Əminik ki, indi bu məqaləni oxuyanların bir çoxu  belə bir fikir söyləyəcəklər: “Yaxşı ki, mən məktəbə getmirəm".
Ancaq “Ədəbiyyat və incəsənət” Vogue nəşrinə istinadən məlumat veriri ki, məktəb forması yeni bir qüvvə ilə qarderobumuza qayıdır və əgər təhsil aldığınız zaman onu sevə bilməmişdinizsə, indi sevməli olacaqsınız, çünki 2021 payız- qış mövsümünün əsas tendensiyalarından biri məktəbli formasına qayıdış olacaq.
Hansı paltar seçmək və nə ilə geyinmək lazımdır?
“Məktəblinin geyimi" anlayışına klassik birtonlu qammada və ya xırda damalarda, ağ yaxalıqla və ya dairəvi kəsiklə bütün modellər düşür. Ümumiyyətlə, uşaqlıq formasını xatırladan bütün paltarlar bu seçimə aid edilir. Məsələn, Christian Dior kolleksiyasında olduğu kimi, payız-qış 2021 mövsümü üçün qəhvəyi platya və ağ çıxacaqlar təklif olunur (fotoda). Maria Grazia Curie də oxşar geyim- bu dəfə ağ köynək ilə qəhvəyi ətək və əlbəttə ki, ağ qolf ilə geyinməyi təklif edir. Bu vəziyyətdə geyimi brutal ayaqqabılar tamamlayır, lakin onlar daha çox adi məktəbli ayaqqabıları "Mary Jane" və ya lofer ilə əvəz edilə bilər. Simone Rocha də məktəbli qıza aid  möhtəşəm bir ətək və ağ yaxası olan anime paltarında bir xarakter təklif edir, geyimi qara ceket tamamlayır. Ofis günləri üçün, işgüzar görüşlər üçün və ələlxüsus da tələbələr - bu
geyimlərdən seçsələr əsil zövqlü hesab ediləcəklər, digərlərinə nümunə olacaqlar.
Haydı, dəb paylaşmağa!

“YARAT” Film Klubu və Rusiya İnformasiya və Mədəniyyət Mərkəzinin əməkdaşlığı ilə rus kinorejissorlarının "Səmadan dərhal döyüşə" filmi nümayiş edilib.
AzərTAC xəbər verir ki, film “YARAT” Müasir İncəsənət Mərkəzində açılan sərginin konsepsiyasına uyğun olaraq, müxtəlif nəsillər arasında fərqliliyi təcəssüm etdirir. Ekran əsəri İkinci dünya müharibəsi və Qış müharibələri zamanı hava-desant qoşunlarının komandanı, ordu generalı, Sovet İttifaqı qəhrəmanı Vasili Margelovun taleyindən bəhs edir. Film, desantçılar arasında kulta çevrilmiş "Batya" adlı seriala istinadən çəkilib.
Daha sonra “YARAT”da Rusiya istehsalı olan “Afrika” filmi də nümayiş olunub. Filmdə hadisələr 1943-cü ilin qışında, Leninqradın ağır blokadası vaxtında cərəyan edir.

