Super User
Mədəniyyət nazirinin İmişlidə keçirdiyi vətəndaş qəbulu müsbət nəticə verəcək
Xəbər verdiyimiz kimi, Mədəniyyət naziri Adil Kərimlinin iştirakı ilə iyunun 7-də İmişli rayonunda vətəndaş qəbulu keçirilib.
Azərbaycan Respublikasının Prezidenti İlham Əliyevin tapşırığına əsasən, mərkəzi icra hakimiyyəti orqanları və digər idarəetmə qurumları rəhbərlərinin şəhər və rayonlarda vətəndaşlarla görüşləri təşkil olunur. Hər ay keçirilən bu qəbildən görüşlərin məqsədi sakinlərin problem və təkliflərini yerində dinləmək, qaldırılan məsələlərin operativ həlli və digər məsələlərlə bağlı müraciətlərin aidiyyəti üzrə yönəldilməsidir.
“Ədəbiyyat və incəsənət” portalı Mədəniyyət Nazirıiyinə istinadən xəbər verir ki, İmişli rayon Heydər Əliyev Mərkəzində gerçəkləşən qəbuldan əvvəl nazir və rayonun icra başçısı Elçin Rzayev Ümummilli liderin şəhərdəki abidəsi önünə gül dəstələri qoyaraq əziz xatirəsini ehtiramla yad ediblər.
Əsasən, Beyləqan, İmişli, Saatlı və Sabirabad rayonlarından bir qrup vətəndaşın iştirak etdiyi qəbulda sakinlərin müraciətləri mədəniyyət sahəsinə dair təkliflər, işlə təmin olunma və digər məsələlərlə bağlı olub.
Nazir vətəndaşların ayrı-ayrı məsələlərə dair xahiş və təkliflərini, fikirlərini dinləyərək hər bir müraciətin operativ şəkildə araşdırılması, qanunvericiliyə uyğun həlli ilə bağlı qəbulda iştirak edən nazirliyin məsul nümayəndələrinə tapşırıqlar verib.
Görüşdə şəhid ailələri və qazilərin qaldırdıqları məsələlərə xüsusi diqqətlə göstərilməsi, vaxtında və obyektiv baxılması məqsədilə hər bir müraciət qeydiyyata alınaraq nəzarətə götürülüb.
“Ədəbiyyat və incəsənət”
(10.06.2024)
Mayın “Ulduz”u çap olundu
“Ulduz”un Qərbi Azərbaycana həsr olunmuş may sayı “Ulduz” jurnalı, Təhsil Nəşriyyatı və Azərbaycan Dövlət Pedaqoji Universiteti “Qərbi Azərbaycan Ardaşdırmalar Mərkəzi”nin birgə layihəsi əsasında işıq üzü görüb.
“Ədəbiyyat və incəsənət” portalı xəbər verir ki, jurnal ADPU-nun prorektoru, Dərələyəz, Keşkənd icmasının rəhbəri, professor Mahirə Nağıqızı və tədqiqatçı-hüquqşünas Səməd Vəkilovun ön sözüylə açılır.
Jurnalda ADPU-nun rektoru Cəfər Cəfərovun “Qərbi Azərbaycan İcmasının yaranması tarixi zərurətdir”, Qərbi Azərbaycan İcmasının sədri, millət vəkili Əziz Ələkbərlinin “Qərbi Azərbaycana qayıdış əsas hədəfimizdir”, Misir Mərdanov və Ədalət Tahirzadənin “Vəkilov Həsənalısultan bəy Məhəmməd bəy oğlu”, Akademik Abel Məhərrəmovun “Qərbi Azərbaycanın Ağbaba mahalı”, millət vəkili Musa Urudun “Zəngəzurun təhsil tarixi”, millət vəkili Məlahət İbrahimqızının “Ermənistanda Azərbaycan türklərinin silinməz izləri”, filologiya elmləri doktoru, professor Seyfəddin Rzasoyun “Qərbi Azərbaycanda aşıq yaradıcılığı: milli yaddaş və tarix” yazıları yer alır.
