“Ədəbiyyat  və incəsənət” portalı yazıçı-dramaturq Əyyub Qiyasın tanınmış teatr və kino xadimlərinin həyatlarından qələmə aldığı maraqlı anları təqdim edir. Növbəti təqdim edilən Eldəniz Zeynalovdur.

 

 

ELDƏNİZ ZEYNALOV

(1937-2002)

 

***

 Bir dəfə teatra gəldim, gördüm aləm qarışıb bir-birinə, hamı sənətdən, böyük ideyallardan danışır, amma aralarında bircə nəfər də olsa bu sənətə, böyük ideallara sadiq olanı yoxdur. Sadəcə, boşboğazlıq edirdilər.

Onların söhbətinə müdaixlə etməsəm də, qulaq asmaq məcburiyyətində qaldım. Birdən ən çox danışan və istedadsızların önündə gedən aktyor üzünü mənə tutub xəbər aldı:

– Bax, Eldəniz də eşitdi, kim düz deyir, kimin danışdığı xoşuna gəldi?

Mənsə ümumiyyətlə ağzını açmayan aktyoru göstərib:

– Ən çox Tahirin dedikləri xoşuma gəldi, – dedim. 

– Əşşi, nə danışırsan, Tahir bayaqdan bəri heç ağzını açmayıb.

– Elə ağzını açmağına görə də onun danışğını bəyəndim, – deyib, uzaqaşdım.

 

(26.01.2023)

 

 

Azərbaycanın zəngin mədəni irsi, xalqımızın həyat tərzi və qədim adət-ənənələri ilə sıx bağlı olan xalçaçılıq sənəti və məktəblərinin Avropada tanıdılması məqsədilə Azərbaycanın Avropa Şurası yanında daimi nümayəndəliyi və “Azərxalça” ASC tərəfindən Avropa Şurasının (AŞ) mənzil-qərargahında Azərbaycan xalçalarının sərgisi təşkil edilib. 

 

“Ədəbiyyat və incəsənət” AzərTAC-a istinadən xəbər verir ki, Avropa Şurası Parlament Assambleyasının qış sessiyası zamanı təşkil olunmuş sərgi fevralın 3-dək avropalı xalça sevərlər üçün açıq olacaq. Sərgidə Azərbaycanın müxtəlif xalçaçılıq məktəblərini ehtiva edən xalça nümunələri nümayiş olunur. Həmçinin böyük ekran vasitəsilə xalçaçılıq sənətini, eləcə də Azərbaycanın tanınmış xalçaçılarından bəhs edən film nümayiş olunur. 

Heydər Əliyev Fondu tərəfindən çap edilmiş, Azərbaycan xalça tarixi və məktəblərini təşviq edən nəfis kitablar təqdim olunur. Nümayiş olunan nəfis ornamentli rəngbərəng xalçalara əlavə edilmiş fotolar xalçaçılıq haqqında daha geniş məlumat verir. 

Sərgini giriş sözü ilə açan Azərbaycanın Avropa Şurası yanında daimi nümayəndəsi, səfir Fəxrəddin İsmayılov 2001-ci il yanvarın 25-də Azərbaycan Respublikasının üçrəngli Dövlət Bayrağının Ümummilli Lider Heydər Əliyevin iştirakı ilə təşkilatın mənzil qərargahı qarşısında qaldırıldığını xatırladıb. Üzvlüyümüzün ötən dövrdəki 22 ilinə nəzər salan F.İsmayılov bu müddətdə çoxsaylı uğurların əldə edildiyini vurğulamaqla bərabər, müxtəlif illərdə Avropa Şurası ilə münasibətlərdə enişli-yoxuşlu dövrlərin olduğunu qeyd edib. O, bu gün Azərbaycan Respublikasının Avropanın demokratik millətlər ailəsinə mənsub olduğunu və Avropanın multikultural kimliyinə öz dəyərli töhfələrini verdiyini vurğulayıb. 

Avropa Şurasının (AŞ) Baş katibi Mariya Peyçinoviç Buriç çıxış edərək, sərgidə nümayiş etdirilən xalçaların bənzərsiz və canlı xüsusiyyətlərə məxsus olduğunu, ənənələrə əsaslanan bu sənətin yüksək qiymətləndirildiyini və onun qorunmalı olduğunu bildirib. O, AŞ-nin “müxtəliflikdə birlik” anlayışı ilə mədəniyyət sahəsinə böyük önəm verdiyini söyləyib. AŞ-nin Baş katibi Azərbaycanın artıq 22 ildir Avropa Şurasına üzv olduğunu və qurumun çoxsaylı konvensiyalarını imzaladığını və ratifikasiya etdiyini bildirib. Azərbaycan həmişə mədəniyyətlər və dinlərarası dialoqa xüsusi əhəmiyyət verdiyini vurğulayaraq, bu sahədə ölkəmizin xüsusi rolunu qeyd edib. 

