Super User
“Bahar oğlu” Lənkəranda anıldı
Kənan Məmmədli, “Ədəbiyyat və incəsənət”
Bölgələrimiz içində ədəbi prosesə təkan verməsi, istedadlı yazarlar üzə çıxarması baxımından daim fərqlənən, ön mövqelərdə olan Azərbaycan Yazıçılar Birliyi Lənkəran bölməsi bu istirahət günlərində növbəti bir tədbiri ilə yadda qaldı. Belə ki, AYB Lənkəran Bölməsi və Lənkəran Dövlət Dram Teatrının birgə təşkilatçılığı ilə Azərbaycan ədəbiyyatının görkəmli nümayəndəsi, şair, yazıçı, dramaturq, tərcüməçi Cəfər Cabbarlının 125 illiyi ilə əlaqədar "Bahar oğlu" adlı tədbir keçirildi.
Təbii ki, məkan olaraq Lənkəran Dövlət Dram Teatrı seçilmişdi. Tədbiri izləməyə bölgə yazarları, teatr xadimləri, ictimaiyyət nümayəndələri təşrif buyurmuşdular. Xüsusən, AMEA Ədəbiyyat İnstitutunun ədəbi-tənqid şöbəsinin müdiri, filologiya elmləri doktoru, tanınmış tənqidçi Vaqif Yusiflinin iştirakı tədbirə rəng qatırdı.
ANAR BABALI
Tədbiri teatrın baş rejissoru Anar Babalı açdı. O, Cəfər Cabbarlının ədəbiyyatımızda, xüsusən dramaturgiya sahəsində, milli teatr sənətinin inkişafındakı müstəsna xidməti barədə qısa məlumat verdikdən sonra tədbiri aparmaq üçün sözü AYB Lənkəran Bölməsinin sədri, yazıçı Qafar Cəfərliyə verdi.
QAFAR CƏFƏRLİ
Qafar Cəfərli ədəbiyyatımıza "Bahar oğlu" kimi qədəm qoyan böyük ədibin həyat yoluna nəzər saldı. Bildirdi ki, cəmi 34 il ömür sürən Cəfər Qafar oğlu Cabbarlı özündən sonra əsrə sığacaq bir ədəbi irs miras qoymuşdur. Yaradıcılığa çox erkən yaşlarından başlayan böyük ədibin həyatı həmin vaxtı ölkədə mövcud olan Rusiya imperiyası, Azərbaycan Xalq Cumhuriyyəti və Sovet dövrünə düşdüyündən, ədəbi yaradıcılığı da üç dövrlə xarakterizə olunur. Cəfər Cabbarlı yaradıcılığının hər üç dövründə məşğul olduğu sahənin hər birində möhtəşəm nümunələr yarada bilmişdir.
VAQİF YUSİFLİ
Sonra Q. Cəfərli yubilyarın yaradıcılığı haqqında danışmaq üçün sözü Vaqif Yusifliyə verdi. Vaqif Yusifli Cəfər Cabbarlının yaradıcılığı haqqında ətraflı çıxış etdi, ortaya əsl tənqidçi baxışı qoydu. Cabbarlının poeziya, nəsr, dramaturgiya, tərcüməçilik, kino, jurnalistika sahəsindəki fəaliyyətindən tədbir iştirakçılarına məlumat verdi, C. Cabbarlının Allahın bəxş etdiyi böyük istedad sahibi olduğunu və qələmə aldığı hər bir əsəri ilə bunun təsdiq olunduğunu xüsusilə vurğuladı.
DİGƏRLƏRİ
Daha sonra yazıçı Hafiz Mirzə, şahmat üzrə Əməkdar məşqçi İdrak Dadaşov, şair Məmməd Əvəzoğlu çıxış edərək Cabbarlı yaradıcılığının müxtəlif məqamlarına toxundular.
Teatrın tanınmış aktyorlarından respublikanın əməkdar artisti Sücəddin Mirzəyev, Aynur Əhmədova və Allahverən Babayev çıxışlarında görkəmli dramaturqun sənətinə olan sevgilərini bir daha dilə gətirdilər, onun qələmindən çıxan, dramaturgiyamızda xüsusi bir era təşkil edən əsərlərinin bu gün də aktual olduğunu bildirməklə həmin dram əsərlərin səhnə taleyindən, bu əsərlərdə oynadıqları rollardan söz açdılar. Aynur Əhmədova və Allahverən Babayev yubilyarın bir neçə şeirinə yeni həyat verərək yüksək sənətkarlıqla ifa etdilər.
