Super User
Bakıda Çin incəsənəti ilə bağlı sərgi layihəsinin açılışı olub
Azərbaycanın Milli İncəsənət Muzeyində “Çin incəsənəti Azərbaycan Milli İncəsənət Muzeyinin kolleksiyasından” sərgi layihəsinin açılacağı barədə məlumatlı idiniz. Dünən sərginin açılış mərasimi keçirilib.
Azərbaycan Milli İncəsənət Muzeyi, Azərbaycan Mədəniyyət Nazirliyi və Çinin Azərbaycandakı səfirliyi tərəfindən təşkil olunmuş tədbirdə ölkəmizdə akkreditə olunmuş səfirlər və digər rəsmi şəxslər iştirak ediblər.
Çin Xalq Respublikasının Azərbaycandakı səfiri Qo Min tədbiri açaraq qeyd edib ki, sərgi Çin və Azərbaycan arasında dostluq əlaqələrini nümayiş etdirir: “İki ölkənin rəhbərlərinin qətiyyətli addımları sayəsində Çin və Azərbaycan arasında münasibətlər uğurla inkişaf edir. Sərginin məqsədlərindən biri də iki müxtəlif mədəniyyətlər arasında körpünün qurulmasıdır”.
Daha sonra konsert proqramı təqdim edilib.
“Ədəbiyyat və incəsənət”
(30.03.2023)
İntiqam Qasımzadə təltif olunub
Bu gün Azərbaycan Yazıçılar Birliyi Həmkarlar İttifaqının sədri, tanınmış şair Firuzə Məmmədli "Azərbaycan" jurnalının baş redaktoru İntiqam Qasımzadəyə Həmkarlar İttifaqı Respublika Komitəsinin Fəxri Fərmanını təqdim edib.
“Ədəbiyyat və incəsənət” portalı xəbər verir ki, İntiqam Qasımzadə mədəniyyət sahəsindəki xidmətinə və "Azərbaycan" jurnalının 100 illiyi münasibətilə təltif olunub.
“Ədəbiyyat və incəsənət”
(29.03.2023)
Milli Məclisin Mədəniyyət Komitəsinin sədr müavinini kim güllələyib?
Ötən gün axşam radələrində Millət vəkilimiz, Milli Məclisin Mədəniyyət Komitəsinin sədr müavini Fazil Mustafanın Bakıda - yaşadığı evin qarşısında silahlı hücuma məruz qalması xəbəri paylaşıldı. Millət vəkilinə avtomat silahdan çoxsaylı atəş açılıb, o, iki güllə yarası alıb.
Bununla bağlı, “Ədəbiyyat və incəsənət” portalı Milli Məclisin Mədəniyyət Komitəsinin eksperti Əkbər Yolçuyevə müraciət edib, olaya şərh verməsini xahiş eləyib. Əkbər bəy söyləyib:
“Ağla ilk gələn nədir? Elə bilirəm, çoxumuzun nəzər-diqqəti cəhalət yuvasına, guya islamçı olsalar da faktiki anti-İslam zehniyyəti sahiblərinə yönəlir. Hüquq mühafizə orqanlarımız heç şübhəsiz gərəkli, təxirəsalınmaz tədbirlər görəcək, cahil cinayətkarları bir an öncə bularaq, onlara haqq etdikləri cəzanı verəcəkdir. Hörmətli Fazil bəyə böyük keçmiş olsun deyir, tezliklə sağlamlığına qovuşmasını diləyirəm!”
