Super User
“Hallüsinasiyanın oğruları” – Kubra Quliyevanın hekayəsi
“Ədəbiyyat və incəsənət” portalı gənc yazar Kubra Quliyevanın esse və hekayələrinin dərcini davam etdirir. Bu dəfə sizlərə “Hallüsinasiyanın oğruları” hekayəsi təqdim ediləcək.
Yorğunluqdan göz qapaqlarım yumulurdu və tələm-tələsik çarpayıma uzandım. Xoş xəyallarla yuxuya dalacağımı düşünürdüm...
Tam əksi, gözlər yumulur, özümü bir xarabalığda tapıram. İlk dəfə idi belə bir bina görürdüm mən, düz uçurum kənarında hündür, doqquzmərtəbəli, uçuq-sökük binanın 4 ya 5-ci mərtəbəsində idim. Ətrafa göz gəzdirdim. Qorxudan sinəm sıxılır, nəfəsim daralırdı, hər yerdə keçmişimlə bağlı xatirələr var idi sanki. Azca külək əsən kimi bütün bina lərzəyə gəlirdi adəta, qaçmağa, uzaqlaşıb canımı xilas etməyə çalışırdım, amma hansısa bir qüvvə özünə doğru çəkirdi məni.
Gözlərim yenə yumulur və açılır.
Uzun müddət yan-yörəmi gözdən keçirdim bir daha. Yerdə içki şüşələri və qan damcıları var idi. Diqqətlə və ürkək baxışlarla ətrafı nəzərdən keçirdim. Qışqırmağa, səsimi çıxarmağa çalışdım, amma sinəmin üstündə bir ağırlıq çökmüşdü sanki. Avazım çıxdığı qədər çığırsam da, heç nə eşidilmirdi. Öz çığırtılarım içimdə boğulduqca özümü havalanacaq dərəcəyə çatmış kimi hiss edirdim. Birdən gözüm sökülmüş pəncərəyə sataşdı. Pəncərənin küncünə düzülmüş bir xeyli şəklim var idi. Uşaqlığım, məktəb illərim və gəncliyim fotoşəkillər arasından gülümsəyirdi mənə.
Birdən gözüm bir şəklə sataşdı və ilk dəfə idi ki, səsim əks-səda verərək eşidildi.
Ağlayırdım, nəfəs almadan ağlayırdım, gördüyüm şəkil hər şeyi izah edirdi mənə.
Şəkildən mənə baxan babamdı və qucağında olan da mən idim.
Əsl xoşbəxtlik nədir desələr şəkildə gülümsəyən bu iki cüt gözü göstərərdim yəqin ki.
Birdən ağlamağım kəsildi və qeyri-ixtiyari yuxarı mərtəbəyə doğru qaçmağa başladım. 7-ci mərtəbəyə qalxanda geniş mətbəxdən mənə gülümsəyən anamı gördüm. Bir dəqiqə...
Yox-yox, dayanmaq olmazdı, mətbəxdən gələn bihuşedici ətri də geridə qoyub yuxarı qalxdm, tam 9-cu mərtəbəyə.
Budur, baba orda idi və məni gözləyirdi.
Siması son günlərinin əksinə, çox gözəl idi, şəkillərdən gülümsəyən adam indi canlı-canlı qarşımda idi..
-Axı, axı, axı sən, ssəən axıı...
-Hə, mən ölmüşdüm.
-Baba, məni niyə qoyub getdin?
-Burdayam, gözəlim, burdayam, getmədim heç yerə.
-Baba, nə olar, bir dəfə qucaqlasam səni, axı nə olar?
-Olmaz qızım, olmaz, sənə demişdim axı, yaşamalısan sən.
-İstəmirəm, istəmirəm, sənsiz yaşamaq istəmirəm mən.
-Öyrəşməlisən, mənsizliyə də, mənnən sonra həyatına gəlib gedəcək olan hər kəsin yoxluğuna da öyrəşməlisən. Biraz yaxınlaş və qarşıdakı güzgüdən özünə bax.
-Baxdım.
-Nə görürsən orda?
-Aşağı mərtəbələri və yuxarını.
-Təsvir elə, aşağı və yuxarını.
-Bax, baba, aşağı çox pisdi, qırıq sökük, uçurum və vahimə doludu.
-Bəs yuxarı?
-Yuxarı isə tam əksinə parlaqdı, işıqlıdı, geniş və hüzur doludu.