"Azərxalça" Açıq Səhmdar Cəmiyyətinin (ASC) İdarə Heyətinin sədri Emin Məmmədov çıxış edərək, rəhbərlik etdiyi “Azərxalça”nın tarixindən söz açıb. Bildirib ki, XX əsrin birinci yarısından fəaliyyət göstərən “Azərxalça” 2016-cı ildə Prezident İlham Əliyevin Sərəncamı ilə yenidən strukturlaşdırılıb. O, xalqımızın zəngin və nadir mədəni irsi olan xalçaçılıq sənəti haqqında danışaraq, nəsildən-nəslə ötürülməsinin əhəmiyyətindən söz açıb. Sonra natiq xalçaçılıq üzrə Qarabağ, Qazax, Naxçıvan, Şirvan məktəblərindən bəhs edərək, “Azərxalça”nın əsas məqsədinin xalçaçılıq ənənəsinin qorunub saxlanılması və bu sənətin daha da inkişaf etdirilməsi olduğunu qeyd edib. Nadir xalçaların ərsəyə gəlməsində yerli və xarici rəssamlarla, eləcə də dizaynerlərlə əməkdaşlıq çərçivəsində ənənəvi xalçalara istinadla müasir xalçalar yaradıldığını və beləliklə, xalça sənətinin daim inkişaf etdiyini diqqətə çatdırıb. O, “Azərxalça”da dünyada nadir sənət əsərləri olan xalçalar toxunduğunu xüsusi qeyd edib. 

Açılış mərasimində Bakı xalçaçılıq məktəbinə məxsus xalça Avropa Şurasına hədiyyə edilib. 

Qeyd edək ki, sərginin açılışına Avropa Şurasının Baş katibi Mariya Peyçinoviç Buriç, AŞ katibliyinin əməkdaşları, AŞPA qış sessiyasına gəlmiş müxtəlif Avropa ölkələrinin parlamentariləri, AŞPA-da və Avropa İnsan Hüquqları Məhkəməsində çalışan həmvətənlərimiz, eləcə də yerli ictimaiyyətin üzvləri qatılıblar. Sərgi qurumun mənzil-qərargahına səfər edən turistlər tərəfindən də ziyarət edilir və onlara xalçaçılıq sənəti və məktəblərimiz haqqında məlumat verilir.

 

“Ədəbiyyat və incəsənət”

(27.01.2023)

Nüfuzlu Euronews ötən 2022-ci ilin ən yaxşı fotolarını müəyyənləşdirib. Burada Rusiyanın Ukraynaya təcavüzündən tutmuş İrandakı antihökümət yürüşlərinə, Tur de Frans yarışmalarınadək hər şey var. Yola saldığımız il hadisələr baxımından o qədər zəngin olub ki, fotoqraflar fotokameralarını futlyara salmağa macal tapmayıblar. 

Həmin fotoları ardıcıllıqla “Ədəbiyyat və incəsənət” portalı oxucularına təqdim etdik. 

Son üç paylaşımda isə ilk 3 yeri tutan fotoları təqdim edirik. 

 

1-ci yer

Vinnitsıda rus aviahücumu zamanı öldürülmüş 4 yaşlı Lizanın dəfni mərasiminin hüznü. 17 iyul, 2022-ci il. 

Foto: Efrem Lukatsky/AP

 

“Ədəbiyyat və incəsənət”

(27.01.2023)

Professor Əlibala Məhərrəmzadə “Ev tapşırığı: Uğur düsturunu tapacağıq”  layihəsini sizlərə təqdim edir

 

 

Biz biznesdə, peşə fəaliyyətində uğur qazanmağın yolunu göstərən ən çox tələb olunan kitablardan 10-na nəzər yetirdik. İndi də gəlin, ümumiyyətlə adi insanı uğurlu insana çevirən, insanın düşüncə tərzini, adət və xasiyyətini, xarakterik cəhətlərini dəyişən ən populyar kitablardan 10-na nəzər yetirək.