“Ədəbiyyat və incəsənət”
(29.03.2023)
“Azərbaycanı tanıyaq” layihəsi Daşkənddə təqdim olunub
Tez-tez bu barədə xəbərlərimiz olur, Özbəkistandakı Heydər Əliyev adına Azərbaycan Mədəniyyət Mərkəzinin layihəsi ilə qardaş ölkədə Azərbaycan tarixi, mədəniyyəti, ədəbiyyatı, turizminin tanıdılması və təbliği istiqamətində layihələr və tədbirlər həyata keçirilir. Azərbaycan Mədəniyyət Mərkəzinin təşəbbüsü və təşkilatçılığı ilə Daşkənd şəhərində fəaliyyət göstərən və verdiyi təhsil səviyyəsinə görə xüsusi fərqlənən, çoxsaylı xarici vətəndaşların təhsil aldığı “British School” beynəlxalq məktəbinin müəllim və şagird kollektivi üçün “Azərbaycanı tanıyaq” layihəsinin təqdim edilməsi növbəti belə addım olub.
Mədəniyyət Mərkəzindən “Ədəbiyyat və incəsət” portalına verilən məlumata görə, layihə üzrə Daşkənddəki Britaniya məktəbinin müəllim və şagird kollektivi Azərbaycan Mədəniyyət Mərkəzini ziyarət edib, qonaqlara Azərbaycan Mədəniyyət Mərkəzi, onun fəaliyyəti, Mərkəzdə yaradılmış Heydər Əliyev, Azərbaycan tarixi və Azərbaycan-Özbəkistan Dostluq muzeyləri haqqında məlumat verilib. Müəllim və şagirdlər Azərbaycan tarixi, mədəniyyəti, ədəbiyyatı, incəsənəti, xalq sənətkarlığı, musiqisi, adət-ənənələri, tarixi abidələrimizi əks etdirən çox sayda guşələr, eksponat və maketlərlə tanış olublar.
Sonra Mədəniyyət Mərkəzinin konfrans zalında davam edən tədbirdə Azərbaycan Mədəniyyət Mərkəzinin direktoru Samir Abbasov çıxış edərək qonaqları baharın gəlişi və xalqlarımızın milli bayramı - Novruz bayramı münasibətilə təbrik edib. O, Azərbaycan-Özbəkistan dostluğu, habelə Azərbaycanın qədim tarixi, zəngin mədəniyyəti, poeziyası, incəsənəti, dövlətimizin qazandığı nailiyyətlər haqqında danışıb.
Diplomat Azərbaycanın qədim yaşayış məskəni Qobustan və Azıx mağarası, xalqımızın zəngin mədəni irsə, tarixi abidələrə, milli mətbəxə malik olduğunu qeyd edərək, həm maraqlı tarix, mədəniyyət, həm də gözəl və füsunkar təbiətlə ölkəmizin hər bir xarici turist üçün cəlbedici olduğunu bildirib. O, Azərbaycan Ordusunun rəşadəti, Ali Baş Komandan İlham Əliyevin uğurlu siyasəti nəticəsində Ermənistan işğalından azad edilən tarixi şəhərimiz, mədəniyyət paytaxtımız Şuşa haqqında məlumat verib, bu tarixi şəhərin, yalnız Azərbaycanın deyil, bütün Türk dünyasının mədəniyyət paytaxtı seçildiyini qeyd edib.
Tədbir iştirakçılarına Azərbaycan Mədəniyyət Mərkəzinin layihəsi ilə hazırlanmış “Azərbaycanı kəşf et” adlı sənədli film təqdim edilib. Sənədli filmdə müstəqillik illərində Azərbaycanın qazandığı nailiyyətlər, ölkəmizin paytaxtı Bakı ilə yanaşı, Qəbələ, Şəki, Gəncə, Naxçıvan və Şuşanın görməli yerləri, turizm imkanları, tarixi abidələri, mətbəx mədəniyyəti, habelə işğaldan azad olan ərazilərimizə mədəniyyətin qayıdışı, keçirilən möhtəşəm tədbirlər öz əksini tapıb.
Sonda Azərbaycan Mədəniyyət Mərkəzi tərəfindən hazırlanmış bədii proqram təqdim edilib.
