Super User
İyunun 17-də Qarabağın ürəyi Gəncə şəhərində döyünəcək.
Gəncə Dövlət Filarmoniyasının səhnəsində “Qarabağ gecəsi” adlı xeyriyyə konserti keçiriləcək. Konsertdə ölkəmizin tanınmış Xalq və Əməkdar artistləri Qarabağ üçün oxuyacaqlar.
Qarabağ Dirçəliş Fondunun təşəbbüsü və təşkilatçılığı, Mədəniyyət Nazirliyinin təşkilati dəstəyi ilə reallaşacaq konsertdən əldə ediləcək vəsait Ağdam rayonunun ərazisində yerləşən Pənahəli xanın İmarət kompleksinin bərpasına yönəldiləcək.
Qeyd olunmalıdır ki, konsertin baş sponsoru Veysəloğlu Şirkətlər Qrupu, informasiya dəstəkçisi isə “Azərbaycan Televiziya və Radio Verilişləri” Qapalı Səhmdar Cəmiyyətidir.
Siz də bilet əldə edərək “Qarabağ gecəsi”nin iştirakçılarından biri ola bilərsiniz.
(Bilet əldə etmək üçün linkə keçid edin: https://iticket.az/events/concerts/karabakh-night-charity-concert23)
Həmrəy olaq, Qarabağı birlikdə bərpa edək!
“Ədəbiyyat və incəsənət”
(09.06.2023)
Azərbaycanın tədiyə balansının ümumi qalığı 3,4 milyard dollar təşkil edib
“Ədəbiyyat və incəsənət” portalının növbəti Açıq portfel xəbəri Mərkəzi Banka istinadəndir.
Cari ilin birinci rübü üzrə tədiyə balansı əsasən neft və qaz qiymətlərinin əlverişli olması, qeyri-neft-qaz ixracının artması və kapitalın və maliyyənin hərəkəti hesabında müsbət meyillərdən təsirlənib.
Hesabat dövründə Azərbaycanın tədiyə balansının ümumi qalığı 3 milyard 453,8 milyon ABŞ dolları təşkil edib. Cari əməliyyatlar balansında 3.4 milyard dollar, kapital və maliyyənin hərəkəti hesabında isə 1.3 milyard dollar profisit yaranıb, ehtiyat aktivləri 3.5 milyard dollar artıb. Bu dövrdə xam neftin orta qiyməti 85 dollar/barel olub, qeyri-neft-qaz ixracı isə 27 faiz artaraq 900 milyon dollar səviyyəsində formalaşıb.
“Ədəbiyyat və incəsənət”
(09.06.2023)
Xalq artisti Siyavuş Aslanın xatirəsi anılıb
Akademik Milli Dram Teatrının rəhbərliyi və kollektivi II Fəxri xiyabanda Xalq artisti, görkəmli sənətkar Siyavuş Aslanın, Yasamal qəbiristanlığında isə onun oğlu Çingiz Aslanın məzarlarını ziyarət edib, ruhları üçün dualar ediblər.
Tetarın bədii rəhbəri, Əməkdar incəsənət xadimi Mehriban Ələkbərzadə, Xalq artistləri Rafiq Əzimov, Nurəddin Mehdixanlı və Əli Nur çıxış edərək Siyavuş Aslanın həyatı, səhnə fəaliyyəti, Azərbaycan teatrının inkişafındakı rolu haqqında danışıblar.
“Ədəbiyyat və incəsənət”
(09.06.2023)
Bu səhər möcüzəli səhər oldu
“Ədəbiyyat və incəsənət” portalı Almaz Ərgünəş Bəyazidin yazısını təqdim edir. Günümüzdə kim deyir ki, möcüzə olmur? Olur, özü də necə.
Bu səhər çantamı çiynimə atıb yeniyetməlik və gənclik illərimin xatirələrini yaşadan yerləri dolaşdım.
Hər yan yaşıllıq, isti günəş, tərtəmiz küçələr, gözəl, sakit, mehriban Sumqayıt.
Arada səbr gətirdim, yanımdan ötən yaşlı kişi - Sağlam olun - dedi.
Gulə-gülə minnətdarlığımı bildirdim.
Tanış simalar gördüm. Amma görmək istədiklərimin çoxusu vəfat etmişdi. Bununla belə, bir-birinə bənzər insanlar mənə çoxlarını xatırlatdı. Sandim ki, cooox uzun bir ömür yaşadım.