Bu kitablar, əziz oxucularım, insanlara düzgün istiqamət verir, sürətli və keyfiyyətli dəyişikliklərə bir təkan olur.

Beləliklə, seçdiyim növbəti 10-luğu sizlərə təqdim edirəm.

 

Norman Vinsent Pil «Pozitiv düşüncənin gücü»

Daha bir superbestseller. Onun fəlsəfəsi milyonlarla insana, şəxsi, mənəvi və maliyyə hədəflərini vurmağa kömək edib. Müəllif qəti əmindir ki, pozitiv düşüncə həmişə müsbət nəticəyə gətirir. O, on illər boyunca bu təlimi öyrənib, əksər uğur qazanan insanın sirlərinə bələd olub və başa düşüb ki, bu təlim 100%  işləyir.

Az qala 100 il yaşayan amerikalı yazıçı və din xadimi (1896 - 1993) Norman Vinsant Pil motivasiya kitabları boyunca aforizm səviyyəsinədək yüksələn gözəl fikirlərini səpələməklə də xüsusi maraq oyadır.

Əziz oxucum, gəlin onlardan bəzilərinə diqqət edək:

 - Həyatımızdakı bu və ya digər cəhət özlüyündə heç bir məna  kəsb etmir. Məna kəsb edən - sizin ona münasibətinizdir. Və məhz bu münasibət uğuru və uğursuzluğu müəyyənləşdirir.

 - Fikirlərinizi dəyişin və siz öz dünyanızı dəyişəcəksiniz.

 - Həyatın nə qədər miskin olsa da gözlərini aç və çalış ki, imkanları görəsən. Mütləq görəcəksən. Çünki onlar var.

 - Boş ciblər heç vaxt sizə olmaq istədiyiniz mərtəbəyə çatmağa mane ola bilməzlər. Mane ola bilənlər boş başlar və boş ürəklərdir.

 - Sürətlə üzmək üçün asta avar çəkmək lazımdır.

 

“Ədəbiyyat və incəsənət”

(27.01.2023)

 

SilkWay Beynəlxalq Ədəbiyyat Festivalının Azərbaycan turunun 32 finalçısının əsərlərindən ibarət Antologiya bu il “Azərkitab” Yayınlarında nəşr olunacaq. Festivalın rəsmi media dəstəkçisi olan “Ədəbiyyat və incəsənət” portalı antologiyaya daxil ediləcək əsərlərlə oxucularını tanış edir.

 

Zeynallı Həsən Hakim oğlu (Həsən Kür)

1996-cı il 17 mart tarixində Salyan rayon, Sarvan kəndində dünyaya gəlib.

Şeir yazmağa 15-16 yaşlarında başlayıb. 

Şeirləri mütəmadi olaraq antologiyalarda, qəzet, jurnal və saytlarda dərc olunur. Türkiyə, İran, Türkmənistan və Qazaxıstanda bəzi şeirləri çap olunub. 

"Xalqın şairi" telelayihəsinin, "Nəsimi ili" və "Nizami ili" şeir müsabiqələrinin qaliblərindəndir.

2019-cu ildən Dünya Gənc Türk Yazarlar Birliyinin üzvüdür.

2020-ci ildə 30 illik qisasımızın alındığı Böyük Vətən müharibəsinə könüllü olaraq yollanıb.

"Boyat dərdin üstündə" , "Tikanlı məftillər" və "Döyüş və Dönüş" kitablarının müəllifidir.

Vətən müharibəsi iştirakçıları - qazi şairlər. Poeziyamızda yeni status. Onların şeirləri qan-qada görüb deyə sərtdir, mübarizdir. Onların şeirləri ağlatmır, sısqamır, nifrətə kökləyir, mətinləşdirir.

Həsən Kürün istedadının parlamasında əsas rol isə şübhəsiz, Nigar Həsənzadənin “Söz” layihəsinə məxsusdur. Məhz bu layihə gənc şairi publika qarşısına çıxararaq yaradıcılıq məziyyətlərini üzə çıxarmasını təmin edib.

 

 

 

Son döyüş

 

İsmayılov Raqil Rafiq oğlu və Əzizov Sübhan Elşad oğlu Salyan rayon, Dayıkənd kənd orta məktəbinin məzunlarıdır. Hər ikisi könüllü olaraq yollandıqları 2-ci Qarabağ müharibəsində birlikdə şəhid olublar. Şeir onlara həsr olunur.

 

 

-Raqil eşidirsən? Mənə cavab ver!

