“Ədəbiyyat və incəsənət” portalı sizlərə Xeyrəddin Qocanın miniatür hekayələrinin təqdimini davam  etdirir. 

Qurultayda Siyasi Şura üzvlərinin ad-soyadları olan siyahı oxunur. "Xeyrəddin Qoca - müvəqqəti işsiz" sözləri oxunarkən iki mindən çox adam tutan Respublika Sarayında hamı gülür.

Fasilədə vəzifəli şəxslər - nazirlər, dövlət adamları, millət vəkilləri Xeyrəddin Qocaya yaxınlaşıb deyirlər:

-Deməli, bu yaxınlarda sənə mütləq iş veriləcək.

Xeyrəddin Qoca cavab verir:

-Heç bilirsiniz, salondakılar nəyə gülürdülər? Mən müvəqqəti yox, əbədi işsizəm...

Doğrudan da məşhur yazıçı uzun müddət işsiz qalır. Bir gün onu toya çağırırlar. İçərisində 100 manat nəmər qoyduğu zərfin üstünə "Xeyrəddin Qoca - müvəqqəti işsiz" sözlərini yazıb qutuya atır.

Sonradan toy sahibləri başa düşürlər ki, guya Xeyrəddin Qoca "müvəqqəti işsiz" sözlərini yazmaqla toya saldığı nəmərin az olduğuna işarə edir. Yəni "işləsəydim, daha çox nəmər salardım" - demək istəyir...

“Ədəbiyyat və incəsənət”

(14.06.2024)

Könül, “Ədəbiyyat və incəsənət”

Sabah - 15 iyun Milli Qurtuluş Günüdür. Milli Qurtuluş Günü tanınmış şair, publisist Yusif Nəğməkar üçün ikiqat bayramdır. Axı onun doğum günü də xalqının hərc-mərclikdən, separatizmdən, müstəqilliyinə təhlükədən qurtulduğu günə təsadüf edir. 

Artıq şair təbrik mesajları və mükafatlar almaqdadır. 

Milli Məclisin Mədəniyyət komitəsinin sədri Fazil Mustafa Yusif Nəğməkara məktub ünvanlayıb. Məktubda yazılır: 

“Hörmətli Yusif müəllim,

Sizi doğum gününüz və yaradıcılıq uğurlarınızla bağlı təbrik edir, möhkəm cansağlığı, yeni başarılar diləyirəm!

Siz özünəxas mədəniyyət-sənət, ruhaniyyat iqlimi olan qədim Beyləqan torpağında, Birinci Aşıqlı elində və əlamətdar bir gündə doğulmusunuz. – Sizdən öncələr Azərbaycanda və Türk dünyasında bir sıra görkəmli sənətkarların doğum və anım günü kimi mədəniyyət təqvimə düşən 15 iyun, artıq 27 ildir Ümummilli lider Heydər Əliyevin adı ilə bağlı olan Milli Qurtuluş Günü olaraq Azərbaycanda rəsmi dövlət bayramı günüdür. Azərbaycanla qardaş Türkiyə arasında müttəfiqlik münasibətləri haqqında “Şuşa Bəyannaməsi” 3 il öncə – məhz 15 iyunda imzalanıb. Siz bu əlamətdar günün mənəvi haqqını ödəməyə çalışan, öz yaradıcılığı ilə vətənə, xalqa, Türk dünyasına xidmət edən şairlərdənsiniz. Təsadüfi deyil ki, sizin şeirlərinizə Azərbaycan bəstəkarları ilə yanaşı Türkiyə bəstəkarları da müraciət edir. “Mehtər” marşı üstə ifa edilən “Azərbaycan, Türk bayrağı” şeiriniz qardaş ölkə xorunun ifasında rəğbətlə qarşılanıb. 

“Qazax" Xeyriyyə İctimai Birliyində isə birliyin sədri, riyaziyyat elmləri doktoru, professor İlham Pirməmmədovun təşəbbüsü, görkəmli tədqiqatçı-araşdırmamı, canlı tarix Şəmistan Nəzirlinin  və AMEA Nizami Gəncəvi adına Ədəbiyyat institutunun şöbə müdiri, filologiya üzrə elmlər doktoru, professor Asif Rüstəmlinin iştirakı ilə şairlə görüş keçirilib. 

Doğum günü ərəfəsində yaradıcılığından  söhbət açılıb, onu təbrik edib mükafatlandırıblar. 

