Super User
Yusif Nəğməkardan Şairlər Günü təbriki
“Ədəbiyyat və incəsənət” portalının poçtunda şair Yusif Nəğməkarın Şairlər Günü münasibətilə qələm dostlarına təbriki var. Təbriki nəzərinizə çatdırırıq.
ŞAİRLƏR Gününüz mübarək, əziz qələm dostlarım!
Q Ə Z Ə L
Nazlı yar könlümə hicranı da ahəstə qoyar,
Elə ahəstəliyi aləmi ta xəstə qoyar.
Öldürər aşiqini yüz gülüşüylə qəsdən,
Gülüşün gül eləyib qəbrimə bir dəstə qoyar.
Hərdən acı sözünə heç ürəyi tab eləməz,
Dilinə, dilçəyinə nabat ilə püstə qoyar.
Ha sına, imtahan eylə, əladı qiyməti də,
İsmətlə namusunu başına tac istə, qoyar.
Kimsə hüsnüylə, ya əqliylə onun bəhsə girə,
O, yarı yolda ötüb rəqibini düzdə qoyar.
Vəfasına əminəm ki, çəkiləntək adıma
Ürəyinin başında heykəl ilə büst də qoyar.
Nəğməkarın gözünü bağlasalar dəsmal ilə,
Çaşmadan barmağını sevdiyinin üstə qoyar.
“Ədəbiyyat və incəsənət”
(06.06.2023)
Beynəlxalq Türk Mədəniyyəti və İrsi Fondunun prezidenti Alanyada beynəlxalq festivalda iştirak edib
Beynəlxalq Türk Mədəniyyəti və İrsi Fondunun prezidenti Günay Əfəndiyeva 21-ci Alanya Beynəlxalq Turizm və İncəsənət Festivalında iştirak edib. Festival Alanya Bələdiyyəsinin təşkilatçılığı ilə “Türkiyə Respublikasının 100 illiyində türk respublikaları” mövzusunda keçirilib.
Fonddan verilən məlumata görə, festivalın açılışı çərçivəsində rəsmi şəxslərin iştirakları ilə Alanyadakı Atatürk abidəsinin önündən başlayan təntənəli yürüş türk xalqlarının folklorunu, milli geyimlərini və musiqi mədəniyyətini əks etdirən bədii proqramın müşayiəti ilə gerçəkləşib.
Festivalın açılış mərasimində Alanya Bələdiyyəsinin sədri Adem Murat Yücel, Türk Əməkdaşlıq Təşkilatlarının rəhbər və nümayəndələri, Türk dövlətlərini təmsil edən rəsmilər və mədəniyyət xadimləri, KİV nümayəndələri iştirak ediblər.
Açılış tədbirində çıxış edən Fondun prezidenti Günay Əfəndiyeva hər il Alanyada xüsusi mövzu altında keçirilən Beynəlxalq Turizm və İncəsənət Festivalının bölgənin mühüm turizm və mədəniyyət mərkəzi olduğunu bir daha sübut etdiyini, dünyaya bəşəri sülh mesajını çatdırdığını vurğulayıb.
Günay Əfəndiyeva 2023-cü ilin Türk dünyasında əlamətdar il olmasından bəhs edib. Fondun prezidenti bu il Türkiyədə Cümhuriyyətin qurulmasının 100 illiyinin, Azərbaycanda müasir Azərbaycan Respublikasının banisi və memarı, dahi lider Heydər Əliyevin 100 illiyinin, Qazaxıstanda böyük şair və mütəfəkkir Xoca Əhməd Yasəvinin 930 illiyinin, Qırğızıstanda dünya şöhrətli yazıçı Çingiz Aytmatovun 95 illiyinin, həmçinin bütün Türk dünyasında təntənəli qeyd olunduğunu vurğulayıb. Günay Əfəndiyeva bildirib ki, ötən il Bursadan sonra Qarabağın göz bəbəyi Şuşanın 2023-cü il Türk Dünyasının Mədəniyyət Paytaxtı ünvanını daşıması türk xalqlarının ən böyük coşğuyla qarşıladığı hadisələrdəndir.
Eyni zamanda, Günay Əfəndiyeva bu il Türkiyə Respublikasının Prezidenti Rəcəb Tayyib Ərdoğanın demokratik seçkilərdəki qələbəsinin ölkə ilə yanaşı, bütün Türk dünyası üçün mühüm əhəmiyyətini vurğulayaraq, bildirib: “Rəcəb Tayyib Ərdoğanın Türk birliyini hər zaman dəstəkləyən fəaliyyətlərinə bütün Türk dünyası dərin rəğbət və minnətdarlıq duyğuları bəsləyir. Heç şübhəsiz, qarşıdakı yeni dövrdə Türk xalqlarının həyatın bütün sahələrini əhatə edən inteqrasiya prosesi daha da sürətlənəcək”.