-Sübhan, mən deyəsən yaralanmışam.

Tərpədə bilmirəm heç bir yerimi,

Elə bil ölmüşəm, cansız bir daşam.

 

-Yox , ölməyəcəksən, yaşayacaqsan

İndi harda olsa gələr uşaqlar.

Qardaş, ürəyini buz kimi saxla

Onlar gəlib bizi aparacaqlar.

 

-Sübhan, sən necəsən? Yaran dərindi?

-Bilmirəm, amma bərk ağrıyır başım.

-Özünü qorxutma, bir az möhkəm ol

Sən sağ qalacaqsan, əziz qardaşım.

 

-Komandir! Komandir! Yoldaş leytenant!

-Dayan Sübhan, dayan yorma özünü.

Deyəsən komandir şəhid olubdur

Həyata əbədi yumub gözünü.

 

-Yazıq... yetim qoydu uşaqlarını

Canını tapşırdı Ana Vətənə.

Dünən gecə yarı bir az dərdləşdik

Qızının şəklini göstərdi mənə.

 

-Danışma qardaşım, taqətdən düşmə

Mənim indi səndən bir istəyim var.

Götür bu məktubu, mən şəhid olsam,

Verərsən anama açıb, oxuyar.

 

Bilsin ki, içimdən nə hisslər keçib,

Bilsin ki, Vətəni necə sevirdim.

Təsəlli tapsın ki, mən şəhid oldum,

Sevinə-sevinə məzara girdim.

 

-Sən ölməyəcəksən, belə danışma!

Anan qalmayacaq gözləri ağlar.

Bütün qohumların, bütün dostların,

Gələn il toyuna yığılacaqlar.

 

Birlikdə gəlmişik cəbhəyə, Raqil

Kəndə də, birlikdə qayıdaydıq kaş.

Əgər yolumuzu ölüm kəsdisə

Sən ölmə, yerinə mən ölüm, qardaş.

 

-Ay Sübhan, bədənim oldu buz kimi, 

Gözüm heç bir yeri görmür elə bil...

-Dayan... bir az dayan, ölmə qardaşım

Raqil... ölmə Raqil... cavab ver Raqil...

 

 

Xəzan səsi

 

Gözümün işığı, burda payızdı

Hər kəs yığışıb öz gödəkcəsinə

Bircə sevincini görəydin onun

Günəş gülə-gülə sovuşub getdi

Bahar tətilinə gedərcəsinə

 

Gözümün işığı, burda payızdı 

Burdakı yarpaqlar payıza kölə

Zavallı ağaclar payıza əsir 

Baxçanın sonuncu bənövşələri

Bir saxsı dibçəkçün evə tələsir

 

Mən indi payızın çiyinlərində

Yazın gəlişini gözləyən bağam

Mən indi səngərdən boylanan əsgər

Ayaq səslərindən qorxan torpağam

 

Dişimi dişimə sıxıb dözürəm

Olur belə şeylər, olur, qadası

Tək qalan adamlar özündən küsür 

Getməyə bir qucaq yer tapmayanda

Yıxılır bir küncdə qalır, qadası

 

Bəs ora necədi? Havası, suyu? 

Quşlar çöldə ölür, yoxsa qəfəsdə? 

Adamlar necədi? Hər darıxanda 

Neçəsi söz qoyur sözünün üstə? 

Sən necə, nə qədər dəyişilmisən? 

Yenə yerə düşən çörək qırığın

Öpüb qoyursanmı gözünün üstə?

 

Yox, sən dəyişilmə, özünü qoru

Aldanma küçənin xəzan səsinə.

Kaş ki, illər sonra bir yaz səhəri

Birgə oyanaydıq azan səsinə.

 

 

Xəmirli əllər

 

Bir səhərin sübh çağı

Hamı əl-ələ verib 

yuxuna haram qatar-

Katibə zəng vurar ki,

İşdən çıxarılmısan.

Nişanlın, mesaj-mesaj

Başının ətin yeyər:

-Səninləyəm, cavab ver!

Axşam harda olmusan?

 

Anan girər otağa,

Pəncərəni açar ki,

boğulmasın tüstüdən..

Araq şüşəsi tapar

Döşəyinin üstündən.

 

Cırıldayan yatağı

Əsəblə silkələyər-

"Ay alkaş oğlu, alkaş

yenə içmisən?" deyər..

 

Qışqırar əsəbindən,

Xəmirli əlləriylə

Sinəni yumruqlayar.

