“Ədəbiyyat və incəsənət” portalının “Ədəbiyyat qəzeti” ilə birgə ƏDƏBİYYATIMIZI SEVDİRƏK layihəsində bu gün sizlərə Nəriman Fərmanın hekayəsi təqdim edilir. 

Həyətində durduğum, hər cür şəraiti və yaraşıqlı görkəmi olan bu binanın 10 il bundan qabaq bizim idarənin sərəcamına verildiyini xatırladım. Bina artıq tikilməyə başlayanda idarəmiz üçün nəzərdə tutulduğunu bilirdik. Ona görə də biz işçilər də tikinti ilə maraqlanır və tez-tez bura baş çəkirdik. İdarə binası hazır olandan sonra, binanın fasadı aqlay lövhələrə sadə həndəsi fiqurlar verməklə üzləndi.

Nəhayət, səbrsizliklə gözlədiyimiz gün gəlib çatdı. Hər bir şəraitə malik olan ikimərtəbəli bina bizim idarənin sərəncamına verildi. Ancaq bina boş bir ərazidə inşa edildiyindən darıxdırıcı görünürdü. Demək olar ki, yaşıllığı yox idi. Bu işləri isə işçilərimiz öz üzərinə götürdü. Hasar boyu şam ağacları əkdik. İdarənin arxa tərəfində isə çox da böyük olmayan bir bağ salıb alma, ərik, əncir, nar, üzüm, zeytun ağacları əkdik.

Ötən bu on il ərzində ağaclar xeyli böyüyüb qol-budaq atmış, bar da gətirmişdilər.

Həyətdə bir neçə dövrə vurduqdan sonra dayanıb, orada saldığımız bağa tamaşa etməyə başladım. Birdən diqqətimi hasarın yanında balasını ağzında saxlamış bir pişik cəlb etdi. Pişik divarın o biri tərəfinə aşmaq istəyirdi. Amma aşa bilmirdi. Buna baxmayaraq, o, dayanıb durmaq da bilmirdi.

Əvvəl buna elə bir əhəmiyyət vermədim. Ancaq pişiyin sonrakı hərəkətləri - davamlı olaraq hasarın o biri tərəfinə aşmaq cəhdləri məni maraqlandırıb düşündürməyə vadar etdi. Baxdım ki, bu pişik elə bizim idarənin bağında təzəlikcə yaşamağa başlayan pişikdir. İşçilərimiz idarənin bağında, hasarın iki divarının kəsişməsində ona bir dam da düzəltmişdilər. Hündür və işıqlı olsun deyə, damın üçüncü divarı da hasar hündürlükdə hörülüb, şiferlə örtülmüşdü. Etibarlı olsun deyə, şiferin üzərinə ağır dəmir parçası da qoyulmuşdu.

Pişiyə tikilən bu dam onu məmnun etməyə bilməzdi. İşçilər danışırdılar ki, təzə damda pişiyin iki balası da olub. Belə qayğının müqabilində pişiyin balasını da götürüb burdan getməsi mənim üçün müəmmalı görünürdü.

Pişik hey hasarı aşmaq üçün cəhdlər edirdi. Hər tullananda ağzında balasını tutduğundan ya o hündürlüyə çata bilmirdi, ya da o hündürlüyə çatanda balası ağzından düşmüş olurdu.

Amma pişik inadından dönmürdü. Təkrar-təkrar hasarı aşmaq cəhdini davam etdirirdi. Görünür, pişik balalarına qarşı nəsə bir təhlükənin gəldiyini duyub. Ona görə də balalarını bu təhlükəli ərazidən çıxartmağa çalışır. Ancaq bunun dəqiqini onun özündən başqa bilən yox idi. Pişiyin balası da körpə olduğundan bu təhlükədən xəbərsiz idi. Pişik balasının gözləri körpə olduğu üçün təzə-təzə açılırdı. Hələ heç tam miyoldaya da bilmirdi. Hər anasının ağzından düşəndə yerdə yumalanıb, zığıltılı-iniltili qarışıq zəif bir səs çıxarırdı. Ayaqları əsə-əsə ayaq üstə güclə dururdu. Pişik balası lap aciz idi. Çox miskin görünürdü. Ona yazığım gəldi. Halına acıdım. Pişiyin özünün isə hünərinə, fədakarlığına, balasına qarşı qayğı və məhəbbətinə mat qalmışdım.

