“Ədəbiyyat və incəsənət” portalının “Ulduz” jurnalı ilə birgə UŞAQ ƏDƏBİYYATINI TANIDAQ layihəsində Britaniya və Amerika uşaq şeirindən seçmələr təqdim edilir.  Şeirləri ingilis dilindən tərcümə edən Şahin Xəlillidir.

Bu gün tanış olacağınız şeir Eva Merriama aiddir. O, Amerika şairidir.

Eva Merriam

(1916-1992)

ABŞ

Dizlər

İməkləyir gör necə

Çağalar dizi üstə.

Mən çıxıram dizimlə,

Düşürəm üzü üstə.

Bax, yatmağa gözəl yer

Anamın dizləridir.

Pişik balaları

Pişik balalarının

Əynində xəz paltosu

Yatanda yazıqların

Kəsilmir xorultusu.

Dayaz qabda, bax, onlar

Gör bir necə süd içir.

Yalayanda bığını

Könlündən balıq keçir.

“Ədəbiyyat və incəsənət”

(11.06.2024)

“Ədəbiyyat və incəsənət” portalı şair, publisist, siyasi icmalçı Əkbər Qoşalının növbəti siyasi təhlilini təqdim edir. 

Misir çağdaş dünyada sivilizasiyanın beşiyi olaraq qəbul edilir. Havayı yerə deməyiblər: Misir – dünyanın anasıdır…

Azərbaycan çağdaş dünyada sivilizasiyalar və mədəniyyətlərarası diloqun əsas ünvanlarından biridir.

Misir əsas hissəsi Afrikada yerləşən qitələrarası ölkədir.

Azərbaycan əsas hissəsi Asiya, digər hissəsi Avropa qitəsində yerləşən qitələrqovuşuğu ölkədir.

Misir Ərəb Respublikasının (جمهوریّة مصر العربیّة‎‎) elanı (18.06.1953) Azərbaycan Xalq Cümhuriyyətinin (آذربایجان خالق جمهوریتي) elanından (28.05.1918) 35 il sonra, Azərbaycanın öz müstəqilliyini bərpa etməsindən (18.10.1991) isə 38 il öncə baş verib. Misirin əhalisi Azərbaycan Respublikası əhalisindən təqribən 10 dəfə çox, ərazisi təqribən 12 dəfə böyükdür.

“Dünyanın anası”nın himnində üç dəfə təkrarlamaqla “Biladi” - “Mənim ölkəm” vurğusu edilir.

Bizdə himnin başlanğıcında iki, sonunda dörd dəfə “Azərbaycan” deyilir...

Azərbaycan Prezident İlham Əliyev iyunun 8-də Misirdə rəsmi səfərdə oldu, önəmli görüşlər, qarşılıqlı maraq doğuran məsələlərin müzakirəsini keçirdi, Misirli həmkarı ilə birgə mətbuata bəyanatla çıxış etdi.

Artıq 8 aydır beynəlxalq ictimaiyyətin diqqəti Misirin yanıbaşında – Qəzza zolağında, Fələstində, İsraildədir... Quzey-doğu hissəsi Asiya qitəsində olan Sinay yarımadasında yerləşən Misir, gündoğarda Fələstin, İsrail və Qəzza zolağı ilə həmhüduddur.

Misirin aid olduğu coğrafiya yalnız son ayların deyil, son illərin ən mürəkkəb hadisələrinə səhnə olub və olmaqdadır. Misir özü bir neçə il öncə gərgin daxili çaxnaşmalardan keçdi. Bölgəsinin çəkili ölkəsi olan Misirlə bizi yalnız uzaq tarix, eyni din inancı deyil, beynəlxalq məzmunlu məsələlərə ortaq baxışımız və bu ortaq baxışı sərgilədiyimiz, üzvü olduğumuz beynəlxalq qurumlar (da) birləşdirir. Azərbaycan Prezidentinin Qahirədə dediyi kimi: “Bütün beynəlxalq məsələlərdə bizim fikrimiz üst-üstə düşür. Hər iki ölkə beynəlxalq təşkilatlar çərçivəsində fəal çalışır, o cümlədən BMT, Qoşulmama Hərəkatı, İslam Əməkdaşlıq Təşkilatı çərçivəsində fəal əməkdaşlıq olunur, habelə İslam həmrəyliyinin gücləndirilməsi istiqamətində birgə səylər göstərilir”.

Yuxarıda da vurğuladığımız üzərə, Misir yanıbaşında yaşanan qanlı olaylara biganə deyil, əlbəttə; Azərbaycan özü Ermənistanın (havadarlarının hərtərəfli dəstəyi ilə) həyata keçirdiyi 30 illik işğalın ağır sonuclarını yaşayıb, soyqırım aktları görüb, itkinlik görüb… Azərbaycan II Qarabağ müharibəsi və ondan sonra qısamüddətli antiterror tədbirləri ilə öz ərazi bütövlüyünü bərpa etmiş qürurlu, güclü dövlətdir. Bu güc, qürur həm də onu ifadə edirk ki, bütün yaşanmışlara baxmayaraq, Azərbaycan məhz sülh üçün çalışır, müharibədə olduğu kimi, sülhdə də qızıl ləyaqət göstərir. – “Azərbaycan keçən ilin sentyabr ayında öz dövlət suverenliyini və ərazi bütövlüyünü tam bərpa etmişdir. Bu, Ermənistan ilə normallaşdırma yolumuzda önəmli amil olacaqdır. İki ilə yaxındır Azərbaycan-Ermənistan şərti sərhədində sakitlikdir, heç bir atəşkəs pozuntusu müşahidə edilmir”. – Prezident İlham Əliyev bunları Qahirədə söylədi. Əlavə etdi ki: “Danışıqlar prosesində irəliləyiş üçün yaxşı imkanlar var. Azərbaycanın Qazax rayonunun otuz ildən çox müddət ərzində işğal altında olmuş dörd kəndi danışıqlar yolu ilə Azərbaycana geri qaytarılmışdır”.

Güclü havadarlarına arxalanan Ermənistan kimi bir keçmiş işğalçı ilə münasibətlərdə belə gələcəyə baxan sülhpərvər Azərbaycan, Fələstin-İsrail münasibətlərinin də məhz ədalətli sülh anlayışı içində (beynəlxalq hüquq normalarına uyğun) həllinin tərəfdarıdır: “Fələstin-İsrail münasibətlərinin tənzimlənməsi və müstəqil Fələstin Dövlətinin yaradılması bizim Qoşulmama Hərəkatına sədrliyimiz dövründə hər zaman diqqət mərkəzində idi. Bir çox tədbirlər keçirilmişdir və Azərbaycanın mövqeyi birmənalıdır - müstəqil Fələstin Dövləti qurulmalıdır, Şərqi Qüds onun paytaxtı olmalıdır”.

