Super User
Cənnətin itirilmiş xəritəsi - “Sən yaşadığın həyat deyilsən, sən yaşatdığın həyatsan”
Heyran Zöhrabova, "Ədəbiyyat və incəsənət"
“Həyatım palçıqdan və dərinlikdən ibarət idi, amma mən o qaranlıq suların bir parçası deyildim. O suların içində bir varlıq idim."
(Mən Kirke, Madeline Miller)
Bir insanın kimliyini onun irqi, rəngi, milliyyəti, mənsub olduğu ailə və ya yaşadığı sosial mühit deyil, onun xarakteri, davranışları, həyata, insanlara baxışı, düşüncələri, dəyərləri və gördüyü işlər təyin edir.
Əziz oxucu, sən ağ və ya qara dərili, qara və ya rəngli gözlü, sarışın və ya əsmər ola bilərsən.
Sən əzab-əziyyətlərlə dolu çətin bir həyat yaşaya bilərsən, sən pis bir ailədə böyümüş də ola bilərsən, sən ədalətsiz bir cəmiyyətin içində bir fərd də ola bilərsən.
Bəli, nə ağın qaradan, nə də qaranın ağdan heç bir üstünlüyünün olmadığı bu qoca dünyada biz bəlkə gələcəkdə etiqad edəcəyimiz dini, yaşayacağımız yeri özümüz seçə bilərik, amma biz irqimizi, rəngimizi milliyyətimizi, harda və necə bir mühitdə doğulacağımızı özümüz seçə bilmirik.
Amma bütün bunlara rəğmən unutmamağın lazım olan çox vacib bir nuans var ki, bu gün sənə onu xatırlatmaq üçün yazıram bu xitabı.
Əziz oxucu, səni sən edən nə sənin cismin, nə də bu yaşadığın həyat deyil, çünki içində var olduğun bu həyatı sən seçməmisən.
Səni sən edən və eyni zamanda da səni yaxşı və yaxud da pis bir insan edən sənin ruhun, öz şəxsi xarakterin, şəxsi düşüncə və dəyərlərin, həyata, insanlara baxış tərzin, münasibətin, davranışların və gördüyün işlərdir.
Düzdür, insanın necə formalaşmasına içində var olduğu həyat və cəmiyyət də təsir göstərə bilir, məhz elə bunun üçün də iradəli ol və hər zaman çalış ki, yaşadığın həyat sənin mənən gözəl bir insan kimi formalaşmağına mane ola bilməsin.
Və eyni zamanda da yaşadığın həyat sənin ümidsizliyə qapılmağına da səbəb olmasın.
Çünki sən yaşadığın həyat deyilsən, sən yaşatdığın həyatsan.
Səni sən edən bu çirkin və ədalətsiz mühitdə var olmağın deyil, səni sən edən bu çirkin və ədalətsiz mühitdə ədalətli və gözəl qala bilməyindir.
Səni sən edən bir pişiyin başını sığallamağın, yaşlı bir insana yolu keçməkdə, ağır yükləri olan birinə o yükləri daşımaqda kömək etməyin, kiçik bir uşağın simasındakı qəlbdən gələn gerçək bir təbəssüm olmağı bacarmağındır.
Səni sən edən təbiəti zibilləyən bir cəmiyyətin içində var olmağın deyil, səni sən edən təbiəti zibilləyən bir cəmiyyətin içində bir zibil qabı tapana qədər zibili əlində daşımağındır.
Səni sən edən hər şey və hər kəsdə bir qüsur axtaran insan toplumunun içində var olmağın deyil, səni sən edən hər şeydə bir qüsur axtaran bu insan toplumunda hər şeyə ayn -ür rıza (qədim osmanlıcada qüsur görmədən məhəbbətlə baxan gözlər deməkdir) ilə baxa bilməyindir.
