Super User
“Səsdən könüllərə” təqdim olundu
Habil Yaşar, “Ədəbiyyat və incəsənət”
“Landmark” hotelinin “Rotunda” zalında psixoloq, təlimçi, terapist Əsmər xanım Kərimovanın imzası ilə “Səsdən Könüllərə” Beynəlxalq Kouçluq Layihəsinin təqdimatı keçirilmişdir.
Təqdimatda layihənin siması olan gənc şair, qiraətçi, psixoloq Ülvi Yolçuyevin “Qeybət” adlı şeir gecəsi də baş tutmuşdur. Tədbirdə Ülviyyə Sadıqova, Orxan Həsənli, Habil Yaşar, Sevinc Əhmədova, Zülfiqar Məmmədli, Gültəkin İsmayılova kimi ziyalılar, yazarlar da yer almışdır.
“Ədəbiyyat və incəsənət”
(20.06.2023)
Ölkə ərazisində qeyri-sabit hava şəraiti iyunun 24-dək davam edəcək
Milli Hidrometeorologiya Xidmətinin məlumatına əsasən sabah - iyunun 21-i səhərədək Bakıda və Abşeron yarımadasında şimal-qərb küləyinin 15-20 metr/saniyə, arabir 23-25 metr/saniyəyədək güclənəcəyi gözlənilir.
Ölkə ərazisində qeyri-sabit hava şəraiti iyunun 24-dək davam edəcək. Bəzi yerlərdə fasilələrlə leysan xarakterli yağış yağacağı gözlənilir. Əsasən Qazax-Gəncə, Qarabağ və Şərqi Zəngəzur, Balakən-Şəki, Quba-Qusar, Dağlıq Şirvan, Mərkəzi Aran rayonlarında yağıntıların intensiv və güclü olacağı, şimşək çaxacağı, dolu düşəcəyi ehtimalı var.
Şərq küləyi 15-20 metr/saniyə, bəzi yerlərdə arabir 23-28 metr/saniyəyədək güclənəcək.
Çaylarda sululuğun artacağı, bəzi dağ çaylarından qısamüddətli sel keçəcəyi gözlənilir.
“Ədəbiyyat və incəsənət”
(20.06.2023)
Özbəkistandakı Heydər Əliyev adına Azərbaycan Mədəniyyət Mərkəzinin fəaliyyəti bəyənilib
Xəbər verdiyimiz kimi, TÜRKSOY təşkilatının yaradılmasının 30 illiyi münasibətilə Özbəkistanda keçirilən tədbirlərdə iştirak məqsədilə Azərbaycanın mədəniyyət naziri Adil Kərimli bu ölkədədir.
Təbii ki, Özbəkistanın mədəni həyatına
Daşkənd şəhərindəki Heydər Əliyev adına Azərbaycan Mədəniyyət Mərkəzi (AMM) çox möhkəm siyarət edib. Rəngbərəng, müxtəlif tədbirlərlə mərkəz tək azərbaycanlılara deyil, özbəklərə də xidmət edir. Və təbii ki, Daşkəndə səfər edən nazirimizin bu ocağa baş çəkəcəyi gözlənilən idi.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, Adil Kərimli səfərinin ikinci günündə AMM-i ziyarət edib. Əvvəlcə Ümummilli Lider Heydər Əliyevin mərkəzin qarşısında ucaldılmış büstü önünə tər gül dəstələri qoyan nazir Mədəniyyət Mərkəzinin həyətində yaradılmış “Şəhidlər” abidə-kompleksini ziyarət edib.
Nazir AMM-in qarşısında Heydər Əliyev küçəsində qoyulmuş Ulu Öndərin xatirə lövhəsi ilə də tanış olub.
Mədəniyyət nazirinin başçılıq etdiyi nümayəndə heyəti daha sonra mərkəzdə Ümummilli Lider Heydər Əliyevin 100 illik yubileyi münasibətilə yaradılmış Azərbaycan-Özbəkistan Dostluq Muzeyini ziyarət edərək burada qardaş xalqın ortaq tarixi köklərini, milli-mənəvi, mədəni dəyərlərini əks etdirən eksponatlar, Özbəkistanın dövlətçilik və incəsənət, ədəbiyyat və mədəniyyət sahəsində xüsusi xidmətləri olan azərbaycanlılara aid guşə ilə tanış olub.
Hər bir eksponat barədə ayrıca məlumat verən AMM-in sədri Samir Abbasov görülən və görüləcək işləri də diqqətə çəkib, iki qardaş xalqın dostluq əlaqələrinə verdikləri töhfədən danışıb.
Mərkəzdə yaradılmış kitabxana, rəqs və rəsm dərnəkləri, Azərbaycan dili kursları ilə tanış olan nazir Azərbaycan mədəniyyətini təbliğ edən dərnəklərin və dilimizin öyrədilməsində xüsusi rolu olan kursun fəaliyyətini təqdirəlayiq hesab edib.