-Afərin, gözəlim mənim, gəl indi baba sənə izahını versin bu güzgüdəki əksinin.
Bu uçurum kənarındakı bina tamamilə sənə aiddi. Sən və daxili aləminin yanıması kimi düşün. Aşağı mərtəbələr sənin keçmişində yaşadığın mənfi xatirələr və acı səhnələrdir.Yuxarı qatlar isə özünü yetişdirib həyatı dərk etdiyin çağlarda qazandığın uğurları, çatdığın hədəfləri əks etdirir. Sən hal-hazırda bu iki qat arasında bir boşluqdasan, amma bir şeyi düşün, yuxarı qalxanda heç bir pilləkən olmadan havalana bildin sən. Səncə, bunu necə bacardın?
-Necə?
-Məqsədin məni görmək idi və yuxarıda bir yerlərdə mənim səni gözlədiyimi bildiyin üçün heç nə düşünmədən düz yuxarı havalandın sən. Yaşadığın həyat da eynilə belə olacaq, mənim gözəlim. Məqsədlərinə çatmağa çalışdıqca pilləkənlərə və maneələrə əhəmiyyət verməyəcək, dümdüz hədəfə yol alacaqsan.
-Baba..
-Tezdi, qızım, hələ çox tezdi, geri dönüb təslim olmaq üçün çox tezdi, amma hədəflərinə çatmaq üçün qarşında böyük bir cığır açılıb. Hər çöküşündə məni və verdiyin sözləri xatırla. Məni heç vaxt unutma, mən sən qalxdıqca yuxarılarda olacaq və bir gün sənin gəlişini gözləyəcəyəm.
-Ba-ba-ba babaaaa.
***
Uçurumun kənarına gəlirəm, binanın ən hündür mərtəbəsindən aşağı baxanda hər şeyin o qədər qorxunc olmadığının fərqinə varıram.
3,2,1 – budur, möhtəşəm uçuşum gerçəkləşdi. Uçurumun təpəsindən ən dərininə doğru uçuşum reallaşmışdı artıq.
***
Neçə gün yatmışam, necə yatmışam, xəstəxanada nə işim var, əllərim niyə sarğıdadı, bilmirəm, amma gözümü açıb həkimin xoş simasını görəndə sevindim.
Ölməmişdim, əksinə, ruhumu arındırıb yenidən doğulmuşdum mən.
Budur həyat, budur azadlıq, budur xoşbəxtlik.
Bəli mən buyam, küllərindən doğulan Semiramidayam mən.
“Ədəbiyyat və incəsənət”
(17.08.2023)
Yazı yazmağa bu qədərmi qeyri-ciddi baxırsınız?
Redaksiyaya yazı göndərən müəlliflərin nəzərinə!
Əziz müəlliflər. Poçtumuzda hər çün daha çox müəllif məktublarına rast gəlirik. Sizlər hansısa xəbəri, bədii yaradıcılıq nümunələrinizi bizə yollayıb dərcini xahiş edirsiniz.
“Ədəbiyyat və incəsənət” sizin xəbərlərinizi BİZƏ YAZIRLAR, bədii nümunələrinizi isə OXUCULARIMIZIN YARADICILIĞI rubrikalarında mütəmadi dərc edir. (Əlbəttə ki, burda söhbət peşəkar jurnalist və yazıçılardan getmir, həvəskarlardan gedir).
Amma çox təəssüf ki, əksərən yazılar qüsurlu, redaktəsiz, korrektə səhvləri ilə dolu gəlir. Email vasitəsilə göndərilən yazını məktubun “mövzu” hissəsinə yükləyənlər, yazını pdf formatında göndərənlər, hətta əllə yazılan yazının telefonla şəklini çəkib yollayanlar da olur.
Xahiş edirik ki, yazınızın dərcini istəyirsinizsə, lütfən qaydalara əməl edin.
Müəllifin özü haqda qısaca bilgi və fotonu əlavə etməklə yazını Word formatında, Times New Roman qarniturunda, 12-lik şriftlə göndərməsi mütləqdir.
Sizə bol oxucu arzulayırıq!
