Super User
Dədə Ələsgərin 202 yaşına
Sevilən şair Ramiz Qusarçaylı Dədə Ələsgərin 202 illiyinə həsr etdiyi şeirini “Ədəbiyyat və incəsənət” portalının oxucularına təqdim edir
Haqq aşığı, Sözün, Sazın övliyası, yaşı min illərə sığmayan Dədə Ələsgərin 202 yaşı tamam oldu. 203 yaşında Ağkilsədə görüşək, ustad!
Nə sazdı, nə sözdü, nə də aşıqdı,
Nə mağar, nə düyün, nə yaraşıqdı,
Allahın taxtından gələn işıqdı,
İşığın taxtında şahdı Ələsgər.
Hər beyti ayədi, hər sözü kəlam,
Açması önündə dilsizəm, lalam,
Sənətdə peyğəmbər Əleyhissəlam,
Dəryada tufandı, Nuhdu Ələsgər.
Yerin pərdəsidi, göyün simləri,
Əritdi canında çox tilsimləri,
Dolaşır İlahi mərasimləri
Kükrəyən, çağlayan ruhdu Ələsgər.
Sehri çox mələklər ötən eşqinin,
Arazda, Samurda itən eşqinin,
O taylı, bu taylı Vətən eşqinin
Göyçə dodağında ahdı Ələsgər.
Kitablar bağlanıb Hürr savaşından,
Zirvələr dizinnən, bulud qaşından,
Adına pir tikin məhək daşından
SafAğdı, OdƏrdi, Bağdı Ələsgər.
“Ədəbiyyat və incəsənət”
(27.03.2023)
Sevilir…
“Ədəbiyyat və incəsənət” portalı Elman Eldaroğlunun “Ad gününüz mübarək, İlhamiyyə xanım” yazısını təqdim edir
Sevilir. Buna əsas səbəb, peşəkarlığı ilə yanaşı, Azərbaycan xanımına xas olan dəyərləri özündə ehtiva etməsidir. Onun bircə dəfə də olsun, birlikdə apardıqları televiziya verilişində həyat yoldaşının sözünü kəsdiyinin şahidi olmamışam, hətta veriliş boyu ömür-gün yoldaşı onun söylədiklərini yarımçıq qoyanda belə heç bir irad bildirmir. Burada adamın yadına köhnə zamanların əsl azərbaycanlı ailəsinə xas olan milli dəyərlər düşür. Bilirəm, məni qınayanlar da tapılacaq, amma bu dəyər doğmadır, əzizdir. Necə deyərlər, baba və nənələrimizdən miras qalıb. Bax, məhz milli ənənələrimizi yüksəkdə tutduğu üçün insanların ürəyinə yol tapa bilib. Əlbəttə ki, söhbət İlhamiyyə Rzadan gedir...
Deyir ki- “Uzun zamandır ki, birlikdə veriliş aparırıq. Bir də görürsən ki, verilişdə ancaq özü danışır. İmkan vermir ki, mən də mövzu haqqında nəsə söyləyim. Əvvəllər susub-susub birdən partlamağım olurdu, amma indi buna adi hall kimi baxıram. Bir dəfə yadıma gəlir ki, Həmid mənə danışmağa imkan vermədi. Əslində, bu, normaldır. Amma həmin vaxt doğrudan da dəhşətli dərəcədə ağ elədi. Nə vaxt ağzımı açdımsa, sözüm ağzımda qaldı, Həmid danışmağa başladı. Bir neçə dəfə belə edəndən sonra elə efirdə dedim, Həmid, daha mən danışmayacam, sən danış, mən qulaq asım. Onda Həmid ayıldı ki, çox ağardıb. Sözünü deyib bitirəndən, o mövzuda deyiləcək bütün sözləri deyəndən, fikrini tamamlayandan sonra mənə dedi ki, buyurun, İlhamiyyə xanım, deyəsən axı siz də nə isə deyəcəkdiniz...”
Möhkəm iradəli, səbirli, səmimi, eyni zamanda təmkinli xanımdır. Özünü isbat edərək adamların rəğbətini qazanmağı bacarır. Etik normalara ciddi riayət edir. Onun üçün abır-həya insana xas olan ən müsbət xüsusiyyətlərdən biridir...
Deyir ki- “Bizim vaxtımızda söyləyirdilər ki, təvazökarlıq insanın bəzəyidir, insanın baş ucalığıdır. İndi təvazökar insana bilirsiniz necə həqarətlə baxırlar? Sadədil, avam, hətta axmaq kimi baxırlar. Səmimi olduğuna görə adama səmimiyyətini irad tuturlar. Təbii ki, dəyərlərin dəyişib, dəyişməməsindən asılı olmayaraq ölçü hissinin olması çox gözəldir. Səmimiyyətdə də ölçü olmalıdır. Amma bütovlükdə biz cəmiyyətdən danışırıqsa, mən bəzən özümə hesabat verməli oluram. Düşünürəm ki, filan yerdə çox səmimi danışsam, bu mənim əleyhimə işləyəcək. Lakin vaxt vardı ki, məni səmimiyyətimə görə sevirdilər. İndi isə misal üçün müsahibəyə gedəndə, yaxın adamlar mənə deyirlər ki, çalış, çox səmimi olma. O vaxt müğənnilərin, sənət adamlarının şəxsi həyatı indiki qədər insanlara maraqlı deyildi. Uzaq başı onların geyimləri maraqlı ola bilərdi. İndi isə əksinədir, adamın məişəti, ailəsi, həyat tərzilə də maraqlanırlar...”