İki quruluş… Yəqin bundandır bu düşüncələr. İki əsr. Amma daha önəmlisi, iki minillik!!!
Keçmiş çox kövrəkdir...
Ən çox konyaklı şokaladı sevirdim. Evə gələndə Sahilə qızım mənə konyakli şokalad aldığını dedi.
Bu aralar sanki keçmişim mənimlə görüşə gəlib. Çox romantik adamam.
Möcüzə elə bu deyilmi?
“Ədəbiyyat və incəsənət”
(09.06.2023)
Qulu Məhərrəmli: “Heysiyyətimizi tapdalayanları cəzalandırmalıyıq!”
“Ədəbiyyat və incəsənət” portalının daimi müəllifi Elman Eldaroğlu bu dəfə çox məşhur telejurnalist, professor barədə fikirlərini bölüşür. Qulu Məhərrəmli barədə. Buyurun.
Amerikalıların gözəl bir deyimi var:- “Adamın haqqında xoş sözlər demək üçün onun ad gününü gözləməyə dəyməz.” Aşıq Ələsgər isə “Eylər” adlı məşhur qoşmasında söyləyir;
"“Can” dеməklə candan can əskik olmaz,
Məhəbbət artırar, mеhriban еylər...”
Axı ömür elə də uzun deyil, bir-birimizə xoş söz deməyə niyə də tələsməməliyik? Necə deyərlər, qılıncımızın qaşı düşməyəcək ki...
Nə isə, bu gün sizə bildiklərini təkcə tələbələrinə yox və həm də ictimaiyyətə çatdırmağa çalışan Azərbaycanın bir televiziya tənqidçisi, publisisti, filologiya elmləri doktoru, BDU-nun professoru, Azərbaycan Respublikasının "Əməkdar jurnalist"i haqqında söhbət açmaq istəyirəm.
Deyir ki:- “Mənə elə gəlir, insan öz yaşını hiss eləmir. İnsan yaşını hiss eləsə, ona uyğunlaşsa, onun üçün çox çətin olar. Yəqin bu, həyat enerjisiylə, ətraf mühitlə bağlı bir məsələdir. Bunu bioloji baxımdan izah etmək çətindir, çünki insanın yaşlanmağı, qan damarlarının vəziyyəti, beynin iş qabiliyyəti, insanın özünün fiziki göstəriciləri yaşda əks olunur. Amma insanı cavan saxlayan və gənc göstərən onun ruhu, düşüncəsidir. Stalinə sual verirlər ki, insan nə vaxt yaşlanır, deyir zamanı hiss eləməyəndə. Mənim də işim elə gətirib ki, televiziya həyatı, pedaqoji fəaliyyətim, jurnalistika mühiti, istər-istəməz onun özünün dinamizmi həyatıma təsir eləyir. Görünür, xarakter də burda rol oynayır. Amma ən əsası ruhun vəziyyəti ilə bağlıdır. İnsan içində ölübsə, istəyir 30 yaşı olsun, istəyir 50, əlbəttə ki, ölüvay görünəcək...”
Altmış doqquz yaşın içindədir, fəqət çevikliyini hələ də itirməyib. Oturaq həyat keçirmək, süstlük, hərəkətsiz yaşamaq ruhuna zidd əlamətlərdəndir. Necə deyərlər, burdan vurub, ordan çıxır. Pedaqoji fəaliyyəti ilə yanaşı, dostların xeyir-şərində, mədəni kütləvi tədbirlərdə, televiziya ekranlarında onu tez-tez görmək olur. Nəvələrinin əksəriyyəti xarici ölkələrdə təhsil alır. Bir də görürsən ki, onların diplomalma mərasimlərində iştirak edib, sosial şəbəkələrdə şəkil paylaşır. Sevincini dostları ilə bölüşməyə tələsir. Bütün bu hərəkətlərin hamısı adamdan böyük enerji tələb edir. Enerjinin mənbəyi isə təkcə düzgün qidalanmaqda deyil, gərək niyətin saf, qəlbin təmiz, ruhun sağlam olsun...
