Super User
“Oskar" mükafatı laureatlarının adı fevralın 8-də açıqlanacaq
94-cü “Oskar” mükafatı laureatlarının adı fevralın 8-də canlı yayımla Amerika Kino Sənəti və Elmləri Akademiyasının rəsmi tviter səhifəsində açıqlanacaq.
Qeyd edək ki, ümumilikdə 23 nominasiya üzrə qaliblərin adını aktyorlar Tracee Ellis Ross və Leslie Jordan səsləndirəcək.
Martın 27-də baş tutacaq rəsmi mükafatlandırma mərasiminin isə aparıcısı hələlik məlum deyil.
Builki “Oskar” namizədlərinin müəyyən edilməsi üçün keçirilən səsvermə akademiyanın tarixində ən yüksək fəallığı ilə fərqlənib. Ümumilikdə 9500 üzvdən 9487-si səsvermədə iştirak edib.
Lütfi Zadə, Qara Qarayev və Rüstəm İbrahimbəyov günləri, Facebook-un yaranışı, hidrohen bombasının da itməsi
4-5 fevralın təqvimi Varisin təqdimatında
4 fevral
Ümumdünya xərçənglə mübarizə günü
World Cancer Day 2008-ci ildən qeyd edilir, məqsəd xərçəng xəstəliklərinin azaldılmasına nail olmaqdır.
2019-cu ildə “Mən varam və mən olacağam” adlı kampaniyaya start verildi, bu, xərçəng xəstələrinə əlavə güc verməyə, onları mübariz olmağa bir cağırış idi. ÜST-ün məlumatına görə, xərçəngin 100-dən çox növü var, hər il milyonlarla insan bu xəstəlik səbəbindən həyatlarını itirirlər. Yeni xərçəngə tutulma hallarının 60 faizi Afrika, Asiya, Mərkəzi və Cənubi Amerika ölkələrinin payına düşür. Xərçəngdən ölüm hallarının 70 faizi də bu regionlarda baş verir.
Bütün dünyada kişilər əsasan xərçəngin bu 5 növündən ölürlər: ağciyər xərçəngi, mədə xərçəngi, qaraciyər xərçəngi, düz bağırsaq xərçəngi və həzm sistemi xərçəngi. Qadınları öldürən əsas xərçəng növlər isə bunlardır: döş xərçəngi, ağciyər xərçəngi, mədə xərçəngi, düz bağırsaq xərçəngi və qadınlıq yolu xərçəngi.
Xərçənglə mübarizə günündə insanlara əsas o təlqin edilir ki, xərçəng tam müalicəsiz xəstəlik deyil, tütündən istifadəni dayandırmaqla, alkoqoldan istifadəni azaltmaqla, sağlam qidalanmaqla, çox hərəkətli olmaqla xərçəngdən ölüm hallarını 30 faiz azaltmaq olar.
Allah bütün xəstələrə şəfa versin.
Rissyün günü –baharın başlanğıcı
Budur, artıq gündoğanda – Yaponiyada Rissyün günü bayram edilir, bu, baharın gəlişi deməkdir. Yapon inanclarına və elmi ehtimallarına görə, fevralın 4-də artıq bahar atributları özünü göstərməyə başlayır, qış çıxıb getmək üçün qapı kəndarına gəlir.
Çox keçməz ki, biz də görərik axır çərşənbə gəldi, ardınca Novruz gəldi. Bu bir göz qırpımında bitən gödək həyatda hər şey elə sürətlə baş verir ki.
Milli ev şorbası günü
Vakuum günüdür bu gün həm də. Alimlər vakuum barədə bilgiləri ilk dəfə 4 fevral günündə açıqlayıblar. Şri-Lankanın müstəqilliyi günüdür, “Seylon çayı” deyibən bəh-bəhlə içdiyimiz çayın vətəninə təbriklər! Anqolada bu gün silahlı üsyan günüdür, 1961-ci ildə anqolalı vətənpərvərlər Luanda həbsxanasına basqın edib öz siyası liderlərini azad ediblər. Latviyada çox maraqlı bayramdır, sıyıq günü. Bu ölkədə sıyıq çox sevilir, hətta süd istehsalçıları sıyıq konservaları da istehsal edirlər.
ABŞ bu gün bayramları yanaşı düzüb, özü də müxtəlif təyinatlı bayramları. Poçtalyon günüdür, bu gün hər kəs poçtalyonlardan minnətdarlıq kəlmələrini əsirgəməməlidir. Milli Qırmızı libas günüdür. Amerikalı xanımlar bu gün yeni tikdirdikləri, yaxud aldıqları qırmızı libas geyinəcəklər. Deyilənə görə, bunu etmək, insanlara uğur gətirir. Təbii ki, söhbət ABŞ-dan gedirsə, mütləq mətbəx bayramları ilə qarşılaşmaq labüdlüyü var. Bu gün gündəmdə iki belə bayram dayanır. Milli ev şorbası günü, bir də Milli içinə tərəvəz doldurulmuş göbələk günü.