İçini çəkə-çəkə,

Uşaq kimi ağlayar.

 

Qaçasan otağından,

Hirs soyutmaqdan ötrü

Qapını bərk vurasan,

Küçənizdə can verən

itə təpik vurasan.

 

Qaçasan, sən qaçdıqca

Uzaqlaşa yol hələ.

Aclıq vurar təpənə

Dönərçiyə deyəsən-

"Zəhərini bol elə".

 

Bədbəxtlikdən içindən

İynə çıxmaz çörəyin.

Kredit şöbəsindən

Bahar xanım zəng edər:

"Müəllim, sağsınızsa,

Borcunuzu ödəyin!"

 

İri-iri addımlar

Ata səni sahilə.

Yerdən bir daş götürüb

Keçirəsən boynuna,

Qulağına səs gələ...

 

Bu yaşlı kişi kimdir?

Kövrək səslə qışqırır:

"Etmə, qurbanın olum

Əgər pulun yoxdursa,

Gəl, mən sənə verim, var.

Əgər evin yoxdursa,

Bir nəfərlik yerim var.

İş də taparam sənə

Köhnə bir tanışım var,

hamıya iş düzəldir.

Ölmə, qurbanın olum,

Axı həyat gözəldir!"

 

O yaşında adamın

Yaşamaq məhəbbəti

Sanki güc verər sənə.

Çıxarıb boynundakı

yarım kiloluq daşı

Qayıdasan evinə.

 

Anan qaça qapıya

Daş izi qalan yerdən

Boynunu qucaqlayıb

Deyər: "yaxşı ki, varsan.

mən səni bağışladım, 

sən də bağışlayarsan..."

 

 

Qadın

 

Haçansa hardasa görmüşəm səni,

Amma ki, üzündə ləkən yox idi.

Sən ki, çiçək kimi təravətliydin,

Üstündə bir dənə tikan yox idi .

 

Sən həmin qadınsan, sən o qadınsan

Yuxudan hamıdan əvvəl oyanıb,

Hamıdan axırda yuxuya gedən.

Namərd sərvətinə boyun əyməyib,

Bir tikə çörəkçün qonşuya gedən.

 

Hər gün döyülmüsən, tapdalanmısan,

Nişan üzüyünə əsir düşmüsən.

Uşaq qucağında evdən qovulub,

Hərənin dilinə bir cür düşmüsən.

 

Sən həmin qadınsan, ağlın kəsəndən,

Belini bükmüsən qar, qış demədən.

Bütün küçələri təmizləmisən,

Bir sarı yarpağa qarğış demədən.

 

Sənin zərifliyin, qadın olmağın

Doğmanın, ogeyin yadından çıxıb.

Süpürgə çəkmisən bütün yollara,

Bircə öz taleyin yadından çıxıb.

 

Gizlətmə üzünü, utanma məndən

Qoy dünya utansın, bəşər utansın!

Sənə qalxan yerdə əllər qırılsın,

Sənə qalxdığına əllər utansın!

 

 

“Ədəbiyyat və incəsənət”

(27.01.2023)

 

 

 

Dünən ölkə mediasının diqqətini çəkən əsas mədəniyyət xəbəri bir qrup mədəniyyət və incəsənət xadiminin Azərbaycan Respublikası Kinematoqrafçılar İttifaqının üzvlüyündən imtina etməsi oldu. İttifaqın üzvlüyündən ümumilikdə 20-yə yaxın incəsənət nümayəndəsinin imtina etdiyi bildirildi. Onların arasında çox məşhurlar - Xalq yazıçısı Natiq Rəsulzadə, Xalq artisti Əbdül Mahmudov, Xalq artisti Ramiz Məlikov, Əməkdar incəsənət xadimi Yavər Rzayev, Əməkdar artist Gülşad Baxşıyeva, Əməkdar artist Münəvvər Əliyeva da var. 

APA sözügedən şəxslərlə əlaqə saxlayaraq, üzvlükdən imtina səbəblərini öyrənərkən 

Xalq yazıçısı Natiq Rəsulzadə üzvlükdən imtina etmək məsələsinin çoxdan olduğunu bildirdi: “Mən o üzvlükdən çoxdan imtina etmişəm. Çünki bir Xalq yazıçısı olaraq, məni nə katibliyə, nə də rəhbərliyə saldılar. Bu, hesab edirəm ki, doğru deyil, haqsız yanaşmadır. Bilirsiniz, mən hansısa qurumdan çıxanda qapını çırpmıram. Səs-küyü sevmirəm. Bu qədər adam üzvlükdən imtina edibsə, demək, burada nəsə var. Mən, ümumiyyətlə, 5-6 ildir, ora ilə əlaqəni kəsmişəm”.