Mədəniyyət Mərkəzinin Rəqs Ansamblı milli rəqslərimizi ifa edib, Özbəkistanın dünyaca məşhur “Özbəyim yoşları” musiqi qrupu, tanınmış saz ustası İlham Abdullayev Azərbaycan musiqilərini səsləndiriblər.
“Ədəbiyyat və incəsənət”
(29.03.2023)
Milçək qovan memarın “Sarı gəlini” - Yunus Oğuzun felyetonu
“Ədəbiyyat və incəsənət” portalının Gülüş klubunda bu gün yenidən ölkənin çox az felyetonçusundan biri olan Yunus Oğuzdur, bu gün onun “Milçək qovan memarın “Sarı gəlini” felyetonunu təqdim edirik
Bekarçılıqdan milçək qovurdu. Əsnəməsin deyə milçəköldürəni əlindən buraxmırdı. Gözləri həşərat axtarırdı. Belə baxanda işi-gücü vardı. Bekarçılıqdan maaş da alırdı. Sinəsinə "əməkdar" adı da yapışdırmışdı. Bir az ittifaqdan, bir az əməkdarlıqdan, bir qədər icarəyə verdiyi emalatxanadan, qeyri-hökumət təşkilatının həyata keçirdiyi ekspert layihəsindən, saat hesabı dediyi institutdan pulu-parası gəlirdi. Cavanlığında ikiotaqlı mənzili vardı. Şəhərli qızla evlənib onun evinə köçmüşdü. Özününkünü icarəyə vermişdi, ordan da bir miqdar pul gəlirdi. Hələ adını bir siyasi partiyaya da yazdırmışdı. Ordan da nəsə qoparırdı. Qayınatasının, qayınanasının "toçka"larını fırladır, imkan düşən kimi pul "qattalayır", heç kim də cınqırını çıxara bilmirdi. Ancaq yenə bekarçılıqdan milçək qovurdu. İşini düzüb-qoşmuşdu, bekarçılığa daha çox vaxtı qalırdı.
Sənəti üzrə heç kim ona iş vermək istəmirdi. Memar idi, özü də kreativ memar. Kreativ, yəni yaradıcı. Bizdə isə yaradıcı adamı sevmirlər, nöşün ki, birincisi, belələri ipə-sapa yatmır, öz bildiyini dədəsinə də vermir, hətta fikirlərində də sərbəstdir. İkincisi, bizdə mentalitet, yəni yaddaşdan gələn adət-ənənə çox güclüdür.
Yaradıcı məsələləri heç yaxına buraxmaq istəmirik. Dəyişmək, yenilənmək bizə yaddır. O dee.., elə yenilənmişik ki, Şəkidə-xəstəxanada bir dəstə arvad Nəsimini də yeniləmək istədi. Hamısını işdən qovdular. Di get, bu da sənə yenilənmək, bu da sənə kreativ. Hələ bilmirəm bu "kreativ" sözünü bizə nəyə dürtüşdürüblər. Gül kimi tərcüməsi var - yaradıcı, yenilənmə...
Növbəti milçəyi öldürmək istəyəndə ona zəng gəldi. İcra hakimiyyətində işləyən məmur- memar dostu idi. Telefonun titrəməsindən milçək uçub getdi. Heyifsləndi. Bir milçəyin sayı azalmadı.
Dəstəyin o başından səs gəldi:
* Müəllim, zaman dəyişib, - salamsız-kalamsız söhbətə başladı, - işimiz çoxdur, lap çoxdur. Özümüzü hökumətin gözünə soxmalıyıq. İşimizi hər kəsə göstərməliyik. İndi hamı bizdən kreativ olmağımızı istəyir. O dəqiqə yadıma sən düşdün. Kreativ olduğun üçün səndən qaçırdıq. Indi sənin qazanmaq vaxtın gəlib. Özü də elə şeylər fikirləş ki, Azərbaycanda yox, dünyada analoqu olmasın, həm də yuxarıların xoşuna gəlsin,- Milçək qovanı danışmağa qoymadı. - Sabah saat on ikidə gözləyirəm, özü də əliboş gəlmə. Sağ ol.