Muzeydə yaradılmış “Azərbaycan xalçaları zalı”na baxış zamanı öz tövsiyələrini verən nazir Azərbaycan xalqının xalq sənətkarlıq ənənələrinin təbliği baxımından muzeyin mövcudluğunu yüksək qiymətləndirib.
Mərkəzin foyesində Ümummilli Liderə həsr olunmuş fotosərgi və AMM-in layihələri ilə çap edilmiş kitablar, Heydər Əliyevə aid nəşrlərdən ibarət sərgi ilə tanış olan nazir Mədəniyyət Mərkəzinin Azərbaycana dair özbək dilində kitab nəşri sahəsində gördüyü işləri dəyərləndirərək gələcəkdə də bu sahədə işləri genişləndirməyi tapşırıb.
Mədəniyyət Mərkəzində yaradılmış Azərbaycan Dövlətçilik Tarixi Muzeyi ilə də tanışlıq olub.
Daha sonra nümayəndə heyəti Mədəniyyət Mərkəzində yaradılmış Heydər Əliyev Muzeyi ilə tanış olub. Ümummilli Liderin həyat və fəaliyyətini əks etdirən eksponatların, fotostendlərin nümayişi ilə yanaşı, burada müxtəlif tədbirlərin keçirildiyi də bildirilib.
Sonra nazir muzeyin xatirə kitabına ürək sözlərini yazıb.
Sonda AMM-in kollektivi ilə görüşən nazirin başçılıq etdiyi nümayəndə heyəti mərkəzin fəaliyyətini qiymətləndirib və işlərində uğurlar arzulayıblar.
Adiı Kərimlinin Özbəkistana səfəri davam edir.
“Ədəbiyyat və incəsənət”
(20.06.2023)
Rejissor Oqtay Əliyevin ilk doğum günü onsuz keçdi
Mina Rəşid, “Ədəbiyyat və incəsənət”
Ötən gün televiziya prodüseri, rejissor, Əməkdar mədəniyyət işçisi Oqtay Vidadi oğlu Əliyevin doğum günü idi. O, 1968-ci il iyunun 19-da qədim Azərbaycan şəhəri olan İrəvanda doğulub. 1975-1985-ci illərdə İrəvan şəhərində M.F. Axundov adına orta məktəbi bitirib. 1987-1992-ci illər Azərbaycan Dövlət İncəsənət İnstitutunun "kino və dram rejissoru" fakultəsində təhsil alıb.
1983-1985-ci illərdə Cəfər Cabbarlı adına İrəvan Dövlət Azərbaycan Dram Teatrında rejissor köməkçisi işləyib. 1989-1994-cü illərdə Bakı şəhər Mədəniyyət idarəsində rejissor vəzifəsində çalışıb. 1993-cü ildə Azərbaycan televiziyasında "Virtuoz" adlı layihənin prodüseri olub.
1990-cı ildə "Ər və arvad" (Mar Bayciyev), "Molla Nəsrəddin və Əzrayıl", "Gəlin, açıq danışaq, lap açıq", "Əkizlərin nağılı" (Panço Pançiyev) pyeslərinin və bir sıra əlamətdar bayram proqramlarının quruluşçu rejissoru olub və ssenarilərini yazıb. 1995-ci ildə A.P. Çexovun "Məmurun ölümü" əsəri əsasında çəkilmiş "Kiçik leytenant" filminin baş prodüseri olub. 1997-ci ildə Space tv-də yayımlanan "Korifey", "Həftə çal-çağırı", "İşdən sonra" verlişlərinin müəllifi və baş prodüseri olub.
1998-ci il oktyabr ayının 5-dən "SOY" production şirkətinin təsisçisi və prezidenti idi. "Ən yaxşı ssenariyə görə" I Audiovizual festival, Bakı- 2001, "Ən yaxşı animasiya işinə görə" III Beynəlxalq Audiovizual festival Bakı- 2003 mükafatlarını qazanıb.
Tanınmış televiziya prodüseri, rejissoru Oqtay Əliyev bu il martın 22-də Abşeron rayonunda yol-nəqliyyat hadisəsi zamanı faciəli şəkildə dünyasını dəyişib.
Allah rəhmət eləsin.
“Ədəbiyyat və incəsənət”
(20.06.2023)
Yeddi ildən sonra “AzDrama”nın səhnəsinə çıxacaq
Xalq artisti Mehriban Zəki yeddi ildən sonra Azərbaycan Dövlət Akademik Milli Dram Teatrının səhnəsinə çıxacaq.
Bu barədə aktrisa “Qafqazinfo”ya danışıb.
O, yazıçı-dramaturq Şıxəli Qurbanovun “Sənsiz” əsəri əsasında hazırlanacaq eyniadlı tamaşada baş rollardan birini canlandıracaq:
“Səhnədə sonuncu çıxışım 2016-cı ildə Erik Emmanuel Şmidtin "Müsyö İbrahim və Quran çiçəyi" adlı əsəri əsasında hazırlanan tamaşasında olub. Əslində işdən çıxmamışam, sadəcə bu illər ərzində rol verilmirdi. Bu, mənə də təəccüblü gəlir.