Azərbaycan Prezidenti Qahirədə Azərbaycan dövlətinin prinsipial mövqeyini bu cümlə ilə duyurdu: “Qəzzada yaşanan faciə tezliklə dayandırılmalıdır, müharibə dayandırılmalıdır və bütün məsələlər danışıqlar yolu ilə həll olunmalıdır”.

Beləliklə, Azərbaycan Prezidenti İlham Əliyevin Misirə səfəri əlamətdar hadisədir. Prezident Əbdülfəttah Əs-Sisinin ötən il ölkəmizə səfəri də əlamətdar hadisəydi Müxtəlif əməli çalışma sahələri üzrə qarşılıqlı faydalı işbirliyimiz ilbəil möhkəmlənir. Bizim işbirliyimiz bir sıra regional, beynəlxalq məsələlərə kontstruktiv baxışın formalaşması, beynəlxalq ictimaiyyətə çağırışlar və s. baxımından da yeni səhifələrin açılmasına səbəb olur. Prezidentin dediyi kimi, “Ölkələrimiz arasındakı siyasi dialoq müntəzəm xarakter daşıyır. Bu siyasi dialoq bundan sonra da davam ediləcək”.

Prezident Əliyev Prezident Sisini COP29-un açılış törəninə dəvət etdi.

Misir Qoşulmama Hərəkatında ən ilk dönəmlərdən aktiv mövqe tutan ölkədir və Afrikanın, demək olar, bütününü əhatə edən Hərəkatın yeni inkişaf dönəmi Azərbaycan Prezidentinin bu beynəlxalq quruluşa sədrlik etdiyi illərlə sıx bağlıdır. Azərbaycanın Misirin soy və din qardaşlarının qayğılarına aşina olması, mümkün dəstəklər nümayiş etdirməsi, heç şübhəsiz, Misirdə də bilinir.

Ayrıca, Azərbaycan Türk Dövlətləri Təşkilatının qurucu üzvüdür və Prezident Əliyev Misir səfərindən öncəki gün TürkPA-ya üzv ölkələrin parlament sədrlərini qəbul etmişdi. “Mən əminəm gün gələcək ki, dünyanın bütün məsələlərini Türk Dövlətləri Təşkilatı ilə məsləhətləşmə yolu ilə həll edəcəklər” – İlham Əliyev bu sözləri həmin görüşdə demişdi. Azərbaycan Prezidentinin Misirə rəsmi səfəri, orada verdiyi ismarıclar Türk Dövlətləri Təşkilatının baxışı kimi də şərh oluna bilər. Gəlin bu yerdə Misir – Türkiyə münasibətləri zəifləyən vaxtlarda, məsələn, Fransa-Misir, Yunanıstan-Misir gəliş-gedişlərinin necə sıxlaşdığını yada salaq. Qardaş Türkiyənin Aralıq dənizində iki gündən bir “NAVTEX” elan etmək zorunda qaldığı, ondan öncə Liviya və Türkiyənin Aralıq dənizində Dəniz Yetki Alanlarının Sınırlandırılması Anlaşması (27.11.2019) imzaladığını yadımıza salaq. Həmin Anlaşmadan 7 ay sonra (06.08.2020) Misirlə Yunanıstan Dəniz Yetki Alanlarının Sınırlandırılması Anlaşmasını imzaladı... Həmin anlaşma imzalanandan 27 gün sonra (02.09.2020-ci ildə) Azərbaycan Prezidenti Yunanıstanın ölkəmizdə yeni təyin olunmuş fövqəladə və səlahiyyətli səfiri Nikolaos Piperiqkosun etimadnaməsini qəbul edirdi. “Cənab səfir, mən sizinlə açıq danışacağam. Sözsüz ki, diplomatların özlərinə məxsus ünsiyyət üslubu olur. Mən diplomatlar hazırlayan institutda təhsil almışam. Ona görə də mən diplomatik dilin nə olduğunu bilirəm. Lakin zənnimcə, yaxşı olar ki, harada olduğumuz, nə istədiyimiz və necə irəli getməyimizlə bağlı aydın anlayışa sahib olmaq üçün bir-birimizin mövqelərimizi bilək” deyən Azərbaycan Prezidenti çox vacib mövzulara toxundu. Onlardan biri də Türkiyə və Yunanıstan arasında Şərqi Aralıq dənizi regionunda o dönəmdə baş verən gərginlik idi: “Bu sirr deyil ki, Türkiyə təkcə bizim dost və tərəfdaşımız yox, bizim üçün qardaş ölkədir. Biz heç bir tərəddüd etmədən Türkiyəni dəstəkləyirik və bütün hallarda dəstəkləyəcəyik. Biz eyni dəstəyi türk qardaşlarımızdan da görürük. Onlar Azərbaycanı bütün məsələlərdə dəstəkləyirlər və biz onları bütün məsələlərdə dəstəkləyirik, o cümlədən Şərqi Aralıq dənizində kəşfiyyat məsələsi ilə bağlı. Mən istəyirəm ki, siz bizim mövqeyimizi biləsiniz. Bu mövqe mənim göstərişimlə artıq Azərbaycan hökuməti tərəfindən rəsmi açıqlanmışdır. Sizə bir daha deyə bilərəm ki, Türkiyə bizim üçün təkcə dost yox, qardaş ölkədir və türklər bizim qardaşlarımızdır. Beləliklə, bütün məsələlərdə biz onların yanında olacağıq”.

2013-cü ildən sonra Misir-Türkiyə siyasi bağları müvəqqəti işlər vəkili səviyyəsinə enmişdi. 9 ildən sonra – 2022-ci ilin noyabrında Fütbol üzrə Dünya Kuboku yarışlarına evsahibliyi edən Qətərin Əmiri Təmim bin Həməd Al Saninin vasitəçiliyi ilə Misir və Türkiyə liderlərinin görüşü baş tutdu. Türkiyə və Misir prezidentlərinin Dohada yüksək səviyyəli dialoqa başlaması, bizim qardaş ölkəmizlə dost ölkəmiz arasında münasibətlərdə yeni başlanğıc oldu...

Elə bilirəm, bu xatırlatmalar, Azərbaycan-Misir münasibətlərinin inkişafının digər qardaş, dost ölkələrin, o cümlədən Türk Dövlətləri Təşkilatının da çıxarlarına cavab verdiyini göstərməkdədir...