Tarix üzrə fəlsəfə doktoru, dosent Cəbi Bəhramovun “Şimali Azərbaycan ərazilərinin Rusiya imperiyası tərəfindən işğalı və Qərbi Azərbaycan torpaqlarının ermənilərə güzəştə gedilməsi”, fizika elmləri doktoru, professor Bəxtiyar Nəcəfovun “Atam haqqında xatirələr”, kimya üzrə fəlsəfə doktoru Nazir Əhmədlinin “Oğurlanmış ata yurdu – Qərbi Azərbaycan”, filologiya elmləri doktoru, professor Fəridə Səfiyevanın “Əqidəsinə sadiq alim”, professor Hacı Həsənovun “XIX –XX yüzilliyin əvvəllərində Qərbi Azərbaycanda yürüdülmüş inzibati-ərazi idarəçilik siyasətinin tarixindən” yazıları qədim yurd yerimizin tarixini günümüzə daşıyır.
ADPU-nun filologiya fakültəsinin dekanı Könül Həsənovanın “Alim şair Həsən Mirzəyə həsr olunmuş şeir mətnlərində qənaət prinsipinin linqvokulturoloji xüsusiyyətləri”, tarix elmləri üzrə fəlsəfə doktoru Leyla Cəlalovanın “Azərbaycan sevdalı, dünya şöhrətli jurnalist – Leyla Vəkilli”, Araşdırmaçı Jurnalistlər Liqasının Baş katibi Şəfahət Avılbəylinin “Qərbi Azərbaycanın Qarabağı-Qaraqoyunlu”, sosiologiya üzrə fəlsəfə doktoru Əfqan Vəliyevin “Göyçə mahalının tarixi və ədəbi mühiti” yazılarını oxuculara təqdim edir.
Əməkdar mühəndis Nəbi Ramazanlının “Loru-Pəmbək mahalı”, filologiya üzrə fəlsəfə doktoru, dosent Cəlal Allahverdiyevin “110 yaşlı “Lək-Lək”” , Şumeroloq, biologiya elmləri doktoru Tariyel Azərtürkün (Əliyev) ”Nüvədinin uzaq-yaxın tarixi və daş yazılı abidəsi barədə”, “Bütöv Azərbaycan qəzetinin baş redaktoru Tamxil Ziyəddinoğlunun “Qəbirlər də qəribləşir”, İstanbul Universitetinin doktorantı Dilqəm Əhmədin “İrəvanlı Cabbar Ərtürk”, yazıçı Yeganə Kərimzadənin “Bir köç gedir...” yazıları oxucuları Qərbi Azərbaycanın tarixi, mədəniyyəti, ədəbiyyatı ilə tanış edir.
Jurnalın bu sayında Qərbi Azərbaycanla bağlı şeirlər yer də alıb.
“Ədəbiyyat və incəsənət”
(07.06.2024)
İntizar ədəbiyyatı - Söhrab Tahir, "Arazım"
Təqdim edir: Heyran Zöhrabova, “Ədəbiyyat və incəsənət”
Ovuclayıb içdim səni,
Dənizləşdi gözlərim.
Mən suvardım gözlərimlə
Həsrət qalan düzləri.
Adın mənə qüvvət verdi,
Bükülmədi dizlərim.
Qoy alnına həkk olunsun
Taleyimin sözləri.
Çay bəxtini girov qoyan,
Yazıq, nəcib Arazım!
Öz yurdunda lənətlənmiş
Doğma, qərib Arazım!
Qayaların kölgəsindən
Yaşmaq tutma bu sayaq.
Səndə batmış illərimi
Gəl, bir yerdə biz sayaq,
Daha qopur qəzəblərin
Sarayından daş, suvaq,
Bu dünyadan sərhədləri
Bir götürək,
Bir udaq,
Taleyinin dirəkləri
Göyə dəyən Arazım,
Məftilləri gül açmayan,
Göyərməyən Arazım.
“Ədəbiyyat və incəsənət”
(07.06.2024)
İstanbulda “Azərbaycan çadırı” qonaqlarda xüsusi maraq doğurub
Dünən İstanbulda başlayan VI Etnosport Beynəlxalq Mədəniyyət Festivalında qurulan “Azərbaycan çadırı” qonaqların böyük marağına səbəb olub.
“Ədəbiyyat və incəsənət” portalı AzərTAC-a istinadən xəbər verir ki, hər il milyonlarla insanın qatıldığı etnosportda müxtəlif xalqların milli-mənəvi dəyərləri nümayiş etdirilir. Rəsmi açılış mərasimindən sonra tədbirin keçirildiyi Atatürk Hava Limanının ərazisində quraşdırılan milli çadırlar qonaqlara təqdim edilib.