Yalta konfransı
2006-cı ilin 4 fevralında Turin metropoliteni açılıb. Facebook sözü, onun göy rəngli loqosu az qala beşikdəki uşağa da doğmadır. Bu gün facebook-un ad günüdür. 2004-cü ilin 4 fevralında Harvard Universitetinin tələbəsi Mark Sukerberq bu sosial şəbəkəni rəsmən yaradıbdır. 1998-ci ildə Brüsseldə qloballaşma əleyhinə olan insanlar Bill Qeytsin sifətinə tort çırpıblar. 1976-cı ildə zəlzələ Qvatemalada 23 min insanın ölümünə səbəb olub. 1974-cü ildə iki illik təlimdən sonra ABŞ-da Nim Çimski adlı şimpanze ilk sözü yaza bilib. 1971-ci ildə Britaniyanın Rolls Roys avtomobil konserni bankrotluğunu elan edib. 1945-ci ilin 4 fevralı tarixi bir gündür, Yaltadakı Livadiya sarayında Ruzvelt, Çörçill və Stalin Almaniyanın qeydsiz-şərtsiz təslim olması razılığına gəliblər. 1943-cü ildə Sürixdə Bertold Brextin “Sezuanlı xeyirxah insan” tamaşasının premyerası olub. 1708-ci ildə İohann Sebastyan Baxın 71-ci kantantası onun ilk çap olunan əsəri kimi tarixə düşüb. 1169-cu ildə zəlzələ Siçiliyada 15 min insanın ölümünə səbəb olub. 634-cü ildə Əmir ibn əl Asın başçılığı altında müsəlman ordusu Datxin altında bizanslılar üzərində tarixi qələbə qazanıb.
Bu gün dünyaya gəlmiş məşhurlar az deyil
1988-ci ilin 4 fevralnda Sumqayıtda Məsumə Məmmədova dünyaya gəlib. Heç vaxt “nə olsun” deməyə tələsməyin. Söhbət dövrümüzün ən populyar müğənnilərindən biri olan Damladan gedir. 1961-ci ilin bu günündə Azərbaycan Respublikası 1-ci vitse-prezidenti katibliyinin rəisi, Azərbaycan Gimnastika Federasiyasının vitse-prezidenti Altay Həsənov, 1945-ci ildə Azərbaycan musiqisinin canlı klassiki, korifey sənətkar, hazırda Rusiyadakı səfirimiz Polad Bülbüloğlu, 1939-cu ildə xalq artistimiz Tarıyel Qasımov, 1921-ci ildə “Ən böyük azərbaycanlılar” siyahısında ön yerlərdən birini tutan dahi şəxsiyyət, süni intellekt sahəsi üzrə dünyanın ən ünlü alimi, qeyri-səlis məntiq nəzəriyyəsinin banisi Lütfi Zadə, 1910-cu ildə iki dəfə Sovet İttifaqı Qəhrəmanı olmuş əfsanəvi hərbçimiz Həzi Aslanov, 1906-cı ildə amerikalı astronom, Plutonu kəşf etmiş Tombo, 1881-ci ildə fransız rəssamı, “mexaniki incəsənət” təmayülünün görkəmli nümayəndəsi Fernan Leje, 1881-ci ildə rus kinematoqrafiyasının banilərindən biri, kinorejissor Yakov Protozanov, 1875-ci ildə aerodinamikanın atası, alman fiziki Lüdviq Prandtl, 1746-cı ildə tarixin ən məşhur polyaklarından olan, antirus üsyanının rəhbəri Tadeuş Kostyuşko dünyaya gəliblər.
Cavanşir Cahangirovu anırıq
2020-ci ilin 4 fevralında Azərbaycan televiziyası tarixində iz qoymuş, bir vaxtlar “Çay dəstgahı” verilişi ilə məşhurlaşmış istedadlı telejurnalist, 2000-ci illərdə Azərbaycan Radiosuna rəhbərlik etmiş Cavanşir Cahangirov dünyadan köçüb, ruhu şad olsun! 1940-cı ilin 4 fevralında qırmızı cəllad, on minlərlə sovet insanın, o cümlədən azərbaycanlının qətlinə fərman vermiş SSRİ dövlət təhlükəsizliyi və daxili işlər nazirliyi rəhbəri Nikolay Yejov, 1925-ci ildə alman arxeoloqu, qədim Vavilonun yerini tapmış Robert Koldovey, 1894-cü ildə saksafon çalğı alətini kəşf etmiş belçikalı musiqiçi Adolf Saks, 1871-ci ildə rusların tarix boyu ən çox qorxduqları 3 şəxsdən biri – Şimali Qafqaz xalqılarının milli azadlıq hərəkatının başçısı Şeyx Şamil dünyadan köçüblər.