Arada istədim pişiyə necəsə bir köməklik göstərim ki, o hündürlüyə qalxsın. Ancaq ehtiyat etdim: birdən o mənim köməyimi düz başa düşməz, məndən qorxar. Ozüm də çəkinirdim ki, əgər müdaxilə etsəm, pişiyin bu müqəddəs mübarizəsini yarımçıq qoyaram. Məcbur olub onun hasarı aşmaq cəhdinə sadəcə bir tamaşaçı kimi baxmağa başladım. Ancaq bekar da qalmadım. Başladım pişiyin hasarı aşmaq cəhdlərini saymağa.

Pişik mən baxandan əvvəl neçə dəfə hasarı aşmağa cəhd etdiyini bilmədim. Ancaq mən yenidən saymağa başladım. Bir, iki, üç... pişik heç cürə hasarı aşa bilmirdi. Hər dəfə sayanda ürəyimdə pişiyin hasardan aşa bilməsini arzulayırdım. Pişiyin hasardan aşmaq cəhdlərinin uğursuzluğu məni narahat etməyə başlamışdı. Hər dəfə onun balası ağzından düşəndə istəyirdim ki, pişiyə köməklik edim: yaxınlaşıb bala pişiyi götürüb, hasarın o biri üzünə qoyum. Ancaq mən bu fikrimi beynimdə qətiləşdirməmiş pişik ya hasarın üstündən, ya da elə havadaca geriyə fırlanıb balası ağzından düşən yerə tullanırdı. Pişik hər dəfə də ağzından düşüb toz-torpağa batmış balasının üz-gözünü yalayıb təmizləyirdi. Pişiklə bərabər mənim də həyəcanım artmışdı. Pişiyə yuxarıda dediyim səbəbdən kömək etməkdə aciz idim. Hələlik isə pişiyə ancaq uğurlar diləyirdim.

Artıq pişiyin çılğınlığı pik həddə çatmışdı: tüklərini qabardır, dodaqlarını sağa-sola tərpədib bığlarını oynadır, dişlərini qıcayır, cürbəcür həyəcanlı səslər çıxarırdı. Sanki ağlayırdı, dayanıb durmadan fəryad edirdi. Elə bil ki, havalanmışdı. Yazıq, deyəsən, yavaş-yavaş taqətdən də düşürdü. Divarı aşmaq cəhdlərində ləngimələr olurdu. Mən də pişiyin hərəkətlərinə uyğun rəqəmləri aramla sayıb uzadırdım: beeeşş... aaaltıı... Sanki bununla pişiyə kömək edir, özümə isə təskinlik verirdim.

Ancaq pişiyin sonuncu cəhdində sanki möcüzə baş verdi. Mən yeddi deyib qurtarmamış pişiyin cəhdi uğurlu oldu. O, balası ağzında hasarın üstünə qalxdı. Artıq onun əzab-əziyyəti arxada qalmışdı. Pişik bir anlığa hasarın üstündə dayandı. Qələbə qazanmış qəhrəman kimi bayrağını - balasını ağzında yuxarı qaldırıb bir anlıq saxladı. Bəlkə də o artıq ürəyində öz qələbə nəğməsini oxuyurdu...

Təbii ki, pişiyin bu qələbəsinə yeganə tamaşaçı kimi məndən çox sevinən olmadı. Xeyli rahatlaşdım. Sonra pişik ağzında balası hasarın o biri üzünə - bayır tərəfinə düşüb, xeyli aralıda görünən seyrək ağaclığa girib gözdən itdi.