Ölkəmizin Ankaradakı səfirliyinin nəzdində fəaliyyət göstərən Azərbaycan Mədəniyyət Mərkəzinin təşkilatçılığı ilə qurulan “Azərbaycan çadırı” qonaqlarda xüsusi maraq doğurub. Milli çadırımızda Azərbaycanın tarixi və mədəniyyətinə dair guşələr yaradılıb ki, burada tariximiz, dövlətçiliyimiz və mədəniyyətimizə dair nəşrlər sərgilənir, ölkəmizin tarixi, mədəniyyəti və turizm bölgələrinin əsrarəngiz gözəlliyinə dair videoçarxlar göstərilir. Bunlarla yanaşı, çadırda sadə Azərbaycan ailəsinin ənənəvi mənzilinin nümunəsi, məişətdə istifadə etdiyi əşyalar, qədim xalçalar, suvenirlər də nümayiş olunur, milli şirniyyatlarımız qonaqlara təqdim edilir. Azərbaycan Mədəniyyət Mərkəzinin təşkilatçılığı ilə xüsusi olaraq tədbir üçün İstanbula gələn İsmayıllı rayonundan xalçaçı Ruhiyyə Süleymanova, Bakıdan miniatür rəsmlərin yaradıcısı, rəssam İlahə Cəfərli və Qəbələdən ağacoyma ustası Şahin Rəhimov sahələri üzrə əl işlərinin yaradılma prosesini canlı olaraq qonaqlara nümayiş etdirirlər. Çadırımızı ziyarət edənlər arasında Türkiyənin nüfuzlu elm xadimləri də olub.
Festivalın bədii hissəsində Mərkəzin “Xəzər” Xalq Rəqs Ansamblının ifasında milli rəqslərimizi təqdim edilib.
Mərkəzin təşkilatçılığı ilə festivalda iştirak üçün İstanbula gələnlər arasında xüsusilə sosial şəbəkələrdə yayımlanan videoları ilə türklərin böyük sevgisini qazanan Azərbaycanın Ağdam rayonunun Gülablı kənd uşaq musiqi məktəbinin müəllimi Habil Məmmədov və onun şagirdləri də var. Müəllim və şagirdlərinin dueti tamaşaçılar tərəfindən xüsusi alqışlarla qarşılanıb.
Xatırladaq ki, festivalda Azərbaycan Respublikasının Atçılıq Federasiyasının təşkilatçılığı ilə Dövlət Sərhəd Xidmətinin 52 nəfərdən ibarət heyəti iştirak edir. Onlar Qarabağ atlarının iştirakı ilə milli musiqimiz və zərif Azərbaycan rəqslərindən ibarət “Koroğlu” adlı şou-kompozisiya ilə çıxış edirlər.
Qeyd edək ki, Dünya Etnosport Konfederasiyasının təşkilatçılığı ilə bu gün başlayan VI Etnosport Mədəniyyət Festivalı iyunun 9-dək davam edəcək.
“Ədəbiyyat və incəsənət”
(07.06.2024)
“Adamın adamı”nın premyerası oldu
İyunun 6-da Azərbaycan Dövlət Akademik Musiqili Teatrında Xalq yazıçısı Anarın “Adamın adamı” pyesi və Xalq artisti Vasif Adıgözəlovun musiqisi əsasında hazırlanan eyniadlı tamaşanın premyerası keçirilib.
AzərTAC xəbər verir ki, səhnə əsərində Xalq artisti Fatma Mahmudova, Əməkdar artistlər, həmçinin teatrın xor və balet artistləri iştirak ediblər.
Tamaşanın süjet xəttində cərəyan edən hadisələrdə cəmiyyətin bır sıra problemləri satirik-yumoristik vəziyyətlərlə ön plana çəkilir. Dəbdəbəli həyat tərzi ilə seçilən, vəzifə və pul düşkünlərinin əslində sosial-psixoloji durumlarındakı natamamlıqlar obrazların dili ilə tamaşaçılara çatdırılır.
Əməkdar incəsənət xadimi Əsgər Əsgərovun yeni quruluşda hazırladığı əsər ilk dəfə 2005-2010-cu illərdə mərhum rejissor Faiq Zöhrabovun “Aldın payını, çağır dayını” adı ilə nümayiş olunub.