Böyük Azərbaycan şairi Nizami Gəncəvinin 880 illik yubileyi münasibətilə Azərbaycan Tərcümə Mərkəzinin bu il ukrain dilində Ukraynada işıq üzü görmüş “Leyli və Məcnun” kitabının Kiyev Beynəlxalq Kitab Festivalında (“Kyiv Book Art Fest”) təqdimatı keçirilib. Təqdimatı
tanınmış Ukrayna yazıçısı, tərcüməçi, Əməkdar incəsənət xadimi Aleksey Kononenko açaraq, Nizaminin zəngin ədəbi irsi haqqında danışıb. Natiq həmçinin Azərbaycan Tərcümə Mərkəzinin Ukrayna–Azərbaycan ədəbi əlaqələrinin inkişafına verdiyi töhfələrdən bəhs edib: “Azərbaycan Dövlət Tərcümə Mərkəzi “Leyli və Məcnun” poemasını ukrain dilində Ukraynada nəşr etməklə dahi Nizaminin zəngin ədəbi irsinin Ukraynada yaxından tanıdılması və dərindən öyrənilməsinə yönəldilmiş dəyərli bir layihə həyata keçirib. Bu il 880 yaşı qeyd edilən böyük şairin əsərlərinin yenidən dünyaya ayaq açması, bəşəri mənəvi dəyərlərin gündəmə gətirilməsinə, ümumilikdə insanlığın ruhi dünyasının zənginləşməsi və saflaşmasına xidmət edən tarixi zərurətdir”.
Mərkəzin Ukrayna təmsilçisi Marina Qonçaruk nəşr haqqında ətraflı danışaraq kitaba, məşhur ukraynalı türkoloq-alim Aqafangel Krımskinin Nizami yaradıcılığının geniş və dərin təhlilini verən “Nizami və müasirləri” monoqrafiyasından parçaların da daxil edildiyi və əsərin artıq ölkənin mərkəzi kitabxanalarından əldə edilə biləcəyi barədə məlumat verib.
Festival çərçivəsində “Leyli və Məcnun” kitabı ilə yanaşı, Dövlət Tərcümə Mərkəzinin ukrain dilində Ukraynada ərsəyə gətirdiyi “Müasir Azərbaycan poeziyası antologiyası”, İmadəddin Nəsiminin “Haqq yolu mən özüm oldum...”, Leyla Əliyevanın “Dünya yuxutək əriyir” kitabları da nümayiş edilib.

6 sentyabr, Beynəlxalq Kitaboxuma Günü

1852-ci ilin 6 sentyabr günündə  Mançesterdə ilk pulsuz kitabxana fəaliyyətə başladığından başbilənlər bu günü kitab oxumaq günü kimi dəyərləndiriblər. İndi Dumanlı Albiondan bir Azərbaycana transfer olunaq. Kimdən soruşursan ki, hansı kitabı oxuyursan, deyir, vallah iş-güc aman vermir kitab oxumağa. Ay kişilər, dünyanın əsas ölkələrinin prezidentləri, baş nazirləri qiymətli vaxtlarından ayırıb mütaliə edirlərsə, sizin kitab oxumağa vaxt tapmamaq bəhanəniz gülünc görünmürmü? İnsan maddı və mənəvi varlığın məcmusudur. Maddi aclığı zamanı yeməli, mənəvi aclığı zamanı isə mütaliə etməli, incəsənətdən feyziyab olmalıdır. Bu yarıbayarı tələbatdır, acan kimi qarnını doyduran insan ikinci tələbatının qeydinə qalmırsa, belə çıxmırmı ki, həmin tələbat heç onda əzəldən yoxmuş? Bəs insanı canlıların alisi edən axı, məhz ikinci tələbatıdır?

Mən bircə misal çəkib də kitabların insan həyatındakı rolunu göstərməyə çalışaçağam. Dünyanın ən varlı adamı – “Amazon”un sahibi Cef Bezos deyir ki, bir vaxtlar mən pulsuz, iradəsiz, aciz birisi idim, heç cür uğur qazana bilmirdim, elə ki, Kadzio İsiquronun romanlarını oxudum, situasiyanı necə dəyərləndirməyi, insanları necə tanımağı, necə qətiyyətli olmağı, ən əsası da özünəgüvəni öyrəndim, gəlib indiki Cef Bezos oldum. Necədir?

Evdə ailə başçıları ailə üzvlərini, idarə və müəssilərdə rəhbərlər tabeçiliklərində olan işçiləri bu gün kitab oxumağa məcbur eləsinlər, ildə cəmi bir dəfə qeyd edilən kitab oxumaq günündə gəlin biz də qonşulardan dala qalmayaq.