Qitələrarası Misirlə qitələr qovuşuğunda yerləşən - ərazisindən həm Gündoğar-Günbatar, həm Quzey-Güney daşıma dəhlizlərinin keçdiyi Azərbaycanın işbirliyi yeni uğurlar vəd etməkdədir. Bunu iyunun 8-də Qahirədə imzalanmış Azərbaycan-Misir sənədləri bir daha sübut edir:

- Gənclər və idman sahələrində əməkdaşlıq haqqında Anlaşma Memorandumu;

- Bakı şəhər İcra hakimiyyəti ilə Qahirə Qubernatorluğu arasında dostluq və əməkdaşlıq haqqında Anlaşma Memorandumu;

- Elektrik və bərpaolunan enerji sahələrində əməkdaşlıq haqqında Anlaşma Memorandumu;

- AZPROMO ilə Misir Ərəb Respublikasının Sərmayə və Azad Zonalar üzrə Baş Qurumu arasında 2024-2025-ci illər üzrə Birgə Fəaliyyət Planı;

- Azərbaycanın İqtisadiyyat Nazirliyi ilə Misirin Neft və Mineral Ehtiyatlar Nazirliyi arasında əməkdaşlıq haqqında Niyyət Protokolu;

- Azərbaycanın İqtisadiyyat Nazirliyi ilə Misirin Beynəlxalq Əməkdaşlıq Nazirliyi arasında təcrübə mübadiləsi haqqında Anlaşma Memorandumu;

- İnformasiya və kommunikasiya texnologiyaları sahəsində əməkdaşlıq haqqında Anlaşma Memorandumu.

İmzalanmış sənədlər, əldə edilmiş razılaşmalar ölkələrimiz arasında ticarət dövriyyəsini daha da artıracaq. Energetika, bərpaolunan enerji növlərinin istehsalı, neft sənayesi, əczaçılıq, alüminium sənayesi və b. sahələrdə daha yaxşı sonuclara varmaq mümkün olacaq. Hər bir sahə üzrə işbirliyi isə digər sahələr üzrə işbirliklərini tətikləyir – uğur uğur gətirir...

DÖVLƏTİMİZ ZAVAL GÖRMƏSİN!

“Ədəbiyyat və incəsənət”

(11.06.2024)

 Azərbaycan Ədəbiyyat Fondu və Bakı Şəhəri üzrə Təhsil İdarəsinin birgə “Bir direktor, bir şagird” adlı layihəsi uğurla icra olunmaqdadır. 

Layihənin əsas məqsədi nümunəvi məktəblərimizi, istedadlı şagirdlərimizi üzə çıxarmaq, onların ədəbiyyata olan marağına diqqət yönəltməkdir. 

Tədris ili müddətində bir neçə məktəb layihənin iştirakçısı olub və bir-birindən gözəl esselərlə şagirdlərimiz öz potensiallarını, yazma, düşünmə, analizetmə qabiliyyətlərini nümayiş etdiriblər. 

Bununla bərabər, öz işinin peşəkarı olan təhsil müəssisələrinin rəhbərləri də bu layihənin iştirakçısı olublar. Rəhbər idarəetmə sisteminin əsas fiqurudur. Hər hansı idarəetmə prosesində, o cümlədən məktəbin idarə olunmasında ən əsas mövqe, məsuliyyət rəhbərə - direktora məxsusdur. Məktəb rəhbərləri məktəb işinin məzmununu dərindən mənimsəməklə demokratik prinsiplərə istinadən operativ təşkilatçılıqları ilə təlim- tədris prosesinə əsaslı təsir göstərirlər. Layihənin bir özəl tərəfi də odur ki, məktəb rəhbərlərinin şagirdlərinə olan səmimiyyət və sevgisini nümayiş etdirir.

Layihə “Ədəbiyyat və incəsənət” portalının media dəstəyi ilə həyata keçirilir. Layihənin əlaqələndiricisi fondun əməkdaşı Ülviyyə Əbülfəzqızıdır. 

Rubrika sayəsində çoxminli oxucu auditoriyası bir çox məktəb direktorları və istedadlı şagirdlərimizlə tanış olublar.

Ülviyyə Əbülfəzqızı söyləyir: 

-Gəlin birlikdə bir daha layihə iştirakçıları olan şagird və direktorların bir neçəsini xatırlayaq. Diqqət çəkən şagirdlərimizdən biri ən azyaşlı iştirakçımız - 247 nömrəli tam orta məktəbin 3- cü sinif şagirdi Əkbər Qorodayev oldu. 

Əkbər "Kitab aşiqi" essesi ilə kitabların dəyərli dost olduğunu vurğuladı. O, oxuduğu bir neçə kitabın adını söyləyərək mütaliənin əvəzsiz olduğunu bildirdi. Əkbərin essesindən son bir neçə cümləyə nəzər salaq:

"İstərdim ki, bütün uşaqlar maraqlı kitabları oxusunlar. Oxusunlar ki, daha da böyüsünlər, zənginləşsinlər, gələcək addımlarını atanda düşünüb hərəkət etsinlər.

Nə vaxtsa haradansa oxuduğum bu fikirlə yazımı tamamlayıram:  “10 yaşına qədər həftədə ən azı 1 kitab oxuyan uşaqda 16 yaşına çatdıqda həftədə 1-dən az kitab oxuyan uşağa nisbətdə təlim nailiyyətlərinin daha yüksək olduğu müşahidə edilmişdir.” Yoldaşlarımın  da təhsildə nailiyyətlərinin,  danışma, ünsiyyət bacarıqlarının, dünyagörüşünün yüksəlməsi üçün daha çox kitab oxumasını tövsiyə edirəm. Oxuduğumuz kitablar haqqında qısa məlumat verir, digərlərini də oxumağa sövq edirik, hətta aramızda “Mən oxudum, sən də oxu” şüarı altında kitablarımızı bir-birimizə ötürürük."

247 nömrəli tam orta məktəbin direktoru Sitarə xanıma və şagirdimiz Əkbərə uğurlar diləyirik.

Növbəti yazısı ilə fərqlənən şagirdimiz isə 83 nömrəli məktəb- liseyin əlaçı şagirdi Tərlan Həsənovadır. 

Bu şagirdimiz " Azərbaycan qadını dünyanın

səkkizinci möcüzəsidir" adlı essesi ilə yaddaşımızda iz saldı. Şagirdimizin essesindən bir parçaya nəzər salaq:

"Mehriban xanım bu gün müasir Azərbaycan qadınının ən mükəmməl obrazıdır. Azərbaycan qadını - gözəl ana, vəfalı ömür-gün yoldaşı, elini-obasını düşməndən qoruyan, haqq-ədalət yolunda qanını-canını əsirgəməyəndir. Azərbaycan qadını - övladını torpağa əmanət edən, “Şəhadətin mübarək” deyərək, ən böyük “Şəhid anası” titulunu şərəflə daşıyandır. Azərbaycan qadını - bir saçını ağ, birini qara hörən, bu dünyada o dünyadakı ömür-gün yoldaşına vəfalı olandır. Azərbaycan qadını - dünyanın səkkizinci möcüzəsidir!

”Qadınsız insan yoxdur, qadınsız həyat yoxdur” Bu sözlərsə Ümummilli lider Heydər Əliyevə məxsusdur!"

