Super User
Azərbaycan əhalisinin sayı 10 milyon 157 min 406 nəfərdir
Növbəti Açıq Portfel xəbərini “Ədəbiyyat və incəsənət” portalı Dövlət Statistika Komitəsinə istinadla bildirir. Azərbaycan əhalisinin sayı 10 milyon 157 min 406 nəfərə çatıb. Belə ki, əhalinin son siyahıyaalınmasının nəticəsi əsasında 2023-cü il avqust ayının 1-i vəziyyətinə hesablanmış əhalinin sayı 10 milyon 157 min 406 nəfər təşkil edib.
Qeyd edək ki, əhalinin ümumi sayında şəhər əhalisinin xüsusi çəkisi 54,6 faiz, kənd əhalisinin xüsusi çəkisi 45,4 faiz, kişilərin xüsusi çəkisi 49,8 faiz, qadınların xüsusi çəkisi isə 50,2 faiz olub.
“Ədəbiyyat və incəsənət”
(14.09.2023)
Hər gün xatırlayaq, unutmaq cinayətdir!
Kubra Quliyeva, “Ədəbiyyat və incəsənət”
Mən 10-cu sinifdə oxuyanda hərbi müəllimimiz bizə "genosid nədir?" deyə sual vermişdi. Sinifə çökən səssizliyi müəllimimiz pozub evdə genosidin nə olduğunu araşdırmağı bizə tapşırmışdı. Elə həmin gün evə gəlib Googledə genosid sözünün qarşılığını tapdım. Genosidə qarşı iki kəlmə soy və qırım.
Mənə görə bu qədər bəsit deyil. Bəzən sözlər yaşananların yanında çox cılız qalır. Elə 31 illik ağrısı olan Xocalı soyqırımı kimi. Biz gənc nəsil yaxın keçmişimizi hələ bizim yaşımızda ikən faciəylə üzləşən bir nəsildən öyrənirik. Məsələn, Xocalıdan çıxanda 17 yaşı olan Hüseyn dayı bir müxbirlə olan söhbəti əsnasında "mən ən çox samovardan qorxuram" demişdi. Müxbirin niyə sualına qan dondurucu şəkildə "Çünki onlar mənim 4 yaşlı bacımın belinə qaynayan samavarı bağlayıb yandırmışdılar və o, bizim evdə içdiyimiz sonuncu çay idi" deyərək boğazımızı düyünləmişdi. 36 yaşlı Aysel xanım var, o,soyqırımın ən körpə şahidlərindən biri kimi danışırdı:
-Xocalıdan çıxanda mənim cəmi 5 yaşım var idi, lakin o səhnələr gözümün önündən heç vaxt gedmir. Evə girən ermənilər əvvəl atamı güllələmiş, sonra birtəhər qaçmağa çalışan anamı və məni üzümüz gözümüz qan içində olana qədər döyüb tanınmaz hala salmışdılar. Anam oradan sağ çıxa bilməsə də məni döydükləri üçün öldü bilən ermənilər qarın üstündə buraxıb getmişdilər. Qonşumuz Firuzə xalanın yoldaşı tapmasa yəqin mən də anamla birgə yatırdım.
Bu hələ genosidin kadrlara alınan, yaşanmış həyat hekayələrinin kiçik bir parçasıdır. Hamilə qadının qarnını bıçaqla yarıb ərinin qabağında təcavüz edilməsi, meyidlərin ekspertizadan sonra ölü halda belə təcavüzə uğraması, körpələrin dərisinin soyulması, kişilərin gözləri önündə ailələrinə edilən işgəncələrə qarşı yaşadıqları izdirablar, qocaların tikə-tikə doğranması və daha saymağa gücümün yetmədiyi neçə-neçə vəhşətdən danışım sizə?
Hansı dərdimizə yanıb,hansı ağrımıza ağlayaq? Bir gecədə 7 min insan ölümü sadəcə rəqəmdən ibarət can itkisi deyil axı.
Qan qoxan torpağlarımızda neçə insanın taleyi məhv oldu. Neçə uşağı doğulmadan öldürdülər, neçə gənc qızın namusunu ləkələyib, neçə mərd kişinin qeyrətini məhv etdilər onlar.
