Super User
“Əbədiyaşar şəxsiyyət Mir Cəlal Paşayev – 115” adlı xülasə oxuculara təqdim edilib
F.Köçərli adına Respublika Uşaq Kitabxanasının məlumat-biblioqrafiya şöbəsi tərəfindən Azərbaycanın tanınmış yazıçısı Mir Cəlal Paşayevin 115 illik yubileyi münasibətilə “Əbədiyaşar şəxsiyyət Mir Cəlal Paşayev – 115” adlı daycest oxuculara virtual şəkildə təqdim edilib.
Kitabxanadan verilən məlumata görə, daycestdə görkəmli ədib haqqında qısa xülasə, görkəmli şəxsiyyətlərin onun haqqında dəyərli fikirləri, həmçinin, Mir Cəlalın əsərlərində işlətdiyi atalar sözləri və aforizmlər yer alıb.
Xülasədə 24 adda kitab və 131 adda dövrü mətbuat məqaləsinin tammətnli siyahısı, yazıçının 5 kitabı yer alıb.
“Ədəbiyyat və incəsənət”
(13.09.2023)
Yağışın navalçaları döyəcləyən səsi… - MUSİQİ BƏLƏDÇİSİndə
Heyran Zöhrabova, “Ədəbiyyat və incəsənət”
"Və rəqs edənlər dəli sanıldı, musiqini eşitməyənlər tərəfindən"
Fridrix Nitsşe
Öncə mahnı playlistimi açıb "Vüsal Namazlının - Duyğular" (piano) adlı əsərini seçib, onun həzin melodiyasının müşayəti ilə düşünməyə başladım.
Tanrı insanlara öz duyğu və düşüncələrini ifadə və təsvir edə bilmək üçün müxtəlif yol, üsul və vasitələr bəxş edib.
Məsələn, rəssamlar hiss etdiklərini boyalarla təsvir edib, pantomima aktiyorları bunu jest və mimikalarıyla ötürərkən, yazarlar hekayə və romanlarıyla, şairlər misralarla, rəqqaslar müxtəlif bədən hərəkətləri ilə ifadə etdiyi kimi musiqiçilər də bunu notlarla edirlər.
Necə ki, rəssam boyayla şəkil çəkməklə, yazar sətirə sözlər düzməklə, musiqiçidə notları bir-birinə pərçimləməklə edir.
Bir az fərqli, bir az həssas mövzudur musiqi.
Ən çox "Ruhun qidasıdır"-, deyilir onun haqqında və bu, həqiqətən də belədir deyəsən.
Musiqi sadəcə ifadə etmə şəkli deyil, o, həm də ruhun bəzən istirahət etmək, dincəlmək, bəzən də enerji yığmaq şəklidir.
Hərdən insanlar yuxuya gedərkən, bəziləri iş görərkən, bəziləri istirahət edərkən, hətta bəziləri də kitab oxuyarkən belə musiqi dinləməyi çox sevirlər.
Musiqi həm də xoş bir axına, duyğu selinə qapılıb təslim olmaqdır.
Eyni ilə damar yolu ilə birbaşa xəstənin qanına yeridilən dərman vasitəsi kimi, musiqi də bilavasitə ruhla və dolayı deyil də birbaşa, vasitəsiz nitqlə kontaktdadır.
İnsan bəzən hadisələr qarşısında özünü sıxar-sıxar, sonra bir musiqi səsi eşidər və ovcunda nəyi isə sıxıb saxlamışcasına içində sıxıb saxladığı duyğuları, suyun axıb özünə yol tapdığı kimi, göz yaşıyla yol tapıb onu ələ verər.
İnsanlar müxtəlif olduğu kimi onların hər bir sahədə özünü, duyğularını ifadə etmə dili və zövqləri də fərqlidir və bu da özünü müvafiiq olaraq musiqinin tendensiyalarında tapır.
Kimi muğamı, kimi kllassik, kimi retro, kimi lirik musiqini sevdiyi kimi, kimiləri də repi, roku, cazı, elektron musiqini sevir.
