İyunun 6-da “Four Seasons Hotel Baku”da Dövlət Turizm Agentliyinin (DTA) təşkilatçılığı ilə “Azərbaycanın qastroturizm perspektivləri” mövzusunda hesabat xarakterli mətbuat konfransı keçirilib. 

İlk çıxış edən Azərbaycan Turizm Bürosunun qastronomiya turizminin idarə edilməsi sektorunun müdiri Səkinə Əsgərova qastroturizmin inkişafının turizmin vacib istiqamətlərindən biri hesab olunduğunu və son illərdə Azərbaycanın qastronomiya destinasiyası kimi təbliği istiqamətində çoxistiqamətli işlərin həyata keçirildiyini qeyd edib. 

O deyib: “2018-ci ildən etibarən kulinariya sahəsi Dövlət Turizm Agentliyinə verilib. Bizim ən önəmli vəzifələrimizdən biri milli mətbəx nümunələrinin qorunması və onun təbliğindən ibarətdir. Lakin DTA-nın strategiyası buraya yeni baxış gətirmiş oldu. Bu yeni baxış nədən ibarətdir? Biz çalışırıq ki, Azərbaycan kulinariyasının milli mətbəxinin bir turizm çəkisi olsun. Bu potensialımızdan turizm potensialı kimi də istifadə edib ölkəmizə ziyarətə gələn turistlərin sayını artırmaq və bu rəqəmləri daha da dayanıqlı etmək niyyətindəyik.

Onun sözlərinə görə, Dövlət Turizm Agentliyinin tabeliyində olan Milli Kulinariya Mərkəzi tərəfindən bu günədək milli mətbəx nümunələrinin tədqiqi, qorunması və tanıdılması üçün müəyyən vacib işlər görülüb. Hazırda kulinariya sahəsində təhsili inkişaf etdirməklə gənc, bu sahəni ürəkdən sevən, peşəkar aşpazların fəaliyyətinə dəstək verilməsi istiqamətində işlər davam etdirilir. Eyni zamanda, bununla zəngin kulinariya ənənələrimizi dünyaya çatdırmaq, bu istiqamətdə təbliğat işini gücləndirmək və beynəlxalq təşkilatlarla əməkdaşlığı genişləndirmək əsas fəaliyyət istiqamətlərindəndir. Azərbaycan zəngin və qədim kulinariya ənənələrinə malikdir: “Sirr deyil ki, Azərbaycan mətbəxi özünəməxsus dadları ilə seçilir. Bu gün bütün dünyada qastroturizm turizmin maraqlı və fərqli sahəsi kimi inkişaf etməkdədir. Dünya təcrübəsində qastronomik turların, eləcə də yeni dadların axtarışında olan turistlərin sayı artmaqdadır. Turistlər səfər etdikləri ölkənin milli mətbəx nümunələri ilə tanış olmaq, yeni dadlar kəşf etmək istəyirlər. Odur ki, qastroturizmin inkişaf etdirilməsi vacib istiqamət sayılır”. 

Sonra DTA-nın sədr müavini Azadə Hüseynova və sədrin müşaviri Kənan Quluzadə Dövlət Turizm Agentliyi tərəfindən qastronomiya turizminin inkişafı ilə bağlı görülən işlərdən danışıblar. 

Qeyd olunub ki, DTA ölkədə kulinariya sahəsində və onun inkişafı istiqamətində məsul olan əsas qurumdur. Son dönəmdə kulinariya ilə bağlı, Azərbaycanda qastronomiyanın inkişafı ilə bağlı Dövlət Turizm Agentliyi tərəfindən yeni strateji yanaşma ortaya qoyulub və müxtəlif perspektivli işlər, böyük layihələr həyata keçirilir. Həmin layihələrlə və bütünlükdə ölkəmizdə qastronomiyanın inkişafı ilə bağlı hesabat xarakterli tədbirdə media üzvləri olaraq sizi görməkdən məmnunuq. Növbəti illər üçün də strateji yanaşmamız və görüləcək işlər daha genişdir”.

Sonda mövzu ətrafında jurnalistlərin səsləndirdiyi suallar cavablandırılıb.

“Ədəbiyyat və incəsənət”

(07.06.2023)

Xətai Sənət Mərkəzində plener əsərlərinin sərgisi açılıb. Sərgidə Mədəniyyət Nazirliyi, Azərbaycan Rəssamlar İttifaqı, Azərbaycan Dövlət Rəsm Qalereyası və Xətai Sənət Mərkəzinin təşkilatçılığı ilə “Heydər Əliyev İli” çərçivəsində elan olunmuş plenerdə yaradılmış əsərlər nümayiş olunub.