Biz öz keçmişini unudan insanlar olmamalıyıq, bizə və əcdadlarımıza yaşadılanlara qarşı susmamalı, bir daha belə vəhşətlərlə üzləşməmək üçün, bir daha torpağlarımızın namus qanı qoxmaması üçün səsimizi duyurmalıyıq dünyaya. Çünki genosid sadəcə hərfi mənası soy qırım olan hadisə deyil. Genosid qan qoxan torpaqların altında yatan şəhidlərin harayıdır.
“Ədəbiyyat və incəsənət”
(14.09.2023)
“Maya” filmi Kiprdə nümayiş olunub
“Maya” filminin Kiprdə təqdimatı keçirilib.
Bu barədə “Ədəbiyyat və incəsənət” portalına filmin ssenari müəllifi və rejissoru, Azərbaycan Yazıçılar Birliyinin İdarə Heyətinin üzvü Xəyal Rza məlumat verib.
Qeyd edilib ki, təqdimat Şimali Kipr Türk Respublikasının Baş Nazirliyinin dəstəyi ilə, Turizm, Mədəniyyət, Gənclik və Ətraf Mühit Nazirliyi tərəfindən təşkil edilib.
Sentyabrın 8-də İsmet Vehit Güney Sənət Mərkəzində nazirliyin şöbə müdiri, şair-yazar Ceyhan Özyıldızın aparıcılığı ilə keçirilən “Maya” filminin təqdimatında respublika rəhbərliyi, deputatlar və sənət adamları iştirak ediblər.
Təqdimatda çıxış edən Şimali Kipr Türk Respublikası Prezidentinin katibliyinin rəisi Çağın Zort, Turizm, Mədəniyyət, Gənclik və Ətraf Mühit Nazirliyinin idarə rəisi Şirin Zaferyıldızı “Maya” filmindən təsirləndiklərini vurğulayaraq, Qarabağla Şimali Kiprin oxşar taleyindən söz açıblar.
Filmin ssenari müəllifi və rejissoru Xəyal Rza Qarabağın 30 illik işğal tarixi, 44 günlük İkinci Qarabağ müharibəsi və şanlı Zəfərimiz haqqında danışıb.
Qeyd edək ki, Beynəlxalq Türk Müəllifləri Birliyinin və “ES Baku”nun maliyyə dəstəyi ilə çəkilən, əzablı, iztirablı qadın taleyindən bəhs edən “Maya” filminin operatoru Rafiq Əliyev, bədii rəhbəri isə görkəmli kinorejissor, Xalq artisti Oktay Mir Qasımdır.
“Ədəbiyyat və incəsənət”
(14.09.2023)
Mədəniyyət naziri Adil Kərimli Arif Məlikovun Fəxri xiyabanda məzarını ziyarət etdi
Sentyabrın 13-də görkəmli bəstəkar, pedaqoq, SSRİ və Azərbaycanın Xalq artisti, Dövlət və Heydər Əliyev mükafatları laureatı, akademik Arif Məlikovun (1933-2019) anadan olmasının 90-cı ildönümü tamam oldu.
Bu münasibətlə mədəniyyət naziri Adil Kərimli, tanınmış mədəniyyət və incəsənət xadimləri, nazirliyin məsul əməkdaşları, sənətkarın ailə üzvləri və digər qonaqlar I Fəxri xiyabanda sənətkarın məzarını ziyarət edib, üzərinə tər çiçəklər düzdülər.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, anım mərasimində çıxış edən Adil Kərimli Arif Məlikovun bənzərsiz yaradıcılığı ilə adını əbədi olaraq musiqi mədəniyyəti tariximizə yazdırdığını dedi. Bildirdi ki, Ümummilli lider Heydər Əliyev bəstəkarın yaradıcılığını daim diqqətdə saxlayıb, yüksək qiymətləndirib. Prezident İlham Əliyev tərəfindən də Arif Məlikovun xatirəsinin əbədiləşdirilməsi, sənətinin yaşadılması və gələcək nəsillərə ötürülməsi istiqamətində davamlı işlər görülüb və görülməkdədir. Prezident İlham Əliyevin görkəmli bəstəkarın xatirəsinin əbədiləşdirilməsi ilə əlaqədar 2019-cu ildə imzaladığı sərəncam bu diqqətin parlaq təzahürüdür.
