Moskvada fəaliyyət göstərən “İllüzion” (“Иллюзион”) kinoteatrı Azərbaycan Respublikası Mədəniyyət Nazirliyi ilə birgə tamaşaçılara Azərbaycan kinosunun geniş retrospektivini təqdim edir. “Ədəbiyyat və incəsənət”portalı Mədəniyyət Nazirliyinə istinadən xəbər verir ki, fevral ayının 7-də başlayan film nümayişləri ayın 15-ə qədər davam edəcək. Proqramda Azərbaycan kinosunun səssiz filmlərindən başlayaraq müxtəlif dövrlərdə çəkilmiş 19 film nümayiş olunur.

Azərbaycan kinosu retrospektivinin açılışına rejissor Fariz Əhmədovun premyerası 2021-ci ildə Rotterdam kinofestivalında baş tutan “Sonuncu” adlı filmi ilə fevral ayının 7-də start verilib.

Qeyd edək ki, 19 filmdən ibarət “Azərbaycan kinosu. Retrospektiv” proqramına 1935-ci ildən bu günə qədər olan dövrü əhatə edən komediya və triller, nağıl və detektiv hekayələr, kinoromanlar, sevgi hekayələri, sosial dramlar və sürreal təmsillər daxildir. Sovet dövrünün son səssiz filmlərindən biri olan “Dəcəl dəstə”dən tutmuş ilk müstəqil filmlərdən biri olan “Yarasa”ya, müharibədən sonrakı və mülayimləşmə dövrü filmlərindən beynəlxalq festivalları fəth edən müasir müəllif filmlərinə qədər müxtəlif dövrlərə aid proqram Azərbaycan kinematoqrafiyasının geniş janr və üslublarını nümayiş etdirir. Filmlərin yarıdan çoxu Dövlət Film Fondunun arxivindən olan 35 mm-lik kinolentdən, Azərbaycan Dövlət Film Fondu tərəfindən təqdim olunan rəqəmsal nüsxələrdən nümayiş etdirilir. Nümayişlər kino tənqidçilərinin mühazirələri və rejissorlarla görüşlərlə müşayiət olunur.

Retrospektiv proqramının kuratorları “İllüzion” kinoteatrının art-direktoru Aleksandra Lavrova və Mədəniyyət Nazirliyiniun Audiovizual və interaktiv media şöbəsinin müdiri Rüfət Həsənovdur.

Retrospektevin növbəti günlərinin proqramını təqdim edirik:

12 fevral 16:00

“Bizim Cəbiş müəllim”

 1969. 75 dəq. Rejissor: Həsən Seyidbəyli. 35 mm. 12+

12 fevral 18:10

“İstintaq”

 1979. 87 dəq. Rejissor: Rüstəm Ocaqov. 35 mm. 12+

12 fevral 20:35

“Şeytan göz qabağında”

 1987. 89 dəq. Rejissor: Oktay Mir-Qasım. 35 mm. 12+

13 fevral 19:00

“Qətldən yeddi gün sonra”

 1991. 93 dəq. Rejissor: Rasim Ocaqov. 35 mm. 18+

14 fevral 19:00

“Balıqçının qızı”

 2019. 88 dəq. Rejissor: İsmayıl Səfərəli. dcp. 12+

14 fevral 21:30

“Səpələnmiş ölümlər arasında”

 2020. 88 dəq. Rejissor: Hilal Baydarov. dcp. 18+

15 fevral 19:30 Bağlanış

“Duz, istiot zövqə görə”

 2019. 22 dəq. Rejissor: Teymur Hacıyev. dcp. 18+

“Axşama doğru”

 2020. 12 dəq. Rejissor: Teymur Hacıyev. dcp. 18+

“Daxildəki ada”

 2020. 79 dəq. Rejissor: Rüfət Həsənov. dcp. 18+

Bu gün əməkdar artist, Mədəniyyət Nazirliyi yanında İçtimai Şuranın eksperti, “Ustad dərsləri” ekspert qrupunun rəhbəri, aktyor Azad Şükürovun doğum günüdür. 

Bu münasibətlə İctimai Şura onu təbrik edib. Təbrik mətnində deyilir:

“Hörmətli Azad müəllim. Sizi Mədəniyyət Nazirliyi yanında İctimai Şura adından doğum gününüz münasibəti ilə səmimi qəlbdən təbrik edir, sizə cansağlığı və yaradıcılıq uğurları arzulayırıq. Şuramızda  "Ustad dərsləri" işçi qrupunun rəhbəri kimi səmərəli fəaliyyətinizə görə də Sizə ayrıca minnətdarlıq edirik. 