5 fevral
Beynəlxalq Skautlar Günü
Skaut yaşı 6 yaşdan ta ki 21 yaşa qədər hesab edilir. Bu gün 216 dünya ölkələrindən 50 milyondan çox uşaq, yeniyetmə və gənc skaut hərəkatının sıralarında birləşərək, «Hər gün bir xeyirxah iş görək” devizi altında fəaliyyət göstərirlər. Skaut sözünün tərcüməsi kəşfiyyatçı deməkdir, skaut hərəkatının banisi isə general Robert Baden-Pauell olub. Bu general istefada olarkən “Oğlanlar üçün kəşfiyyat” kitabını yazıb. Bu kitabda da o, yeniyetmə və gənclərin bir vahid ideya ətrafında birləşməsinin əsasını qoyub.
O cümlədən ölkəmizdə də fəaliyyət göstərən Skaut təşkilatı – müstəqil, qeyri-siyasi qurumdur, bu, uşaq, yeniyetmə və gənclərlə bir iş proqramıdır ki, özlüyündə bütün çətinliklərə baxmayaraq daim ayaqda qalmağı ehtiva edir. Skautların vətəni İngiltərə hesab edilir, 1907-ci ildə bu ölkədə ilk boyskaut düşərgəsi açılıb.
Skaut qalstukunu sonradan sovetlər götürüb pioner qalstuku kimi istifadə ediblər, eləcə də “Həmişə hazır ol” şüarını.
Skautun yaşadığı qaydalar şərçivəsi isə bunlardır: faydalı olmaq, bütün skautların dostu və qardaşı olmaq, xeyirxah, alicənab olmaq, yalan danışmamaq, təbiəti qorumaq, gülümsər olmaq, çətinlikdən qorxmamaq.
Azərbaycan skautlarının andı bilirsiniz necədir? And içirəm öz şərəfimə, məndən asılı hər bir şeyi edəcəyəm ki, Allah və Azərbaycan qarşısında olan borcumu yerinə yetirim, hər vaxt başqalarına kömək edim, skaut qanunlarına tabe olum.
Skaut gününüz mübarək, əziz uşaq, yeniyetmə və gənclər.
Ümumdünya Nutella günü
Bu bir uşaq bayramıdır, məşhur yerfındıqlı şokolad pastasının şərəfinədir. Bu qidanı bütün dünyada uşaqlar çox sevirlər, amma bir çox rejionda, xüsusən müharibələr və aclıqlar çəkən Afrika və Mərkəzi Asiya regionunda uşaqlar ona tamarzıdırlar. Nutella günündə xüsusən avropalı və amerikalı uşaqlar aclıq çəkən uşaqlara sovqatlar, mütləq də Nutelle göndərirlər.
Səhər naharına dondurma günü
Bu dadlı qidanı adətən insanlar səhərlər yeməzlər, amma bu gün insanlardan məhz səhər naharına dondurma yemək təvəqqe olunur. Bekarçılıqdan ortaya çıxan bir gündür əlbəttə. Qayğısız əcnəbi insanlar bilmirlər ki, başlarını nə ilə qatsınlar.
Monarx günü
Monarx günüdür həm də bu gün. Amma bu monarx o monarxdan deyil, yəni, kilsə ilə əlaqəli bir gün deyil. Söhbət nimfalid ailəsindən olan kəpənəkdən gedir, Şimalı Amerikada məskunlaşmış bu kəpənək olduqca valehedici olduğuna görə şəninə gün təsis ediblər.
Finlandiyada bayraq, Burundidə birlik, Danimarkada Şahzadə Merinin tacı, Pakistanda Kəşmirlə həmrəylik, Argentinada Linkoln və Buanes-Ayres karnavalları günüdür. İsraildə Tu bi-Şvat bayramıdır. Yəhudi təqvimi ilə şvat ayının 15-ci günündə qeyd edilən bu bayramın qeyri-rəsmi adı “Ağaclar üçün Yeni il” adlanır, insanlar bir-birini görcək gülümsəyərək “Roş xa-Şana La İlanot” söyləyirlər.
O ki qaldı Amerikaya, onlarda bu gün Milli şokoladlı fondyu günüdür. Fondyu – çörək, kartof və əridilmiş pendirin şokoladla süfrəyə verilməsidir.