“Adam ictimailəşibsə, müəyyən çərçivəni qəbul etməlidir. Hardasa şüuraltı yaşın ölçüləriylə hesablaşmalısan. Qadağalar olmalıdır, bu, təbiidir. Önəmli olan özün üçün belə sərhədlər qoymamağındır. Mən etik məsələləri nəzərdə tutmuram. Əlbəttə, bu yaşda şortik geyinib hər hansı bir məclisdə görünsən sənə başqa cür baxacaqlar. Təbii ki, yaşadığın cəmiyyətin qaydalarını nəzərə almalısan. Eyni zamanda onu əsas gətirib bütün hərəkətlərinə məhdudiyyət qoymaq olmaz. Deməlisən də, gülməlisən də, məclislərdə də olmalısan. Özünə uyğun çevrən olmalıdır. Xoşbəxtlikdən məndə həmişə belə bir çevrə olub. İkincisi, çox vaxt gənclərin əhatəsindəyəm. Onlarla çox vaxt ruhi vəziyyətimiz uyğun gəlir. Dərsdə tələbələrləyəm, onların ritmiylə müzakirələr aparıram. Mentaliteti də, yaşı da, qadağaları da nəzərə almalısan. Amma əsas odur ki, bütün bu qadağaların içində həm də ruhunu diri saxlayasan. Bu, çətindir, amma mən nə dediyimi yaxşı bilirəm...”- söyləyir.
Ailəsi çox da böyük deyi. İki qızı var, onlar da ailə qurublar. Ömür-gün dostu Zemfira xanım Məhərrəmli ilə tələbə yoldaşı olublar. O da media adamıdır. Bədii yaradıcılıqla aktiv məşğul olur. Bir sıra kitabların müəllifidir...
Zəngin və parlaq uşaqlığı olub. Zəngilanda doğulsa da 5 yaşında atası rəhmətə getdiyindən onu Şuşada internat məktəbinə qoyublar. İnternat məktəbdə oxumağı xarakterinə, həyatına çox ciddi təsir edib. Kollektiv mənafeni, sözün yerini, yaxşılığı, şərə qarşı dayanmağı, zəifin tərəfini saxlamağı, zalıma qarşı çıxmağı orada öyrənib. Hətta bəzi yazılmamış qanun və qaydaları da burada mənimsəyib. Məsələn, hər gördüyün şeyi demək olmaz, oğurluq eləmək kişilikdən deyil, döyülənə kömək etməlisən və s..
Deyir ki,- “Bir dəfə başqa rayonlardan bizim oxuduğumuz məktəbdəki pioner düşərgəsinə uşaqlar gəlmişdi. Özləriylə ərzaq gətirmişdilər, biz tər tökə-tökə o ərzağı boşaltdıq. Beş nəfəriydik, bizi sıraya düzüb üstümüzü axtardılar. Yəni birdən biz ordan konfet, peçenye götürmüş olarıq. Sarsılmışdıq bu hərəkətdən. Gedib müəllimimizə dedik ki, biz bu anbarı dağıtmalıyıq, çünki təhqir olunmuşuq. Heysiyyətimizi tapdalayanları cəzalandırmalıyıq. Müəllim nəsihət verdi, sonra dedi ki, necə istəyirsiniz eləyin. Orda elə həngamə qopardıq ki, bizdən üzr istədilər. Anladılar ki, heç bir uşağın heysiyyətini tapdalamaq olmaz. İnsan özünün ləyaqətini qorumursa, o, çox yararsız adamdır. Haqsızlığa qarşı çıxmaq lazımdır...”
Müstəqil yaşamağı uşaqlıq illərindən öyrənib. Qoçaq və dalaşqan olub. Təsəvvür edin ki, 5-ci, 6-cı siniflərdə oxuyanda İsa bulağına gedib pul qazanırdı. Çör-çöp yığaraq orada kabab bişirmək istəyən adamlara satırdı. Tələbəliyi də pis keçməyib. Yaşadığı yataqxanada müxtəlif ziyafətlərdə içib də, dava da salıb, şənlənib də. Döyüldüyü də az olmayıb, amma heç vaxt kimlərinsə təsiri altına düşməyib, sarsılmaz iradəsi var...