Nazir diqqətə çatdırdı ki, görkəmli bəstəkarın 90 illik yubileydə geniş şəkildə qeyd olunacaq. Birinci vitse-prezident Mehriban xanım Əliyevanın təşəbbüsü və rəhbəri olduğu Heydər Əliyev Fondunun dəstəyi ilə sənətkarın yubileyi həm də onun dünya klassik musiqisinin şah əsərlərindən sayılan “Məhəbbət əfsanəsi” baletinin yarım əsrdən sonra yenidən müəllifin vətənində səhnəyə qoyulması ilə əlamətdar olacaq. Dünyanın bir sıra böyük səhnələrini fəth edən bu möhtəşəm balet nümunəsi 18-19 sentyabr tarixlərində Üzeyir Hacıbəyli XV Beynəlxalq Musiqi Festivalı çərçivəsində Heydər Əliyev Sarayında nümayiş olunacaq.
Azərbaycan Bəstəkarlar İttifaqının sədri Xalq artisti Firəngiz Əlizadə dedi ki, Arif Məlikov görkəmli bəstəkar olmaqla yanaşı, həmçinin rəssam, pedaqoq və ictimai xadim idi: “Arif Məlikov SSRİ Ali Sovetinin deputatı kimi Azərbaycan xalqının haqq işinin dəstəklənməsinə də böyük töhfələr verib. Onun bütün janrlarda əsərləri var. Məni çox sevindirən odur ki, bu gün təhsil ocaqlarında Arif Məlikovun əsərləri tədris edilir. Arif Məlikov gözəl tələbələr yetişdirib, özündən sonra böyük irs qoyub”.
Ü.Hacıbəyli adına Bakı Musiqi Akademiyasının rektoru Xalq artisti Fərhad Bədəlbəyli vurğuladı ki, Arif Məlikov böyük bəstəkar olmaqla yanaşı, həm də böyük şəxsiyyət idi: “O, xasiyyətcə sərt adam idi, çox insan ona görə ondan inciyirdi. Amma o, həqiqətləri insanların üzünə deyirdi. Ümidvaram ki, onun yetirmələri balet janrını da davam etdirəcəklər”.
Xatırladaq ki, Arif Məlikov 1933-cü il sentyabrın 13-də Bakı şəhərində anadan olub. 1953-1958-ci illərdə Azərbaycan Dövlət Konservatoriyasında (indiki BMA) bəstəkarlıq ixtisası (Qara Qarayevin sinfi) üzrə təhsil alıb. 1960-cı illərdən bu tədris ocağında müəllim, 1979–1986-cı illərdə professor və 1986-cı ildən ömrünün sonunadək Bəstəkarlıq kafedrasının müdiri vəzifələrində çalışıb.
Arif Məlikovun simfoniya, balet, operetta, kantata, vokal, kamera və instrumental əsərlər misilsiz sənət nümunələri olaraq Azərbaycan musiqi xəzinəsinin qiymətli inciləri sırasında özünə daimi yer tutub. Bəstəkarın “Məhəbbət əfsanəsi” baletinin isə dünyanın tanınmış teatr səhnələrində yarım əsrdən artıq bir dövrdə tamaşaya qoyulması musiqi mədəniyyətimizin möhtəşəm nailiyyətlərindəndir.
Ölkəmizdə musiqiçi kadrların yetişdirilməsinə mühüm töhfələr verən görkəmli bəstəkar 2019-cu il mayın 9-da vəfat edib.
Ruhu şad olsun!
“Ədəbiyyat və incəsənət”
(14.09.2023)
Bir mahnının tarixçəsi: “Küçələrə su səpmişəm”
Heyran Zöhrabova, “Ədəbiyyat və incəsənət”
Küçələrə su səpmişəm,
Yar gələndə toz olmasın
Elə gəlsin, elə getsin,
Aralıqda söz olmasın.
Sevərək dinlədiyimiz elə mahnılar var ki, bir çoxumuz onların tarixçəsindən və ya ilk versiyalarından xəbərsizik.
Bu qəbildən olan mahnılardan biri də elə Rəşid Behbudovun ifasında məşhurluq qazanmış xalq mahnısı olan "Küçələrə su səpmişəm" mahnısıdır.
Hər dəfə bu mahnını haradasa eşidəndə Heydər Əliyevin ifası və ifa edərkən kövrələrək gözlərinin dolduğu epizodlar gəlir gözlərimin önünə. Və bir də Zərifə Əliyevanın büstü qarşısındakı o mənalı baxışları..
