Super User
BİRİ İKİSİNDƏ – Malik Atilayın şeirləri
“Ədəbiyyat və incəsənət” portalının “Ulduz” jurnalı ilə birgə Biri ikisində layihəsində yaşı 35-ədək olan şairlərin şeirlərinin dərcini davam etdiririk. Bu gün növbə Malik Atilayındır
Malik ATİLAY
BİR İNTİHARIN TARİXÇƏSİ
Siqnal səsi daş kimi düşüb
Şüşə kimi çilik-çilik edər fikirlərini,
Anidən ayılar sərxoş adam,
Ayılar xəyala getdiyi yolun ortasında,
Ayılar ağrılarından, acılarından...
Bir az geriyə qaçar,
Bir az qabağa.
Sürücü yazıq bilməz
Sağa qaçsın,
Sola qaçsın.
Heç bilmədiyi bir oyunun içində,
Hara gedəcəyini bilmədən qalar...
Sərxoş adamın film kimi gözünün önündən keçər yaşamadıqları,
Qızının əlindən tutub dərsə aparmamağı,
Yoldaşının üzünə gülməməyi,
Oğlunun çiyninə əlini qoymamağı...
Əyləc səsi.
İçini qurd yemiş ağac kimi yerə yıxılan adam.
Sıraya düzülər maşınlar
Tanımadıqları adamın cənazə namazına...
KİMİN GÖZ YAŞIDI BELƏ?..
Kimin göz yaşıdı belə?..
Bir evdə bir cüt gözdən çıxıb.
Min evin damından axır,
Min-min adamı isladır.
Kimin göz yaşıdı belə?..
Oğluna sarı açılan
İsti-isti güllələri
Bir damcısıyla soyudur…
Kimin göz yaşıdı belə?..
Sahibsiz əsgər məzarının
Qapqara mərmərdəki
Üzünü-gözünü yuyur…
Kimin göz yaşıdı belə?..
GƏMİLƏR FİT VERİR YUXULARIMDA
Tərk edilib suyun dibinə batmış
Gəmilər fit verir yuxularımda.
Əlsiz-ayaqsız düşmənim,
Dili lal, gözləri kor dünənim.
Hücum çəkir üstümə qoşun-qoşun.
Qarsız, amma qaranlıq bir gecəsiydi qışın,
Dörd dost idik,
Qaranlığa yelləncək qurub
Söyüşlü şeirlər oxuyurduq…
Qaranlığı qan qırmızısı şəraba boyamaq istəyərək
Dənizə qarşı.
Yaşamağa çalışırdıq uduzub-udub.
Üstündən illər keçib həmin gecənin,
Mən burdayam,
Xoşbəxtəm evimdə,
Xoşbəxtəm hər səhər gözümü açanda sevdiyim qadını gördüyüm üçün,
Dünənki Malik ölüb,
Sabahkı Malik tərk edib bizi,
Bircə söyüşlü şeirlər oxuyan Malik qalıb.
Hələ də
O qaranlıq gecədə...
Dodaqaltı şeirlər pıçıldayır...
DİVAR SAATI
1.
Hər tik-takında
Bir xatirə yatan divar saatını,
Xatirələri oyatmaqdan qorxurmuşcasına
Üsulca götürdü divardan.
2.
Həyatın hər anına
Şahidlik edən divar saatının
Yazdığı cümləyə nöqtə qoydu,
Kəllə sümüyünü deşib çıxan gülləylə.
3.
Yalnız adamlar
Bir yerdən sonra əşyalarına çevrilirlər.
Məsələn, ürəyi əsir yalnızların,
Birdən ürək döyüntüsü,
Divar saatının tik-takından ayrı döyünər.
KƏDƏRLİ UŞAQLAR
1.
Bəlkə də, oyuncaqçı,
Əli yetməyən oyuncaqlarda
Gözü qalan uşaqların
Kədərli baxışlarını
Silirdi vitrindən…
2.
Mən qar yağmasın deyə, dualar edən
Uşaqlar gördüm,
Allah!
Mən
Və o uşaqların cırıq çəkmələri şahiddir
O gecələrə.
Suya düşmüş xəyalların paradı
Başucundakı divara cızıq ataraq
Çəkəcəyi cəzanın hesabını tutan dustaq kimi
Ürəyində suya düşmüş xəyalların paradı var.
İlk cızıq atandan yadigardı ürəyində,
Səni necə tərk etmişdi, xatırlayırsan?
Gələcəyəm, demişdi.
O gün gözləyə-gözləyə öyrənmişdin
Həyatın ağzından tikə kimi torpağa düşən
heç kəs geri qayıtmır.
Ananı itirdiyin gecə
Heç xəbərin olmamışdı yan otaqda
Bir yuxudan daha dərin yuxuya adlayan qadından.
O gündən sayı-hesabı yox
ömrünə qar kimi enən ağrıların, dərdlərin –
O gündən ürəyin mil-mil şagird dəftəri...
Usta dirijor və qələbə nəğməsi
Qollarını itirsə də geri dönməyən əsgər,
Olmayan qollarıyla
Yol göstərmək istəyirdi yoldaşlarına…
İndi
Fərqi yox idi, amma
Ondan uzaqda döyüşən qolları
Ön cəbhədə
Usta dirijor kimi
Qələbə nəğmələri bəstələyirdi…
“Ədəbiyyat və incəsənət”
(16.11.2023)
Bu gün Beynəlxalq Tolerantlıq, Düymə və Yumşaq Oyuncaq Günüdür
Kənan Məmmədli, “Ədəbiyyat və incəsənət”
Bu günə təsadüf edən əsas tarixi hadisələri diqqətinizə çatdırırıq:
16 noyabr. Beynəlxalq Tolerantlıq Günü
Beynəlxalq Tolerantlıq Günü 1995-ci ildə YUNESKO-nun 50 illiyi münasibətilə təsis edilib, məqsəd - qurumun da nizamnaməsində qeyd olunduğu kimi, dünyada hamını bir-birinə dözümlülük nümayiş etdirərək mehriban qonşular kimi yaşamağa çağırış olub. Sivilizasiyaların qovuşduğu, şərq və qərb mədəniyyətlərinin çuğlaşdığı Azərbaycanda daim müxtəlifliyə, fərqliliyə hörmət, dinindən, dilindən, irqindən asılı olmayaraq bütün insanlara eyni isti münasibət, eyni rəğbət olub. Bu, özünü xalqımızın əsrlərdən gələn ədəbiyyat nümunələrində, bədii və fəlsəfi fikir tarixində də göstərir. Elə bir vaxtlar yurdsuz-yuvasız bədnam ermənilərə sığınacaq verməyimiz də bu səbəbdəndir. Azərbaycan indi bütün dünyada tolerantlıq örnəyi kimi tanınır. Azərbaycan dünyanın nadir ölkələrindəndir ki, burada bütün millətlər, bütün xalqlar, bütün dinlərin nümayəndələri bir ailə kimi yaşayır. Yəhudi xalqının tarixi vətənindən kənarda yeganə kompakt yaşayış yerinin Qubanın Qırmızı qəsəbəsi olması faktı dönə-dönə dünyada vurğulanmırmı? Yaxud, min illərdir ki, xınalıq, qırız, lahıc kimi etnosların assimilyasiyadan qorunub saxlanması məgər azmı işdir?
