Super User
Oxucular daha çox nəyə maraq göstərir? -
Kənan Məmmədli, “Ədəbiyyat və incəsənət”
Təbii ki, hər bir KİV üçün hansı səpkili yazılarının daha çox oxunması barədə məlumatlar maraqlıdır. Mən də “Ədəbiyyat və incəsənət” portalının son 10 gününün reytinqini diqqətinizə çatdırmaq istədim.
Burada həm portalın əməkdaşlarının (Əli Çağla, Nemət Tahir, Sərtyel), həm daimi müəlliflərinin (Əkbər Qoşalı, Təranə Dəmir, Aysel Fikrət, Fəxrəddin Qasımoğlu, Coşğun Xəliloğlu) müəllif yazıları yer alıblar, ilk onbeşlikdə cəmi 3 xəbər var, bu da cəmi-cümlətanı 20 faiz deməkdir.
İlk onbeşliyin mövzu rəngarəngliyi də qeyd edilməlidir. Sıralanmada birinci qərarlaşmış Əkbər Qoşalının yazısı siyasi icmaldır, ikinci olan Sərtyelin yazısı satıradır, üçüncü yerdəki Nemət Tahirin yazısı isə səfər təəssüratıdır.
Digər yerlərdə ədəbiyyat və incəsənət xadimləri barədə qeydlər, şeir, hekayə, esselər və qeyd etdiyimiz xəbərlər yer alır.
Amma günümüzün bir gerçəkliyini də mütləq qeyd edək. Bu gün ölkənin elektron KİV-lərindəki yazı və xəbərlərin oxunma sayı birbaşa onların sosial mediada paylaşılmasından asılıdır. Demək, bəzən çox dəyərli, bir inci olan yazılar sadəcə kölgədə qalır, böyük oxucu auditoriyasına yol aça bilmir.
Və sonda onu da qeyd edim ki, günümüzdə sırf mədəniyyət sferasında KİV-in mövcud olması elektron KİV deyiləndə yalnız xəbər və futbol saytlarının nəzərdə tutulmasını bir norma hesab edən Azərbaycanda sensasiya hesab edilə bilər. Fədakarlıqla mədəniyyəti təbliğ edən əməkdaşlarımıza alqış düşür!
“Ədəbiyyat və incəsənət” portalında son 10 günün reytinqi
16 -26 iyul, 2024
1.”Görüşdən qaçanlar” - Əkbər Qoşalı
2. Gülüş klubu - Sərtyel
3. “Özümdən 3 yaş böyük… “- Nemət Tahir
4. “Gülbəy” - Coşğun Xəliloğlu
5. “Müşfiq xanın ad günündə…” - xəbər
6. Status yağışı - Əli Çağla ilə
7. “Ədəbi proses 2023” -xəbər
8. “Şeytanla bəhsə girib… “- Təranə Dəmir
9. “Şuşada Emil Əfrasiyab…” - Aysel Fikrət
10. Poeziyanın yorulmaz əsgəri Eldar Əhədov
11. “AYB Lənkəran bölməsi…” -xəbər
12. “Sumqayltda yerli AYB bölməsi… -xəbər
13. “Urmu gölünün uykusu” - Əkbər Qoşalı
14. “Mahcamal haqqında…”- Aysel Fikrət
15. “Ruh” - Fəxrəddin Qasımoğlu
“Ədəbiyyat və incəsənət”
(29.07.2024)
Yalan danışmağı xoşlamayan xanım...
Elman Eldaroğlu, “Ədəbiyyat və incəsənət”
Alim var ki, bütün ömrü boyu işləyib müdafiə etdiyi, daha çox məlumatlı olduğu mövzunu bir yana tullayıb, tamam başqa mövzuda özünü təsdiq etməyə səy göstərir. Və hərşeyşünas görüntüsünü yaratmağa çalışır. Belə alimləri gah müxalifətdə, gah da iqtidarda təmsil olunmağa can atan siyasi əqidəsizlərə də bənzətmək olar. Obrazlı desək, abırlı “nizamişünas” heç vaxt özünü “füzulişünas” kimi təqdim etməyə çalışmaz…
Bütün ömrünü Seyid Nəsimiyə həsr edib və bu mövzuda hər bir suala cavabı var. Bir az da qabağa getsəm, ölkədə onun qədər Nəsimini bilən ikinci alim yoxdur…
Qürurlu xanımdır. Özünə çox güvənir, fəhminə, zəkasına, ağlına həmişə inanıb. Olduqca cəlbedici və xoşagələndir. Amma tələbkar olduğundan onunla ünsiyyət qurmaq elə də asan deyil, xarizmatik insandır. Eyni zamanda idealistdir və hər şeyin yaxşı olmasını arzulayır...
Hər hansı bir tarixi şəxsiyyətin həyat və yaradıcılığını araşdırıb, heç kimin bilmədiyi faktları üzə çıxarmaq, onu fərqli şəkildə təqdim etmək çox çətindir. Tədqiqatçıdan böyük hünər, ciddi təhlil, dərin savad tələb edir. Haqqında söhbət açmaq istədiyim filologiya üzrə fəlsəfə doktoru Səadət Şıxıyeva neçə illərdir ki, böyük Azərbaycan şairi İmadəddin Nəsiminin həyat və yaradıcılığını araşdırır. Bu istiqamətdə bir sıra uğurlara imza da atıb...
Deyir ki,- “Nəsiminin müraciət etdiyi janrlar və şeirinin poetikası haqqında bir neçə tədqiqat əsərində bəhs olunsa da, bu şairin söz sənəti haqqındakı görüşləri, əsərlərində yer alan ədəbi kateqoriya və terminlərə indiyədək diqqət yetilməmişdir. Adı daha çox hürufiliklə bağlı yad olunan Nəsiminin ədəbi fəaliyyətinin istiqamətləri, ədəbi-tənqidi görüşləri və poetika elmi ilə əlaqəli nəzəri biliyi barədə indiyədək araşdırmalarda pərakəndə və çox zaman səthi məlumatlar verilmişdir. Halbuki onun hər iki divanında yer alan janr və poetik formalar zənginliyi və rəngarəngliyi baxımından divan ədəbiyyatında çox az şairin ədəbi mirası ilə müqayisə oluna bilər. Nəsiminin əsərlərinin arxitektonikası, onun poetik ənənələri sinkretik təqdimi, fərdi yaradıcılıq eksperimentləri, poetik sözə həssas və elmli münasibəti şeir sənətinə dərindən bələdliyini göstərir. Şairin hər iki divanında şərq şeir sənətinin həm təcrübi və tətbiqi şəkillərini, həm də onun nəzəri biliklərinin ifadələrini müşahidə etmək mümkündür”…
Xarekteri olduqca güclüdür. Çalışdığı sahədə özünü yüksəyə qaldırmağı bacarır. Nə istədiyinin fərqindədir və istəyinə çatmaq üçün əzmlə addımlaya bilir. Zamana meydan oxuyur, qarşısına çıxan səddi asanlıqla ram etməyi bacarır...