La Skalada “Otello”nun premyerası
2009-cu ilin 5 fevralında Somalı piratları rəsmən 3200000 dollar pul alaraq Ukraynanın “Faina” gəmisini 17 nəfər ekipajla birgə azad edərək tarixdə ilk presidentin əsasını qoyublar. 1991-ci ildə Qırğızıstanın paytaxtı 65 il bolşevik terrorçusu Frunzenin adını daşıdıqdan sonra Bişkek olub. 1958-ci ilin 5 fevralı qəribə bir olayla yadda qalıb. Jorjiya sahillərindəki təlim zamanı aviaqəzada hidrohen bombası itib. Hələ də həmin bomba tapılmayıb. 1952-ci ildə Nyu-York üçişıqlı işıqfor işlədilən ilk şəhər kimi tarixə düşüb. 1924-cü ildə BBC radiosu Qrinviç abservatoriyasından dəqiq vaxt siqnalları verməyə başlayıb. 1920-ci ildə Ukraynada ataman Maxno vərəqələr yayaraq yerli xalqı rus bolşevikləri ilə mübarizəyə səsləyib. 1916-cı ildə Sürixdə “Kabare Volter” – dadaizmin yarandığı məkan fəaliyyətə başlayıb. Dadaizmin əsas prinsipləri irrasionalizm, mövcud kanon və stereotiplərin dağıdılması olub. 1887-ci ildə Milanın La Skala teatrında Verdinin “Otello” operasının premyerası olub. 1783-cü ildə İtaliyanın Kalabriya əyalətində tarixin ən uzunmuddətli zəlzələsi qeydə alınıb – iki ay davam edən yeraltı təkanlar və sunami 180 yaşayış məskənini dağıdıb, 60 min insan həyatını itirib.
Üç dahi azərbaycanlının doğulduğu gün
1985-ci ilin 5 fevralında dünya futbolunun ən parlaq ulduzu – Kriştianu Ronaldu, 1968-ci ildə Türkiyənin xarici işlər naziri Mövlud Çavuşoğlu, 1878-ci ildə fransız mühəndisi, “Sitroen” kompaniyasının yaradıcısı Andre-Qustav Sitroen, 1840-cı ildə Amerika silah konstruktoru, pulemyotu kəşf etmiş Qayri Maksim, 1812-ci ildə fransız baronu, Puşkini dueldə öldürmüş Jorj Dantes dünyaya gəliblər.
Təqvimdə çox az sayda günlər var ki, həmin gün bir xalqa məxsus bir neçə dahi insan doğulur. 5 fevral da belə günlərdən biridir. 1939-cu ilin bu günündə dünyaşöhrətli azərbaycanlı yazıçı, ssenarist Rüstəm İbrahimbəyov, 1923-cü ildə tanınmış azərbaycanlı tarzən Baba Salahov, 1918-ci ilin bu günündə isə dahi azərbaycanlı bəstəkar, dünya musiqi irsində əvəzsiz yerə malik Qara Qarayev doğulublar.
Niyə də 5 fevralı dahilər günü elan etməyək ki?
Günün fotosu: Çeçenistandakı 400 min nəfərlik mitinqin əks-sədası
Qroznı şəhərində 400 min kişi - ölkənin kişi əhalisinin 80 faizi kütləvi nümayişə çıxaraq Rusiya KİV-lərinin, xaricdə yaşayan bəzi şəxslərin çeçenlər əleyhinə çıxışlarını lənətləyib qisas tələb etməsindən sonra Kreml bərk narahat olub. Dərhal Putin Kadırovla telefon əlaqəsi quraraq xalqı sakitləşdirməyi xahiş eləyib.
Foto: Euronews
“Mədəni Yenilənmə” layihəsi 2022-ci ildə də davam etdiriləcək
Mədəniyyət Nazirliyi və YARAT Müasir İncəsənət Məkanının birgə təşkilatçılığı ilə ictimaiyyətdə böyük əks-səda doğuran “Mədəni Yenilənmə” layihəsi 2022-ci ildə də davam etdiriləcək.
“Ədəbiyyat və incəsənət” portalı nazirliyə istinadən bildirilir ki, layihə çərçivəsində ilin ilk tədbirinə Azərbaycanın Xalq artisti, Türkiyə Radio və Televiziya Qurumunun bədii icmalarından biri olan Ankara Radiosu Çoxsəsli Xorunun bədii rəhbəri və dirijoru Elnarə Kərimova və xor kollektivi dəvət olunub.