Bəli, haqqında söhbət açdığım İlhamiyyə Rza insanlar arasında səmimiyyətin, sevginin get-gedə azaldığından gileylənsə də, içindəki insan sevgisi hələ də onu tərk etməyib. “Sağlam həyat uzmanları hər şeyi deyir, bircə bundan başqa: çox yaşamaq, özü də ağrı acısız yaşamaq istəyirsinizsə, xeyrə, ədalətə, sevgiyə, dostluğa olan inamınızı itirməyin.”- söyləyir...
Martın 26-sı, baharın bir xoş günündə dünyaya gəlib və yaradıcılığı ilə qoca dünyamıza yaz təravəti gətirib. Doğum günü münasibəti ilə İlhamiyyə xanımı təbrik edir, möhkəm can sağlığı, firəvan həyat, yaradıcılıq uğurları arzulayıram.
Çox yaşasın!
“Ədəbiyyat və incəsənət”
(27.03.2023)
Qarşıda bir uzun yol var
“Ədəbiyyat və incəsənət” portalı Rəsmiyyə Sabirin növbəti yaradıcılıq hesabatı –“Zindan sevinci” adlı son kitabı barədə Arif Fərzəlinin resenziyasını təqdim edir
Yaxşı tanıdığın, yaxşı kimi tanıdığın şairdən gözləntin həmişə böyük olur. Bəlkə, elə buna görə poeziyamızda özünə məxsus cığırla illərdir enişsiz irəliləyən Rəsmiyyə Sabirin növbəti yaradıcılıq hesabatını – “Zindan sevinci” adlı son kitabını açarkən daxilimdə xəfif bir nigaranlıq var idi. Xoşbəxtlikdən çox tez, elə ilk misraların işığındaca əriyib getdi bu nigaranlıq, rahatlıqla, məmnunluqla əvəzləndi.
Səhifədən səhifəyə keçdikçə eynən əvvəlki qıvraq, azadə üslubla qarşılaşdım. Yenə həmin səliqə-sahmanın, mövzuya doğru yöndən yanaşmanın, sözlə yumşaq rəftarın, məzmunu formaya tam oturtmaq, yersiz məcazlardan, əndazəsiz mübaliğələrdən yayınmaq bacarığının şahidi oldum. İrili-xırdalı hər şeirində bir az da püxtələşmiş, daha yetkin Rəsmiyyə Sabir gördüm...
Kitab klassik divan tərzində, amma bir yox, altı minacatla başlayır. Və hamısında oxucu zövqünə sarı çətin səfər niyyətində uğur ricasından daha qabarıq, fərdi ağrıları doğuran ümumi əskikliklərdən qurtuluş diləyi var:
“...Soyuyur insanların,
Yaxılıram, İlahi!”
“...Qoyma bu dərdi-kədəri,
Qoyma məni yeyə, Allah!”
“... Ürəyim ağrıyır, Tanrım,
Dünya boyda
dərd daşıyan ürəyim.”
“...İçi cah-cəlallı cahan vermisən,
Durub seyr edirəm gendən, İlahi!”
Allahın insana ən böyük bəxşişi Vətən sevgisidir. Sənət əhlinin xoşnaxışlığı ondadır ki, bu hissi yalnız öz varlığında yaşamır, təkcə quruca dillə yaxın ətrafa bildirib dayanmır, rəssam çəkdiyində, memar tikdiyində, bəstəkar nota köçürdüyündə duyğularını geniş kütləyə, ictimaiyyətə yetirir. Şair də şeirləri ilə oba-oba, el-el bəyan edir doğma yurda məhəbbətini:
“...Hər qarış torpağın müqəddəs, əziz,
Ölsək belə, səni yaşadırıq biz...”
“...Bir ölüb, min dirilərik,
Səni yaşadarıq biz,
Vətən!..”
“... Anamın sinəsi torpaq,
Köksün üstə baş qoyuram...”
Xalqımızın çoxillik Qarabağ həsrətini, yenidən ona qovuşmaq istəyini dolğun şəkildə ifadə edən “Bağışlama bizi, Vətən” adlı şeirinin Rəsmiyyə Sabirin yaradıcılığında xüsusi yeri, onun şair kimi qəbul olunmasında xüsusi rolu var:
“...Səni əsir ikən qoymuşuq darda,
Cəngavər ruhumuz hardadır, harda?