16 noyabr. Ümumdünya düymələr günü
“Yaxan düymələ, düymələ” deyə dad-aman eləyən xanəndələrimiz bu mahnını düymənin hikmətini bilibən oxuyublar, biləsiniz. Qapının qıfılı nədirsə paltarın da düyməsi odur. Hələ 20-ci əsrdə - 1938-ci ildə Amerikanın Button Society təşkilatı təqvimə belə bir günün salınmasına nail olub. Məişətimizə möhkəm daxil olan düymənin çox qədim tarixi var. Əvvəllər düymə yalnız bəzək elementi idi, düymələmə funksiyasını isə qayışlar, sancaqlar daşıyırdı. Düymə düymə olandan sonra onun kolleksiyasını yığanlar da tapıldı, məsələn, bir isveçli keşiş 40 min müxtəlif düymə toplayıbmış. Amma rekord isə Nyu-Cersi şəhərindən olan bir mühəndisə məxsus imiş, düz 100 min ədəd.
16 noyabr. “Yumşaq oyuncaqla ziyafət təşkil elə” günü.
Tək uşaqlar üçün yox, eyni zamanda böyüklər üçün də nəzərdə tutulan, tək xanımları deyil, həm də kişiləri əhatə edən bu günü, təsəvvür edin ki, azərbaycanlı kişisi də dəbə düşüb qeyd edir. Oturub masanın başında, ətrafında da yumşaq ayı, it. İçəri girən bir adam deməzmi ki, sənin kişi boyunu yerə soxum? (Burda bir smaylik yetərlidir).
16 noyabr. Rudolf Kreyseri yaxşı tanıyın!
Portəgizlər milli dəniz günündə hava soyuqdur deyə yalnız dəniz havası udacaqlar. Şimali Koreyada rəhbərlik icazə versə, insanlar Ana günündə analarını təbrik edəcəklər. Estonlar suverenlik deklarasiyası günündə bəsdir deyincəyə qədər şənlənəcəklər. Kubalılar Müqəddəs Kristobal günündə kilsələrə axışıb şam yandıracaqlar. ABŞ-da isə bu gün Milli Fəst-Fud günüdür, dünyada ən çox fəst-fud yeyən amerikalılar bu gün fəst-fuda qarşı əsl genosid həyata keçirməyəcəkmi, keçirəcək!
1945-ci ilin 16 noyabrında Londonda YUNESKO yaradılıb; 1848-ci ildə yenə də Londonda əsas hadisələr cərəyan edib – bu dəfə dünyaşöhrətli bəstəkar Şopen özünün son konsertini verib; 1766-cı ildə tarixin ən virtuoz skripkaçısı, eyni zamanda bəstəkar, dirijor və pedaqoq, fransalı Rudolf Kreyser dünyaya gəlib. Bu adam haqda maraqlı bir şey oxumuşam. Sən demə onun ifasına vurğun olan böyük Bethoven məşhur 9-cu sonatasını ona həsr edib, onun ifası üçün yazıb. Hətta bu sonataya bəzi mənbələrdə Kreyser sonatası da deyilir. Amma siz bu adamda dikbaşlığa baxın ki, o boyda kişinin arzusunu ürəyində qoyub, bu sonatanı ifa etməyib; 1582-ci ildə qəddarlıqda ad çıxarmış rus çarı İvan Qroznı öz oğlunu qətlə yetirib.
“Ədəbiyyat və incəsənət”
(16.11.2023)
QİRAƏT SAATI: Məhşər divanı, yaxud yalanın 17 anı – Adəm Bakuvinin romanı
“Ədəbiyyat və incəsənət” portalının Qiraət saatında Adəm İsmayıl Bakuvinin “Məhşər divanı, yaxud yalanın 17 anı” sənədli romanının dərci davam edir. Roman erməni millətindən olan bəşəriyyət canilərinin utopik məhkəməsindən bəhs edir. Onu nəinki oxumaq, hətta ən maraqlı faktları yaymaq, təbliğ etmək lazımdır.
60-CI DƏRC
Nəhayət, üçüncü çıxışçı söz aldı:
-Mənsə öz arxivimdəki bir qəzetdən sitat oxumaq istəyirəm. "Moskovskiy komsomolets" qəzeti. 29 yanvar 1994-ci il sayı. "Neft sindromu" məqaləsi. Burada Xocalı əsirləri barədə dəhşətli həqiqət yazılıb: ”Əsirlər var. Lakin artıq onlar yaşamağa yararlı deyillər. Qışda onları səhərlər ayaqyalın qarın-buzun üzərinə çıxarırlar. Təpələrindən soyuq su tökür, başlarında şüşə sındırır, sonra təzədən kameraya salırlar. Əsl işgəncələr isə bundan sonra başlanır. Barmaqlarını qapının arasına qoyub qırır, cığırdıqca rezin dəyənəklə döyürlər. Çoxu əzablara tab gətirməyərək dəli olu, ölür. Biz növbəti kəndə güzar edəndə bir erməninin diri uşağı götürüb iki böldüyünü görmüşəm. Sonra bədənin bir hissəsi ilə anasının sifətinə, başına o qədər döydü ki, övladının al qanına bulaşmış qadın dəli olub gülməyə başladı.”
Bu məqamda Baş Hakim yekun nitqi söyləmək zamanının yetişdiyini duyub söz götürdü:
-Vikipediyanın rus redaksiyasının rəsmi məlumatına görə 11557 hərbçinin, 763 dünc sakinin həlak olduğu, 30 min hərbçinin yaralandığı, 749 dinc sakinin itkin düşdüyü, yüz minlərlə insanın qaçqın həyatı yaşamağa məruz qaldığı, Azərbaycan tərəfinin məlumatına görə itkinin masştabı azı iki dəfə artıq olan qanlı Qarabağ müharibəsinin əsas baiskarı kimi Abel Qezeviç Aqanbekyan Divan tərəfindən qeybedilmə cəzasına məhkum edilir. Divanın qanunlarına görə ona son söz verilir.