Telefonun o biri başında səs əvəzinə, düd...düd... gəldi. Söhbət bitmişdi.
Memarın sevincdən və yaradıcı eşqdən qarnı guruldadı. Düşünməyə, düşündüklərini kağıza köçürməyə başladı...
Səhəri gün saat on ikidə, əlində qovluq dostu məmur- memarın qarşısında şax-şax oturmuşdu.
Dostu yenə salamsız-kəlamsız mətləbə keçdi:
* Nooldu, müəllim, bir şey fikirləşə bildinmi? Umudumuz sənədir. Sənin haqqında başçıya danışmışam, xeyli tərifləmişəm. Demişəm nicatımız sənsən. Danış görək.
Milçək qovanın tərifdən hulqumu qalxıb qalstukunun üstünə keçdi. Boğazını arıtlayıb hulqumunu yerinə qaytararaq dedi:
* Kreativ ünvanı düz tapmısız, müəllim. Bilirsən ki, bizim qeyri-maddi sərvətlərimiz yavaş-yavaş YUNESKO-da mədəni irsimiz kimi qeydiyyatdan keçir. Ermənilərə gözdağı vururuq, analarını ağladırıq. - Məmur başını razılıqla yellədi. - Bizim hər şeyimizi öz adlarına çıxarmaq istəyirlər, köpəkuşaqları. Onlarda vicdan-zad qalmayıb. İndi bizim əsas mübarizəmiz onlarladır. Biz hər işimizdə onları qabaqlamalıyıq. Bunun üçün də qeyri-maddi dəyərlərimizi maddi dəyərlərə çevirməliyik.
Məmur memar heç nə başa düşmədiyindən soruşdu:
* Bunu necə edəcəksən?
* Çox asan, - qovluğu açıb içindəki eskizləri məmura göstərə-göstərə cavab verdi, - bax. Şəhərimizə gələn turistlərin sayı çoxalıb. Ağ şəhərdə "Sarı gəlin" kompleksi tikirik. Turistləri bu kompleksə apararıq. Onlar bura daxil olan kimi "Sarı gəlin" havası çalınmağa başlayır. O zaman bütün dünya biləcək ki, "Sarı gəlin" bizimdir, ermənilər bizdən oğurlayıblar. Yavaş-yavaş bunu bütün dünyaya sübut edəcəyik. Həm "Sarı gəlin" maddiləşəcək, həm də biz qazanc götürəcəyik, həm də yuxarıların kreativ ideyalar xoşuna gələcək. Əllərini sənin kürəyindən çəkməyəcəklər.
* Elə bu? - Məmur milçəkqovan məmura baxdı.
* Əlbəttə yox? - Memar şəstlə cavab verdi.- Gör nə qədər qeyri- maddi dəyərlərimiz var. Şəhərdə də gör nə qədər rayonumuz fəaliyyət göstərir. Çatdırsaq qonşu şəhərlərə də keçə bilərik, - O barmağını bir- bir qatlamağa başladı. - Bunun "sazı" var, "dolması", "lavaşı", canım sənə desin, "balabanı", nə bilim e... "Çırpınırdı Qara dənizi", "Covkan"ı, "Novruz bayram"ı var. Hansını deyim?
Məmur baxdı ki, dostu kreativ danışır. Onu təriflədi:
* Afərin sənə! Sənin bu kreativliyin ermənilərin anasını ağladacaq...
Bir neçə gündən sonra "Sarı gəlin" kompleksi təsdiqləndi. İndi qalıb o biri kreativ təkliflər. Onlar da yaxınlarda həyata keçər.
Amma, onlardan heç biri demədi ki, ermənilərin analarını harda ağlatmaq lazımdır ki, dilləri dilçəklərindən çıxmasın.
