Super User
Murmanskda milli mədəniyyətlərin “Dostluq bayramı” festivalı keçirilib
On ildən artıqdır ki, “Dostluq bayramı” festivalı adlı çoxjanrlı mədəniyyətlər bayramı Murmansk vilayətində yaşayan müxtəlif millətlərin nümayəndələrini bir yerə toplayır. Bu müddətdə festival əsl sülh, xeyirxahlıq və dostluq bayramına çevrilib. Bu tədbir hər il “Mədəniyyətdən birliyə” devizi altında təşkil olunur.
Murmansk vilayətindəki “Azərbaycan” Mədəniyyət Mərkəzi” İctimai Təşkilatının və Rusiya Azərbaycanlı Gənclər Birliyinin (RAGB) Murmansk vilayət bölməsinin mətbuat katibi, Rusiya Jurnalistlər İttifaqının və Azərbaycan Jurnalistlər Birliyinin üzvü Əlihüseyn Şükürov AzərTAC-a bildirib ki, builki bayram xüsusi əhəmiyyət kəsb edir – Rusiya Federasiyası Prezidentinin fərmanı ilə 2022-ci il Rusiya Xalqlarının Mədəni İrs İli elan edilib.
Rusiya Federasiyasının Murmansk vilayətinin mədəniyyət naziri Olqa Obuxova tədbirdə çıxış edib. O qeyd edib ki, Zapolyarye diyarında tarixən ən müxtəlif xalqların nümayəndələri yanaşı yaşayıblar. Murmansk vilayətinin heyrətamiz mədəni müxtəlifliyini simalıların gələcək nəsilləri üçün qoruyub saxlamaq məqsədilə “Dostluq bayramı” kimi xoş ənənəni, əlbəttə, davam etdirmək lazımdır.
“Azərbaycan” Mədəniyyət Mərkəzi” İctimai Təşkilatının sədri Afil Hüseynov çıxışında vurğulayıb ki, şimallılara xas olan qarşılıqlı hörmət və dostluq, mədəni müxtəliflik və mənəvi birlik Murmansk sakinlərinin qürur mənbəyi, onların ən böyük sərvətidir.
Festival çərçivəsində təşkil edilmiş sərgidə müxtəlif mədəniyyətlərə xas olan milli məişət əşyaları və dekorativ-tətbiqi yaradıcılıq məmulatları nümayiş etdirilib. Sonra böyük konsert proqramı təqdim olunub. Konsertin proqramına müxtəlif xalqların mədəniyyətini əks etdirən rəqs, musiqi və ədəbiyyat nömrələri daxil edilib.
Festivalda “Azərbaycan” Mədəniyyət Mərkəzi” İctimai Təşkilatının sədr müavini Hüseynalı Hüseynov, regiondakı milli-mədəni mərkəzlərin, ictimai təşkilatların, yaradıcı kollektivlərin və təhsil müəssisələrinin nümayəndələri iştirak ediblər.
“Şuşa mədəniyyətinin inciləri” layihəsinin ilk təqdimatı Xurşidbanu Natəvana həsr olunub
Xəbər verdiyimiz kimi, Mədəniyyət Nazirliyi “Şuşa mədəniyyətinin inciləri” layihəsini həyata keçirir. Layihə Prezident İlham Əliyevin müvafiq sərəncamı ilə 2022-ci ilin ölkəmizdə “Şuşa İli” elan edilməsi münasibətilə reallaşdırılır.
Layihənin “Şuşanın simaları” bölməsi üzrə ilk təqdimatı bu il 190 illiyi qeyd edilən tanınmış şairə, ictimai xadim, xeyriyyəçi Xurşidbanu Natəvana həsr olunub.
Xurşidbanu Natəvan 1832-ci ildə Azərbaycanın dilbər guşəsi, qədim mədəniyyət mərkəzi Şuşada dünyaya göz açıb.
Xuşidbanu ilk təhsilini dövrünün alim və sənətkarlarından alıb. Doğma dili ilə yanaşı, ərəb və fars dillərini də mükəmməl öyrənib, klassik poeziyanın incəliklərinə dərindən yiyələnib.