Fevralın 15-də Azərbaycan Dövlət Akademik Filarmoniyasında Elnarə Kərimovanın səhnə fəaliyyətinin 30 illik yubileyi qeyd olunacaq. Konsertdə dirijorun rəhbərliyi ilə Ankara Radiosu Çoxsəsli Xorunun ifasında müxtəlif bəstəkarların xor əsərləri səsləndiriləcək. Eyni zamanda, səfər çərçivəsində Qarabağ Zəfəri ilə bağlı Türkiyə və Azərbaycanın birgə strateji layihəsi kimi dirijor Rauf Abdullayevin rəhbərliyi ilə TRT Ankara Radiosu Çoxsəsli Xorunun, Azərbaycan Dövlət Xor Kapellasının və Ü.Hacıbəyli adına Azərbaycan Dövlət Simfonik Orkestrinin ifasında dahi Azərbaycan bəstəkarı Qara Qarayevin “Zəfər marşı”nın səs yazısı nəzərdə tutulub.
Qeyd edək ki, bu əsər orijinalda “Dəniz neftçilərinin mahnısı” adlanırdı. E.Kərimovanın təşəbbüsü və bəstəkar Fərəc Qarayevin razılığı ilə bu əsərin rus dilində olan sözləri Zəfərə həsr olunmuş Azərbaycan dilində sözlərlə əvəz edilib.
Həmçinin “Mədəni Yenilənmə” layihəsi çərçivəsində fevral 17-də Elnarə Kərimovanın Azərbaycanın müxtəlif xor kollektivlərinin iştirakı ilə YARAT Müasir İncəsənət Məkanında xor ifaçılığı üzrə ustad dərsi keçiriləcək.
Qeyd edək ki, Elnarə Kərimova Üzeyir Hacıbəyli adına Azərbaycan Dövlət Konservatoriyasında bəstəkarlıq və xor dirijorluğu fakültəsindən müvəffəqiyyətlə məzun olub. 26 yaşında Azərbaycan Dövlət Xor Kapellasının bədii rəhbərliyinə seçilib və bu xor ilə bir çox ölkədə qastrol səfərində olub. 1992-ci ildə Türkiyə Cümhuriyyətinin dəvəti ilə Ankaraya gələrək, “TRT Çoxsəsli Xoru” bədii rəhbəri vəzifəsində işləməyə başlayıb. O, Türkiyənin bir çox şəhərindəki festival və tədbirlərdə 300-dən artıq konsert verib. E.Kərimova xor musiqisinin inkişafı və yayılması üçün müxtəlif tədris ocaqlarında (Ankara Dövlət Konservatoriyası, Bilkənd Universitet) müəllimlik etmiş və həvəskar xor qrupları ilə işlənib.
O, 1999-cu ilin may ayından etibarən “Orfeon” kamera xoru ilə işləməyə başlayıb. Milli və beynəlxalq səviyyəli müsabiqə və festivallarda bədii rəhbəri olduğu konsertlərlə birlikdə “Orfeon”un ilk albomuna da imza atıb. E.Kərimova bu xor ilə İngiltərə və Kanadada birinci yerə çıxmış, Avstriyadakı xor olimpiadalarında 4 gümüş medal qazanmış, Belçika, Pakistan, İsrail, Yaponiya və Çində konsertlər verib.
2009-cu ilin sentyabr ayında TÜRKSOY-un təqdim etdiyi beynəlxalq layihədə Ü.Hacıbəylinin “Koroğlu” operasından görkəmli xor səhnələrini işləyib. 2010-cu ilin noyabr ayında Azərbaycan Mədəniyyət və Turizm Nazirliyinin təşəbbüsü ilə “Buta” kamera xorunu yaradıb. O, 2012-ci ilin mart ayında “Zirvə” mükafatına layiq görülüb. 2015-ci ildə TÜRKSOY Beynəlxalq Kamera Xoru ilə Almaniyanın Maqdeburq şəhərində Avropa Xor Oyunlarında qızıl medal qazanıb. 2011-ci ildə Azərbaycan Respublikasının Prezidentinin Sərəncamı ilə Əməkdar artist, 2018-ci ildə isə Xalq artisti fəxri adlarına layiq görülüb.
Xatırladaq ki, “Mədəni Yenilənmə” Mədəniyyət Nazirliyi və YARAT Müasir İncəsənət Mərkəzinin 2021-ci ilin oktyabr ayından etibarən keçirilən müştərək layihəsidir. Layihənin məqsədi hazırda Azərbaycanın hüdudlarından kənarda yaşayıb-yaradan mədəniyyət və incəsənət xadimlərini, görkəmli simaları çağdaş nəslə tanıtdırmaq, onların doğma vətənlərində kəsb etdiyi əhəmiyyəti vurğulamaq, fəaliyyət təcrübəsi ilə peşəkar bilgilərinin mübadiləsini təmin etmək, bir ildən artıq sürən pandemiya səbəbindən fəaliyyət böhranı ilə üzləşdiyi bir vəziyyətdə onlara fəaliyyət və ifa imkanı yaratmaq, eləcə də mədəniyyətsevərlərin mənəvi ehtiyacını təmin etməkdir.
