Özbəkistanda çıxan “Darakçi” nəşrində Azərbaycan yazıçısı Əlibala Məhərrəmzadənin “Çovdar çörəyi” romanı hissə-hissə dərc edilir. Roman həm də “Yenigün” nəşriyyatında kitab kimi çıxacaq.

“Ədəbiyyat və incəsənət” portalı xəbər verir ki, atalar və oğullar arasında ənənəvi ziddiyyət mövzusuna toxunan bu roman Azərbaycanda 2019-cu ildə nəşr edilib və böyük uğur qazanıb. Azərbaycan ədəbi tənqidinin görkəmli nümayəndələri Nizami Cəfərov, Vaqif Yusifli, tanınmış yazıçı İlqar Fəhmi roman barədə müsbət rəylər vermişlər. 

Romanın mövzusu kinossenarilər yazılmasına da rəvac vermişdir. Görkəmli kinodramaturq Ramiz Fətəliyevin yazdığı ssenari xüsusilə diqqətçəkəndir.

"Hökümət o zaman özünə potensial üsyançılar hazırlayır ki,cəmiyyətdə xurafatlaşma, cahilləşmə, zombiləşmə sürətlənir, riyakarlıq, saxtakarlıq baş alıb gedir. Bu zaman milli-mənəvi və maddi dəyərlərin, vətənpərvərliyin təbliği effekt vermir, dövlətçilik anlayışı isə məmur və ictimai status anlayışı ilə eyniləşdirilir".

“Ədəbiyyat və incəsənət” portalı xəbər verir ki, yazıçı-publisist Yunus Oğuzun yeni  çapdan  çıxan  "Keçmişdən gələcəyə  nə  daşıyırıq- Tarix İbrətdir" adlı kitabı bu epiqrafla başlayır. 

Kitabda müstəqillik uğrunda mübarizə illərindən   günümüzə qədər olan  proseslər oxucunun diqqətinə çatdırılır.

 Bildiyiniz kimi, Beynəlxalq Muğam Mərkəzi (BMM) muğam sənətimizin elmi-nəzəri və praktiki məsələlərini "Dəyirmi masa" ətrafında müzakirə edir. Layihədə növbəti tədbirin görkəmli xanəndə Seyid Şuşinskiyə həsr olunduğunu bildirmişdik. Bu dəfə daha ətraflı.

Beləliklə, qeyd edək ki, layihənin ideya müəllifi BMM-in direktoru, Xalq artisti Murad Hüseynov, koordinatoru isə fəlsəfə doktoru, tədqiqatçı Gülhüseyn Kazımlıdır.

“Seyid Şuşinski – ustad xanəndə, böyük müəllim” adlı tədbir xanəndənin ad günündə reallaşıb.

Tədbirdə çıxış edənlər bildiriblər ki, zəngin yaradıcılıq yolu keçmiş, Qarabağ xanəndəlik məktəbinin ən böyük simalarından biri Xalq artisti Seyid Şuşinski musiqi xadimi, pedaqoq, müəllim kimi Azərbaycan milli musiqi mədəniyyətinin inkişafında çox mühüm rol oynayıb.

Xalq artisti, professor Möhlət Müslümov Seyid Şuşinskinin tələbəsi olmuş Əməkdar müəllim Nəriman Əliyevlə birgə çalışdığı dövrdə xanəndənin öz ustadından öyrəndiyini tələbələrinə olduğu kimi ötürdüyündən danışıb. Bildirib ki, bu gün də muğam dərslikləri həmin dövrdə Seyid Şuşinski tərəfindən tərtib edilən tədris proqramı əsasında çap olunur.

Bakı Musiqi Akademiyasının professoru Arif Əsədullayev diqqətə çatdırıb ki, “Ağa” deyərək müraciət olunan Seyid Şuşinski uzun illər dayısı Nəriman Əliyevin evində yaşayıb. O, 14 yaşından xanəndəni tanıdığını vurğulayaraq xatirələrini bölüşüb.

Əməkdar artist, tarzən Valeh Rəhimov Seyid Şuşinski ilə ilk dəfə tanışlığından danışaraq həmin gün eşitdiyi ifa ilə bağlı fikirlərini bölüşüb.

Seyid Şuşinski haqqında lentə alınan sənədli filmin rejissoru Kəmalə Musazadə filmin çəkilişlərindən danışıb.

Filmdə xanəndənin obrazını yaradan Əməkdar müəllim Qəzənfər Abbasov rolunun məsuliyyəti ilə bağlı təəssüratlarını bölüşüb.