Tədbiri yekunlaşdıran Qafar Cəfərli Bölmə ilə Teatrın birgə işindən böyük məmnunluqla danışaraq bu işgüzar əlaqələrin bundan sonra da daha sıx olacağına əminliyini ifadə etdi. Tədbirin keçirilməsinə verdiyi dəstəyə görə teatrın rəhbərliyinə, təşkilatçılara və iştirakçılara minnətdarlığını bildirdi.
Tədbirin sonunda xatirə şəkli çəkildi.
Beləcə, AYB Lənkəran bölməsi növbəti tədbirini başa vurdu, qarşıda isə Azərbaycanın Mədəniyyət, habelə Elm və Təhsil nazirliklərinin təşkilati dəstəyi ilə Azərbaycan Nəşriyyatlar Assosiasiyasının 5-7 aprel tarixlərində Heydər Əliyev Mərkəzində keçirəcəyi 2-ci Lənkəran Kitab Sərgisində iştirak var. Bölmə sərgi çərçivəsində Azərbaycan Ədəbiyyat Fondunun təşkil edəcəyi “Bölgə ədəbiyyatı. Problemlər və perspektivlər” dinləməsinə təşkilatı dəstək verəcək.
“Ədəbiyyat və incəsənət”
(01.04.2024)
“İrəvan mətbəxindən nümunələr” layihəsində - həlisə
Rubrikanı Könül aparır.
“Ədəbiyyat və incəsənət” portalının Azərbaycan Milli Kulinariya Assosiasiyası ilə birgə layihəsində sizlərə hər dəfə İrəvan mətbəxindən nümunələr təqdim edirik. Bu nümunələr Azərbaycanın bu sahə üzrə tanınmış mütəxəssisi, əməkdar mədəniyyət işçisi, tarix üzrə fəlsəfə doktoru, kulinar Tahir Əmiraslanovun gərgin əməyi nəticəsində ortaya çıxmışdır.
Bu gün sizlərə Həlisənin hazırlanma qaydasını təqdim edəcəyik.
DÜSTUR:
§ Hinduşka və ya toyuq əti – 117 qr
§ Soğan – 17 qr
§ Yarma və ya buğda – 25 qr
§ Yağ – 20 qr
§ Duz – 6 qr
§ İstiot – 0,05 qr
HAZIRLANMASI:
Hinduşka və ya toyuq bişirilir. Sümükdən ayrılır, işgənəyə yarma (2-3 saat əvvəldən isladılmış), ət əlavə olunub, həlim alınanadək qaynadılır.
Arzu Bağırova (Dərələyəz mahalı, Heşin kəndi) eyni nüsxədə hinduşka və ya toyuq əti əvəzinə qovur- malıq ət, əlavə olaraq ələyəz istifadə etmişdi.
Buğda isladılır, 2-3 saat saxlandıqdan sonra süzülür. Qurudulur və daş dübəkdə döyülür. Qabığı çıxarılmış, ağarıb düyüyə oxşar vəziyyətə düşmüş buğda qabığından ayrılır. Yenidən yuyulur. Qovurmalıq ət və soğan qovrulur, üzərinə işgənə və ya su əlavə olunur. Hazırlanan yarma çölməyə tökülür və duvağı (qapağı) örtülür. Təndirə, vam közün üzərinə sallanır. 2-3 saat bişdikdən sonra (təndirin də ağzını örtmək şərtilə) çıxarılır.
“Ədəbiyyat və incəsənət”
(01.04.2024)
Günün fotosu: ƏRDOĞAN ÜÇÜN QARA XƏBƏR
Türkiyədə keçirilən bələdiyyə seçkilərində dünən axşam saat 19.00-a olan xəbərə görə səslərin 30 faizi hesablanıb.
Euronews mövzu ilə bağlı baş xəbərini “Türkiyə prezidentinə ciddi zərbə” adlandırıb. Belə ki, İstanbulda, İzmirdə və Ankarada - ölkənin 3 əsas şəhərində Ərdoğanın hakim partiyası fiaskoya uğrayıb, böyük üstünlüklə müxalifət - kamalçılar öndədirlər.