Amma kənardan hər nə qədər sevgi mahnısı kimi görünsə də əslində mahnının fərqli və çox maraqlı bir tarixçəsi var.
Mahnı əslində xalq tərəfindən Azərbaycana köməyə gəlmiş Qafqaz İslam ordusuna ithaf olunub.
Yazıçı Manaf Süleymanov yazır ki, xalq mahnısının sözləri Sovet dövründə redaktə olunub.
Deyilənə görə o illərdə Bakıda belə bir adət var imiş ki, su maşınları küçələri gəzir və həm tozu yatırmaq, həm də az da olsa sərinlik yaratmaq məqsədi ilə su səpirmiş.
Və o vahiməli günlərdə Bakını xilas etməyə gələn türk əsgərlərinin yolunu gözləyən insanlar onları qarşılayarkən bu mahnını belə oxuyurlarmış.
Küçələrə su səpmişəm
Türk gələndə toz olmasın.
Elə gəlsin, elə getsin,
Aramızda söz olmasın.
Təhminə:
- "Küçələrə su səpmişəm, yar gələndə toz olmasın". Gör necə sevirlərmiş bir vaxtlar... Məsələn, sən mən keçən küçələrə heç su səpərsənmi, toz olmasın deyə?
Zaur:
- Bakıda mümkün deyil bu, küçənin bir başına su səpənəcən xəzri o biri başını toza qərq eləyəcək.
Təhminə:
- Eh, ruhun yoxdur sənin.
“Təhminə və Zaur” filmindən.
Xoş dinləmələr
https://youtu.be/jLzrdogPDqg?si=APVwNr080KYguoGa
“Ədəbiyyat və incəsənət”
(14.09.2023)
Milli Məclisin Mədəniyyət Komitəsində görüş olub
Milli Məclisin Mədəniyyət Komitəsinin sədri Qənirə Paşayeva Azərbaycan Respublikasının Əməkdar jurnalisti, İctimai Televiziya və Radio Yayımları Şirkəti Yayım Şurası və Mətbuat Şurası İdarə Heyətinin üzvü Azər Həsrətlə və onun xanımı – Bakı şəhərindəki 3 saylı tam orta məktəbin direktoru, Əməkdar müəllim Almaz Həsrətlə görüşüb.
“Ədəbiyyat və incəsənət” portalı xəbər verir ki, Milli Məclisdə keçirilən görüşdə Əməkdar jurnalisti 55, Əməkdar müəllimi 50 illik yubileyləri münasibəti təbrik edən Komitə sədri onların öz fəaliyyət sahələrində əldə etdikləri uğurları vurğulayıb, yeni uğurlar arzulayıb.
Azər Həsrət və Almaz Həsrət yaradıcılıqdakı yeni uğurlarını və planlarını Qənirə Paşayeva ilə bölüşüblər, Azərbaycan həqiqətlərinin beynəlxalq ictimaiyyətə peşəkarcasına çatdırılması, gənc nəslin mədəni irsə dərindən vaqif olması və İKT-nin az qala bütün əməli fəaliyyət sahələrinə tətbiqinin yaratdığı yeni gerçəkliklərlə bağlı önəmli məqamlara vurğu ediblər.
2023-cü ilin Respublikamızda Heydər Əliyev İli olduğu, eləcə də Şuşa şəhərinin bu il Türk Dünyasının Mədəniyyət Paytaxtı statusunu daşıdığını deyən Komitə sədri, bu önəmli hadisələrin hər bir Azərbaycan aydınının üzərinə özünəxas mənəvi məsuliyyət gətirdiyini söyləyib.
Yüksək fəxri ad daşıyan Azər və Almaz Həsrətləri əlamətdar yubileyləri münasibəti ilə bir daha təbrik edən Komitə sədri, onlara Qarabağ motivli xatirə hədiyyələri və Təbrik məktubları təqdim edib.
Təbrik məktublarında müvafiq olaraq, Azər Həsrətin jurnalistikada, ictimai fəaliyyətdə, o cümlədən Azərbaycan həqiqətlərinin beynəlxalq ictimaiyyətə çatdırılması işində, Almaz Həsrətin gənc nəslin təlim-tərbiyəsində, pedaqoji, elmi və jurnalist fəaliyyətində xidmətləri xatırlanıb.