6 sentyabr. Roş Xa-Şana, yaxud Yəhudi Yeni ili

Ənənəvi yəhudi təbriki belə səslənir: “Le şana tova tikatev ve-texatem”. Tərcüməsi belədir ki, Ömür Kitabında qoy bu il də sənin adın yazılsın. Bax budur yəhudi müdrikliyi. Biz adətən, insana yüz yaşa deyə maksimalist, həm də boğazdanyuxarı, qeyri-real görünən alqış edirik. Yəhudi isə minimalistcəsinə üzlərinə gələn ildə qarşısındakına bu bir ili rifah içində keçirməyi arzulayır. Saxta maksimalizmdən səmimi minimalizm daha gözəl deyilmi?

Əsatirə görə yer üzündə yaşayış məhz bu müqəddəs tarixdən başlayıb, dünyanın hər yerində yəhudilər bu günü bayram edir, sinaqoqa gedir, dini ayinləri icra eləyirlər. Yaxındakılar bir-birinə hədiyyə verir, uzaqdakılarsa təbrik məktubu yollayırlar. Və mütləq də bol nemətli süfrə açılır. Süfrəyə mütləq bolluq rəmzi olan balıq qoyulur, “qoy mənim ailəm ayaqda deyil, başda dursun” deyə qoyun, yaxud balıq kəlləsi qoyulur, üstəlik, kökü dairəvi kəsib dəmir sikkələrə oxşadırlar ki, qoy yeni ildə başlarına var-dövlət yağsın. Yeməyə oturanda isə yəhudilər ilk olaraq bir dilim almanı bala batırıb ağızlarına qoyurlar, yeni ilin şirin olmasını təmin etmək anlamındadır bu.

Yəhudi xalqı bizə dost və qardaş xalqdır. Onları Yeni il münasibəti ilə təbrik edir və deyirik: Le şana tova tikatev ve-texatem!

6 sentyabr. SSRİ-nin dağılması, parislilərin “genosidi”, Pavarotti

1991-ci ilin bu günündə SSRİ Dövlət Şurasının növbədənkənar iclasında Mixail Qorbaçov Latviya, Litva və Estoniyanın müstəqilliyini tanımaq məcburiyyətində qaldı, bununla da SSRİ-nin rəsmən dağılmasının təməli qoyuldu. 1989-cu ildə Parisdə kompüter səhvi ilə yol hərəkəti qaydalarını pozmuş 41 min parisliyə canilik və soyğunçuluq ittihamı gəldi və onları affekt vəziyyətinə saldı. 1952-ci ildə Jenevrədə Müəllif hüquqları barədə Ümumdünya konvensiyası imzalandı.

2007-ci ilin bu günündə dünya şöhrətli italyan tenor Luçano Pavarotti gözlərini əbədi olaraq yumdu. Pavarottinin adı gələndə qeyri-ixtiyarı yadıma bir KVN zarafatı düşür. Karreras və Dominqo özlərini konsertə çatdırırlar, Pavarotti gəlib çıxmır. Belədə, konsertmeyster onlardan soruşur ki, bəs Pavarotti harada qaldı. Karreras deyir, pavarotda.

Varisin “1-10 sentyabrın təqvimi” yazısından seçmələr

Amerikalı publisit, tarixçi və memuarçı Tara Vestoverin adı son illər xüsusən parlayıb. Cəmi 34 yaşı olan Tara Kliftonda doğulub, Triniti kollecini və Briqama Yanqa universitetini bitirib. Avtobioqrafiya və memuar janrında yazdığı kitablar tək ABŞ-da yox, dünyada maraq oyadıb. Tara Goodreads Choice Award, John Leonard Prize, Jean Stein Book Award kimi nüfuzlu mükafatlara layiq görülüb. Ona ən böyük uğuru isə 40 dilə tərcümə edilmiş “Tələbə” kitabı gətirib. Nədən bəhs edir “Tələbə”? İlk öncə qeyd edək ki, bu da avtobioqrafik romandır, Taranın öz başına gələnlər əks olunur. Kitabın şərhi ingilisdilli resurslarda “Özünü tapmaq üçün xəyanət" başlığı ilə verilir.