Siz 11 fevral 1959-cu ildə Ağdamın Muğanlı kəndində müəllim ailəsində anadan olmuş, hələ orta məktəbdə oxuduğunuz illərdə bədii özfəaliyyət dərnəyinin fəal üzvlərindən olmaqla öz incəsənətə sevginizi büruzə vermisiniz, daha sonra Xətai adına mədəniyyət sarayının nəzdində fəaliyyət göstərən Azərbaycan xalq teatrına üzv yazılmısınız.

Azərbaycan Dövlət İncəsənət İnstitutunun aktyorluq fakültəsində - Rza Təhmasibin kursunda təhsil almağınız (1977-1981) aktyor kimi püxtələşməyinizə səbəb olub. 

İnstitutu fərqlənmə diplomu ilə bitirdikdən sonra bir müddət Nəcəf bəy Vəzirov adına Lənkəran Dövlət Dram Teatrında çalışmış (1981-1984), daha sonra Tədris Teatrında (1984-1990), Şuşa Dövlət Musiqili Dram Teatrında (1990-1992) sənətə xidmət etmisiniz.

1992-2009-cu illərdə Bakı Bələdiyyə Teatrında çalışmısınız. 

1990-cı ildən Mədəniyyət və İncəsənət Universitetində də çalışır, gənc nəslin təlim-tərbiyəsində rol oynayırsınız. Universitetdə kafedra müdirisiniz, dosentsiniz. 

Eləcə də bir sıra ədəbi-dram verilişlərində, dublyaj redaksiyasında fəaliyyət göstərmisiniz, gözəl qiraət ustasısınız. 

2003-cü ildə İranda keçirilən I Tehran Beynəlxalq Komediya Festivalında qızıl medala layiq görülməyiniz, 2002-ci ildə Əməkdar artist fəxri  adına layiq görülməyiniz əməyinizin əsl bəhrəsi sayıla bilər.

Bir daha Sizi təbrik edirik, sənət səmalarından heç vaxt əskik olmamağınızı diləyirik!”

Türkiyəli heyət ümumilikdə 8 layihə ilə gəlib, müştərək serialın çəkilməsi də planda var.

Nizami Kino Mərkəzində Türkiyənin ölkəmizdə səfərdə olan kinematoqrafçılar heyətinin mətbuat konfransı keçirilib.
AzərTAC xəbər verir ki, mətbuat konfransında “Eslem Film” şirkətinin rəhbəri Metin Yücel, “Asmalı Konak”, “Kurtlar Vadisi Pusu” kimi serilların rejissoru Selahattin Sancaklı, “Kurtlar Vadisi Pusu” filmində Yasin obrazını canlandıran Ertuğrul Şakar, prodüser Yalçın Çoban iştirak edib.
Metin Yücel media nümayəndələrinin diqqətinə çatdırıb ki, yaxın zamanda Azərbaycan kinematoqrafçıları ilə birlikdə 2020-ci ilin 44 günlük Vətən müharibəsi və Şuşadan bəhs edən filmin çəkilişlərinin başlanması nəzərdə tutulub. Müştərək filmin heyətinin yarısını Azərbaycan, yarısını da Türkiyə kino sənətçiləri təşkil edəcəklər.
Filmdə əsas məqsəd Azərbaycanı və ölkəmizin tarixi zəfərlə başa çatan Vətən müharibəsini dünyaya tanımaq, eyni zamanda otuz il doğma torpaq həsrətində olan azərbaycanlıların yurd, vətən nisgilini göstərməkdir. Filmin çəkilişləri Qarabağla yanaşı müxtəlif bölgələrimizdə də aparılacaq.
Rejissor Selahattin Sancaklı film layihəsinin əsas hekayəsinin Şuşa üzərində qurulacağını deyib: “Qarabağ savaşının hər mərhələsi nə qədər çətin olsa da, Şuşanın alınması və Şuşa döyüşləri bu müharibənin ən çətin mərhələsi olub”. Onun sözlərinə görə, layihənin davamı kimi serial çəlkilişi də nəzərdə tutulub.
Aktyor Ertuğrul Şakar filmin bütün türk dünyası üçün əhəmiyyətli olacağını vurğulayıb. Onun sözlərinə görə, Şuşa və Qarabağ savaşının filmlə dünyaya təqdimatına ehtiyac var.
Aktyor seçimlərinin hələ başlanmadığını qeyd edən prodüser Yalçın Çoban təşkilati işlər bitdikdən sonra kastinqlərin keçiriləcəyini bildirib.
Yaradıcı heyət Azərbaycan Respublikası Mədəniyyət Nazirliyi ilə görüş keçirildiyini də deyib. Layihənin büdcəsi və ssenarisi haqqında suallara cavabında heyət üzvləri bildiriblər ki, nazirlik və əlaqədar təşkilatlarla müvafiq razılıq əldə ediləndən sonra bu barədə konkret danışmaq olar.
Yaradıcı heyət ötən il Azərbaycanda polis işini təcəssüm etdirən filmi lentə aldığını və yaxın vaxtlarda təqdimatının keçiriləcəyini də diqqətə çatdırıb. Vurğulanıb ki, Azərbaycana birgə əməkdaşlıqla bağlı ümumilikdə 8 layihə ilə gəliblər. Müxtəlif janr və mövzuları əhatə edən layihələrin əsas məqsədi Azərbaycan və Türkiyə kinematoqrafçıları arasında təcrübəyə rəvac və əlaqələrin inkişafına təkan verməkdir.
Azərbaycan kinosu haqqında az bilgiyə sahib olduqlarını da etiraf edən yaradıcı heyətin üzvləri mədəniyyətlərin təbliği və tanıtımı üçün sənət sahəsində çoxsaylı layihələrin vacibliyini qeyd ediblər.