“Ədəbiyyat və incəsənət”
(29.03.2023)
Səməd Vurğun, Abbas Zamanov və erməni məsələsi
“Ədəbiyyat və incəsənət” portalı ictimai fəal Elnur Eltürkün bir arxiv araşdırmasını təqdim edir.
1960-ci ildə Səməd Vurğunun anadan olmasına həsr edilmiş ədəbi-bədii gecədə Naxçıvanın “erməniləşməsinə” qarşı çıxan professor Abbas Zamanovun sərt çıxışını təqdim edirəm!
– Əziz həmvətənlilər.... Əziz Səmədsevərlər, Vurğun xalqımızın kisəsindən getdi. Vurğun ruhu haqqında danışmaq azdır, onun canından da çox sevdiyi Azərbaycan torpağının taleyi, müqəddəratı uğrunda mübarizə aparmaq lazımdı. İndi elə bir az bundan əvvəl buraya gələndə köhnə naxçıvanlı bir alim (Bakıda ezamiyyətdə olan Naxçıvan MSSR Ali Soveti Rəyasət Heyətinin katibi Əli Əliyev nəzərdə tutulur-red.) Vurğunun xatirə gecəsinə getdiyimi biləndə fikirli-fikirli dedi: “Abbas, Naxçıvanı ermənilərə verirlər.... Görəsən Səməd Vurğun sağ olsaydı, buna nə ad verərdi?” Dedim, sağ olsaydı, deyərdi: Qədim Naxçıvan torpağı Azərbaycanındır və biz onu heç kəsə verməyəcəyik!
Qeyd edim ki, Abbas Zamanov 1911-ci il oktyabrın 10-da Naxçıvan MR Şərur rayonunun Maxta kəndində anadan olmuşdur.
“Ədəbiyyat və incəsənət”
(29.03.2023)
Günün fotosu: Ukrayna Challenger-lərə sevinir
Günün fotosu: Ukrayna Challenger-lərə sevinir
Britaniya tankları - ən ultramüasir tanklar hesab olunan Challenger-lər Ukraynaya gətirilib. Tanklarla birlikdə Britaniyada hərbi xidmət keçib bu tanklarla davranmağı öyrənən ukraynalı hərbçilər də vətənlərinə dönüblər.
Şəkildə də həmin hərbçiləri və Challenger-ləri görürsünüz.
Fotonun müəllif hüququ: Ben Birchall/PA
“Ədəbiyyat və incəsənət”
(29.03.2023)
“ Biz naməni yazdıq sənə göz yaşlarımızla...” – Xaqani Əmininin qəzəlləri
“Ədəbiyyat və incəsənət” portalının “Ulduz” jurnalı ilə birgə “Biri ikisində” layihəsində bu gün növbədə Şeir vaxtıdır, Xaqani Əmininin qəzəlləri ilə tanışlıqdır.
QƏZƏL DE Kİ...
Xaqani ƏMİNİ
Hicranına dözmək mənə müşküldü, sözüm yox,
Amma elə zənn etmə ki, aşiqdə dözüm yox.
Saldın məni gözdən, könül, öz nalələrinlə,
İndi üzünə baxmağa cananın üzüm yox.
Səhraləri başdan-başa sərgəştə dolandım,
Hicranın əlindən, görəsən, harda izim yox?
“Yum gözlərini, bunca, – deyirsən, – mənə baxma,”
Nolar, elə billəm, koram aləmdə, gözüm yox.
Başdan-başa, Xaqani, vücudum dolu qəmdir,
Əks eyləyən ayinədə dərdimdir, özüm yox.
***
Məhşər günü cənnət, deməyin, zahidə qaldı,
Hardan axı haqqın kərəmi fasidə qaldı?!
Göz gördü, tökən qanımı qəmzəndi, danırsan,
Aləmdə gümanım bu iki şahidə qaldı.
