Beynəlxalq Teatr İttifaqları Konfederasiyasının təşkilatçılığı ilə iyunun 11-dən 24-dək Moskva şəhərində Beynəlxalq Çexov festivalı çərçivəsində MDB, Baltikyanı ölkələr və Gürcüstanın gənc rejissorlarının iştirakı ilə rejissor laboratoriyası keçirilir. Bu möhtəşəm tədbirdə ölkəmizi təmsil etmək üçün Azərbaycan Dövlət Akademik Milli Dram Teatrının quruluşçu rejissoru Mehman Fətullayev və Azərbaycan Dövlət Kukla Teatrının rejissoru Anar Məmmədov seçilib.
Bu barədə Azərbaycan Teatr Xadimləri İttifaqının məsul katibi Aida Qafarova məlumat verib.
“Azərbaycan Teatr Xadimləri İttifaqının xətti ilə tədbirdə iştirak edəcək gənc rejissorlar Mehman Fətullayev və Anar Məmmədov 14 gün ərzində laboratoriyada digər ölkələrin gənc rejissorları ilə bərabər, festival çərçivəsində oynanılan tamaşalara baxacaq, ustad dərslərinə, seminarlara və digər tədbirlərə qatılacaqlar”, - deyə A.Qafarova vurğulayıb.
“Ədəbiyyat və incəsənət”
(12.06.2023)