Abel Aqanbekyan yerindən durub ağır-ağır söylədi:
-Mən qoca adamam, bu gün-sabah onsuz da dünyadan köçəsiyəm, xəstəyəm, ağrıyıram, gah təzyiqim qalxır, gah şəkərim qalxır. Özümü bilsəniz necə pis hiss edirəm, oy necə pis hiss edirəm...
Ürəyini ovuşdurub yerinə oturdu, dərhal tibb bacıları peyda olub ona yardım etməyə başladılar, proses bir müddət dayanmalı oldu, haçandan-haçana Aqanbekyan özünə gəldiyini büruzə verib çıxışını davam etdirdi:
-Mən möhtərəm Divandan xahiş edirəm bu qoca və xəstə şəxsə qarşı mərhəmətli olsun, onu əfv etsin. Üstəlik, onu da nəzərə almağınızı xahiş edirəm ki, tale bu günlərdə mənə çox ağır bir zərbə vurub, 23 yaşlı sevimli nəvəm, kiçik Abel Aqanbekyan, ona mənim adımı qoymuşdular, Moskvada yol qəzasında həlak olub. Bu lənətlənmiş hadisə iyulun 7-də baş verib, Abel can Xamovniçesk rayonunda "BMW" markalı idman motoskleti ilə bir piyadanı vurub. Piyada hadisə yerində ölüb. Nəvəmi isə yaralı vəziyyətdə xəstəxanaya yerləşdiriblər. Amma həkimlər onun həyatını xilas edə bilməyiblər. Oyyyy, yazıq Abel can, dərdim çox böyükdür.
Abel Aqanbekyan cibindən yaylıq çıxarıb hönkürüb ağlamağa başladı, yaşlı hakim “Qətlinə fərman verdiyin on minlərlə insanın ahıdır səni tutan, cənab akademik” söylədi, Baş Hakim hökmün icra edilməsi üçün müttəhimin aparılmasını tələb etdi, iki nəfər üzü qaraörtüklü şəxs Abel Aqanbekyanı səhnənin arxasına apardı.
Baş Hakim Divanın bugünkü işini bitmiş elan etdi, Baş Meydan bir anda boşalmağa başladı. Ancaq meydanın üzərinə hopmuş Xocalı ah-naləsi, inilti və çığırtısı, ağrı-acısı uzun müddət səmadan yapışıb qaldı, çəkilib getmədi.
15-Cİ PROSES.
MONTE MELKONYAN
Divanın növbəti iş günü sakit başladı, çünki ittiham olunan Monte Melkonyanın dünəndən portretinin üzü açılmışdı, dünəndən bu şəxs müttəhim kürsüsündə əyləşmişdi. Dünən o, bütün proses boyu yanında əyləşən akademik Abel Aqanbekyanın davranışına göz qoyurdu, şəxsən tanıdığı bu akademik onun da millətçi kimi yetişməsində müəyyən rol oynamışdı. Akademikin Parisdəki çağırışı isə həqiqətən də onu və dostlarını Qarabağın Azərbaycandan qoparılması uğrunda mübarizəyə sürükləmişdi. Sonda akademik Divan qarşısında nəvəsini itirdiyini də söyləyib aciz durumda dayananda, hətta göz yaşları tökəndə Melkonyan dağ bildiyi şəxsin necə təpələşməsindən hürkmüşdü, insanın düzgün sanıb keçdiyi bir yolun sonda ona peşmançılıq gətirməsinə canlı şahidlik etməsi onu öz həyat yolu barəsində də düşünməsinə vadar etmişdi.
Baş Hakimin xahişindən sonra diktor xanımlar səhnəyə çıxıb növbəti müttəhim barədə bilgiləri oxumağa başladılar.
Birinci xanım aramla danışdı:
-Monte Melkonyan 1957-ci il noyabrın 25-də ABŞ-ın Kaliforniya ştatında anadan olmuşdur. Berkli universitetini arxeologiya ixtisası üzrə bitirmişdir. Amma bütün şüurlu həyatını təhsilə yox, döyüşlərə, müharibələrə həsr etmişdir. Belə ki, ASALA terror təşkilatına üzv olan, sonralar da təşkilatın aparıcı üzvlərindən birinə çevrilən bu şəxsin ilk döyüş təcrübəsi uzaq 1978-ci ilə təsadüf edir. Həmin il o, Livanda gedən vətəndaş müharibəsində Livan ermənilərinin dəstəklədikləri sağ xristian qüvvələrin tərəfində döyüşmüşdür. Livan təcrübəsinin ardınca ASALA-nın bir nömrəli düşmən adlandırdığı Türkiyəyə qarşı mücadilə Monte Melkonyanın döyüşçü tərcümeyi-halında əsas yeri tutmuşdur. O, Türkiyədə bu dəfə kürd separatçılarının tərəfində mövqe tutmuş, Türkiyə ordusuna qarşı PKK terror təşkilatının həyata keçirdiyi əməliyyatlarda iştrak etmişdir. Livanda xeyli qan töküb müəyyən sayda adam öldürən bu şəxs Türkiyə ordusuna da itki yaşatmışdır, bu açıq döyüşlərdən sonra isə ASALA-nın əsas silahı olan terror əməliyyatlarına keçid etmişdir. 1981-ci ilin 24 sentyabrında Melkonyan Parisdəki Türkiyə səfirliyinə hücum təşkil etmişdir. Bu dövləti cinayət izsiz qalmamışdır, həmin ilin noyabrında onu izləyərək Fransa polisi nəhayət həbs etməyə müvəffəq olmuşdur. Həbsi zamanı üstündən saxta sənədlər aşkar olunmuşdur. Melkonyanın həbsinə cavab olaraq ASALA bir neçə terror hadisəsi törətmiş və sonda Fransa hökuməti Melkonyanı Livana deportasiya etməli olmuşdur. Lakin bir müddət sonra o, saxta sənədlərlə yenə də Fransaya qayıtmışdır. Bu müddət ərzində o fələstinli azadlıq döyüşçüsü Əbu Nidal ilə sıx əlaqə saxlamışdır. Bu dəfə isə yəhudiləri özünə hədəf seçmişdir.