Azər Həsrət və Almaz Həsrət görüş, təbrik və yüksək diqqət üçün Komitə sədrinə təşəkkür ediblər.
“Ədəbiyyat və incəsənət”
(14.09.2023)
TÜRKDİLLİ XALQLARI TANIYAQ LAYİHƏSİ - Çuvaş Ədəbiyyatı
Leyla Səfərova, “Ədəbiyyat və incəsənət”
Çuvaş adı ilk dəfə 16-cı əsrdə rus salnamələrində çəkilib. Knyaz Andrey Mixayloviç Kurbskiy 1551-ci ildə Kazana etdiyi səfəri ilə bağlı qeydlərində Çuvaş xalqının adını çəkib. Bu səbəblə Çuvaş adının kökünün hardan gəldiyi mövzusunda araşdırmaçılar ortaq məxrəcə gələ bilməyib. 18-ci əsrə kimi çuvaşların özlərinin yazılı ədəbiyyatı olmayıb.
Çuvaşların dini rәsmi olaraq Xristianlıqdır, ancaq İslam dinini qəbul edənlər də vardır. Bu iki dini qəbul edənlər olsa da qədim Tanrıçılıq inamı hələ də onların içində yaşayır. Bu inamda olanlar özlərini Xristian və Müsəlman çuvaşlardan ayrı tuturlar. Çuvaş şifahi xalq ədəbiyyatı Yumax (nağıl), Yuri (mahnı), Vak Janr (Kiçik növ), Aça-Piça Simaxisem (Oğul-Uşaq Sözü “Laylalar, oyun mahnıları, tapmacalar, yanıltmaclar, qısa heyvan nağılları”), Mifsempe Halapse (Miflərlə hekayələr) şəklində təsnif edilib.
Çuvaş dastanları ümumiyyətlə Ulip (alp) motivi ətrafında inkişaf edən və digər Türk dastanlarında rastlanan motivlərlə eynilik göstərən yarı dastan, yarı əfsanə özəlliklərini özündə nümayiş etdirir. Bu dastanlarda Oğuz Xaqan və Dədə Qorqud dastanları ilə digər Türk dastanlarının epizodlarına rastlanır.
Çuvaşların nağılları da digər türk xalqlarının nağılları ilə oxşardır. Anadoluda çox sevilən “Kəl Oğlan” (Keçəl) nağılı Çuvaş nağılları arasındadır. Bu nağılın Çuvaşca adı “Kukşa İvan”dır. Oğlan sözü Çuvaşcada olmadığına görə “oğlan” əvəzinə “İvan” adını işlədiblər. Çuvaş əfsanələri qədim Türk inamının özülündə yüksəlib. Lətifələri də Molla Nəsrəddin lətifələrinə oxşayır.
Çuvaşların duaları bu cür qruplaşdırılır:
1-Ovsunçuluqda işlәdilәn vә xәstәlәri sağaltmaq mәqsәdi ilә söylәnәn dualar;
2-Gözәgörünmәyәn güclәrdәn yardım üçün söylәnәn dualar;
3-Nәsihәt verәn dualar.
“Ədəbiyyat və incəsənət”
(13.09.2023)
13 sentyabr - ən yağıntılı gün
Milli Hidrometeorologiya Xidmətinin məlumatına görə sentyabrın 13-ü gecədən səhərədək bütün ölkə boyu yağıntı müşahidə edilib, şimşək çaxıb, arabir leysan xarakterli yağış yağıb. Bəzi yerlərdə yağıntılar intensiv və güclü olub. Şahdağda 2 min 750 metr hündürlüyə qar da yağıb.
Qəbələdə yağıntının miqdarı 57 millimetrə çatıb ki, bu da aylıq normanın tam 73 faizi deməkdir. Göygöldə isə hətta aylıq normanın 108! faizi qədər yağıntı olub.