Layihənin konsert hissəsində Xalq artisti Aygün Bayramova, BMM-in solistləri Əməkdar artist İlkin Əhmədov və xanəndə Məmməd Nəcəfovun ifaları təqdim olunub. Xanəndələri Xalq artistləri Möhlət Müslümov (tar) və Fəxrəddin Dadaşov (kamança) müşayiət edib.

Aprelin 13-də Cəfər Cabbarlı adına Azərbaycan Dövlət Teatr Muzeyində tanınmış teatr və kino aktyoru, Xalq artisti Məbud Məhərrəmovun 65 illiyinə həsr olunmuş tədbir keçirilib.

AzərTAC xəbər verir ki, tədbiri muzeyin direktoru, Əməkdar mədəniyyət işçisi Sevinc Mikayılova giriş sözü ilə açaraq, yubilyara təbriklərini çatdırıb, onun yaradıcılıq yolu haqqında məlumat verib.

Muzeyin əməkdaşı Suğra Niftullayeva aktyorun sənət fəaliyyətindən ətraflı danışıb.

Tədbirdə iştirak edən qonaqlardan Xalq artistləri Ramiz Həsənoğlu, Hacı İsmayılov, Xalq rəssamı Arif Hüseynov, Əməkdar incəsənət xadimi Adil Abbas, rejissor Oleq Səfərəliyev, Əməkdar artist Həcər Ağayeva və başqaları yubilyarı ad günü münasibətilə təbrik ediblər və onunla bağlı öz ürək sözlərini bölüşüblər. Təbriklərə, eyni zamanda aktyorun ailə üzvləri və dostları da qoşulub.

Tədbir çərçivəsində muzey əməkdaşları tərəfindən hazırlanmış və M.Məhərrəmovun həyat və yaradıcılığını əks etdirən videoçarx nümayiş olunub.

Həmçinin aktyorun oynadığı tamaşalardan və çəkildiyi filmlərdən fraqmentlər izlənilib. Eləcə də, Azərbaycan Dövlət Akademik Opera və Balet Teatrının solistləri Xalq artisti xanəndə Gülyaz Məmmədova “Nə gözəldir”, “Dilkəş təsnifi”, Fatimə Cəfərzadə və Prezident təqaüdçüsü Atəş Qarayev “Arşın mal alan” operettasından “Axtarıb tapdım səni”, “Aşiq oldum”, “Arşın mal alan” ariyalarını ifa ediblər.

Bunlardan əlavə, tədbir yubilyarın şərəfinə təşkil olunmuş xoş sürpriz ilə yadda qalıb. Məbud Məhərrəmovun U.Şeksprin “Kral Lir” tamaşasında yaratdığı Təlxək obrazında Xalq rəssamı Arif Hüseynov tərəfindən çəkilmiş portretinin təqdimatı olub.

Əsər Cəfər Cabbarlı adına Azərbaycan Dövlət Teatr Muzeyinin kolleksiyasına daxil edilib.

Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Türk Dünyası İnfo” İctimai Birliyi tərəfindən həyata keçirilən “Zəfər duyğularının ədəbiyyatda və nəşrlərdə təzahürü” adlı layihəsi əsasında “Zəfər duyğuları” poeziya antologiyası nəşr olunub. Kitab “Şuşa İli”nə həsr edilib.

Sözügedən antologiyada ümumilikdə 46 tanınmış şairin şeirləri yer alıb. Nəfis şəkildə, 300 tirajla çap olunmuş 220 səhifəlik nəşrin məsləhətçisi akademik, Milli Məclisin deputatı Nizami Cəfərov, “Ön söz”ün müəllifi AMEA-nın şöbə müdiri, filologiya elmləri doktoru, professor Bədirxan Əhmədli, redaktorları, Sumqayıt Poeziya Evinin direktoru, şair İbrahim İlyaslı və filologiya üzrə fəlsəfə doktoru, Atatürk Mərkəzinin şöbə müdiri İlahə Abdullayevadır.

Layihə ilə bağlı fikirlərini AzərTAC-a açıqlayan “Türk Dünyası İnfo” İctimai Birliyinin sədri Dəyanət Osmanlı deyib: “Tariximiz, cəmiyyətimiz üçün daimi gündəmdə olan ümdə məsələlərdən biri də ədəbiyyat vasitəsilə qələbəmizin ruhunda dayanan ictimai əhəmiyyətli faktların, milli-tarixi gələnəklərimizin, vətənpərvərlik tariximizin, o cümlədən milli-mənəvi dəyərlərimizin təbliğinin gücləndirilməsidir. Layihəmizin adından da bəlli olduğu kimi, Zəfər tariximizin təbliğinə yönələn əsərlərin, kitabların yazılmasına böyük ehtiyac vardır. Ona görə də layihənin məqsədinə uyğun olaraq ölkəmizdə, Türkiyədə, Gürcüstanda və digər bölgələrdə Vətən müharibəsindəki Zəfər tariximizi vəsf edən poetik əsərləri toplayıb dəyərləndirərək antologiya halında çap etmişik”.