Səni sən edən gücünü qadına, uşağa fiziki və psixoloji şiddət göstərərək nümayiş etdirdiyini düşünənlərlə eyni dünyada yaşamağın deyil, səni sən edən belə bir dünyada gücünü hər zaman qadınları və uşaqları qoruyub, dəstək olmağınla göstərməyindir. Qadına zəif deyənlərin içində qadına zərif davranmağındır səni sən edən.
Bəli, əziz oxucu, öz əlində olmayan səbəblərdən ötrü mühakimə olunan insanlara qarşı ön yarqılı olmayıb, almanların yəhudiləri konsentrasiya düşərgəsində həbs etdiyi kimi, cəmiyyətin də bizi həbs etdiyi irq, rəng və s. kimi qəlibləri sındırıb çıxaraq kim olduğunu öz düşüncələrinlə, hadisələrə, insanlara olan münasibətinlə və gördüyün işlərlə özün seçərək, özün təyin et.
Özünə inanaraq, ümid edərək çalış və öz həyatını özün qur.
Gözəllik və fərqliliyi xarici görünüşdə, gücü şiddətdə, hörməti nüfuzda, əsaləti ailə və sosial mühitdə, müasirlik və sərbəstliyi göstərişdə görən bir insan toplumunun içində, sən gözəllik və fərqi ruhun, gücü qoruyub qollamağın, dəstək olmağın, hörməti təvazükarlığın, əsaləti xarakterin, müasirlik və sərbəstliyi isə elm və əxlaqınla yansıt.
“Ədəbiyyat və incəsənət”
(19.10.2023)
Azərbaycanın turizm imkanlarının təbliği məqsədilə Hindistanda silsilə tədbirlərə başlanılıb
Azərbaycanın turizm destinasiyası olaraq təbliği məqsədilə oktyabrın 16-da Hindistanın Nyu-Delhi şəhərində seminar keçirilib.
Dövlət Turizm Agentliyinin yaydığı məlumata görə, 50-dək turizm agenti və turoperatorun iştirak etdiyi seminarın əsas məqsədi Azərbaycanın turizm imkanlarını nümayiş etdirmək və Hindistan turizm sənayesinin Azərbaycan haqqında məlumatlığını artırmaqdır.
Seminar çərçivəsində Azərbaycan turizminə həsr olunmuş ətraflı təqdimat və videoçarxlar nümayiş etdirilib, ölkəmizin istirahət turizmi və işgüzar tədbirlərin təşkili üzrə potensialı təqdim edilib.
Seminarın sonunda interaktiv sual-cavab sessiyası təşkil olunub, iştirakçıların sualları cavablandırılıb.
Təbliğat tədbirləri oktyabrın 18-də Banqalor, ayın 28-də isə Mumbay şəhərində davam etdiriləcək.
Qeyd edək ki, 2023-cü ilin yanvar-sentyabr dövründə Hindistandan Azərbaycana səfər edənlərin sayı 77 min 379 nəfər təşkil edib. Bu da ötən ilin eyni dövrü ilə müqayisədə 115 faiz artımdır.
“Ədəbiyyat və incəsənət”
(18.10.2023)
Günün fotosu: Avropa müharibəyəmi hazırlaşır?
Günün fotosu: Avropa müharibəyəmi hazırlaşır?
Rubrikanı Kənan Məmmədli aparır
Bu həftə 2800-ə yaxın hərbi qulluqçu NATO blokunun xaricdəki çoxsaylı böhranlara tez cavab vermək qabiliyyətini artırmaq üçün NATO-nun rəhbərliyi altında deyil, Avropa Birliyi çərçivəsində tarixdə ilk hərbi manevrlərdə iştirak edir.
Manevrlər İspaniyada keçirilir.
Avropa müharibəyəmi hazırlaşır?
Foto: AP
“Ədəbiyyat və incəsənət”
(18.10.2023)
“Hər gün bir yeni şeir” rubrikasında “Yorğunluq”
“Ədəbiyyat və incəsənət”dəki bugünkü yeni şeir payınız gözəl şairimiz Əlizadə Nuridən gəlir. Şeir “Yorğunluq” adlanır.