Bildim ki, pişik mütləq burda qalan balasından ötrü geri qayıdacaq. Tez gedib onun damına baxdım. Dam boş idi. Dedim, yəqin pişik o biri balasını aparanda, bu biri balası anasının dalınca çıxıb. Ancaq ola da bilərdi ki, pişik baş verəcək təhlükəni nəzərə alıb digər balasını artıq aparıb bağın başqa yerində gizlədib. Ətrafı axtarsam da, pişiyin o biri balasını tapmadım. Qayıdıb pişik gözdən itən səmtə bir də baxdım. Güman etdim ki, pişik az vaxta qayıdar. Xeyli vaxt ötdü. Pişik görünmədi...

Bir az da gözlədim. Ancaq pişik geri qayıtmadı... Özlüyümdə yəqin etdim ki, o qayıtmayacaq. Çünki onun fədakarlığını, balalarına sonsuz qayğısını, məhəbbətini ki, mən görmüşdüm, o bu səbrin yiyəsi ola bilməzdi. Qayıtsaydı, çoxdan qayıtmışdı. Başa düşdüm ki, mənim axtardığım o biri pişik balasını anası əvvəl aparıb. Buna görə də xeyli rahatlaşdım. Amma düşündüm ki, görəsən, pişik balalarını aparanda onlara fərq qoyub, yoxsa yox? Yəni, pişik əvvəl hansı balasını aparıb? Bəlkə əvvəlinci apardığı balası axırıncıya nisbətən zəif imiş? Ona görə də onu qabağa salıb və yaxud əksinə, ona daha çox güvənib?.. Bunu onun özündən başqa bilən olardımı?

Elə bu fikirlərlə də idarəyə daxil olub, iş otağımıza keçdim. Çox vaxt bir yerdə nahar etdiyim dostum məni belə pəjmürdə görüb soruşdu:

- Yeməkxanada səni soruşdum. Dedilər ki, tez çıxmısan. Nolub, gözümə birtəhər dəyirsən?

Fikrim hələ pişiyin yanında olduğundan dostumun sualına susmaqla cavab verdim.

Elə bu an, idarəmizin gülərüz, mehriban xanımının - müdirin katibəsinin dəhlizdə ayaq səsləri eşidildi. Onun yerişində həmişəki kimi bir ahəngdarlıq vardı. Elə bil addımlarını atanda dabanlarını döşəməyə ürəyinin ritminə uyğun vururdu. Ayaq səsləri bizim otağın yanında dayandı. O, qapını açıb təbəssümlə dedi:

- Xahiş edirəm, hamınız iclas zalına buyurasınız.

Bir azdan hamı iclas zalında idi. Amma hamıda bir narahatlıq da hiss olunurdu. -Görəsən, bu fövqəladə iclas nə üçündür? -Nə məsələdir? -Xeyirdimi? -Adətən, müdir iclası səhərlər edir - deyənlər də oldu.

Müdir zala daxil oldu. Həmişə gülərüz görünən müdir, bu gün fərqli görünürdü: halı pərişan, hərəkətlərində isə bir narahatlıq hiss olunurdu. Baxışlarını zalda gəzdirib gah susur, gah da vacib nəsə demək istəyən bir görkəm alırdı. Amma yenə heç bir şey demirdi. Müdir hamının üzünə diqqətlə baxır, elə bil nəsə bir bəd xəbəri bizə demək istəmirdi. Ancaq demək məcburiyyətində idi. Sanki deyəcəyi sözün zala necə təsir edəcəyindən ehtiyatlanırdı.

Müdir bir neçə dəqiqəlik bu davranışının zalda darıxdırıcı sükut yaratdığını görüb, nəhayət, çıxışa başladı. Çıxışı çox qısa oldu:

- Bizim bu idarənin binası plana düşüb. Buradan magistral yol çəkiləcək, bu bina söküləcək. Təcili idarəni boşaltmalıyıq. Ola bilər elə bu gün axşam idarənin hasarını sökməyə başlasınlar. Ona görə elə indidən şəxsi əşyalarınızı özünüzlə götürün, idarəyə aid sənədləri və başqa şeyləri qablaşdırın. Hələlik biz müvəqqəti olaraq idarəmizin terminaldakı binasında yerləşəcəyik. Bizə cəmi bir gün vaxt veriblər. Xahiş edirəm, təcili işə başlayın.