“Ədəbiyyat və incəsənət”
(17.08.2023)
“Çörək atlı, biz piyada, pul qaçaq...” – Əvəz Qurbanlının şeirləri
“Ədəbiyyat və incəsənət” portalının “Ulduz” jurnalı ilə birgə Biri ikisində layihəsində növbəti üç gündə sizlərə Əvəz Qurbanlının 14 şeirini təqdim edəcəyik. Hamısını birdən niyə vermirik? Çünki şeir çox olanda dadı-duzu qaça bilər.
TAPILDI
Kimsə anlamadı itirdiyini,
Bir şair evində ölü tapıldı.
İntihar məktubu axtarırdılar,
Cibində beş qəpik pulu tapıldı...
Arsız qapılarda dabanı çıxdı,
Mədəni bildiyi yabanı çıxdı.
Evindən yarımçıq divanı çıxdı
Qalan əşyaların külü tapıldı.
Dünya dilindəki sözə dəymədi,
Ona atılanlar sizə dəymədi.
“Nekro-gicləmələr” gözə dəymədi,
Qəddar səssizliyin dili tapıldı...
Bəlkə, bir gecəsi min aya düşdü?
Bir sözü min dənə mənaya düşdü.
Yoxsa şəhid oldu, minaya düşdü?
Hansısa şeirdə qolu tapıldı...
Bitdi o günəşin vaxtı o gecə,
Bir ulduz göylərdə axdı o gecə.
Bir bulud doyunca yağdı o gecə,
Bir cüt də göz vardı, dolu tapıldı...
OLMUŞAM
Demirəm ki, uçan evin dirəyi,
Damsız evin təzə damı olmuşam.
Hamı kimi yaşamışam həyatda,
Adam-adam gəlib hamı olmuşam.
Beyin yorub, tökməmişəm tər sözə,
Sevib könül bağlamışam zər sözə.
Nə yaxşı ki, inanmışam hər sözə –
Avamların ən avamı olmuşam...
Özü gəlib qafiyələr, rədiflər,
Sıxıb məni yalan-yuluş təriflər.
O qədər söz veriblər ki, hər(i)flər
Axır dönüb söz adamı olmuşam...
GÖTÜRMÜRƏM
Çətini ilhamım coşanacandı,
Söz üçün üz qoyub, üz götürmürəm.
Sənətdə öz yolum, öz cığırım var,
Kiminsə yolundan iz götürmürəm.
Demirəm dünyanın gözü məndədi,
Bütün ölçülərin düzü məndədi.
Çox da ataların sözü məndədi,
Bəzən atamdan da söz götürmürəm.
İmanım, əqidəm, sözüm, əməlim
Üst-üstə düşürsə – düzdür təməlim.
Payımdan artığa uzanmaz əlim,
Ancaq payımdan da az götürmürəm.
Sözü doğru yerə yozanam mən də,
Elimin dərdini yazanam mən də.
Götürsən aşığam, ozanam mən də,
Nə olsun, əlimə saz götürmürəm?
Həyat sərt oyundu, şux oynamışam,
Bəzən ac olsam da, tox oynamışam.
Hər sözün nazıyla çox oynamışam,
Hər qızın nazından naz götürmürəm.
Bu başıdaşlıya neyləyər o daş?
Nə yaşım o yaşdı, nə başım o baş.
Gözün götürmürsə, məndən uzaqlaş –
Mən həssas adamam, göz götürmürəm!
DAŞ BAŞA DÜŞÜR...
Başımı itirrəm, çaşıb qalıram,
Haçan ki, bir işim çaşbaşa düşür.
Başını başlara qoşan da gəlir,
Tərslikdən mənimlə baş-başa düşür.
Tıxa qulaqları, boşa danışım,
Yüz dəfə qayıdım başa, danışım,
Buraxın, dərdimi daşa danışım
Təkcə xarabada daş başa düşür...
Kiridin Əvəzi, bəsdi zığıdı!
Bilmirəm yenə də nə dığ-dığıdı...
Əsas bir adamın razılığıdı –
Çağır gör neçəsi "daşbaş"a düşür...
SAXLAYA-SAXLAYA
Mizan vardı, düzən vardı qabaqlar,
Yol bilənə yol saxlaya-saxlaya.
Qaçaq vardı, ozan vardı qabaqlar,
Dolanardı el saxlaya-saxlaya.
Mizan itib, düzən pozuq, el qaçaq,
Gecə-gündüz qaçdığımız yol qaçaq.
Çörək atlı, biz piyada, pul qaçaq,
Dirəşirik hal saxlaya-saxlaya.