Allah göydə deyilsə,
O göy kimin göyüdü?
Harda körpə dərd qalıb
Mənə verin, böyüdüm...
Gülə güllə atdılar,
Dik tutmuşdu başını.
Bu yağışdı, yoxsa ki,
Göy üzündə vurulmuş
Quşların göz yaşıdı?!
Hər yanımı qan tutub-
Mən də belə adayam.
Get, o bayquşdan soruş
Hansı xarabadayam...
Bir kor adam kimiyəm-
Mən gəzim, sən it indi...
...Səni tapa bilmədim,
Əlimi də itirdim.
Sən nə yaman dərindin-
Sevib də batdım səni...
...Ölüm, məni bağışla,
Bir az yubatdım səni.
Qəmlə əylənirəm mən,
Bəs hanı tay-tuşlarım?
...Bu gün süfrə açmışam:-
Çağırın ac quşları...
Ölü balıqlar düşür ,
Atdığım hər qırmağa.
Çox soyuqdu...gedirəm
Allaha sarılmağa...
“Ədəbiyyat və incəsənət”
(18.10.2023)
Türk dünyasının I-ci Beynəlxalq Mədəniyyət Forumuna “Simurq” Mədəniyyət Assosiasiyasının təklifləri
Bildiyiniz kimi, oktyabrın 13-14 tarixlərində Türk dünyasının mədəniyyət paytaxtı Şuşa şəhərində Türk dünyasının I-ci Beynəlxalq Mədəniyyət Forumu keçirilib. Forumda “Simqurq” Mədəniyyət Assosiasiyasının Prezidenti, professor Fuad Məmmədov da iştirak edib.
“Ədəbiyyat və incəsənət” portalınln əməkdaşı Fuad Məmmədovdan forumla bağlı təəssüratlarını alarkən Fuad müəllim hazırladıqları və irəli sürdükləri Təklifə diqqət yönəldərək söyləyib:
-Türk dünyasının mədəni paytaxtı Şuşa şəhərində, 13-14 oktyabr 2023-cü il tarixində keçirilmiş Türk dünyasının I-ci Beynəlxalq Mədəniyyət Forumunda Türk dünyasına daxil olan xalqların həyat qabliyyətinin, dövlətlərin isə qüdrətinin artırılması naminə Türksoy Beynəlxalq Akademiyasının prezidenti, akademik Şahin Mustafayevin sədrliyi ilə keçirilmiş dəyirmi masada Forumun Deklarasiyasına daxil etmək üçün “Simurq” AMA tərəfindən iki innovativ kulturoloji təkliflər irəli sürüldü:
Birincisi - Mustafa Kamal paşa Atatürkün və Azərbaycan xalqının Ümummilli lideri Heydər Əliyevin mədəniyyətin inkişafına verdikləri qiymətə əsaslanaraq, Türksoylu xalqların və dövlətlərin XXI-ci əsrdə milli maraqları və zamanın çağırışlarına cavab olaraq həmin ölkələrdə elm, təhsil və maarifın daxil olunması şərti ilə mədəniyyət analayışı, insanın ağlı, qəlbi və əməyi vasitəsi ilə yaranmış, çoxşaxəli sosial fenomen kimi qiymətləndirilsin və Türksoyun inkişaf konsepsiyasında nəzərə alınsın.
İkincisi - insan kapitalının, davamlı, rəqabətqabliyyətli və təhlükəsiz inkişafın yenidən hasil edilən strateji resursu və aparıcı qüvvəsi olan - yüksəkmədəniyyətli insanın formalaşdırılması, inkişafı və kamilləşməsini XXI əsrdə Türk dünyasının ümdə məqsədi kimi qəbul olunması tövsiyə olunsun.