İclas qurtarandan sonra müdir kürsüdən düşüb gedə-gedə işçilərə təskinlik də verirdi. Yəqin mənim daha fikirli, dalğın olduğumu sezib bir anlıq mənim yanımda dayandı. Mənə üzünü tutub, amma sanki hamıya müraciət edirmiş kimi dedi:

- Bilirəm, bu idarədə hamınızın zəhməti çox olub. Bir az səbr edin, tezliklə daha gözəl binamız olacaq. Mənim isə fikrim müdirin "bu bina plana düşüb, söküləcək"- deyən andan hələ də pişiyin yanında idi. İdarənin işçilərindən pişik və balalarından ötrü narahat olanlar da oldu. Nahar vaxtı pişik balalarını da bağdan götürüb, buranı tərk etdiyini təfsilatı ilə onlara danışdım. İşçilərdən pişiyin bu hərəkətinə təəssüflənən də oldu, təəccüblənən də.

Müdirin tapşırdığı bütün işləri tam yerinə yetirdiyimizdən idarədən çox gec çıxdıq. Artıq söküntüyə hazır olan texnikalar idarə hasarının bayır tərəfində hazır vəziyyətə gətirilmişdi.

“Ədəbiyyat və incəsənət”

(30.08.2024)

Təqdim edir: Könül, “Ədəbiyyat və incəsənət”

Poetik qiraətdə növbə yenidən Əlizadə Nuridədir. “Qəza” deyir şair. 

Qəzaya tək adam yox,

Yol da qəzaya düşər...

-Yenə də fərqli, orijinal! 

Xoş mütaliələr.

Qəza

Yolda ölənlərə elegiya

Nə kəm oldu bu kərəm,

Qəmi eşqə bükərəm!

Şəklini mən çəkərəm

İşığı aya düşər.

Durub dağın başında,

Ölüm- allah yaşında!

Ömür ağırlaşanda,

Güc də əsaya düşər.

Nə yarı var, nə tam yox,

Atma məni, atam yox...

...Qəzaya tək adam yox,

Yol da qəzaya düşər...

“Ədəbiyyat və incəsənət”

(30.08.2024)

Ülviyyə Əbülfəzqızı, “Ədəbiyyat və incəsənət”

SUAL

Fərid Hüseyn  üçün "alın yazısı" nə deməkdir?

CAVAB

Alın yazısı insanın xarakterinə uyğun qurulmuş, tərtib edilmiş həyat hekayəsidir. İnsanın xarakteri ilə həyat hekayəti bir-birinə uyğun gəlməyəndə, başlayır alın yazısına üsyan etməyə, əks halda isə alın yazısına boyun əyib yaşayır. Bizim iradəmiz alın yazımıza müsbət və mənfi mənada müdaxilələr etmək üçün mövcuddur.

“Ədəbiyyat və incəsənət”

(30.08..2024)

Şəfa Vəli, “Ədəbiyyat və incəsənət”, Şəki-Zaqatala təmsilçisi

Yolumuz kəsişən həyatlara, iç-içə keçən duyğularadır. Bələdçimiz şeirdirsə, yoldan qorxmaqmı olar?! 

...Kral qızıydı Enheduanna. Ən gözəl şeirlərini İnannaya ithafən yazırdı. İnanna şumerlərin eşq tanrıçası idi; xatırladıram sadəcə, bilirəm, hamının öz İnannası var.  Enheduanna şeirlərindən birində İnannaya deyirdi: “Sənə itaət etməyən dağlarda bitkilər lənətlidir”. 