“Adamın adamı”nın quruluşçu dirijoru Əməkdar incəsənət xadimi Fəxrəddin Atayev, quruluşçu rəssamı Əməkdar rəssam Nabat Səmədova, quruluşçu baletmeysteri Əməkdar artist Nigar Şahmuradova, xormeysteri Əməkdar artist Vaqif Məstanov, dirijoru Səməd Süleymanlı, rejissoru Elməddin Dadaşov, konsertmeysterləri Kamil Həsənov və Fidan Məmmədova, rejissor assistenti Tamilla Aslanovadır.
“Ədəbiyyat və incəsənət”
(07.06.2024)
Mədəniyyət Mərkəzində şəhid Raul Piriyevin xatirəsi anılıb
Nigar Həsənzadə, “Ədəbiyyat və incəsənət”
Bakı Şəhər Mədəniyyət Baş İdarəsinin tabeliyində olan H.Abbasov adına Mədəniyyət Mərkəzinin təşkilatçılığı ilə Azərbaycan Texniki Universitetində şəhid Piriyev Raul Zabit oğlunun xatirəsi anılıb.
İlk olaraq Azərbaycan Respublikasının Dövlət Himni səsləndirilib, şəhidlərimizin əziz xatirəsi bir dəqiqəlik sükutla yad edilib.
Tədbirdə şəhid anaları, mədəniyyət, incəsənət və ictimaiyyət nümayəndələri, şəhidin ailə üzvləri, tələbələr iştirak ediblər.
Çıxış edənlər Raul Piriyevin qısa həyat və qəhrəmanlıq dolu döyüş yolundan bəhs ediblər.
Bədii hissədə şəhidin xatirəsinə ithaf edilən şeirlər səsləndirilib, mahnılar ifa olunub, videoçarx nümayiş olunub.
“Ədəbiyyat və incəsənət”
(07.06.2024)
STATUSLAR STATUSUnda Cavid Zeynallı
Növbətçi: Könül, “Ədəbiyyat və incəsənət”
Bu dəfə facebook sosial şəbəkəsindən yazar Cavid Zeynallının bir postunu sizlər üçün seçdim. Post teatr mövzusundadır.
Bu gün Almatı Gənc Tamaşaçılar Teatrının kiçik səhnəsində bir tamaşaya baxdıq.
Qarsiya Lorka, "Qanlı toy".
Əvvəlcə oturmuşdum, sonra ayaq üstə baxmaq istədim. Mən çox az-az hallarda təəccüblənə bilirəm. Tamaşa o qədər böyük peşəkarlıqla və ustalıqla hazırlanmışdı ki, teatrın qarşısında otelin avtobusunu gözləyəndə kimsə belə dedi:
-Bu tamaşa müzakirə olunmur.
Amma sonra nə oldu? Hamı bir ağızdan heyrətini bölüşməyə başladı.
Tamaşanın rejissoru: Dina Jumabayeva. Səhnəyə çıxmadı. Soruşdular ki, bəs rejissor hardadır? Cavab belə oldu:
-Hardasa buralardadır.
Hardasa buralarda e! Heyrət. Belə bir tamaşa qur, nə zala gəl, nə də sonda səhnəyə çıx.
Mən tamaşa haqqında çox şey yazaram. Amma yazmıram. İndi öz-özümə pıçıldayıram: istedad kopayoğlu şeydir.
Başqa heç nə!
“Ədəbiyyat və incəsənət”
(07.06.2024)
POETİK QİRAƏTdə Musa Yaqubun “Vardır” şeiri
Poetik Qiraətdə bu gün mərhum Xalq şairimiz Musa Yaqubdur. Onun “Vardır” şeiri “Yaşıl dünya naminə həmrəylik ili”nə yaraşan şeirdir. Ruhu şad olsun Musa Yaqubun!
Xoş mütaliələr!
Burda hər meşənin min cür ağacı,
Burda hər ağacın yamyaşıl tacı.
Burda hər tac üstə sarmaşıq saçı,
Hər saçın küləkdən darağı vardır.
Burda hər budağın şeyda bülbülü,
Burda hər bülbülün qönçə bir gülü,
Burda hər qönçənin yaşıl bir tülü,
Hər tülün xırdaca saçağı vardır.