Qoynuna gəlmədik, of, bu bahar da,
Bağışlama bizi, Vətən!..”
Gəldik, cəngavər ruhumuzla gəldik. Hər bahar qoynuna gül dəstəsi ilə gələk deyə, bir payız qılıncla gəldik. Düşməndən qisasımızı alıb torpaqlarımızı, qürurumuzu geri qaytardıq...
Əsl şeir həyatdan qopmur, hədəflərini dəyişə-dəyişə, döyüşə-döyüşə zamandan zamana addayır... Hələ İrəvanın, Təbrizin “Quşlardan alırıq səs-sorağını”. Onları quzğunlar caynağından saldırmasaq, “Bağışlama bizi, Vətən!..” Bu gün arxa cəbhədə monopolizmlə, rüşvətlə, süründürməçiliklə savaşa qalxmışıq. Köklərini dibdən kəsməsək, “Bağışlama bizi, Vətən!..”
Şeiriyyətin təməl daşı axtarış, yaraşığı orijinallıqdır. Təzə fikirlər tapıb təzə naxışlar vurmalısan. Bundan ötrü isə istifadə edəcəyin sözləri yoğurub, şəkildən-şəklə salıb poetik kəşfə çevirməlisən:
“...Ürəyim kabab olunca
Qəm yığışır iyə, Allah!..”
“...Atamın əlləri saxlayır
təməli uçuq Yer kürəsini...
“Kəsilmiş qollardakı zəncirlərin cingiltisi,.. şikəst ayaqların addım səsi,.. içində yıxılan adam...” Belə gözlənilməz ifadələrin zənginliyi ilə Rəsmiyyə Sabir öz lirikasına bədii güc qazandırır.
Eyni zamanda qarşılaşmalar aparıb təzadlar qurunca şeirlərində dinamikliyi artırır:
...İçim, çölüm od içində,
Üşüyürəm niyə, Allah?!
“... Bundan sonra
bir qızın
arzusu yox,
yuxusu çin çıxacaq,
Şəhidim!..”
“...Qara günlərin xanımı
ağsaçlı anam...
Ağ geyinib
qara torpağa qarışdı...”
Rəsmiyyə Sabir dili mükəmməl bildiyindən, yeri gəldikcə, qrammatik imkanlardan da yararlanır və bu onun şeirlərinə çeviklik gətirir:
“...Dərdim üst-üstə gəlir,
Çıxılıram, İlahi!..”
Burada riyaziyyatdakı toplama, çıxma əməlindən söhbət getmir, yüklər – qayğılar, ağrılar, itkilər çoxaldıqca ömrün qısalmasına işarə vurulur. Yaxud “Yer kürəsinin üstündə deyil, Sözümün üstündə durmuşam...” – deyəndə müəllif dayanmağı, qərarlaşmağı yox, dönməzliyi, mətinliyi nəzərdə tutur...
Rəsmiyyə Sabir bütün yaranmışları öz yaxını, simsarı bilir, doğması, əzizi hesab edir. Onlarla dərdləşir, onların dünyadan vaxtsız gedişinə qəlbən acıyır:
“...Mənim dərd bacım oduncaq,
sən ağac kimi yandın,
mən adam kimi,
tüstü ruhlarımız qarışdı...”
“...Zərli kəpənəklərin
Ölümünə ağladım...”
Beləcə, səriştəsini, peşəkarlığını, fitri istedadının üstünə gəlib şeirlərinin daha oxunaqlı alınmasına çalışır. Usandım demədən üzü bitkinliyə irəliləyir:
“Hələ ki qarşıda bir uzun yol var,
Ömür də dumana, sisə düşəcək.
Tale bazarında bəxt paylananda
Mənim də payıma nəsə düşəcək..
.
“Nəsə” niyə, Rəsmiyyə xanım?! İnanırıq ki, alın yazın və yazdıqların birləşib yaradıcılıq fəaliyyətinə layiqli qiymət, şəxsiyyətinə sayğı gətirəcək...
“Ədəbiyyat və incəsənət”
(27.03.2023)
Uğurun sizinçün nə olduğunu anlayın! - Uorren Baffetdən 13 Uğur qazanmaq qaydası
Professor Əlibala Məhərrəmzadə “Ev tapşırığı: Uğur düsturunu tapacağıq” layihəsini sizlərə təqdim edir. Bu dəfəki mövzumuz böyük uğrlar sərgiləmiş Uorren Baffetin uğur qazanmaq qaydalarıdır. Qaydalar 13-dür. Hər buraxılışımızda sizlərə 1 yeni qayda verərək əvvəlkiləri də təkrarən saxlayırıq ki, biliyiniz daha təkmil və mükəmməl olsun.
Beləliklə 13-cü qayda.
Uğurun sizinçün nə olduğunu anlayın!