Fondun prezidenti müasir dövrdə beynəlxalq aləmdə sürətlə yüksələn, türk dövlətlərinin tarixi qardaşlığının uğurla davam etdirilməsindən bəhs edərək bildirib: “3 il öncə Azərbaycanın Qarabağ uğurundakı savaşında, bu ilin əvvəlində Türkiyədə baş verən ağır zəlzələ fəlakətində Türk dünyasının qəlbi bir bədəndə döyündü. Biz Türk respublikalarının tək ürək, yeri gəldikdə tək yumruq olmağının şahidi olduq. Türkiyə Cümhuriyyətinin 100-cü ildönümündə ölkədə keçirilən genişmiqyaslı tədbirlərin bu mövzuya həsr olunması türk həmrəyliyinə verilən önəmin bariz göstəricisidir”.
Günay Əfəndiyeva rəhbərlik etdiyi Fondun əsas missiyasının ümumtürk mədəni irsinin mühafizəsi və tanıdılması vasitəsilə Türk xalqlarının birlik və həmrəyliyinin gücləndirilməsi olduğunu vurğulayıb.
Mərasimin sonunda tədbir iştirakçıları fotoşəkil sərgisini, müxtəlif türk xalqlarının milli geyimlərinin və mətbəxinin nümayiş olunduğu çadırları ziyarət ediblər.
Üç gün davam edən festivalda Türk dünyasının milli mədəniyyətini, musiqisini, rəqslərini əks etdirən rəngarəng tədbirlər keçirilib.
“Ədəbiyyat və incəsənət”
(06.06.2023)
Həkim, millətçi, xilaskar…
Dünən axşam “Millət naminə. Əbdül Kərim bəy Mehmandarov” filmi təqdim olunub
Dünən axşam saatlarında Nizami Kino Mərkəzində qələbəlik idi, Mədəniyyət Nazirliyinin sifarişi ilə “Azərbaycanfilm” kinostudiyasında istehsal olunmuş “Millət naminə. Əbdül Kərim bəy Mehmandarov” sənədli filmi ictimaiyyətə təqdim olunurdu.
Tanınmış kino xadimləri tanınmış Qarabağ nəslinin nümayəndəsinin həyat hekayəsinin səhnə təcəssümününün alınıb-alınmamasını öyrənməkdə maraqlı idilər. Və bəri başdan deyək ki, film alınıb.
Filmin əsərinin çəkilişləri Bakıda və Şuşada aparılıb. Filmin rejissoru Yavər Rzayev, prodüseri Nazim Hüseynov, rəssamı Rafiq Nəsirov, bəstəkarı Azər Hacıəsgərlidir.
“Ədəbiyyat və incəsənət” portalı xəbər verir ki, filmdə Qarabağ hökmdarı İbrahimxəlil xanın mehmandarı Mirzə Əli bəy tərəfindən əsası qoyulmuş, daha sonra Şuşada və Azərbaycanın digər bölgələrində məskunlaşan Mehmandarovlar nəslindən
bəhs edilir. Mehmandarovlar XX-XXI əsrlərdə Azərbaycanın ictimai-siyasi həyatında özünəməxsus rol oynayıblar. Filmdə Peterburq Tibb-Cərrahlıq Akademiyasının məzunu Əbdül Kərim bəy Mehmandarovun həkimlik fəaliyyəti ilə yanaşı, Qarabağın və ümumilikdə Azərbaycanın tarixində əhəmiyyətli rol oynaması, eləcə də 1905-1906-cı illərdə ermənilərin törətdiyi qırğınlara qarşı şuşalıların mütəşəkkil qaydada müqavimət göstərməsində, xalqın səfərbər edilməsində və Difai təşkilatının yaradılmasında müstəsna xidmətləri əksini tapır.
İndi isə qayıdaq Nizami Kino Mərkəzinə. Filmin nümayişindən əvvəl Azərbaycan Dövlət Film Fondunun direktoru, Əməkdar incəsənət xadimi Cəmil Quliyev ekran əsəri barədə məlumat verib. O deyib ki, Mehmandarovlar nəslinə həsr olunan bu film tarixi-publisistik formada çəkilib. Film özünəməxsusluğu ilə seçilir. Hazırkı vaxtda sənədli film çəkmək çox çətindir. Rejissor burada özünəməxsus tərzdə maraqlı forma tapa bilib. Eyni zamanda, ekran əsərinin simvolik sonluğu var.
Cəmil Quliyev əminliyini bildirib ki, bu film milli kinematoqrafiyada öz layiqli yerini tutacaq.
Üzeyir Hacıbəyli adına Azərbaycan Dövlət Simfonik Orkestrinin dirijoru, Mehmandarovlar soyunun nümayəndəsi Mustafa Mehmandarov təqdimatdan məmnunluğunu bildirərək, bu işdə əməyi olan hər kəsə təşəkkürünü bildirib. Qeyd edib ki, zalda Mehmandarovlar nəslinin nümayəndələri iştirak edirlər. Və öz ailəsi adından Azərbaycan Respublikasının Prezidenti İlham Əliyevə və birinci xanım Mehriban Əliyevaya sonsuz minnətdarlığımı bildirib. Deyib ki, burada həssas məqamlar var, Mehmandarovların Şuşada olan malikanə kompleksi misilsiz və gözəl şəkildə bərpa edilib. Bu, eyni zamanda, bizim gələcək nəsillərə bir töhfədir.