Bu il teatra rəhbər təyin olunan Əməkdar incəsənət xadimi Mehriban Ələkbərzadə dedi ki, teatr ştatında olan bütün aktyor və aktrisalar tamaşalarda rol almalıdırlar. Mənə də “Sənsiz” tamaşasında rol almağı təklif etdi, razılaşdım. Tamaşanın quruluşçu rejissoru Nihad Qulamzadədir. Mən Sevinc obrazını canlandırıram”.
Qeyd edək ki, 2016-2023-cü illərdə “AzDrama”nın baş direktoru Azər Paşa Nemətov olub. O, apreldə 75 yaşında vəfat edib. Ötən ay isə Akademik Milli Dram Teatrına Mehriban Ələkbərzadə bədii rəhbər təyin edilib.
“Ədəbiyyat və incəsənət”
(20.06.2023)
Azərbaycan nümayəndə heyəti Əlişir Nəvai adına Daşkənd Dövlət Özbək Dili və Ədəbiyyatı Universitetində Məhəmməd Füzuli adına Azərbaycan Mədəniyyət Mərkəzi ilə tanış olub
Mədəniyyət nazirinin başçılıq etdiyi nümayəndə heyətinin Özbəkistana səfəri davam edir. Nazirin rəhbərlik etdiyi nümayəndə heyəti iyunun 19-da Əlişir Nəvai adına Daşkənd Dövlət Özbək Dili və Ədəbiyyatı Universitetində olub, burada fəaliyyət göstərən Məhəmməd Füzuli adına Azərbaycan Mədəniyyət və Təhsil Mərkəzini ziyarət edib. Bu barədə “Ədəbiyyat və incəsənət” portalı Mədəniyyət Nazirliyinə istinadən məlumat verir.
Mərkəz 2019-cu ildə Daşkənddəki Heydər Əliyev adına Azərbaycan Mədəniyyət Mərkəzinin (AMM) layihəsi əsasında yaradılıb. AMM tərəfindən mərkəzə Azərbaycan dilinin, ədəbiyyatının, mədəniyyətinin təbliği məqsədilə nəşrlər, əyani vasitələr təqdim edilib. Burada Azərbaycanla bağlı kiçik kitabxana, həmçinin milli mədəniyyətimizə dair guşələr yaradılıb.
Mərkəzin rəhbəri dosent Gülbahar Aşurova Azərbaycan ədəbiyyatının təbliği, həyata keçirilən layihələr və Heydər Əliyev adına AMM ilə birgə fəaliyyətləri barədə məlumat verib. Qeyd olunub ki, mərkəz universitetdə Azərbaycan ədəbiyyatına dair aparılan tədqiqatlara da dəstək verir, həmçinin Azərbaycan ədəbiyyatından tərcümə işlərində fəal iştirak edir.
Adil Kərimli Heydər Əliyev adına AMM-nin layihəsi ilə Özbəkistanın müxtəlif təhsil və mədəniyyət müəssisələrində ölkəmizlə bağlı belə mərkəzlərin yaradılması ideyasının təqdirəlayiq olduğunu bildirib.
Nümayəndə heyəti daha sonra Ə.Nəvai adına Daşkənd Dövlət Özbək Dili və Ədəbiyyatı Universiteti ilə tanış olub.
“Ədəbiyyat və incəsənət”
(20.06.2023)
Mədəniyyət nazirimiz Daşkənddə TÜRKSOY-un baş katibi ilə görüşüb
Xəbər verdiyimiz kimi, Azərbaycan Respublikasının mədəniyyət naziri Adil Kərimli Özbəkistanın paytaxtı Daşkənddə Beynəlxalq Türk Mədəniyyəti Təşkilatı – TÜRKSOY-un 30 illiyinə həsr olunmuş tədbirlərdə iştirak edir.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, səfər çərçivəsində Daşkənddə Adil Kərimli ilə TÜRKSOY-un baş katibi Sultan Rayev arasında ikitərəfli görüş keçirilib.
TÜRKSOY-un 30 illik yubileyi münasibətilə baş katibə təbriklərini çatdıran nazir türk xalqlarının ədəbi-mədəni zənginliklərinin təbliğində təşkilatın fəaliyyətini yüksək qiymətləndirib.
Ölkəmizlə TÜRKSOY arasında əlaqələrin yüksək səviyyəsindən məmnunluğunu bildirən Adil Kərimli Azərbaycanın qədim Şuşa şəhərinin 2023-cü il üçün “Türk dünyasının mədəniyyət paytaxtı” elan olunmasına və Şuşada “paytaxt ili”nin açılış mərasimində şəxsən iştirakına görə Sultan Rayevə təşəkkürünü ifadə edib.