Biz naməni yazdıq sənə göz yaşlarımızla,
Amma səni görmək, gözəlim, qasidə qaldı.
Sən getdin, əzizim, mənə üz verdi kədər–qəm,
Həsrət ürəyimdə əbədi abidə qaldı.
Xaqani, gədalıq edə bildik qapısında,
Söz mülkü Süleymanlıq edən Vahidə qaldı.
***
Çərxdən umma vəfa, sabit keçən dövranı yox,
Hər zaman bir tövr dövr eylər, onun səhmanı yox.
Var əzəl gündən bizim peymanımız peymanəyə,
Sındırıb peymanəni zahid, onun peymanı yox.
Bir sağalmaz dərdə düşdüm, dərd dərd üstən gələr,
Dərdə bax ki, dərd əlindən dərdimin dərmanı yox.
Düşməmiş eşqində aşiq mənfəət sevdasına,
“Var-yox” fərqində yox ki, vəsli var, hicranı yox.
İndi ki, Xaqani eylər iddia aşiqliyi,
Eşq meydanında cananın düşünsün, canı yox.
***
Görsəydi Züleyxa bu gözəl yarı, düzün de,
Heç gör səni istərdimi, ey Yusif, özün de.
Göstər ona, görsün necə gülşəndə solub gül,
“Qalmaz bu gözəllikdə sənin də gül üzün”, – de.
Öz dərdini könlüm deyə bilmir, dili yoxdur,
Ey badi-səba, yarə bu biçarə sözün de.
Tök gözlərim üstə bir ovuc torpaq öləndə,
“Qoy qalmasın arxamca o dünyadə gözün”, – de.
Öz cənnətinə bağlıdı zahid, nə qanır eşq,
Yox xeyri nəsihətlərinin, gündə yüzün de.
Səndən bizi, Xaqani, əgər kim xəbər alsa,
Aşiqlərin ünvanını ancaq göy üzün de.
***
Bu canı eşqdə bir sərvnazə verdim mən,
Xəyali-vəsl ilə ömrüm güdazə verdim mən.
Həqiqi eşqimi zahidlərə bəyan elədim,
Heyif ki, sirrimi əhli-məcazə verdim mən.
Cahan məhəbbəti dəryadə qərq edib çoxusun,
Bilib bunu, özümü çox dəyazə verdim mən.
Yaxardı qəm səni axır bədəndə qalsaydın,
Nə yaxşı, çıxmağa, ey can, icazə verdim mən.
Cəmali-yarımı, Xaqani, qiblədir bildim,
Odur ki, fikrimi ancaq nəmazə verdim mən.
***
Gərçi gülşəndə gülün xarə təmənnası olur,
Gülə axırda qalan bülbüli-şeydası olur.
Yar əgər istəsə, biganə məni incitməz,
Bülbülü dərdə salan öz güli-rənası olur.
Göz yumub eşqinə bənd olma vəfasız gözəlin,
Gec-tez axır bu işin sonradan əmması olur.
Adı dillərdə gəzər canlı bir əfsanə kimi,
Yaşadan aşiqi qəlbindəki sevdası olur.
Yetməsə vəslinə Xaqani, deyin ağlamasın,
Kim bilir, ayrılığın, bəlkə də, mənası olur.
***
Saldı sevdayi-səri-zülfü könül başımıza,
Nə qara gündür, əcəb gəldi bu il başımıza.
Dərdi ərz eyləmək artırdı cəfasın yarın,
Bir bəla oldu məhəbbətdə bu dil başımıza.
Ey könül, heyrət edirsən ki, sitəm daşı yağır,
Yoxsa bu çərx, sanırdın, səpə gül başımıza?
Aldanıb zahidə cənnət həvəsiylə yaşadıq,
Almadıq saqi əyağın ələ, kül başımıza!
Ələ al saqi əyağın, başa çək, Xaqani,
Başa düş, başqa dəva çarə deyil başımıza.