Sonra Tarix İnstitutunun direktoru, professor Kərim Şükürov, filmin ssenari müəlliflərindən biri, “Mehmandarovlar” kitabının müəllifi, “Şuşa” qəzetinin baş redaktoru, Şuşanın tanınmış tədqiqatçısı Vasif Quliyev, filmin rejissoru, Əməkdar incəsənət xadimi Yavər Rzayev təqdim olunan ekran əsəri və Mehmandarovlar haqqında danışıblar.
Sonra da diqqətlər ekrana cəmlənib, “Millət naminə. Əbdül Kərim bəy Mehmandarov” filmi nümayiş olunub.
Zal filmin nümayişi bitəndə gurultulu alqışlar səsləndirib. El qədrini bilənlər əsla unudulmamalıdır!
“Ədəbiyyat və incəsənət”
(06.06.2023)
Bakıda Şəki rüzgarı
Teaatr haradan başlayır?
Cavab sonda bəlli olacaq.
Hələliksə xəbərə keçək.
Bildiyiniz kimi, Mədəniyyət Nazirliyi və Azərbaycan Teatr Xadimləri İttifaqının təşkilatçılığı ilə “Qonaq teatr” layihəsi həyata keçirilir, bu bölgənin tetarı digər bölgədə tamaşa göstərir, həm teatrsevərlər fərqlilik görür, həm də ümumən teatrın inkişafına zəmin yaranır.
Dünən layihə çərçivəsində İttifaqın səhnəsində Şəki Dövlət Dram Teatrının yaradıcı kollektivi türk yazarı Toyğun Orbayın “21:15 qatarı” adlı birhissəli səhnə əsərini təqdim edib.
Öncə Azərbaycan Teatr Xadimləri İttifaqı Sədrinin vəzifə səlahiyyətlərini icra edən, Xalq artisti Hacı İsmayılov çıxış edərək Şəki Teatrının fəaliyyətindən söz açıb, həmçinin tədbir və layihə haqqında ümumi məlumat verərək, yaradıcı kollektivi teatrın 90 illiyi münasibətilə təbrik edib.
Bildiyiniz kimi, Hacı İsmayılov özü də şəkilidir, bu bölgə Azərbaycan tetar tarixində əsaslı rol oynayır və ən azından onu deyək ki, böyük Mirzə Fətəli Axundov da şəkilidir.
“Ədəbiyyat və incəsənət” portalı xəbər verir ki, Hacı İsmayılov söyləyib: “Bu il çox əlamətdar ildir, həm Ümummilli Lider Heydər Əliyevin anadan olmasınin 100 illiyi, həm də Azərbaycan peşəkar teatrının yaranmasının 150 illiyidir. Bu il, eyni zamanda, 4 teatrın yubileyidir. Mədəniyyət Nazirliyi və Teatr Xadimləri İttifaqının birgə təşkilatçılığı ilə təşkil olunan “Qonaq teatr” layihəsi çərçivəsində bir çox bölgə teatrları Bakıya qastrol səfəri edirlər. İlk növbədə Ağdam teatrının yaradıcı kollektivi bu layihədə iştirak edərək şəhidlərimizə həsr olunmuş “Şuşadan gələn səs” tamaşası ilə çıxış edib. Bu gün də Azərbaycan mədəniyyətində öz yeri olan Şəki Dövlət Dram Teatrının kollektivi bizim qonağımızdır. Onlar maraqlı səhnə əsəri ilə burada çıxış edirlər”.
Sonra Şəki Dövlət Dram Teatrının yaradıcı kollektivi tərəfindən Toyğun Orbayın “21:15 qatarı” tamaşası nümayiş olunub.
Tamaşanın quruluşçu rejissoru Elvin Nuri, quruluşçu rəssamı Sahib Əhmədov, geyim üzrə rəssamı Surə İslamova, musiqi tərtibatçısı Zeynəb Xəlilovadır. Rolları Akif Yusifov, Rəhim Qocayev, Lalə Məmməd, Rəsul Məmmədrəhimov ifa ediblər.
Sonda Şəki Dövlət Dram Teatrının 90 illiyi münasibətilə və milli teatr sənətinin inkişafındakı xidmətlərinə görə teatr kollektivi İttifaqın təsis etdiyi Fəxri fərmanla təltif olunub.
Deyək ki, Mədəniyyət Nazirliyi və Azərbaycan Teatr Xadimləri İttifaqının təşkilatçılığı ilə həyata keçirilən “Qonaq teatr” layihəsi böyük maraq doğurur.