Nəsiminin diri-diri dərisinin soyulmasını və onun həmin zaman şeir söyləməsini xalqın şairə olan məhəbbətindən yaranmış əfsanə olduğunu düşünür. Nəsiminin iki dəfə ailə qurduğunu iddia edir. Bundan əlavə alimlərin ortaq türk dili təklifinə onun da öz yanaşması vardır:- “Ortaq türk dili fərqli bir anlayışdır. Keçən əsrin əvvəllərində də bu iddianı irəli sürənlər olub. Onlar ortaq türkcə deyəndə tatar türkcəsini, Mərkəzi Asiya xalqlarının, Qafqaz, İran və Türkiyə türklərinin hamısının anlaya biləcəyi ortaq ədəbi dil ideyasını təklif etmişdilər. Amma onu gerçəkləşdirə bilmədilər. Çünki canlı dil hər zaman qalibdir və süni müdaxilələri qəbul etmir. Düşünürəm ki, dilimiz gələcəkdə də bu çoxyönlü, müxtəlif niyyətli gizli və aşkar həmlələrə məğlub olmayacaq. Bu cür müdaxilə - mövcud sözləri, xalq tərəfindən qəbul olunmuş bir çox kəlmələri "ərəbcədir" deyə süni və kütləvi şəkildə dildən çıxartmaq və başqa bir qrup sözü dilə gətirərək, əsassız əvəzetmələr doğru qərar deyil. Sözlərin dildə oturuşması zaman istəyir. Bundan başqa, hər ərəb dilində olan kəlməni də zərurət olmadan dilimizdən çıxara bilmərik. Türkiyə dilçiləri bir əsrə yaxındır ki, ədəbi dildə təmizləmə aparır. Bununla belə, onların da ədəbi dilində yetərincə ərəb sözləri var. Bunlar elə sözlərdir ki, bizdə
onun ya tələffüzə daha yatımlı variantı var, ya da türkcə qarşılığı mövcuddur”- söyləyir...
İşgüzar, çalışqan, əzmkar insandır. Maraqlı iddiaları ilə həqiqətin harada olduğunu ortaya çıxara bilir. Yalan danışmağı xoşlamır. Cəsarətli və mərd xanımdır. Davranışı, yüksək mədəniyyəti ilə seçilir. Müvəffəqiyyət onun üçün çox əhəmiyyətli olduğundan gərgin iş rejiminə, çətinliklərə qatlaşmağı bacarır…
İstirahət günlərində - iyulun 27-si Səadət xanımın növbəti ad günüydü. Ona möhkəm cansağlığı, firəvan həyat və tükənməz nailiyyətlər arzulayırıq.
Yeni yaşınız mübarək, Səadət xanım!
“Ədəbiyyat və incəsənət”
(29.07.2024)
“Türkiyədə yeni əlifba” - ESSAD BEY
Leo Essad –Bey Nusenbaum barədə əfsanələr dolaşmaqdadır. Bir neçə təxəllüslə, o cümlədən azərbaycanlı oxuculara yaxşı tanış olan Məhəmməd Əsəd bəy və Qurban Səid təxəllüsü ilə yazdığı bəllidir. Bu məntiqlə, dünyaşöhrətli “Əli və Nino” romanının müəllifi də odur.
Talehə Əliyeva ötən əsrin 20-ci, 30-cu illərində Almaniya mətbuatında sözügedən müəllifə aid bir neçə məqaləni dilimizə çevirib və redaksiyamıza təqdim edib. Onları diqqətinizə çatdırırıq.
TÜRKİYƏDƏ YENİ ƏLİFBA
Ankaradan xəbər gəldi ki, Türkiyə höküməti Rusiya türkləri kimi ərəb hərflərindən latın əlifbasına keçməyi qərara alıb. Bu qərar Türkiyənin avropalaşmasında yeni bir addım olacaq.
Türk yazısı üç tarıxı mərhələdən keçib: orxon, uyğur və ərəb. Bu üç əlifbadan Türk dilinə bir az uyğun gələni orxondur. Digər yazılarda, xüsusilə ərəb hərflərində ”şərti” işarələrdən istifadə olunmalı idi. Türkcədə bu hərflərlə səlis oxumaq üçün türk dilini çox gözəl bilmək vacibdir, çünki türkcənin öyrənilməsində oxu yazıdan öndə gəlir. Yeni latın əlifbası həm türklərə, həm də əcnəbilərə bu dili öyrənməyi asanlaşdıracaq.
Başqa bir tərəfdən qeyd etmək lazımdır ki, yeni orfoqrafiyanın tətbiqi özünü türkcədə olan bəzi dialektlərin fərqliliyində əks etdirəcək; həmçinin ərəb əlifbasında olan qədim türk ədəbiyyatı nümünələrinin unudulmasına gətirib çıxaracaq, eyniylə uyğurlardakı “Kudatku Bilik” kimi. Ən təəssüfedici hal isə odur ki, ərəb əlifbasından imtina ilə türklərin cox əhəmiyyət verdiyi dekorativ yazı sənəti, gözəl yazı da itəcək.
Ancaq çox yaxşı olardı ki, (bir zamanlar İspaniya və Rusiya akademiyalarındakı kimi) onlar Türkiyə Akademiyasının daha əvvəlki planına, yəni əski əlifbanın birdəfəlik ləğv etmək yox, əsaslı reformasiyaya, uyğun qərar verərdilər.
(“Die literarische Welt” qəzeti, Berlin, 2/ 1926-cı il N-36. S.2(1/4) səh.266
Almancadan tərcümə etdi: Talehə Əliyeva
Müəllif hüquqları qorunur. Bakı. 27 iyul 2024-cü il)
“Ədəbiyyat və incəsənət”
(29.07.2024)
“Cənnətin möhürü”
Cəlilabad təhsilinin tanınmış nümayəndəsi, istedadlı nasir, ədəbiyyatşünas, pedaqoq İlham Əhmədovun yeni- "Cənnətin möhürü" kitabı çapdan çıxıb.