Fuad Məmmədov onu da qeyd edib ki, AMEA-nın prezidenti, akademik İsa Həbibbəylinin elmin və təhsilin də mədəniyyətın tərkib hissəsi kimi Forumda irəli sürdüyü fikri də bu innovativ təkliflərə dəstək kimi qiymətləndirilə bilər. Türkiyədən və Orta Asiya türk dövlələrindən olan, dəyirmi masanın bir sıra iştirakçıları da bu təklifi bəyəniblər.
“Ədəbiyyat və incəsənət”
(18.10.2023)
Füzuli Şəhəri Günü təntənəli şəkildə qeyd olunub
Prezident İlham Əliyevin 31 iyul 2023-cü il tarixdə imzaladığı sərəncamla Azərbaycan Respublikasının işğaldan azad edilmiş əraziləri üzrə şəhər günləri təsis edilib. Sərəncama əsasən, 17 oktyabr Füzuli Şəhəri Günüdür.
Bu münasibətlə Heydər Əliyev Fondu, Mədəniyyət Nazirliyi və Azərbaycan Respublikası Prezidentinin Qarabağ iqtisadi rayonunda xüsusi nümayəndəliyinin birgə təşkilatçılığı ilə oktyabrın 17-də Füzulidə təntənəli şəhər günü tədbiri keçirilib.
“Ədəbiyyat və incəsənət” portalı Mədəniyyət Nazirliyinə istinadən xəbər verir ku, tədbirdə dövlət və hökumət rəsmiləri, millət vəkilləri, diplomatik korpusun nümayəndələri və digər qonaqlar iştirak ediblər.
Azərbaycan Respublikasının Prezidenti İlham Əliyev Füzuli Şəhəri Günündə bu ilin avqustundan doğma yurdlarına qayıtmış bir qrup Füzuli sakini ilə görüşüb səmimi söhbət edib.
Sonra Füzuli Şəhəri Gününün geniş qala-konserti təqdim edilib. Tanınmış incəsənət ustalarının ifasında xalq və bəstəkar mahnıları səsləndirilib.
Dahi Azərbaycan şairi Məhəmməd Füzuliyə həsr olunmuş “Vətənimdir, vətənimdir, vətənimdir, vətənim!”, “Ümummilli lider Heydər Əliyev və Füzuli”, “Füzuli rayonu – işğaldan öncə və işğaldan sonra” adlı, həmçinin Füzuli ərazisindəki Yedditəpə kurqanları arxeoloji abidəsindən aşkar edilmiş maddi mədəniyyət nümunələrinin yer aldığı sərgilərlə tanışlıq olub.
Daha sonra qonaqlar "Füzuli" guşəsinə baş çəkiblər. Burada Məhəmməd Füzulinin müxtəlif əsərləri əsasında hazırlanmış kompozisiyalar nümayiş olunub, şairin şeirləri səsləndirilib. Rəssam tərəfindən dahi şairin portreti yaradılıb.
Tədbir məkanında "100 tar" adlı kompozisiya təqdim olunub. Ustad tarzənlər, uşaq, yeniyetmə və gənclərdən ibarət 100 nəfər tarzənin ifası maraqla qarşılanıb.
Sonra tədbir iştirakçıları və qonaqlar Azərbaycan milli mətbəx nümunələrini dadıblar.
“Ədəbiyyat və incəsənət”
(18.10.2023)
Müstəqilliyimiz dönməzdir, əbədidir!
Gənclər Kitabxanasında Müstəqilliyin Bərpası Günü ilə əlaqədar silsilə materiallar hazırlanıb
Bəli, qeyd etdik ki, 18 Oktyabr - Müstəqilliyin Bərpası Günüdür. Və bu əlamətdar gün münasibətilə Cəfər Cabbarlı adına Respublika Gənclər Kitabxanasında silsilə materiallar - videomaterial, virtual və ənənəvi kitab sərgisi hazırlanıb.