Belə bir deyim var, teatr asılqandan başlayır. Amma günümüzdə teatr məhz təşəbbüsdən başlayır. Gözəl təşəbbüsdən.
“Ədəbiyyat və incəsənət”
(06.06.2023)
Oxumalı olduğunuz 16 ən yaxşı yapon müəllifi
“Ədəbiyyat və incəsənət” portalının əməkdaşı Habil Yaşarın diqqətini becomeawritertoday.com saytındakı maraqlı xəbər cəlb edib. Belə ki, sayt tarixin ən məşhur 16 yapon yazısını müəyyənləşdirmək məqsədilə sorğu keçirib.
Öncə nəticələri təqdim edirik (yazılış orijinaldakı kimidir):
1.Ryunosuke Akutagawa
2.Yukio Mishima
3. Banana Yoshimoto
4. Ryu Murakami
5. Yoko Ogawa
6. Kenzaburo Oe
7. Natsuo Kirino
8. Yasunari Kawabata
9. Mieko Kawakami
10. Natsume Soseki
11. Sayaka Murata
12. Hiromi Kawakami
13. Junichiro Tanizaki
14. Kobo Abe
15. Murasaki Shikibu
16. Haruki Murakami
Indi isə əməkdaşlarımızın reytinqə reaksiyasını.
İntiqam Yaşar: Yapon ədəbiyyatının ən məşhur isimləri burdadır, həm Akutaqava, həm Mişima, həm Kobo Abe, həm də Murakami. Demək, qənaətbəxş reytinqdir.
Habil Yaşar: Ən sevdiyim yapon yazarı, əlbəttə ki, Rünöskö Akutaqavadır. Onun sırada ilk cərgədə dayanması gözəldir.
Malik Məmmədov: Düzü, yapon ədəbiyyatı barədə bilgili deyiləm.
Kənan: Bərbad reytinqdir. Çağdaş yapon ədəbiyyatı burda təmsil olunmur.
Könül: Mən yapon filmlərini yapon romanlarından daha çox sevirəm.
Varis: Əlbəttə ki ən sevdiyim yapon yazıçısı Haruki Murakaminin, eləcə də dünyaca məşhur Akutaqavanın, Mişimanın, Kobo Abenin, Oenin siyahıda yer almaları əladır. Amma Nobel mükafatçısı Kadzuo İsiquro bəs hanı? Əgər kimsə desə ki, o Amerikada yaşayır deyə siyahıya salınmayıb, mən sual edərəm: yapon Ayda yaşasa belə, o yapon deyil məgər?
Şəkildə: Dünya üçün mübaliğəsiz olaraq demək olar ki, “Norveç meşəsi”ni yazan Haruki Murakami birincidir.
“Ədəbiyyat və incəsənət”
(06.06.2023)
Mədəniyyət Nazirliyi Bakı şəhərində ucaldılacaq Çingiz Aytmatovun abidəsi ilə bağlı açıq müsabiqə elan edir
Azərbaycan Respublikasının Mədəniyyət Nazirliyi Türk dünyasının görkəmli nümayəndəsi, Qırğızıstanın Xalq yazıçısı Çingiz Aytmatovun xatirəsinin əbədiləşdirilməsi məqsədilə Bakı şəhərində ucaldılacaq abidəsinin eskiz-layihələrinin hazırlanması üçün heykəltaraşlar arasında açıq müsabiqə elan edir. Müsabiqə 15 iyun – 31 iyul 2023-cü il tarixlərində keçiriləcək.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, eskiz layihələr Mədəniyyət Nazirliyinin “Heykəltaraşlıq abidələrinin, xatirə-memorial və memarlıq komplekslərinin ucaldılması və demontajı üzrə Ekspert komissiyası”nın üzvləri tərəfindən qiymətləndiriləcək. Layihələrin müzakirəsi qapalı şəraitdə keçiriləcək.
Müsabiqənin qalibi barədə məlumatlar əsas mərhələ başa çatdıqdan 15 gün sonra 15 avqust 2023-cü il tarixində Mədəniyyət Nazirliyinin rəsmi saytında (culture.gov.az) yayımlanacaq. İkinci və üçüncü yeri tutan müəlliflərə müvafiq olaraq 2000 manat və 1000 manat məbləğində pul mükafatı təqdim ediləcək.
“Ədəbiyyat və incəsənət”
(06.06.2023)
“Azərkitab” Yayınlarından yay sürprizləri
Ölkənin ən stajlı kitab təbliğatı mərkəzi - “Azərkitab” öz fəaliyyətini daha da genişləndirməkdədir. Qurum indi tək kitab təqdimatları keçirmir, tək kitab satmır, həm də kitab nəşr edir.
“Ədəbiyyat və incəsənət” portalı “Azərkitab”ın redaktorlarından biri olan Nadir Cəfərovdan “Azərkitab” Yayınlarının özəlliyi ilə bağlı bilgi alıb.