Çox öyünmə, çox da karvanbaşısan,
Yorularsan, karvan yükü daşısan.
Görürəm ki, bu yollarda naşısan,
Sür dalımca, gəl saxlaya-saxlaya.
Xarabada pis nə desən, istə – var,
Haya qaçan, küyə gedən dəstə var.
Çəpişimə qızırğanan xəstə var,
Qapısında fil saxlaya-saxlaya.
Get toyuğa, yumurtaya şükr elə,
Səhər yatıb, günortaya şükr elə.
Gecə-gündüz düş ortaya, şükr elə,
Can saxladın mal saxlaya-saxlaya.
Şükr elə ki, hələ canın diridi,
Dilə gəlib danışmağın yeridi?
Lal olmuş da ağzımızda kiridi
Hər nadana dil saxlaya-saxlaya.
Qorxdum, yoxsa heyfim gəldi barıta?
Qaldı düşmən donuzları darıda.
Qoydum bütün işlərimi yarıda
Dur deyənə əl saxlaya-saxlaya.
Gözlərimin qarasını ağ alar,
Bu yaralar, bəlkə, bir gün sağalar.
Nə iş görür qapındakı ağalar?
Mənim kimi qul saxlaya-saxlaya?
Day neynirəm quru əhdi, boş andı?
Olan oldu, yaşananlar yaşandı...
Neçə-neçə ailələr boşandı
Ər qıraqda dul saxlaya-saxlaya.
Ətəklərdən daş saldıra bilmədim,
Oynatdılar, qol qaldıra bilmədim.
Arzulara toy çaldıra bilmədim
Ümidlərə il saxlaya-saxlaya.
Yaş da gəlib qırx altını haqlamış,
Can evinin sütunları laxlamış...
Can da evdən çıxmır, Allah saxlamış,
Yaşa Əvəz, öl saxlaya-saxlaya.
“Ədəbiyyat və incəsənət”
(17.08.2023)
Bu gün Bodrumda musiqi bayramıdır
DÜNYACA MƏŞHUR ROBBİ UİLYAMS KONSERT VERƏCƏK
Dünyaşöhrətli britaniyalı müğənni, 85 milyon albom satmış Robbi Uilyams bu gün - avqustun 17-də Bodrumda - ultra lyuks Lujo otelində konsert verəcək.
Məşhur müğənni konsert zamanı populyar mahnılarından - Let Me Entertain You, Millennium, Supreme, No Regrets, Angels -
əlavə, əfsanəvi “Feel” adlı əsərini də ifa edəcək.
Konsertin təşkil olunacağı otelin saytında verilən açıqlamada oteldə qalanların ödəniş etmədən konsertdə iştirak edə biləcəkləri qeyd olunub.
Konsert biletinin 17 min 600 lirəyə (1105 manat) satışa çıxarıldığı da bildirilib.
Lujo oteli Bodrumda nömrə bir olmağa can atır, dünyaşöhrətli Robbi Uilyamsı da prestij xatirinə gətirib.
Konsertə biletlər o cümlədən Azərbaycanda da satılır. iTichket.az ölkəmizin varlı təbəqəsini Bodruma dəvət edərək kifayət qədər bilet satıb.
“Ədəbiyyat və incəsənət”
(17.08.2023)
Kanadada Heydər Əliyevin 100 illiyinə həsr olunmuş konsert keçiriləcək
Kanadanın Ontario əyalətində yerləşən Niaqara-Fols şəhərindəki “Mount Carmel Spiritual Centre” konsert zalında avqustun 26-da Azərbaycan xalqının Ümummilli Lideri Heydər Əliyevin 100 illiyinə həsr olunmuş konsert təşkil ediləcək. Heydər Əliyevin milli incəsənət və onun incisi olan Azərbaycan muğamının ölkə hüdudlarından kənarda da tanınması və ən geniş mədəni ictimaiyyətin qəlbini fəth etməsi üçün əlindən gələni etməsi, Azərbaycan mədəniyyətinə daim diqqət və qayğı göstərməsi barədə məlumatı olan Beynəlxalq Niaqara Musiqi Festivalının (“Music Niagara Festival”) rəhbərliyi onun xatirəsini anmaq, əlamətdar Beynəlxalq Azərbaycan Muğamı Gününü (“International Day of Azerbaijani Mugham”) Ulu Öndərin 100 illik yubileyinə həsr etmək qərarına gəlib.