«Şəxsən mənim üçün uğur qazandığım pulun miqdarı deyil, məşğul olduğum işi necə sevməyimdir! Öz işindən tüklərin biz-biz durana qədər misilsiz həzz ala bilirsənsə, bax bu, əsil uğurdur».
Əvvəlki qaydalar bunlar idi:
Unutmayın – həmişə özünə investisiya qoymaq lazımdır!
«Hər gün öz xarakterinzin zəif cəhətləri üzərində çalışın, onları daha yaxşı edin, öz qabiliyyət və bacarıqlarınızı inkişaf etdirin. Özünə investisiya qoymaq həmişə universitetlərə təhsil haqqı ödəmək anlamında deyil. Mənim iki diplomum var, amma mən onları çərçivəyə salıb divardan asmıram. Mən hətta bilmirəm ki, onları hara qoymuşam».
«Yox!» deməyi öyrənin
«Siz «yox» deməyi öyrənməsəniz, heç vaxt öz zamanınızı tam olaraq idarə edə, ona nəzarət edə bilməyəcəksiniz».
Heç vaxt başqalarına qulaq asmayın
«Çalışın, başqalarının düşüncəsinə əsaslanan qərar qəbul etməyəsiniz. Karyeramın əvvəlində mənə yalnız uğursuzluq vəd edirdilər. Hətta mən investorlardan 100 min dollar toplamağı bacaranda da həmin şəxslərin fikirləri dəyişməmişdi. Təsəvvür edin, 10 ildən sonra bu pullar mənə 100 milyon dollar gətirəndə onların sifətlərinin ifadələri nə cür oldu.
Özünüzə yalnız öz daxili şkalanız ilə qiymət verin!»
Cəld və məhsuldar hərəkət edin
«Qərarı çox uzadıb çox düşünməyin. Həmişə çalışın, hər şeyin məğzini cəld, zamanında anlayasınız. Sonradan başa düşəcəksiniz ki, bu, pul qazanmağın yeganə vasitəsidir».
Çalışın, öz gəlirlərinizi təkrar investisiyaya qoyasınız
«Öz ilk biznesinizlə qazandığınız pulu çalışın xərcləməyəsiniz, işin inkişafına qoyasınız. Haçansa mən dostumla bərbərxanada oyun avtomatı quraşdırıb bir qədər pul qazanmışdım. Amma bu pulu digər yeniyetmələr kimi xərcləmədik, dövriyyəyə buraxdıq. Nəticədə, 26 yaşda artıq mənim 1,4 milyon dollarım var idi».
Hər şey barədə əvvəlcədən razılaşın
«İstənilən işi başlayanda dərhal maliyyə məsələsində razılaşın. Bunu etməsəniz, böyük ehtimalla siz aldadılacaqsınız. Bu dərsi mən yeniyetməlik vaxtımda əxz eləmişəm. Necəsə, mənim babam məndən və dostumdan mağazasını təmizləməyi xahiş etmişdi. Biz 5 saat ərzində süpürgələrlə işlədik, yeşikləri daşıdıq. İş qurtaranda babam bizim ikimizə cəmi 90 sent ödədi. Həmin anda şəraitin ədalətsizliyindən mən çox sarsılmışdım».
Ən xırda şeylərə belə diqqət edin və onlardan öz maraqlarınız üçün istifadə eləyin
«Həmişə xırda şeylərə diqqət etsəniz yaxşıca qənaət etmiş olacaqsınız. Bir yaxşı nümunə gətirim: Mənim bir tanışım evinin küçə divarlarını rəngləmək qərarına gəlmişdi, o bunu çox ağılla etdi. 4 divarın hamısını yox, yalnız əsas küçəyə baxan divarı rənglədi».
Öz pullarınızdan düzgün istifadə edin
«Birinci yarımqayda: heç vaxt pulunuzu itirməyin. İkinci yarımqayda: heç vaxt birinci qaydanı unutmayın.
Foreks bazarında ticarətlə məşğulsunuzsa həmişə məntiqsiz risklərdən qaçın. Ticarətlə necəgəldi məşğul olmayın. Həmişə pula qənaət metodundan yararlanın ki, nəticədə kapitalınız qorunsun və artsın».
Öz vəsaitinizlə yaşayın!
«Çalışın, heç vaxit borca pul göitürməyin. Götürsəniz, heç cür inkişaf edə bilməyəcək, bütün həyatınızı yoxsulluq içində keçirəcəksiniz. Cəld borclarınızı qaytarın və dövriyyəyə buraxmaq üçün azacıq kapital toplayın».
Qətiyyətli olun!
«Qətiyyətsizliklə siz heç nəyə nail ola bilməyəcəksiniz. 1984-cü ildə mən bir kompaniya almışdım. Bu kompaniyada bir qadından – kompaniyanın qurucusundan çox xoşum gəlirdi. İş onda idi ki, böyük maliyyəsi olmayan və olduqca qətiyyətli olan bu xanım yalnız qətiyyəti hesabına mebel satışı ilə məşğul olan böyük bir mağazalar şəbəkəsi aça bilmişdi».