“Azərkitab” digər nəşriyyatlardan nə ilə fərqlənir? Mətn redaktəsinin yüksək keyfiyyəti ilə.
Hazırda bir çox yazıçı və şairlər öz yeni kitablarını redaktorsuz nəşr etdirirlər. Ən yaxşı halda redaktor təsisatı formal xarakter daşıyır. Hətta redaktorla korrektora fərq
belə qoyulmur.
Halbuki, bədii əsərin keyfiyyəti bilavasitə peşəkar redaktor faktorundan asılıdır. Ona görə də kitablar satılmır, oxucu qəlbinə yol tapa bilmir.
Bu problemin çözülməsi üçün ölkənin ən qocaman kitab mərkəzi - “Azərkitab” kitab təbliğatı Mərkəzi köklü tədbirlər həyata keçirir. Bunlardan biri yeni fəaliyyətə başlamış “Azərkitab” yayınları vasitəsi ilə “Renessans” layihəsinin həyata keçirilməsidir. Layihə çərçivəsində yayın evi yazarların kitablarını ən yaxşı redaktorların və korrektorların hesabına oxucuların sevimlisinə çevirməkdə iddialıdır, yüksək satış faizi təmin etməkdə də həmçinin.
Unutmayın, təkcə istedad bestseller yazmağa kifayət etmir!
“Azərkitab” kitab təbliğatı mərkəzinin “Azərkitab” yayınları, “Renessans” qrupu Bakı, Atatürk prospekti, Kral Hüseyn küçəsi, 64 A/1. (“Zivella” mebel evinin arxası) ünvanında fəaliyyət göstərir. Əlaqə nömrəsi: +994 51 3047525.
Peşəkar kitabçılar yazarları əməkdaşlığa dəvət edirlər.
Onu da deyək ki, “Azərkitab”ın kitabları ən yüksək poliqrafik keyfiyyətə malikdir, ASMİR MMC-nin “Məktəbli” poliqrafiya mərkəzində ölkə kitab industriyasının ən nəfis məhsulları çap edilir.
Xatırladaq ki, bu günlərdə “Azərkitab” yayınlarında yazıçı Varisin yeni “Qızıl cib saatı”, eyni zamanda ölkədə ən çox satılan “Sonuncu ölən ümidlərdir” romanının 7-ci təkrar nəşri yeni redaktədə çap olunub. Yazıçı Adəm İsmayıl Bakuvinin “Paris üçbucağı” romanı da kitabsevərlərin yay fəslində oxu menyüsünə qata biləcəkləri maraqlı kitablar sırasındadır.
Yayın evi oxuculara digər xoş sürprizlər də hazırlayır.
“Ədəbiyyat və incəsənət”
(06.06.2023)
Azərbaycan tarixi və mədəniyyəti Lion “Konsulluq bayramı”nda təqdim olunub
Fransanın Lion şəhərində 20-ci “Konsulluq bayramı” keçirilib.
AzərTAC xəbər verir ki, 46 ölkənin təmsil olunduğu bayramda Fransa-Azərbaycan Dialoqu Assosiasiyasının təşkilatçılığı ilə hazırlanmış Azərbaycan stendi də ziyarətçilər təqdim edilib.
Azərbaycan stendində Heydər Əliyev Fondunun milli tariximiz, mədəniyyətimiz, eləcə də xalçaçılıq məktəblərinə dair fransız dilində nəşrləri, İRS jurnalı və milli şirniyyatlarımız təqdim olunub. Paxlava, şəkərbura ilə çaya qonaq edilən ziyarətçilərə Azərbaycanın tarixi, mədəniyyəti haqqında ətraflı məlumat verilib.
Qeyd edək ki, artıq ənənəyə çevrilmiş “Konsulluq bayramı” şəhərdəki konsulluqların və xarici assosiasiyaların öz ölkələrinin mədəni sərvətlərinin təqdimatı vasitəsilə Lion şəhərinin beynəlmiləlliyini təşviq edir.
Fransada nadir olan bu tədbir Lionda yerləşən 66 konsulluqdan ibarət korpusun dinamizminə əsaslanır.
“Ədəbiyyat və incəsənət”
(06.06.2023)
Bu gün Bakıda II Türk dünyası Ədəbiyyat və Kitab festivalı açılır
Bu gün Bakıda olduqca əhəmiyyətli bir beynəlxalq mədəniyyət tədbirinə start verilir, II Türk dünyası Ədəbiyyat və Kitab festivalı başlayır. Elmlər Parkında düzənlənəcək bu bir həftəlik tədbirdə iştirak etmək şansından yararlanmamaq, kitabsevərlər üçün sadəcə bir itki olar.
Açılış mərasimində Baş nazirin müavini Əli Əhmədovun, mədəniyyət naziri Adil Kərimlinin, Azərbaycan Milli Elmlər Akademiyasının prezidenti İsa Həbibbəylinin, Azərbaycan Yazıçılar Birliyinin sədri Anarın, Milli Məclisin Mədəniyyət Komitəsinin sədri Qənirə Paşayevanın, Xalq yazıçısı Çingiz Abdullayevin, BDU-nun rektoru Elçin Babayevin, Türkiyənin Azərbaycandakı səfiri Cahit Bağçının çıxış etmələri tədbirin ranqından xəbər verir.