Bu barədə AzərTAC-a “Music Niagara Festival”ın “İpək yolu” komitəsinin sədri, Kanadada “Mədəniyyətlərin və sivilizasiyaların dünya irsi” devizi altında fəaliyyət göstərən Heydər Əliyev Mərkəzinin prezidenti, Azərbaycanın Əməkdar incəsənət xadimi İsmayıl Hacıyev bildirib.
“Azərbaycan muğamı bütün dünyada təntənəli surətdə və qalibiyyətlə irəliləyir və dünyanın ən geniş mədəni ictimaiyyətinin rəğbətini qazanır. Azərbaycan Prezidenti İlham Əliyev Heydər Əliyevin bütün sahələrdə, ilk növbədə, mədəniyyət sferasında böyük ənənələrini davam etdirərək və zənginləşdirərək Azərbaycanın dünyanın əsas mədəniyyət paytaxtlarından birinə çevrilməsi üçün əlindən gələni edir.
Bu gün muğam bütün bəşəriyyətin nemətinə çevrilib ki, bu da Azərbaycanın birinci xanımı Mehriban Əliyevanın xidmətidir. Mehriban xanımın beynəlxalq fəaliyyəti Azərbaycan muğamının qədim yüksək mənəvi sənətinin inkişafına və tərəqqisinə, onun qədim ifa ənənələrinin dirçəldilməsinə məqsədyönlü şəkildə istiqamətlənib”, - deyə İ.Hacıyev qeyd edib.
Dünyanın unikal möcüzəsi olan Niaqara şəlaləsinin yaxınlığındakı nüfuzlu “Mount Carmel Spiritual Centre” konsert zalında keçiriləcək tədbir Azərbaycanın təkcə hərbi-siyasi müstəvidə deyil, eləcə də beynəlxalq mədəniyyət cəbhəsində ön mövqedə qələbəsinin bariz nümunəsidir.
“Kanadada Heydər Əliyev Mərkəzinin “Mədəniyyətlərin və sivilizasiyaların dünya irsi” adlı devizini diqqətə alaraq biz müxtəlif ölkələrdən olan musiqiçiləri konsertimizdə iştirak üçün dəvət etmək və tədbiri “One World Family” şüarı altında keçirmək qərarına gəldik. Konsertdə əsasən Böyük İpək yolu üzərində yerləşən ölkələrdən olan nümayəndələr – Çin, Hindistan, türk və İran əsilli musiqiçilər iştirak edəcəklər.
Diasporla İş üzrə Dövlət Komitəsinin dəstəyi ilə keçiriləcək konsertdə Bakıdan istedadlı musiqiçi Elnur Mikayılov da iştirak edəcək. Elnurun kamançada ifasını əks etdirən yazıları onu dinləyən Niaqara festivalının direktorlar şurasının böyük rəğbətini qazanıb”, - deyə “İpək yolu” komitəsinin sədri bildirib.
“Ədəbiyyat və incəsənət”
(17.08.2023)
“Ad günümdür bu gün. Çoxlu-çoxlu təbrik edin, tərifləyin məni”
Elman Eldaroğlu, “Ədəbiyyat və incəsənət”
Deyir ki;- “Poeziyaya gələndə hərfləri təzə öyrənmişdim. Bir dəfə rəhmətlik atamla o zamanki yeganə televiziya kanalı, Az tv-ni izləyirdik. Məktəbli bir qız Bəxtiyar Vahabzadənin "Ana" şeirini söyləyirdi. Atam köks ötürüb dedi ki, kaş mənim də üç övladımdan biri şeir yazardı. Dedim, nə var ki, şeir yazmağa. Mən yazaram. Elə o vaxtdan, hər gecə atam zavoddan yorğun işdən gələndən sonra, rəsm albomuma yazdığım “şeirlərimi” atama oxuyurdum. Sonra uzun illər yazmadım.”
Onu “Facebook” sosial platformasından tanıyıram, necə deyərlər, üzünü görmədiyim dostlarımdandır. Heç bilmirəm, harada çalışır, nə işlə məşğul olur, bircə onu bilirəm ki, gənc şairlərdəndir.