Xatırladaq ki, “Qazax” Xeyriyyə İcyimai Birliyinin üzvü,  Azərbaycan Jurnalistlər (1989) və Azərbaycan Yazıçılar  (1995) birliklərinin üzvü, şair-publisist Mədətov Yusif Məhiş oğlu (Yusif Nəğməkar)

15 iyun 1955-ci ildə Beyləqan rayonunun Birinci Aşıqlı kəndində ziyalı ailəsində anadan olub. Orta təhsilini Birinci Aşıqlı kənd və Beyləqan şəhər 1 saylı məktəbində (1961-1971) alıb. Bir müddət rayonda çıxan "Yüksəliş" qəzetində müxbir kimi fəaliyyət göstərib, şeirləri, oçerk və məqalələri, ədəbi-tənqidi yazıları ilə özünü oxucu kütləsinə tanıdıb. 

1973-1977-ci illərdə N. Tusi adına Azərbaycan Dövlət Pedaqoji Universitetinin Filoloğiya fskültəsini Ana dili və ədəbiyyat ixtisası üzrə bitirib. Təyinatla Beyləqan rayonunda bir neçə il müəllimlik etdikdən sonra Azərbaycan Dövlət Teleradio Verilişləri Komitəsində müxtəlif vəzifələrdə çalışıb (1983-2006).

Novator sənətkar, Azərbaycanın Xalq şairi Rəsul Rza gənc Yusif Nəğməkarın yaradıcılığını dəyərləndirərək "Təsadüf" adlı məqaləsi ilə  "Uğurlu yol" yazaraq ilk dəfə onu ədəbiyyata təqdim edib ("Ədəbiyyat və incəsənət" qəzeti, 30 aprel 1977-ci il).

Sonralar görkəmli Xalq şairi Bəxtiyar Vahabzadə "Mənim çox sevdiyim şair Yusif Nəğməkar" adlı məqalə yazıb və eyni zamanda Yusif Nəğməkara "Dünən, bu gün və sabah" adlı şeir həsr edib. 

Yusif Nəğməkar 2015-ci ildə Tarixi Çanaqqala zəfərinin yüz illiyi ərəfəsində yazdığı "Çanaqqala - Türkə qala" poeması ilə müsabiqə qalibi olub və həmin vaxt "Azərbaycan bayrağı" media mükafatı və bir qurumun təsis etdiyi "İlin şairi" adını alıb. 

"Qılınc və qələm", Rəsul Rza və Şahmar Əkbərzadə adına Beynəlxalq ədəbi mükafatlar laureatı Yusif Nəğməkarın indiyədək 20-dən artıq kitabı nəşr olunub.

O, hazırda Azərbaycan Sənaye Korporasiyasında Mətbuat katibi vəzifəsində çalışır.

Ailəlidir. Üç övlad atasıdır.

Yusif Nəğməkarın şeirlərinə Azərbaycan və Türk bəstəkarları vaxtaşırı müraciət edərək bir çox mahnılar-şərqilər bəstələmişlər.

O, "Ədəbiyyat qəzeti"nin redaksiya heyətinin üzvüdür.

Biz də öz adımızdan şairi təbrik edir, ona yeni-yeni yaradıcılıq uğurları arzulayırıq.

“Ədəbiyyat və incəsənət”

(14.06.2024)

Meksikanın Azərbaycandakı Səfirliyinin və Bülbül Vokal Məktəbinin təşkilatçılığı ilə Bülbülün Memorial Muzeyində  meksikalı tenor Luis İtzkoatl və pianoçu Maurisio Duranla görüş keçirilib.

“Ədəbiyyat və incəsənət” portalına muzeydən verilən məlumata görə, görüş zamanı maraqlı müzakirələr, fikir mübadilələri baş tutub. Meksikalı tenor tələbələrin suallarını cavablandıraraq, Azərbaycan və Meksika vokal sənəti ilə bağlı fikirlərini bildirib.

Meksikanın Azərbaycandakı Səfirliyinin Mədəniyyət üzrə attaşesi cənab Aristeo Gonzalez Guerrero muzeylə tanış olduqdan sonra öz ürək sözlərini Fəxri Qonaqlar kitabına qeyd edib. 

Sonda Luis İtzkoatl tələbələrlə birlikdə Müslüm Maqomayevin "Azərbaycan" mahnısını ifa ediblər.

“Ədəbiyyat və incəsənət”

(130.6.2024)

Sadiq Qarayev bioloq alimdir və yazıçıdır. Bu günlərdə onun 50 yaşı tamam olub. Azərbaycan Yazıçılar Birliyinin Natəvan klubunda bu münasibətlə tədbir keçirilib. 