...Bizim çağdaşımızdır Bəsti Məmməd. Onu illər əvvəl Dünya Gənc Türk Yazarlar Birliyinin layihələrindən birində tanımışam. Şeirlərini özünə ithafən yazır; xatırladıram sadəcə, bilirəm, hamının şeirinin ünvanı ən birinci özüdür.  Bəsti şeirlərinin birində özünə deyir: “Sərçələr hönkürüb ağlaya bilsə, Ağlayar unutqan adamlar üçün...” 

Enheduannanın və Bəstinin misralarını ard-arda oxuyaraq çıxdığımız yolu qısaldaqmı, əziz oxucu?  O məşhur məsəli xatırlayaraq gülümsədiyinin fərqindəyəm. Ürəklə gülümsə, mən də gülümsəyirəm. Elə isə başlayaq bu iki qadın şairin kəsişən həyatından, iç-içə keçən duyğularından danışmağa... 

Qeyd:  Bozdağ silsiləsi... Ən sevdiyim, heyranı olduğum dağ silsiləsidir Azərbaycanımda. Mənimçün ölkəmin mistik hadisələri  ən birinci Bozdağdan başlayır. 

* 

...Sərçələr uçuşur, bir-birinə xəbər ötürürdülər: 

-Qız, Bozdağın qumlu dumanına düşmə ha! 

-Dumandan qorxanmı var, qız?!  Ömrümüz dumanda keçir! 

-Sonra da bəşər övladı elə bilir, ona sadiqik. 

Sərçələrin xəbəri yox  idi ki, yaxınlıqdakı Oyuq mağaranın girəcəyində oturanlar onları dinləyir, təkcə dinləməklə qalmır, həm də, anlayır... Yox, onlar quş dili bilmirdilər, onlar kainatda var olan bütün duyğuları tanıyırdılar. Səs duyğunun təzahürü, söz səslərin cəmindən başqa bir şey deyil! 

-Könlümdən keçənləri mahnı eylədim, -dedi Enheduanna. 

-Şeir-şeir qocalıram, -dedi Bəsti. 

-Haradan gəlib, haraya gedirsən? 

-Sabahdan yola çıxmışam, yolum əvvələdir-ilk şeirin eşidildiyi yerə...

-Sabahdan əvvələ uzanan yolda yoldaşın ola bilməyəcəyəm, sən gəldiyin yerə gedirəm. 

-Biz dünyanın əzəlindən yoldaşıq.

İki qadın şair gülümsədi... Təbəssümlərinə qarışan incə kədəri Oyuq mağaranın divarları çoxdan tanıyırdı. Bundan əvvəl də burada həyatı kəsişən qadın şairlər olmuşdu, bundan sonra da olacaqdı. Və minilliklər keçsə belə, qadınlar eyni sevir, eyni ayrılır, eyni kədərlənirdilər. Oyuq mağaranın hərdən-hərdən, ən çox da, avqustun istisində buz kimi bir “ah” çəkməsi bundan idi. 

Hər iki qadın şair eyni anda titrədi. 

-Ölsək, ağlayanımız sevdalar olarmı? –pıçıldadı Enheduanna. 

-Sevdalar da ümidlidir ki, arxasınca ağlayan qadın olacaq, -ərklə əlini yellədi Bəsti. 

Bu dəfə qəhqəhə çəkdilər. Ta gözləri yaşaranədək güldülər... Oyuq mağara yenə “ah” çəkdi. Bilirdi, gülüşün sonunda da olsa, o göz yaşlarının dərdin məşum övladı olduğunu. Bu dünyanın məna boxçasında “qadın fəhmi” deyilən izaholunmazlıq var və qadınlar çoxdan bilir ki, sevinc kədər qədər ölçüsüz deyil! 

-Sərçələr elə bilir ki, bizi aldada biliblər.-başını buladı Enheduanna. 

-Sərçələr dəqiq bilir ki, biz özümüz aldanmağı seçməkdə mahirik.-əlləriylə küləyə sığal çəkdi Bəsti. 