Bəli, haqqında söhbət açdığım professor Qulu Məhərrəmlinin sərt, amansız qaydalar altında böyüməsi onun həyatında mühüm rol oynayıb. Ona görə də mərd, döyüşkən, cəsur, dinamik adamdır. Bəlkə də çoxunuz bu faktları bilmirdiniz. “Facebook” sosial platformasında Cenevrədən, “Dü Leman” kollecinin məzunu, nəvəsi Nihadla paylaşdığı şəkilə baxarkən dediklərim yadıma düşdü və bildiklərimi sizinlə bölüşmək istədim...
Çox yaşayın, Qulu müəllim! Nəvələrin uğurları şirin olur. Gözünüz aydın olsun!
“Ədəbiyyat və incəsənət”
(09.06.2023)
“Bir sevda qoynunda dərya salmışıq…”
“Ədəbiyyat və incəsənət” portalının Poetik qiraət rubrikasının daimi aparıcısı, gözəl şairimiz Əlizadə Nuri sizə növbəti şeirini təqdim edir:
Bir sevda qoynunda dərya salmışıq…
Yaxşı ki, dünyanın künc-bucağında,
Bir az özümüzə yer saxlamışıq.
Bəlkə xatirələr ,,qara qutu”du-
İçində nə qədər sirr saxlamışıq…
Günəşin ovcundan dağılır işıq…
Bu könül ev kimi… sevgi-sarmaşıq.
Bir sevda qoynunda dərya salmışıq-
Dəryanın dibində dürr saxlamışıq…
Qadağa beləymiş, yasaq da belə,
Ölənə şər atır bu sağ da belə.
Hər gün canımızı yusaq da belə-
Hələ içimizdə kir saxlamışıq…
“Ədəbiyyat və incəsənət”
(09.06.2023)
“Vətən dərdi çəkənlərin, dağa dönmüş qəmiyəm mən” - Əli Qayib
“Ədəbiyyat və incəsənət” portalında dərc edilən Güney Azərbaycan ədiblərinin ən yaxşı nümunələrini diqqətinizə çatdırmaqdayıq.
Portalımızın Güney Azərbaycan təmsilçisi Əli Çağlanln təqdimatında bu həftə Əli Qayibin həftəsidir.
Şeirlərini Qayıb təxəllüsüylə yazan Əli Rəştbər 1980-cı ildə Qaradağın Gal kəndində dünyaya göz açıbdır. Atası Məhəmmədin kənddən köçməsi ilə 1990-cı ildə Urmu şəhərinə daşınıblar.
Əli Qayıbın hazırda üç kitabı ışıq üzü görübdür: “Yol ağlasın” 2015, “Susqun fəryadıyam mən bu torpağın” 2017, “Salam olsun ozanlara” 2020.
Əli Qayıb bir mütərcim və yazar kimi də fəaliyyət göstərir. Onun hekayələri Güney Azərbaycanın gündəliklərində və jurnallarında nəşr edilibdir.
MƏN
Söz mülkündə nakam qalan,
Diləklərin dəmiyəm mən.
Haq sevdalı ürəklərin,
Sızıldayan simiyəm mən.
Qəmkeşəm qəmə qatlaşan,
Fərhadam, dağları aşan,
Köç etməyə hazırlaşan,
Qərib quşlar kimiyəm mən.
Olmasa da yaşım yetmiş,
Yetmişinə yolum yetmiş,
Hasılı talana getmiş,
Bir yiyəsiz zəmiyəm mən.
Bax ahına, amanına,
Dalğasına, tufanına,
Yanını son limanına,
Söykəyəcək gəmiyəm mən.
Dərd qəddini əyənlərin,
Ox bağrına dəyənlərin,
Araz-araz deyənlərin,
Gözlərinin nəmiyəm mən.
Mən Qayıbam, yaram dərin,
Dərdim qaynar, odum sərin,
Vətən dərdi çəkənlərin,
Dağa dönmüş qəmiyəm mən.
“Ədəbiyyat və incəsənət”
(09.06.2023)
3 milyarda doğru!!! - “Üzüklərin hökmdarı” böyük kassa mədaxilinə hesablanıb
"Üzüklərin hökmdarı" trilogiyasının motivləri əsasında hazırlanan hələ ki sonuncu “Üzüklərin hökmdarı: Güc üzükləri” çoxseriyalı fantastik filminin ikinci sezonunun çəkilişləri nəhayət ki, başa çatıb.
“Ədəbiyyat və incəsənət” portalı xəbər verir ki, bu barədə kinonews.ru saytı məlumat verib.