Burda hər yamacın çiçəkdir daşı,
Burda çiçəklərin şehdir göz yaşı;
Burda şeh damlası bir üzük qaşı,
Hər qaşın qızılı qurşağı vardır.
Burda sərər düzə lalələr xalı,
Burda hər xalının qara bir xalı…
Hər xalda şirin bir şair xəyalı,
Burda hər xəyalın oylağı vardır.
Burda qayaların daşdır suvağı,
Burda hər daş üstə qartal caynağı,
Caynaqlı hər daşın bir buz bulağı,
Burda hər bulağın qonağı vardır,
Harda bu saydığım gözəllik olsa,
Orda Azərbaycan torpağı vardır!!!
Ədəbiyyat və incəsənət”
(07.06.2024)
Mükafatçıların müsabiqəyə təqdim etdikləri poeziya nümunələri - II YER: RƏŞAD NAĞI MUSTAFA
Bildiyiniz kimi, “Ulduz" aylıq ədəbiyyat dərgisi və Azərbaycan Ədəbiyyat Fondunun unudulmaz Xalq şairi Vaqif Səmədoğlunun 85 illik yubileyinə həsr edilmiş, 35 yaşa qədər qələm adamları arasında keçirdikləri poeziya müsabiqəsinin qalibləri artıq bəllidir.
I yer:
Cavid Qasımov;
II yer:
Rəşad Nağı Mustafa,
Allahşükür Ağa;
III yer:
Eminquey,
Seyyidəli Sübhi,
El Roman
“Ədəbiyyat və incəsənə” portalı mükafatçıların poeziya nümunələrini təqdim edir:
II YER
RƏŞAD NAĞI MUSTAFA
“MÜHARİBƏ ŞEİRİ”
Müharibə başlayıb.
Nəbatat bağındayam.
Hava yaman soyuqdur, özüm də bir az xəstə.
Heyif, evdən çıxanda papaq da qoymamışam,
Anam elə bilir ki, ölüm ayağındayam.
Müharibə başlayıb... Nəbatat bağındayam...
Mən səni gözləyirəm...
Eləcə dayanmışam Eldar şamının altda.
Gör e, adam adında ağaclar var həyatda.
Ağacların üstündən yıxılan balacalar böyüyür,
igid olur.
Mən səni gözləyirəm, amma indi, bəlkə də,
bu ağacın adaşı Şuşada şəhid olur.
Mən səni gözləyirəm...
Gəlsən, soruşma məndən, vətən səninçün nədir?
Bax indi dediklərim hamısı bəhanədir:
Anamın olduğu yer, atamın yatdığı yer,
bir də sən hardasansa, ora mənə vətəndir.
Anam heç vaxt ölməsin, sən də ölmək istəmə.
Mən atamdan bilirəm, ölüm bədahətəndir.
Mən də mütləq öləcəm, elə Eldar şamı da.
Bir əsgər anasının ümidi ölmür heç vaxt,
bir də əziz şəhidlər ölmür, başına dönüm.
Məni bərk qucaqlama, axı atan deyiləm,
məndən barıt qoxusu gəlmir, başına dönüm.
Hər şeyə baxmayaraq,
yenə də məni sevmək
çox xoşuna gəldisə,
dua et, ayrılmayaq,
duadan yaxşı nə var,
ürəyin gözəldirsə?..
“QIŞ PARKI”
Qırılar qanadın, qırılar qolun,
Uçma, qurban olum, sən hələ xamsan.
Mən yazan şeirdən düşdüsə yolun,
Bəxtəvər adamsan, xoşbəxt adamsan.
Mənə lazım deyil sənin “sağ ol”un,
Bir dəfə ürəkdən sev məni, bəsdir.
Quşların uçmağı aldadır səni,
Onlarda adətdir, səndə həvəsdir.
Qanadın buluddan böyük deyilsə,
Kədərin Uhuddan böyük deyilsə,
Lap böyük olsa da, qorxma, mən varam.
Sənin gəlişinə aşiq olmuşam.
Vurulmaq bir dəfə olur, bilirsən,
Bir də gedişinə vurulammaram.
Uçma, qurban olum, sən hələ xamsan.
Uçsan da, unutma, yerdə mən varam.
Qırılsa qanadın, yansa qanadın,
Yerə bərk düşməyə səni qoymaram.