Dəyanət Osmanlı xüsusi olaraq vurğulayıb ki, 44 günlük haqq savaşında əzəli və əbədi torpağımız Qarabağın kənd-kənd, rayon-rayon, şəhər-şəhər 30 illik erməni işğalından azad olunması hər bir Azərbaycan insanının həyatına yeni bir möhtəşəm qürur qatmışdır. Vətən müharibəsinin ədəbi-bədii, mədəni, tarixi-ictimai düşüncədə təsirləri təkcə Qarabağ mövzusu ilə kifayətlənmir, həm də yeni tarix yazılır. Bu amil yeni nəslin keçmişə, bugünə və gələcəyə baxışlarının optimallaşmasında mühümdür.

O, antologiyanı tərtib edərkən bir sıra məqamlara toxunulduğunu söyləyib: “Ədəbiyyat yeni nəsillərin milli ruhunda, dilində, adət-ənənəsində, vətənpərvərlik duyğularında, eləcə də müasir dünyada yaşayan bütün azərbaycanlıların bugünkü həyatının, gələcəyinin ən aktual stimulverici qüvvəsi kimi çıxış edir”.

Qeyd edək ki, kitabın kitabxanalara, ziyalılara və gənclərin daha çox təmsil olunduğu müxtəlif auditoriyalara, QHT nümayəndələrinə paylanılması nəzərdə tutulub.

Gənc və istedadlı rəssamlar üçün öz istedadlarını realizə etmələri üçün əlahəddə bir şans yaranır: Bu gün Bakı Fotoqrafiya Evində “Re: Art” incəsənət agentliyinin və saytının təqdimatı keçiriləcək. Təbii ki, incəsənət ümumi anlayışdır, söhbət konkret rəssamlıqdan gedəcək. 

“Ədəbiyyat və incəsənət” portalı xəbər verir ki, təqdimatda agentliyin iştirakçı rəssamları Nərgiz Əsgərova, Şəlalə Salamzadə, Emin Mathers, Ləman Məmmədova və Leyli Salayevanın əsərlərinin videotəqdimatı da nümayiş ediləcək. Videoya yazılan musiqilər Azər Hacıəsgərliyə məxsusdur.

Agentlik “Mədəni üfüqlər” layihəsi çərçivəsində incəsənət xadimləri, mədəniyyət fəalları və yaradıcı sahibkarlar üçün təklif olunan 6 layihədən biridir. Beynəlxalq ekspert, Əməkdar incəsənət xadimi Cahangir Səlimxanovun müəllifi olduğu "Mədəni üfüqlər" layihəsinin məqsədi iştirak edənlərə təlim verməklə, yenilikçi fikirlərin ərsəyə gətirilməsində və bu fikirlərin sosial cəhətdən tələb olunan təşəbbüslərə və ya məhsullara, xidmətlərə çevrilməsində onlara yol göstərmək, eləcə də onların qarşısında yeni üfüqlərin açılmasına nail olmaqdır. 

Qeyd edək ki, Agentlik müasir incəsənətlə məşğul olan, fərqli düşüncəli insanlara, ilklərə imza atan qətiyyətli, inamlı rəssamlara dəstək vermək məqsədilə yaradılır.

Belə rəssamlar isə heç də az deyil.

Xəbər verdiyimiz kimi, Azərbaycan Respublikası mədəniyyət naziri Anar Kərimovun əmri ilə İbrahim Müseyib oğlu Əliyev Bakı Şəhər Mədəniyyət Baş İdarəsinin rəisi təyin olunub. Dünən Vaqif Mustafazadə adına 2 saylı uşaq incəsənət məktəbində yeni rəhbərin kollektivə təqdimatı keçirilib. 

Mədəniyyət Nazirliyinin Strateji inkişaf və layihələrin idarə edilməsi şöbəsinin müdiri – Aparatın rəhbəri v.i.e Vüqar Məmmədov İbrahim Əliyevi kollektivə təqdim edən zaman Baş İdarənin Nazirliyin aparıcı qurumlarından biri olduğunu və bir çox əhəmiyyətli tədbirlərin təşkilində aparıcı rol oynadığını, burada çalışan mütəxəssislərin nazirlik çərçivəsində ekspert kimi cəlb edildiyini xüsusilə vurğulayıb. “Şuşa ili” çərçivəsində keçiriləcək tədbirlərdə, təcrübə mübadilələri zamanı Baş İdarədə çalışan mütəxəssislərin yaxından iştirak etmələrini, bölgələrlə paytaxt müəssisələri arasında birgə layihələrin həyata keçirilməsinin zəruriliyini qeyd edib.

