraq, ifadələri alınıb.Araşdırma nəticəsində Sadıq Dadaşovun Elşad Əsədovu bıçaqla, digərlərinin isə təpiklə vurmaları müəyyən edilib.

Məhkəmə iclasında Sadıq Dadaşov və Şahmar Əsədov özlərini qismən təqsirli biliblər, Pərviz Əsədov, Mətləb Muradov, Zabit Yolçiyev və Nazim Mikayılov özlərini təqsirli bilməyiblər.

Zərərçəkmiş şəxsin hüquqi varisi təqsirləndirilən şəxslərə ömürlük azadlıqdan məhrum etmə cəzası təyin edilməsini xahiş edib.

Bakı Ağır Cinayətlər Məhkəməsinin hökmü ilə Şahmar Əsədov və Sadıq Dadaşov 18, Pərviz Əsədov və Mətləb Muradov 17, Zabit Yolçiyev və Nazim Mikayılov 16 il müddətinə azadlıqdan məhrum olunublar.

Bəli, biz sizə müdhiş bir cinayət işi barədə danışdıq. Elə sevmək lazımdır ki, əqil başdan çıxmasın. Soyuq başla sevmək lazımdır. Əks təqdirdə, sevgi ölüm gətirəcək.

“Ədəbiyyat və incəsənət”

(14.08.2023)

Aida Eyvazlı, “Ədəbiyyat və incəsənət”

Bir beçə ildir ki, DİM imtahan komissiyası jurnalistika şöbəsinə imtahan verənlərin yazılarını yoxlamaq üçün bizi  imtahan komissiyasına dəvət edir. Biz də böyük məmnuniyyətlə bu dəvəti qəbul edib gedirik. 

Ötən il jurnalistika fakultəsinə sənəd  verənlərin əksəriyyəti "Jurnalist binasından ev almaq istəyirik" arzusunu dilə gətirmişdilər. Daha bilmirlər ki, əslində jurnalist olmaq üçün bu arzuda olanın fəhmi, ilahi vergisi və yaza bilən qələmi olmalıdır. Jurnalistin məqsədi yazmaq və hər şeyi ayna kimi göstərmək olmalıdır. Nə yazıqlar olsun  ki, bu gün bizim çoxumuzun yerini tutan psevdo juranalistciklər sayta 30 informasiya yerləşdirməklə qeydiyyatdan keçib MEDİA Agentliyinin tam hüquqlu mənsubu ola bilirlər, halbuki onların bəziləri  heç öz tərcümeyi-hallarını belə yaza bilmirlər. Aralarında elə sayt rəhbərləri bizim şərəfli adımızı  şərəfsizcəsinə daşıyanlar var ki, yumurta-toyuq davası edirlər. Hər hansı bir broyler fabrikində fabrikin direktoru bir "zurnaçı trol”ciyəzə 1 qutu yumurta və iki toyuq verirsə, digərinə 4 toyuq və 2 qutu yumurta verirsə, bax onda bu iki nəfərin arasında intriqa başlayır... "A... necə yəni sənə məndən çox toyuq verib... Yaxşı... bundan sonra görsün ki, onun başına nə oyun açacağam...”

Onların arasında bir tort, bir dəstə gül davası edənlər də var... Nə yazıqlar olsun ki, bu qırmızı "troll paçalar" ucbatından əsil jurnalistlər qalır kənarda və onlar əsl jurnalistlərə meydan sulayır.  1 ilə bahalı maşın alıb sürürlər... O qədər oyunlardan çıxırlar ki…

Jurnalist olmaq istəyən abituriyentlərin yazılarını oxuyanda, onların yazdıqlarından necə jurnalist ola biləcəkləri bəllidir. Şəxsən mən onların heç birinə yüksək bal yazmamışam.

Bu dəfə bir günə 15 yazı oxudum. Və oxuduğum birinci yazı məni titrətdi: Mövzu: “Uğurlu insan olmaq nə deməkdir?" 

1.“Bir uğur əldə etmək yoluna girəndə çəkinmə. Uğurlu insanlar da güclü insanlardırlar, amma məğlubiyyət qəbul etmədiyi müddətdə”.

2.“Həyatda özünə etdiyin ən böyük yaxşılıqlarındır sənin uğurların”.

3.“Hər şey beyində başlayır, beyində də bitir”

Bu mövzunu yazanın oğlan və ya qız, neçə yaşında olmasını bilməsəm də, 2 səhifə yarım yazısında 5-6 dənə belə uğurlu cümlə var idi. Yazı tərzi də bişmiş bir qələmi olan gənc  jurnalisti xatırladırdı.