“Amazon Film Studios” şirkətinin istehsal etdiyi, Con Tolkienin müəllifi olduğu sözügedən filmin birinci sezon nümayişi ötən ilin oktyabrından bu ilin mayınadək davam edib, 465 milyon dollarlıq büdcəyə malik bu ekran əsərində bəhs edilən hekayə qədim dövrdə dünyanın mənşəyini, eləcə də həmin zamanda yaşayan irqləri izah edən uydurma Tolkien mifologiyası haqqındadır.
Qeyd edək ki, hazırda əksər film istehsal edən studiyalarda Amerika Ssenaristlər Gildiyasının davam edən tətili səbəbindən film və serialların buraxılışları sürətləndirilir. Güman edilir ki, “Üzüklərin hökmdarı: Güc üzükləri” vaxtında yayımlanan bir neçə layihədən biri olacaq. Serialın pərəstişkarları layihənin yeni sezonunun başlanmasını səbirsizliklə gözləyir.
İstehsalçılar böyük gəlir hədəfləyiblər.
Xatırladaq ki, kinotrilogiya indiyə qədər 2,92 milyard dollar kassa mədaxili ilə kino tarixinin rekorduna sahiblənmişdir.
Şəkildə: Filmdən kadr
“Ədəbiyyat və incəsənət”
(09.06.2023)
Nəfəskəsici detektiv – Fəxrəddin Qasımoğludan “On ikiyə işləmiş”
“Ədəbiyyat və incəsənət” portalı “Qiraət saatı”nda Fəxrəddin Qasımoğlunun “Son gecə” detektiv romanının dərcini yekunlaşdırdı. Böyük oxucu marağını və istəyini nəzərə alıb romanın davamı olan “On ikiyə işləmiş” romanının dərcinə başlayırıq.
Özü polis orqanlarında çalışan, ən dəhşətli, tükürpədici cinayətlərdən bilavasitə xəbər tuta bilən müəllifin bu romanı da sizləri sonadək gərginlik içində saxlayacaq. Və siz bu romanı da çox bəyənəcəksiniz.
1-ci dərc
1990-cı il, may ayının 24-ü. Saat 21:00.
Şəhər kənarında yerləşən tanınmış restoranın geniş salonunda, ortada açılmış tək bir masanın arxasında əyləşmiş adamlardan başqa heç kim yox idi. Ola da bilməzdi. Bu restoran, «oğru yığıncağı»nın keçirilməsi üçün üç gün əvvəldən bu tarixə bron edilmişdi. Axşama qədər qapıları bağlı saxlanılmış restoran, az əvvəl qonaqların gəlişinə yaxın açılmış, həm çöl, həm içəri tərəfdən silahlı adamlar tərəfindən qorunurdu.
Masada doqquz nəfər oturmuşdu. Avtoritetlərinin göstəricisi olan, çiyinlərinə döydürdükləri səkkizguşəli ulduz döymələrini əyinlərindəki bahalı libaslar gizlətsə də, onların əl barmaqlarındakı döymələr hamısının zəngin kriminal keçmişə malik olmalarından xəbər verirdi.
Masanın üstü cürbəcür yeməklərlə, içkilərlə dolu idi, ancaq heç kim süfrəyə əl uzatmağa tələsmirdi. Vacib bir məsələ ilə bağlı təşkil olunmuş «yığıncaq» öz qərarını verənədək süfrəyə toxunmaq, xüsusilə spirtili içki qəbul etmək olmazdı. Bunu, bu insanların özləri üçün yaratdıqları «oğru» qanunları tələb edirdi. Bütün qərarlar ayıq başla verilməli idi.
Onlardan başqa burada üç nəfər də var idi. Orta yaşlı bu üç nəfər ayaq tərəfdə masadan bir qədər aralıda dayanmışdı, hər üçü olduqca həyəcanlı görünürdülər.
Nəhayət, masanın lap başında oturmuş, statusca hamıdan yüksək mövqe tutması aşkar hiss olunan zəhmli adam üzünü yaxınlıqda durmuş, onları qorumaq üçün hazır vəziyyətdə dayanmış idmançı görkəmli gəncə tutub dedi:
-Bunları yola sal, getsinlər.
Üstlərindən ağır bir yük götürülmüş kimi dərindən nəfəs alan bu üç nəfər, ikinci dəfə deyilməsini gözləməyib, sürətlə restoran zalını tərk etdilər.