Çökən müəssisədən vaxtında çıxmağa çalışın!
«Gəncliyimdə mən bir dəfə qaçış yarışlarına pul qoymuşdum, uduzdum, pulumu qaytarmaqçün yenə qoydum, yenə uduzdum. Bundan sonra mən fikrimi toplamağı bacardım. Sonralar mənə yalnız ziyan gətirən biznesdən dərhal çıxmağa başladım».
Həmişə hər şeyin perspektivinə diqqət edin
«Həmişə öz növbəti gedişinizi və ondan sonrakını qiymətləndirin. Ətrafınızda baş verən şeylərə adekvat baxmağa çalışın. Belədə çox şey əldə edəcəksiniz».
“Ədəbiyyat və incəsənət”
(27.03.2023)
“Xəstəlik kimisən, əzizim, yoluxmaq istəyirəm sənə...” – İlahə Abbasovanın debütü
“Ədəbiyyat və incəsənət” portalının “Ulduz” jurnalı ilə birgə “Biri ikisində” layihəsində bu gün növbədə Debütdür, Ilahə Abbasovanın şeirləri ilə tanışlıqdır.
DEBÜT
İlahə ABBASOVA
YASƏMƏN ƏTRİ
Bir hekayə yazmalıyam mən –
Yasəmən ətri verən...
Oxumalısan sən,
Sevməlisən,
Gizlədə bilməyib duyğularını,
Unudaraq soluna qalib gələn sağını,
Üzdə bir az hüznlə,
Təmiz bir təbəssümlə
gülməlisən...
Düşünməlisən...
Qara qaşlarını çatıb,
Gözəl gözlərini qısıb,
Bəlkə də, sonuncu dəfə
məni düşünməlisən...
Bir hekayə yazmışam mən –
Yasəmən ətri verən...
Oxumamısan sən,
Sevməmisən...
MƏNİ SƏNSİZ DÜŞÜNMƏ
Bir meşə düşün,
Ağacsız... Quşları nəğməni unutmuş.
Bir dağ düşün,
Dumansız... Çayları axmağı unutmuş.
Bir dəniz düşün,
Dalğasız... Balığı üzməyi unutmuş.
Bir sahil düşün,
Qumsuz... Küləyi əsməyi unutmuş.
Bir səma düşün,
Buludsuz... Yağışı yağmağı unutmuş.
Bir körpə düşün,
Gülüşsüz... Ya da ağlamağı unutmuş.
Bir dünya düşün,
İnsansız... Günəşi doğmağı unutmuş.
Bir də məni düşün,
Sevgisiz... Nəfəs almağı unutmuş.
Yox...
Məni sevgisiz düşünmə,
Səssiz, nəfəssiz düşünmə,
Ruhu bədənsiz düşünmə.
Sənsizlik öldürər məni,
Öldürürsənsə, tam öldür,
Ölünü kəfənsiz düşünmə,
Gəl məni sənsiz düşünmə...
YANIMDA OL
Xəstəlik kimisən, əzizim,
Yoluxmaq istəyirəm sənə...
Qanım çəkilsin, üzüm solsun,
amma yanımda ol...
Sən torpaq kimisən, əzizim,
Səndən gəlmişəm sanki.
Qayıtmaq istəyirəm sənə...
Nəfəsim kəsilsin, sonum olsun,
amma yanımda ol...
DÖZÜR QADIN
Baxır qadın...
Gözlərində bir hüzn var,
keçmişinə baxır qadın...
Qarışıb duyğu selinə,
acı bir göz yaşı olub,
yad gözlərdən axır qadın...
Alışıb bu qaranlığa,
məna tapıb,
boş rənglərdən qaçır qadın...
İnsanların xaosunda
tək qalır qadın...
İzdihamdan sıxılaraq
özünü axtarır qadın...
Xatirələr tonqal olur,
yanır qadın...
Dərd küləyi dərman olur,
sönür qadın...
Yaşamağa səbəb tapmır,
Hamı deyir: “ölür qadın”.
Amma ölmür, dözür qadın.
HEYKƏLLƏRİN RƏQSİ
Bir xəyal qur,
Gizlət hamıdan,
Lap qırxlı körpəni bədnəzərdən qoruyan kimi...
Bir xəyal...
Yıxmağa əlin gəlməsin.
Bir dilək tut,
Bildirmə özünə,
Lap təmiz... məsum... dərin.
Bir dilək...
Diləməyə dilin gəlməsin.
Bir dua yerləşdir köksünə,
Bir varlığın xəbər tutsun,
Bir də səni var edən,
Bir dua...
Lap içdən... məhrəm... gizlin.
Bir mahnı dola dilinə,
Sözləri zildən söylənməsin,
Bir az bəmdən... həzin.
Bir mahnı...
Bütün heykəllər rəqs edə bilsin.