“Ədəbiyyat və incəsənət” portalının Kitabxanadan aldığı məlumata görə, hazırlanan materiallarda Azərbaycan dövlətçiliyinin müstəqillik tarixi, qurucuları haqqında məlumat verilib.
Burada müstəqilliyin ilk illərində respublikanın ictimai-siyasi fəaliyyətini əks etdirən məlumatlar, maraqlı faktlar, sənədlər, foto və videogörüntülər də təqdim edilib.
Virtual kitab sərgisində Ulu Öndər Heydər Əliyevin Azərbaycan dövlətçiliyi, müstəqillik, onun mahiyyəti, insan həyatında daşıdığı müstəsna əhəmiyyət haqqında söylədiyi dəyərli fikirlər, tövsiyələr yer alıb. Materiallarda Prezident İlham Əliyevin rəhbərliyi altında müstəqilliyini qoruyub saxlayan, günü-gündən daha da güclənən, beynəlxalq siyasi arenada müstəsna nüfuza malik olan Azərbaycan dövlətinin Şanlı qələbəsini, Zəfər tarixini əks etdirən məlumatlar da təqdim edilib. Virtual kitab sərgisində Ali Baş Komandan İlham Əliyevin Prezident seçilməsinin 20-ci ildönümündə Xankəndi şəhərində söylədiyi tarixi çıxışın görüntüləri də yer alıb.
18 Oktyabr - Müstəqilliyin Bərpası Günü ilə əlaqədar hazırlanan virtual kitab sərgisində “İlham Əliyev. İnkişaf - məqsədimizdir”, “Heydər Əliyev. Müstəqilliyimiz əbədidir”, “Müstəqillik yollarında: liderlik missiyası”, “Heydər Əliyev irsində Azərbaycan tarixi məsələləri”, “Müstəqil Azərbaycan dövlətinin qurucusu” kimi 20-ə yaxın kitabın biblioqrafik təsviri və qısa annotasiyası təqdim edilib.
18 Oktyabr - Müstəqilliyin Bərpası Günü ilə əlaqədar hazırlanan materiallar kitabxananın rəsmi saytında yerləşdirilib.
Müstəqilliyimiz dönməzdir, əbədidir!
“Ədəbiyyat və incəsənət”
(18.10.2023)
18 OKTYABR — MÜSTƏQİLLİYİN BƏRPASI GÜNÜDÜR
Uzaq tarix bir yana, bəs yaxın tariximizi bilirikmi?
Bu gün hansı gündür?
“Ədəbiyyat və incəsənət” portalı sizi 32 il öncəyə bir fikir səyahətinə dəvət edir.
XX yüzilliyin sonlarında Sovetlər Birliyinin süquta uğraması ilə yaranan əlverişli tarixi şərait və taleyin bəxş etdiyi imkan nəticəsində Azərbaycan xalqı XX yüzillikdə ikinci dəfə müstəqillik bayrağını qaldırdı. Bu, xalqımızın siyasi tarixində XX əsrdəki ikinci parlaq qələbəsi idi.
Rusiyada demokratik qüvvələrin fəaliyyəti nəticəsində respublikalarda da mərkəzdən qaçma, öz suverenliyinə qovuşmaq istəkləri qarşısıalınmaz həddə çatdı. Belə şəraitdə Azərbaycan Respublikası Ali Sovetinin xalqın tələbi ilə çağırılmış növbədənkənar sessiyasında 1991-ci il avqustun 30-da Azərbaycan Respublikasının dövlət müstəqilliyini bərpa etmək haqqında bəyannamə qəbul edildi.
(Bu başqa məsələdir ki, həmin bəyannaməyə kimlər qol çəkmədi. Hələ də onların bəzisi siyasi elitada təmsil olunur)
Azərbaycan Respublikasının Ali Sovetinin həmin ilin 18 oktyabr tarixli sessiyasında "Azərbaycan Respublikasının Dövlət müstəqilliyi haqqında" Konstitusiya Aktı yekdilliklə qəbul edildi.