...İki qadın şair eyni anda ayağa qalxdı, əks istiqamətlərdə yola düzəldilər: Enheduanna gələcəyə, Bəsti keçmişə doğru yol başladı. Bozdağ  əyilib sehirli balasına-Oyuq mağaraya pıçıldadı: 

-Səni oyanı yaxşı tanıyıram mən. Hələ adlı-sanlı usta olmamışdan bələdiydim əməlinə. Amma şair ruhunu oyanlar var ha, onlar ilk baxışdan tanınmaz. Şairlər, ən çox da, qadın şairlər ömrünə gələn oyuqçunu gedəndən sonra tanıyır. Sözünü oyuqçuya deyə bilməyəndə də, əlac qalır şeirə... 

*

...Yolumuz uzundur, əziz oxucu! Yola indi başlamışıq! Hər cığır başında dayanıb şeir dərmək haqqımız var. Bəsti Məmmədin sərçələrdən bəhs edən şeirini oxuyaq, sonra yola davam edərik: 

Sərçələr hönkürüb ağlaya bilsə, 

Ağlayar unutqan adamlar üçün... 

Elə lap çoxdannan ölmüş, yox olmuş, 

Atalar, analar, babalar üçün... 

Sərçələr hönkürüb ağlaya bilsə, 

Ağlayar atılmış körpələr üçün...

Lap için çəkərək, lap hıçqıraraq

Ağlayar məhv olmuş kölgələr üçün... 

Axtarmaz qar üstə dən o sərçələr...

Olmaz bircə gün də şən o sərçələr... 

Səsinə bürüyər kainatı da, 

Lap çapar atını,

cüt qanadını

çırpar kainatın başqa ucuna... 

Ağlayar son dəfə atıb gəldiyi 

adamsız küçələr, həyətlər üçün...

Ağlaya bilsə... 

 “Ədəbiyyat və incəsənə”

(30.08.2024)

Azərbaycan Respublikasının Mədəniyyət Nazirliyində görkəmli opera müğənnisi, Rusiyanın, Azərbaycanın və SSRİ-nin Xalq artisti Tamara Sinyavskaya ilə görüş keçirilib.

“Ədəbiyyat və incəsənət” portalı Mədəniyyət Nazirliyinə istinadən xəbər verir ki, mədəniyyət naziri Adil Kərimli sənətkarın yaradıcılıq yolundan danışıb, onun opera tamaşalarında yüksək sənətkarlıq nümayiş etdirdiyini bildirib.

Diqqətə çatdırılıb ki, əfsanəvi müğənni və bəstəkar, SSRİ Xalq artisti Müslüm Maqomayevin ömür-gün yoldaşı olan T.Sinyavskaya Azərbaycan mədəniyyətinin təbliğinə də töhfələr verib. Müğənninin bu sahədəki fəaliyyəti dövlətimiz tərəfindən daim yüksək dəyərləndirilib. O, ötən il Prezident İlham Əliyevin müvafiq sərəncamları ilə “Heydər Əliyevin 100 illiyi (1923–2023)” yubiley medalı və “Azərbaycan Respublikası Prezidentinin fəxri diplomu” ilə təltif olunub.

Sonra həmin dövlət təltifləri təntənəli şəkildə sənətkara təqdim olunub.

Tamara Sinyavskaya fəaliyyətinin daim diqqətdə saxlanılması və yüksək qiymətləndirilməsinə görə dövlətimizin başçısına dərin təşəkkürünü bildirib.

Sonda sənətkarla xatirə şəkilləri çəkdirilib.

“Ədəbiyyat və incəsənət”

(30.08.2024)

Hər ay mərkəzi icra hakimiyyəti orqanları və digər idarəetmə qurumlarının rəhbərləri tərəfindən şəhər və rayonlarda qəbullar keçirilir. Azərbaycan Respublikasının Prezidenti İlham Əliyevin tapşırığına əsasən reallaşan qəbullarda vətəndaşların müxtəlif məsələlərlə bağlı müraciətləri dinlənilir.

Mədəniyyət naziri Adil Kərimli avqustun 29-da Astara rayonunda vətəndaşları qəbul edib.