“Ədəbiyyat və incəsənət”
(27.03.2023)
Sumqayıtda muğam bayramı
Novruz tətillərində sumqayıtlı musiqisevərlər diqqətdən kənarda qalmayıblar. “Ədəbiyyat və incəsənət” portalı xəbər verir ki, Sumqayıtın Bulvarında qərarlaşan ecazkar Muğam Mərkəzində muğam konserti keçirilib. Tədbirə şəhər ictimaiyyətinin nümayəndələri xüsusi dəvət alıblar.
Milli mədəniyyətimizin sütununu təşkil edən əsas artefaktlardan olan muğamı saatlarca dinləyərsən, yorulmazsan. Bu dəfə də belə olub. Konsertdə Muğam Televiziya müsabiqələrinin iştirakçıları və qalibləri, eləcə də respublika və beynəlxalq müsabiqələrin laureatları maraqlı proqramla çıxış ediblər.
Xanəndələr Aytən Məhərrəmova, Məmməd Nəcəfov, Zabitə Alıyeva, Babək Şuşalı, Yaqut Xəlilzadə, Nisbət Sadrayeva, Xəyal Hüseynov, Rəvan Qaçayev, gənc xanəndələr Ədilə Əliyeva, Sevil Abdullayeva, Yusif Sadıxov, Həsrət Əzizli, tarzənlər Səxavət Məmmədov, İsmayıl Zülfüqarov, qanun ifaçısı Natəvan Həsənova, kamançaçı Fərrux Haşımlı, balabançı Rafael Əsgərov, nağaraçı Vüsal Bayramovun ifasında tamaşaçılar muğam və təsnifləri, instrumental muğam parçalarını, habelə muğam improvizasiyalarını dinləmək imkanı əldə ediblər.
“Ədəbiyyat və incəsənət”
(27.03.2023)
Mədəniyyət Nazirliyindən gözəl təşəbbüs: Paytaxt teatrlarının bölgələrə səfərləri təşkil edilib
Ümummilli Lider Heydər Əliyevin 100 illik yubileyinə həsr olunmuş “Heydər Əliyev İli” çərçivəsində Mədəniyyət Nazirliyi tərəfindən təşkil edilən silsilə tədbirlər davam edir. Bu fədbirlərdən biri də paytaxt teatrlarının bögələrə səfərlərinin təşkilidir.
“Ədəbiyyat və incəsənət” portalı Nazirliyin mətbuat xidmətinə istinadən xəbər verir ki, regionlarda mədəniyyət həyatının fəallaşdırılması, əhalinin, xüsusilə də gənclərin asudə vaxtının keyfiyyətinin yüksəldilməsi, yerli yaradıcı kollektivlərlə daha sıx ünsiyyət və faydalı təcrübə mübadiləsi məqsədi daşıyan bu səfərlər bayram tətillərinin ilk günlərindən başlayıb.
Novruz bayramı günləri paytaxtın səkkiz aparıcı mədəniyyət ocağının kollektivi ölkənin müxtəlif regionlarında maraqlı repertuarla bölgə tamaşaçılarının qarşısına çıxıb. Proqram çərçivəsində ilk qastrol edən kollektiv Azərbaycan Dövlət Yuğ Teatrı öz “Şəbədə” tamaşası ilə Şamaxıya yollanıb. Kollektiv martın 20-də Şamaxı rayon Mədəniyyət Mərkəzində sənətsevərlərin qarşısına çıxıb.
A.Şaiq adına Azərbaycan Dövlət Kukla Teatrının yaradıcı heyət martın 22-si Salyan və Lənkərana gedib. Kuklaçılar M.F.Axundzadənin “Müsyö Jordan və dərviş Məstəli şah” tamaşasını əvvəlcə Salyan Dövlət Kukla Teatrında nümayiş etdirib. Həmin gün kollektiv Lənkəran şəhərindəki uşaq evi sakinlərinin də könlünü oxşayıb.
Azərbaycan Dövlət Akademik Rus Dram Teatrı Gəncə teatrsevərlərinin qonağı olub. Kollektiv martın 22-də Nizami Gəncəvinin “Yeddi gözəl” poeması əsasında eyniadlı tamaşanı Gəncə teatrının səhnəsində nümayiş etdirib.
Azərbaycan Dövlət Akademik Musiqili Teatrı İbrahim Sadıxovun “Molla Nəsrəddinin beş arvadı” əsərinin tamaşası ilə martın 23-də Mingəçevir teatrının səhnəsində çıxış edib.
Şuşa Dövlət Musiqili Dram Teatrı isə “Lənkəran xanının vəziri”ni qusarlı tamaşaçılarla görüşdürüb. Axundzadənin bu məşhur əsərinin tamaşası martın 23-də Qusar Dövlət Ləzgi Dram Teatrında oynanılıb.
Azərbaycan Dövlət Pantomim Teatrı martın 24-də Qəbələ rayon Mədəniyyət Mərkəzində “Pantomim buketi”ni nümayiş etdirib.
