Super User
EKSPRESS-SORĞU -“Sənin üçün payız nədir?”
Nemət Tahir, “Ədəbiyyat və incəsənət”, Qarabağ bölməsi
Payız öz rəngarəngliyi ilə insan ruhunu oxşayır, qəlbə sakitlik bəxş edir. Qızılı yarpaqlar təbiətin həzin bir nəğməsi kimi hər yanı bəzəyir, sanki insanın iç dünyasını qidalandırır, ona mənəvi rahatlıq gətirir.
Lakin Ağdamda payız başqadır, burada kədər və sevinci bir arada yaşayırsan.
Bu məğrur torpaq sanki dağıntılar arasında da gözəllik yaratmaq istəyir. Erməni işğalçılarının viran qoyduğu şəhərin xarabalıqları arasında təbiətin toxuduğu sarı və qızılı naxışlar yeni bir həyatın simvoluna çevrilir. Dağıntılar arasından baş qaldıran Xan çinarları, nar kolları sanki dirçəlişin işarəsidir. Onlar, Cümə məscidinin kölgəsində, yeni tikilən binaların fonunda, bir daha baş əyməyəcəklərini hayqırır.
Ağdamdan dağlara doğru irəlilədikcə yolun hər iki tərəfində təbiətin öz boyaları ilə yaratdığı möcüzələr insanı heyran qoyur. Qarqarçayın sahillərində, Şahbulaq dağının ətəyində və Xaçınçay su anbarının ətrafında sarı-qızılı yarpaqların rəqs etdiyi çiçəklər, itburnu, böyürtkən və nar kolları payızın füsunkar palitrasını gözlər önünə sərir. Təbiətin sinəsində yerləşən Şahbulaq qalası isə bir rəssamın əlindən çıxmış əsər kimi qarşımıza çıxır. Sanki qızılı boyalarla işlənmiş möhtəşəm bir tabloya baxırsan. Qalanın yaxınlığında pıçıltı ilə axan bulağın göz yaşı kimi şəffaf suları kiçik bir göldə toplanaraq, ətrafdakı mənzərənin sakitliyini və təbiətin qəlbindəki sonsuz gözəlliyi tamamlayır. Ağacların sarı və qırmızı rəngləri bu dumduru göldə əks olunaraq insanın ruhuna toxunan bir harmoniya yaradır.
Burada payız mənə görə, 6 min şəhidin anasıdır, şəhid olmuş bir şəhərin ümidləridir, vətən həsrəti ilə bu dünyadan köçən doğmaların həsrətidir, kədəridir, nisgilidir.
Ağdamın payızı təbiətin dilə gətirə bilmədiyi bir qüssənin, eyni zamanda yenidən dirçəlişə olan ümidin rəmzidir.
“Ədəbiyyat və incəsənət”
(14.10.2024)
“İrəvan mətbəxindən nümunələr” layihəsində Mal qarnından bozartma
Rubrikanı Könül aparır.
“Ədəbiyyat və incəsənət” portalının Azərbaycan Milli Kulinariya Assosiasiyası ilə birgə layihəsində sizlərə hər dəfə İrəvan mətbəxindən nümunələr təqdim edirik. Bu nümunələr Azərbaycanın bu sahə üzrə tanınmış mütəxəssisi, əməkdar mədəniyyət işçisi, tarix üzrə fəlsəfə doktoru, kulinar Tahir Əmiraslanovun gərgin əməyi nəticəsində ortaya çıxmışdır.
Bu gün sizlərə Mal qarnından bozartmanın
hazırlanma qaydasını təqdim edəcəyik.
Nuş olsun!
DÜSTUR:
§ Mal qarnı – 200 qr
§ Soğan – 25 qr
§ Kərə yağı – 30 qr
§ Axta zoğal – 10 qr
§ Sarıçiçək – 0,1 qr
§ Duz – 6 qr
§ İstiot – 0,05 qr
Xörək əlavəsi:
§ nar turşusu – 15 qr, nar –
20 qr, sirkə-sarımsaq – 10 qr, tərəvəz turşuları – 20 qr
QEYD: Mal qarnının bişmə müddəti heyvanın yaşından və
mal qarnının bərklik dərəcəsindən asılı olaraq, 2-3 saat çəkə bilər.