Beynəlxalq Muğam Mərkəzi “Muğam axşamları” adlı layihəsini bu ayın 17-də təqdim edəcək
Mədəniyyət irsimizin ən dəyərli nümunələrindən olan muğamın daim diqqət mərkəzində olması fərəhləndirici haldır. Beynəlxalq Muğam Mərkəzinin böyük maraqla gözlənilən “Muğam axşamları” layihəsinin növbəti konserti fevralın 17-də təqdim olunacaq.
Beynəlxalq Muğam Mərkəzindən bildirilib ki, həmin gün sevilən xanəndələr Mirələm Mirələmov, Məmməd Nəcəfov və Nisbət Sədrayeva “Rast” muğamını ifa edəcəklər. Xanəndələri BMM-nin solistləri tarzən Rövşən Qurbanov, Ceyhun Muradov (kamança), Əməkdar artist Təranə Əliyeva (qanun), Amil Mustafayev (nağara) və Vasif Yusibli (ud) müşayiət edəcək.
Qeyd edək ki, Beynəlxalq Muğam Mərkəzi Azərbaycan milli musiqisinin təbliğinə həsr olunmuş bir neçə layihə həyata keçirir ki, onlardan biri də “Muğam axşamları” layihəsidir. Bu layihə çərçivəsində tanınmış ifaçılar tərəfindən muğamlar, xalq mahnıları və təsniflər səsləndirilib. Muğam sənətimizin fəlsəfəsini gələcək nəsillərə çatdırmaq məqsədilə reallaşan layihəyə tamaşaçılar böyük maraq göstərməkdədir.
İlin sonuna kimi Beynəlxalq Muğam Mərkəzinin təşkilatçılığı ilə "Rast" , "Şur", "Zabul-Segah", "Çahargah", "Bayatı-Şiraz", "Humayun", "Şüştər", "Şahnaz", "Orta Mahur", "Arazbari", "Osmanlı", "Heydəri", "Bayatı Qacar", "Mahur hindi", "Qarabağ şikəstəsi", "Xaric segah", "Heyratı", "Mirzəhüseyn segahı", "Kəsmə şikəstə", "Bayatı Kürd" , "Ovşarı", "Dəşti", "Qatar", "Rahab", "Şirvan şikəstəsi" muğamları təqdim olunacaq.
Xatırladaq ki, Beynəlxalq Muğam Mərkəzi “Muğam axşamları” layihəsini 2017-ci ildən həyata keçirir. Bundan əlavə mərkəzin musiqinin müxtəlif janrlarını əhatə edən “Aşıq musiqisi axşamları”, “Vokal musiqi axşamları”, “Muğamat var olan yerdə”, “Unudulmayanlar” və digər layihələrinin konsertləri tamaşaçılar tərəfindən maraqla gözlənilir.
Beynəlxalq Muğam Mərkəzi muğamsevərləri fevralın 17-də səbirsizliklə gözləyəcək.
Niyazinin mənzil-muzeyində “Şuşa İli”nə həsr olunmuş tədbir keçirilib
Azərbaycan Musiqi Mədəniyyəti Dövlət Muzeyinin filialı olan Niyazinin mənzil-muzeyində “Şuşa İli”nə həsr olunmuş “Musiqili Şuşa” rubrikasında “Hacıbəyovlar: Niyazi” adlı tədbir keçirilib.
AzərTAC xəbər verir ki, Azərbaycan Musiqi Mədəniyyəti Dövlət Muzeyinin direktoru, sənətşünaslıq elmləri doktoru, Əməkdar mədəniyyət işçisi Alla Bayramova tədbiri giriş sözü ilə açaraq muzeyin Musiqi Həvəskarları Klubunun pandemiya ilə əlaqədar ara verdiyi tədbirlərin bərpa olunması və gələcək silsilə tədbirlər haqqında məlumat verib.
Niyazi mənzil-muzeyinin müdiri, Əməkdar mədəniyyət işçisi Rza Bayramov tədbir iştirakçılarını salamlayaraq maestro Niyazinin 110 illik yubileyi münasibətilə görüləcək işlər haqqında danışıb.
Muzeyin şöbə müdiri Xanım Abdinova “Musiqili Şuşa. Hacıbəyovlar: Niyazi” mövzusunda çıxış edib. Onun çıxışı muzeyin zəngin kolleksiyaları əsasında mövzuya uyğun hazırlanmış slayd-şou ilə müşayiət olunub.
Gənclər Günü münasibətlə tədbirin bədii hissəsində gənclərin ifalarında Azərbaycan və Qərbi Avropa bəstəkarlarının əsərlərindən ibarət rəngarəng konsert proqramı təqdim olunub.