Mədəniyyətin hər bir sahəsi olduğu kimi xalqımızın musiqisi də çox zəngin və rəngarəngdir.
Milli, klassik və ya retro musiqimiz deyəndə kimlər yada düşür, Üzeyir Hacıbəyov, Şövkət Ələkbərova, Rəşid Behbudov, Şəfiqə Axundova, Akif İslamzadə, Emin Sabitoğlu, Rübabə Muradova, say-say bitməz. Kiçik bir essenin cümlələrinə hansı birini sığdırıb, hansı birindən danışım ki?!
Şərqin ilk opera yazan qadın bəstəkarı Şəfiqə Axundovanın "Həsrətindən" əsəri haqda danışım. Ya bəlkə "Getmə, getmə gəl"-, deyən Şövkət Ələkbərovanın nə qədər zaman da keçsə köhnəlməyən şedevrlərindən, Rəşid Behbudovun "Nazəndə sevgilisindən" və nə qədər il keçsə də hər dövrdə aktuallığını qoruyan Mübariz Tağıyevin "Xatirə"sindən danışım?
Pianinonun ağ və qara dillərinə toxunub möhtəşəm əsərlər yaradan bəstəkarların musiqiləri bəzən bir dağ başında oturan qoca çobanın tütəyində, bəzən gənc küçə musiqiçisinin gitarasında, bəzən də sərxoş bir aşiqin serenadasında yaşayıb oradan qəlblərə yol tapır..
Mənim hansı musiqini sevdiyimə gəldikdə isə, az öncə çöldə payız qoxan gur yağış damlaları navalçaları döyəcləməyə başladı və mən telefonumda çalınan və bayaq özüm yandırdığım musiqini söndürüb yağışın səsini dinləməyə başladım.
“Ədəbiyyat və incəsənət”
(13.09.2023)
Musiqili Teatrın aktyorları beynəlxalq festivalda iştirak edirlər
Azərbaycan Dövlət Akademik Musiqili Teatrının gənc aktyorları Nicat Əli və Nərmin Əliyeva Qazaxıstanda “Qazaxıstan qlobal dünyada” layihəsi çərçivəsində həyata keçirilən “TeART-Kokşe-2023” Beynəlxalq Teatr Festivalında iştirak edirlər.
Bu barədə teatr məlumat yayıb.
Sənət ocağının əməkdaşları bu festivalda Rusiya Dövlət Teatr Sənəti Akademiyasının (ГИТИС) təcrübəli müəllimlərinin rəhbərliyi ilə keçirilən ustad dərslərində məşqlərini davam etdirirlər.
“Ədəbiyyat və incəsənət”
(13.09.2023)
T.M.Ağababayevin “Şöhrət” ordeni ilə təltif edilməsi haqqında Azərbaycan Respublikası Prezidentinin Sərəncamı
Azərbaycan Respublikası Konstitusiyasının 109-cu maddəsinin 23-cü bəndini rəhbər tutaraq qərara alıram:
Azərbaycan rəssamlıq sənətinin inkişafında xidmətlərinə görə Tofiq Məmmədəli oğlu Ağababayev “Şöhrət” ordeni ilə təltif edilsin.
İlham Əliyev
Azərbaycan Respublikasının Prezidenti
Bakı şəhəri, 12 sentyabr 2023-cü il.
Firəngiz Əlizadənin əsəri Almaniyanın ali musiqi məktəblərinin tədris proqramına daxil edilib
Sevindirici xəbərimiz var. Azərbaycan bəstəkarının əsəri ilk dəfə Almaniyanın ali musiqi məktəblərinin tədris proqramına daxil edilib. Almaniya dünya musiqisində görkəmli yeri olan dahi bəstəkarların vətənidir. Bax, Bethoven, Brams və bu kimi dünya səviyyəli alman bəstəkarlarının yaradıcılığı yüksək professionallığın parlaq nümunəsidir. Və bu adlarla yanaşı, Almaniyanın ali musiqi ocaqlarının tədris proqramına görkəmli Azərbaycan bəstəkarı Firəngiz Əlizadənin “Muğamsayağı” əsərinin daxil edilməsi böyük əlamətdar hadisədir.