HAZIRLANMASI:
Qarın təmizlənir, yuyulur. 5-6 sm- lik kvadrat şəklində tikələrə doğranır. Qazana yığılır, üzərinə su əlavə olunur və bişməyə qoyulur. Qaynayana yaxın suyu bir dəfə dəyişdirilir. Yenidən su əlavə olunaraq, gur odda bişirilir və kəfi təmiz alınır. Qabıqlı soğan əlavə olunur və təxminən 1 saatdan sonra çıxarılır. Vam odda bişirilir. Bişənə yaxın həm suyu çəkilməli, həm də tam bişməlidir. Kərə yağı vurulur, tovlanır, duz, istiot, sarıçiçək şirəsi, axta zoğal əlavə olunur, bir daha tovlanır və 5-6 dəqiqə yer dəmi alır. Yanında göyər- ti, nar turşusu, nar, sirkə-sarımsaq, tərəvəz turşuları verilir.
“Ədəbiyyat və incəsənət”
(14.10.2024)
Bakıda “Qərbi Azərbaycanın şirin inciləri" kitabının təqdimatı olub
Oktyabrın 12-də Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Qrant layihəsi çərçivəsində Azərbaycan Milli Kulinariya Assosiasiyasında hazırlanmış “Qərbi Azərbaycanın şirin inciləri” kitabının təqdimatı olub. Kitabın təqdimatı 20 oktyabr-Beynəlxalq Kulinariya gününə həsr edilib.
“Ədəbiyyat və incəsənət” portalı AzərTAC-a istinadən xəbər verir ki, Azərbaycan Milli Kulinariya Assosiasiyasının prezidenti Tahir Əmiraslanov və layihə rəhbəri Aynurə Əmiraslanova tərəfindən qələmə alınmış kitab Qərbi Azərbaycan ərazisində yüzilliklər boyu formalaşan və ermənilər tərəfindən özününküləşdirilən ənənəvi şirniyyatlarımızın düsturlarının bərpasını və tarixi-etnoqrafik tədqiqatını əhatə edir.
Kitabın "Ön söz"ünün müəllifi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyevadır.
Tədbirdə çıxış edən Aygün Əliyeva kitab haqqında öz təəssüratlarını bölüşüb, kitabın elmi, praktiki, mədəni mahiyyəti ilə yanaşı, siyasi mahiyyətini də açıqlayıb, görülmüş işi yüksək dəyərləndirib.
Sonra Qərbi Azərbaycan İcması nümayəndələri, AMEA-nın alimləri və digər qonaqlar Qərbi Azərbaycanın zəngin irsindən, süfrə mədəniyyətindən danışıblar. Onlar Azərbaycan milli mətbəxinin dünyanın ən qədim və zəngin mətbəxlərindən olduğunu diqqətə çatdırıblar.
Daha sonra qonaqlara “Qərbi Azərbaycanın şirin inciləri” kitabı hədiyyə olunub.
Kitab Azərbaycan və ingilis dillərində çap olunub, 220 səhifədən ibarətdir. Əsərdə Qərbi Azərbaycan mətbəxinə aid bərpa edilmiş ənənəvi şirniyyat düsturları ilk dəfə geniş şəkildə təqdim olunub.
Sucuq, alana, İrəvan kətəsi, saray paxlavası, adi paxlava, xurma südü, Göyçə badamburası, cilov kimi şirniyyatlar bu mətbəxin inciləri olaraq ilk dəfə oxuculara nəfis şəkildə təqdim edilib. Kitabın üz qabığında ermənilərin özününküləşdirməyə çalışdığı bu şirniyyatların rəsmləri də yer alır. Son üz qabığında isə "Kəvər" adlı toponimdən götürülmüş paxlavanın təsviri əks olunub.
Kitabda geniş mövzulara toxunulub: un və qənnadı məmulatlarından başlayaraq, meyvə quruları, mürəbbələr, şəkərləmələr və içkilərə qədər müxtəlif şirniyyatlar ətraflı şəkildə təsvir olunub. Həmçinin, kitabın sonunda 58 ədəd ədəbiyyat siyahısı və bu sahə ilə bağlı məlumatlar verən 63 respondent haqqında məlumatlar yer alır.
Kitab həm tədqiqatçılar, həm də milli mətbəximizi öyrənmək istəyən kulinariya həvəskarları üçün əvəzsiz qaynaqdır.
Kitabın sonunda müəlliflər və əsas mənbələr haqqında məlumat və digər faydalı bilgilər yer alıb. Kitab "Nero" nəşriyyatında çap olunub.
“Ədəbiyyat və incəsənət”
(14.10.2024)
Bu gün QGallery”də “Yaşıl Dünya Naminə Həmrəylik” adlı sərgi açılacaq
BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) ərəfəsində Azərbaycan Dövlət Rəssamlıq Akademiyasının “Eight Group” şirkəti ilə birgə təşkilatçılığı və Azərbaycan Rəssamlar İttifaqının dəstəyi ilə tələbələrin əsərlərindən ibarət “Yaşıl Dünya Naminə Həmrəylik” adlı sərgi açılacaq. Bu barədə “Ədəbiyyat və incəsənət” portalı AƏrTAC-a istinadən məlumat verir.