İkinci – publikanın sevimlisi xanım isə emosional çıxış etdi:
-1983-cü ildə Melkonyan Parisdəki Orli hava limanında insanlığa sığışmayan bir terror aktı həyata keçirməyə müvəffəq olmuşdur. Türk hava yolları şirkətinin kassaları qarşısında o, partlayış təşkil etmişdir. Nəticədə 8 nəfər həlak olmuş, 55 nəfər müxtəlif dərəcəli bədən xəsarəti almışdır. 1985-ci ildə Melkonyan yenidən Fransa polisi tərəfindən həbs olunmuş və terror aktının təşkilində günahkar bilinərərk 6 il müddətinə azadlıqdan məhrum edilmişdir. Lakin ASALA liderlərinin, erməni lobbisinin əməli fəaliyyəti öz bəhrəsini vermiş, Melkonyanın cəzaçəkmə müddəti müəmmalı şəkildə azaldılmışdır. Və o, 1989-cu ildə azadlığa buraxılaraq Fransadan Yəmənə deportasiya edilmişdir. Ancaq orada çox qalmayıb saxta sənədlərlə yenidən Avropaya gələrək bir muddət orada yaşamışdır. SSRİ prezidenti Mixail Qorbaçovun başladığı perestroyka siyasəti, ölkəni anarxiya və xaosun bürüməsi, milli zəmində münaqişələrin peyda olması, akademik Aqanbekyanın “miatsum” çağırışları, Ermənistanın Dağlıq Qarabağ iddiası ilə Azərbaycana elan edilməmiş müharibəyə başlaması ona gətirib çıxarmışdır ki, Melkonyan SSRİ ərazisinə keçmiş, öz cinayət və vəhşət siyasətini indi də bu əraziyə yönəltmişdir.
Söz yenidən birinci xanıma adladı...
(Davamı var)
“Ədəbiyyat və incəsənət”
(16.11.2023)
Mahnı Teatrında ustad sənətkar Hüseyn Bozalqanlının anadan olmasının 160 illiyi qeyd olunub
Rəşid Behbudov adına Dövlət Mahnı Teatrında Azərbaycan Aşıqlar Birliyinin (AAB) təşkilatçılığı ilə görkəmli saz-söz ustadı aşıq Hüseyn Bozalqanlının anadan olmasının 160 illiyinə həsr olunmuş tədbir keçirilib.
AzərTAC xəbər verir ki, tədbiri giriş sözü ilə açan AAB-nin sədri, Əməkdar elm xadimi, professor Məhərrəm Qasımlı Hüseyn Bozalqanlının keçdiyi ömür yolundan və ustad sənətkar kimi yaradıcı fəaliyyətindən söz açıb. Qeyd edib ki, Hüseyn Bozalqanlı kiçik yaşlarından saza-sözə bağlanıb və on iki yaşından etibarən şeir yazmağa başlayıb. Eyni zamanda, məşhur aşıqların – Mirzə Bayramov, Qədir İsmayılov, Vəli Bozalqanlı, Ələkbər Əsgərov və başqalarının müəllimi olub.
Bildirilib ki, Tovuzun Bozalqanlı kəndində anadan olan Hüseyn Bozalqanlı mədrəsədə təhsil aldığından ərəb və fars dillərini mükəmməl bilib. Azərbaycan aşıqlarının I və II qurultaylarında mötəbər qonaq kimi iştirak edib. Bozalqanlı 1941-ci ildə Tovuzda vəfat edib. Bu gün Tovuzda fəaliyyət göstərən Aşıq Muzeyi uzun illərdir ki, bu böyük sənətkarın adını daşıyır.
Tədbirdə aşıqlar müxtəlif saz havaları üstündə Hüseyn Bozalqanlının şeirlərini ifa ediblər.
Sonda ustad aşıq, Əməkdar mədəniyyət işçisi Əli Quliyev çıxış edərək tədbirin təşkilatçılarına minnətdarlığını bildirib.
“Ədəbiyyat və incəsənət”
(16.11.2023)
Leyla Əliyevanın “Sevgi”si
Könül, “Ədəbiyyat və incəsənət”
Proqram əlimdə yox idi, Xudafərin Təqdimat Zonasına gedirdim, bu zaman səsgücləndirici ilə gələn məlumat məni ayaq saxlamağa vadar etdi. Elan edilirdi ki, Mədəniyyət Nazirliyinin təşkilatçılığı və “Caspian Event Organisers” şirkətinin dəstəyi ilə Bakı Ekspo Mərkəzində keçirilən 9-cu Bakı Beynəlxalq Kitab Sərgisində Zəfər Təqdimat Zonasında Leyla Əliyevanın “Sevgi” kitabının təqdimat mərasimi olacaq. Leyla Əliyeva - Heydər Əliyev Fondunun vitse prezidentidir, Azərbaycan prezidentinin də qızı.
Yeganə təəssüfləndirici məqam o oldu ki, Leyla xanım özü mərasimə qatılmamışdı. “Şərq-Qərb" nəşriyyat evinin baş redaktoru Nərgiz Cabbarlının moderatorluğu ilə keçirilən təqdimatda çıxış edən Xalq yazıçısı Elmira Axundova kitab haqqında ətraflı məlumat verdi, söylədi ki, Leyla xanımın kitabları zövqlü, fəlsəfi və dərin mənalı kitablardır. Burada fərqli cəhət var. Kitabda Leyla xanımın şeirləri yer alıb. Leyla xanım öz üzərinə böyük məsuliyyət götürüb. O, dahi babası və atası kimi Azərbaycan üçün böyük işlər görür. Leyla xanım çox istedadlı və yaradıcı insandır.
Azərbaycanın Xalq rəssamı, professor Arif Hüseynov Leyla Əliyevanın çəkdiyi rəsmlər barədə danışdı. Bildirdi ki, hər yaradıcı insanın rəsmlərində öz səsi var. O səsi Leyla Əliyevanın əsərlərində də hiss etmək olar. Leyla rəsmlərində iki minimal rənglərdən istifadə edir və onların vasitəsilə tamaşaçıya öz fikrini çatdırır.
“Şərq-Qərb” nəşriyyat evinin direktoru Sevil İsmayılova qeyd etdi ki, kitabın adının “Sevgi” olması heç də təsadüfi deyil. Çünki Leyla Əliyeva yaratdığı hər bir şeyə öz sevgisini qatır.
Nəşrdə, həmçinin Leyla xanımın şəxsən özü hazırladığı şirniyyatların reseptləri də yer alıb.
Təqdimatda, eyni zamanda, Leyla Əliyevanın rəsm əsərlərindən ibarət olan kataloq təqdim olundu.