83 nömrəli məktəb- liseyin direktoru Almaz Bayramova və şagird Tərlan Həsənovaya  uğurlar diləyirik.

Növbəti uğurlu şagirdimiz Bakı şəhəri Məktəb Lisey Kompleksinin 11- ci sinif şagirdi Kənan Quliyevdir. Şagirdimiz essesində günümüzün ən aktual məsələlərindən birinə toxunmuşdur. Kənan Quliyevin "Stress: müasir görünməz problem" adlı essesindən bir parçaya diqqət edək:

"Stresssiz-hesabsız inkişafa baxmayaraq, fərdlərin onun enerjisinə təsirini yumşaltmaq və davamlılıq inkişaf etdirmək üçün strategiyalar qəbul edilə bilər. Məşq, ibadət və istirahət üsulları kimi stressi azaldan fəaliyyətlərlə məşğul olmaq stress reaksiyasını tənzimləməyə və emosional rifahı söndürməyə kömək edə bilər. Güclü sosial əlaqələr qurmaq və dostlardan, ailədən və ya psixi sağlamlıq mütəxəssislərindən kömək axtarmaqdadır. Bundan əlavə, düzgün qidalanma, adekvat yuxu və vaxtın idarə edilməsi təcrübələri üzrə sağlam həyat tərzini inkişaf etdirmək mümkündür.

 Son olaraq, stress kimi güclü təsirdən qaynaqlanan və fiziki, emosional və psixikaya təsirli müasir dövrdə geniş yayılmış aspektdir. Stressin səbəbləri və nəticələrini başa düşmək effektiv mübarizə strategiyalarını tətbiq etmək, fərdlər daha çox güclü olmaq və rifahla həyat fəaliyyətinin öhdəsindən gələcək."

Məktəbin direktoru Esmira Quliyeva və şagird Kənan Quliyevə bol nailiyyətlər diləyirik.

 Zaman yel qanadları ilə ömrümüzdən elə sürətlə keçir ki, heç ruhumuz da incimir. Beləcə bir tədris ilinin də sonuna gəldik. Rubrikanın son qonağı isə 189-190 nömrəli tam orta məktəb oldu. Həmin məktəbin 11- ci sinif şagirdi Əziz Əlizadə "Uğur hekayəsi" adlı yazısı ilə bizə uğur yolunun xəritəsini göstərdi.

Gəlin Əlizadə Əlinin bu essesindən bir parçaya nəzər salaq:

"Təbii ki, heç bir uğur təkbaşına qazanılmır. Bu yolda mənə dəstək olan ailəm, mənə məndən çox inanan müəllimlərim uğur hekayəmi yazmaqda mənə kömək oldular. Ancaq əminəm ki, bu hekayə tamamlanmayıb. Əldə etdiyim bu uğur hekayəmizin başlanğıcıdır, davamını yazmaq üçün daha qətiyyətlə çalışmalı, çətinliklərdən qorxmamalı, ən əsası, özümüzə inanmalıyıq. Onda uğur da daim bizimlə olacaq."

189- 190 nömrəli məktəbin direktoru Fayaz Hüseynova və şagird Əziz Əlizadəyə uğurlar diləyirik.

Ümummilli Lider Heydər Əliyevin bu sözlərini bir daha xatırlayaq: “Təhsil millətin gələcəyidir. Xalq həmişə öz ziyalıları, öz mədəniyyəti, öz elmi ilə tanınır."        

Azərbaycan Ədəbiyyat Fondunun Bakı Şəhəri üzrə Təhsil İdarəsi ilə birgə “Bir direktor, bir şagird” adlı layihəsi yeni tədris ilində də davam edəcəkdir. 

“Ədəbiyyat və incəsənət”

(11.06.2024)

“Ədəbiyyat və incəsənət” portalı yazıçı, dramaturq Orxan Fikrətoğlunun “Ləkəli təkərləmə....” hekayəsini təqdim edir. 

Orxan Fikrətoğlu 1966-cı ildə Bakı şəhərində anadan olub. 1983-1991-ci illərdə Moskva şəhərindəki bitirib. 1983-cü ildə kinoda işıqçı kimi fəaliyyətə başlamışdır. Müxtəlif dövrlərdə C.Cabbarlı adına “Azərbaycanfiım” kinostudiyasının, Dövlət kino komitəsinin, AzərTelefilmin, baş redaktoru işləyib. Dövlətlər arası MİR Teleşirkətinin direktor müavini, Mozalan satirik kinojurnalının direktoru və ANS teleşirkətinin baş icmalçısı olub. On dörd bədii, üç publisitik kitabın müəllifidir.

İlk hekayəsi 1981-ci ildə “Kirpi” jurnallnda çap olunub. Ondan sonra dövrü mətbuatda yüzlərlə hekayə, povest və publisistik yazılar çap etdirib. Onlarla bədii filmin ssenari müəllifidir. Əsərləri İran, Türkiyə, Bplqarıstan, İsveç və bir çox dünya ölkələrində çap olunub. "Yeddi" romanı Almaniyada mükafata layiq görülüb. Onun hekayələri OKSFORD Universitetinin dərsliklərinə salınıb. Bir sıra Respublika mükafatları laureatıdır. Hekayələri "Dünya Nəsr Antalogiyasına" düşüb.

Orxan Fikrətoğlunun, "TAS", "Qıyığın ölümü", "Şəkilçi və şəkilçi " pyesləri ölkə teatrlarında səhnələşdirilib. Ssenariləri əsasında onlarla film çəkilib.

2023-cü ildə Mədəniyyət nazirinin müşaviri təyin edilib. Həmçinin həmin ilin dekabr ayından Azərbaycan Respublikası Kino Agentliyinin (ARKA) baş direktorunun vəzifəsini icra edir.

Ləkəli təkərləmə....

Hekayə

Ağlı ilə deyil, ürəyiylə yaşayan  Qəqəni Səfərin ruhuna ...

Radionun səsi məhlənin üstünə yun şal kimi atılıb. Evlər istidən tərləyib, qapılar əsnəkdi. Hündür binaların ayağı altında qalmış məhlə kartondan düzəldilmiş kino-dekora oxşayır. Damlar ağ-qara şəkillər kimi parlaqdı. Adamların üzü muğam zəngüləsinin avazı təki ləngərlə təkrarlanır.  

Segahın şirin yerində hardansa Dürnisə  arvadın xırıltılı səsi eşidilir : - “Bir də bu dünyaya gəlsəm,

Atamın goru üçün qəhbə olacam.”

Abrından dastanlar danışılan Dürnisənin  gəldiyi qənaət quşbaz Kərimi heyrətləndirir. “Əbrəş” göyərçinini qıvrım buludlu göy üzünə buraxıb Dürnisənin qırışmış əllərindən öpür.