“Ədəbiyyat və incəsənət” portalına Cəlilabadda yaşayan pedaqoq Elçin Heseynovun verdiyi məlumata görə, müəllifin “Cənnətin möhürü" kitabında qələmə aldığı hekayə və oçerklər müasir dövrün tələblərinə çox uyğun işlənib. Hadisələr olduqca real təsir bağışlayır, tərbiyəvi mahiyyətilə oxucunu cəlb edir.
Elçin Hüseynov əminlik də bildirir ki, oxucular əsəri rəğbətlə qarşılayacaqlar.
Şəkildə: Elçin Hüseynov və İlham Əhmədov yeni kitabı nümayiş etdirirlər.
“Ədəbiyyat və incəsənət”
(29.07.2024)
“Demək, unudammadın təkliyi..” - Mahir N. Qarayevin şeirləri
“Ədəbiyyat və incəsənət” portalının “Ədəbiyyat qəzeti” ilə birgə ƏDƏBİYYATIMIZI SEVDİRƏK layihəsində bu gün sizlərə Mahir N. Qarayevin “Dəmir qapı Dərbənd" silsiləsindən şeirlərini təqdim edəcəyik.
Nəğmə dedik son baharın adına, Göy üzünün durnaları apardı... - Mahir N.Qarayevin "şeirləri
Təbriz bayatısı
Dərddən demə, qardaş:
Çəkilməz dərdimə,
tikilməz qəlbimə yazığın gəlsin,
dözəndə - səbrimə,
bezəndə - qəbrimə yazığın gəlsin;
tanrısız dünyanın bəndəsi yazıq,
şəhərlisi yazıq, kəndlisi yazıq,
hayıfdı bu nəslin 37-si,
əsrin 41-nə yazığın gəlsin!
Yurddan demə, qardaş:
Hərə bir tərəfdən,
hərə bir qıraqdan çapıb da gələr,
Nəsimi - Hələbdən,
Füzuli - İraqdan qopub da gələr;
baxmaz doğanağa, baxmaz örkənə,
dağını, daşını qoşub tərkinə
salamsız... kəlamsız... ərk ilə
Təbriz Araz üstdən aşıb da gələr!
Qürbət ağısı
Nəğmə dedik son baharın adına,
Göy üzünün durnaları apardı.
Həsrət bizi yanar qoydu oduna,
Gəzən olsa, külümüzü taparmı?!
Ana Vətən -
Göyçəklərin göyçəyi!
Qərib yurda ürəyimiz qızammaz.
Yad ellərin yüz ölümü, əcəli
Yad torpaqda qəbrimizi qazammaz...
Qoxuladıq bu düzləri yurd deyə,
Qurd fələkdi - quzu-quzu otardı.
Bir qəribin gözlərini örtməyə
Yüz yad elin torpaqları çatarmı?!
Ana Vətən -
Gerçəklərin gerçəyi!
Ümid dolu xatirələr usanmaz;
Ağardımı anamızın birçəyi?!
Yuxusunu qarışdırar, yozammaz...
Nəğmə dedik, dan yerinə üz tutub,
Yad ellərin yad günəşi yubandı;
Dağlarını duman tutub, sis tutub,
Dənizləri - dəniz boyda qubarmı?!
Ana Vətən -
Bir ömürlük ruzumuz!
Şəkərimiz, çörəyimiz, duzumuz;
Bu qismət ki haqdan gələn yazımız -
Ölüm belə alnımızdan pozammaz!
Qərib Nazimin yolçuluğu
Nağılım dünya,
gerçəyim dünya,
əzəlim, gözəlim, göyçəyim dünya!
Başımın üstündə bir qara bayraq -
baş alıb gedəcəyim,
baş qoyub öləcəyim dünya!
Tutula-tutula dərdinə,
qurşana-qurşana acına -
bu ucundan yol başlayıb
çıxasıyam o ucuna...
Yad nəzərdən yaşına-yaşına,
uçuna-uçuna,
yaşara-yaşara
milyon verstlik radiusdan
dolanacam İstanbulun başına!
Başımın üstündə bir qara bayraq -
öpəcək nəm çəkən yanaqlarımı;
Başımın üstündə bir qara bayraq -
örtəcək ölüncə ayaqlarımı!
Baş alıb gedəcəyim,
Baş qoyub öləcəyim dünya!
Sən görəcəkliyin,
çox görmə mənə:
bu həsrəti, bu qisməti, bu dağı,
bir də başım üstdəki bu qara bayrağı...
*
Qərib torpaqların göy üzü qərib,
qərib torpaqların
göydə - ayı qərib, ulduzu qərib,
yerdə - suyu qərib, dənizi qərib...
Qərib suların aynasında
iri alnın qırış-qırış,
buyur, bu dünyanı gəz qarış-qarış -
qərib torpaqların hər üzü qərib...
Yalnız mahnı oxuya bilməkdir
dünyanın ən böyük xoşbəxtliyi!
Mahnı ki oxuyammadın -
demək, unudammadın təkliyi;
və bir də quş kimi uçub gedəcək
quşa dönmək ümidinin əl boyda gerçəkliyi...
Sonra bir gəmi gedər,
uzaq üfüqlərə tənha bir gəmi -
quruyub qaldığın sahillər yazıq;
üstündən adlayan gecələr yazıq,
içindən keçdiyin səhərlər yazıq!
Gəzdin qarış-qarış:
Parisli Parisə,
Misirli Misirə yaraşan kimi
yaraşdın dünyanın hər qarışına,
hər addımına;
və bir gün beləcə
iri alnın qırış-qırış
qarışdın dünyanın hər qarışına,
hər adamına...
Cavid əfəndinin buludu
Evim yenə eşik mənim,
yerim yenə bayırdımı?!
Yanım-yörəm keşik mənim -
anam, bura Bayıldımı?!
Göy üzünün naçar-naçar
durnaları hara uçar?
Bura o çöl-bayır deyil -
dörd yanım qəbirdi, bacım.
Ha baxıram, Bayıl deyil -
deyəsən, Sibirdi, bacım!
Dünən gedən qaraçılar
indi görən, hara çatar?
Külək döyür otağımı,
yağış kəsənə oxşamır.
Qəbirdən sal yatağımı -
evim damır, damır, damır...
Göyün üzü bulud-bulud,
unut daha... unut... unut...
Şeir bazarı
Azğın soyuq
göy üzündə səfil-səfil dolaşan
ruhları da qısnayanda məzara -
şair Məhəmməd Hadi
şeirlərini çəkmişdi bazara.
Bir cüt tərəzi gözü kimi
bir cüt əl göylərdən enmişdi yerə:
Tanrının sol əlində
dinməz oturmuşdu Məhəmməd Hadi -
ürəyinin başından qoparıb
Tanrının sağ əlinə atırdı şeirlərini.