Bu gün açılan və oktyabrın 17-dək davam edəcək, paytaxtın “QGallery” sərgi salonunda keçiriləcək sərgidə müasir insanın düşdüyü ekoloji vəziyyətlə bağlı fikirlərini əks etdirən sənət əsərləri nümayiş etdiriləcək. Sərginin məqsədi incəsənət vasitəsilə tamaşaçının diqqətini təbiətə müdaxilənin nəticələrinə, ekologiyanın insan mədəniyyətinin səviyyəsindən asılılığına, ətraf mühitdə baş verən dəyişikliklərdə hər kəsin məsuliyyətinə yönəltməkdir.
Bir qədər əvvəl Azərbaycan Dövlət Rəssamlıq Akademiyası tələbələrinin 100-dən çox rəsm əsərinin təqdim edildiyi müsabiqə keçirilib. Akademiyanın rektoru və müəllimlərinin, “Eight Group” qrupunun nümayəndələrinin daxil olduğu münsiflər heyəti təqdim olunmuş işlərin arasından müsabiqə yolu ilə 33 rəsm əsərini seçib.
Təşkilatçıların qeyd etdiyi kimi, bu gün rəssamlar təkcə rəsm çəkməyi bacaran və rəsm çəkən insanlar deyil. Onlar müxtəlif fənlərin kəsişməsində işləyən və aktual suallar verən yaradıcılardır.
“Yaşıl Dünya Naminə Həmrəylik” sərgisində təqdim olunan əsərlər arasında insanın və Yer kürəsində həyatın həm təbii fəlakətlər, həm də öz əməlləri qarşısında acizliyini nümayiş etdirən, müəyyən bir reallıq ab-havasına qərq edən akademik şəkildə işlənmiş mənzərələr var.
“Yaşıl Dünya Naminə Həmrəylik” sərgisinin konsepsiyasının əsasını ekoloji şüurun, şüurlu istehlakın və təbiətə qayğının sadəcə dəb tendensiyası olmadığını ifadə edən çağırış təşkil edir. Bu gün bu, daha çox həyati zərurətdir və ümumi gələcəyimizə töhfədir.
Sərgidə Azərbaycan Dövlət Rəssamlıq Akademiyasının tələbələri olan 21 müəllifin 33 əsəri nümayiş olunacaq. Müsabiqənin nəticələri elan ediləcək, müsabiqənin üç finalçısına pul mükafatı veriləcək. Əlavə olaraq yeddi iştirakçıya da pul mükafatının verilməsi nəzərdə tutulub.
“Ədəbiyyat və incəsənət”
(14.10.2024)
GÜLÜŞ KLUBUnda futbol millimiz
Sərtyel, “Ədəbiyyat və incəsənət”
1.
Azərbaycan xalqının çox xeyirxah, təəssübkeş xalq olması barədə çox deyilib, çox eşidilib. Bu dəfə isə futbol üzrə milli komandamız sözügedən fikri isbatladı.
Belə ki, Azərbaycan millisi səfərdə estonlardan 3 top yeyərək məğlub oldu. Bu, estonların tarixində ilk dəfə idi, 3 qol vurub qalib gəlmək!
Millimiz eston xalqına müdhiş bir bayram yaşatdı! Afərin millimizə, onun 70 yaşlı, ayda da 70 min qazanana əcnəbi baş məşqçisinə!
2
Dayısı və regionu hesabına yükəsk karyera əldə etmiş nazir Mazanov barədə “Mazanovun nailiyyətləri” adlı kitab çapdan çıxıb. Kitab ağ vərəqlərdən ibarətdir.
3.
Güclü külək evlərin damlarını qoparır, ağacları aşırırdı. Sovet kəşfiyyatçısı Ştirlis düşündü ki, deyəsən külək başlayacaq.
4.
“Neftçi” rəhbərliyi yerli məşqçiləri bəyənmir, əcnəbilər də gəlib klubu lap bərbad vəziyyətə salır. Roman Qriqorçuk da belə getdi.
Bəlkə rəhbərlik “Neftçi” yə məşqçilik etməyə yadplanetli gətirsin?
5.
İcra başçısı müavininə:
-Bu camaat hardan bilir ki, bizim şəhərdə korrupsiya var?
-Necə hardan, cənab başçı? Mətbuatdan.
-Dərhal məsələyə son qoyulsun!
-Oldu, cənab başçı. Demək, sabahdan korrupsiaya ilə mübarizəyə başlayırıq, eləmi?