-Elə danışma böyük məmə, biz sənə baxıb qız böyümüşük.”-  deyir.

Dürnisənin çölə çıxmış gözləri Kərimin sözündən sonra yerinə qayıdır. Arvad işıqlanıb : - “Matışkə kişilər kimi əlimi nöş öpürsən, alə ” –söyləyir.

Dürnisənin min illik ərkini tanıyan Kərim toxtayır.

Göydə qəzəl qafiyəsi kimi oynaşan quşlarına baxıb, fit çala-çala dama qalxır. Məhlə əxlaqından arxayın olmuş Kərimin fiti də sevincəkdi.

İkimərtəbəli köhnə mülk uzaqdan yastı balabana oxşayır. Kərim bu balabanın deşikli yerindən durbinlə şəhərə baxır. Şəhər damdan çox hündürdədi, görünmür. O, hündürlüyə baxandan sonra Kərim çevrilib ayağı altında qalmış məhləsinə də baxır. Məhlə baxışlarından çox aşağıdadı. Xır əkən bəstəboy  “kəndliyə” oxşayır.

Dürnisə arvad köhnə palazın üstündə oturub yun çırpır.  İlləri ələmiş əllərinin heyi qalmayıb. Yun çubuğu üzü üzlər görüb yaprınmış yunu didə bilmir, eləcə havanı dilləndirir. Biri birinin əlindən tutmuş yunlar dəcəl uşaqlar təkin çubuqdan yayınıb yer üstündə “şalaxo” oynayırlar. Dürnisə arvad, orkestri çaşdrımış naşı dirijora oxşayır.

Valya xalanın əri Andro qapılarının ağzında başı aşağı durub altdan yuxarı məhlədəkilərə tamaşa edir. Uzaqdan Andro həvəngin dəstəsinə oxşayır. O, məhləyə köçəndən hamının baxışı dəyişib, altdan yuxarı olub. Əvvəl məhlənin gözünə yaxşı görünən nəsə indi pis görünür. Əvvəllər pis kimi tanınan adam indi yaxşı adam kimi tanınır. Daha məhlədə eyib tutan yoxdur. Nə istəsən eləyə bilərsən. Qınamayacaqlar. Hamının başı özünə qarışıb. ”Veçernə bazarında” olduğu kimi məhlə daha bahanı ucuz alır. Buludlardan aşağı taxtadan yonulmuş iki  quş asılıb. Dinc gözləri qapalı, qanadları parıltılı, cinsi, adı bəlli olmayan quşlardır. Uçub eləmirlər. Eləcə göydən asılıblar. Qızılı lələkləri var.  Xəzri olanda Xəzriyə, Gilavar olanda Gilavara yellənirlər. O, quşları küləyin gicavar vaxtı buludlardan  kim asıb, niyə asıb, heç kəsin xəbəri yoxdur. Məhlədə heç kəs bu sualın cavabını axtarmır da. Hamı gözünü açandan o quşları göydən asılı görüb. Gözləri ilə gördükləri möcüzənin niyə  quş şəklində olduğu da heç zaman məhlə adamlarına çöçün gəlməyib. Quşlar onların sirridir. Onlar bu möcüzəni gözləri ilə görə bildiyi üçün hər axşam göyə dua edirlər. Bu adamlar sirr adamlarıdır. Seçilmişdilər.  Elə bir iş bilirlər ki, bu işi başqaları bilmir. Bu sirr həm də onları  göyə yaxın edir. Göydəki ilə qohum kimi yaşayırlar. Göydən aşağı ancaq onların məhlələrində quşlar sallanıb.

Başqa məhlələrin quşları da başqadır, adamları da. Quşa görə onlar qəzavü-qədərə də daha çox bağlıdırlar. Olana tabe olandılar.  İnandıqları yeganə möcüzə bu quşlardır. Quşlar onları görünən üfüqün cızığından çıxarıb. Doğulandan təkkə uşaqları kimi dincliyə, özünə qapanmağa meyillidilər. Ayaqlarına geyindikləri rezin “şap şuplarını” kandarda çıxarıb dünya xalçadı deyə üstünə çıxmırlar. Gözləri həmişə göydədir. Dəyişikliyi ordan gözləyirlər.

Səlimin oğlu Bahadır özünü tanıyandan tində dayanır. Bir ayağını qaldırıb divara söykəmiş Bahadırın saçları Buzovna yeli kimi titrəkdi. Məhlənin xırda uşaqları əsgər marşı oxuya-oxuya Bahadırın qarşısından keçib gedirlər. Bahadır yorğun Generallar kimi onlara əl eləyir.

Hər dəfə birinci mərtəbəinin kəllə qapısı açılanda Kərim udqunur. Qapıdan çölə çıxan Mərdan kişi hər səhər əlində təzə daş güzgü tutur. Güzgünün üstünə düşən gün işığı Kərimin gözlərini qamaşdırır. Mərdan əlində tutduğu güzgünü hər səhər  tut ağacına söykəyir. Güzgünü görən məhlə adamları ağacın başına toplaşırlar. Güzgüdə görünən üzlərini biri-birilərinə göstərib gülüşürlər. Nədənsə onlara  öz üzləri  güzgüdə gülməli görünür. Uşaqların oxuduğu əsgər marşı da güzgüdə məzəli səslənir.

Gülən adamlara yuxarıdan baxan Kərim hər səhər “Olanla görünən yəqin  başqa başqadır ” deyə düşünür.

Vaxtdan çıxmaq istəyən başıaşağı Andornun hər səhər altdan yuxarı səsi eşidilir : -“Ay kişilər belə yaşamayın. Düşər düşməzi olar. Elə bilirsiz Allahın səbri bir gün tükənməyəcək?”

Hər səhər məhlə adamları himə bənd imiş kimi bu sözlərdən sonra gülməklərini kəsib ağlayırlar.

Onda Andro ucadan: - “Ağlamaq lazım deyil. Mən başqa zaddan danışırdım.”- qışqırır.

Hər səhər məhlə adamları Mərdanın güzgüsünü daşla vurub  sındırırlar. Hər səhər Mərdan sınıq güzgüsünü götürüb məhlədən qaçır.

Sonra yenə səhər də,

güzgü də, Mərdan da məhləyə qayıdır...

 Qafar kişi məhlənin nəfəsliyidir.

Məhləyə gələn yel ondan keçib içəri girir. Qafar günəbaxana oxşayan arvadı ilə qapısının ağzındakı artırmada oturub çay içir. Arvad hər səhər Qafara özünə çöçün görünən tərsəvand sualını verir.

-“Qədeş, necə olur ki,meşədə bitən ağac susuz böyüyür, baxçada əkilən ağac böyümür? ”

Qafar dərindən nəfəs alıb üzünü arvadına tutur: - “Adamlar da belədir. Kökü susuz olanı var” - deyir.