Qeyd edək ki, Azərbaycan bəstəkarının əsərinin seçilməsi təsadüfi deyildir.
Hələ 1989-cu ildə “Musik und Gesellschaft” (Almaniya) jurnalında qeyd olunurdu ki, Firəngiz Əlizadənin musiqisi Çingiz Aytmatovun kitabları kimi Şərq mədəniyyətini və incəsənətini Qərb üçün açır.
Firəngiz Əlizadə bir bəstəkar kimi, stereotipləri sevmir və onları yüksək peşəkarlıqla öz üslubu ilə əvəz edir. Müasir musiqinin əfsanəsi Arnold Şönberq klassik Qərb musiqi ənənəsinin Şərqlə birləşdirilməsinin mümkünlüyünə inanmırdı və “... onlar yağ və su kimi qarışmırlar”,- deyə bildirirdi. Lakin Firəngiz Əlizadə bunun əksini sübut etdi – o, Şərq və Qərb musiqi elementlərini özünəməxsus bəstəkarlıq üslubunda uğurla əlaqələndirərək birləşdirdi.
Firəngiz Əlizadənin fərdi musiqi dili avanqardizmlə tonallıq arasındadır və burada iki dünyanın özünəməxsus sintezi üstünlük təşkil edir. Firəngiz Əlizadə Şərq modal təfəkkürünün Qərb konstruktivizmi ilə qovuşduğu əsərlər yaradır. Bəstəkarın musiqisi Amerikadan Avstraliyaya kimi bütün qitələrdə məşhur orkestrlər, ansambllar, görkəmli musiqiçilər – Berliner Filarmonik, Kronos-Kvartet, Yo-Yo Ma, Evelin Qlenni, Hilari Han və bir çox başqaları tərəfindən ifa olunur.
Planetimizdə çəkişmələrin və münaqişələrin olduğu bir vaxtda dünyanın bir çox ölkələrində Firəngiz Əlizadənin musiqisi böyük maraqla qarşılanır. Xarici mətbuatda qeyd olunduğu kimi: “O, Şərqlə Qərbin müxtəlif xüsusiyyətlərini birləşdirmək və sintez etmək kimi heyrətamiz istedada malikdir”.
Firəngiz Əlizadə yaradıcılığının Almaniyanın ali musiqi məktəblərinin tədris planına daxil edilməsi təkcə bəstəkarın özü üçün deyil, bütün respublikamız üçün sevindirici haldır. Çoxsaylı tələbələr nəinki Firəngiz Əlizadənin yaradıcılığını təhlil edib öyrənəcək, həm də onun vətəni – Azərbaycan haqqında daha çox məlumat əldə edəcəklər. Bu da ölkəmizin dünyada təbliği istiqamətində mühüm əhəmiyyətə malikdir.
“Ədəbiyyat və incəsənət”
(12.09.2023)
YUĞ Teatrı “BİKEN” Beynəlxalq Teatr Festivalında iştirak edəcək
Azərbaycan Dövlət YUĞ Teatrı Qazaxıstanda keçiriləcək “BİKEN” Beynəlxalq Teatr Festivalında iştirak edəcək.
Teatrdan verilən məlumata görə, sözügedən festival Qazaxıstanın Xalq artisti Biken Rimovoyun 100 illik yubileyi ilə əlaqədar 29 sentyabr – 4 oktyabr tarixlərində Rimovoy adına Taldıkorqan Dram Teatrında keçiriləcək. Festival çərçivəsində YUĞ Teatrı oktyabrın 3-də C.Məmmədquluzadənin “Çay dəstgahı” əsəri əsasında rejissor Günay Səttarın quruluşunda hazırlanmış “Toy dəstgahı” tamaşası ilə çıxış edəcək.