-Korrusiyaya qarşı niyə? Mətbuata qarşı!
“Ədəbiyyat və incəsənət”
(14.10.2024)
“Ov” - Fazil Sənanın hekayəsi
“Ədəbiyyat və incəsənət” portalının “Ədəbiyyat qəzet” ilə birgə ƏDƏBİYYATIMIZI SEVDİRƏK layihəsində bu gün sizlərə Fazil Sənanın hekayəsi təqdim edilir.
Bəhram qapını açıb hər tərəfin ağ örpəyə büründüyünü görcək öz-özünə: "Bəh, bəh! Nə gözəl havadı", - deyib uzunboğaz çəkmələrini geyinib darvazadan çölə çıxdı və ətrafı nəzərdən keçirib küçə yuxarı getməyə başladı. Küçənin sonundakı darvazanın ağzında dayanıb qapını döydü və bir az keçmiş, qapı açıldı.
- Sabahın xeyir, Cico.
- Aqibətin xeyir.
- Görürsən, nə gözəl havadı. Belə havada nə lazımdı? - Bəhram ətrafı nəzərdən keçirib Cicoya baxdı.
- Nə lazımdı? - Cico sual dolu baxışlarla Bəhrama baxdı.
- Nə lazım olacağını bilmirsən? Həmişə demirdin, məni də ova apar. Əsl ov havasıdı. Hazırlaş, bir azdan gedək.
- Belə qarda?
- Bəs nə? Əsl yeyib-içməli, ov havasıdı.
- İndi mən neyləməliyəm?
- Çörəyini ye, əynini geyin. Bir az da çörək, pendir götür. "Başı xamırlı" da yaddan çıxmasın, çöl soyuqdu. Gedim Zülüyə də deyim, o da hazırlaşsın, qayıdıram. Sən də bir saata kimi hazır ol.
- Oldu, - deyən Cico qapını örtüb evə getdi.
Aradan xeyli keçmiş Bəhram Cico da yanında Zülünün darvazasının yanına çatanda gördülər ki, Zülü qapının ağzında onları gözləyir.
- Bəhram, bəs bunun tüfəngi hanı? - deyən Zülü əli ilə Ciconu göstərdi və güldü.
- Bu, tüfəngsiz ovçudu.
- Zarafatsız, Ciconun tüfəngi hanı? Ovu nə ilə vuracaq?
- Ona tüfəng lazım deyil. Əgər sənin üçün çox maraqlıdırsa, məsələyə aydınlıq gətirim.
- Doğrudan, mənim üçün maraqlıdır. Bu soyuqda, qara bata-bata hara gedir?
- Zülü, mən elə bilirdim ki, sən əməlli-başlı ovçusan. Sənin heç ovçuluqdan anlayışın yox imiş.
- Sən elə danışırsan ki, elə bil ovçu təkcə sənsən. Mən tüfəng götürüb ov edəndə, sən hələ aşırmalı şalvar geyinirdin.
Sözündən, səsinin ahəngindən Zülünün incidiyini hiss edən Bəhram üzünü Zülüyə tutaraq dedi:
- Zülü, incimə, əzizim. Sualıma düzgün cavab versən, bilərəm ki, doğurdan da, sən ov edəndə mən aşırma şalvar geyinmişəm.
- Buyur, Boriq. - Zülünün sözünə hər üçü güldü.
- De görüm, ovçunun ova getməsi üçün nə lazımdı, Zülü?
- Tüfəng, bıçaq.
- Elə bu?
- Qalın pal-paltar, ov çantası, içində də yemək-içməyi, durbin, belində qatardan əlavə, ehtiyat patron.
- Qurtardın?
- Hə, qurtardım. Məncə, daha heç nə qalmadı. Ovçu üçün lazım olan hər şeyi sadaladım.
- Yaxşı, Zülü, sən sadaladıqlarının hamısını biz götürmüşük?
Bir az fikirləşən Zülü, yanlarında onların söhbətinə qulaq kəsilən Ciconun üzünə baxaraq güldü və dedi:
- Cico, sən bilərsən, mən sadaladıqlarımdan əlavə, ovçu üçün daha nə lazımdı? Görürəm, sən bizim ikimizdən də ağıllı adamsan. Çünki biz ova tüfənglə, sən tüfəngsiz gedirsən, - deyən Zülünün sözünə gülüşdülər.
- Yox, Zülü, ovçu üçün lazım olanların hamısını sadaladın. Mənim fikrimcə, əlavə olunası bir şey yoxdur.
- Ovçu üçün əsas lazım olanın adını çəkmədiniz. Bəhram yoldaşlarına baxdı.