Azərbaycan Dövlət Gənc Tamaşaçılar Teatrı Sumqayıt teatrsevərlərinin görüşünə gedib. Yaradıcı heyət “Dəcəl keçi” nağıl-tamaşasını martın 26-da təqdim edib.
Ən nəhayət bu gün Azərbaycan Dövlət Akademik Milli Dram Teatrı “Məlikməmməd” nağıl-tamaşası ilə Şəkidə teatrsevərlərin qarşısına çıxacaq.
Gözəl təşəbbüsdür. Yalnız alqışlamaq lazımdır.
“Ədəbiyyat və incəsənət”
(27.03.2023)
Demə Səməd Vurğun gəldi-gedərdi…
“Ədəbiyyat və incəsənət” portalı xəbər verir ki, hər il olduğu kimi bu il də mart ayının 21-i saat 11-də Xalq şairi Səməd Vurğunun anadan olması və Poeziya Günü münasibətilə "Qazax" Xeyriyyə İctimai Birliyi və Səməd Vurğunun Ev Muzeyinin birgə təşkilatçılığı ilə Fəxri Xiyabanda Səməd Vurğunun məzarı ziyarət olundu.
Eyni zamanda 22 martda anadan olmuş Xalq yazıçısı İsmayil Şıxlının, 23 martda anadan olmuş Xalq yazıçısı Mehdi Hüseynin, Xalq yazıçısı Yusif Səmədoğlunun, Xalq şairi Vaqif Səmədoğlunun, Xalq yazıçısı İsa Muğannanın, Azərbaycan SSR Xalq Artisti və SSRİ xalq artisti, xoreoqraf, professor, Leyla Vəkilovanın, ictimai-siyasi xadim Mövsüm Poladovun məzarları da ziyarət olundu.
Məzarlara tər gül dəstələri qoyuldu, çıxışlar, xatirələr söyləndi.
Mart ayının 21-i Qazax Rayon İcra Hakimiyyətinin, Azərbaycan YaIçılar Birliyinin Qazax Zona filialının və "Qazax" Xeyriyyə İctimai Birliyinin birgə təşkilatçılığı ilə Səməd Vurğunun anadan olmasının 117-ci ili əlaqədar olaraq Qazax rayonunun Yuxarı Salahlı kəndində yerləşən Səməd Vurğunun Poeziya Evində anım tədbiri keçirildi.
Novruz bayramı ilə əlaqədar olaraq "Qazax" Xeyriyyə İctimai Birliyinin Bakıda yaşayan üzvləri doğmalarını ziyarət etmək üçün Qazax və Ağstafa rayonlarına getdikləri üçün Yuxarı Salahlı kəndində Səməd Vurğunun Poeziya Evində təşkil olunan anım tədbirində fəal iştirak etdilər.
Əklil və tər qərənfillər "Qazax" Xeyriyyə İctimai Birliyi tərəfindən hazırlanmışdı.
Ruhu şad olsun dahi şairin!
“Ədəbiyyat və incəsənət”
(27.03.2023)
Bayram gününün 3 pozitiv hadisəsi
“Ədəbiyyat və incəsənət” portalı Azərbaycan Mətbuat Şurasının sədri Rəşad Məcidin yazısını təqdim edir
Bayram gününün 3 pozitiv hadisəsi, məncə, bunlardır:
30 ildən sonra Tərtər rayonunun Talış kəndində Novruz bayramı münasibətilə geniş konsert proqramı təşkil edilib, aşıq havaları səslənib, kəndirbazlar, pəhləvanlar, eləcə də ölkənin tanınmış incəsənət nümayəndələri çıxış edib. Azərbaycan Dövlət Kukla Teatrının “Oyuq” teatr-studiyasının ifasında “Can Qarabağ” adlı rəngarəng konsert proqramı təqdim olunub.
Böyük Qayıdışın ilk ünvanı olan Zəngilan rayonunun Ağalı kəndində Novruz bayramı xüsusi coşqu ilə qeyd olunub. Ağalı sakinləri uzun illərdən sonra baharın gəlişini doğma yurdlarında qarşılayıblar. Azərbaycan Dövlət Televiziyası vasitəsi ilə canlı yayımlanan konsert proqramı, səslənən milli musiqi və ifa olunan rəqslər böyükdən kiçiyə hər kəsə əsl bayram ab-havası bəxş edib.
Baş prokuror Kamran Əliyev 85 illik yubileyi ilə əlaqədar Azərbaycan SSR Prokuroru, prokurorluğun veteranı İlyas İsmayılovun bağ evinə gedərək onunla görüşüb, Baş Prokurorluğun kollektivi adından təbriklərini və xoş arzularını çatdırıb, onu “Azərbaycan Prokurorluğunun 100 illiyi (1918-2018)” Azərbaycanın yubiley medalı ilə təltif edib.