Qeyd edək ki, Leyla Əliyevanın “Sevgi” kitabında yer alan reseptlərin əsas xüsusiyyəti onların şəkərsiz olmasıdır. Reseptlərin hər biri kitabda Leyla Əliyevanın şeirlərindən parçalarla müşayiət olunub. Bu nəşr Bakı Kitab Mərkəzinin bilavasitə iştirakı ilə “Şərq-Qərb” nəşriyyatında çap olunub. “Sevgi” kitabı Azərbaycan, türk, ingilis və rus dillərindədir.
Çox faydalı, ruhoxşayan, ən əsası, orijinal nəşrdir.
“Sevgi” oxuyun, sevginiz əskik olmasın.
“Ədəbiyyat və incəsənət”
(16.11.2023)
Musiqi və xalçaçılıq barədə kitablar
Könül, “Ədəbiyyat və incəsənət”
Sərginin - Azərbaycan Respublikası Mədəniyyət Nazirliyinin təşkilatçılığı və “Caspian Event Organisers” şirkətinin dəstəyi ilə Bakı Ekspo Mərkəzində keçirilən 9-cu Bakı Beynəlxalq Kitab Sərgisinin sonuncu günü diqqətimi iki kitab təqdimatı cəlb elədi. Biri musiqi, digəri xalçaçılıq barədə idi. Nəşrlər həm nəfisliyi, həm də maraqlı olmaları ilə diqqət çəkirdi.
XALÇA MƏMULATLARI
Sərgi çərçivəsində “Azərbaycan Milli Xalça Muzeyinin kolleksiyasından xalça məmulatları” kitabı təqdim edildi. Həmin təqdimat mərasimində layihənin rəhbəri, Azərbaycan Milli Xalça Muzeyinin direktoru, sənətşünaslıq üzrə fəlsəfə doktoru Şirin Məlikova kitab haqqında ümumi məlumat verib, muzeyin tarixi və bugünkü fəaliyyəti barədə danışdı. Bildirdi ki, bu kitab Azərbaycan Milli Xalça Muzeyinin 55 illik yubileyi münasibətilə dərc olunub.
Nəşrdə Azərbaycan Respublikası Milli Arxiv İdarəsinin, Rusiya Etnoqrafiya Muzeyinin və alim-etnoqraf Həsən Quliyevin arxivlərindən şəkillər istifadə olunub.
Sonra müəlliflər - Əməkdar rəssam, dosent Məmmədhüseyn Hüseynov, sənətşünaslıq üzrə fəlsəfə doktoru Aytən Əhmədova muzeyin yeni nəşri, onun ərsəyə gəlməsi, apardıqları araşdırmalar, kolleksiyanın mahiyyəti və digər məqamlar barədə ətraflı məlumat verdilər. Əlbəttə, yaxşı olardı ki, kitablardan izləyicilərə hədiyyə də verilsin. Amma bahalı poliqrafiyalı kitablar sadəcə nümayiş üçün gətirilmişdi.
LİDERLƏR VƏ MUSİQİ
Kitab Sərgisi çərçivəsində “Heydər Əliyev və musiqi mədəniyyəti” və “İlham Əliyev və musiqi mədəniyyəti” kitablarının təqdimatı mərasimi də maraqlı alındı.
Hər iki kitabın tərtibçi müəllifi, sənətşünaslıq üzrə fəlsəfə doktoru, Əməkdar mədəniyyət işçisi Səadət Təhmirazqızı idi. Yeri gəlmişkən, Səadət xanım Sumqayıtdandır, tanınmış müğənni Təhmiraz Şirinovun qızıdır.
Müəllif çıxış edərək təqdim olunan kitabların dövlətimizin başçısının musiqi mədəniyyətinə göstərdiyi diqqət və qayğıdan bəhs etdiyini bildirdi.
Bildirdi ki, “Heydər Əliyev və musiqi mədəniyyəti” kitabı Ulu Öndərin anadan olmasının 100 illiyinə musiqi ictimaiyyətinin töhfəsidir.
Bəstəkar, professor, Əməkdar incəsənət xadimi Məmmədağa Umudov və Azərbaycan Televiziyasının əməkdaşı Dilşad Tahirqızı çıxışlarında belə kitabların çapının təqdirəlayiq addım olduğunu vurğuladılar. Onlar bildirdilər ki, bu kitabların nəşri mədəni irsimizin daha da zənginləşməsinə töhfə verəcək.
Bu kitabdan da hədiyyə payım olmadı. Amma qəmimiz kəm. Əsas odur ki, mədəniyyətimiz qazansın!
“Ədəbiyyat və incəsənət”
(16.11.2023)
BƏS ÖTƏN İL? - Eyni sərgi iki fərqli nazirlə iki fərqli biçimdə
Kənan Məmmədli, “Ədəbiyyat və incəsənət”
9-cu Beynəlxalq Kitab Sərgisi barədə sizlərə ətraflı məlumat verdik. Ötən il bu vaxtlar isə 8-ci sərgi keçirilirdi. Onda məkan və format eyni idi, amma nazir başqaydı, hədəflər də başqaydı.
Gəlin ötənilki sərgiyə boylanaq.
Beləliklə:
Oktyabrın 5-də Mədəniyyət Nazirliyinin təşkilatçılığı ilə Bakı Ekspo Mərkəzində VIII Bakı Beynəlxalq Kitab Sərgisi açılıb. Sərgidə 10-dan çox ölkədən 60-dan artıq xarici təşkilat,118 yerli nəşriyyat-poliqrafiya və kitab sənəti ilə əlaqəli müəssisə təmsil olunub.
Açılış mərasimində Baş nazirin müavini Əli Əhmədov bütün oxucuları kitab bayramı münasibətilə təbrik edib. Bildirib ki, Azərbaycanda belə sərgi-yarmarkaların keçirilməsi artıq bir ənənə halını alıb. Kitabın bəşəri dəyər olduğunu qeyd edən Baş nazirin müavini belə sərginin ölkəmizdə keçirilməsini yüksək qiymətləndirib: “Kitab insanın bilik, vərdişlər qazanmasında böyük yer tutur. İnsan nailiyyətlərinin hamısını kitabla əlaqələndirirlər. Kitabsız insan cəmiyyətinin inkişafını təsəvvür etmək olmaz. İndi kitab elektron aləmdə yaşamaq üçün rəqabət aparır. Azərbaycan dövləti, cəmiyyəti elmə böyük hörmətlə yanaşır. Bu gün Azərbaycan Respublikasının kitab çapı dövlətin diqqət mərkəzindədir”.