Dünyanın ən böyük əldə toxunma 5400 kvadratmetrlik xalçası Əbu-Dabidəki məscidə döşənilib
Birləşmiş Ərəb Əmirliklərinin paytaxtı Əbu-Dabidəki Böyük Şeyx Zayed Məscidinə dünyanın ən böyük əldə toxunma xalçası döşənilib.
AzərTAC rəsmi “Emirates” agentliyinə istinadla xəbər verir ki, nəhəng xalçanın toxunması prosesində müxtəlif ölkələrdən dəvət olunmuş məşhur xalça ustaları və rəssamlar iştirak ediblər. Belə ki, 1200 xalça ustası bir il müddətində yun və pambıq iplərdən istifadə etməklə 5400 kvadratmetr ölçüsü və hər 6 santimetrində 40 ilməsi olan, ümumilikdə isə 2,5 milyon düyün vurulmuş xalçanı ərsəyə gətirib.
Nəhəng ölçüsünə rəğmən vahid parça halında toxunan bu sənət əsəri “Ginnesin Rekordlar Kitabı”na daxil edilib.
Məscidin ibadət zalını bəzəyən bu unikal xalça heyrətamiz dizayna malikdir və onun toxunması prosesində canlı rənglər müxtəlif bitkilər, o cümlədən nar qabıqları, ağac yarpaqları, nadir otlardan istifadə olunub.
Həmçinin onun toxunması üçün 5 min kvadratmetr sahəsi olan emalatxana ayrılıb.
Mədəniyyət naziri Gəncə şəhərində bir sıra mədəniyyət ocaqlarına baxış keçirib
Xəbər verdiyimiz kimi, Mədəniyyət naziri Anar Kərimov fevralın 3-də Gəncə şəhər edib. Səfər çərçivəsində nazir Gəncə şəhər Mərkəzi Kitabxanasında olub. Burada Mərkəzi Kitabxana və filiallarının kitab fondu, dərnəklər, kurslar və göstərilən xidmətlər haqqında məlumat verilib. Ümumi kitab fondu ilə tanış olan Anar Kərimov fondun zənginləşdirilməsi, xüsusilə latın qrafikalı kitabların alınması barədə tövsiyələrini verib.
Gəncə şəhər Uşaq incəsənət məktəbinə gələn nazir binanın vəziyyəti ilə tanış olub. Məlumat verilib ki, məktəbdə müxtəlif ixtisaslar üzrə 400-dən çox şagird təhsil alır. Sonra mədəniyyət naziri burada xoreoqrafiya dərsinin gedişini izləyib. Xoreoqrafiya sinfi yetirmələrinin uğurları barədə nazirə məlumat verilib. Bildirilib ki, məktəbin yetirmələri Türkiyə, Gürcüstan və Ukraynada festival və müsabiqələrdə iştirak edərək müxtəlif mükafatlara layiq görülüblər.
Anar Kərimov şəhərdəki Heydər Əliyev Mərkəzində yaradılan şəraitlə də maraqlanıb. Məlumat verilib ki, burada ulu öndər Heydər Əliyev zəngin dövlətçilik irsinin qorunması və təbliği həyata keçirilir. Mərkəzdə qorunan ümummilli liderin ölkəmizə rəhbərliyinin hər iki dövrünü əks etdirən materiallar – fotolar, müxtəlif tarixi sənədlər və s. haqqında ziyarətçilərə bilgi verilir. Bundan başqa, mərkəzdə mütəmadi olaraq konfranslar, tədbir və təqdimatlar keçirilir.
Görkəmli ədəbiyyatşünas və yazıçı Mir Cəlal Paşayevin Gəncədəki ev-muzeyinə baxış zamanı nazir burada aparılan təmir işlərinin son mərhələləri ilə tapşırıq və tövsiyələrini verib. Anar Kərimov Mir Cəlal Paşayevin zəngin bədii və elmi irsindən söhbət açıb, onun Azərbaycan ədəbiyyatının inkişafına verdiyi töhfələri vurğulayıb.
Səfər çərçivəsində Anar Kərimov Azərbaycan Yazıçılar Birliyinin Gəncə şəhəri üzrə elmi tədqiqat mərkəzinə də gəlib. Nazir bildirib ki, 44 günlük Vətən müharibəsində Zəfər çalmış ölkəmizi mədəniyyət və ədəbiyyat vasitəsilə daha uğurlu təbliğ etmək lazımdır. Milli dəyərlərimiz gənclər arasında daha çox aşılanmalıdır. Bu mənada yazıçı və şairlərin üzərinə böyük məsuliyyət düşür.
ABŞ-dakı Azərbaycan prodakşnı “İlin media mükafatı”nı qazanıb
Azərbaycanlı kinorejissor Elmar Bayramovun rəhbərlik etdiyi "Old Stone Pictures" media-prodakşn ABŞ-da “İlin media mükafatı” kateqoriyasının qalibi olub.