Azərbaycan Respublikasında dekabrın 29-da ümumxalq səsverməsi keçirildi. Referendum bülleteninə bir sual yazılmışdı: "Siz "Azərbaycan Respublikasının dövlət müstəqilliyi haqqında" Azərbaycan Respublikası Ali Sovetinin qəbul etdiyi Konstitusiya Aktına tərəfdarsınızmı?"
Azərbaycan xalqı yekdilliklə respublikanın dövlət müstəqilliyinə tərəfdar çıxdı.
1992-ci ilin mayında Milli Məclis tərəfindən Azərbaycan Respublikasının Dövlət himni (musiqisi Üzeyir Hacıbəyovun, sözləri Əhməd Cavadın), az sonra üçrəngli bayraq, içində alov olan səkkiz guşəli ulduz təsvirli dövlət gerbi təsdiq edildi.
1991-ci il oktyabrın 18-dən Azərbaycan istiqlal, suveren bir ölkədir və xalq bunu bir bayram kimi qeyd edir.
Yəni, 1918-ci ilin 28 mayını 1991-ci ilin 18 oktyabrı geri qaytarıb.
“Ədəbiyyat və incəsənət”
(18.10.2023)
Lənkəran Teatrı Bakıda “Qonaq Teatr” layihəsi çərçivəsində “Cəmilə” tamaşasını təqdim edib
Mədəniyyət Nazirliyi və Azərbaycan Teatr Xadimləri İttifaqının “Qonaq Teatr” layihəsi çərçivəsində Lənkəran Dövlət Dram Teatrı “Cəmilə” (Çingiz Aytmatov) romantik dramını tamaşaçılara təqdim edib.
Teatrdan verilən məlumata görə, tamaşa Lənkəran Dövlət Dram Teatrının bərpasının 50 illiyi münasibətilə nümayiş olunub.
Teatr Xadimləri İttifaqının böyük səhnəsində göstərilən tamaşada müharibənin insanların taleyinə vurduğu zərbələrdən bəhs olunur. Tamaşanın quruluşçu rejissoru İmran Ali Qurban, quruluşçu rəssamı Tərlan Sadıqov, bəstəkarı Azər Hacıəsgərlidir.
Tamaşadan əvvəl Azərbaycan Teatr Xadimləri İttifaqı sədrinin vəzifə səlahiyyətlərini icra edən Xalq artisti, Dövlət mükafatı laureatı Hacı İsmayılov Xankəndində Azərbaycan bayrağının ucaldılması münasibətilə hamını təbrik edib.
Hacı İsmayılov teatrın keçdiyi zəngin inkişaf yolundan söz açıb. Qeyd edib ki, repertuarında Azərbaycan və dünya dramaturgiyasının klassik və müasir nümunələrinin yer aldığı Lənkəran Teatrı bu gün də fəaliyyətini davam etdirir, Azərbaycanda və onun hüdudlarından kənarda qastrol səfərlərində olur, bir çox beynəlxalq teatr festivallarında ölkəmizi uğurla təmsil edir.
Azərbaycan səhnəsinə maraqlı tamaşalar bəxş edən Lənkəran Dövlət Dram Teatrının kollektivinə uğurlar arzulayan Hacı İsmayılov milli teatr sənətinin inkişafındakı xidmətlərinə görə və bərpasının 50 illiyi münasibətilə teatrı İttifaqın Fəxri fərmanı ilə təltif edib.
Tədbirdə, həmçinin teatrın bərpasında xüsusi xidmətləri olan aktyorlar - Xalq artisti Qabil Quliyev Fəxri fərmanla, Xalq artisti Böyükxanım Əliyeva və aktrisa Şahrud Mehdiyeva “Qızılgül” mükafatı ilə təltif olunublar.
Sonda tamaşanın uğurlu quruluşuna görə gənc rejissor İmran Ali Qurban İttifaqın Fəxri fərmanına layiq görülüb.