Bədii yaradıcılığı XIX əsrin təxminən 50-ci illərindən başlayan Xan qızı əvvəl “Xurşid”, sonra isə “Natəvan” təxəllüsü ilə aşiqanə şeirlər qələmə alıb. Müəllifin Şuşanın əsrarəngiz təbiətindən ilhamlanaraq yazdığı bədii nümunələr hələ sağlığında dillər əzbəri olub. Klassik ədəbi ənənələrimizi yaşadan, yüksək humanizm ideyaları, dərin lirizm ifadə edən yaradıcılığı və unikal şəxsiyyəti sayəsində Natəvan dövrün ədəbi mühitinin formalaşmasına mühüm təsir göstərib.
Yaradıcılıqla yanaşı, xeyriyyəçiliyi ilə də seçilən Natəvan bütün xərclərini öz üzərinə götürərək 1864-cü ildən Şuşanın bir qrup şairindən ibarət “Məclisi-üns” ədəbi məclisə rəhbərlik edib. O, həmçinin 1873-cü ildə Şuşaya içməli su kəməri çəkdirib. Şuşadakı Xan qızı bulağı tanınmış şairənin xeyir əməllərinin sübutlarından biridir.
Xurşidbanu Natəvan 1897-ci il oktyabrın 1-də vəfat edib və Ağdamın “İmarət” qəbiristanlığında dəfn olunub.
44 günlük Vətən müharibəsində ərazi bütövlüyümüz bərpa ediləndən sonra ermənilər tərəfindən xaricə satılarkən Azərbaycan dövlətinin ölkəmizə qaytardığı Üzeyir Hacıbəyli, Bülbül və Natəvanın güllələnənmiş büstləri Şuşada yenidən əvvəlki yerlərinə qoyulub.
Bu gün Azərbaycan mədəniyyətinin paytaxtı 270 yaşlı Şuşa şəhəri dirçəlir. 28 illik işğal zamanı erməni vandalizminə məruz qalmış qədim şəhərimizdəki tarixi abidələrimiz bərpa olunur, Şuşada aparılan bərpa və quruculuq prosesi Şuşanın orijinal memarlıq üslubuna uyğun olaraq gerçəkləşdirilir. Həyata keçirilən işlər çərçivəsində ötən il “Xan qızı” bulağı bərpa edilib.
Niyazi adına 22 nömrəli uşaq musiqi məktəbinin şagirdi beynəlxalq müsabiqədə uğur qazanıb
Bakı Şəhər Mədəniyyət Baş İdarəsinin Niyazi adına 22 nömrəli uşaq musiqi məktəbi Moskvada keçirilən "CA MAESTOSO" IV Beynəlxalq Onlayn Musiqi Müsabiqəsində uğurla iştirak edib.
Baş İdarədən AzərTAC-a bildirilib ki, məktəbin fortepiano ixtisası üzrə I sinif şagirdi Müzəffər Əliyev öz yaş kateqoriyası üzrə yeganə qalib olaraq II yerə layiq görülüb və laureat adını qazanıb.
Münsiflər heyəti şagirdin müəllimi Gülnar Mirzəyevanın peşəkarlıq səviyyəsini yüksək qiymətləndirib və onu sertifikatla təltif edib.
Qeyd edək ki, müsabiqə Türkiyənin “CASPİART SANAT VE SANATSAL EĞİTİM HİZMETLERİ TİC.LTD.” şirkəti ilə Rusiyanın “Boris Tarakanov Not Arxivi” Ümumrusiya mediatekasının birgə təşkilatçılığı ilə keçirilib.
“Miss ABŞ-2019” gözəllik müsabiqəsinin qalibi Çesli Krist intihar edib
Xarici KİV məlumat verir ki, “Miss ABŞ-2019” gözəllik müsabiqəsinin qalibi Çesli Krist Nyu-Yorkun mərkəzində özünü hündürmərtəbəli binadan ataraq intihar edib.
Ç.Kristin cansız bədəni 60 mərtəbəli Orion binasının yaxınlığında tapılıb. Binanın 9-cu mərtəbəsində yaşayan Ç.Kristini sonuncu dəfə 29-cu mərtəbənin terraslarının birində görüblər.