Səhnə əsərində xan ilə xanım çaydan zəhərləndiyinə görə müqəssir axtarılır. Alleqorik personajlar öz aralarında bu hadisəyə səbəb olan günahkarı axtararaq günahsız birini ittiham edir və onu qurban verirlər.
Tamaşada rolları aktyorlar Vüqar Hacıyev, Təranə Ocaqverdiyeva, Oqtay Mehdiyev, Amid Qasımov, Elgün Həmidov, Günəş Mehdizadə və Nigar Mürsəlova canlandırırlar.
“Ədəbiyyat və incəsənət”
(12.09.2023)
İki od arasında ikən “İki od arasında”nı yazan görkəmli yazıçımız
BU GÜN YUSİF VƏZİR ÇƏMƏNZƏMİNLİNİN DOĞUM GÜNÜDÜR
Bu gün Azərbaycanın dövlət xadimi və yazıçısı Yusif Vəzir Çəmənzəminlinin doğum günüdür, anadan olmasının 136-cı ildönümüdür. Çəmənzəminlinin “İki od arasında”, “Qızlar bulağı”, “Soyuq öpüş”, “Bir cavanın dəftəri”, “Gündəliklər”, “Qanlı göz yaşları”, “Xanın qəzəbi”, “Zeynal bəy”, “Son bahar”, “Üç gecə” əsərləri xüsusilə məşhurdur.
“Ədəbiyyat və incəsənət” portalı xəbər verir ki, Yusif Vəzir Çəmənzəminli 1887-ci il sentyabrın 12-də Şuşa şəhərində anadan olub. Yusif Vəzirin atası Məşədi Mirbaba Mirabdulla oğlu Vəzirov Şuşa bəylərindən biri idi. Yusif Vəzirin daşıdığı Vəzirov soyadı XVIII əsr Qarabağ hökmdarı İbrahimxəlil xanın nüfuzlu vəzirlərindən biri olan Mirzə Əliməmmədağanın tutduğu vəzir vəzifəsinə bağlı olaraq nəsildən-nəslə keçib.
İlk təhsilini Şuşada “Kar Xəlifə” ləqəbi ilə tanınan Molla Mehdinin məktəbində alıb. 1896-cı ildə Şuşa realnı məktəbinə daxil olub. Bu məktəbdə təhsilini rus dilində aldığı üçün 1904-cü ildə həyatından şikayət tərzində yazılmış "Jaloba" adlı ilk şeirini yazıb. Həmin illərdə əmisi oğlu və dostu Mirhəsən Vəzirovla birlikdə rus dilində "Fokusnik" adlı aylıq yumoristik jurnal çıxarıb.
1905-ci ildə Şuşada baş verən erməni-müsəlman toqquşmaları nəticəsində məktəbi tərk etməyə məcbur olan Yusif Vəzir təhsilini davam etdirmək üçün Bakıya gedib. 1910-cu ildə Bakı realnı məktəbini bitirən gənc yazıçı Kiyev şəhərindəki Müqəddəs Vladimir adına İmperator Universitetinin hüquq fakültəsinə daxil olub. Bu dövrlərdə Yusif Vəzir uşaqlar üçün yazdığı və əsasını xalq nağıllarından götürdüyü məşhur "Məlik Məmməd" nağılını qələmə alıb.
Əsərlərini “Bədbəxt”, “Haqq tərəfdarı”, “Müsavi”, “Stradayuşiy”, “Sərsəm” və başqa təxəllüslərlə yazan Yusif Vəzirin ən tanınmış təxəllüsü “Çəmənzəminlidir”. O, bu təxəllüsdən 1911-ci ildən istifadə etməyə başlayıb və bu adla tanınıb.
Çəmənzəminli Kiyev şəhərində 1912-ci ildə "Yeddi hekayə", 1913-cü ildə isə "Həyat səhifələri" adlı kitablarını çap etdirib. Bundan başqa, Ukraynada "Arvadlarımızın halı", "Qanlı göz yaşları", "Ana və analıq" kitabları da işıq üzü görüb.