***
Sevgilim, hər gəlişin qəlbə diləklər gətirər,
Dilinə eşqimizi odlu ürəklər gətirər.
Bir gözəlsən ki, mələklər də çəkir həsrətini,
Nə verər mislini dünya, nə fələklər gətirər.
Aşiqin dönsə də torpaqlara, səndən dönməz,
Onu hər gün qapına gizli küləklər gətirər.
Bil ki, dünyadə qəmindən yıxılan aşiqini,
Qaldırıb məhşərə çiynində mələklər gətirər.
Qəbrimin torpağı, Xaqani, dönər gülzarə,
Gündə cənnətdən enib huri çiçəklər gətirər.
“Ədəbiyyat və incəsənət”
(29.03.2023)
Rəsm qalereyası: Nəvai Mətin, “Kəpəz dağı”
Rəsm qalereyası: Nəvai Mətin, “Kəpəz dağı”
Bu gün Xalq artisti Əlibaba Məmmədovun xatirəsi anılacaq
Bu gün Beynəlxalq Muğam Mərkəzində Xalq artisti, ustad xanəndə Əlibaba Məmmədova həsr olunmuş xatirə gecəsi təşkil olunacaq.
Əməkdar mədəniyyət işçisi İlqar Fəhminin aparıcılığı ilə keçiriləcək konsert proqramında Xalq artisti Gülyaz Məmmədova, Əməkdar artist Səbuhi İbayev, eləcə də digər xanəndələrin ifaları səslənəcək. Gecəni tarzən Rüstəm Müslümovun müşayiəti ilə ansambl idarə edəcək.
Qeyd edək ki, Bakının Maştağa kəndində anadan olan Əlibaba Məmmədov musiqi təhsilini 1953–1958-ci illərdə Azərbaycan Dövlət Musiqi Məktəbində xanəndə Seyid Şuşinskinin sinfində alıb. 1945-ci ildən Müslüm Maqomayev adına Azərbaycan Dövlət Akademik Filarmoniyasının və 1978–1988-ci illərdə "Azkonsert birliyi"nin solisti olub. 1968-ci ildə Filarmoniyanın nəzdində maestro Niyazinin təşəbbüsü ilə "Hümayun" xalq çalğı alətləri ansamblını yaratmış və ömrünün sonuna kimi həmin ansambla rəhbərlik etmişdir. Əlibaba Məmmədov Azərbaycanın görkəmli xanəndələrindən bəhrələnərək, muğam sənətində öz yolunu açan ustad xanəndə kimi tanınıb. Xanəndənin ifa etdiyi "Rast", "Bayatı-Şiraz", "Rahab", "Dəşti" və başqa muğam-dəsgahlarının səs yazıları AzTV-nin fondunda saxlanılır. Əlibaba Məmmədov 100-dən artıq mahnı və təsniflər yaradıb və onlar bir çox xanəndələrin repertuarlarına daxil edilib. M.Füzuli, Ə.Vahid, M.Müşviq, S.Rüstəm, B.Vahabzadə kimi Azərbaycan şairlərinin sözlərinə yazılmış "Yaşa məhəbbətim, yaşa ürəyim", "Gəl bizə, yar", "Bir dənəsən" və bir çox digər mahnılar AzTV-nin fondunda görkəmli xanəndələrin lent yazısında qorunub saxlanılır. O, 1963-cü ildən Bakı Musiqi Kollecində, 1988-ci ildən isə Bülbül adına Orta İxtisas Musiqi Məktəbində muğamdan dərs deyərək gənc xanəndələr nəslinin yetişməsində böyük əmək sərf etmişdir. Görkəmli xanəndə, Xalq artisti Əlibaba Məmmədov 2022-ci il fevralın 25-də 92 yaşında vəfat edib və birinci Fəxri xiyabanda dəfn olunub.
“Ədəbiyyat və incəsənət”
(29.03.2023)