Baş katib Azərbaycanın TÜRKSOY-un fəaliyyətinə verdiyi davamlı dəstəyin əhəmiyyətini vurğulayıb, “Şuşa – Türk dünyasının mədəniyyət paytaxtı” ilinin Azərbaycanın bu qədim şəhərinin tarixi-mədəni mirasının daha geniş miqyasda təbliği baxımdan böyük fürsət olduğunu bildirib.
Görüşdə “Şuşa – Türk dünyasının mədəniyyət paytaxtı” ili çərçivəsində nəzərdə tutulan tədbirlər və layihələr barədə fikir mübadiləsi aparılıb.
“Ədəbiyyat və incəsənət”
(20.06.2023)
Unutqan babanın lətifəsi
“Ədəbiyyat və incəsənət” portalı növbəti iyun lətifəsini sizlərin diqqətinə çatdırır
Atoppa baba “İynəvur” klinikasına gedib həkim Eldostuya şikayət edir:
— Həkim, sənin qadoyu alım, oğlumla gəlinim gediblər Antalyaya, uşağı mənə tapşırıblar. Mən əslində uşağa çox yaxşı baxıram. Hər gün havada gəzdirirəm, masaj elətdirirəm, idman elətdirirəm. Bununla belə, nə edirəmsə xeyri yoxdur, uşaq hər gün geriləyir, çəkisini itirir, arıqlayır…
Həkim qaşlarını çatıb soruşur:
— Bəs nə yedirdirsən ona?
Atoppa baba duruxur.
— Həkim, deyirəm axı, nəyisə yaddan çıxartmışam, uşağa heç nə yedirtmirəm.
“Ədəbiyyat və incəsənət”
(20.06.2023)
Nəfəskəsici detektiv – Fəxrəddin Qasımoğludan “On ikiyə işləmiş”
“Ədəbiyyat və incəsənət” portalı “Qiraət saatı”nda Fəxrəddin Qasımoğlunun “Son gecə” detektiv romanının dərcini yekunlaşdırdı. Böyük oxucu marağını və istəyini nəzərə alıb romanın davamı olan “On ikiyə işləmiş” romanının dərcinə başlayırıq.
Özü polis orqanlarında çalışan, ən dəhşətli, tükürpədici cinayətlərdən bilavasitə xəbər tuta bilən müəllifin bu romanı da sizləri sonadək gərginlik içində saxlayacaq. Və siz bu romanı da çox bəyənəcəksiniz.
7-ci dərc
-Keç içəri.
Bayaq gözləməsini tapşıran kişinin səsi yemişbaşı xəyallardan ayırdı. O, tələsik addımlarla onu çağıran adamın açıq saxladığı qapıdan içəri keçdi.
-Gəl, Eyvaz, gəl. Danış görək neylədin, nə öyrənə bildin və necə oldu ki, izləməyi tapşırdığım adamı itirdin.
Qarşısındakı, daha doğrusu özünün büzüşərək qarşısında durduğu, iri kresloya yayxanmış, siqar çəkən adamın sakit danışığı yemişbaşı qətiyyən sakitləşdirmədi. Uzun illər xidmətində durduğu bu adamın xarakterinə yaxşı bələd olduğu üçün, onun elə bir çox adamların taleyi ilə bağlı qərarları da belə sakit tərzdə verməsinin dəfələrlə şahidi olmuşdu.
-Əvvəlcə hər şey yaxşı gedirdi. Hətta onun çəkməçi işləyən bir nəfərlə görüşüb gizli məlumat almasını da öyrənə bildim. Ancaq metroda mindiyimiz qatar tərpənərkən, deyəsən çoxdan görmədiyi tanışını görüb birdən vaqondan düşməsi hər şeyi korladı. Qapılar bağlandığı üçün mən vaqonda qaldım və onu itirdim.
-Həmin tanışı dediyin adamın neçə yaşı olardı?
-Təxminən eyni yaşda olardılar, qırx ya bir qədər az.
-Sifətini görə bildin?
-Yox, qucaqlaşandan sonra tanışı fırlandı və arxası mənə tərəf olduğu üçün görə bilmədim.
-O da Bəxtiyarı qucaqladı?
-Hə, deyəsən qucaqladı - Eyvaz verdiyi cavabın düzgünlüyünə əmin olmadığı üçün qeyri-ixtiyari boynunun dalını qaşıdı.
-Yaxşı.
Oturan adam gözlərini qıyıb nəsə fikirləşməyə başladı. Kreslonun böyrünə dayaq verdiyi əlindəki barmaqlarının arasında tüstülənən siqarın külü döşəməyə sərilmiş bahalı xalçaya dağılsa da, o buna əhəmiyyət vermir, bir nöqtəyə baxmaqda davam edirdi.
Yemişbaş sakitcə onun nə deyəcəyini gözləyir, nəfəsini də ehtiyatla alırdı ki, ona mane olmasın.