Foto: Euronews
“Ədəbiyyat və incəsənət”
(01.04.2024)
Rəsm qalereyası: Aytac Suanverdiyeva, “Qadın portreti”
Rəsm qalereyası: Aytac Suanverdiyeva, “Qadın portreti”
Gəlin, mümkün qədər az günah işlədək!
Elman Eldaroğlu, “Ədəbiyyat və incəsənət”
“Hər bir insan öz şəxsiyyətini hər şeydən üstün tutmalıdır. Haqqı nahaqqa verməməli, qul haqqı yeməməlidir. Mümkün qədər az günah işlətməlidir. Təkəbbürdən uzaq - sadə və təvazökar olmalıdır. Eyni zamanda, ömrü boyu yaxşılıq etməyə çalışmalıdır...” Bu kəlmələri söyləyən Əli Zülfüqaroğlu 1981-ci ildə Gilar kəndində dünyaya gəlib. Gilar kəndi qədim, köçəri türkman tayfalarına məxsusdur. Volqaboyu Bulqarıstanından köçərək Ərdəbildə məskunlaşan ulu babaları, sonradan indiki Yardımlı rayonu ərazisində yurd salıblar. Həmin kəndin bu günə gəlib çatan məzarlığından Səlcuqlu imperiyasında da istifadə edilən, qədim türklərə məxsus səkkizgüşəli simvollar hələ də tapılmaqdadır... Əli bu kənddə anadan olsa da, orta təhsilini Şəfəqli kənd məktəbində alıb. Sonra Bakıya üz tutub - Bakı Dövlət Universitetinin jurnalistika fakültəsində ali təhsilə yiyələnib. Ötən müddət ərzində bir sıra mətbu orqanlarında çalışıb. Hazırda “Xalq Cəbhəsi qəzeti”nin siyasət yazarıdır. İki övladı var- bir qız və bir oğlan. Qızı BDU-nun biologiya fakültəsində birinci kursda oxuyur, oğlu isə hələ ki məktəblidir, 8-ci sinifdə oxuyur… Deyir ki,- “Dürüstlük, kiminsə haqqına girməmək, xəyanət etməmək, cəmiyyətə yararlı insan olmaq - bunlar mənim həyat devizimdir.” Arzuları böyükdür, istəyir ki, ölkəmizdə ədalətli və inkişaf etmiş bir cəmiyyət qurulsun, Azərbaycan daha da qüdrətli dövlətə çevrilsin. Bu günədək bizə gəlib çatan dəyərlər sisteminin daşıyıcısı olan gənc nəsli yad təsirlərdən qorumağın vacibliyini dilə gətirir. "Yeni mədəniyyət" nümunələrinin təhdidlərindən gəncliyimizı sığortalamağı vacib sayır. Futbola tamaşa etməkdən zövq alır, sanki bu oyuna baxanda istirahət edir... Ölkə mətbuatında olduğu kimi, xarici kütləvi informasiya vasitələrində də çoxsaylı yazılarına rast gəlmək olar. Analitik xarakterli bu yazılar, eləcə də müxtəlif hadisələrə şərhləri onun bir savadlı siyasi şərhçi kimi də yetişdiyindən xəbər verir. Jurnalist olaraq isə uğurları daha çoxdur. Müxtəlif yazı müsabiqələrinin qalibi olub, xeyli mükafatlara layiq görülüb. Bir sözlə, Əli Zülfüqaroğlu istedadlı qələm adamı, mehriban ailə başçısı, sədaqətli dost və gözəl insandır... ...Təxminən iyirmi il olar ki, tanışıq. Nədənsə, onu sonbeşik qardaşım qədər çox istəyirəm. Budur, onun növbəti ad günüdür. 43 yaşı tamam olur. Onu bu münasibətlə təbrik edir, möhkəm can sağlığı, yaradıcılıq uğurları arzulayırıq.
“Ədəbiyyat və incəsənət”
(01.04.2024)
Milli Məclisinin Mədəniyyət Komitəsi Zakir Bağırovun anım günü münasibətilə paylaşım edib
Milli Məclisinin Mədəniyyət Komitəsi Azərbaycanın mədəniyyət naziri olmuş Zakir Bağırovun anım günü münasibətilə martın 30-da “Zakir Bağırovun vəfatından 35 il keçir” adlı paylaşım edib.
Paylaşımı diqqətinizə çatdırırıq:
Azərbaycanın Mədəniyyət naziri (1971–1988) və Xalq deputatı olmuş
görkəmli mədəniyyət, elm xadimi
Zakir Bağırovun anım günüdür (27.11.1929, Şuşa – 30.03.1989, Bakı).