“Ədəbiyayyat və incəsənət” portalı xəbər verir ki, tədbirdə çıxış edən natiqlər yazıçının ömür yolundan, elmi tədqiqatlarından, bədii yaradıcılığından və ictimai fəaliyyətindən söhbət açıblar.

Qeyd olunub ki, Sadıq Qarayev yazıçı və ictimai xadim olaraq fəal vətəndaşlıq mövqeyi ilə seçilir və öz əsərlərində azərbaycançılıq məfkurəsi, milli dövlətçilik ideyalarının təbliğinə önəm verir. 

Bildirilib ki, S.Qarayev “Sahilsiz təzadlar”, “Sahibsiz kölgələr”, “N” saylı qəhrəmanlıq” adlı irihəcmli elmi-fəlsəfi, tarixi romanların, eləcə də, hekayə, esse və publisistik yazılardan ibarət “Sarvansız zamanlar”, “Azərbaycançılıq məfkurəsi” kitablarının, yerli və xarici mətbuatda dərc olunmuş 60-a yaxın elmi məqalənin müəllifidir.

Tədbirdə şəxsiyyətin özünütəsdiqi, toplum və təbiət hadisələrinin qarşılıqlı bağlantısı, bəşəri qayğılar fonunda milli dəyərlərin qorunması, zənginləşdirilməsinin dolğun təsvir edildiyi “Sahilsiz təzadlar” romanı, “Orbitlər və universal mövcudluq nəzəriyyələri” adlı elmi ideyaların müddəaları obrazlı vasitələrlə oxucuya çatdırılan, azərbaycanlı çekistlərin vətənpərvərlik və peşəkar xidmətini əks etdirən ilk iri həcmli “Sahibsiz kölgələr” romanı, tarixi Zəfərimizə həsr edilmiş ilk elmi-fəlsəfi, sənədli-publisist, “N” saylı qəhrəmanlıq” tarixi romanı, hekayə, esse və publisistik yazılardan ibarət “Sarvansız zamanlar” və “Azərbaycançılıq məfkurəsi” kitabları ətrafında elmi, ədəbi təhlillər və müzakirələr aparılıb. Müəllifin müstəqillik dövrü Azərbaycan ədəbiyyatında elmi idrakla bədii təfəkkürün birliyi əsasında yazılmış əsərləri ilə seçildiyi vurğulanıb.

Sonda Sadıq Qarayevə Azərbaycan Milli Elmlər Akademiyasının Azad Həmkarlar İttifaqının fəxri fərmanı və AYB-nin fəxri diplomu təqdim olunub. Həmçinin Milli Məclisin Mədəniyyət Komitəsinin təbrik məktubu oxunub.

“Ədəbiyyat və incəsənət”

(13.06.2024)

Küveyt Dövlət Universitetinin Sabah əl-Səlim tədris korpusunda iyunun 10-13-də “Turizm və Səyahət” adlı sərgi təşkil olunub. Tədbirdə Küveytin müxtəlif sektorlarını təmsil edən yerli qurumlarla yanaşı, ölkədə akkreditə olunmuş diplomatik korpusun nümayəndələri də iştirak ediblər.

Azərbaycan Respublikasının Küveyt Dövlətindəki səfirliyindən AzərTAC-a bildirilib ki, sərgidə diplomatik nümayəndəliyimizin dəstəyi ilə Azərbaycan stendi qurulub. Sərgiyə gələnlərə ölkəmizin tarixi, mədəniyyəti, mətbəxi, turizm potensialı barədə məlumat verilib.

Eyni zamanda, 2024-cü ildə Azərbaycan Respublikası ilə Küveyt Dövləti arasında diplomatik əlaqələrin qurulmasının 30 illiyinin tamam olması və bu il üçün Azərbaycanın mədəniyyət paytaxtı Şuşa şəhərinin “İslam dünyasının mədəniyyət paytaxtı” elan edilməsi ziyarətçilərin diqqətinə çatdırılıb. Sərginin təşkil edildiyi zalda ölkəmizin şəhər və rayonlarının, habelə Şuşa şəhərinin tanınmış məkanlarına aid stend quraşdırılıb və səfirliyin dəstəyi ilə çap edilmiş “Şuşa: Azərbaycan mədəniyyətinin paytaxtı, Qarabağın incisi” kitabı iştirakçılara təqdim edilib.