Üç gün davam edən sərgi yaradıcı şəxslərin əl işlərində daha çox təbiətin rənglərini görmək və naturadan işlənmiş əsərlərə ictimai marağın artırılması məqsədilə keçirilib.

Azərbaycan Dövlət Rəsm Qalereyasının direktor müavini Gülşən Qəribli tədbiri açaraq sərgi iştirakçılarını salamlayıb. Xətai Rayon İcra Hakimiyyətinin əməkdaşı Turan Cəfərova, Azərbaycan Rəssamlıq Akademiyasının dosenti Rüstəm Quliyev, rəssam Calal Ağayev, Xətai Sənət Mərkəzinin direktoru Zahid Əvəzov çıxış edərək sərginin əhəmiyyəti barədə danışıblar.

Bildirilib ki, sərgiyə 200-dən çox rəssam tərəfindən 500-ə yaxın yağlı boya, akril, sulu boya və s. texnikada yaradılmış əsərlər təqdim edilib. Onların sırasından sərgilənmək üçün 56 rəssamın 79 əsəri seçilib.

Əsərləri nümayiş olunan müəlliflərə sertifikatlar təqdim olunub. Həmçinin sərgidəki əsərlər arasından Xətai Sənət Mərkəzinin və sərgi ziyarətçilərinin seçdiyi bir əsərin müəllifi Raul Hüseynova hədiyyə təqdim edilib.

“Ədəbiyyat və incəsənət”

(07.06.2023)

Azərbaycan Bəstəkarlar İttifaqında (ABİ) tanınmış bəstəkar, Əməkdar incəsənət xadimi, Oqtay Zülfüqarovun oğlu Cahangir Zülfüqarovun Uşaqların Beynəlxalq Müdafiəsi Günü münasibətilə müəllif konserti olub. Bu barədə Bəstəkarlar İttifaqından bildirilib.

Tədbirdə ABİ-nin sədri, Xalq artisti, AMEA-nın müxbir üzvü, professor Firəngiz Əlizadə səbəbkarın çoxşaxəli yaradıcılığından, müəllimi – Azərbaycanda simfonizmin banisi Cövdət Hacıyev və atası – uşaq musiqisinin klassiki sayılan Oqtay Zülfüqarovun irsinə sadiqliyindən və ehtiramından danışıb. Qırx ildən artıq müddətdə bəstəkarın həyat verdiyi əsərlərin – mahnı, kamera, tamaşalara yazılan musiqilər, opera, fantaziya və digərlərinin uğurlu taleyini, müəllifin özününsə sadə, təvazökar xasiyyətini ayrıca qeyd edib. 

Azərbaycan Bəstəkarlar İttifaqının katibi, Əməkdar incəsənət xadimi, professor Zemfira Qafarova musiqiçilər ailəsinin layiqli təmsilçisi Cahangir Zülfüqarovun sənətinə böyük dəyər verdiyini diqqətə çatdırıb.

Sənətşünaslıq üzrə fəlsəfə doktoru, musiqişünas Lətifəxanım Əliyeva ABİ-nin dəstəyilə bəstəkara həsr etdiyi yeni nəşr olunmuş broşürdən söhbət açdı. 

Tədbirin bədii hissəsi maraqlı keçib. Fleyta və simfonik orkestr üçün bəstələnmiş “Ümid adası” adlı qravüraları Xalq artisti Rauf Abdullayevin dirijorluğu ilə ifa edən Üzeyir Hacıbəyli adına Azərbaycan Dövlət Simfonik Orkestrinin lent yazısı səsləndirilib. Həmin yazıda fleytada solo ifa bəstəkarın qızı, Beynəlxalq müsabiqə laureatı Əminə Zülfüqarovaya məxsusdur. 

Üzeyir Hacıbəyli adına Bakı Musiqi Akademiyasının və Atatürk Universitetinin professoru, fəlsəfə elmləri doktoru Həqiqət Məhərrəmovanın ifasında “Sarı gəlin”, “Ağ alma” - Piano üçün 2 Fantaziya tamaşaçılara xüsusi zövq verib. 