Təltif olunanlar göstərilən diqqətə görə Teatr Xadimləri İttifaqına dərin minnətdarlıqlarını bildiriblər.
“Ədəbiyyat və incəsənət”
(18.10.2023)
“Füzuli Şəhəri Günü” Gənclər Kitabxanasında
Bir vaxtlar Qaryagin adlandırılan, sonra adı dahi şairimiz Məhəmməd Füzulinin şərəfinə Füzuli olan, sonra isə erməni qəsbkarları tərəfindən işğal edilən Aran Qarabağı rayonu Füzuli 44 günlük müharibədə oktyabrın 17-də azadlığına qovuşdu, indi hər il həmin tarix Füzuli Şəhər Günü kimi qeyd edilir.
Cəfər Cabbarlı adına Respublika Gənclər Kitabxanası da bu əlamətdar günə öz töhfələrini veriblər, kitabxnanın əməkdaşları tərəfindən dünənki əlamətdar tarix - “Füzuli Şəhəri Günü” ilə əlaqədar silsilə materiallar - virtual kitab sərgisi, videomaterial və internet resursları bazası hazırlanıb.
“Ədəbiyyat və incəsənət” portalına kitabxanadan daxil olan məlumata görə, materiallarda Füzuli rayonunun yaranma tarixi, erməni işğalı dövründə məruz qaldığı vandallıq aktları - tarixi, mədəni abidələrin, təbii sərvətlərin məhv edilməsi, sonradan Azərbaycan Respublikasının Prezidentinin diplomatik siyasəti, prinsipiallığı, polad iradəsi və Azərbaycan Ordusunun qəhrəmanlığı sayəsində 44 günlük Vətən müharibəsində qazanılan Qələbə və Füzuli rayonunun işğaldan azad olunması haqqında geniş məlumat verilib.
Videoçarxda Azərbaycanın müasir tarixinin ən şanlı görüntüləri olan Prezident İlham Əliyev tərəfindən Füzulidə Azərbaycan bayrağının qaldırılması, burada inşa edilən beynəlxalq hava limanının istifadəyə verilməsi görüntüləri də yer alır. Materiallarda Füzuli rayonunda aparılan yenidənqurma işlərinə, yüzlərlə Füzuli sakininin öz doğma torpaqlarına qayıtmalarına, bu ərazilərin yenidən dirçəlməsinə, çiçəklənməsinə dair görüntülər təqdim edilir.
17 oktyabr – “Füzuli Şəhəri Günü”nə həsr edilən virtual kitab sərgisində Prezident İlham Əliyevin “Şəhər günlərinin” təsis edilməsi haqqında imzaladığı Sərəncamın mətni, “Xilaskar İlham Əliyev”, “Zəfər salnaməsi”, “Qarabulaqdan Füzuliyədək”, “Sevgilim, Vətən”, “Qarabağ Azərbaycandır!”, “Və Nida!”, “Füzuli rayonunun memarlıq abidələri”, “Füzuli rayonu: ensiklopedik məlumat kitabı” kimi 20-dən çox kitabın, “Füzuli regionun gözəl şəhərlərindən birinə çevriləcək”, “İsveçli səyyahlar Füzuli rayonunda”, “Füzuli şəhərində Qazaxıstan tərəfindən tikiləcək incəsənət məktəbinin təməli qoyulub” kimi dövrü mətbuat nümunələrinin biblioqrafik təsviri yer alıb. Eyni zamanda, kitabxananın rəsmi saytında elektron resursların bazası yaradılıb.
Bazada şanlı Zəfər tarixindən sonra internet məkanında Füzuli şəhəri haqqında dərc edilən materiallar toplanılır. İstifadəçilər işlək keçidlər vasitəsilə məqalələrin tam mətninə baxmaq imkanına malikdirlər.
Zəfərin mübarək, Azərbaycan!
“Ədəbiyyat və incəsənət”
(18.10.2023)