Arvadı Qafarın nə dediyini anlamasa da evdə qanqaraçılıq düşməsin deyə dinmir. Qapıya sarı boylanır. Məhlənin qapıları ağzında əlində qırıq büst tutmuş Mərdan dayı dayanıb. O, elə indicə qan tər içində həyətə girib bürünc büstü tut ağacının altına qoyub. Məhlə adamları Mərdanın yerə qoyduğu büstü dövrəyə alıblar. Nadir kişi :-“ Bu kimdir,alə? “ - soruşur.

Mərdan:-“ Proletariatın rəhbəri  Lenindir ”- deyir.

Nadir kişi: -“Alə, Lenin qurtardı da, it əl çəkib, motal əl çəkmir? ” - qışqırır.

Mərdan həyacanla məhlə adamlarının üzünə baxıb :-“Onu məhlədə gizlədə bilərəm?”- soruşur.

Dürnisə arvad:- “ Kimdən? ” – xəbər alır.

Mərdan:-“ Heykəlləri sökürdülər. Buna yazığım gəldi. O boyda kişidən bircə bu baş qalıb. Onu da kəsirdilər. Yəni mənim bir baş qədər bu məhlədə hörmətim yoxdur? Nə olar, icazə verin Lenini məhlədə gizlədim”. - deyir.

Səməd kişi söhbətə qoşulub:-“ Mərdan,  bizi fırlatma... vaxtı gələcək, bu başın “Sabunçu baraxolkasında”  yaxşı qiyməti olacaq. Satılanda sənə şərikəm ha...? ” - söyləyir.

Mərdan söhbətin bitdiyini anlayıb Leninin büstünü qucağına alır. Səntirləyə səntirləyə qapısına səmt gedir.

Dürnisə arvadın nəvəsi Sübhan qaça-qaça həyətə girib nənəsinin qırxtaxta tumanı altında gizlənmək istəyir.

Nadir kişi Sübhana :- “ Nənənin dalına niyə girirsən, alə ”- qışqırır.

Sübhan ağlaya-ağlaya :-“ Dünyadan qorxuram”- deyir.

Dürnisə arvad abrını vermək üçün Nadir kişiyə tərəf çönmək istədiyi an həyətə nazirlər kimi bahalı kostyum geyinmiş iki kişi girir.

Bahalı kişilərdən biri çantasından çıxardığı  “noutbuka” baxıb:-“  Mərdanov qardaşları, on səkkiz A buradır ? ”-soruşur.

Məhlə adamları:-“Buradır ”- deyirlər.

İkinci kişi :-“Sizin kanalzasiya xətləriniz tutulub, təmir eləməyə gəlmişik”-söyləyir.

Səməd kişi gələnlərin bahalı görkəmlərinə göz vurub :-“ Siz doğurdan “zaxod” düzəldənsiz ? ”- soruşur.

Nisbətən cavan kişi:-“ Belə baxanda mən professoram, elmi açılışlarım da var. Kolleqam da elə-belə adam deyil. On il bundan qabaq yeni modeldə nüvə silahı icad etmişdi.”- deyir.

Səməd kişi köksünü ötürüb:-“ Keçmiş olsun, bala. Sonra nə oldu ki ? ”- soruşur.

İkinci kişi:-“Sonra bizə boru işlərini etibar etdilər. Elm zamanı deyil. Bazar dövrüdür. Neynəyək ? Acından ölək? Alimlərin çörəyi həmişə “poxdan” çıxır. Bu formulun subuta ehtiyacı yoxdur”, -deyir.

Səməd kişi:-“ Sizə baxanda Mərdana çox şükür ” - deyib qapısına tərəf gedir.

“Bahalı kişilər”-dən biri əlindəki iri açarla kanalizasiya xəttini döyəcləyir. İki-üç zərbədən sonra köhnə cuğun boru açarın zərbinə dözməyib partlayır..

Borudakı pislik çölə fışqırır...

Həyəti üfünətli qoxu bürüyür..

İki-üç dəqiqənin içində borudan fışqıran çirkab cu həyəti basır....

Qapılar, adamlar çirkli su altında qalıb görünməz olurlar....

“Bahalı kişilər” borunu təmir edə bilməyəcəklərini anlayıb məhlədən qaçırlar.

Göz görəsi bir-iki saatın içində məhlə çirkab suların altında görünməz olur. 

Hardansa uzaqdan, suların altından Dürnisə arvadın nəm səsi eşidilir: ”Mən sənə neynəmişdim ki, axırımı belə yazdın, ey yeri göyü heç nədən yaradan kişi ? Məni bir təmiz yerdə öldürə bilmirdin? ”.

Kərim çirkabın göydən asılan möcüzə quşlara qədər qalxdlğını görəndə əlindəki durbini  kənara atır. Çevik həmləylə quşlardan birinin belinə hoppanır. Quş belində adam olduğunu hiss edib dirilir. Kərim  taxta quşun  gözlərini açdığına sevinir. Barmaqlarının ucuyla onun isti qanadlarını sığallayır. Quş bu təmasa bəndmiş kimi göydən asılı iplərini qırıb buludlara doğru uçur. Kərim geriyə çevriləndə o biri quşun da arxalarıyca süzdüyünü  görür. Min illik yuxudan oyanmış müqəddəs quşlar haralarasa çox yuxarılara doğru uçurlar. Hara getdiyini əvvəllər də düşünməyən Kərim belində oturduğu quşun iradəsindədir. Hara gedəcəyi onun üçün həmişə olduğu kimi bu gün də maraqlı deyil. Bu haqda heç düşünmür də.  Onun üçün maraqlı olan yolun özüdür. Amma hardansa içində göynək bir sızıltı da var.

İndicə ayrıldığı keçmişi onu doğma haləsindən asanca buraxmaq istəmir. Son dəfə çevrilib çirkaba batmış keşmişinə, ömrünü yuxudaymış kimi şirin-şirin yaşadığı məhləsinə baxır. Məhlə görünməsə də, xatirəsi görünür. Keçmiş gözünün tutumundadır. Gözdən kənarda keşmiş olmur. Ancaq gələcək olur. Gələcək Kərimi qorxudur. Görəsən altındakı quş onu hara aparacaq ? Oralarda nə var? Gələcək keçmiş qədər tanış deyil deyə qorxuludur. Bir var harasa öz iradənlə gedəsən. Bir də var səni harasa aparalar. Bunlar fərqli- fərqli hallardır. 

Kərim çətinlikə də olsa gözlərini açıb aşağı boylanır. Bütün dünyanı çirkab su basıb. Su göyün boğazına qədər qalxıb.