Zülü ilə Cico maraqla "Boriq, o nədi ki, biz bilmədik, amma sən bilirsən?" - deyə soruşdular.
- Mən deyəndə ki, siz ovçu deyilsiniz, xətrinizə dəyir. İndi görürsən, Zülü, səni yanımda hərliyə-hərliyə ovçu eləmişəm. Ciconu da sənin kimi öyrədib ovçu eliyəcəm.
- Yaxşı, bildik ki, sən yaxşı, təcrübəli ovçusan. De görək, ovçu üçün daha nə lazımdı ki, biz bilmirik, amma sən bilirsən?
- Əsl ovçu üçün sizin sadaladıqlarınızla bərabər, ov tulası da olmalıdır. Kinolarda görməmisiniz ki, ovun yaraşığı tuladı? Ovu ürküdən, vurulan ovu gətirən ov tulasıdı. Ov tulasının əziyyəti ovçunun əziyyətindən heç də az deyil, bəlkə də çoxdur.
- Sənin sözünnən, bizim tulamız yoxdur, onda biz ovçu deyilik? - Zülü ilə Cico hər ikisi Bəhrama baxdı.
- Niyə, var. Heç tulasız da ova gedərlər?!
Zülü ilə Cico təəccüb qarışıq maraqla: - Tulamız varsa, bəs hanı? Biz görmürük, sən görürsən?" - dedilər.
- Siz görə bilməzsiniz. Onu ancaq mənim kimi ovçular görə bilər, - deyən Bəhram yanınca addımlayan yoldaşlarına baxıb gülümsündü.
- Göstər, biz də görək.
Zülü ilə Cico ayaq saxlayıb maraqla Bəhrama baxdılar.
Bəhram yoldaşlarına baxaraq güldü və dedi:
- Bəs, Cico nədi?
Zülünün qəhqəhəsindən tutulan Cico "Tüpürüm sizə də, sizin ovunuza da" deyib geri qayıtmaq istədikdə, Bəhram tez Ciconun qoluna girərək, "Ə, axmaqlama, hara qayıdırsan? Zarafat edirəm", - deyib minnət eləməyə başladı. Zülü də Ciconun bir qoluna girərək, "Boriqdi də, zarafat eləyir. Burda inciməli nə var?" - deyib Bəhrama dəstək oldu. Birtəhər Ciconun könlünü alaraq, qayıtmaq fikrindən daşındırıb yollarına davam etdilər.
- Zülü, kolluqlara fikir ver. Buralarda dovşan çox olur. Rast gəlsə, bir-ikisini vurardıq, günorta kabablayıb yeyərdik.
Bəhram sözünü tamamlamışdı ki, kolun dibindən dovşan tullana-tullana qaçmağa başladı. Zülünün tüfənginin açılmağı ilə dovşanın havaya qalxıb qarda eşələnməyi bir göz qırpımında baş verdi. Dostlar sevincək özlərini dovşana çatdırdılar. Bəhram dovşanın qulaqlarından tutub havaya qaldırdı və dedi:
- Halaldı sənə, Zülü, tulalıqdan çıxıb əməlli-başlı ovçu olmusan, - sözləri ilə Bəhram həm də Ciconun könlünü oxşamağa başladı.
Bəhram dovşanı Cicoya uzadaraq, - "Al, qoy çantaya, birini də vursaq, günorta yeməyimiz olacaq", - dedi.
- Yolumuz hayanadı, Boriq? - Zülü soruşdu.
- Qamışlı gölünə. Göldə yaxşı quş olur. Günorta yeməyini də gölün kənarında yeyərik. Elə yaxşı deyil?
- Yaxşı fikirdi. - Zülü dostunun fikrinə dəstək oldu.
- Zülü, sən o tərəfdən hərlən, tək yulğunun yanına gəl, biz də bu tərəfdən gedək. Bəlkə, dovşannan-zaddan bir şeyə rast gəldik. Bəhram əli ilə Zülünün gedəcəyi yerin istiqamətini göstərdi.
Vədələşdikləri yulğunun yanına çatanda Zülünün çantasında iki dovşan vardı.
- Birini də mən vurmuşam, - dedi Bəhram.
Gölün yanına çatan kimi Bəhram dedi:
- Zülü, sən dovşanların adama birini soy, təmizlə, biz də çır-çırpı topalıyaq.
Bir azdan süfrə açıldı. Hərə çantasında götürdüyü çörəyi, pendiri, arağı süfrəyə qoydu. Sağlıqlar bir-birini əvəz etdikcə, şüşələr də bir-bir boşalmağa başlayırdı. Bəhram butulkanı götürdü ki, araq süzsün, baxdı ki, butulka boşdu. Əlini uzadıb o biri butulkanı götürdü. Gördü ki, əlindəki butulka da boşdu. Üzünü yoldaşlarına tutaraq: "Neçə şüşə arağımız var idi?" - dedi.