Açılış mərasimində habelə Xalq şairi Sabir Rüstəmxanlı, Beynəlxalq Türk Mədəniyyəti və İrsi Fondunun prezidenti Günay Əfəndiyeva, Beynəlxalq Türk Akademiyasının Vitse pezidenti Erhan Türvedar, TİKA (Türkiyə İş Adamları Birliyi) Bakı Koordinatorunun müavini Ahmet Çanga, TÜRKSOY-un Azərbaycan təmsilçisi Elçin Qafarlı, millət vəkili, Avropa İttifaqı-Azərbaycan Parlament Əməkdaşlıq Komitəsinin həmsədri Cavanşir Feyziyev çıxış edəcəklər.
“Ədəbiyyat və incəsənət” portalınln əməkdaşı festivalın təşkilatçısı olan “Beytüm” Beynəlxalq Türk Müəllifləri Təşkilatının rəhbəri Xəyal Rzayla görüşüb bu böyük kitab bayramı ilə bağlı ondan bilgilər əldə etmişdir.
Festivalın məhz 7 gün davam etməsi özlüyündə türk mifologiyasının müqəddəs 7 rəqəminə istinadı ehtiva edir, günlərin hər biri də bir qardaş ölkəyə həsr edilir.
5 iyun - Azərbaycan
6 iyun - Qazaxıstan.
7 iyun - Türkmənistan
8 iyun - Türkiyə
9 iyun - Qırğızıstan
10 iyun - Özbəkistan
11 iyun - Macarıstan
Bu gün saat 10-da başlayacaq təntənəli açılış məraaimində ilk olaraq I Qarabağ qazilərinin ifasında Fərahim Sadiqin “Əsgərnamə elegiya” layihəsi nümayiş olunacaq.
Sonra şairə, “Söz” layihəsinin rəhbəri Nigar Həsənzadə məşhur “İgidlərin sözü layihəsini təqdim edəcək. II Qarabağ müharibəsi qaziləri öz şeirlərini söyləyəcəklər.
Açılış çıxışlarından sonra musiqi nömrələri təqdim ediləcək. Rəşad İsmayıl sözləri və musiqisi Şahin Musaoğluna aid “Qan qardaşı, can qardaşı, şan qardaşıyıq biz” kompozisiyasını təqdim edəcək, Kürdəmir rayon Uşaq İncəsənət məktəbinin Davud Ələkbərov adına uşaq xalq çalğı alətləri ansamblının ifasında dahi bəstəkar Üzeyir Hacıbəylinin “Koroğlu” operasından “Uvertüra”, ansamblın solistləri Aysu Alməmmədli və Həsənalı Həsənlinin ifalarında bəstəkar Emin Sabitoğlunun “Gün keçdi” filmi üçün yazdığı “Bayatılar” mahnısı səslənəcək. İçinə şeir bəndləri yazılmış şarların havaya buraxilması ilə tamamlanan açılış mərasimindən sonra ziyarətçilərin Kitab sərgisi ilə tanışlıqları başlayqcaq.
İlk gündə sərginin növbəti tədbirləri aşağıdakılar olacaq:
“Xarıbülbül” Rəqs Qrupunun ifasında “Küçələrə su səpmişəm” rəqsi;
“Heydər Əliyev və Azərbaycan ədəbiyyatı” mövzusunda konfrans. Çıxışçılar - Akademik İsa Həbibbəyli, Xalq şairi Nəriman Həsənzadə, AMEA-nın müxbir üzvü Tehran Əlişanoğlu, fil.e.d., dos. Elnarə Akimova, fil.e.d., dos. Pərvanə İsayeva, fil.e.d., dos. Əlizadə Əsgərli, tənqidçi Əsəd Cahangir.
“Ulu Öndər Heydər Əliyevin xatirəsinə həsr olunmuş, onunla şəxsən təmasda olan insanların xatirələrinin yer aldığı, AYB tərəfindən nəşr edilən “Əbədi ömrün YÜZ İLİ” kitabının təqdimatı. Moderator: Kitabın redaktoru olan yazıçı-dramaturq, Əməkdar incəsənət xadimi Elçin Hüseynbəyli.
Millət vəkili Cavanşir Feyziyevin 8 dildə nəşr edilmiş “Türk dünyası” 5 cidliyinin təqdimatı. Moderator şair, MM-in mədəniyyət komitəsinin eksperti Əkbər Qoşalı.
Beynəlxalq Türk Mədəniyyəti və İrsi Fondu tərəfindən nəşr edilmiş “Saqınbaydın manası” kitabının təqdimatı. Beynəlxalq Türk Mədəniyyəti və İrsi Fondunun nümayəndəsi Mirbek Karıbayevin, Beynəlxalq Türk Akademiyasının vitse-prezidenti Erhan Türbedarın təqdimatı ilə.