“Asosial insanam, özümü sosial şəbəkələrdə daha rahat ifadə edə bilirəm. Qoy, elə aktivliyim də, “məşhurluğum” da sosial şəbəkədə qalsın. Həmişə deyirəm ki, mən dördayaqlılardan yox, ikiayaqlılardan qorxuram. Düzdür, meşədə ayı ilə rastlaşsaydım, bəlkə də qorxardım. Adətən xanımlar, itdən, pişikdən qorxurlar. Amma onlara deyirəm, qorxmayın, rahatlıqla keçin gedin. Siz heyvanlara dəyməsəniz onlar sizə toxunmazlar.”- söyləyir.
Şairi tanımağa nə var ki? Yetər ki, bir neçə şeirini oxuyasan. Mən də sosial şəbəkədən onun bir neçə şeirini tapıb oxudum. “Şəhid evi” şeirində yazır:
Mən elə bir məmləkətdə doğuldum ki,
Gənc ömürlər, yarpaqlardan öncə solur.
Köçəri quşlardan öncə, şəhidlər uçur cənnətə
Belə gəlir payız fəsli bu yerlərə.
Bahardan doymayan pöhrələr…
Atadan doymayan körpələr…
Xəzan anaların saçından başlayır burda.
Torpaq ataların ürəyindən başlayır çürüməyə…
Mən elə bir məmləkətdə doğuldum ki,
Şəhid evləri, UÇUQ-SÖKÜK damlardan asılmış
TƏZƏ bayraqlardan bəlli olur...
Mən elə bir məmləkətdə doğuldum ki,
Kişilər ya şəhid olur ölür,
Ya da utandığından ölür...
Bu gün yaşadığımız həqiqətləri gözəl ifadə etməyibmi? Bu poeziya nümunəsində həm giley-güzar, həm biganəlik və həm də qeyrət hiss olunmurmu? Və ya məhəbbət şeirlərindəki həsrət yanğısını duymamaq mümkün deyil. Obrazlı desək, sanki bu yanğını təsəllinin vasitəsilə soyutmağa çalışır. Və “Soyuq əllər” şeirində yazır:
Ayrı-ayrı yaşayırıq,
Eyni hava, eyni şəhər
Sən o yanda, mən bu yanda
Eyni gecə, eyni səhər.
İsitdiyin əllər indi
Soyuqdur sənsiz boş qalıb
Barmağının ucunadək
Darıxıram, yada salıb.
Bir çırpınır iki ürək,
Gecələrin birindəyik
Buludlar da sevdamıztək
Qaralıb, qəm içindəyik.
Pay gətirir sənə yellər
Dəli bir eşq, şirin yuxu
Məndə qalsın soyuq əllər
Yuxusuzluq, bir də qoxun...
Deyir ki;- “Bir dəfə sosial şəbəkədə də bununla bağlı paylaşmam vardı: Elə etki, bir də şeir yazmayım, mən xoşbəxt olanda yaza bilmirəm. Yazmasam, demək ki, başım xoşbəxtliyimə qarışıb. Təki xoşbəxt olaq, bütün xanımlara, bunu arzu edirəm.”
Bəlkə də bu söhbəti heç açmazdım. Şəxsən tanımıram deyə, haqqında danışmağa sözüm çox azdır. Onun “Facebookda” indicə paylaşdığı- “Ad günümdür bu gün. Çoxlu-çoxlu təbrik edin, tərifləyin məni”- sözləri bir kövrək ruhlu şair xanımın səmimiyyətinə biganə qala bilmədim. Yəqin ki, o, sizin də dostluğunuzda var- Günel Balakişini deyirəm...
“Nifrət ürəkdə qalmağın bir formasıdır. Sevgimin ən çarəsiz halında nifrətinə də razıyam, Zeyd. Sevmirsənsə, nifrət et. Yetər ki, unutma məni, Zeyd.
Nifrət ümiddir. Nifrət nə zamansa yenidən sevilmək ehtimalıdır. Unudulmaqsa sondur. Unutma məni, Zeyd, unutma...”- söyləyir…
Təbrik edirik!
“Ədəbiyyat və incəsənət”
(17.08.2023)
6-cı ANİMAFİLM Beynəlxalq Animasiya Festivalının proqramı üç hissədən ibarət olacaq
Mədəniyyət Nazirliyinin dəstəyi və Azərbaycan Animasiya Assosiasiyası və “PERİ FİLM” MMC-nin təşkilatçılığı ilə uşaqlar və böyüklər üçün nəzərdə tutulmuş ənənəvi 6-cı ANİMAFİLM Beynəlxalq Animasiya Festivalı sentyabrın 6-dan sentyabrın 10-dək Nizami Kino Mərkəzində keçiriləcək. Artıq festivalın bilet satışına başlanılıb.