Şeirlərin odu
isidirdi Tanrının sağ əlini -
Tanrının sol əlində
soyuqdan donurdu Məhəmməd Hadi...
Eləcə oturmuşdu, baxırdı,
qəhərini güclə boğur, boğulurdu:
tərəziyə atılırdı,
tərəziyə qatılırdı şeirləri -
isti təndirdən çıxan buğda çörəyi kimi
buğlana-buğlana satılırdı şeirləri...
Dərisi soyulmuş Allah
Nəsiminin qətli
Soyun bu kafiri!
Sabaha qoymayın, sabahdan iraq!
Tövbə eləməkdən sapdırın bunu -
Göydən Allah baxır...
Allahdan iraq!
Bir az da sabahın halına yanın -
Sabaha qoymayın, sabahdan iraq.
Nəfəsi bu günü murdarlayanın
Qanı da sabahı murdarlayacaq!
Bu fani dünyada zulum görənlər,
Cənnət qapısından gülüb girənlər,
Şükürlər içində ölüb gedənlər
Buna nə deyər?!
Soyun bu kafiri!
Yaxına qoymayın cavan qızları,
Kimsə ağlamasın qoy oğrun-oğrun;
Allahın yerdəki allahbazları!
Göydən Allah baxır...
Allahdan qorxun!
Soyun bu kafiri!
Kəsin bu səsi!
Ayıb, allahsızın sözündən ayıb!
Çılpaq ayaqları, çılpaq sinəsi
Bakirə qızların gözündən ayıb!
Halalın-haramın,
dulun-hərəmin
nəfəsindən ayıb, nəfsindən ayıb!
Soyun bu kafiri!
Çoxdan fürsət gəzən
qansız rəislər -
əmrə müntəzirlər,
qana hərislər,
vəkillər, vəzirlər,
qanunpərəstlər...
Kimi baltasıyla, kimi daşıyla,
kimi dırnağıyla, kimi dişiylə -
soyarlar, kəsərlər,
şaqqalayarlar.
Günahkar bir günün günortasında,
tamahkar dünyanın tən ortasında
haqqı dana-dana
haqq eləyərlər!..
Gizlicə-gizlicə
ağbirçəklilər
ovudar, ovudar cavan qızları.
Gecələr özləri qızlardan betər
qovrular dərdinə allahsızların.
Bir kafir
cəhənnəm çöhrəli allahbazların
cənnətə açılan sabahı olar.
Hələ soyulmamış allahsızların
dərisi soyulmuş Allahı olar!
“Ədəbiyyat və incəsənət”
(29.07.2024)
LİDERLİYİN 21 QANUNU – 5.E.F.Xatton qanunu
Əlibala Məhərrəmzadə, “Ədəbiyyat və incəsənət”
Bütün yüksəliş və enmələr liderliyin sayəsində baş verir» sözləri ilə başlayan «Liderliyin 21 inkaredilməz qanunu» kitabını – Con Maksvellin bu incisini, yəqin ki, oxumayan əz-əz liderə rast gəlmək olar. Rəsmən onun özünün, yaratdığı EQUIP və The John Maxwell Company təşkilatlarının bu günədək liderliyin sirlərini öyrətdiyi 5 milyon müdavimi var. Bu gün ABŞ-ın Vest Poynt Hərbi Akadesmiyasından tutmuş BMT-yədək, nüfuzlu Fortune 500 siyahısındakı əksər şirkətlər təmsil olunmaqla az qala hər bir qurumda Con Maksvelldən liderlik dərsi almış insanlara rast gəlmək olar.
Con Maksvellin təqdim etdiyi liderlik qanunlarının 21-nə də qısaca da olsa nəzər yetirməyimiz vacibdir. Belə ki, öz şəxsi həyatlarında və bizneslərində bu qanunlara əməl etməklə insanlar dərhal fayda əldə edirlər.
5.E.F.Xatton qanunu.
«Əsl lider danışanda insanlar ona qulaq asır».
Əsl lider təkcə vəzifəyə malik deyil, o, hakimiyyətə malikdir.
«E.F.Xatton» - maliyyə xidməti göstərən kompaniyadar. ABŞ-da belə bir televiziya reklamı var imiş bir zamanlar: Ağzınadək dolu restoranda iki nəfər maliyyə mövzusunda danışırmış. Biri deyirmiş ki, hansısa investisiya barədə filan şey eləmək lazımdır. Bu vaxt ikinci deyirmiş ki, hər şey yaxşıdır, amma mənim brokerim Xatton deyir ki... Həmin an səs-küylü restoranda lal sükut yaranırmış, hamı gözləyirmiş ki, ikinci personal Xattonun sözlərini söyləsin.
Maksvell məhz buna görə öz növbəti qanununu hamının qulaq asdığı Xattonun adı ilə adlandırıb.
Əgər siz əvvəl heç tanımadığınız insan qrupu ilə görüşə gedirsinizsə, cəmi beş dəqiqəyə onların hansının lider olduğunu sezə biləcəksiniz. Kiminsə sualı yarananda bütün qrup uzvləri kimə baxırlar? Kimin sözlərini gözləyirlər? Bax real lider odur.
Vəzifəcə lider birinci danışır, real lidersə sonda.
- Həqiqi liderlik həmişə daxildən gəlir, xarakterin gücündə özünü göstərir;
- Liderlik ətrafdakılarla yaxşı əlaqə qura bilmək, güclü çevrəyə malik olmaqdan qaynaqlanır; lazımi adamları tapa bilməklə əlaqələndirilir;
- Lider çoxlu informasiyaya malik olur;
- Liderlik intuisiya qabiliyyəti tələb edir;
- Liderlik təcrübədən qaynaqlanır;
Maksvell Xatton qanununun məğzini dərk etməkçün liderlik arzusunda olan insana məsləhət görür ki, özü-özünə bu sualları versin:
- Mən danışanda insanlar həqiqətənmi məni dinləyirlər?
- Onlar bu mövzuda başqa birisinin də danışmasını arzulamırlar ki?
Əvvəl təqdim edilən qanunlar isə burda sıralanıb:
1.Tavan qanunu.
«Liderlik qabiliyyətini insanın effektivliyi müəyyənləşdirir».
Şəxsin liderlik effektivliyi tavanla xarakterizə edilir. Şəxsin insanları öz ardınca apara bilmək qabiliyyəti nə qədər azdırsa, onun potensial imkanlar tavanı da o qədər alçaqdır.
