Azərbaycanın turizm imkanlarının nümayiş etdirilməsi məqsədilə Azərbaycan Turizm Bürosu yerli turizm tərəfdaşları ilə birgə Özbəkistanın paytaxtı Daşkənd şəhərində “İpək Yolu üzərində turizm” mövzusuna həsr edilmiş Daşkənd Beynəlxalq Turizm Sərgisində (TIFF) təmsil olunur.

Dövlət Turizm Agentliyindən AzərTAC-a bildirilib ki, milli stenddə ölkəmizi ümumilikdə 7 yerli turizm sənayesi tərəfdaşı təmsil edir.

Sərgi ziyarətçilərinə Azərbaycanın tarixi, mədəni irsi, milli mətbəx nümunələri, dağ-xizək mərkəzləri, şərabçılıq, sağlamlıq və qış turizmi imkanları haqqında ətraflı məlumat verilir, xarici turizm sənayesi nümayəndələri ilə B2B formatlı görüşlər keçirilir.

Sərgi çərçivəsində keçirilən sessiya zamanı Dövlət Turizm Agentliyinin sədrinin müşaviri Kənan Quluzadə İpək Yolunun turizm məhsuluna çevrilməsinin əhəmiyyətindən bəhs edən təqdimatla çıxış edib.

Daşkənd Beynəlxalq Turizm Sərgisi (TIFF) Özbəkistan və Mərkəzi Asiya regionunda turizm sənayesinin əlamətdar tədbirlərindən biri hesab olunur.

Noyabrın 17-dək davam edəcək sərgiyə 1500 iştirakçının, dünyanın bir sıra ölkələrindən 15 mindən çox ziyarətçi və turizm sənayesi nümayəndəsinin qatılacağı gözlənilir.

Qeyd edək ki, 2023-cü ilin yanvar-oktyabr dövrü ərzində Özbəkistandan Azərbaycana səfər edənlərin sayı 31 416 nəfər təşkil edib ki, bu da ötən ilin eyni dövrü ilə müqayisədə 52 faiz artımdır.

Ümumilikdə cari ilin yanvar-oktyabr dövründə Mərkəzi Asiya regionundan Azərbaycana səfər edən 108 516 nəfər qeydə alınıb və bu, ötən ilin eyni dövrünə nisbətdə 85 faiz artımdır.

“Ədəbiyyat və incəsənət”

(17.11.2023)