Zəhmli adam uzun-uzadı onların arxasınca baxdıqdan sonra üzünü masadakılara tutub dedi:
-Yığışdıq, dinlədik, araşdırdıq. Hamı eşitdi. İndi hərə öz fikrini bildirsin.
-Günahkardır!
Ən birinci ondan sağ tərəfdə oturmuş «Xan» ləqəbli avtoritet dilləndi.
-Günahkardır!
Onunla üzbəüz oturmuş «Ağbaş» ləqəbli avtoritet də öz hökmünü səsləndirdi.
-Günahkardır!
-Günahkardır!
-Günahkardır!
Beləcə, masadakı səkkiz nəfər eyni hökmü verib, doqquzuncu, son söz sahibi olan zəhmli adamın nə deyəcəyini gözlədilər.
Adam, hökmləri dinləyib bir qədər fasilə verdi, sonra yumruğunu masaya vurub amiranə səslə hamının gözlədiyi son qərarı səsləndirdi:
-Müqəddəs olana xəyanət etməyi düşünən baş da, müqəddəs olana uzadılan əl də kəsilməlidir. Üç günün tamamında hökm yerinə yetirilsin.
Bu sözlərdən sonra məclisə böyük bir sükut çökdü. Kriminal aləmdə «söz» sahibi olan, onlarla ağır məsələlər araşdırılan yığıncaqlarda iştirak etmiş, az əvvəl yenə ən ağır qərarı vermiş masadakıların azı yarısı verdikləri qərarın doğruluğuna tam əmin deyildilər. Ancaq bunu dilə gətirib az əvvəlki üç şahidin dediklərinin əksini sübut etmək üçün əllərində heç bir dəlilləri yox idi. Bu aləmdə, sübutu olmayan söz dilə gətirilmirdi…
* * *
2020-ci il, may ayının 16-sı. Saat 16:20…
Ofisin qapısını içəridən bağladım, işıqları söndürüb pəncərələrin pərdələrini yarıya qədər endirdim. Alaqaranlıq otaqda masanın arxasına keçib kresloma əyləşdim.
Ofisdə tək idim. Bir neçə gün əvvəl yekunlaşmış, qaçırılmış qızın axtarışları ilə bağlı keçirdiyim əməliyyatdan sonra köməkçimə işə çıxmamasını, bir qədər dincəlməsini tapşırmışdım. Həmin əməliyyat zamanı, məhz köməkçim Layiqənin bacarığı sayəsində bizə lazım olan məkana son anda daxil ola bilmişdik. Layiqə, təbiətin ona bəxş etdiyi qadın cazibəsi və əsil aktrisalıq istedadı ilə cinayətkarları vadar etmişdi ki, qızı saxladıqları hündür hasarlı, dəmir darvazalı məkanın qapısını açsınlar.
Olduqca çətin keçən bu əməliyyatda ən son anda, hər şeyin saniyələrlə ölçüldüyü bir vaxtda gənc qızın həyatını xilas edə bilmişdik, həmin məsələni mənimlə paralel araşdıran polis zabiti isə ağır güllə yarası almışdı.
Bu əməliyyat barədə əvvəlki söhbətlərimdən mən kifayət qədər tanınıram. Tanımayanlar üçünsə, kiçik bir tanışlıq verim. Mən Bəxtiyaram. Hər iki mənada. Həm adım Bəxtiyardır, həm özüm. Hər insanın həyatda bir amalı, bir missiyası olmalıdır. Mənim də missiyam cinayətkarlıqla mübarizə aparmaq, darda olan insanlara kömək etməkdir. Bax elə həyatda bu yolu tutduğum üçün özümü bəxtiyar, başqa sözlə, xoşbəxt hesab edirəm. Əzilən bir insanın dadına çatdıqdan, yaxud ölüm təhlükəsində olan birinin həyatını xilas etdikdən sonra daxildən gələn o hissi sizlərə heç cür izah edə bilmərəm. Bunu başa düşmək üçün yalnız özünüz o hissi yaşamalısınız.