Liderlik keyfiyyətləri həmişə individuumun təşkilatda effektivlik tavanı yaratmasını təmin edir. Liderlik güclüdürsə, tavan da yüksək olacaq. Ölkə çətin duruma düşəndə yeni prezident, firma pullarını itirəndə yeni baş direktor, kilsə ziyarət olunmayanda yeni baş pastor, idman komandası ardıcıl məğlubiyyətlərə uğrayanda yeni baş məşqçi axtarışına çıxırlar. Liderliklə effektivlik arasındakı qarşılıqlı əlaqə ən çox idmanda özünü göstərir. Hər bir komandada istedadlar olur. Amma komandaların fərqini məşqçi və bir neçə əsas oyunçunun təmin etdiyi liderlik yaradır. Komandanın effektivliyini dəyişmək üçün məşqçi tərəfindən onun liderlik çəviyyəsini yüksəltmək lazımdır. Bax bu da fəaliyyətdə olan tavan qanunudar.
2.Təsir qanunu.
«Liderliyin həqiqi ölçüsü təsirdir».
Əgər insan başqalarına təsir edə bilmirsə, heç vaxt öz ardınca adam apara bilməz. Əsl liderlik heç vaxt hansısa posta təyin olunmaqla baş tutmur, o, yalnız təsir edə bilmək qabiliyyətindən asılıdır.
3.Proses qanunu.
«Lider bir gün ərzində deyil, günbəgün olurlar».
Liderə çevrilmək prosesi haradasa aksiya bazarında müvəqqəti kapital investisiyasına bənzəyir. Siz bir günə varidat toplamaq istəyirsinizsə, uğur qazanmağa əsla şansınız yoxdur. Burada ən vacib olan olduqca uzun məsafəyə qaçışda sizin gündəlik hərəkətlərinizdir. Liderlik – çox mürəkkəb məfhumdur. Onun olduqca çox aspektləri var: təcrübə, emosional güc, hörmət, insanlarla ünsiyyət təcrübəsi, nizam-intizam, perspektiv, uzaqgörənlik, vaxtında qərarvermə bacarığı, hücuma keçmə əzmi. Bunların hamısı qeyri-maddi şeylərdir, onları birdən-birə əldə etmək mümkünsüzdür. Məhz buna görə də liderlərə effektiv olmaq üçün belə uzun müddətlik möhkəmlənmə, güclənmə lazım gəlir.
Con Maksvell iddia edir ki, liderliyin bir çox aspektlərini o özü məhz uzun illərdən sonra 51 yaşında hiss etməyə başlayıb. Liderləri digərlərindən fərqləndirən əsas cəhətlər məhz öz bacarıqlarını inkaşaf etdirmək, yaxşılaşdırmaq qabiliyyətidir. Uğurlu liderlər öyrənməyi bacarır və sevirlər. Və öyrənmə prosesi onlarda ömür boyu davam edir.
«İnsan nəyi bilmədiyini bilmirsə, o inkişaf edə bilməz».
4.Liderlik – inkişaf qanunlarına tabedir. Naviqasiya qanunu.
«Gəminin sükanını hər kəs fırlada bilər, ancaq kursu tapmaq üçün lider lazımdır».
Bəzi şturmanlar limanı tərk etməzdən öncə bütün baş tutacaq səyahəti beyin süzgəclərindən keçirə bilirlər. Onlar gözəl bilirlər ki, lazım olan məntəqəyə çatmaq üçün nə qədər güc sərf etmək, komandaya ekspedisiyanın uğur qazanması üçün kimləri salmaq lazımdır. Onlar üfüqdəki maneələri hamıdan tez görürlər.
Lider elə bir şəxsdir ki, başqaları görəndən daha çox görür, başqaları duyandan daha çox duyur.
Bəzən eyni zamanda dörd təyyarənin məhv olmasından danışılır. Bu ona görə olur ki, qırıcı təyyarə dördlükdə sıx halda uçanda mütləq onlardan birinin pilotu aparıcı olur, lider olur. O, öndə gedir, digər üçü ardınca gedərək onun hərəkətlərini təkrarlayır. Bu təkrarlama sonadək, hətta lider sürəti itirib dağa çırpılanda belə davam edir.
Naviqatorlar üçün hər bir keçmiş uğur və uğursuzluq özlüyündə informasiya, müdriklik mənbəyidir. Uğurlar insana özünü daha yaxşı tanımağa, öz bacarıq və istedadına daha çox güvənməyə imkan verir. Uğursuzluqsa səhvləri görüb onların üzərində işləməyə, onları düzəltməyə imkan yaradır.
Naviqatorlar bir çox mənbələrdən informasiya toplayır, aşağı səviyyədə nə baş verdiyini öyrənmək üçün komanda üzvləri ilə daim təmasda olurlar. Onlar situasiyanı dərindən öyrənməyə çalışırlar.
«Əgər siz açıq gözlərlə fəaliyyət göstərməsəniz həyat daim sizə qurşaqdan aşağı gözlənilməz zərbələr vuracaq», - yazır müəllif. O yazır: «Optimizmlə realizmi, intuisiyayla planlaşdırmanı, inamla faktları balanslaşdırmaq çox çətindir. Amma yol göstərən lider kimi effektiv olmaqçün məhz bunlar vacibdir».
Con Maksvell kitabın bu bölümündə öz liderlik fəaliyyətində daim istifadə etdiyi strategiyanı da göstərib:
- Bütün fəaliyyət ardıcıllığını öncədən düşünmək;
- məqsədi lokallaşdırmaq və sistemləşdirmək;
- prioritetləri ünvanlı korrektə etmək;
- əsas personalı müəyyənləşdirib onu məlumatlandırmaq;
- planın bəyənilməsi üçün vaxt rezervasiya etmək;
- reallaşdırmaya fəal qoşulmaq;
- gözlənilən problemlərə uyğunlaşmaq;
- uğurları təbii şəkildə görmək və qeyd etmək;
- hər gün öz planına nəzarət etmək.
Con Maksvellin naviqasiya qanununun əsas məğzi – hazırlıqdır.
“Ədəbiyyat və incəsənət”
(29.07.2024)
«Səni Qış parkında gözləyəcəyəm» - Rəşad Nağı Mustafa
“Ədəbiyyat və incəsənət” portalının “Ulduz” jurnalı ilə birgə BİRİ İKİSİNDƏ layihəsində sizlərə portalın və jurnalın birgə təşkilatçılığı ilə Xalq şairi Vaqif Səmədoğlunun 85 illiyi münasibətilə keçirilən Poeziya müsabiqəsində fərqlənən gənc şairlərin şeirlərini təqdim edirik.