- Adama bir şüşə gətirmişdik. Cəmi üç butulka idi. - Zülü cavab verdi.
- Bəs burda dörd butulka var.
- Sənin gözünə elə görünür. Bilmirsən, başı xamırlını üç içəndə dörd saydırır adama? - deyən Ciconun sözünə, "Hə... Onu bilmirdim", - dedi Bəhram.
- Qalxın, görək göldə nə var, nə yox? - Zülü üzünü yoldaşlarına tutdu.
- Siz gölün kənarında qamışlığı ürküdün, quşlar havaya qalxsın. Mən vuracam, siz daşıyın. - Bəhram tüfəngini hazırlamağa başladı.
Zülü: "Cico hürkütsün, mən də atım", - dedi.
- Hə, Cico, sən qamışlığa gir, quşları ürküt, Zülü ilə mən də vurum.
Cico qamışlığa girib səs-küy saldı. Bu zaman bir dəstə quş havaya qalxdı. Bəhramla Zülü havaya qalxan quşlara atəş açdılar. Bir quş havada bir-iki dəfə qanad çalıb sahilə yaxın yerdə suya düşdü.
Bəhram sevincək çığırdı: "Cico, tez cum suya, quş suya düşdü".
- Boriq, su dərin olar, bataram, - deyən Cico qamışlıqdan cavab verdi.
- Ə, qorxma, qamışlığa yaxın düşdü. Sahilə yaxındı, ora dayazdı, tez ol, - Bəhram Ciconu tələsdirdi.
Arağın təsirindən çox şeyi fikirləşmək qabiliyyəti korşalmış Cico özünü verdi gölə. Bir az keçmiş göldən çıxan Cico titrəyə-titrəyə əlində tutduğu quşu Bəhrama uzadaraq: "al", - dedi və özü yaş paltarda sönmüş ocağın kənarında bürüşdü.
Bəhram quşu alıb o tərəf-bu tərəfinə baxaraq, "Bu nədi, ə?" - dedi.
Dişi-dişinə dəyən Cico güclə "bilmirəm" deyə bildi.
Zülü yaxınlaşıb quşu Bəhramın əlindən alıb o tərəf-bu tərəfinə baxaraq: "Boriq, nətər ovçusan, görmürsən, nədi? Qarğadı də", - dedi.
- Qarğa nədi? Nə axmaq-axmaq danışırsan? Bu qarda, soyuqda bir belə yolu gəlib elə bir qarğa vurmuşam? - deyən Bəhram acıqlı-acıqlı Zülünün üzünə baxdı.
- Yox, Boriq, iki qarğa vurmusan.
- İki qarğa vurmuşamsa, bəs, biri hanı?
- Boriq, vurduğun qarğanın biri budu, əlimdə ölüb. Biri də odu bax, sönmüş ocağın kənarında can verir. Narahat olma, uzağı, bir-iki saata o da öləcək. - deyən Zülü donmuş Ciconu Bəhrama göstərdi.
- Hə... Yenə yaxşıdı. Gülləm boşa getməyib. Bir gülləyə iki qarğa pis deyil, - deyən Bəhram baş verənləri dərk etmədən özündən razı halda gülümsündü.
“Ədəbiyyat və incəsənət”
(14.10.2024)
BİR SUAL, BİR CAVAB Rəbiqə Nazimqızı ilə
Ülviyyə Əbülfəzqızı, “Ədəbiyyat və incəsənət”
SUAL
Nə gəlirsə, əlimdən qapıb alır misralar,
Nə deyirəm qurtarmır, sözlərim yenə qalır.
Mənə qalır ağrını çəkib üstümə salmaq,
Məni qəmdən qurtarmaq yenə də sənə qalır. (Rəbiqə Nazimqızı)
Rəbiqə xanım, dərdləri misralarla bölmək qəlb ağrılarını ovudurmu?
CAVAB
Əlbəttə. Yaradıcılıq istedad, intellekt, ruh hadisəsi olmaqla yanaşı həm də sublimasiya hadisəsidir. Sənətkar çox zaman neqativ hadisə və ya hisslərdən doğan mətni gözəlliyə çevirir. Ağrı sözə çevrilir və maddiləşərək içindən kənara yol tapır. Oxucu o ağrını duyur, anlayır, amma iliklərində hiss eləmir. Çünki sözə bürünüb, çılpaq deyil, həm də gözəl, mütənasib biçim alır. Bəzi mətnlər var ki, ən ağır anlarda yazılıb, bəlkə, onlar mətnə çevrilməsəydi, adamın ürəyi partlaya bilərdi. Bütün insanlarda belədi, məsələn, ağrıyanda qışqırırsan, ağlayırsansa, prosesi daha rahat keçirirsən, nəinki susanda. Ümumiyyətlə, mən sükutu sevmirəm. Təbii, əgər o sükut rahatlıqdan xəbər vermirsə...