Taranın qəribə bir ailəsi var.Ata dünyanın sonuna hazırlaşır, kütləvi aclıq ola bilməsi səbəbindən şaftalıları yığıb saxlayır və bütün kəndi məhv edə biləcək sayda silah alır. Ana türkəçarə ilə məşğuldur, yanıqları, parçalanmış sümükləri lavanda ilə müalicə edir. Qardaş və bacılar məktəbə getmirlər və zibilxanada işləyirlər, təkrar emalı mümkün olan zibilləri yığırlar. Tara tüfəng ata bilir, tikintdəi kran idarə edə bilir, lakin oxumaq və yazmaq onunçün olduqca şətindir, təhsilsiz qalmaq öz sözünü deyir. Amma bir gün onun həyatı dəyişir. Valideynlərdən gizlincə Tara kollecə daxil olmağa hazırlaşır...

Tara Vestoverin “Tələbə” kitabını türk dilində (ingiliscədən türkcəyə Duyğu Akın çevirib) Bakı Kitab Mərkəzindən əldə edə bilərsiniz.

Azad Şuşaya qayıdışdan bəhs edən film də nümayiş olunub

İstanbul şəhərində Xaricdə Yaşayan Türklər və Əqrəba Toplumlar Başqanlığı (YTB), TRT, Türkiyə Mədəniyyət və Turizm Nazirliyi Kinematoqrafiya Baş İdarəsi, Anadolu Agentliyi və Boğaziçi Mədəniyyət və Sənət Vəqfinin təşkilatçılığı ilə keçirilən Diaspor Beynəlxalq Qısa Filmlər Festivalı başa çatıb. Festivalın seçim mərhələsindən sonra müxtəlif ölkələrdən 24 filmin əsas proqrama daxil edildiyi festival “Atlas” kinoteatrında gerçəkləşib.
AzərTAC xəbər verir ki, türkdilli filmlər kateqoriyasında azərbaycanlı rejissor Nazim Şərbətovun “28” filmi də nümayiş olunub. Film Hollandiyada yaşayan jurnalist Xatirə Sərdarqızının 28 il sonra doğma şəhəri Şuşaya qayıdışının hekayəsini təqdim edir. Film Azərbaycan Respublikasının Diasporla İş üzrə Dövlət Komitəsinin dəstəyi ilə hazırlanıb.
Nümayişdən sonra rejissor Nazim Şərbətov film və Qarabağ haqqında sualları cavablandırıb. Filmin qəhrəmanının Birinci Qarabağ müharibəsində yurd-yuvasından köçmək məcburiyyətində qaldığını qeyd edən rejissor qəhrəmanın uşaq vaxtı psixoloji sarsıntılar yaşadığını söyləyib: “Bu hekayədə müharibənin insanlar və uşaqların üzərində nə kimi travmalara səbəb olduğunu göstərmək istədik”.
Festival çərçivəsində müxtəlif tədbirlər və görüşlər təşkil edilib. Kino tənqidçiləri və rejissorlar iştirakçılarla görüşərək fikir mübadiləsi aparıb.