İntihardan əvvəl anasına vida məktubu yazan Ç.Kris bütün varidatını anasına vəsiyyət edib. İntihar səbəbi hələlik açıqlanmasa da Ç.Kristin 2019-cu ildən psixoterapevt yanına getdiyi, depressiyadan əziyyət çəkdiyi bildirilir.
Fevralın 7-də Moskvada Azərbaycan kinosunun retrospektivi açılacaq
Tamaşaçılara ümumilikdə 19 film təqdim olunacaq
Azərbaycan kinematoqrafiyasının müxtəlif dövrlərin və janrların 19 filmindən ibarət miqyaslı retrospektivi fevralın 7-də Moskvada rejissor Fariz Əhmədovun "Sonuncu" (2021) sənədli filminin nümayişi ilə "İllüzion” kinoteatrında açılacaq. Bu barədə “Ədəbiyyat və incəsənət” portalı TASS agentliyinə istinadən məlumat verir. Azərbaycan kinosunun petrospektivi barədə bazar ertəsi kinoteatrın mətbuat xidmətindən məlumat yayılıb.
"Azərbaycan və Rusiyanın tarixi əlaqələri yüz ildən çoxdur və ölkələrimiz mədəniyyət, o cümlədən kinematoqrafiya sahəsində səmərəli əməkdaşlıq edirlər. Ötən ilin sonunda Azərbaycan paytaxtında Rusiya Film Festivalı keçirilib, bu günlərdə isə "İllüzion" kinoteatrında Azərbaycan kinosunun irimiqyaslı retrospektivi olacaq - əminik ki, çoxsaylı kino həvəskarlarının böyük marağına səbəb olacaq hadisə başlayıb", - deyə proqramın kuratoru, rejissor və Azərbaycan Respublikası Mədəniyyət Nazirliyinin kinematoqrafiya departamentinin rəhbəri Rüfət Həsənovdan mətbuat xidməti sitat gətirib.
Təqdimat proqramına ilk azərbaycanlı qadın rejissor Həmər Salamzadənin və Aleksandr Popovun "Coşqun Vətən" (1937) məktəb komediyası, Boris Barnetin "Mavi dənizin sahilində" lirik kinopoeması (1936), Tofiq Tağızadənin "Uzaq sahillərdə" (1958) casus trilleri, İsmayıl Səfərəlinin "Balıqçı qızı" (2019) pritçası və başqaları daxildir. Tamaşaçılara ümumilikdə 19 film təqdim olunacaq.
"Azərbaycan Respublikası Mədəniyyət Nazirliyi ilə əməkdaşlıq sayəsində biz nəinki Dövlət Film Fondunda saxlanılan sovet dövrünün filmlərini, həm də yenidənqurma dövrünün kinosunu və müasir Azərbaycan "yeni dalğa kinosu"nun ən yaxşı nümunələrini göstərəcəyik. Filmlərin yarıdan çoxu Rusiya Dövlət Film Fondunun arxivindən 35 mm-lik plyonka ilə nümayiş olunacaq, rəqəmsal surətləri isə bizə lütfkarlıqla Azərbaycan Dövlət Film Fondu təqdim edib. Bu filmləri böyük ekranda görmək praktiki olaraq mümkün deyil",- deyə proqramın həmkuratoru və "İllüzion"un art-direktoru Aleksandra Lavrova qeyd edib.
Açılışda Xəzər dənizində Kür adasının sonuncu sakini Vitali Pronindən bəhs edən "Sonuncu" sənədli filmi nümayiş etdiriləcək. Bu filmin premyerası 2021-ci ildə Rotterdam kinofestivalında baş tutub.
Nümayişlər Kinoşünaslar və kinotənqidçilərin mühazirələri və rejissorlarla görüşlərlə müşayiət olunacaq. Proqram fevralın 15-dək davam edəcək.
Moskvalıların, eləcə də Rusiya paytaxtında yaşayan həmyerlilərimizin retrospektivə böyük maraq göstərəcəklərinə inam böyükdür.