“Ədəbiyyat və incəsənət”
(14.10.2024)
Güney Azərbaycan Poeziyası Antologiyasında Əli Rəştbərin “Ağlamazdım” şeiri
“Ədəbiyyat və incəsənət” portalının Güney Azərbaycan Poeziyası Antologiyası layihəsində Təbriz təmsilçimiz Əli Çağlanın növbəti təqdim etdiyi yazar Urmiyadan Əli Rəştbərdir.
Əli Rəştbər
Urmiya
AĞLAMAZDIM
Bilsəydim kədərim incidir səni,
Ürəyim dolanda heç ağlamazdım.
Vədəsiz küləklər ömür bağımın_
Yarpağın yolanda heç ağlamazdım.
Bilsəydim payıza bir isti sözsən,
Şaxtaya sazağa alovlu közsən,
Bilsəydim qışımda yoluma gözsən,
Baharım solanda heç ağlamazdım.
Nə varsa azadlıq, bütün dustaqlar,
Sənin əllərində olsa ıxtıyar.
Bilsəydim Qayıbın sən kimisi var,
Anamdan olanda heç ağlamazdım.
“Ədəbiyyat və incəsənət”
(14.10.2024)
Zəmanəmizin Mirzə Cəlili barədə
Elman Eldaroğlu, “Ədəbiyyat və incəsənət”
Onun haqqında fikir yürüdənlər heç də birmənalı danışmırlar. Necə deyərlər, topa tutanlar da var, tərifləyənlər də. Təbii haldır, belə aydınlar zəmanəsində birmənalı qarşılanmasalar da, tarix onları gələcək nəsillərə örnək kimi ötürə bilir. Bəzən mənə elə gəlir ki, Fazil Mustafa ötən əsrin əvvəlində yaşamış Mirzə Cəlilin müasir taleyini yaşayır…
Doğrudur, rəsmiyyətdə müxalifəti təmsil etsə də, müxalifətdə iqtidarı təmsil edir. O, xalqın arasında hakimiyyətin yox, hakimiyyətin içində xalq adamlarından biridir…
Təsadüfən "Anews Tv" yutub kanalına verdiyi müsahibəyə rast gəldim. O qədər gözəl fikirlər söylədi ki, illərlə ifadə etməyə səy göstərdiyim, çalışıb sözə çevirmək istədiyim fikirləri dilə gətirdi. Səmimiyyətimə inanın, bu gün o, hansı siyasi platformada təmsil olunduğundan, kimi dəstəklədiyindən asılı olmayaraq, zəmanəmizin Mirzə Cəlilidir...
Gözümü açandan bu cəmiyyət "ZİYALI" anlayışını hələ də müzakirə edir. Nəhayət ki, ZİYALI kimdir sualına ən dolğun cavabı Fazil bəydən eşitdim.
Deyir ki:- "Tarixlə yaşayan xalqlar faciəvi xalqlardır. Onları tarixdən ayırıb müasir dövrə gətirməyi bacarmaq lazımdır. Xalqını özünə güvənən, öz qəhrəmanını yeni dövrün insanları arasından seçə bilən bir xalqa çevirə bilməlisən. Təəssüf ki, bu baş verməyəndə Dədə Qorqud eposunda deyildiyi kimi, insan- baş kəsib, qan töküb ad qazanmağa üstünlük verir və zəkayla ad qazanmaqdan vaz keçir."
Bəli, əsl ZİYALI xalqını özünə güvənən, öz qəhrəmanını yeni dövrün insanları arasından seçə bilən bir xalqa çevirə biləndir...
Çox yox, hər dəfə Azərbaycan parlamentində təmsil olunan 125 deputatın 110-u Fazil Mustafa təfəkkürlü, Fazil Mustafa düşüncəli və nəhayət Fazil Mustafa məzmunlu insan olsaydı, xalq öz millət vəkilləri ilə fəxr edərdi...
Fazil Mustafa mövcud sistemin yaratdığı bəsit şərait daxilində xalqın problemlərinin həllinə yarımağa can atan tək-tək vicdanlı ziyalılardandır. O, deputatlığın imkan və imtiyazlarını özünə həsr edən adamlardan yox, xalq üçün xərcləməyi bacaran insanlardandır...