Vurğulayıb ki, Prezident İlham Əliyevin diqqət və qayğısı sayəsində beynəlxalq kitab sərgiləri, eyni zamanda, digər beynəlxalq tədbirlər ölkəmizdə yüksək səviyyədə təşkil edilir.
Tədbirdə mədəniyyət naziri Anar Kərimov çıxış edərək sərginin əhəmiyyətindən danışıb.
Bildirib ki, sərginin əsas məqsədinin cəmiyyətdə kitaba olan marağı artırmaq və mütaliə mədəniyyətini təbliğ etmək, oxucuları nəşriyyat işi sahəsində olan rəqəmsal yeniliklərlə tanış etmək, ölkəmizdə kitab sənayesi sektorunun və müasir ədəbi proseslərin inkişafını dəstəkləməkdir.
Nazir qeyd edib ki, 15 illik tarixə malik, Bakı Beynəlxalq Kitab Sərgisi ölkəmizdə keçirilən müxtəlif sahələr üzrə beynəlxalq tədbirlər sırasında, cəmiyyət tərəfindən böyük maraqla qarşılanan və iştirakçı baxımından kütləviliyi ilə seçilən öncül festivallardan hesab olunur.
“Səkkizinci Bakı Kitab Sərgisinin digər əvvəlki illərdən fərqi onun daha geniş formada təşkil olmasındadır. Təbii ki, 7-ci Bakı Beynəlxalq Kitab Sərgisi kitab sənayesi sahəsində bir dönüş nöqtəsi olub. Artıq Azərbaycanda bu sahədə yeni dünya standartlarına cavab verən təcrübə formalaşdırılıb. Amma builki sərgimizin keçən ilkindən fərqi ondadır ki, bu il naşirlərin sayı , ümumiyyətlə kitab sənayesi subyektlərinin sayı keçən ilkindən demək olar ki, 30-40 faiz daha çoxdur. Bu il ilk dəfə olaraq, ölkəmizdə kitab sərgisində Türkiyə “fəxri qonaq” statusunda iştirak edir. “Şuşa İli”nə həsr olunan Bakı Beynəlxalq Kitab Sərgisində bütün konstruksiyalar, kitab məhsulları mədəniyyət paytaxtımızın simvolları ilə bəzədilib”,- deyə Anar Kərimov bildirib.
Anar Kərimov əlavə edib ki, builki sərgidə Türkiyədən 40, Rusiya, İran və Özbəkistanın hər birindən 4 nəşriyyat dəvət olunub. Ümumilikdə 110 –dan çox nəşriyyatın iştirakı gözlənilir. Türkiyədən və digər ölkələrdən kifayət qədər məşhur qonaqlar dəvət olunub: “Qonaqlar içərisində İlbər Ortaylı, Fatih Ərdoğan, Xasiyət Rüstəm kimi məşhur simalar var”.
Sərgi müddətində “Qarabağa kitabla gedək” aksiyasının davam edəcəyini bildirən Anar Kərimov qeyd edib ki, hazırda bu aksiya çərçivəsində işğaldan azad olunmuş ərazilərdə yaradılacaq kitabxanalar üçün 93 min 212 nüsxə kitab toplanıb: “Təşkilat Komitəsi tərəfindən sərginin son günü “Ən yaxşı nəşriyyat” və “Ən yaxşı kitab” nominasiyaları üzrə qaliblər seçiləcək. Şuşaya həsr olunmuş məzmun və poliqrafik baxımından ən yaxşı kitabın buraxılışını təmin edən naşir Şuşanın 270 illiyi münasibətilə təsis olunan “Xatirə nişanı” ilə təltif olunacaq”.
Nazir çıxışının sonunda kitab bayramı münasibətilə bütün kitabsevərləri təbrik edib, sərgi iştirakçılarına uğurlar arzulayıb.
Türkiyənin mədəniyyət və turizm nazirinin müavini Serdar Çam qeyd edib ki, Türkiyə və Azərbaycan arasında dostluq münasibəti əbədi və sarsılmazdır: "Biz daim birlikdə istənilən sahədə tərəfdaşlıq mübadiləsi edirik. Türkiyədə də bu yaxın illər ərzində müxtəlif başlıqda xeyli sayda kitab işıq üzü görüb".
Kitab sərgilərinin keçmişlə bu günü, yazarla oxucuları eyni məkanda birləşdirdiyini vurğulayan nazir müavini sərginin təşkilində əməyi olan hər kəsə minnətdarlığını bildirib.
Azərbaycan Yazıçılar Birliyinin sədri, Xalq yazıçısı Anar kitabın cəmiyyət həyatındakı rolundan danışıb. Söyləyib ki, kitab cəmiyyətin mərkəzində duran əsas anlayışlardan biridir, kitab mədəniyyətdir: “Kiçik yaşlarından uşaqlarda kitaba sevgi yaratmaq çox önəmlidir. Tədqiqatlar göstərir ki, balaca yaşlarından daha çox kitab oxuyanlar, həmçinin valideynləri daha çox kitab oxuyan uşaqlar gələcəkdə daha yüksək akademik nailiyyətlər əldə edirlər. Bu da bir daha kitabların mütaliə vasitəsi kimi həyatımızda nə qədər önəmli yer tutduğunu göstərir”.
Qeyd edilib ki, bu ilki sərgidə Türkiyədən 40, Rusiya, İran və Özbəkistanın hər birindən 4 nəşriyyat dəvət olunub. Sərgi çərçivəsində uşaqlar və böyüklər üçün ustad dərsləri, inklüzivlik, eləcə də digər aktual mövzular üzrə kitab təqdimatları, imza günləri, konfranslar, simpoziumlar, qiraət və musiqi saatları, həmçinin kitab sənayesi sektorunun subyektləri arasında əməkdaşlıq platformaları təşkil ediləcək. Sərgi müddətində müxtəlif formatda 200-dən çox tədbirin təşkili nəzərdə tutulur.
Beş gün ərzində müxtəlif formatda tədbirlər təşkil ediləcəyini bildirən natiqlər bildiriblər ki, sərginin “fəxri qonaq ölkəsi” Türkiyədir. Türkiyə Respublikasının Mədəniyyət və Turizm Nazirliyi tərəfindən qardaş ölkənin mədəniyyətinin nümayişi məqsədilə sərgi salonunda və bir sıra mədəniyyət müəssisələrimizdə müxtəlif formatda silsilə tədbirlər də keçiriləcək. Eyni zamanda, Türkiyənin dünyaşöhrətli yazarları, tarixçiləri, elm adamları və aktyorları sərgidə iştirak edirlər.