Daha bir yazı  babat idi. Yönləndirən olarsa, ondan jurnalist ola bilər. Verilən digər mövzularda yazılan qalan 13 yazı isə bərbad idi. Bu abituriyentlər ədat, isim, fel, heç bir qrammatik qayda tanımırlar, onların heç birinin mütaliəsi yoxdur. Görün abituriyentin biri nə yazıb:

“Bir insan bu dünyada yaşayırsa, bu insanın mütləq bir işi düz gətirməyə bilər, bu o demək deyil ki, demək həyat bitti, və yaxud da bu həyata əlvida. Umummiyyətlə heç bir canlı bu ifadəni işlətməməlidir...”.

"həyat bitti" - bitti??? Bəlkə bitdi? 

heç bir canlı bu ifadəni işlətməməlidir"... - yəni it-pişik də, ağac da? Bəlkə insan? 

Belə səhvlər o yazılarda o qədər çox idi ki...  Ədəbiyyat, jurnalistika fakultəsinə imtahan verənlər -da, -də, -ki şəkilçilərinin işlədiləcək yerlərini bilmirlər. Absaz tanımırlar.

Bu bədbəxtlikdir, bu faciədir. Azərbaycan Respublikası Elm və Təhsil Nazirliyi, niyə məktəblərdə uşaqları ədəbiyyat kitabları ilə yükləmirsiniz, niyə bu uşaqlar oxumağı və yazmağı bacarmırlar? Belə deyirlər ki, məktəblərdə inşa və ifadə yazmaq, yoxlama işi yazmaq proqramdan çıxarılıb. Bu nə fəlakətdir? Niyə bu uşaqları bədbəxt edirsiniz? Axı dərindən yazıb oxumağı bacarmayan bu yetirmələrimiz sonra, bu dövlətdə məmur, nazir olurlar. Əksər hallarda da belə oxumağı-yazmağı bacarmayanlar gəlib yüksək kreslolarda otururlar.

Ötən il Bakı şəhər təhsil şöbəsinin bir qrup  direktor və müəllim heyəti Finlandiyaaya təhsil təcrübəsini öyrənməyə getmişdilər. Oradan qayıdandan sonra gördükləri nəyi tətbiq etdilər? Dünyanın heç bir yerində imtahanlarda tələbələr, dövlət imtahanı verənlər Azərbaycandakı kimi əziyyət çəkmir. Bizdə  imtahan verib iş axtaranları İsa kimi çarmıxa çəkirlər.  

Lap elə götürək juranlist olmaq istəyənlərə bu dəfə lototrondan çıxan mövzular. O nə mövzudur ki? Jurnalist olmaq istəyənlərin də hamısı  ağıllarına gələni yazıb, vərəqləri  mənasız sözlərlə doldurmuşdular. 

Bizə dünyanın inkişaf etmiş ölkələrində, Finlandiyada, lap elə yaxınlığımızda olan Qazaxıstandakı təhsil sistemini gətirin.  Bizim uşaqlara kitab oxutmalıyıq. Kitab , ədəbiyyat oxumayan insan cəmiyyətdə formalaşa bilmir. Yalnız tiktokun, instaqramın əsiri olub qalır.

Təhsilimiz xəstədirsə, millətimniz, dövlətimiz xəstədir. Bu reanimasiyadan təhsilimizi xilas edək!

Sonda isə onu demək istəyirəm ki, yuxarıda birinci yazısından misal gətirdiyim  abituriyent, əgər bu yazımı oxuyacaqsansa, özünü tanıt bizə. Sənə 10 bal yazdım. Sənin işığın bizim işığımızdır. Bir uşaq, bir tələbə, bir idmançı gözəl nəticə, uğur qazananda buna sevinirəm. Çünki bu, Vətənimin adına yazılır.

O ki, qaldı jurnalistikamıza, qəzetçiliyimizə… İnanıram ki, jurnalistikamızı bu ağlamalı günə qoyanları nə vaxtsa bir ələkdən keçirən tapılacaq. Ələyin altına gedənləri deyil, üstündə qalanları götürək. Çünki  juranalistikamızı ot-ələf basıb. 

Biz yenidən yer belləyib, torpaq şumlayıb jurnalistikamız üçün əkinçilik etməliyik, toxum səpməliyik.

Nə olar, jurnalistikamızı onun dəyərini bilənlərə verin, copy-paste edənlərə deyil, araşdırma aparanlara yol verin, meydan verin. 

“Ədəbiyyat və incəsənət”

(14.08.2023)