Xalq artisti Ənvər Həsənov ittifaqın heç bir funksionallığının olmadığını əsas gətirdi. 

“O ittifaq, ümumiyyətlə, niyə var? Nəyə yarayır? Azərbaycan kinosu üçün nə edib, mən bilmirəm. Mən neçə vaxtdır, xəstəyəm, dedilər, guya ittifaq mənə yardım üçün pul ayırıb, amma belə bir şey yox idi. Heç bir manat da ayrılmamışdı. Hamısı yalandır”.

Xalq artisti Tariyel Qasımov da üzvlükdən imtina edənlər arasındadır:

“Mən Özbəkistanda 17 filmə çəkilmişəm. Bu yaxınlarda Şöhrət Abbasovun yubileyinə dəvətim üçün Bakıya, İttifaqa teleqram vurublar. Amma bu, mənə deyilməyib. Təsəvvür edirsiniz? Şəfiqə Məmmədova bunu məndən gizlədib. Düzdür, bir gün qalmış xəbər tutdum, bir təhər getdim, amma edilən hərəkətə heç bir ad verə bilmədim. Bundan sonra artıq üzvlükdən imtina etdim. Mən seçki prosesində də olmamışam. Şəfiqə Məmmədova yenidən necə, harada sədr seçilib, bilmirəm, mən onu seçməmişəm, seçmək fikrim də olmayıb”.

Qeyd edək ki, bir müddət öncə ittifaqın mətbuat katibi Əli Vəliyev də ittifaqdan və ittifaqın mətbuat katibi vəzifəsindən ayrıldığını bildirmişdi.

Oxu.az saytı isə Mədəniyyət Nazirliyinin Azərbaycan Respublikası Kinematoqrafçılar İttifaqındakı istefalarla bağlı açıqlamasını dərc etdi. Nazirlikdən sayta bildirilmişdi ki, ölkədə mədəniyyət sahəsində fəaliyyət göstərən ictimai təşkilatlar, o cümlədən kino ittifaqları qanunvericiliyə əsasən öz fəaliyyətlərini əsasnamələrinə uyğun olaraq müstəqil şəkildə həyata keçirirlər:

“Sözügedən qurumların fəaliyyətlərinin təşkili və ona nəzarət olunması Mədəniyyət Nazirliyinin səlahiyyətlərinə daxil deyil”.

Hər halda, nə baş verir? Kütləvi istefalar nə səbəbədir?

Çox güman ki, quruma yeni təyin edilən sədrə - Xalq artisti Şəfiqə Məmmədovaya bir etiraz demarşıdır bu istefalar. 

Əməkdar artist Gülşad Baxşıyeva isə  Kinematoqrafçılar İttifaqından ayrılması ilə bağlı olay-a deyib ki, ittifaqdan ayrılma səbəbi Xalq artisti Şəfiqə Məmmədova deyil:

"Mən Şəfiqə Məmmədovaya görə ittifaqa gəlməmişəm, ona görə də çıxmaq niyyətim yoxdur. Şəfiqə Məmmədova bu gün var, sabaha orada yoxdur. Hər dəfə kimsə xoşuma gəlməyəndə ittifaqdan çıxacam, xoşuma gələndə qayıdacam? Sadəcə demişəm ki, mən oranın üzvü sayılmıram. Orada yoxam, yalnız adım gedir. Heç bir tədbirlərə, iclaslara məni çağırmayıblar. Özləri seçiblər, özləri doğublar, özləri də göbəyini kəsiblər. Mən bilməmişəm ki, seçki olub, ya qurultay. Bir stəkan çay içib, deyib ki, məni seçirsiz, beş-altı adam çay içə-içə seçiblər. Bundan nə millətin, nə də kino sahəsində çalışanların xəbəri olub. Mən özümü oranın üzvü saymıram. Çıxmış kimi bir şeyəm. Şəfiqənin atasının ittifaqı deyil. O, yaratmayıb, Prezident yaradıb. Sabah onu çıxarıb, yerinə başqasını gətirəcəklər".

Mövzunu gündəmdə saxlayacağıq.

 

Şəkildə: Şəfiqə Məmmədova “Ad günü” filmində. 

 

“Ədəbiyyat və incəsənət”

(27.01.2023)