O, Ukraynada təhsil alan azərbaycanlı tələbələri ilə birgə "Müsavat”ın Kiyev şöbəsini qurub. Azərbaycan Demokratik Cümhuriyyəti tərəfindən Yusif Vəzir Ukraynada diplomatik nümayəndə təyin edilib.
Yusif Vəzir həmin dövrdə "Azərbaycanın Muxtariyyatı" və "Biz kimik və istədiyimiz nədir?" kitablarını çap etdirib. Daha sonra Nəsib bəy Yusifbəylinin təklifi ilə 1919-cu ildə səfir kimi İstanbul şəhərinə göndərilib. O, İstanbulda diplomatik fəaliyyətlə yanaşı, öz ədəbi yaradıcılığını da davam etdirir. "Azərbaycan ədəbiyyatına bir nəzər", "Tarixi–coğrafi və iqtisadi Azərbaycan" adlı kitablarını yazıb.
Yusif Vəzir "Bakı işçisi" nəşriyyatında şöbə redaktoru, daha sonra Dövlət Plan Komitəsinin ictimai-mədəni bölməsində ixtisası üzrə vəkil işləyib, Azərbaycan Dövlət Universitetinin şərqşünaslıq fakültəsində, müxtəlif institutlarda rus dilindən dərs deyib.
1937-ci ildə ölkəni bürüyən repressiya dalğası ondan da yan ötməyib. O, Azərbaycan Yazıçılar İttifaqının üzvlüyündən çıxarılıb. Özbəkistana göndərilib.
1938-ci ildə Yusif Vəzir Özbəkistan SSR-nin Urgənc şəhərindəki Pedaqoji İnstitutda baş müəllim və eyni zamanda, institut kitabxanasına müdir təyin olunub. Amma realda orada Yusif Vəzir sürgün həyatı yaşayıb.
1940-cı il yanvarın 25-də həbs edilərək Bakıya gətirilib. Altı aya yaxın Keşlə qəsəbəsindəki həbsxanada saxlanıldıqdan sonra 1940-cı ilin iyulun 3-də Nijni Novqorod vilayətindəki həbs düşərgəsinə göndərilib. Yusif Vəzir Çəmənzəminli 1943-cü il yanvarın 3-də dustaq olduğu həbs düşərgəsində vəfat edib və Betluqa çayının sahilindəki qəbiristanlıqda dəfn olunub.
1956-cı ildə bir çox digər repressiya qurbanları kimi Yusif Vəzirə də bəraət verilib.
Ruhu şad olsun!
“Ədəbiyyat və incəsənət”
(12.09.2023)
UNESCO-nun Dünya İrs Komitəsinin 45-ci sessiyası Ər-Riyadda işə başlayıb
Səudiyyə Ərəbistanı Krallığının Ər-Riyad şəhərində UNESCO-nun Dünya İrs Komitəsinin 45-ci sessiyası işə başlayıb.
AzərTAC xəbər verir ki, UNESCO-nun Səudiyyə Ərəbistanı ilə birgə təşkil etdiyi sessiya sentyabrın 25-dək davam edəcək. Sessiyada ötən dövr ərzində İrs Komitəsinin fəaliyyətinə nəzər salınacaq. Sessiya gedişində artıq Ümumdünya İrs Siyahısına daxil olan ərazilərin konservasiya vəziyyətinin qiymətləndirilməsi müzakirə olunacaq, təklif olunan yeni nominasiyalar qiymətləndiriləcək.
Sessiya gedişatında görüşlər, seminarlar və sərgilər təşkil olunacaq, Komitənin növbəti iclasının yeri və tarixləri haqqında qərar qəbul ediləcək.