-Qoy sən deyən olsun…
Nəhayət kreslodakı adam dilləndi.
Onun dediklərindən heç nə başa düşməyən yemişbaş əvvəlcə bir qədər döyükdü. Sonra ehtiyatla soruşdu:
-Bağışlayın, ancaq başa düşmədim.
Qarşısındakı onun bu sualına əhəmiyyət verməyib dedi:
-İndi gedə bilərsən. Sabah tezdən burada ol. Aydəmirə çəkməçi dükanının yerini nişan verəcəksən səhər.
İzlədiyi adamı itirdiyinə görə danlanacağını gözləyən yemişbaş, bu sözlərdən sonra bir qədər rahat nəfəs aldı, -Oldu, baş üstə, sağ olun, - deyib cəld otaqdan çıxdı.
* * *
Deyəsən xeyli yatmışam. Havanın qaralması onu göstərir ki, yuxuya getməyimdən azı iki saat keçib. Divandan qalxıb əl-üzümü yumaq üçün hamamxanaya keçdim. Soyuq su məni əməlli-başlı ayıltdı.
Yuyunub qayıdanda bayaqdan sakitlik çökmüş məhəllədə bir uğultunun yarandığını eşitdim. Bu uğultu məhəllə kişilərinin polis bölməsindən qayıtmalarının əlaməti idi. Hamının eyni vaxtda danışması səslərin bir-birinə qarışaraq evə uğultu şəklində gəlməsinə səbəb olurdu. Qayıtmaları yaxşı oldu. Məhəlləyə çıxıb nə baş verdiyini öyrənmək mənim üçün bir tərəfdən qonşu kimi vacib idisə, digər tərəfdən keçmş polis zabiti və peşəkar kimi buna borclu idim.
Geyinib həyətə düşdüm. Kişilərin gəldiyini görən arvadlar da küçəyə çıxmışdı, hərə öz həyat yoldaşından nə baş verdiyini soruşurdu. Bu qarışıqlıqda ağız deyəni qulaq eşitmirdi. Birdən başına yığışan insanların arasında məni görən Qələndər uca səslə qışqırdı:
-Bu nə işdir, Bəxtiyar, gör başımıza nələr gəldi. Heç bilmirəm nə olub. Günorta nahar eləyib hamımız yatmışdıq, birdən polislər gəldilər, qapını döyüb bizi oyatdılar, dedilər Salamı aparacaqlar, guya cinayət törədib. Mənim uşağım neyləyib axı, evdə yatan yerdə balamı oyadıb apardılar.Salamımı bölmədə saxladılar. Deyirlər qatildir, adam öldürüb. Mənim oğlum qatil ola bilməz axı Bəxtiyar, sən ki, Salamı tanıyırsan?!
Bu haraydan məhəlləyə yenə də sükut çökdü. Bu haray halal zəhməti ilə, əlinin qabarı ilə övladını böyüdüb ona gözəl tərbiyə vermiş, oğlunun qatil olacağına heç bir vəchlə inanmaq istəməyən atanın harayı idi.
Hamı kövrəlmişdi, hamı susurdu. Yaxınlaşıb “Günorta nahar eləyib hamımız yatmışdıq” kəlmələri ilə məni təəccübləndirmiş (günorta nahar edib bütün ailə üzvlərinin yatması sizə müəmmalı gəlmir ki?) Qələndərin qoluna girdim.
-Sakit ol, Qələndər, polis bölməsində nə dedilərsə, hamısını mənə danış.
-Nə deyəcəklər, guya Salam dünən gecə saatlarında maşınla adam vurub qaçıb. Adam da ölüb. Axı oğlum səhərə qədər işdə olub, o necə kimisə vura bilərdi həmin vaxt? - Qələndər ağlamsındı.
-Vurulan adam uşaqdır ya böyük, kişidir, ya qadın, yerində ölüb, ya həkimə çatdırıblar?
-Kişidir dedilər. Təxminən qırx beş yaşında. Yerindəcə keçinib. Adamları da bölmənin qabağında idilər. Beş-altı kişi idi. Hamısı da «quldura» oxşayırdı. Salamın atası olduğumu biləndə az qalmışdı məni öldürsünlər. Əvvəl qonşular, sonra polislər araya girdi. Zorla əllərindən aldılar məni.
-Salamın maşını haradadır?
-Polis bölməsinin həyətində. Dedilər, hələlik orada qalması lazımdır. Bayaq uşağı aparanda maşını da apardılar.
-Yaxşı, narahat olma, Salamı hamımız tanıyırıq, bilirik ki, başına belə bir hadisə gəlsə, heç vaxt qaçıb gizlənməzdi, ilk növbədə vurduğu adama kömək edər, səndən də bunu gizlətməzdi. Günahı yoxdursa, polislər hər şeyi aydınlaşdırıb buraxacaqlar.
-Dedilər, sübutlar var. Daha bilmədim nə subütlardı, demədilər. İndi mən neyləyəcəm, Bəxtiyar?