Festivalın direktoru, Azərbaycan Animasiya Assosiasiyasının sədri Rəşid Ağamalıyev bilet satışından əldə olunacaq bütün gəlirin qadın rejissorlara dəstək məqsədilə ianə ediləcəyini bildirib.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, 6-cı ANİMAFİLM Festivalına üç əsas proqram daxildir. Festivala 46 ölkədən daxil olan 174 film arasından seçim komissiyası müsabiqəyə 13 ölkədən 39 film qəbul edilib. Həmin filmlər 2 beynəlxalq və 2 yerli kateqoriyalar üzrə yarışacaq. Bütün seçilmiş filmləri beynəlxalq münsiflər və uşaq tamaşaçılar qiymətləndirəcək və qaliblər festivalın bağlanış mərasimində mükafatlandırılacaq. Festivalın mükafat fondu 2,3 min ABŞ dolları təşkil edir.
Festivalın müsabiqədənkənar proqramında “Qadınların qadınlar üçün çəkdiyi filmlər” proqramı, Yaponiyanın “Ghibli” studiyasının “Oskar” mükafatına namizəd “Qırmızı tısbağa” (“The Red Turtle”) və “Oskar” mükafatı qazanmış “Ruhlarla sovrulanlar” (“Spirited Away”) tammetrajlı filmləri, mükafata layiq görülmüş Hindistan animasiya filmləri nümayiş etdiriləcək.
Qeyd edək ki, “Qadınların qadınlar üçün çəkdiyi filmlər” tədbirində İranda etiraz aksiyaları zamanı təhlükəsizlik qüvvələri tərəfindən qətlə yetirilmiş Hədis Nəcəfi haqqında çəkilmiş “Hədis” filmi, müsəlman aləmində demokratik yolla seçilmiş ilk müsəlman qadın millət vəkili Pərixanım Sofiyeva haqqında gürcü filmi nümayiş etdiriləcək.
Festivalın peşəkarlar üçün proqramı çərçivəsində yerli animasiya film layihələri təqdim olunacaq və beynəlxalq münsiflər heyəti, eləcə də xüsusi qonaqlarla görüşlər, ustad dərsləri və vörkşoplar təşkil ediləcək. Proqram çərçivəsində “Oskar” mükafatı qazanmış rejissor Michaël Dudok de Vittin, kanadalı animator Matthev Lyonun master-klasları, uşaqlar üçün isə gürcüstanlı rejissor Ana Chubinidze və hindistanlı Tehzeeb Khurana animasiya vörkşopları keçirəcək.
Animasiya peşəkarları üçün proqram çərçivəsində bu il bir sıra qapalı tədbirlər də təşkil olunacaq. Bunlara İsveçrə İnkişaf və Əməkdaşlıq Agentliyinin dəstəyi ilə həyata keçirilən “Animasiya filmləri vasitəsilə qadın haqları” adlı vörkşop və maliyyə proqramı layihəsinə seçilmiş 5 qadın rejissor üçün avropalı mentorlar — isveçrəli rejissor İsabelle Favez, fransalı prodüser Olivier Catherin ilə təlimlər, individual görüşlər daxildir. Seçilmiş animasiya layihələri “ANIMAFILM School: Pitçinq müsabiqəsi”ndə ictimaiyyətə təqdim olunacaq. Pitçinq müsabiqəsində izləyici kimi hər kəs iştirak edə bilər.
Festivalın gedişində, həmçinin Azərbaycan milli animasiya sənayesinin kommersiyalaşdırılması və ixrac imkanları perspektivləri mövzusunda dəyirmi masa təşkil olunacaq.
Həmçinin, Azərbaycan kinosunun 125, Cəfər Cabbarlı adına “Azərbaycanfilm” kinostudiyasının yaradılmasının 100 illiyi münasibətilə “Klassik Azərbaycan animasiya filmləri” tədbirində milli animasiyamızın inciləri olan filmlərin nümayişi keçiriləcək.