Xatırladaq ki, UNESCO İrs Komitəsinin 43-cü sessiyasına Bakı ev sahibliyi edib. Dünya Mədəni İrs Siyahısı UNESCO-nun Dünya Mədəni və Təbii İrsinin Qorunmasına dair 1972-ci il konvensiyası əsasında yaradılıb. Sözügedən konvensiya Dünya Mədəni İrs Siyahısına qəbul olunmaq üçün təbii və ya mədəni yerlərin növünü müəyyənləşdirir və müstəsna universal dəyərə malik abidə və məkanlar bu ümumbəşəri irs elan edilməyə layiq görülür.
“Ədəbiyyat və incəsənət”
(12.09.2023)
GÜNÜN SİTATI Fuad Nağıyevdəndir
“Bu ilin 8 ayında ölkəmizə 1 milyon 344 mindən çox səfər olub. Bizim əsas məqsədimiz ölkə turizmini inkişaf etdirməkdir.
İnkişaf deyərkən turistlərin sayında, coğrafiyasında və turist xərcləməsində artıma nail olmağı nəzərdə tuturuq. Bunun üçün birlikdə çalışmalıyıq. Əsas hədəf 2026-cı ildə ölkəyə gələn xarici turistlərin sayını 4 milyon nəfərə çatdırmaqdır. Növbəti 4 il üçün turizmin ÜDM-də payını 2019-cu illə müqayisədə 1,5 dəfə artırmaq niyyətindəyik. Orta hesabla hər il 20 faiz artıma nail olmaq istəyirik. 2026-cı ildə yerli turistlərin sayını 6 milyon nəfərə, turizmdən gələn gəlirləri 10 milyard manata çatdırmaq əsas hədəflərimizdəndir".
“Ədəbiyyat və incəsənət” portalı xəbər verir ki, sitat Dövlət Turizm Agentliyinin sədri Fuad Nağıyevin Azərbaycan Turizm Agentlikləri Assosiasiyasının illik fəaliyyətinin yekunlarına dair konfransda söylədiyi məruzədən götürülüb.
“Ədəbiyyat və incəsənət”
(12.09.2023)
Tanınmışların konserti, yubileylər, gənclərə güvən, abonent konsertlərinin bərpası…
Filarmoniya yeni mövsümün anonsunu etdi
Azərbaycan Dövlət Akademik Filarmoniyası növbəti yaradıcılıq mövsümünün açılışına hazırdır. Filarmoniyanın mediaya təqdim etdiyi məlumatdan “Ədəbiyyat və incəsənət” portalı əsas məqamları diqqətinizə çatdırır:
Sentyabrın 19-da filarmoniyanın yay zalında Azərbaycan kinematoqrafiyasının 125 illiyinə həsr olunmuş konsert təşkil ediləcək.
Azərbaycan Dövlət Akademik Filarmoniyasının kamera orqan musiqisi zalında müxtəlif konsertlərin və yaradıcılıq axşamlarının keçirilməsi nəzərdə tutulur.
Filarmoniyanın səhnəsində tanınmış bəstəkarların bir sıra tədbirləri və yaradıcılıq gecələri təşkil ediləcək. Onların arasında Azərbaycanın Xalq artisti, bəstəkar Vasif Allahverdiyevin 60 illiyi, Azərbaycan Xalq artistləri Tofiq Bakıxanovun və Nəriman Məmmədovun yaradıcılıq gecələri, görkəmli rus bəstəkarı Sergey Raxmaninovun 150 illiyinə həsr olunmuş fortepiano axşamı, Xalq artisti Eldar Mansurovun yaradıcılıq gecəsi, violonçelçi Sabir Əliyevin 95 illiyi ilə bağlı tədbir, İlyas Mirzəyevin 60 illiyinə və Fərəc Qarayevin 80 illiyinə həsr olunmuş yaradıcılıq axşamları var.
Həmçinin xarici ifaçıların və tanınmış musiqi kollektivlərinin iştirakı ilə konsertlər də nəzərdə tutulub. Fransada yaşayan soydaşımız, Azərbaycanın Əməkdar artisti, Fransanın Ali Beynəlxalq Musiqi Akademiyasının direktoru Adilə Əliyeva öz çıxışı ilə klassik musiqi həvəskarlarını sevindirəcək.