Hə, bir də ki, mən həyatda öz ağlımla yaşayıram. Özümün özüm üçün yaratdığım, başqaları üçün anlaşılmaz ola biləcək, lakin doğruluğuna tam əmin olduğum prinsiplərlə. Ümumiyyətlə, bu kontekstdən yanaşsaq, iki cür yaşam tərzi var. Həyat hisslərlə yaşayanlar üçün faciə, ağıl ilə yaşayanlar üçün isə komediyadır. Həyata komediya kimi baxmaq, mənim təbiətimə daha uyğundur. Heç vaxt ruhdan düşməmək, həmişə nikbin olmaq və rastlaşdığım çətinliklərdə də nə isə tapıb gülümsəmək, ən əsası isə ləyaqətlə yaşamaq – budur mənim kredom.
Bəzən qəhrəman olmaq üçün bircə an bəs edir, ləyaqətli insan olmaq üçünsə bir ömür lazımdır.
Bir neçə il əvvəl qatı cinayətkarı zərərsizləşdirərkən aldığım güllə yarasından sonra sağ qolumdakı ağrılar səbəbindən çox sevdiyim peşəmdən, polis sıralarından ayrılmağa məcbur olmuşdum. Ancaq mən məğlub olmağa öyrəşməmişəm və həyatın mənə bəxş etdiyi bu «sürpriz»lə qətiyyən barışmaq fikrim olmadığından on səkkiz il ərzində polis sıralarında mayor rütbəsinə qədər qalxaraq əməliyyatçı kimi yiyələndiyim təcrübəmi detektiv fəaliyyətində istifadə etmək qərarına gəldim. Təxminən bir il əvvəl detektiv agentliyi açdım, bir müddət sonra isə az əvvəl haqqında sizə danışdığım Layiqəni özümə köməkçi götürdüm. İşlədiyi müddət ərzində Layiqəyə heç vaxt «belə etmə» demədim, həmişə «bax, belə et» dedim və hər fürsətdə təcrübəmi onunla bölüşdüm. Nəticədə Layiqə, qısa müddət ərzində çox yaxşı bir detekiv köməkçisinə çevrildi.
Bu bir il ərzində Bakı şəhərində baş vermiş, uğurla araşdırdığım bir neçə gurultulu cinayət hadisəsindən sonra «Nizami» metrosu ilə üzbəüzdə yerləşən ofisim müəyyən dairələrdə detektiv Bəxtiyar Nəzərlinin ofisi kimi, Layiqə isə detektiv köməkçisi kimi məşhurlaşdı. Məncə, bu qədər tanışlıq kifayət edər.
Bu gün isə, bir qədər əvvəl, həftənin eyni günündə və saatında görüşməli olduğum agentimlə, daha doğrusu onun kuryeri ilə görüşmüşdüm. Kuryer adi tumsatan idi. Mənə lazım olan məlumatları agentim kağız parçasında bu tumsatana verirdi, o da kağız parçasını «Beloçka» tum paketinin içərisində yerləşdirirdi. Müəyyən olunmuş vaxtda «Dram teatrı»nın qarşısına gələn tumsatan bükərək ona verdiyim əlliliyi alır, lazım olan tum paketini mənə verirdi.
Əgər tumsatan gəlməzsə, deməli həftə ərzində maraq doğuran hər-hansı hadisə baş verməmişdi. Ona görə də bir qədər gözləyib, çıxıb gedir, növbəti həftənin eyni günündə və saatında yenidən təyin olunan yerə gəlirdim.
Tumsatana verdiyim əlli manat, olduqca dəyərli olan bu məlumatların müqabilində çox simvolik bir məbləğ idi. Həm də, belə qənaətə gəlmişdim ki, bu elə tumsatanın əziyyətinə görə ona çatan halal zəhmət haqqıdır. Məlumatları verən insan isə, hər kimdirsə, onun heç nəyə ehtiyacı yoxdur. Buna baxmayaraq, bu iş üçün qat-qat çox məbləğ tələb olunsaydı belə, onu ödəyəcəkdim. Bunu etməyə dəyərdi.
Bəzən, hazırlanan hansısa cinayət barədə aldığın məlumatla kiminsə həyatını xilas etmiş olanda, başa düşürsən ki, bu atdığın addım heç bir pulla müqayisəyə gəlməz. Pul ağıllı insan üçün yalnız bir vasitədir. Otuz doqquz illik həyatımda yiyələndiyim bu və bir çox bunun kimi müsbət keyfiyyətlərə görə öz təbiətimlə yanaşı, az qala ömrümün yarısını həsr etdiyim polis peşəsinə də borcluyam. Təəssüf ki, bir çox ağılsız insanlar pulu məqsəd kimi qəbul edərək həyatda özlərinə yeganə meyar seçirlər.