Sabunçu Gənclər Evində Azərbaycan Gənclər gününə həsr olunmuş “Gənclər həftəsi” çərçivəsində “Gənclərin karyera və motivasiya forumu” keçirildi
Azərbaycanda növbəti dəfə Gənclər günü qeyd edilməkdədir.
Sabunçu Gənclər Evində 125 gəncin iştirakı ilə keçirilən “Gənclərin karyera və motivasiya forumu”nun spikerləri öz sahələrində kifayət qədər uğur qazanmış, karyeraları ilə gənclərə motivasiya ötürən şəxslər idi: dünyanın ən böyük pre-seed akseleratoru olan Founder Institute-un Azərbaycan üzrə direktoru Cəfər Nəcəfov, Azərbaycan Respublikasının Əməkdar Jurnalisti, Avrasiya Materikinin ədəbiyyat üzrə 3-cü LiFFT festivallar festivalının qızıl laureatı, yazıçı Varis Yolçuyev, Azərbaycanda ilk ayaqqabı brendi "Danilov"un yaradıcısı İlyas Danilov və nitq mədəniyyəti, yüksək etik protokol qaydaları üzrə bir çox dövlət və özəl qurumların təlimçisi, Etika Akademiyasının rəhbəri Günel İbrahim.
“Ədəbiyyat və incəsənət” portal Sabunçu Gənclər Evinin İctimaiyyətlə əlaqələr üzrə katibi Nərmin İbrahimovaya istinadən məlumat verir ki, məqsədi gəncləri yeni ilə öz karyeraları üçün motivasiya ala biləcəkləri spikerlərlə görüşdürərək ilhamlandırmaq olan forumu Sabunçu Gənclər Evinin direktoru Samir Mehralıyev açaraq 2021-ci il ərzində fəaliyyətlərinə görə Sabunçu Gənclər Evinin ən fəal könüllülərini təltif etdi.
Daha sonra hər bir spiker olduqca maraqlı çıxışlar edərək gənclərə faydalı məsləhətlər verdilər, onların çoxsaylı suallarını cavablandırdılar.
Sonda forum iştirakçıları “Ailə fotosu” çəkdirdilər.
Forumdan sonra gənclər üçün “Gənclər partisi” təşkil olundu. Gənclər həm əyləndilər, həm də müxtəlif yarışlarda iştirak edərək Sabunçu Gənclər Evindən hədiyyə qazandılar.
Qeyd edək ki, Sabunçu Gənclər Evi Azərbaycan Respublikası Gənclər və İdman Nazirliyinin nəzdində fəaliyyət göstərən sosial xidmət müəssisəsidir. Gənclər evinin əsas hədəfləri gənclərin sosial və fərdi inkişafına nail olmaq, demokratik iştirakçılığı gücləndirmək, sağlam gənclik mühitini formalaşdırmaq, intellektual gənclik yetişdirməkdir, gənclərdə sosial məsuliyyətin formalaşdırılması, onların asudə vaxtlarının səmərəli təşkilidir.
Keçirdiyi layihələrin keyfiyyəti, onlara gənclərin böyük həvəslə qoşulması belə deməyimizə əsas verir ki, Sabunçu Gənclər Evi qarşısına qoyulan vəzifələrin öhtəsindən layiqincə gəlir, ölkənin gənclər siyasətinə layiqli töhfələr verir.
Fürsətdən istifadə edərək gəncliyimizi Gənclər günü münasibəti ilə səmimi qəlbdən təbrik edirik!
Bu gün böyük Məmməd Əmin Rəsulzadənin doğum günüdür - Onun barəsində ən gözəl şeir hansıdır?
KİŞİ
Yetmiş illik ayrılıq axır ki çatdı sona,
Salam! Rəsul övladı Məhəmməd Əmin kişi!
Yordun uzaq yolları, səsinlə, sorağınla,
Qırdın axır belini həsrətin, qəmin, kişi!
Məzarına baxanın kirpiyində nəm gördüm,
Ağ mərmərin üzündə qara donlu qəm gördüm,
Sənin kimi yarımaz bir qisməti kəm gördüm,
Acıdım taleyinə min bəxti kəmin, kişi!
Sağ olsun məzarını ağ mərmərə tutanlar,
Dilindəki sözləri seçib zərə tutanlar.