İndisə gəlin yağıntının miqdarı cədvəlinə nəzər yetirək:
Qəbələdə 57;
Göyçayda 41;
İsmayıllıda 40;
Qaxda 39;
Şəkidə 37,
Şahdağda 31,
Oğuzda 27,
Qobustanda 25;
Xaltanda 24;
Kürdəmirdə 23;
İmişlidə 23;
Qrızda 21;
Zərdabda 20;
Sabirabadda 19;
Biləsuvarda 17;
Ağsuda 16;
Ağdamda 16;
Lənkəranda 14;
Şamaxıda 13;
Bakıda 12;
Altıağac,
Balakən,
Naxçıvan,
Yevlax,
Quba,
Ordubad,
Tərtər,
Şabran,
Sədərək,
Şərur,
Mingəçevir,
Gədəbəy,
Şəmkir,
Beyləqan,
Neftçala,
Yardımlı,
Qusar,
Şahbuz,
Tovuz,
Lerik,
Ağstafa,
Gəncə,
Naftalan,
Daşkəsən,
Bərdədə - hər birində 10,
Sumqayıtda 3.
İntensiv yağışlar nəticəsində sentyabrın 13-ü saat 8 radələrində Qəbələ rayonu ərazisindən keçən Dəmiraparançay və Şəki rayonu ərazisində keçən Damarçın çayından sel keçib.
Gəncə, Daşkəsən, Göygöl, Naftalan, Şəmkir, Oğuz, Şamaxı, Qrız, Şəki, Balakən, Lerikdə duman müşahidə olunub. Dumanda görmə 50-500 metrədək məhdudlaşıb.
Ölkə ərazisində müşahidə olunan qeyri-sabit, yağıntılı hava şəraitinin sentyabrın 14-ü gündüz saatlarından tədricən kəsiləcəyi gözlənilir.
“Ədəbiyyat və incəsənət”
(13.09.2023)
Əsrin oğurluğunun üstü açıldı - Van Qoqun oğurlanmış rəsmi tapıldı
Üç il bundan əvvəl Almaniyanın Amsterdam şəhərində yerləşən Singer Laren muzeyindən bir rəsm əsəri oğurlandı. Özü də adi rəsm yox, əsl antikvariat.
İncəsənət tarixinin ən görkəmli simalarından olan niderland rəssam Vinsent Van Qoqa məxsus olan oğurlanmış həmin rəsm əsəri öz doğma vətənində - Niderlandda tapılıb.
Bu barədə “Ədəbiyyat və incəsənət” portalı TASS agentliyinə istinadla xəbər verir.
Van Qoqun “The Parsonage Garden at Nuenen” əsəri məşhur dedektiv Artur Brand və Niderland polisinin birgə səyi nəticəsində aşkarlanıb.
Rəsm əsərinin dəyəri 3-6 milyon avro aralığında qiymətləndirilir.
Bu xəbər günün ən çox oxunan mədıniyyət xəbəridir.
“Ədəbiyyat və incəsənət”
(13.09.2023)
“Anam kəlağayılı bir muğamıydı...”
“Mirvarid Dilbazi Poeziya Məclisi” İctimai Birliyi qədim milli-mənəvi dəyərlərimizdən olan- Azərbaycan kəlağayısının təbliği ilə bağlı bu günlərdə nənələrimizin, qız-gəlinlərimizin ismət, gözəllik, yaraşıq rəmzi kəlağayını vəsf edən şeir, hekayə, elmi və publisistik yazılar toplanmış “Anam kəlağayılı bir muğamıydı...” adlı yeni kitab nəşr etdirib.
İctimai Birlikdən aldığımız məlumata görə, “Elm və təhsil” nəşriyyatında nəfis formada nəşr olunan bu kitabın redaktoru Güllü Eldar Tomarlı, tərtibçi Vüsal Sehranoğludur. Üz qabığındakı “Kəlağayılı Azərbaycan qadını” rəsm əsərinin müəllifi isə rəssam Gülnarə Məmmədlidir.
Kitabdakı bədii nümunələrdə, məqalələrdə kəlağayının tarixi, istehsal prosesi, mərkəzləri, kəlağayının ayrı-ayrı formaları, naxış və ornamentlərin dili və ötürdüyü zəngin informasiya haqqında bilgilər verilib, kitabda rəssam Gülnarə Məmmədlinin kəlağayıya aid rəsm əsərlərinə də yer verilib.
Kitabın adı Xalq şairi Nəriman Həsənzadənin şeirindən götürülüb.
“Anam kəlağayılı bir muğamıydı...” kitabı 26 noyabr “Azərbaycan Kəlağayısı Günü”nə “Mirvarid Dilbazi Poeziya Məclisi”nin töhfəsidir.
“Ədəbiyyat və incəsənət”
(13.09.2023)