Mənə əməliyyat işinin incəliklərini öyrətmiş müəllimim, polis polkovniki Arif Dadaşzadədən miras qalan bu müəmmalı agentin kuryeri ilə indiyə qədər heç bir görüşü buraxmamış, onun hətta bir neçə həftə ardıcıl gəlməməsinə baxmayaraq, növbəti həftə təyin olunan vaxtda görüş yerində olmuşdum. Bu gün də onunla görüşmüş, indi aldığım tum paketindən çıxan kiçik kağız parçasını qarşımdakı masanın üzərinə qoyub baxır, cırıb tullamağa tələsmirdim. Bu dəfəki vərəq parçasında hər-hansı məlumat yox, görüş yeri yazılmışdı. Görüş yeri isə, mənim öz şəxsi agentlərimlə görüşdüyüm, təkcə özümə məlum olan, Bakının sakit parklarından birinin lap dərinliyində yerləşən çayxananın ünvanı idi. Saat 20:00-da məni orada gözləyəcəkdilər. Bu çox maraqlı idi…
Bu görüşə getməyə bilməzdim. Axşama hələ çox var idi.
Kağız parçasında olan ünvanı kompüterdə yazıb printerə verdim. Sonra tum paketindən çıxan kağız parçasını cırıb əvvəlkilər kimi unitaza atdım, suyu buraxdım. Görüşə bir saat qalmış ünvan yazdığım vərəqi Layiqənin masasının üstünə qoyub ofisdən çıxdım. Bu, hər ehtimala qarşı atılan addım idi. Əgər orada məni təhlükə gözləyirsə və mənə nəsə olarsa, son olduğum yer barədə məlumat vermiş olacaqdım, heç nə baş verməzsə, səhər Layiqədən tez gəlib kağızı götürəcəkdim.
Adətim üzrə ətrafı nəzərdən keçirmək üçün görüş yerinə bir qədər tez gəlmişdim.
Davamı var
“Ədəbiyyat və incəsənət”
(09.06.2023)
Bakıda “Viva opera” qala-konserti keçiriləcək
İyunun 11-də - bazar günü Heydər Əliyev Mərkəzində “Viva opera” qala-konserti keçiriləcək.
Konsertdə italyan opera müğənnisi Ferruccio Furlanetto, Rusiyanın məşhur "Bolşoy" Teatrının solistləri, həmyerlilərimiz Dinara Əliyeva və Elçin Əzizov, Azərbaycan Dövlət Akademik Opera və Balet Teatrının aparıcı solistləri - Xalq artistləri Fidan Hacıyeva, Samir Cəfərov, Əkrəm Poladov, Gülnaz İsmayılova, Əməkdar artistlər Afaq Abbasova, İnarə Babayeva, Ramil Qasımov, Səbinə Vahabzadə, Fərid Əliyev, Cahangir Qurbanov, İlham Nəzərov, Anton Ferştandt, İlahə Əfəndiyeva, Fəridə Məmmədova, Tural Ağasıyev, solistlər Fatimə Cəfərzadə, Nina Makarova, Taleh Yahyayev, Atəş Qarayev, Mahir Tağızadə, Gunel Hacıyeva, Atəş Qarayev və Teatrın xor kollektivi çıxış edəcəklər.
Teatrın simfonik orkestrinin müşayiəti ilə baş tutacaq proqramında Ü.Hacıbəyli, M.Maqomayev, C.Verdi, C.Puççini, J.Bize, C.Rossini, P.Çaykovski, P.Maskanyi, Q.Donisetti, V.A.Motsart, N.Rimski-Korsakov, J.Massne və digər bəstəkarların əsərləri səsləndiriləcəkdir.
Orkestrin dirijoru, Əməkdar artist, dirijorların beynəlxalq müsabiqələrinin laureatı Əyyub Quliyev, xormeysteri, Əməkdar incəsənət xadimi Sevil Hacıyevadır.
Biletlər şəhərin bütün kassalarında və iticket.az saytdan əldə etmək olar.
“Ədəbiyyat və incəsənət”
(09.06.2023)