Buludların yarısı suda boğulub. Artıq geriyə yol yoxdur. Keçmiş su altındadır. Bəs gələcək? Kərim başını yuxarı qaldırıb bu dəfə dibsiz göy üzünə baxır. Göy üzünün tutacağı, görünən hər hansı bir əlaməti, daşı, ağacı olmur. Göy üzü sənə heş zaman olduğu kimi görünmür də. Ora ayağının heç zaman dəyməyəcəyi boşluqdur. Göydə toxunulası  heç nə yoxdur. Oranın suyu da başqa cürdür. Oraların öz zamanı,

öz görüntüləri var. Belə baxırsan, göydə buludlardan savayı gözünə heç nə dəymir, amma nədənsə sənə elə gəlir ki, orda kimsə var. Göy üzü sənin uydurduğun qədərdir. Onu necə görmək istəyirsənsə elədir.

Göyün ölçüsü, şəkli yoxdur. Orda sənin öyrəşdiyin, ağlının kəsdiyi, sənə tanış gələcək keçmişin də yoxdur.  Ənənədə yaşayan, dünyaya durbinlə baxan Kərimi qorxudan da budur....

Və  beləcə Kərim göy üzünün dibsiz boşluqlarına baxa-baxa qəfil anlayır ki, göy üzü, sən demə, gedəcəyin yol qədərdir. Mütləq o yolun sonunda kiminsə olacağına  inanmalısan. Yol varsa, deməli yolun axırında da kimsə olacaq. Yol adamı harasa aparmaq, kiməsə çatdırmaq üçün salınır axı. Kimisə tezliklə görəcəyini anlayan kimi Kərim toxtayıb quşun boynunu bərk–bərk qucaqlayır. Quş da Kərimin “yolu” anladığını görüb elə bil sevinir. Üç dəfə ucadan qağayı səsinə oxşar səslə cığırıb buludların arasına girir...

Kərim onu da anlayır ki, getdiyi yolun axırı olmaya da bilər. Keçmiş də, indi də,

gələcək də eləcə yoldu.  Sən bu yolu keçmişsiz, gələcəksiz olduğu kimi anlamayınca, sədlərdən,  mənindən çıxa bilməyincə yola yoldaş ola bilməyəcəksən. Getdiyin yeri sevmək, ora çatmaq istəmək də şərtdir.

Kərim hara getdiyini, niyə getdiyini və ən başlıcası, oralarda nə edəcəyini dəqiq bilmir. Hələ yol onu  arıtlamalıdır.

Kərim nəhayət dərk edir ki, göy üzündə ona ağıl yox, ürək gərəkdir. Və elə həmin an da xatırlayır ki, ürəyi aşağıda, çirkab sular altında qalmış məhlədə qalıb...

“Ədəbiyyat və incəsənət”

(11.06.2024)

Təqdim edir: Heyran Zöhrabova, “Ədəbiyyat və incəsənət”

Qollarım dolanar boynuna bir gün, 

Yenə baş qoyaram dizinə, Təbriz. 

Həsrətdən, hicrandan cana doymuşam, 

Doyunca baxaram gözünə, Təbriz. 

Bulanlıq suların axsın, durulsun, 

Təzə günlərindən büsat qurulsun. 

Səhənd camalına bir də vurulsun, 

Bir qubar qonmasın üzünə, Təbriz, 

Həsrətin yandırar, pörşüdər məni, 

Zərif çiçək kimi üşüdər məni. 

Səsləsəm Savalan eşidər məni, 

Qızınnam oduna, közünə, Təbriz. 

Gülüstan bağının seyrinə gəliım, 

Lalə yamacında bir də dincəlim, 

Ötən günlərimə yetişməz əlim, 

Düşüm heç olmasa izinə, Təbriz. 

Ana təbəssümün ay işığıdır, 

Qolum qamətinin sarmaşığıdır. 

Şerin bu dünyanın yaraşığıdır, 

İncisi tükənməz xəzinə, Təbriz. 

Sən şair ömrümə vüqar vermisən, 

Solub-saralmayan gülzar vermisən. 

Etibar vermisən, ilqar vermisən, 

Hər igid oğluna, qızına, Təbriz. 

Səttarxan bayrağın göylərə ucalt! 

Qara buludları od ağzına at. 

Şair qızının da sözlərini qat 

Şirin söhbətinə, sözünə, Təbriz.

“Ədəbiyyat və incəsənət”

(11.06.2024)

Güclü səsə, vokal imkanlara malik, mahnıları 7-dən 77-yə hər kəsin sevgisini qazanan sevilən müğənni, Türkiyənin pop ulduzu Cem Adrian Event Office Yay Konsertləri çərçivəsində Bakıda çıxış edəcək.

“Ədəbiyyat və incəsənət” portalının Event Office-dən aldığı məlumata görə, konsert avqustun 17-də Yaşıl Teatrda baş tutacaq. 

Masmavi səma altında, Yaşıl Teatrın təkrarsız rahatçılığı qoynunda musiqisevərlər musiqi və əyləncə dolu bir gecəyə dəvətlidirlər. 

Konsert saat 20-də başlayacaq. Biletlər 45-245 azn civarındadır. 

Əlaqə telefonu: +994 993338368

“Hatıram olsun”

“Derinlerde”

“Her yer kül”

“Sen benim şarkılarımsın”

“Zincir”… 

Hamısı Cem Adrianın biri-birindən gözəl, hit mahnılarıdır. Onunla görüşüb canlı ifasını dinləməkdən gözəl nə ola bilər?

“Ədəbiyyat və incəsənət”

(11.06.2024)

“Ədəbiyyat və incəsənət” portalının Güneydən gələn səslər layihəsində bu gün sizlərə portalın Güney Azərbaycan təmsilçisi Əli Çağlanın şeirləri təqdim edilir. 

Yeri gəlmişkən, Əli Çağla həm də Ümumdünya Yazıçılar Təşkilatının (WOW) Türk dövlətləri və Türkdilli xalqlar bölməsinin İran (Güney Azərbaycan) üzrə təmsilçisi təyin edilib. 

ESKİŞEHİR XATİRƏLƏRİ (I)

İndi mən, göydə çətiri açılmayan paraşütçüyəm.

Göydən göy gözlərinə düşürəm indi mən

Gözlərinə tapşır məni, boğmasınlar

Üzmək bacarmıram.

Sənin gözlərin dəniz,

Mənim dərdlərim dəniz.

Sənin gözlərin pinar,

Mənim ürəyim yanar.

İndi mən sənin dəniz gözlərində bir kapitanam

Nəhənglər mühasirə ediblər ətrafımı.

Dəlinir, deşilir dərdlərimin içində olan gözlərin kimi,

Su ilə dolur gəmim

Mənə bir əl at bu gəmini limana çatdıraq

Ey tanrının dəllalı, ey mənim Nuh əmim!..

Mən səninlə iki bardaq 

Leyla şərabı içmək istəyirdim 

Cuba Barda

Barlar sokağına bomba qoyub partlatdı DEAŞ-lar .