Qoy tarixdən utansın səni şərə tutanlar,
Yaman getdi əlindən fürsətin, çəmin, kişi!
Tanrı səni yaratdı, bir də çətin yarada,
Sən qurtuluş istədin, qanlar axdı arada.
Beşiyin Bakıdadır, məzarın Ankarada,
Sənin Vətəndən özgə kimin var, kimin, kişi!
Nələr çəkib başımız, dərdimizdən halıydın,
Yaralı bir nəğmənin unudulmaz xalıydın.
Sən də bizim torpağın Mustafa Kamalıydın,
Heyf! Sünbül tutmamış biçildi zəmin, kişi!
Səndən sonra gələnlər qara yeltək əsdilər,
Bizi bizdən almağa coşdular, tələsdilər.
Məğrur saraylar yapan düz əlləri kəsdilər,
Daşı düz qoyulmadı özülün, himin, kişi!
Ana öz övladını qoymaz gözündən yana,
Vətənin ölməz oğlu, gedək Azərbaycana.
Millət "İstiqlal!"-deyə yenidən gəlir cana,
Özün çal havasını köklənən simin, kişi!
Əzilməz xalqın kökü, dərindədir, dərində,
Zaman çəkib oturdar hər kəsi öz yerində,
İllər gəlib keçsə də sən xalqın nəzərində
Yenə həmin oğulsan, yenə də həmin kişi!
Bu böyük həqiqətə əmin ol, əmin, kişi!
Zəlimxan Yaqub
Kevin Kostner ekranlara qayıdır
Məşhur amerikalı aktyor, canlı əfsanə Kevin Kostner "Horizon" adlı vesterni ekranlaşdırmağa hazırlaşır.
Aktyor 19 il öncə səhnəni tərk edib, bu dönüş möhtəşəm olacaq, belə ki o, ekranlara ilk dəfə rejissor kimi dönəcək, eyni zamanda, filmdə əsas obrazlardan birini də canlandıracaq.
Çəkilişlərin avqustun ayında başlanılması nəzərdə tutulur, kastinqlər fevraldan etibarən start götürəcək.
Qeyd edək ki, K.Kostner son olaraq 2003-cü ildə "Açıq məkan" filmində rol alıb.
Onun ən məşhur filmi isə “Canavarlarla rəqs" filmidir ki, Kostner "Ən yaxşı film" nominasiyası da daxil olmaqla 7 Oskar qazanıb. Film Amerika Kinoakademiyasının "Qızıl şedevrlər"i siyahısına salınıb.
"Les Fossoyeurs" ("Məzarçılar") kitabı Fransanı silkələdi
“Məzarçılar": Fransada qocalar evlərində yaşlı insanlar üçün qayğı əvəzinə qayğısızlıq nümayişi haqqında jurnalist araşdırması böyük qalmaqala səbəb olub. “Ədəbiyyat və incəsənət” portalı Euronews-a istinadən bu barədə məlumat verir.
“Fransada qocalar üçün xüsusi evlərlə bağlı qalmaqal alovlanır” – medianın gündəmində duran baş xəbərlər belədir. Konkret olaraq araşdırmada diqqət mərkəzində Orpea qocalar evi dayanır.
26 yanvar - çərşənbə günü jurnalist Viktor Kastananın "Les Fossoyeurs" ("Məzarçılar") adlı kitabı işıq üzü görüb, kitab bu tip müəssisələrin öz qonaqları ilə pis rəftarından bəhs edir. Kitabdan parçalar daha öncə "Le Mond" qəzetində çap olunmuşdu və cəmiyyətdə geniş diskussiyaya səbəb olmuşdu.
Kastana Orpea qocalar evlərində xərclərin azaldılmasının ciddi "disfonksiyalara" gətirib çıxardığını öz araşdırmasında iddia edir.
İnsanlar sidik qoxusunda yaşayırdılar
Viktor Kastana Ehpad-in özəl qrupunun gəlirlərini artırmaq üçün qonaqların qulluq, tibbi xidmət və hətta qidalanmasının "normallaşdırılması" sistemini təsvir edir. Müəllif göstərir ki, belə qocalar evlərində yaşamaq ucuz deyil - "giriş səviyyəsi" otağına görə ayda 6 500 avrodan başlayaraq müəyyənləşib. Və bu boyda pulun müqabilində insanlar üçün cənnət yaratmaq əvəzinə dözülməz şərait yaradılıb.