-Sakit ol. Axşamın xeyrindən səhərin şəri yaxşıdır. Sakit ol və keç evə, yoldaşına ürək-dirək ver. Yəqin səhər nəsə bilinər.
-Çox sağ ol, Allah hamınızın köməyi olsun, ay qonşular.
Qələndərdən ayrılıb evə qayıtdım. Görəsən bölmədə deyilən sübutlar nə sübutlardır?
Bunu sonraya saxlayaq. İndi bəzi şeyləri edib, getmək olardı. Yatarkən söndürmədiyim televizorun pultunu götürüb səsini minimuma endirdim. Sonra avtomatik sönmə rejiminə qoyub dörd saat vaxt müəyyən etdim. Əgər evim nəzarətdədirsə, qapıdan çıxmadığımı görən izləyicini televizorun işləməsi bir qədər də arxayınlaşdıracaqdı və evdə olduğuma əminliyi artacaqdı. Televizor isə gecə yarısı öz-özünə sönəcəkdi. Qoy fikirləşsinlər ki, yatmağa uzandım. Yəqin ki, mən təxminən həmin vaxt yatmağa uzanacaqdım. Ancaq başqa yerdə…
Hamının bir-birini yaxşı tanıdığı Dağlı məhəlləsində yad birinin saatlarla oturub müşahidə aparması real deyildi. Çünki ilk on beş dəqiqədə məhəllə kişiləri yaxınlaşıb yad adamın küçəmizdə dayanması səbəbi ilə maraqlanacaqdılar. Əvvəlcə çox nəzakətlə. Ancaq cavab tutarlı olmasaydı və adam burada dayanma səbəbini izah edə bilməsəydi, bu nəzakət bir anda başqa rəftarla əvəzlənəcəkdi.
Şəhər camaatı məhəlləmizin bu ənənələrinə bələd idi. Bunu yüz faiz bilən qarşı tərəfin də məhəlləyə burnunu soxmayacağını bilirdim. Deməli, əgər evim nəzarətdədirsə, yəqin ki bu, ətrafı hündürmərtəbəli binalarla əhatə olunmuş məhəlləmizdə məsafədən və xüsusi vasitələrlə edilir. Bunu müəyyən etmək heç də asan olmadığından evin izlənib-izlənilməməsini dəqiqləşdirməyə vaxt sərf edib özümü yormağı lazım bilmədim. Sadəcə arxa pəncərədən qonşunun damına, oradan isə arxa küçəyə keçib gedəcəkdim. Ona görə də havanın qaralmasını gözləmişdim.
Bu mənim üçün vacib idi. Çünki gecəni Gülanənin yanında qalmağı planlaşdırırdım. Gülanə ilə ailə kimi yaşayırdıq. Deyə bilərsiniz ki, niyə ailə yox, ailə kimi? Neçə illər əvvəl bir toy məclisində tanış olduğum bu qadının talelərimizi birləşdirməyə qərar verməsi üçün altı ay səbrlə gözləmişdim. Sonradan şəriətlə kəbin kəsdirib münasibətlərimizi rəsmiləşdirsək də hərənin öz evində yaşamaqda davam etməsinə yekdil qərar vermişdik. Bu yaşam tərzi, işimin xüsusiyyətini nəzərə alaraq mənim üçün çox əlverişli idi. Gülanə isə, sadəcə uzun illər tənha yaşayıb isinişdiyi evindən ayrılmaq istəməmişdi.
Dediyim pəncərədəki dəmir barmaqlıq çöldən heç nə ilə fərqlənməsə də, içəridən bir tərəfi petləli idi, digər tərəfi isə daxili qıfılla bağlanırdı. Qıfılı açdıqdan sonra barmaqlığı qapı layı kimi axıra qədər açmaq olardı. Mənə isə onu azca aralamağım bəs etdi ki, qonşunun damına düşüm. Əlimi uzadıb qıfılı yenidən bağladıqdan sonra pəncərəyə baxdım. İşığını söndürdüyüm evin pəncərəsində yalnız televizordan düşən işığın oynamasını görmək olardı.
Ayaq səslərim qonşunun evində eşidilməsin deyə, qır örtüklü damda bacardığım qədər ehtiyatla addımlayıb damın qonşu küçəyə birləşən kənarına çatdım. Damın kənarı ilə çəkilmiş yoğun qaz borusundan tutub aşağı sallandım və küçəyə düşdüm. Bu küçə başqa bir ara küçəyə, oradan isə əsas yola birləşirdi.
Gülanənin evi ikinci mikrorayanda idi. Yola çıxıb taksi saxlatdım və gedəcəyim ünvanın yaxınlığındakı başqa bir ünvanı dedim. Sürücünün başı ilə «əyləş» işarəsindən sonra maşına oturdum.