Sən yaxşı adamsan, yaxşı adamsan.
Atam deyilsən ki, qəfil öləsən.
Əlini qaşığın altına tutub
Anam deyilsən ki, yemək verəsən.
Eybi yox, mənimçün nar dənələmə,
Bir dəfə ürəkdən sev məni, bəsdir.
Səni Qış parkında gözləyəcəyəm,
Tələsdir özünü, mənə tələsdir…
“Ədəbiyyat və incəsənət”
(07.06.2024)
İntiqam Yaşarın sevdiyi şeir Musa Yaqubdandır
Ülviyyə Əbülfəzqızı, “Ədəbiyyat və incəsənət”
Bu dəfə "Sevdiyin şeiri gəl mənə söylə" rubrikasının qonağı növbəti şeir kitabı-
"Adını çəkirəm" ilə oxucularını sevindirən DGTYB- nin başqanı İntiqam Yaşardır.
-Xoş gördük, İntiqam bəy, yeni kitabınız uğurlu olsun.
Amma bu dəfə Sizin şeirlərinizdən yox, başqa bir şairin şeirindən danışacağıq.
Poeziya milli sənət olduğu üçün xalqın tarixi, keçmişi, milli- mənəvi dəyərləri burada yaşayır.
Dahi Hüseyn Cavid gözəl söyləyib: "Əsərlər zəhərli, əxlaqsız, kefşək bir mövzu təqib edərsə, gec-tez bütün oxucularını da zəhərləmiş olar".
Gözəl poeziya ruhu da gözəlləşdirər.
Beləliklə, İntiqam bəy, şərti olaraq elə bu an üçün söyləsək ki, " Sevdiyin şeiri gəl mənə söylə" Siz bizə hansı şeiri söyləyəcəksiniz?
-Salam Ülviyyə xanım, rubrikaya dəvət etdiyiniz üçün Sizə təşəkkür edirəm. Rubrikanızı izləyirəm, çox rəngarəngdir. Sizə təqdim edəcəyim şeir ölməz şairimiz Musa Yaqubun " Bir günah sənindir, bir günah mənim" şeiri olacaq.
Musa müəllim bu şeirdə cəmiyyətin mənzərəsini, insanların yanaşmasını, insanların düşüncəsini, insan və cəmiyyət münasibətlərini çox gözəl poetik dillə bir az da məsafədən dayanaraq gözəl izah edib. Bu şeiri çox sevirəm və təkrar- təkrar mütaliə edirəm. Musa bəyə rəhmət diləyirəm, oxucularımıza isə xoş mütaliələr arzulayıram.
Musa Yaqub
Bir günah sənin, bir günah mənim
Bir gözünü mən əydim, bir gözünü sən,
Niyə narazıyıq bu tərəzidən?
Sən çeşmə qurudan, mən ağac kəsən,
Bir günah sənindir, bir günah mənim.
Bu südə su qatıb hərə bir qaşıq,
Arını şəkərə dadandırmışıq.
Bazarın yağı şor, balı qarışıq,
O mətah sənindir, bu mətah mənim.
Söz sözə gələndə sən nəfsi qıran,
Mən dünya malına göz yumub duran.
Amma ayrılıqda daşı da yaran,
Bir tamah sənindir, bir tamah mənim.
Görürük bu silah vurmur hədəfə,
Vurmur, ha atırıq mininci dəfə.
Əlimiz dolaşıb düşüb kələfə,
Bir əl gah sənindir, bir əl gah mənim.
Qoyma yalanımız qalxsın ayağa,
Hay deyirik, haya gəlmirik, qağa.
Sözü güləşdirib əhdi danmağa,
Bir vallah sənindir, bir vallah mənim.
Yamanca ustayıq hər ehtiyatda,
Dostluq şirnisi də dilimiz altda.
Amma yaman günə əlimiz altda,
Bir silah sənindir, bir silah mənim.
Ömür təsəllidi, ümid sabahdı,
İndi öz xeyrinə çoxu agahdı.
Hərə dolanışa bir cür nikahdı,
Bir nikah sənindir, bir nikah mənim.
Orda bulanıq su hopur torpağa,
Burda üzə çıxıb dönür bulağa.
Hələ ki vaxtımız var durulmağa,
Bir sabah sənindir, bir sabah mənim.
“Ədəbiyyat və incəsənət”
(07.06.2024)