Zakir Nəriman oğlu Bağırov Azərbaycanın Mədəniyyət naziri olduğu dönəmdə mədəniyyətimizin inkişafı üçün çox iş görüb.
Onun təşəbbüsü ilə Bakıda çağdaş tələblərə cavab verən Bakı Xoreoqrafiya Məktəbi tikilib, bir sıra mədəniyyət ocaqları əsaslı təmir olunub, yeni orkestrlər yaradılıb. Ümummilli lider Heydər Əliyevin respublikaya rəhbərlik etdiyi dönəmin yadigarları olan Üzeyir bəy Hacıbəylinin, Səməd Vurğunun, Cəfər Cabbarlının ev-muzeyləri də Zakir Bağırovun nazir olduğu vaxtlar açılıb.
Onu yaxından tanıyanlar çox səmimi və həssas ziyalı olduğundan söz açır.
Zakir Bağırov yaddaşlarda səxavətli, sözübütöv, mərd, alicənab, yüksək nəzakətə malik bir nazir kimi qalıb.
Sayğılarla anırıq.
Ruhu şad olsun!
Azərbaycan Respublikası
Milli Məclisinin Mədəniyyət Komitəsi
“Ədəbiyyat və incəsənət”
(01.04.2024)
Şəhidlər barədə şeirlər – Səmural Fətəliyev
“Ədəbiyyat və incəsənət” portalı Azərbaycan Yazıçılar Birliyinin üzvü Coşqun Xəliloğlunun “Şəhidlər barədə şeirlər” silsiləsini təqdim edir. Bu gün Səmural Fətəliyevə həsr edilmiş şeirlə tanış olacaqsınız.
S Ə M U R A L AYAZ OĞLU FƏTƏLİYEV
(13.03.1997.-05.10.2020.)
Quba rayonunun Əlibəyqışlaq kəndində anadan olmuş, Az.MİU-nun məzunu, SOCAR-ın Təhlükəsizlik İdarəsinin əməkdaşı, Qarabağın azad edilməsi uğrunda Vətən müharibəsinin şəhidi
SƏMURAL
Adını qəhrəmanlar cərgəsinə yazdı o,
Düşmənə əlləriylə dərin quyu qazdı o,
Çətinlikdən çəkinməz, qəmdən sarsılmazdı, o,
Əlibəyqışlaq kəndinin şir balası Səmural,
Torpağın xilaskarı, bir qalası Səmural.
Şam əgər haqdan yansa, bu şam heç zaman sönməz,
Haqqa inanan kəslər haqqın yolundan dönməz,
Ürəyində var idi arzuları tükənməz,
Əlibəyqışlaq kəndinin şir balası Səmural,
Torpağın xilaskarı, bir qalası Səmural.
İnsanları ucaldan saf əqidə, əməldir,
Deyirdi, Vətən üçün çalışmaq, nə gözəldir,
Vətən bizim anamız, hər bir şeydən əzəldir,
Əlibəyqışlaq kəndinin şir balası Səmural,
Torpağın xilaskarı, bir qalası Səmural.
İnsanlar kamilləşir işdə, mübarizədə,
SOCAR-da çalışırdı, bəli, mühafizədə,
Dürüst, işgüzar kimi qalıbdır hafizədə,
Əlibəyqışlaq kəndinin şir balası Səmural,
Torpağın xilaskarı, bir qalası Səmural.
Ağız şirin olmayır, halva-halva deməklə,
Barışmazdı heç zaman fitnə ilə, kələklə,
Sevincini hamıyla bölüşərdi ürəklə,
Əlibəyqışlaq kəndinin şir balası Səmural,
Torpağın xilaskarı, bir qalası Səmural.
Ali təhsil almışdı, çəkmişdi əsgərliyin,
Həmişə pisləyirdi erməninin şərliyin,
Məqamı çatan kimi sübut etdi ərliyin,
Əlibəyqışlaq kəndinin şir balası Səmural,
Torpağın xilaskarı, bir qalası Səmural.
Yetişdi torpaqları azad etmək məqamı,
“Biz qalib gələcəyik”-ürəyində inamı,
-Kafirlərin sonudur, dedi, eşitsin hamı,
Əlibəyqışlaq kəndinin şir balası Səmural,
Torpağın xilaskarı, bir qalası Səmural.