İbrahim Əliyev çıxışında mədəniyyət naziri Anar Kərimova göstərilən etimada görə təşəkkürünü bildirib və Azərbaycan Respublikası Prezidenti cənab İlham Əliyevin mədəniyyət sahəsində qarşıya qoyduğu vəzifələri  Bakı şəhəri üzrə uğurla yerinə yetirməyə çalışacağını söyləyib.

Daha sonra V.Məmmədov İdarə qarşısında duran əsas vəzifələrdən söhbət açıb və altı ay ərzində strateji qiymətləndirmələrin aparılması, həssas təbəqələrlə, xüsusilə şəhid ailələri və qazilərlə işin müntəzəm aparılması, mətbuatla iş, ictimaiyyətlə əlaqələrin genişləndirilməsini vurğulayıb.  Bu sahələr üzrə tövsiyələr verərək kollektivə uğurlar arzulayıb.

Bəs yeni idarə rəisi kimdir? “Ədəbiyyat və incəsənət” portalı xəbər verir ki, Əliyev İbrahim Müseyib oğlu 12 aprel 1976-cı ildə anadan olub.

Ali Peşə Məktəbi–Bakı Kompüter Liseyini, Azərbaycan Dövlət Neft Akademiyasını Avtomatika və texniki sistemlərdə idarəetmə ixtisası üzrə bitirərək bakalavr dərəcəsi, daha sonra həmin Akademiyanı Texniki sistemlərdə idarəetmə və informatika ixtisası üzrə bitirərək magistr dərəcəsi alıb. Azərbaycan Dövlət İqtisad Universitetini Maliyyə və kredit ixtisası üzrə bitirərək iqtisadçı peşəsinə yiyələnib. Azərbaycan Texniki Universitetinin Nəqliyyat fakültəsini Nəqliyyatda daşımaların və idarəetmənin təşkili ixtisası üzrə bitirib.

Azərbaycan Respublikasının Kənd Təsərrüfatı Nazirliyində, Bakı Kompüter Liseyində, Azərbaycan Hava Yolları QSC-də, İqtisadi İnkişaf Nazirliyində, Rəqəmsal İnkişaf və Nəqliyyat Nazirliyində müxtəlif vəzifələrdə işləyib.

2004 – 2006-cı illərdə Heydər Əliyev Fondunda ictimai əsaslarla çalışıb.

Ailəlidir, 2 övladı var.

2022-ci ilin may ayında görkəmli Azərbaycan bəstəkarı, SSRİ Xalq artisti Rauf Soltan oğlu Hacıyevin anadan olmasının 100 illiyi tamam olur.

Rauf Hacıyev rəngarəng yaradıcılıq palitrasına malik sənətkar kimi Azərbaycanın musiqi mədəniyyəti tarixində özünəməxsus yer tutur. Müxtəlif janrlarda çox sayda qiymətli əsərlər, o cümlədən simfoniya, oratoriya və kantatalar meydana gətirən bəstəkara uğurlu səhnə təcəssümü tapmış operettaları xüsusilə geniş şöhrət qazandırmışdır. Rauf Hacıyevin milli motivlərlə müasir üslubun vəhdətində yaratdığı vətənpərvər ruhlu lirik mahnılar məşhur ifaçıların repertuarına daxil olmuş və Azərbaycan mahnı janrının inkişafında əhəmiyyətli rol oynamışdır. Onun sənətinin yüksək bədii keyfiyyətləri həmçinin kinofilmlər və teatr tamaşaları üçün bəstələdiyi musiqi lövhələrində aydın təzahürünü tapmışdır. Rauf Hacıyev respublikanın mədəni həyatında yaxından iştirak etmiş və səmərəli ictimai fəaliyyəti ilə tanınmışdır.

Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq və görkəmli bəstəkar Rauf Hacıyevin Azərbaycanda musiqi mədəniyyətinin inkişafında təqdirəlayiq xidmətlərini nəzərə alaraq qərara alıram:

1. Azərbaycan Respublikasının Mədəniyyət Nazirliyi Xalq artisti Rauf Hacıyevin 100 illik yubileyi ilə bağlı tədbirlər planı hazırlayıb həyata keçirsin.

2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.

İlham Əliyev

Azərbaycan Respublikasının Prezidenti

Bakı şəhəri, 13 aprel 2022-ci il