Eyni zamanda, tədbirdə cari ilin noyabrında ölkəmizin BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına ev sahibliyi edəcəyi və bununla əlaqədar olaraq 2024-cü ilin respublikamızda “Yaşıl dünya naminə həmrəylik ili” elan olunduğu barədə məlumat verilib. Həmçinin tədbirin keçirildiyi zalda quraşdırılmış ekranlarda COP29-un loqosu və bununla bağlı videogörüntülər nümayiş etdirilib.

Sərgini Küveyt Universitetinin müəllim-tələbə heyəti ilə yanaşı, yerli ictimaiyyətin nümayəndələri də ziyarət ediblər.

Sərgiyə gələnlərə “Azərbaycan Hava Yolları” (AZAL) aviaşirkətinin Bakı-Küveyt-Bakı istiqaməti üzrə reyslərinin uçuş tarixləri və xidmətləri barədə də məlumat verilib.

Azərbaycan stendində videomateriallar vasitəsi ilə ölkəmizin tarixi-mədəni abidələrinə, gəzməli-görməli yerlərinə virtual səyahət də təşkil olunub.

Sərgidə fəal iştiraka görə səfirliyə Küveyt Universitetinin sertifikatı təqdim edilib.

“Ədəbiyyat və incəsənət”

(14.06.2024)

Özbəkistanın paytaxtı Daşkənddə keçirilən Azərbaycan Mədəniyyəti Günləri rəngarəng tədbirlərlə davam edir. 

“Ədəbiyyat və incəsənət” portalı Mədəniyyət Nazirliyinə istinadən xəbər verir ki, mədəniyyət günlərinin daha bir tədbiri iyunun 13-də Daşkənddəki Heydər Əliyev adına Azərbaycan Mədəniyyət Mərkəzində (AMM) gerçəkləşib.

Mərkəzdə görkəmli tarixi romanlar müəllifi Məmməd Səid Ordubadinin özbək dilinə tərcümə olunmuş “Qılınc və qələm” kitabının təqdimatı keçirilib.

Özbəkistanın alim və ziyalılarının da qatıldığı mərasimdə çıxış edən Azərbaycan Yazıçılar Birliyinin (AYB) katibi, şair-dramaturq İlqar Fəhmi sözü mədəniyyət nazirinin müavini Fərid Cəfərova verib.

Nazir müavini bildirib ki, Azərbaycan Mədəniyyət Nazirliyi tərəfindən görkəmli şair və yazıçılarımızın əsərlərinin xarici dillərə tərcümə edilərək təbliği diqqətdə saxlanılır. İndiyədək 100-dən artıq müəllifin əsərinin tərcümə edilərək nəşri həyata keçirilib. Yazarlarımızın Türk dünyasında da tanınmasına xüsusi önəm verilir.

Nəşrin əhəmiyyətini vurğulayan nazir müavini deyib ki, bu kitabla görkəmli nasir Məmməd Səid Ordubadi ilə yanaşı, əsərdə obrazı yaradılan dünyaşöhrətli Azərbaycan şairi və mütəfəkkiri Nizami Gəncəvi və onun dövrü haqqında özbək oxucularda geniş təsəvvür yaranacaq.

Özbəkistanın ədəbiyyatşünas-alimləri, professorlar Nurboy Cabbarov, Abdulla Uluğov, AYB-nin katibi, şair, tərcüməçi Səlim Babullaoğlu, Özbəkistan-Azərbaycan Dostluq Cəmiyyətinin icraçı direktoru Erkin Nuriddinov, şair Aqşin Yenisey və Ankaradakı Azərbaycan Mədəniyyət Mərkəzinin direktoru Samir Abbasov çıxış ediblər. Çıxışlarda yeni nəşrin əhəmiyyəti qeyd edilib, Nizami Gəncəvinin yaradıcılığından bəhs olunub.

Tədbirdə Nizami Gəncəvinin şeirləri qiraət olunub, qəzəllərindən ibarət muğamlar ifa edilib.

Əsərdə Nizami Gəncəvinin surəti mərkəzi yer tutsa da, müəllif bununla kifayətlənməyərək dahi şairin yaşadığı dövrün hərtərəfli mənzərəsini canlandırmağa çalışıb, xalq həyatının geniş lövhələrini yaradıb. Buna görədir ki, roman baş qəhrəmanının adı ilə deyil, əsərin həyat materialında mühüm yer tutan iki amilin – xalqın fiziki və mənəvi qüvvəsinin rəmzi olaraq "Qılınc və qələm" adlandırılıb.

Romanı özbəkcəyə Nazira Aliyeva, Muhsin Hamidov və Rustam Komilov çeviriblər.

“Ədəbiyyat və incəsənət”

(14.06.2024)