II YER
Rəşad NAĞI MUSTAFA
“MÜHARİBƏ ŞEİRİ”
Müharibə başlayıb.
Nəbatat bağındayam.
Hava yaman soyuqdur, özüm də bir az xəstə.
Heyif, evdən çıxanda papaq da qoymamışam,
Anam elə bilir ki, ölüm ayağındayam.
Müharibə başlayıb... Nəbatat bağındayam...
Mən səni gözləyirəm...
Eləcə dayanmışam Eldar şamının altda.
Gör e, adam adında ağaclar var həyatda.
Ağacların üstündən yıxılan balacalar böyüyür,
igid olur.
Mən səni gözləyirəm, amma indi, bəlkə də,
bu ağacın adaşı Şuşada şəhid olur.
Mən səni gözləyirəm...
Gəlsən, soruşma məndən, vətən səninçün nədir?
Bax indi dediklərim hamısı bəhanədir:
Anamın olduğu yer, atamın yatdığı yer,
bir də sən hardasansa, ora mənə vətəndir.
Anam heç vaxt ölməsin, sən də ölmək istəmə.
Mən atamdan bilirəm, ölüm bədahətəndir.
Mən də mütləq öləcəm, elə Eldar şamı da.
Bir əsgər anasının ümidi ölmür heç vaxt,
bir də əziz şəhidlər ölmür, başına dönüm.
Məni bərk qucaqlama, axı atan deyiləm,
məndən barıt qoxusu gəlmir, başına dönüm.
Hər şeyə baxmayaraq,
yenə də məni sevmək
çox xoşuna gəldisə,
dua et, ayrılmayaq,
duadan yaxşı nə var,
ürəyin gözəldirsə?..
“QIŞ PARKI”
Qırılar qanadın, qırılar qolun,
Uçma, qurban olum, sən hələ xamsan.
Mən yazan şeirdən düşdüsə yolun,
Bəxtəvər adamsan, xoşbəxt adamsan.
Mənə lazım deyil sənin “sağ ol”un,
Bir dəfə ürəkdən sev məni, bəsdir.
Quşların uçmağı aldadır səni,
Onlarda adətdir, səndə həvəsdir.
Qanadın buluddan böyük deyilsə,
Kədərin Uhuddan böyük deyilsə,
Lap böyük olsa da, qorxma, mən varam.
Sənin gəlişinə aşiq olmuşam.
Vurulmaq bir dəfə olur, bilirsən,
Bir də gedişinə vurulammaram.
Uçma, qurban olum, sən hələ xamsan.
Uçsan da, unutma, yerdə mən varam.
Qırılsa qanadın, yansa qanadın,
Yerə bərk düşməyə səni qoymaram.
Sən yaxşı adamsan, yaxşı adamsan.
Atam deyilsən ki, qəfil öləsən.
Əlini qaşığın altına tutub
Anam deyilsən ki, yemək verəsən.
Eybi yox, mənimçün nar dənələmə,
Bir dəfə ürəkdən sev məni, bəsdir.
Səni Qış parkında gözləyəcəyəm,
Tələsdir özünü, mənə tələsdir…
“Ədəbiyyat və incəsənət”
(29.07.2024)
“İrəvan mətbəxindən nümunələr” layihəsində Təndirdə balıq kababı
Rubrikanı Könül aparır.
“Ədəbiyyat və incəsənət” portalının Azərbaycan Milli Kulinariya Assosiasiyası ilə birgə layihəsində sizlərə hər dəfə İrəvan mətbəxindən nümunələr təqdim edirik. Bu nümunələr Azərbaycanın bu sahə üzrə tanınmış mütəxəssisi, əməkdar mədəniyyət işçisi, tarix üzrə fəlsəfə doktoru, kulinar Tahir Əmiraslanovun gərgin əməyi nəticəsində ortaya çıxmışdır.
Bu gün sizlərə
Təndirdə balıq kababının hazırlanma qaydasını təqdim edəcəyik.
DÜSTUR
§ Balıq – 190 qr
§ Kartof – 80 qr
§ Qırmızı pul bibər – 0,1 qr
§ Duz – 4 qr
§ İstiot – 0,05 qr
HAZIRLANMASI:
Araz balığı sazan, Göyçə balığı, dişi siqa təmizlənir, yuyulur, iri tikələrə bölünür. Balıqlar şişə keçirilir, üzərinə duz və qırmızı pul bibər əlavə olunur. Hər bir balıq tikəsindən sonra soyulmuş kartof da şişə taxılır. Kartof balığın sürüşməməsi məqsə- dilə şişə taxılır. Nəticədə balığın yağında bişən kartof ləzzətli olur.
Nuş olsun!
Ədəbiyyat və incəsənət”
(29.07.2024)
GÜLÜŞ KLUBUnda Qoc bürcü
Sərtyel, “Ədəbiyyat və incəsənət”
1.
İnkişaf etmiş ölkələr inkişaf etməkdə olan ölkələrdən narazıdırlar. “Xeyir olsun, onlar inkişaf etməkdədir?”
2.
Sıra ilə gah daşları atmaq, gah yığmaq zamanı gəlir, daim növbələşirlər. Kaş ki, biryolluq daşları ələ almamaq zamanı gələydi…
3.
-Həkim, çox xahiş edirəm, məni müalicə edin.
-Vətəndaş, mən baytaram.
-Heç zad olmaz. Mən onsuz da qoç bürcündənəm.
4.
Oğlanla qız tanış olanda oğlan yaxın bir neçə saat, qızsa uzaq-uzaq illər barədə düşünür.
5.
-Alkoqolun qiymətini niyə qaldırırlar?
-Adamlar az içsinlər deyə.
-Siqatetin qiymətini niyə qaldırırlar?
-Adamlar az çəksinlər deyə.
-Kommunal xidmətlərini bəs niyə qaldırırlar?
-…
6.
Saxta pulkəsən arvad uşaq pul xərclədilcə onları tətifləyir, daha çox xərcləməyə ruhlandırır.
7.
Avtobusda istəmədən gəirdim. Dərhal dörd nəfər mənə tərəf çöndü. Özümü “O səs Azərbaycan”dakı kimi hiss etdim.
“Ədəbiyyat və incəsənət”
(29.07.2024)
RUH – Fəxrəddin Qasımoğlunun yeni detektivi
“Ədəbiyyat və incəsənət” portalı detektiv ustası, polis podpolkovniki Fəxrəddin Qasımoğlunun yeni yazdığı “Ruh” romanını dərc edir..