Kitab üç illik araşdırmanın nəticəsidir ki, bu müddət ərzində müəllif 250 nəfərdən müsahibə götürüb, o cümlədən Firmanın keçmiş əməkdaşları ilə müsahibələrə geniş yer verib.
Kastananın sözlərinə görə, Fransada hətta özəl qocalar evləri də dövlətdən xeyli maliyyə alır, lakin onun sözlərinə görə, "bu pullar yaşlı insanların xeyrinə getmir".
Belə müəssisələrdən birinin qonaqlarına baxan qadın jurnalistə məlumat verir ki, "insanlar qidalanmaqda məhdudiyyətlə üzləşirdilər, bir günə onlara maksimum üç uşaq bezi verilirdi. Halbuki qastritdən, qarın getməsindən, sidik saxlaya bilməməsindən əziyyət çəkən insanlar nəzərə alınmırdı, pasiyentin xəstə olub-olmamasının fərqi yox idi".
Qocalar evinin digər işçisi bildirir ki, o, "sidiyin qoxusunda yaşayan qonaqların maraqlarını müdafiə etməli idi".
Bəs necə oldu ki, Viktor Kastana biu kitabı yazmaq qərarına gəldi? O, məşhur yazıçı və aktrisa Françoise Dorinin qocalığı ilə əlaqədar Orpeada məskunlaşmasını, ora köçdükdən cəmi üç ay sonra - 2018-ci ilin əvvəlində vəfat etməsini başa düşməyə çalışmış, nəticədə kitab ərsəyə gəlmişdi.
Orpea sahiblərinin reaksiyası
"Biz bütün bu ittihamları rəsmi olaraq rədd edirik. Biz onları yalan, çirkin və qərəzli hesab edirik", - deyə Orpea rəhbərliyi kitabın "sensasionallığı"nı və "zərər çəkdirmək üçün açıq istəy"ini pisləyib. Qrupun nümayəndələri bildiriblər ki, şirkətin vəkilləri faktların həqiqiliyini bərpa etmək üçün "lazımi tədbirlər" görəcəklər.
"Biz həmişə keyfiyyəti maliyyədən yuxarı qoymuşuq", - deyə Orpea-nın baş direktoru İv Le Man bildirib. Onun sözlərinə görə, kitabda ittihamlar şirkətin keçmiş işçilərindən gəlir, onlar cinayət törətdiklərinə görə işdən qovulublar və işdən çıxarıldıqdan sonra səhv faktlar ötürməklə təkrar "cinayət" törədiblər.
Skandalın siyasətə və iqtisadiyyata təsiri
Kitab çıxdıqdan sonra Paris Fond Birjasında Orpea səhmlərinin dəyəri kəskin şəkildə azalıb. Firmanın qiymətli kağızları 16,11% - 69,28 avroya qədər ucuzlaşıb. Cümə günü səhər səhmlərin qiyməti yenidən düşüb -demək olar ki, 17%. Yəni itkilər iki gün ərzində 30% - dən çox olub.
Oprea rəsmiləri özlərini təmizə çıxarmaq üçün dəridən-qabıqdan çıxsalar belə görünən dağa nə bələdçi. Qanunpozmalar həqiqətən var, özü də böyük miqyaslıdır.
Biz Avropa insanına – xüsusən xoşbəxt fransıza həmişə qibtə ilə baxırıq. Amma sən demə, varlılar da ağlayırmış.
Günün fotosu: Zelenskiy: “Bizə panika lazım deyil”
ABŞ prezidenti Co Baydenlə telefon danışığı zamanı Rusiya müdaxiləsi barədə real təhlükə xəbərdarlığı almasına baxmayaraq Ukrayna prezidenti Vladimir Zelenskiy söyləmişdir:”Əsla bizə panika lazım deyil. Vəziyyət, düzdür, gərgindir, amma keçənilkindən gərgin deyil”.
Mənbə:BBC