Nakam Azərbaycan şairi Mikayıl Müşfiqin 115 illiyinə həsr edilmiş tədbir. Moderator: fil.f.d., dos. Aygün Bağırlı, məruzəçi: fil.f.d., dos. Safura Quliyeva, çıxışçılar: fil.e.d., dos. Cavanşir Yusifli, fil.f.d., dos. Günay Qarayeva, fil.f.d., dos. Firidun Qurbansoy, fil.f.d. Nərmin Cahangirova.
Tədbirdə həmçinin AYB Müşfiq Komissiyasının sədri Xəyal Rzaya rəssam Tünzalə Ağabalayeva tərəfindən Müşfiqin “İşıqlı dünyadan necə əl çəkim” adlı şeirinə həsr edilmiş rəngkarlıq nümunəsi təqdim ediləcək.
Xalq yazıçısı Çingiz Abdullayevlə görüş.
Xalq yazıçısı Anarla görüş. Moderator: İsa Həbibbəyli.
Mərhum Xalq şairi Vaqif Səmədoğlu barədə saytın təqdimatı. Moderator: Fərid Hüseyn.
Əməkdar artist Nuriyyə Hüseynovanın konserti.
Çingiz Mehtipur (“Dalğa” qrupunun rəhbəri) və Vədud Müəzzin ifalarında saz musiqisi
Əsəd Nağıyev, “Musiqili dəqiqələr”.
Ən nəhayət, ilk günün finalı Yay kinoteatrında film nümayişi ilə yekunlaşacaq. Rejissor Oktay Mir-Qasımın “Qisas almadan ölmə” filmi nümayiş olunacaq.
Növbəti günlərdə də biri-birindən maraqlı tədbirlər sıralanacaq. Festivalın ikinci günündə “Türk dövlətçiliyi tarixi" mövzusunda professor Mais Əmrahovun moderatorluğu, professor Kərim Şükürovun, tarix elmləri doktorları İlqar Niftəliyevin və Ellada Bəkirovanın iştirakıyla mühazirə; yazıçı, Azərbaycan Ədəbiyyat Fondunun Baş direktoru Varislə görüş; Nigar Rəfibəyli – 110 tədbiri çərçivəsində qadın şairlərin “Gül dəftəri” şeir şöləni (Narıngül Nadirin, Kəmalə Abıyevanın, Xəyalə Sevilin, Aysel Fikrətqızının, Aypara Ayxanın, Banu Məhərrəmin iştirakı ilə); Elxan Zal Qaraxanlının və Cavanşir Feyziyevin “Xəzər məkanı”, “Türklər, Xəzərlər, Yəhudilər” kitablarının təqdimatı; tanınmış naşir Şahbaz Xuduoğlunun moderatorluğu ilə “Azərbaycanda kitabçılıq” mövzusunda müzakirələr və digər tədbirlər nəzərdə tutulur.
Növbəti günlərdə Xalq Şairi Ramiz Rövşənin və Əməkdar İncəsənət
Xadimi Baba Vəziroğlunun yaradıcılıq gecələri, Türk yazarı Ufuk Tufana məxsus “Ərtuğrul bəy və qayılar”, “Quruluş Osman” kitablarının təqdimatı, Dünya Gənc Türk Yazarlar Birliyinin yubiley tədbiri, Professor Qəzənfər Paşayevin və Kərkük Yazarlar Birliyi başqanı Şemsettin Kuzecinin Kərkük Ədəbiyyatı mühazirələri, Türk Şeiri şöləni (Coşqun Karabulutun, Mahmut Özkocanın, Şemsettin Kuzeçinin, Ceyhan Özyıldızın, Serkan Soyalın iştirakı ilə), Akademik İsa Həbibbəylinin moderatorluğu ilə Mir Cəlal Paşayev – 115 (Məruzəçi: AMEA-nın müxbir üzvü Tehran Əlişanoğlu, çıxışçılar: fil.e.d., dos. Asif Rüstəmli, prof. Tahirə Məmməd, fil.f.d., dos. Aslan Salmansoy, fil.e.d.Mərziyyə Nəcəfova) konfransı, Əməkdar artist Azad Şükürovun təqdimatında Şeir adam, yazıçı-dramaturq, Əməkdar incəsənət xadimi Əli Əmirli ilə Ustad sözü, ədəbiyyatşünas Seyfəddin Hüseynli ilə “Dünya ədəbiyyatı”ndan mənzərələr, tanınmış Türkiyə şairi Mehmet Nuri Parmaksız ilə “Kəpənək Ömürlü Şairlər” layihələri, Azərbaycan Ədəbiyyat Fondunun təşkilatçılığı və AMEA-nın, Dünya Gənc Türk Yazarlar Birliyinin təşkilati dəstəyi ilə “Türk Dünyasının Ortaq Ədəbiyyatı”