“Ədəbiyyat və incəsənət”
(27.03.2023)
Böyük İsmayıl Şıxlının 104 illiyinə
“Ədəbiyyat və incəsənət” portalı Elman Eldaroğlunun böyük Azərbaycan yazıçısı İsmayıl Şıxlının 104-cü ildönümünə həsr edilmiş yazısını təqdim edir
Son dərəcə dinamik, enerjili, özünə güvənən, müstəqil düşüncəli, azad bir insan idi. Şəxsi keyfiyyətləri o dərəcədə yüksək idi ki, xalq içində bir şəxsiyyət kimi böyük nüfuz qazana bilmişdi. Dostları üçün çox işlər görmüşdü. İnsanlara yardımçı olmağı və onların problemlərini bölüşməyi sevərdi. Göstəriş almaqdan xoşlanmaz, inadcıl, öz sözündən dönməzdi. Yeri gələndə sərt çıxışları ilə auditoriyanı lərzəyə gətirə bilirdi...
1919-cu il martın 22-də Qazaxın İkinci Şıxlı kəndində müəllim ailəsində dünyaya gəlmişdi. Kosalar kəndində ibtidai məktəbi bitirib, üç il Qazax pedaqoji məktəbində təhsil almışdı. Bir il Kosalar kənd orta məktəbində baş dəstə rəhbəri və müəllim işlədikdən sonra Azərbaycan Pedaqoji İnstitutunun dil və ədəbiyyat fakültəsində təhsilini davam etdirmişdi. Oranı bitirərək bir il Qazax rayonunun Kosalar kənd orta məktəbində dərs hissə müdiri işləmişdi. İkinci dünya müharibəsinə qatılmış, sovet ordusu tərkibində ön cəbhələrdə siravi əsgər olmuşdu. Ordudan tərxis edildikdən sonra altı ay Kosalar kənd məktəbində tədris hissə müdiri, Azərbaycan Pedaqoji İnstitunun filologiya fakültəsində aspirant, müəllim, baş müəllim olmuş, xarici ölkələr ədəbiyyatı kafedrasının müdiri, bir müddət Azərbaycan Yazıçılar İttifaqının katibi vəzifələrində çalışmısdı. Daha sonra "Azərbaycan" jurnalında baş redaktor, Azərbaycan Yazıçılar İttifaqının birinci katibi, SSRİ Yazıçılar İttifaqının katibi olmuşdu. 1986-cı ildə Azərbaycan Yazıçılar İttifaqının sədri, 1991-ci ildə Azərbaycan Yazıçılar Birliyinin Ağsaqqallar Şurasının sədri seçilmişdi. 1995-ci il iyulun 26-da vəfat edib...
O, dünyaya gələndə Azərbaycan Demokratik Respublikası cəmi bir il idi ki, qurulmuşdu. Ölkədə güclü ictimai-siyasi proseslər gedirdi. Atası Qəhrəman kişinin halal müəllim süfrəsində gələcək şöhrətindən xəbərsiz böyüyürdü. Və bir gün, on doqquz yaşında ikən ilk "Quşlar" şeiri "Ədəbiyyat" qəzetində dərc olundu. Bu onda böyük həvəs yaratdı. Başı müharibəyə qarışsa da qələbədən bir il sonra "İnqilab və mədəniyyət" jurnalında çap etdirdiyi "Həkimin nağılı" hekayəsi ilə mükəmməl ədəbi yaradıcılığa başladı. O vaxtdan son nəfəsinədək özünü ədəbiyyata həsr etdi...
Ömür-gün yoldaşı Ümidə xanım evdar qadın idi. Elçin və Fərrux adında iki yadigarı qalıb. Elçin jurnalist, Fərrux isə rəssamdır...
Başladığı işi sona çatdırmağı xoşlayardı. Möhkəm iradə və fiziki gücə, eyni zamanda idarəetmə qabiliyyətinə sahib idi. Həllini tapmamış problemlərə nifrət edirdi. Davamlı olaraq yenilik arzusunda olması onun ən diqqət çəkən xüsusiyyətlərindən biri olub. Heç zaman özünü məhdudlaşdırmağa çalışmazdı. Ona nəyisə bəyəndirməyə cəhd etmək mənasız olsa da olduqca həssas insan idi...
Ərsəyə gətirdiyi əsərlər çox olub. Amma ona ümumxalq məhəbbəti gətirən əsəri isə “Dəli Kür” oldu. Bəlkə də əsərin baş qəhrəmanı Cahandar ağa obrazı onun daxili dünyasının təzahürü idi. Onun vasitəsi ilə Cahandar ağanı sevdik, qəlbimizdə, yaddaşımızda yuva qurdu. Nə qədər ki, Cahandar ağa yaşayır, haqqında söhbət açdığım xalq yazıçısı İsmayıl Şıxlı da yaşayacaq…
Bəli, Azərbaycan ədəbiyyatının Cahandar ağası- İsmayıl Şıxlı heç zaman unudulmayacaq. Mövludun mübarək, USTAD!
Ruhun şad olsun!…
“Ədəbiyyat və incəsənət”
(27.03.2023)