Axşamın bu saatında evdə olacağını bildiyim üçün gələcəyimi Gülanəyə deməmişdim. Bu qadının ən sevimli məşğuliyyəti ev işləri idi. Həftədə cəmi iki-üç dəfə baş çəkdiyimi bilsə də, hansı gün gələcəyimi bilmədiyindən hər gün iki nəfərlik yemək bişirir, yolumu gözləyirdi. Ancaq bir dəfə də olsun zəng edib gəlib-gəlməyəcəyimi soruşmamışdı, xasiyyətimi bildiyi üçün bunu öz ixtiyarıma buraxmışdı. Onu mənə daha da çox sevdirən cəhətlərindən biri də bu idi.
Hələ ki, yalnız izlənirdim, qarşı tərəfin hər-hansı aktiv addımı qeydə alınmamışdı və düşünmürəm ki, evimdə gecələməyim mənim üçün hansısa təhlükə anlamına gəlirdi. Sadəcə, ilk gündən «rəqib»lərimin əsəblərini oynatmaq qərarına gəlmişdim. Üstəlik də, gecə ya gündüz olsun, araşdırma zamanı sutkanın istənilən vaxtında vəziyyət kəskin dəyişə bilərdi və mən harasa getməli ola bilərdim. Bu qabaqlayıcı tədbirlə, lazım olan anda sərbəst hərəkət imkanlarımı özümdə saxlayırdım.
Fərziyyələrimdə yanılmırdımsa və qarşı tərəf həqiqətən də cinayət aləminin elitasına söykənirdisə, buna isə artıq şübhəm yox idi, bu halda Gülanənin evində qalmağım onun üçün heç bir təhlükədən xəbər vermirdi. Hətta nə yollasa yerimi öyrənmiş olsalar belə, bu aləmin qaydalarını bilən hər kəs bilirdi ki, ailə üzvləri toxunulmazdır və onları hansısa məsələlərə qatmaq olmaz.
Ancaq istənilən halda, neçə illər ərzində varlığından çox az adamın xəbəri olan qadınımın ünvanını kimlərinsə tanıması planlarıma daxil deyildi və pəncərədən çıxaraq getməyimin bir səbəbi də bu idi.
-Çatdıq, qardaş.
-Çox sağ olun, buyurun pulunuzu çıxın.
Sürücü uzatdığım onluğu alıb bir beşlik qaytardı. Sağollaşıb maşından düşdüm. Buradan Gülanənin evinə qədər yüz-yüz əlli metr məsafə olardı.
Əvvəlcə yol kənarındakı mağazaya girdim. Səhv eşitmədiniz, məhz mağazaya. Məni üzdən tanıyan satıcı içəri girdiyimi görcək gülümsədi. O, obyektinin üzərində market yox, mağaza yazıldığı üçün yolum düşdükcə hər dəfə onunla alış-veriş etdiyimi bilirdi.
Bilmirəm mağaza sözü hansı səbəbdən market sözü ilə əvəzləndi və demək olar ki, doğma dilimizə uyğunlaşmış bu sözü az qala tamamilə leksikonumuzdan çıxardı. Ancaq onu bilirəm ki, milyon market ola, bircə mağaza, mən alış-verişi «mağazamız»dan edəcəyəm. Eksperiment üçün evinizdəki kiçik uşaqlara sual verin, görün mağazanın nə olduğunu bilirlərmi? Ancaq marketi hamısı bilir… Başqa dilləri bilmək çox yaxşıdır. Ancaq doğma dilimiz hər şeydən üstün olmalıdır bizimçün.
Bəlkə də razılaşmayacaqsınız. Ancaq mən düşünürəm ki, vətən sevgisi də, millət sevgisi də ən kiçik şeylərdən başlayır…
Gülanə ilə tanışlığımızdan sonra çox sevdiyim «Yubiley» peçenyesini ona da sevdirmişdim. İki qutu peçenye alıb, satıcı ilə sağollaşdım və binaların arası ilə gedəcəyim ünvana tərəf yan aldım.
Qapının üç qısa zəngi mənim gəlişimi bildirirdi. Açarım olsa da, həmişəki kimi zəngi basıb gözlədim. Gülanənin qapını açması heç on saniyə çəkmədi.
-Cənab detektiv?
-Bəli, xanım.
-Xoş gəlmisiniz. Buyurun içəri.
-Təşəkkür edirəm.
Bu aramızda öz-özünə yaranmış özünəməxsus danışıq tərzini heç vaxt dəyişməzdik.
İçəri keçib, qapını örtdüm. Gülanə məni qucaqlayıb başını sinəmə sıxdı. Onun üçün çox darıxsam da zarafatla çiyinlərindən tutub özümdən araladım:
-Elə şey yoxdur, əvvəlcə yemək ver. Bilirsən ki, ac kişini yola gətirmək çətindir.
Gülanə qəhqəhə çəkdi:
-Keç əllərini yu, ac kişi.