Diasporla İş üzrə Dövlət Komitəsi xəbər verir ki, bu barədə məlumat döyüş filmləri prodüseri Alan Qoldberqin rəhbərliyi ilə Nyu-Cersi ştatının Atlantik-Siti şəhərində təşkil olunan “Action Marital Arts Mega Weekend” gecəsində açıqlanıb. COVID-19 pandemiyası səbəbindən 2021-ci ildə açıqlanmalı olan nəticələr bu il yanvarın sonunda elan edilib.
Saşa Mitçel, Sintiya Rotrok, Don Draqon Vilson, Maykl Jey Uayt, Robert Qoldman, Semyuel Kvok və digər tanınmış kino xadimlərinin təmsil olunduqları münsiflər heyətinin qərarına əsasən, “Old Stone Pictures” prodakşn 2020-ci il ərzində müxtəlif beynəlxalq döyüş filmləri festivallarında “Let me run” qısametrajlı filmi ilə 14 nominasiya üzrə birincilik qazandığına görə “İlin media mükafatı” kateqoriyasında qalib elan olunub.
Təntənəli mərasim zamanı mükafat “Old Stone Pictures”in rəhbəri Elmar Bayramova təqdim edilib.
Dövlət Akademik Musiqili Teatrı beynəlxalq festivalda iştirak edəcək
Azərbaycan Dövlət Akademik Musiqili Teatrının kollektivi fevralın 9-13-də 40-cı “Fəcr” Beynəlxalq Teatr Festivalında iştirak etmək üçün İran İslam Respublikasına səfər edəcək.
AzərTAC xəbər verir ki, dünyanın müxtəlif ölkələrinin nüfuzlu teatr kollektivlərinin hər il qatıldığı ənənəvi tədbirlərdə dəfələrlə Azərbaycanı layiqincə təmsil edən Dövlət Akademik Musiqili Teatrı fevralın 11-də "Bir nəfəs qədər" (S.Qulamovun pyesi əsasında) musiqili dramını, 12-də isə "Utancaq qız" (F.Dostoyevski) monotamaşasını Tehranda nümayiş etdirəcək.
Qeyd edək ki, janr etibarilə bir-birindən fərqli olan bu səhnə əsərlərinin hər biri iki dəfə göstəriləcək.
Rejissor Samir Qulamovun pyesi əsasında və quruluşunda "Bir nəfəs qədər" tamaşası Zəfər salnaməmizi qanları ilə yazan şəhidlərimizin əziz xatirəsinə ithaf olunur. Əsərin süjet xəttində Vətən müharibəsinin könüllü döyüşçülərindən biri olan Vətən adlı bir gəncin həyat hekayəsindən bəhs edilir.
Festivalda nümayişi nəzərdə tutulan digər səhnə əsəri isə dünya ədəbiyyatının görkəmli nümayəndəsi Fyodor Dostoyevskinin "Utancaq qız" fantastik povesti əsasında Xalq artisti Cənnət Səlimovanın quruluşunda hazırlanan eyniadlı monotamaşadır. Tamaşanın tərcüməçisi və yeganə qəhrəmanı Əməkdar artist Şövqi Hüseynovdur.
Hər iki tamaşanın ideya müəllifi və bədii rəhbəri, Dövlət Akademik Musiqili Teatrın direktoru, Əməkdar incəsənət xadimi Əliqismət Lalayev səfər öncəsi təəssüratlarını bölüşüb: “Belə bir nüfuzlu beynəlxalq teatr festivalında iştirakımız bizi çox sevindirir. Xüsusi ilə də "Bir nəfəs qədər" tamaşasını seçməyimiz də əbəs yerə deyil. Hər birimizin canlı şahidi olduğumuz şərəfli tariximizi beynəlxalq arenada dünyaya bir daha göstərmək istəyirik. Düşünürəm ki, yaradılan bu şərait dünyaca məşhur "Fəcr" Beynəlxalq Teatr Festivalının rəhbərliyi tərəfindən Azərbaycan teatrına göstərilən hörmətdir, ümumilikdə, teatr sənətimizə sevginin, marağın təzahürüdür. Bundan öncə də həm münsiflər heyətinin üzvü, eyni zamanda, ekspert kimi, həm də rəhbərlik etdiyim teatrın kollektivi ilə birgə “Fəcr” festivallarında iştirak etmişəm. Həmişə də nümayiş etdirdiyimiz layihələr iştirakçılar tərəfindən rəğbətlə qarşılanıb. Budəfəki festivalın da möhtəşəm mədəniyyət hadisəsinə çevriləcəyinə inanıram. Belə görüşlər ölkələrarası mədəni əməkdaşlığın inkişafı üçün çox vacibdir”.