“Ədəbiyyat və incəsənət”
(17.08.2023)
Beynəlxalq festivalın möhtəşəm yekunu: Əyyub Quliyev tamaşaçıları valeh etdi
Almaniyanın mədəniyyət mərkəzlərindən sayılan Bavariyanın Badendorf şəhərində “İmmlinq” Beynəlxalq Opera Festivalının bağlanış mərasimi keçirilib.
Mərasimdə “Bavariya” Festival Orkestri üç müxtəlif ölkənin tanınmış dirijorunun rəhbərliyi altında çıxış edib.
Festivalın bədii rəhbəri Korneliya fon Kersenbrok (Almaniya/Avstriya), Azərbaycan Dövlət Opera və Balet Teatrının baş dirijoru və musiqi rəhbəri, Əməkdar artist Əyyub Quliyev və Gürcüstan Dövlət Konservatoriyasının professoru Mixail Edişaraşvilinin ifasında operalardan uvertüra, ariya, duetlər, ansambllar və müxtəlif musiqi parçaları dinləyicilərə təqdim olunub.
Minə yaxın insanın izlədiyi konsert salonunda yer çatışmazlığı və pərəstişkarların xüsusi marağı nəzərə alınaraq, əsas giriş qapısı açılaraq küçədə əlavə oturacaqlar yerləşdirilib. Dörd saata yaxın davam edən konsertdə Almaniya, Meksika, Çili, Uels, Avstriya, Kosovo, Qazaxıstan, Ukrayna, Koreya və Gürcüstandan dəvət olunmuş istedadlı müğənnilər böyük məharətlə çıxış ediblər.
Gecənin sonunda dirijor Ə.Quliyevin rəhbərliyində ifa olunan dahi Azərbaycan bəstəkarı Qara Qarayevin “Yeddi gözəl” baletindən fraqmentlər musiqisevərlər tərəfindən sürəkli alqışlarla qarşılanıb.
Qeyd edək ki, ənənəyə sadiq olaraq festivalın son konsertində yekun əsər Azərbaycan bəstəkarına məxsus olur.
2022-ci ildə dahi Üzeyir Hacıbəylinin “Koroğlu” operasına uvertürası, 2021-ci ildə isə Maestro Niyazinin “Qaytağı” simfonik rəqsi dirijor Ə.Quliyev və “Bavariya” Festival Orkestri tərəfindən səsləndirilərək böyük rezonansa səbəb olub.
Xatırladaq ki, iyunun 10-da Rixard Ştrausun “Salomeya” operası ilə başlayan “İmmlinq” Beynəlxalq Festivalı iki ay ərzində bir sıra əsərlərin yeni quruluşda təqdimatı ilə - C.Verdinin “Nabukko”, A.Piazzolanın “Mariya Buenos Ayres” operaları və Q.Malerin ikinci simfoniyasının uğurlu ifaları ilə yadda qalıb.
Xəbər Oxu.az-dan iqtibas edilib.
“Ədəbiyyat və incəsənət”
(16.08.2023)
Cəlilabadda orta əsrlərə aid qəbiristanlıq aşkarlanıb
Cəlilabad rayonunun Hacıismayıllı kəndi ərazisində tarixi qəbiristanlıq aşkar olunub.
"Report" xəbər verir ki, Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Salyan Regional İdarəsinin əməkdaşları orta əsrlərə aid qəbiristanlığı nəzarətə götürüb.
Dövlət Xidmətindən bildirilib ki, ərazidə müxtəlif ölçülərdə və formada olan məzar daşlarının üzərində bir-birindən fərqli simvollar, işarələr mövcuddur: "Bəzi məzar daşlarının üzərində ərəb qrafikalı əlifba ilə yazılan yazılara da rast gəlinir. Tarixi əhəmiyyəti nəzərə alınaraq ərazinin daşınmaz tarix-mədəniyyət abidələrinin reyestrinə daxil edilməsi üçün lazımi tədbirlər görüləcək".
“Ədəbiyyat və incəsənət”
(16.08.2023)
Musiqili Teatrın gənc xor artisti vəfat edib
Azərbaycan Dövlət Akademik Musiqili Teatrının xor artisti vəfat edib.
Bu barədə "Report"a teatrın mətbuat xidmətindən məlumat verilib.
Bildirilib ki, teatrın xor artisti Kubra Quliyeva uzun sürən xəstəlikdən dünyasını dəyişib.
“Ədəbiyyat və incəsənət”
(16.08.2023)