Tematik adı “Yaşayacağıq" olan  Moskva Beynəlxalq kinofestivalının nəticələri həftəsonu elan olundu. TASS-ın festivalın mətbuat xidmətinə istinadən verdiyi məlumata görə, rejissor Andrey Zaytsevin "Blokada gündəliyi" filmi kinofestivalın Qran-Prisinə layiq görüldü.
Mərkəzi Kinematoqrafçılar evinin Ağ zalında Beynəlxalq Kinofestivalının bağlanış mərasimi ajiotajla keçdi. Bağlanış mərasimində ən yaxşı tammetrajlı filmə, ən yaxşı sənədli filmə, ən yaxşı qısametrajlı filmə, həmçinin xüsusi nominasiyalarda filmlərə mükafatlar təqdim olundu. Festivalın Qran-Prisinə layiq görülmüş Andrey Zaytsevin "Blokada gündəliyi" filmi Leninqradın ilk, ən ağır, blokada qışı haqqında danışır. Fevral 1942 il, mənfi 30 dərəcə şiddətli don, dəhşətli aclıq, su və elektrik işləmir, nəqliyyat işləmir, Leninqrad qar ilə doludur və iflic olub. Gənc qadın, Olga, bütün şəhər vasitəsilə atasının yanına gedir. O, yenicə ərini dəfn edib və tezliklə özünün də acından öləcəyinə əmindir. O, son dəfə atasını görmək, onunla vidalaşmaq və ondan bağışlanmasını istəmək istəyir. Belə bir süjet.
"Ən yaxşı qısametrajlı film rejissor Kseniya Arıelintsevanın "Avako" filminə qismət oldu. Film on üç yaşlı Aninin hekayəsini izhar edir. Yeniyetmə qız qonşusunun nəzarəti altında qalır - 18 yaşlı Arseninin, hansına ki, çoxdan vurulub. Anya gününü Arseninin "Avako" Gənclər klubunda keçirir, daim diqqətini cəlb etməyə çalışır və ağlına belə gəlmir ki, gün gələcək, Arsenini bir daha görməyəcəklər…
Festivalın ən yaxşı sənədli filmi Vladimir Qolovnevin "Uzaq plan" filmi oldu. Həmçinin kinofestivalın prezidenti mükafatı rejissor Artıkpay Suundukovun "Şambal" filmi qazandı.
Bəlkə də kinofestivalın beynəlxalq imicini qoruyub saxlayan elə yeganə detal da Artıkpay Suundukovun - qeyri rusun mükafatlardan birini qazanması sayıla bilər, hərçənd ki, o özü də Rusiya vətəndaşıdır.

Şəkildə: “Blokada gündəliyi” filmindən bir epizod.

Azərbaycan Respublikasının mədəniyyət naziri Anar Kərimov Britaniya Şurasının Azərbaycandakı nümayəndəliyinin rəhbəri Samr Şahı ölkəmizdəki fəaliyyət müddətinin başa çatması münasibətilə qəbul edib.
Mədəniyyət Nazirliyinin yaydığı xəbərə görə, görüşdə həmçinin, mədəniyyət nazirinin müavini Sevda Məmmədəliyeva, Mədəniyyət Nazirliyi Aparatının rəhbəri Vasif Eyvazzadə, Britaniya Şurasının ölkə ofisinin rəhbəri vəzifəsinə təyin olunmuş Frensis Qardener-Trexo və Britaniya Şurasının əməkdaşı Dilarə İbrahimova iştirak edib.
Qonaqları səmimi salamlayan nazir Anar Kərimov ilk öncə Samr Şahı İordaniya üzrə Britaniya Şurasının ofis rəhbəri və Levant Klasterinin başçısı vəzifəsinə təyin olunması münasibətilə təbrik edib, ona yeni vəzifəsində uğurlar və böyük nailiyyətlər arzulayıb.
Ölkəmizdə fəaliyyət göstərən Britaniya Şurasının mədəniyyət sahəsində həyata keçirdiyi layihələri yüksək qiymətləndirən nazir Azərbaycanın Britaniya Şurası ilə əməkdaşlığa önəm verdiyini və birgə fəaliyyətin Azərbaycan və Böyük Britaniya arasında dostluq əlaqələrinin möhkəmləndirilməsinə istiqamətləndiyini bildirib.
Səmimi qəbula görə nazirə minnətdarlığını ifadə edən Samr Şah Azərbaycanda çalışdığı müddətdə Şuranın əməkdaşları ilə birgə görülmüş işləri məmnunluqla vurğulayıb, mövcud əlaqələrin, səmərəli əməkdaşlığın növbəti illərdə də uğurla davam etdiriləcəyinə əminliyini bildirib, nazirə və nazirliyin kollektivinə uğurlar arzulayıb.
Görüşdə, həmçinin Britaniya Şurasının ölkəmiz üzrə nümayəndəliyinin yeni rəhbəri ilə birgə fəaliyyətin uğurla həyata keçiriləcəyinə, əməkdaşlığın daha da genişləndiriləcəyinə inam ifadə edilib.
Görüş tərəflər arasında qarşılıqlı maraq doğuran digər məsələlərin müzakirəsi ilə davam edib.