Porsuk çayında 

foto çəkdirmək istəyirdim səninlə

Sel gəlib apardı Səməd adlı duyğularımı.

-Ehey, Musa bəy!..

Çəliyini əmanət verərsənmi?

Selin ortasında foto çəkdirmək istəyirəm.  

-Çəliyim Sina dağında 

tanrının güdazına getdi Əli bəy, bağışla!..

Sazovada ulduzların uçuşunu 

seyr etmək istəyirdim səninlə

Göylərə divar çəkdilər siyasət adamları

Ulduzların saçı görünür, naməhrəmdirlər deyə.

İndi Eskişehirin tramvayları içimdən keçir

İçindən keçirəm tramvayların indi mən.

Mənim içimdən keçirsən tramvayda sən

Sənə aldığım kitabı oxuyarkən.

Mən boğulmadım dəniz gözlüm,

Məni terror edə bilmədilər, kommunist baxışlım,

Divarları üstümə örtə bilmədilər əfəndim,

Mən yenə də ölmədim,

            Yenə də varam,

Sənin dəniz gözlərinə şeir yazıram Təbrizdən.

Sənin gözlərin dəniz,

Mənim dərdlərim dəniz.

Sənin gözlərin pinar,

Mənim ürəyim yanar...

ESKİŞEHİR XATİRƏLƏRİ (II)

Sənin köynəyindən qırılıb-qopan düymə kimi

Qırılıb-qopuram bu şəhərdən indi mən.

Səndən sağollaşmamış ayrılsam, bağışlarsan.

Trengarın divarlarındakı saatların əqrəbələri

Görəsən nədən darıxır mənim barmaqlarım kimi?!..

Özümü bu qatarla Təbrizə götürsəm də

Ürəyim səndə qalıb...

ESKİŞEHİR XATİRƏLƏRİ (III)

Başımın üstündə qırmızı bir quş uçur aylardır,

Yuvasız bir quş.

O quşun yerinə olsaydım bəlkə də

Durmadan uçub yanına gələrdim.

Ey quş,

Heç bir zəncir bağlaya bilməz səni,

Saxlaya bilməz səni heç bir qəfəs

Özgürlüyün dadını anlayan quş...

Sənin özgürlüyün ümiddir mənim üçün

Sənin qanadların dözümdür mənim üçün

Sənin uçuşun özgürlükdür mənim üçün,

Varlığından danışarsam

Bütün azadlıq heykəlləri muma çevrilər xiyabanlarda.

Başımın üstündə qırmızı bir quş uçur aylardır

Bu quş da mənim kimi yuvasızdırmı görəsən?

O quşun yerinə olsaydım bəlkə də,

Bəlkə də uçub yanına gələrdim durmadan.

Ey quş!

Heç bir zəncirə bağlanma

Sənə qəfəs yaraşmır.

Özgürlüyü sənin qanadlarından öyrənirəm

Uçuşun mənə azadlıq dərsi verir.

Sənin qanadlarının altında qalırlar sərhədlər.

Rəngin qırmızı möhür basır bütün passportlara

Varlığından söz açıram...

Bütün azadlıq heykəlləri muma çevrilir xiyabanlarda.

Mən sevdanın zəncirinə bağlandım

Qəfəsləri yaraşdırdılar mənə,

Özgürlüyü sənin qanadlarından öyrənsəm də belə.

“Ədəbiyyat və incəsənət”

(11.06.2024)

“Ulduz" aylıq ədəbiyyat dərgisi və Azərbaycan Yazıçılar Birliyi Ədəbiyyat Fondunun unudulmaz Xalq şairi Vaqif Səmədoğlunun 85 illik yubileyinə həsr edilmiş, 35 yaşa qədər qələm adamları arasında keçirdikləri  poeziya müsabiqəsinin qalibləri 10 iyun tarixində mükafatlandırılıblar.

“Ədəbiyyat və incəsənət” portalı xəbər verir ki, Azərbaycan Yazıçılar Birliyinin Natəvan klubunda keçirilən tədbirdə ədəbiyyat xadimləri, ictimaiyyət və media nümayəndələri iştirak ediblər. 

Xalq yazıçısı, Azərbaycan Yazıçılar Birliyinin sədri Anarın təşəbbüsü ilə keçirilən müsabiqənin tənqidçi Seyfəddin Hüseynli, filoloq Günay Səma Şirvan, şair Taleh Mansur, yazıçı Varisin üzv olduqları, AYB katibi, şair Səlim Babullaoğlunun rəhbərlik etdiyi Münsiflər heyəti onlarla iştirakçının qatıldığı müsabiqənin mükafat yerlərini aşağıdakı kimi bölüşdürüb: 

I yer: 

Cavid Qasımov;

II yer: 

Rəşad Nağı Mustafa, 

Allahşükür Ağa;

III yer: 

Eminquey, 

Seyyidəli Sübhi, 

El Roman

Mərasimə moderatorluq edən Azərbaycan Ədəbiyyat Fondunun Baş direktoru Varis xalq şairinin mükəmməl yaradıcılığından söz açmış, onun şərəfinə təşkil edilmiş müsabiqənin necə böyük maraqla qarşılandığına diqqət çəkmişdir. 

İlk olaraq  söz Xalq yazıçısı Anara verilmişdir. Anar Vaqif Səmədoğlu ilə dostluğunun tarixçəsindən danışmış, onun yaradıcılığının əsas məziyyətlərindən söz açmış, qalibləri təbrik etmişdir. 

AYB sədrinin müavini Rəşad Məcid Vaqif Səmədoğlu ilə bağlı xatirələrini söyləmiş, onun şeirlərindən birini səsləndirmişdir.

“Ulduz” jurnalının Baş redaktoru Qulu Ağsəs müsabiqənin əhatə dairəsinin genişliyindən, iştirak edən gənclərin istedadlarından bəhs etmişdir. 

Vaqif Səmədoğlunun həyat yoldaşı Nüşabə Vəkilova 85 illiklə bağlı tədbirlərə qiraət müsabiqəsi ilə start verildiyini bildirmiş, bu şeir müsabiqəsinin növbəti addım olduğunu qeyd etmiş, qarşıda digər tədbirlərin də olacağına diqqət çəkmişdir. 

Müsabiqənin münsiflər heyətində təmsil olunan Seyfəddin Hüseynli və Taleh Mansur ayrı-ayrı iştirakçıların uğurlu poetik nümunələrindən bəhs etmişlər. 

Sonra qaliblər pul mükafatı və diplomla mükafatlandırılmışlar və şeirlərini ifa etmişlər. 

Müsabiqənin Təşkilati dəstəkçisi “Kəpəz hospital", İnformasiya dəstəkçisi "Ədəbiyyat və İncəsənət" portalıdır. 

“Ədəbiyyat və incəsənət”

(10.06.2024)