“Ədəbiyyat və incəsənət” portalı Mədəniyyət Nazirliyinə istinadən xəbər verir ki, qəbuldan əvvəl nazir Adil Kərimli və Astara Rayon İcra Hakimiyyətinin başçısı Qəzənfər Ağayev rayonun mərkəzində Ümummilli Lider Heydər Əliyevin abidəsini ziyarət edib, önünə tər çiçəklər düzərək əziz xatirəsinə ehtiramlarını bildiriblər.

Heydər Əliyev Mərkəzində keçirilən qəbul zamanı Astara, Lənkəran, Lerik, Masallı, Cəlilabad və Yardımlı rayonlarından olan vətəndaşlar, əsasən, işlə təmin olunma, mədəniyyət sahəsi ilə bağlı təkliflər, təşəbbüslər, əməyin qiymətləndirilməsi və digər məsələlərlə bağlı müraciətlərini diqqətə çatdırıblar.

Mədəniyyət naziri vətəndaşları dinləyərək hər bir müraciət üzrə məsələlərin operativ araşdırılması və qanunvericiliyə uyğun həlli ilə bağlı nazirliyin məsul nümayəndələrinə tapşırıqlar verib.

Qəbulda şəhid ailələrinin üzvləri və qazilər də iştirak ediblər. Onların müraciətlərinə xüsusi diqqət göstərilib, qaldırdıqları məsələlərə vaxtında baxılması məqsədilə qeydiyyat aparılaraq nəzarətə götürülüb.

“Ədəbiyyat və incəsənət”

(30.08.2024)

Avqustun 23-dən 28-dək Rusiya Federasiyasının Yaradıcı Sənayelər Agentliyi tərəfindən Moskva Kino Həftəsi təşkil edilib. Tədbirin iştirakçı ölkələri arasında Azərbaycan, ABŞ, Türkiyə, Hindistan, Çin, Cənubi Koreya, Qazaxıstan, Özbəkistan, BƏƏ və digər ölkələr yer alıblar.

Bu barədə “Ədəbiyyat və incəsənət” portalı Mədəniyyət Nazirliyinə istinadən məlumat verir. 

Azərbaycan Respublikasının Mədəniyyət Nazirliyini Moskva Kino Həftəsində təmsil edən Yaradıcı sənayelər və rəqəmsal inkişaf şöbəsinin müdiri Rəşad Əzizov tədbir çərçivəsində “Yaradıcı iqtisadiyyat” mövzusunda keçirilən panel müzakirələrə qatılıb, çıxışında Azərbaycanda Mədəni və Yaradıcı Sənayelərin (MYS) qrantlar və təhsil proqramları vasitəsilə strateji olaraq inkişafına xüsusi diqqət ayrıldığını vurğulayıb. Bildirib ki, qrant və təhsil proqramları, gənc startapçılara dəstək göstərən Yaradıcı Mərkəzin fəaliyyəti, ölkənin MYS sektorunu gücləndirmək və qlobal səviyyədə mövqeyini yüksəltmək öhdəliyini daşıyır. R.Əzizov həmçinin tədbir çərçivəsində müxtəlif ölkələrin yaradıcı sənaye nümayəndələri ilə görüşlər keçirib.

İlk dəfə keçirilən Moskva Kino Həftəsi çərçivəsində iştirakçılar yaradıcı sənaye sahəsi üzrə müxtəlif ölkələrin aparıcı layihələri ilə tanış olmaq imkanı da əldə ediblər. Tədbirdə 25 ölkədən beynəlxalq kino komissiyalarının nümayəndələri, kino sənayesinin rəhbər şəxsləri və ekspertləri iştirak edib.

Qeyd edək ki, bu layihə beynəlxalq peşəkar kino ictimaiyyəti ilə Rusiya kino sənayesinin liderləri arasında qarşılıqlı əlaqələrin yaradılması üçün əlverişli platforma rolunu oynayır.

“Ədəbiyyat və incəsənət”

(30.08.2024)