Bayaqdan əlimdə tutduğum peçenyeləri Gülüyə verib, ayaqqabılarımı çıxardım, başmaqlarımı geyib hamamxanaya keçdim.
-Elə bil ürəyimə dammışdı ki, gələcəksən. Qəşəng plov dəmləmişəm, qarası da yanında, qızsın gətirirəm, - mətbəxdən Gülünün səsi gəldi.
Mən yeməyə çox tələbkar deyildim, pendir-çörək, yaxud kabab yeməyin mənim üçün heç bir fərqi yox idi. Ancaq yeganə sevdiyim yemək var idi ki, o da üstü qaralı, xüsusilə də şabalıdı çox, düyüləri dən-dən olan zəfəranlı plov idi. Uşaqlıqdan anamın bişirdiyi plovu necə sevmişdimsə, tox olarkən bircə artıq tikəyə əl uzatmadığım halda, qarşıma plov gələrdisə, heç vaxt imtina etməzdim. İndi isə çox ac idim. Gülünün plovuna isə söz yox idi.
Otağa keçəndə süfrədə hər şeyin hazır olduğunu gördüm. Çörək, göyərti, turşular, pendir, iki qrafində su və kompot, stəkan və boşqablar… «Görəsən bu şeylər əvvəldən süfrədə idi, ya mən əllərimi yuyanadək düzüldü?» sualını öz-özümə versəm də, cavabını tapa bilmədən keçib süfrəyə əyləşdim.
-Diqqət, məclisə aş gəlir!
Gülü şıltaq-şıltaq gülüb, əlində buğlanan plov dolu buludla mətbəxdən gəldi. Buludu əvvəlcədən boş saxladığı yerə, süfrənin düz ortasına qoydu. Həmişəki kimi gəlişimə necə sevindiyini gizlətmək istəmirdi Gülü.
Birlikdə olduğumuz illərdə, uşaq kimi sadəlövh olan Gülünün qəlbinə dəyəcək ən xırda bir hərəkətə də yol verməmişdim. Hansısa ağıllı adam qadını yaxşı köklənmiş royala, kişini isə barmaqlarını bu royalın dillərində gəzdirib qadının ən gözəl duyğularını oyatmağı bacaran ifaçıya bənzədib.
İllərdir gözü hər gün qapıda qalan, heç vaxt həftənin hansı günü və saat neçədə gələcəyimi, gecəni yanında qalıb-qalmayacağımı bilməyən bu sevimli qadının dilinə gətirdiklərindən çox, susduğu şeyləri necə də anlayırdım…
-Nuş olsun, cənab detektiv.
-Sağ olun, xanım, əlinizə sağlıq.
Bismillah deyib, boşqabımı ağzınacan doldurub qabağıma çəkdim…
Davamı var
“Ədəbiyyat və incəsənət”
(20.06.2023)
Eyni ssenari üzrə 2 pərdəli dram
Bu dramda rolları Xocavənd və Zərdab sakinləri oynayırlar, ssenarist isə Polis orqanlarıdır.
Beləliklə, “Ədəbiyyat və incəsənət” portalı sizə iki eyni mövzulu xəbəri çatdırır. Xəbərlər Daxili İşlər Nazirliyinə istinad edir.
1-Cİ PƏRDƏ: XOCAVƏND
Xocavənd meşəsi. Günün günorta çağı.
Xocavənd Rayon Polis Şöbəsinin əməkdaşlarının keçirdikləri tədbir zamanı rayonun Tağaverd kəndi ərazisindəki meşə massivində yabanı halda bitən, çəkisi 1 ton 500 kiloqram olan 5000 ədəd çətənə bitkisi kökündən çıxarılıb və yandırılaraq məhv edilib.
2-Cİ PƏRDƏ: ZƏRDAB
Zərdab rayonu. Axşamüstü.
Zərdab Rayon Polis Şöbəsinin əməkdaşları tərəfindən “Xaş-xaş 2023” şərti adlı kompleks profilaktik tədbirlər planına uyğun olaraq keçirilən əməliyyat-axtarış tədbirlər nəticəsində yabanı halda bitmiş narkotik tərkibli bitkilər aşkar edilib.
Keçirilən tədbirlər zamanı Kür çayının rayonun Bıçaqçı kəndi ərazisindən keçən hissəsinin sahilində yabanı halda bitən, ümumi çəkisi 1 ton 457 kiloqram olan 1965 ədəd çətənə kolu kökündən çıxarılıb və yandırılaraq məhv edilib.
FİNAL
Narkotiklərlə hamılıqla mübarizə aparaq. O çox sürətlə hücuma keçib. Şəhər-şəhər, kənd-kənd dağıdır, məhv edir. Xüsusən gənclərimiz ağ ölümə tuş gəlməkdədir. İyunun 26-sı bu dəhşətli bəla ilə mübarizə günüdür. Hər kəs bir tanıdığı narkomanı ən azı danlağa tuş eləsin!
“Ədəbiyyat və incəsənət”
(20.06.2023)