Qeyd edək ki, VIII Bakı Beynəlxalq Kitab Sərgisi oktyabrın 9-dək davam edib.
Vəssalam.
Gördüyünüz kimi fərq az deyil. Ən əsası isə 9-cu 8-cidən xeyli üstündür. Bu da onu deməyə imkan verir ki, inkişafdayıq.
“Ədəbiyyat və incəaənət”
(16.11.2023)
YADDAQALAN, MARAQLI, BOL TƏƏSSÜRATLI - Ədəbiyyat Fondu 9-cu Bakı Beynəlxalq Kitab Sərgisində
Könül, “Ədəbiyyat və incəsənət”
Bildiyiniz kimi, 5 gün ərzində Mədəniyyət Nazirliyinin təşkilatçılığı ilə Bakı Ekspo Mərkəzində 9-cu Beynəlxalq Kitab Sərgisi keçirildi.
Noyabrın 11-də açılışı olmuş və dünən- noyabrın 15-dək davam edən sərgidə Azərbaycan Yazıçılar Birliyini qurumun Ədəbiyyat Fondu təmsil edirdi. Fondun sərgidə iştirakına toxunacağıq, indisə ümumən sərgi barədə.
13 ölkədən 30 xarici və 109 yerli təşkilat
Ümummilli Lider Heydər Əliyevin 100 illik yubileyinə həsr olunan 9-cu Bakı Beynəlxalq Kitab Sərgisinin açılış mərasimində mədəniyyət naziri Adil Kərimli, Azərbaycan İnsan Hüquqları üzrə Müvəkkili (Ombudsman) Səbinə Əliyeva, deputatlar və digər rəsmi şəxslər iştirak edirdi.
Açılış nitqi ilə çıxış edən mədəniyyət naziri bildirdi ki, bu gün Azərbaycan dövləti kitab sənayesinə, eləcə də gənc yazarların inkişafına xüsusi diqqət yetirir: “Kitab sərgisi çərçivəsində kitabların toplanması üçün bir sıra vacib tədbirlər görülüb”.
A.Kərimli işğaldan azad olunmuş ərazilərdə ermənilərin dağıtdığı kitabxanalardan da danışıb: “İşğaldan azad olunmuş bölgələrdə kitablar və kitabxanalar ciddi ziyan görüb. Biz də həmin kitabların sərgiyə gətirib burada nümayiş olunması üçün xüsusi işlər görmüşük. 30 il işğal dövrü ərzində Azərbaycan mədəni irsinə məxsus 927-dən çox kitabxana və 5 milyona qədər kitab fondu tamamilə məhv edilib. Bütün bunların bərpa edilməsi və Qarabağda kitab fondunun yaradılması üçün birlikdə addım atmalıyıq".
Sərgidə 11 ölkədən 30-dan çox xarici təşkilat, 109 yerli nəşriyyat-poliqrafiya və kitab sənəti ilə əlaqəli müəssisə iştirak edirdi. Sərgidə Azərbaycanın xalq yazıçıları və şairləri, tanınmış gənc yazarlar və məşhur xarici yazıçılar və aktyorlar iştirak edirdilər.
Sərgi çərçivəsində uşaqlar və böyüklər üçün master-klaslar, inklüzivlik və digər aktual mövzular üzrə kitab təqdimatları, imza günləri, konfranslar, simpoziumlar, qiraət və musiqi saatları və kitab sənayesi sektorunun subyektləri arasında əməkdaşlıq platformaları təşkil edildi. Sərgi müddətində müxtəlif formatda 220-dən çox tədbir keçirildi.
Eyni zamanda Türkiyənin görkəmli yazarları, elm adamları, tanınmış aktyorları və xüsusi tədbirlər proqramı ilə sərgidə təmsil olunurdu. Məşhur yazar İskəndər Palanın adını isə xüsusi qeyd etmək istəyərdim.
Ədəbiyyt Fondu fəal idi
İndi isə Azərbaycan Ədəbiyyat Fondunun sərgidə iştirakı barədə. 321 nömrəli stenddə Azərbaycan yazıçılarının - AYB üzvlərinin (o cümlədən Xalq yazıçıları Anarın, Çingiz Abdullayevin, Xalq şairi Vahid Əzizin, eləcə də Səlim Babullaoğlunun, İlqar Fəhminin, Varisin, Ramiz Qusarçaylının, Yunus Oğuzun, Adəm İsmayıl Bakuvinin, Hümbət Həsənoğlunun, Faiq Balabəylinin və digərlərinin) kitabları sərgiləndi.
Burada eyni zamanda AYB-nin “Ulduz”, “Qobustan”, “Literaturnıy Azerbaydjan”, “Dünya ədəbiyyatı” kimi nəşrləri də nümayiş olundu.
Yazıçılar gün ərzində burada öz oxucuları ilə görüşüb onlar üçün kitab imzaladılar. (Adilə Nəzərin, Nigar Arifin imza saatlarını xüsusən qeyd etmək istərdik).
Eyni zamanda sərginin təqdimat zonalarında müxtəlif maraqlı tədbirlər həyata keçirildi.
“Azərbaycan ədəbiyyatı beynəlxalq müstəvidə”
Noyabrın 15-də sərgi çərçivəsində Yazıçılar Birliyi və Azərbaycan Ədəbiyyat Fondunun birgə təşkilatçılığı ilə “Azərbaycan ədəbiyyatı beynəlxalq müstəvidə” mövzusunda panel müzakirəsi xüsusi diqqət qazandı.
Gənc yazarların, elm, incəsənət və media xadimlərinin, məktəblilərin iştirak etdiyi panel Azərbaycan Ədəbiyyat Fondunun baş direktoru, Əməkdar jurnalist Varisin moderatorluğu ilə keçdi.
Varis ədəbiyyatımızın beynəlxalq müstəvidə yeri, görülən və görüləcək işlər barədə tədbir iştirakçılarını məlumatlandırdı.
Tədbirdə çıxış edən yazıçı Yunus Oğuz Azərbaycan tarixinin və mədəniyyətinin çox qədim olduğunu dedi: “Bizim başlıca məqsədimiz ölkəmizin qədim tarixini dünyada tanıtmaqdır. Bu vəzifə balaca oxucularımızın və gənclərimizin üzərinə düşür”.