Atıldı döyüşlərə, məhv etdi kafirləri,
Tülkülər tez qaçdılar, görən kimi şirləri,
Cəsur bir əsgər oldu, əfsanəymiş hünəri,
Əlibəyqışlaq kəndinin şir balası Səmural,
Torpağın xilaskarı, bir qalası Səmural.
Düşməni məhv eylədi, yağıya uddurdu qan,
Döyüşlərin birində şəhid oldu qəhrəman.
Əbədi yaşayacaq ürəklərdə hər zaman,
Əlibəyqışlaq kəndinin şir balası Səmural,
Torpağın xilaskarı, bir qalası Səmural.
Şəhidlər haqqında mən ehtiramla yazıram,
Sonsuz məhəbbət ilə, təb-ilhamla yazıram,
Bizimlə addımlayır, bu inamla yazıram,
Əlibəyqışlaq kəndinin şir balası Səmural,
Torpağın xilaskarı, bir qalası Səmural.
“Ədəbiyyat və incəsənət”
(01.04.2024)
Zibeydənin fitnesi
Sərtyel, “Ədəbiyyat və incəsənət”
1.
-Sən həqiqətən evlənmisən?
-Bəli.
-Düzdür ki, sən dul qadınla evlənib, onun hesabına sərsəm pullar qazanmısan?
-Xeyir, cəfəng söhbətdir. Mən sərsəm dul qadınla evlənib onunla pullar qazanmışam.
2.
Tibb deyir ki, çox danışmaq lazımdır, əks təqdirdə dil atrofirləşə bilər. Halbuki, çox dinləmək lazım deyil, çünki qulağa heç zad olan deyil.
3.
-Fitnesə getməyə başlamışam, Anaxanım. Düz dörd aydır. Ən bahalı zala özü də.
-Zibeydə, çəkin düşüb? Nə qədər itirmisən?
-Aya 300 manat.
4.
-Ay bədbəxt, sən indiyə kimi yalnız 10-a kimi saymağı öyrənmisən? Sən kim olacaqsan ki?
-Boks hakimi.
5.
Nazir iclasda deyir:
-Biz krizisin yeni fazasına qədəm qoyduq. Bizim valyuta ehtiyatlarımız çoxdur, bizi heç bir təhlükə gözləmir.
Zaldan səs gəlir:
-Bəs bizi?
6.
Orta statistik həmyerlimiz ananasa, bildirçin yumurtasına, balqabaq tumuna, şokolad qlazurlu dondurmaya, popkorna, qovrulmuş şabalıda, hətta marinə olunmuş quzqulağına pul tapa bilir, amma kitaba, kino və teatr biletinə pul tapa bilmir.
7.
-Ooo, Henri, əzizim, sənin ən sevdiyin yazıçı kimdir?
-O’Henri!
“Ədəbiyyat və incəsənət”
(01.04.2024)
Ağstafada "Vətənin Azəri" sənədli filminin təqdimatı keçirildi
Səbinə Yusif, “Ədəbiyyat və incəsənət” üçün
Şəhidlər ölməz, Vətən bölünməz!
Bu şüar bizi daim şəhidləri xatırlamağa, bir də Vətəni göz bəbəyi kimi qorumağa səfərbər edir. Elə Ağstafa şəhər Heydər Əliyev Mərkəzində keçirilən tədbir də bu qəbildən idi.
Mərkəzdə Vətən Müharibəsi Qəhrəmanı Azər Yusiflinin xatirəsinə həsr olunmuş "Vətənin Azəri" sənədli filminin təqdimatı keçirildi.
Filmin ssenari müəllifi və rejissoru Kamalə Musazadədir. Film Prezident sərəncamıyla Mədəniyyət Nazirliyinin xətti ilə çəkilib.
Təqdimat mərasimində Şəhid ailələri, Qazilər, Ağstafa RİH-nin başçısı Seymur Orucov, RİH-nin rəsmi nümayəndələri, idarə və təşkilat rəhbərləri, "Qazax" Xeyriyyə İctimai Birliyinin üzvləri, media nümayəndələri, rayon ictimaiyyəti, ziyalılar iştirak edirdilər.
Filmdə Azər Yusiflinin həyatı və döyüş yolu haqqında ətraflı məlumat verilib. Filmdəki kadrlar Şəhidin doğulub boya-başa çatdığı Ağstafa rayonunun Böyük Kəsik kəndində və döyüşdüyü yerlərdə - Cəbrayıl və Zəngilan rayonlarında çəkilib.