Filarmoniya innovasiyalara həmişə açıqdır, gənc ifaçıları da yaddan çıxarmır. Təcrübə və müasirliyin sintezinə əsaslanan layihələrin həyata keçirilməsi zamanı səhnə həmişə yaradıcı gənclərin ixtiyarına verilir.
Gənc və istedadlı ifaçılara və bəstəkarlara öz yaradıcılıqlarını böyük səhnədə nümayiş etdirmək imkanı verən layihələrdən biri “Gənclərə dəstək” adlanır. Layihənin ideya müəllifi filarmoniyanın direktoru, Azərbaycanın Xalq artisti Murad Adıgözəlzadədir, koordinatoru isə sənətşünaslıq üzrə fəlsəfə doktoru, filarmoniyanın direktor müavini Ayla Kərimova-Zəkəriyyədir.
Layihənin əsas məqsədi ölkədə gənc istedadların aşkar edilməsi və dəstəklənməsi, dünya və yerli musiqi mədəniyyəti ənənələrinin qorunub saxlanılması və inkişafı, musiqi maarifləndirməsi vəzifələrinin həllinə yönəlmiş proqramların həyata keçirilməsi və musiqiçilərimiz arasında hüquqi biliklərin formalaşmasıdır. Bu layihə çərçivəsində konsertlər ölkəmizin müxtəlif səhnələrində təşkil edilir.
2017-ci ildən bu layihənin iştirakçıları hər il ölkəmizin ən mənzərəli guşəsində keçirilən Qəbələ Beynəlxalq Musiqi Festivalında iştirak etmək imkanı əldə edirlər. Xüsusən, bu ilin iyulunda keçirilmiş XIII Qəbələ Beynəlxalq Musiqi Festivalında sözügedən layihə çərçivəsində tamaşaçılara gənc istedadların iki konserti təqdim edilib.
Daha bir maraqlı və mühüm yenilik Azərbaycan Mədəniyyət Nazirliyinin təşkil etdiyi “Yeni adlar” layihəsidir. Bu layihə müasir Azərbaycan ifaçılıq sənətinin inkişafına, bu sahədə yeni istedadlı nəslin tanıdılmasına, parlaq ifaçıların yetişməsinə, o cümlədən musiqi sənətimizi dərindən bilən və böyük sevgi ilə ifa edən gənclərin üzə çıxarılmasına xidmət edir. Gənc ifaçılar filarmoniyanın səhnəsində tanınmış dirijorlar və bədii rəhbərlər – Azərbaycanın Əməkdar artisti Fuad İbrahimovun, Mustafa Mehmandarovun, Orxan Həşimovun, Xalq artisti Ağaverdi Paşayevin və Əməkdar artist İlahə Hüseynovanın idarə etdikləri Üzeyir Hacıbəyli adına Dövlət Simfonik Orkestri və Azərbaycan Dövlət Xalq Çalğı Alətləri Orkestrinin müşayiəti ilə çıxış edəcəklər. Yeni mövsümdə tamaşaçılar üçün çox maraqlı proqram hazırlanıb.
Bakılılar və paytaxtın qonaqları üçün daha bir sürpriz abonement konsertlərinin bərpasıdır.
Uzun fasilədən, 2022-ci ilin noyabrından sonra filarmoniyanın Azərbaycan Mədəniyyət Nazirliyinin dəstəyi ilə təşkil etdiyi abonement konsertləri yenidən başlayır. Konsertlər hər şənbə günü saat 15:00-da kamera və orqan musiqisi zalında keçiriləcək. Bu konsertlərdə müxtəlif kollektivlər rəngarəng proqramlarla çıxış edəcək.
Bir sözlə, Azərbaycan Dövlət Akademik Filarmoniyası yolunuzu gözləyir.
“Ədəbiyyat və incəsənət”
(12.09.2023)