Azərbaycan Dövlət Uşaq Filarmoniyası “Şəms” Uşaq Xoru kiçik yaş qrupu bədii rəhbər - Əməkdar incəsənət xadimi Dilarə Əliyevanın ümidlərini bir daha doğruldub. “Uşaqlar” (söz: Cəmilə Allahverdiyeva), “Ana” (söz: Kamal Baharlı) və “Gözəl Bakı” (söz: Kamal Baharlı) solistlər - Məryəm Əliyeva və Fidan Bağırovanın ifasında bəyənilib. Yusif Həsənbəylinin sözlərinə yazılmış “Vətən hissi” C.Zülfüqarovun nəvəsi Emili Zəkiyyənin solistliyi, eyni zamanda xorun tərkibində bəstəkarın nəvəsi İnarə Zülfüqarovanın iştirakı ilə alqışlarla qarşılanıb. Azərbaycanda uşaq musiqisinin klassiki Oqtay Zülfüqarovun “Elegiya” əsərinin budəfəki ifasının özəlliyi isə ondan ibarət idi ki, onu ustadın nəticəsi – Əfrasiyab Bədəlbəyli adına 11 illik musiqi məktəbinin VI sinif şagirdi Əfrasiyab Məmmədov (müəllim – Sevil Lazımova) pianoda ifa edib. 

C.Zülfüqarovun uşaqlıq və gənclik dostları Rauf İmanov və Məbud Məhhərəmovun şux xatirələri görüşə rəng qatıb. 

Müəllif fleyta və 2 piano üçün bəstələdiyi “Oazis” əsərini fleytada qızı Əminə Zülfüqarova və nəvəsi Əfrasiyabla birgə pianoda ifa etməklə tədbirin son akkordlarını vurub. 

Sonra Cahangir Zülfüqarov iştirakçılara öz təşəkkürünü bildirib.

Azərbaycan Bəstəkarlar İttifaqının baş məsləhətçisi, musiqişünas Sevda Hüseynovanın aparıcısı olduğu konsert xoş və yaddaqalan təəssüratla başa çatıb.

“Ədəbiyyat və incəsənət”

(06.06.2023)

Özbəkistandakı Heydər Əliyev adına Azərbaycan Mədəniyyət Mərkəzinin layihəsi və təşkilatçılığı ilə Daşkənd və Səmərqənd şəhərlərində Azərbaycan musiqisi günləri keçirilib. 

Mərkəzin məlumatına görə, tədbir çərçivəsində Özbəkistandakı Heydər Əliyev adına Azərbaycan Mədəniyyət Mərkəzi tərəfindən A.S.Puşkin adına Səmərqənd regional kitabxana-informasiya mərkəzinə zəngin kitab kolleksiyası hədiyyə edilib. Kitabxananın oxu zalında Azərbaycan Mədəniyyət Mərkəzi tərəfindən hədiyyə olunan kitabların sərgisi açılıb və bir ay ərzində sözügedən nəşrlər sərgilənməsi nəzərdə tutulub. 

Əvvəlcə Səmərqənd regional kitabxana-informasiya mərkəzinin direktoru Zebinisa Şodieva ilə Azərbaycan Mədəniyyət Mərkəzinin Heydər Əliyev Azərbaycan Mədəniyyət Mərkəzinin direktoru Samir Abbasov arasında görüş keçirilib, Səmərqənd kitabxana mərkəzi ilə Azərbaycan kitabxanaları arasında əməkdaşlıq əlaqələrinin qurulması, birgə layihələrin icrası, kitabxanada Azərbaycan fondunun yaradılması müzakirə edilib və bu barədə razılıq əldə olunub.

Sonra qonaqlar üçün kitabxanaya ekskursiya təşkil olunub.

Özbəkistandakı Heydər Əliyev adına Azərbaycan Mədəniyyət Mərkəzinin direktoru Samir Abbasov Özbəkistanın kitabxana fondlarında Azərbaycana dair nəşrlərin zənginləşdirilməsi istiqamətində mühüm layihələrin həyata keçirildiyini bildirib. Yaxın gələcəkdə Puşkin adına Səmərqənd regional kitabxana-informasiya mərkəzində Azərbaycan fondunun təşkil ediləcəyini deyib.

“Ədəbiyyat və incəsənət”

(06.06.2023)

Bu gün Münəvvər Rzayevanın doğum günüdür

Hüseyn Cavid, Sergey Yesenin, Nəriman Nərimanov, Mikayıl Müşfiq, Nazim Hikmət… bu dahilərin büstləri  onun yaradıcı ömründə ayrıca yer tutur.

“Ədəbiyyat və incəsənət” portalı xəbər verir ki, bu gün Azərbaycanın ilk monumentalçı qadın heykəltəraşı, Əməkdar rəssam Münəvvər Rzayevanın anadan olmasının 94-cü ildönümüdür. 