Fəxrəddin Qasımoğlu dalbadal dərc edilən bir neçə detektivi, xüsusən “Son gecə” böyük oxucu auditoriyası tərəfindən maraqla qarşılanıb. Bu romanda da ənənəvi qəhrəmanlar iş başındadırlar, bu dəfə onlar uşaq oğurıuğunu araşdırırlar.
Özünü nə qədər soyuqqanlı aparsa da, ona Ruhanə deməyimdən tutulduğu gözümdən qaçmadı. Amma bu yalnız bir an çəkdi və o özünü tez ələ ala bildi. Yenə bir qədər pauza verdim. Sonra dedim:
- Əgər əyləşib məni diqqətlə dinləsəniz, başa düşərsiniz ki, əvvəlki adınızın Ruhanə olması, mənim iki gündə öyrəndiklərimin içərisində ən az önəmli olanıdır.
Maraqla mənə baxan ev sahibəsi qəribə şəkildə gülümsəyib ikinci kresloya oturdu.
- Sizi dinləyirəm.
Baxışları yenə də soyuq idi və heç nə ifadə etmirdi. Hələ ki, onun üzərində üstünlük əldə edə bilmədiyimi öz - özümə etiraf etdim. Bu qadınla söhbət doğrudan da çətin olacaqdı. Qaldığım yerdən davam etdim:
- Etiraf edim ki, əvvəllər Ruhanə olduğunuzu öyrənməkdən başqa adınızla bağlı başqa bir şey öyrənə bilməmişəm. Sonradan adınızı niyə dəyişməyinizin səbəbi mənə məlum deyil. Ancaq dediyim kimi, araşdırmamda bu heç də vacib məqamlardan olmadığı üçün bunun üzərində çox dayanmamışam. Lazım bilsəniz özünüz deyərsiniz. İndi isə daha maraqlı şeylərə keçək. Bilin ki, mən səmimi olacam, sizdən də eyni şeyi gözləyirəm.
Bunları deyib həmsöhbətimin reaksiyasına baxdım.
Onun üzünün bir cizgisi də tərpənmədi. Susub heç nə demir, sakitcə daha nə deyəcəyimi gözləyirdi. Bu başa düşülən idi. Xeyli danışsam da, əslində hələ ki, heç nə deməmişdim. Qarşımdakı ağıllı qadınsa bütün kartlarımı açmadan nəsə deməyi lazım bilmirdi. Amma mən də boş - boş danışan biri olmadığım üçün, bu danışdıqlarım elə belə deyildi. Artıq qarşımdakı qadının strategiyasını müəyyən etmiş, söhbətimizi haradan başlayıb haraya gətirəcəyimi bilirdim.
Davam etdim:
- Əvvəlcə ayın 11 - i və 13 - ü tarixlərində gəlmiş qonaqlarınızdan başlayaq. Onlar kim idilər, nə məqsədlə gəlmişdilər, ən əsası da bunu Fərman müəllimlə məndən niyə gizlətmisiniz?
Suallarıma dərhal cavab vermədi. Bir xeyli gözünü mənə dikib beləcə oturdu. Onu tələsdirmirdim. Nəhayət dilləndi:
- Sizi ilk dəfə görəndə başa düşdüm ki, çox ağıllı adamsınız. Əminəm ki, indi verdiyiniz sualların cavablarını da bilirsiniz.
Qısa cavab verdim:
- Bəzilərinin.
- Elə isə deyin, mən də bilim.
Diskussiya aparmaq özü bir elmdir və bu qadın o elmdən kifayət qədər xəbərdar imiş. Bəli, tanıdıqca Ruhanə adını sonradan Sənubərə dəyişmiş bu qadın məni daha çox təəccübləndirirdi. Hiss elətdirmədən söhbətimizdə məni sual verən tərəfdən cavab verən tərəfə çevirməyə çalışır. Onun çaldığı ilə oynamağa çalışacağam, amma yenə də çox informasiya vermədən:
- Deyək ki, o gələnlərdən birinin on beş il həbs cəzasına məhkum olunmuş, üç ay əvvəl azadlığa çıxmış biri olduğunu bilirəm.
- Elə isə, onda siz çox şey yox, hər şeyi bilirsiniz.
- Yeri gəlmişkən, sizə Sənubər, yoxsa Ruhanə deyə müraciət edim?
- Necə istəyirsiz.
- Elə isə, adınızı dəyişməyinizin səbəbini bilmədiyim üçün əvvəlki kimi Sənubər xanım deyəcəm.
- Olsun. Artıq mənimçün heç bir fərqi yoxdur. Sizə çay gətirim, yoxsa kofe?
Aha, gözəl xanım fikirləşmək üçün vaxt udur.
- Zəhmət olmasa çay.
Qalxıb mətbəxə keçdi. Maraqla onun arxasınca baxdım. Bu xanım həqiqətən də bahalı ətirinin otaqdan mətbəxə qədər qoyduğu gözəl rayihə qədər xoş, həvəslə söhbət ediləcək qədər maraqlı bir xanım idi. Söz almaq üçün məharətlə istifadə etdiyi «onda siz hər şeyi bilirsiniz» cümləsi əslində incə bir sual idi. Qarşısındakı adamın daha nələr bildiyini öyrənmək üçün verilmiş, amma sual kimi səslənməyən sual…
Təbii ki, Sənubər kiminlə söhbət apardığının fərqində idi. Bunu başa düşürdüm. Onu da başa düşürdüm ki, buna baxmayaraq son iki gündə topladığım məlumatın dərəcəsini maksimum öyrənməyə çalışıb söhbəti uzatmağa çalışacaq. Onun haqqında kifayət qədər məlumata malik olsam da, əsas bir məqamı özüm üçün hələ də müəyyən edə bilməmişdim. Ona görə də bildiyim hər şeyi deməyə tələsmir, onun özünün danışmağa başlamasını istəyirdim. Dediyim məqam iki variantda ola bilərdi. Birincisi Sənubər uşağı qaçıranlarla əlbir idi və onlara şəraiti özü yaratmışdı. Bəli, kriminalistikada belə hallara da rast gəlinir. Bu halda o özü cinayətin iştirakçılarından birinə çevrilirdi. Mən indi dediyim ehtimala inanmaq istəməsəm də, təxminən 3 ay əvvəl həbsxanadan azadlığa çıxmış birinin bu yaxında Sənubərin evinə qədər gəlməsi, orada bir saatadək qalması, bundan sonra uşağın qaçırılması bu ehtimalı istisna etməyə mane olurdu. Üstəlik, əgər hər şey düşündüyüm kimidirsə, onda uşaq üçün heç bir təhlükə yoxdur və tələb olunan pullar qarşı tərəfə çatan kimi onu maşınla şəhərin harasındasa düşürüb evə getməsini tapşıracaqlar. Ona görə də anasının ürəyi çox rahatdı. İkinci variantda isə, Sənubər buna hansısa səbəbdən məcbur edilə bilərdi. Əlbəttə heç bir ana bu halda belə övladını öz əli ilə təhlükəyə atmaz, ən pis sonluğu da gözaltına alıb zərbəni özünə götürərdi. Çox güman ki, burada onu inandıra bilmiş, böyük ehtimalla isə aldatmışlar və indi o, bərk narahatlıq içindədir. Bu halda o, qurbana çevrilir. Çarəsiz, susmağa məcbur olan qurbana. Ancaq möhkəm dayanıb nigaranlığını büruzə vermir. Bəlkə də hələ nəyəsə ümidi var. Əgər belədirsə, bu halda onun iradəsinə yalnız və yalnız qibtə etmək olar. Bu halda onun belə addım atması və sonradan susması üçün çox tutarlı səbəblər olmalıdır. O isə bu səbəbləri demək istəmir, ya da ki, deməyə qorxur.