Film təqdim olunduqdan sonra Şəhid ailələri, İcra Hakimiyyətinin başçısı Seymur Orucov, İctimai Birliyin üzvləri, ziyalılar çıxış edərək, Şəhidlərin keçdiyi şərəfli ömür yoluna nəzər saldılar. Filmin çəkilişində əməyi olan hər kəsə, xüsusilə də Kamalə Musazadəyə təşəkkürlərini bildirdilər.
Sonda Şəhid Azər Yusiflinin atası Nazim Yusifov çıxış edərək Şəhidə verilən dəyərə görə dövlətimizə, xalqımıza təşəkkürünü bildirdi.
Allah bütün Şəhidlərimizə rəhmət eləsin!
“Ədəbiyyat və incəsənət”
(01.04.2024)
Ulduzlar sönmür… - Bu gün İsa Muğannanın anım günüdür.
Heyran Zöhrabova, "Ədəbiyyat və incəsənət"
“Bizim hamımız İsa Muğannadan təsirlənmişik və öyrənmişik"
Çingiz Aytmatov
Bu gün Azərbaycan ədəbiyyatında magik realizmin yaradıcılarından biri olan "İdeal", "Məhşər", "Türfə" kimi məşhur romanlar müəllifi, Xalq yazıçısı, əməkdar incəsənət xadimi İsa Muğannanın anım günüdür.
İsa Hüseynov 1928-ci ildə Ağstafa rayonunun Muğanlı kəndində dünyaya gəlib. Atası Mustafa kişi müəllim olub. O, orta məktəbi bitirdikdən sonra Nəriman Nərimanov adına Tibb İnstitutuna daxil olub. Lakin 4 ay sonra kəndə qayıdıb, sonradan Azərbaycan Dövlət Universitetinin filologiya fakültəsinə qəbul olunub.
Təhsilini Xalq yazıçısı Mehdi Hüseynin məsləhəti ilə Moskvadakı Maksim Qorki adına Ədəbiyyat İnstitutunda davam etdirib.1952-ci ildə İnstitutu bitirərək əmək fəaliyyətinə başlayıb. İki il Azərbaycan Dövlət Nəşriyyatının (Azərnəşr) ədəbiyyat şöbəsində redaktor işləyib. 1960-1964-cü illərdə isə “Literaturnıy Azerbaydjan” jurnalında nəsr şöbəsinin müdiri olub.
Daha sonra Cəfər Cabbarlı adına “Azərbaycanfilm” kinostudiyasında altı il redaktor, dörd il baş redaktor və beş il ssenari kollegiyasının üzvü olub. Bir neçə il isə Azərbaycan Kinematoqrafiya Komitəsində baş redaktor vəzifəsində çalışıb.
1948-ci ildən ədəbi fəaliyyətə başlayan yazıçının “Anadil ötən yerdə” adlı oçerki ilk dəfə 1949-cu ildə “İnqilab və mədəniyyət” jurnalında çap edilib. 1950-ci ildən etibarən isə kitabları nəşr olunmağa başlayıb.
Bir-birinin ardınca “Bizim qızlar”, “Dan ulduzu”, “Hekayələr”, “Yanar ürək”, “Doğma və yad adamlar”, “Teleqram”, “Tütək səsi”, “Pyeslər”, “Kollu koxa”, “Ömrümdə izlər”, “Saz”, “Məhşər”, “İdeal”, “Türfə”, “Qəbiristan”, “Cəhənnəm”, “İsahəq-Musahəq” və digər kitabları oxuculara təqdim olunub. ssenariləri əsasında “Nəsimi”, “Ulduzlar sönmür”, “Qərib cinlər diyarında” və s. filmlər çəkilib.
1976-cı ildə Əməkdar incəsənət xadimi, 1988-ci ildə xalq yazıçısı fəxri adlarına layiq görülüb. “Şərəf nişanı”, “İstiqlal” ordenləri ilə təltif olunub.
Uzun müddət xroniki ürək çatışmazlığından əziyyət çəkən yazıçı 2014-cü il aprelin 1-də 85 yaşında vəfat etmiş, fəxri xiyabanda dəfn olunmuşdur.
Ruhu şad olsun!
“Ədəbiyyat və incəsənət”
(01.04.2024)