dəyirmi masası, moderatoru Gülnarə Cəmaləddin olan Əli Kərimin xatirəsinə həsr edilmiş Sumqayıtlı Şairlər Günü (Əşrəf Veysəllinin, Ofeliya Babayevanın, Rafiq Yusifoğlunun, İbrahim İlyaslının, Əyyub Qiyasın, Elvin Əlizadənin iştirakı ilə), AMEA və Beynəlxalq Türk Mədəniyyəti və İrsi Fondunun “Çingiz Aytmatov – 95” konfransı (Moderator: akademik İsa Həbibbəyli, məruzəçi: fil.f.d., dos. Mehman Həsənli, çıxışçılar: fil.f.d., dos. Nərgiz Cabbarlı, fil.f.d. Ülviyyə Hüseynova, Nəzrin Əliyeva), Bakı Bələdiyyə Teatrının təqdimatında “Ana tarla” tamaşasından hissələr, Xalq artisti Gülyanaq Məmmədovanın konserti, Milli Məclisin Mədəniyyət Komitəsinin sədri Qənirə Paşayeva ilə görüş, “Türk romançılığı və Orxan Pamuk” mövzusunda yazıçılar Fəxri Uğurlu və Qismət Rüstəmovun, “Macar Milli Şairi Şandor Petofi: həyatı və şeirləri” mövzusunda şairlər Ramil Əhmədin və
Ağasəfanın məruzələri, Türkiyəli yazar Mahmut Özkocanın “Aşk və Şiir” təqdimatı və daha nələr, daha nələr baş tutacaq.
Əziz bakılılar, şəhərin qonaqları, əziz kitabsevərlər, hamınızı bu bir həftəni Elmlər Bağında festivalla yaşamağa dəvət edirik.
Kitaba sığınan yenilməz!
“Ədəbiyyat və incəsənət”
(05.06.2023)
“Darıxmışam dostlar üçün…”
Şair-publisist Kənan Aydınoğlunun "Darıxmışam dostlar üçün..." adlı şeirlər kitabı işıq üzü görüb.
“MAYAK KARGO" Məhdud Məsuliyyətli Cəmiyyətinin maliyyə dəstəyi ilə gerçəkləşdirilən "Yeni nəsil Azərbaycan gəncliyinin istedadlı nümayəndələrinə dəstək" layihəsi çərçivəsində yeni nəsil Azərbaycan gəncliyinin istedadlı nümayəndəsi, Azərbaycan Yazıçılar və Jurnalistlər Birliklərinin üzvü, Azərbaycanın Mədəniyyət və Ədəbiyyat Portalının təsisçisi və baş redaktoru Kənan Aydınoğlunun "Yaman darıxmışam dostlar üçün mən" adlı yeni şeirlər kitabı işıq üzü görüb.
Bu barədə “Ədəbiyyat və incəsənət” portalına jurnalist Kamran Murquzov məlumat verib.
“Yeni nəsil Azərbaycan gəncliyinin istedadlı nümayəndələrinə dəstək" layihəsinin rəhbəri və müəllifi Arzu Mahmudovadır. Kitabın redaktoru Naxçıvan Dövlət Universitetinin Filologiya fakültəsinin məzunu, "BAKU CUSTOMS WORKS" Məhdud Məsuliyyətli Cəmiyyətinin əməkdaşı Rafət Allahversiyev, məsləhətçisi Milli Qəhrəman Cəmil Niftəliyev adına Bakı şəhəri 233 saylı tam orta məktəbin İngilis dili müəllimi Nigar İsmayılova, tərtibatçısı isə Azərbaycanın Mədəniyyət və Ədəbiyyat Portalının Mətbuat xidmətinin rəhbəri, "Kümbet" və "Usare" dərgilərinin Azərbaycan təmsilçisi, Azərbaycan Jurnalistlər Birliyinin üzvü Kamran Murquzovdur.
Bu kitabda müəllifin müxtəlif müəssisələrdə təcrübə keçdiyi dövrdə və sonralar həmkarları ilə bağlı qələmə aldığı bədii əsərləri, məqalələri və yoldaşlarının müəllifə ünvanladığı poetik nümunələri yer alıb.
Kitab müəllifin oxucuları ilə sayca üçüncü görüşüdür. Geniş oxucu auditoriyası üçün nəzərdə tutulub. Ədəbiyyatşünas-alim, tənqidçilər və Ədəbiyyat camesi tərəfindən rəğbətlə qarşılanacağına ümid edirik.
Xatırladaq ki, bundan öncə şair-publisist Kənan Aydınoğlunun "Ömürdən bir səhifə" (Bakı, "Adiloğlu", 2007) və "Ömrün yarı yolunda" (Bakı, "MK" Nəşriyyatı, 2010) adlı şeirlər kitabı ictimaiyyət nümayəndələrinin nəzərinə çatdırılıb.
“Ədəbiyyat və incəsənət”
(05.06.2023)