Azərbaycan Yazıçılar Birliyi sədrinin müşaviri Sayman Aruz qeyd etdi ki, Azərbaycan xalqının böyük və zəngin ədəbiyyatını yalnız ümumiləşdirərək dünyaya çatdırmaq mümkündür. O, həmçinin Cənubi Azərbaycan ədəbiyyatı barədə də bilgilər verdi.
Dünya Gənc Türk Yazarlar Birliyinin sədri, şair İntiqam Yaşar bildirdi ki, dünyada ədəbiyyatın təbliğ edilməsi nəşriyyatların üzərinə düşür. Beynəlxalq əlaqələrin qurulmasında isə keçirilən ənənəvi kitab sərgiləri və festivallar mühüm rol oynayır.
Onun sözlərinə görə, hər il Bakı Beynəlxalq Kitab Sərgisində müxtəlif ölkələrdən nəşriyyat evləri iştirak edir. Bu isə gələcəkdə əməkdaşlıq etmək üçün gözəl bir fürsətdir.
Sonra tədbir panel diskussiyalarla davam etdi, moderator və məruzəçilər sualları cavablandırdılar.
“Ədəbiyyat və incəsənət”
(16.11.2023)
POETİK QİRAƏTdə Rəfail İncəyurdun “Təəssüf”ü
“Ədəbiyyat və incəsənət” portalının Poetik qiraət rubrikasında bu gün sizlərlə şair Rəfail İncəyurd görüşür.
Təəssüf
Əylən, insan insafına enməyən,
Əylən, ovçu tamahını yenməyən!..
Güllən körpə balasını yemləyən
qurda dəysə, quşa dəysə, heç bir şey…
Düz qocalar gərək sala düzgün iz,
Cavanlara nümunə- siz, güzgü- siz.
Cözəllərin atmacası sevgisiz
ötüb-keçən yaşa dəysə, heç bir şey!
…Yaxşı-yaxşı ələdiyin yaxşılıq,
Yaxşılığa bələdiyin yaxşılıq,
Məhəbbətlə elədiyin yaxşılıq
boşa çıxsa, daşa dəysə, heç bir şey!
“Ədəbiyyat və incəsənət”
(16.11.2023)
…yoxsa, sənin kitabın oxunmayacaq!
Varis yazır
“Ədəbiyyat və incəsənət” portalı Azərbaycan Ədəbiyyat Fondunun Baş direktoru Varisin “Azərbaycan ədəbiyyatının inkişafına müsbət təsir edə biləcək amillər hansılardır və bu yolda addımlayan gənclər, əsasən, nələrə diqqət etməlidirlər?” mövzusunda mühazirəsini diqqətinizə çatdırır.
Azərbaycan ədəbiyyatının inkişafına müsbət təsir edə biləcək amillər çoxdur, bunların bəziləri ümumədəbiyyat faktlarıdır, bəziləri sırf Azərbaycan üçündür, spesifikdir.
Ondan başlayaq ki, hazırda bütün dünyada mədəniyyətə 3-cü minilliyin İKT basqısı hiss edilir. İnsanlar mobil telefonların və internetin əsarətində ikən kitab mağazaları, teatr və konsert salonları, kino zalları, rəsm qalereyaları boşalır, ağıllı telefonlar hər şeyi öz əllərində cəmləşdirirlər. Hətta kitab yazmaq, film çəkmək, musiqi bəstələmək tədricən süni intellektlərə tapşırılmaqdadır. Belə bir zamanda üstəlik, pandemiya, müharibə, iqtisadi tənəzzül, təbii fəlakət, qlobal istiləşmə kimi faktorlar da bir yandan “sabaha ümid yoxdur” təhlükəsi ilə insanları zombiləşdirir, mənəvi deqradasiyaya aparır.
Bax belə bir çətin zamanda ədəbiyyat sanki seyt-notdadır, edilən hər bir gedişə çox cüzi vaxt ayrılır.
Odur ki, bu faktorları nəzərə alıb yazıçılar bu fərqli yeni insan üçün - 3-cü minilliyin insanı üçün yeni ədəbiyyat yaratmalıdırlar. Yəni, cəmiyyətin sosial sifarişini, oxucunun maraq və istəklərini nəzərə almayan, günün tələbləri ilə səsləşməyən ədəbiyyat oxunulmayacaq, sandıqda qalacaq. Bu ədəbiyyatın inkişafının qızıl qanunudur. Kim də desə ki, belə ədəbiyyat əsl ədəbiyyat deyil, yanılacaq. Çünki hər dövrün öz ədəbiyyatı olur, bu normal tendensiyadır. Kitab əmtəədir, heç kəsə gərək olmadısa, demək, özünü doğrultmadı. Özünü doğrultmadısa, sənin gətirəcəyin arqumentlər (mən gələcək üçün yazıram, yaxşı kitab kütlə üçün deyil, oxucunun səviyyəsi aşağıdır, dekodentçilik ədəbiyyatın əsasıdır və s.) bilmərrə əsassızdır.
Spesifik problemlərə gəlincə, Azərbaycanda nəşriyyatların mətbəə funksiyası daşıması, yazıçılara nəşriyyat sifarişinin olmaması, kitab bazarının kiçik, əhalinin alıcılıq qabiliyyətinin aşağı olması, mediada və cəmiyyətdə mənəviyyat mövzularının kölgədə qalması, reklamvericinin yoxluğu ədəbiyyatımızı inkişafdan saxlayan amillərdir, demək ki, inkişaf üçün də məhz bu amillər aradan qaldırılmalıdır.
Ölkəmizin çox istedadlı ədəbi gəncliyi var. Dövrün nəbzini tutan, qeyd etdiyim faktorlara söykənən mətnlər yazmaq, qlobal ədəbi inteqrasiyanı nəzərə alıb məhəlliçilikdən uzaqlaşmaq, ustad yazarlardan ara-sıra dərslər, tövsiyyə və məsləhətlər almaq, ədəbiyyatşünaslıq elmindən xəbərdar olmaq, ədəbi prosesləri izləmək, daha çox mütaliə edib elitar ədəbi zövq formalaşdırmaq vacibdir.
Mən 2016-cı ildə Nyu-Yorkda Bestseller yazmağın qızıl qaydaları kursunu alanda bizə ən birinci bu qaydanı öyrətmişdilər: Sənə çağdaş oxucunu öz kitabına cəlb etmək üçün cəmi üç abzas şans verilir, bu üç abzasda oxucunu maqnit kimi cəzb edə bilməyəcəksənsə, sənin kitabın oxunmayacaq!
“Ədəbiyyat və incəsənət”
(16.11.2023)