Münəvvər Rzayeva 1929-cu il iyunun 6-da Şuşada anadan olub. Şuşada tanınmış xalça ustası Məcid kişinin ailəsində böyüyüb. 1950-ci ildə Əzim Əzimzadə adına rəssamlıq məktəbini,1956-cı ildə isə V.İ.Surikov adına Moskva Dövlət Rəssamlıq Akademiyasının heykəltəraşlıq fakültəsini bitirib.

Münəvvər Rzayeva yüzədək müxtəlif səpkili sənət əsəri yaradıb, müxtəlif sərgilərin iştirakçısı olub. 1953-cü ildə Rəssamlıq İttifaqının üzvü seçilib. Mədəniyyət Nazirliyinin Dövlət Komissiyasının üzvü, AMEA Nizami adına Ədəbiyyat Muzeyində bərpaçı rəssam kimi fəaliyyət göstərib.

Onun əsərləri Azərbaycan Dövlət İncəsənət Muzeyində, AMEA Nizami adına Ədəbiyyat Muzeyində, Ordubadi muzeyində, Siyəzən mədəniyyət evində, Bədii Fondda saxlanılır.

Onun sonuncu işlərindən biri Qusar rayonunda yerləşən dağın 3 min 763 metr hündürlüyündəki “Heydər zirvəsi”nə bərkidilən Heydər Əliyevin tunc barelyefidir.

Münəvvər Rzayeva 2004-cü il iyunun 6-da - doğum günündə dünyasını dəyişib. 

Ruhu şad olsun!

“Ədəbiyyat və incəsənət”

(06.06.2023)

Bir vaxtlar çox populyar olan müsabiqə təkrar gündəmə gəlir. “Bakı payızı 2023” müsabiqəsinin birinci və ikinci turları çərçivəsində keçiriləcək konsert proqramlarının vaxtları bəlli olub və iticket pkatformasında artıq biletlət sayışa çıxarılıb.  

Konsertlər Bakı Musiqi Akademiyasının Opera Studiyasında 28, 29, 30 iyun və 1 iyul tarixlərində keçiriləcək, müsabiqənin 1 və 2-ci turlarının qalibləri müəyyənləşəcək və elan olunacaq.

Biletləri şəhərimizin kassalarından və www.iticket.az saytından onlayn əldə etmək olar. Əlaqə telefonları: (012) 493-74-67

“Ədəbiyyat və incəsənət”

(06.06.2023)

Dünyaşöhrətli ispan rəssam Pablo Pikassonun “Qadın büstü” (Buste de femme) tablosu Kölndə keçirilən hərracda 3,4 milyon avroya satılıb. 

Bu barədə week-end xəbər paylaşıb. 

Pikasso bu əsəri 1971-ci ildə yaradıb. İık baxışda uşaq rəsmini xatırladır. Amma abstraktizm nümayəndələri iddia edirlər ki, butda dahiyanə fikirlər gizlənib.

Bu arada hərrac evinin milliyyətcə holland olan nümayəndəsi Van Ham bu qiyməti çox  yüksək adlandırıb, belə satışın gözlənilmədiyini qeyd edib, əsərin real qiymətinin 1,5-2,5 milyon avro arasında olduğunu bildirib. 

“Ədəbiyyat və incəsənət”

(06.06.2023)

"Atam Yalçın Rzazadə mənə heç vaxt dəstək olmayıb. Heç bir telekanal, heç bir veriliş işçisi deyə bilməz ki, Yalçın müəllim zəng edib, mənim üçün xahiş edib. Belə şey ömründə ola bilməz. Heç xoşlamırdı ki, onunla bərabər verilişə qonaq gedim. Hətta veriliş əməkdaşları da məni atamla birlikdə efirə qorxa-qorxa dəvət edirdilər ki, Yalçın müəllim bunun əleyhinə olacaq. Bir məqam da var idi, mən bunu heç vaxt vurğulamamışam, deməmişəm. Çünki hardasa xətrimə dəyib, məni incidib belə addımlar. Hətta Yalçın müəllimin Heydər Əliyev adına sarayda keçirilən 50 illik yubiley konsertində də mən oxumamışam. Yalçın müəllim məni o konsertə də çıxarmadı ki, sonra deyəcəklər ki, öz yubiley konsertində oğluna təkan verir, onu qabağa salır"

Bunu moderator.az-a açıqlamasında xalq artisti, görkəmli sənətkar Yalçın Rzazadənin müğənni oğlu Mətin Rzazadə deyib.