Bu günlərdə onun 59 yaşı tamam olur. Müxalifətin iqtidar yönlü, hakimiyyətin müxalif yönlü deputat kimi tanıdığı Fazil bəyi yeni yaşı münasibətilə təbrik edirəm.
Kim necə tanıyır tanısın, mən onu xalqımın qənimət övladlarından biri hesab edirəm.
Yolu açıq olsun!
Ad günü mübarək!
“Ədəbiyyat və incəsənət”
(14.10.2024)
Sabirabadda “Kəlagayı yasıl dünyaya töhfədir'' adlı tədbir keçirilib
Sabirabadda Bayraq Muzeyində Sabirabad Rayon İcra Hakimiyyətinin dəstəyi və Mirvarid Dilbazi Poeziya Məclisinin təşəbbüsü və təşkilatçılıgı ilə ''Sazlı, sözlu kəlagayı günləri'' layihəsi çərçivəsində oktyabrın 11-də ''Kəlagayı yasıl dünyaya töhfədir'' adlı tədbir keçirildi.
“Ədəbiyyat və incəsənət” portalına Mirvarid Dilbazi Poeziya Məclisindən verilən məlumat görə, tədbirdə rəssam Gülnarə Məmmədovanın kəlağayıdan bəhs edən rəsm əsərləri, Güllü Eldar Tomarlının yaşıl dünyanı özundə əks etdirən əl işləri, yaşı əsrlərə söykənən qədimi kəlağayıları sərgiləndi.
Tədbiri giriş sözü ilə Sabirabad Rayon İcra Hakimiyyətinin birinci müavini Həsən Həsənov açaraq qonaqları və tədbir iştirakçılarını salamladı. Şəhidlərimizin əziz xatirəsi bir dəqiqəlik sükutla yad edildi. Azərbaycan himni səsləndirildi.
Həsən Həsənov tədbirin mahiyyətindən, milli dəyərlırimiz olan kəlağayının gələcək nəsillərə ötürülməsinin vacibliyndən danışdı.
Sonra söz Mirvarid Dilbazi Poeziya Məclisi İB-nin sədri, Kəlağayı Muzeyinin direktoru, '' Sazlı, sözlü kəlağ ayı günləri'' layihəsinin rəhbəri Güllü Eldar Tomarlıya verildi. O, layihə nin 2024-cü ilin yanvar ayından həyata keçirdiyini və ilin sonuna qədər davam edəcəyini, bu layihənin hər bölgədə sevgilərlə qarşılan dığını bildirdi . O, qeyd etdi ki, ana təbiət və minillərin yadigarı kəlağayımız gündəlik həyat tərzimizlə bir harmoniya təşkil edir. Kəlağayı mənəviyyatımızın, adət- ənənəmizin, mədəniyyətimizin, milli geyimlərimizin bir hssəsini təşkil edir. Kəlağayı yaşıl dünyaya töhfədir. Kəlağayının ipək parçası, rəngləri, naxışları buna əyani sübutdur.
Cənab Prezident İlham Əliyevin 2023-cü il 25 dekabr tarixi sərəncamına əsasən 2024-cü il ''Yaşıl dünya naminə həmrəylik ili'' elan olub. Mirvarid Dilbazi Poeziya Məclisi ilboyu yaşıl dünyanı özündə əks etdirən tədbirlər, sərgilər təşkil edir.
Tədbirdə Sabirabad Rayon İcra hakimiyyətinin müavini, ictimaii, siyasi və humanitar məsələlər şöbəsinin müdiri Ceyran Xəlilova öz çıxışında milli mənəvi dyərlərimiz olan kəlağayının bütün
zamanlarda xanımlarımızın milli qeyrət ölçüsü, urvat ölçüsü kimi önəmli olduğunu bildirdu.
Əməkdar Mədəniyyət İşçisi, aşıq Solmaz Kosayevanın rəngarəng musiqi nömrələri alqışlarla qarşılandı.
Tədbirdə Mirvarid Dilbazi Poeziya Məclisinin idarə heyətinin üzvü Tərxanım Museyibqızı, məclisin üzvü Səyalı Dadaşova, şairlərdən məclisin üzvü Rəqibə Qəvvas, şair Xanoğlan Xan kəlağayı haqqında fikirlərini söylədilər, şeirlər səsləndirdilər.
Sonda Güllü Eldar Tomarlı təşkilati dəstək üçün Sabirabad Rayon İcra Hakimiyyətinə, aidiyyatı olan dövlət qurumlarına və tədbir iştirakçılarına təşəkkürünü bildirdi.
“Ədəbiyyat və incəsənət”
(14.10.2024)