Sənubər qayıdıb əlindəki sinini iki kreslonun arasındakı jurnal masasının üzərinə qoydu. Sinidəki çay stəkanını mənimçün, kofe süzdüyü kiçik bardağı özü üçün qoyduqdan sonra kreslosuna oturdu. Oturan kimi bardağı götürüb kiçik qurtumlarla kofedən içməyə başladı. Bu məni dinləməyə hazır olduğuna işarə idi. Mənsə daha söhbəti uzatmaq fikrində deyildim. Onsuz da bu qadın heç nə danışmayacaqdı. Onun kofeni şəkərli, ya şəkərsiz içdiyini bilmirəm. Amma indi deyəcəklərimin bu son dərəcə məğrur qadın üçün ən acı kofedən də acı olacağına şübhəm yox idi.
Danışmağa başladım:
- Şübhə yoxdur ki, dediym hər iki adamla tanışlığınız var. Yoxsa onları heç evinizin kandarına da buraxmazdınız. Özü də evdə tək ola - ola. Birinci gələn haqqında heç nə bilmirəm, kimdir, nəçidir? Amma ondan sonra gələn çox maraqlı keçmişə malik olan Ağamirzə Cəfərov adlı biridir. Vaxtilə qətl törətdiyinə görə məhkum olunub. Həbsdə olarkən valideynləri rəhmətə gedib. Qohumları onların evini satıb dəfn, yas xərcini çəkiblər, qəbrin üstünü götürüblər. Qalan pulu isə mənimsəyiblər. Həbsi on beş il əvvəl baş verib, valideynləri isə bundan dörd - beş il sonra rəhmətə gediblər. Bunları öyrənən Ağamirzə Cəfərov hələ o vaxt, həbsdə olarkən qohumlarının üstündən xətt çəkib. Belə məlum olur ki, qohumları da həbsdə olan birisi ilə ünsiyyət saxlamaq eşqi ilə alışıb yanmırlarmış. Beləcə qohumlar arasında bütün əlaqələr kəsilib. Bu dediyim Cəfərovla onun qohumlarının problemidir. Evin satışından qalan pulun kim tərəfindən mənimsənilməsi mənə qətiyyən maraqlı deyil. Bunu ona görə dedim ki, hal - hazırda Ağamirzə Cəfərovun yaşadığı şəhərdə nəinki qalacağı bir evi, heç gedəcəyi yeri də yoxdur. Əyin - başı da normal əyin-baş deyil. Amma birdən - birə belə birisi sizə qonaq gəlir? Yoxlatdırmışam, qız vaxtı yaşadığınız ünvanda qonşu olmamısınız, üstəlik ayrı - ayrı orta məktəblərdə oxumusunuz. Aranızdakı münasibət nədirsə sonradan yaranıb və adi münasibət olmayıb. İndi deyəcəklərimi nəzakətsizlik kimi qəbul etmənizi istəməzdim. Amma mən qaçırılmış oğlunuzun axtarışlarını həyata keçirən detektivəm və hər şeyi olduğu kimi deməliyəm. Münasibətlərinizin daha dərin olduğunu ehtimal etməyə əsasım var: Ağamirzə, dediyim kimi 15 il əvvəl həbs olunub. Oğlunuzun da 15 yaşı var və o da Ağamirzə adını daşıyır. Burada bir qəribəlik görmürsünüz ki? Bəlkə nəhayət danışmağa başlayasınız?
Sənubər yenə susurdu. Nəhayət əlində tutub hərdən içdiyi kofedən növbəti qurtumu alıb dedi:
- Mənim oğlumun yaşının kiminsə həbsi ilə nə əlaqəsi var? Ağamirzə adı da nə qədər istəsəniz var. Siz bununla nə demək istəyirsiniz? Və mən nəhayət nəyi danışmalıyam?
İndi susmaq növbəsi məndə idi. Bir xeyli susdum. Çünki növbəti deyəcəklərimi indi bu qadına deməmək üçün bayaqdan uzaqdan - uzağa danışır, əsas mətləbin üstünə gəlmədən nəsə öyrənməyə çalışırdım. Ancaq bu qadından hələ ki, bircə lazım olan kəlmə də ala bilməmişdim.
Onun gözlərinin içinə baxıb dedim:
- Əminəm ki, məni həqiqətən də ağıllı adam kimi tanımısınız və bayaqdan dediklərimin heç də əsassız olmadığını başa düşürsünüz. İndi ardına qulaq asın. Bunu özünüz istədiniz. Az əvvəl dediklərimdən başa düşdünüz ki, ötən vaxtı boşuna ötürməmişəm. Bütün bu danışdıqlarımla yanaşı başqa şeylər də öyrənə bilmişəm. Ağamirzə Cəfərovla yanaşı müşahidə dairəmə «Molla» ləqəbli qatı bir cinayətkar da düşüb. Altmış yaşı var. Ondan otuz beşini müxtəlif həbsxanalarda keçirib. Üç dəfə həbs olunub. Hamısı da ölüm işi ilə bağlı. Bundan başqa illər əvvəl ana və iki körpəsini qətlə yetirməkdə şübhəli kimi istintaq altında yatıb. Sübutlar kifayət etmədiyindən sərbəst buraxılsa da, işi aparan müstəntiq həmin ailənin qətlini məhz onun törətdiyinə əmin olduğunu bildirib. Bəs niyə soruşmursunuz bunları sizə niyə danışıram?
“Ədəbiyyat və incəsənət”
(29.07.2024)