"Mənim tanınmağım ən çoxu bu son iki ilə-Yalçın müəllimi itirdikdən sonraya təsadüf etdi. Baxmayaraq ki, 10 ildən artıqdır oxuyuram. Yalçın müəllim rəhmətə gedəndən sonra Oqtay Əliyev mənə zəng vurdu və dedi ki, "oğul, mən sənə hərtərəfli dəstəyəm və sənin yanındayam". Allah ona rəhmət etsin. Mən onun etdiyi yaxşılıqları ölən günümə qədər unutmayacam. Bu günki tanınmağımı Oqtay Əliyevə borcluyam. Oqtay müəllimin verilişləri, tanışlıqları, dəstəyi hesabına mən son iki ildə xeyli irəlilədim. Bir məsəl var-yetimə gəl-gəl deyən çox olur, amma çörək verən az. Yalçın müəllimin ətrafında çox adam var idi. Hansı ki, deyirdilər "Mətinə dəstək olacağıq, ay elə, ay belə". İndi haradadır o adamlar? Bu günə qədər mənim dəstəyə ehtiyacım olub. Bu gündən sonra mənim o dəstəyə ehtiyacım da yoxdur. Çünki xalq məni qəbul edib. Ola bilsin ki, kiminsə 5 milyonluq, 3 milyonluq auditoriyası var. Mənim auditoriyam ola bilər ki, 10-15 mindir. Amma o auditoriya musiqidən başı çıxan, musiqiyə dəyər verən insanlardır. Bu məni qane edir. Düşünürəm ki, məni artıq Yalçın Rzazadənin oğlu Mətin kimi yox, Mətin Rzazadə kimi qəbul ediblər" deyə Mətin Rzazadə bildirib.

Müğənni atasının mahnılarına icazəsiz müraciət edənlərdən də danışıb.

"Atamın mahnılarına müraciətlə bağlı dediyim sözlərdə mənə heç kim irad tuta bilməz. O ki, qaldı icazəyə. İcazə istəmək böyük qanacaq, tərbiyə tələb edir. Gənclərin hamısına aid olmasa da, bir çoxları var ki, heç onların oxuma mədəniyyətləri yoxdur, qaldı ki, insanlıq mədəniyyəti olsun. Özləri nə oxuyurlar ki, hələ icazə istəmək üçün mədəniyyətləri də çatsın. 33 yaşım var, gənc müğənni sayılıram, amma heç istəmirəm ki, mənim adımı indiki gənc müğənnilərlə səsləndirsinlər, bir tutsunlar. Verilişlərə də çox çıxmıram, ayda bir verilişə qonaq gedirəm. Sadəcə olaraq maraqlı deyil. Həmyaşıdlarımla efirə çıxanda nə söhbət edim?! Nə həyat tərzimiz, nə də ki sənətimiz bir deyil ki, durub onlarla sənətdən danışım" deyə o bildirib.

Mətin Rzazadə atasının mahnılarını nadir hallarda dinlədiyini bildirib.

"Mən atamı itirmişəm. Fikirləşmirəm ki, müəlimimi, ustadımı, mənə bu sənəti öyrədən ustadımı itirmişəm. Desəm bəlkə də inanmazsınız, bu son iki ildə ürəyim gəlmir ki, Yalçın müəllimin mahnılarını dinləyim. Sonuncu dəfə Yalçın müəllimin mahnısını 1 ay bundan öncə dinləmişəm. Cabir Novruzun Yaşıl teatrda 90 illiyinə həsr olunmuş gecə keçirilirdi, orada onun mahnısını ifa etməli idim. Məhz onda maşında dinlədim. Hətta Yalçın müəllimin mahnılarını haradasa eşidəndə, kimsə ifa edəndə, mənə çox pis təsir edir, xoş olmur. O mahnıları yenidən dinləmək mənim üçün ağırdır. Neçə yaşım olursa-olsun onun yeri həmişə mənim üçün boş qalacaq.Bizim evdə, ailədə onun yeri görünəcək, söhbətləri dilimizdə gəzəcək" deyə Mətin Rzazadə bildirib.

Mətin Rzazadə atasının ev muzeyinin yaradılması ilə bağlı addımların atılacağını da bildirib.

"Ev muzeyi mütləq olacaq. Bunun üzərində çalışacağıq. Sadəcə olaraq mənim başım sənətə, öz işlərimə qarışıb. Gərək bütün işimi-gücümü kənara atıb, bununla məşğul olum. Ev muzeyinin üstündə mütləq çalışacağıq və onu ərsəyə gətirəcəyik. Baxmayaraq ki, Yalçın müəllimin 3 övladı var, amma onun sənətinə yaxın olan övladı mənəm. Ona görə də bunu ilk mən etməliyəm ki, sonradan qardaşlarım mənə dəstək olsunlar" deyə müğənni bildirib.

“Ədəbiyyat və incəsənət”

(06.06.2023)