Mədəniyyət Nazirliyi yanında yaradılmış İctimai Şura ölkənin mədəniyyət mərkəzlərinin günün tələbləri səviyyəsində fəaliyyət göstərmələrində, ölkənin mədəni həyatının zəngin və rəngarəng olmağında çox maraqlıdır. Bu səbəbdən də şuranın nəzdində fəaliyyət göstərən işçi qrupları həm paytaxtda, həm regionlarda müxtəlif tədbirlər həyata keçirməkdədir. “Ədəbiyyat və incəsənət” portalı xəbər verir ki, növbəti belə tədbir gənclik şəhəri Sumqayıtda baş tutacaq. 

Son dövrlərdə Sumqayıt şəhərinin mədəni həyatında bir canlanma hiss olunur, bu sahədə kreativlik, yeni yanaşma tərzi öz sözünü deməkdədir. Pandemiyanın məhdudiyyətləri şəraitində yaranmış çətinliklərə baxmayaraq mədəniyyət sahəsi inkişafdan qalmır, teatr premyeraları, kitab yarmarkaları, rəsm sərgiləri, müxtəlif prezentasiyalar, müsabiqələr, virtual platformalarda forum və müzakirələr keçirilir, sosial mediada tanınmış sumqayıtlılar barədə tanıtım çarxları çəkilib nümayiş etdirilir. Hətta bu arada şəhərdə yeni kukla teatrı da yaranıb. 

Daha nələr etmək olar ki, sumqayıtlıların, xüsusən şəhər gənclərinin asudə vaxtları dəyərli keçsin, onların mədəni səviyyəsi yüksək qalsın? 

Fevralın 17-də Sumqayıt şəhər Poeziya Evində Sumqayıt Regional Mədəniyyət İdarəsinin və Mədəniyyət Nazirliyi Yanında İctimai Şuranın Kitab Nəşri və Ədəbiyyat İşçi Qrupunun birgə təşkilatçılığı ilə “Sumqayıtın mədəni həyatını necə daha rəngarəng etməli” mövzusunda şəhərin tanınmış mədəniyyət xadimlərinin, gəncliyin nümayəndələrinin  iştirakı ilə dinləmə-müzakirələr keçiriləcək. 

Tədbirdə mədəniyyətin bütün sahələri - ədəbiyyat, kitabxanalar, muzeylər, kino, teatr, musiqi, rəssamlıq, fotoqrafiya, memarlıq və heykəltəraşlıq əhatə olunacaq, hər sahənin cari durumu, görüləcək işlər, perspektiv planlar müzakirə obyekti olacaq. 

Sabah bugünkündən bir addım öndə olmaq - Azərbaycan Respublikasının Mədəniyyət Nazirliyinin fəaliyyət prinsipini qısaca olaraq bu postulatla ifadə etmək olar. Sumqayıt mədəniyyət forumu da bu prinsipin daha bir təzahürüdür.

Günün fotosu:

Vellinqton antipandemiya yürüşlərindən çalxalanmaqdadır

Yeni Zelandiyada, Vellinqton şəhərində bir neçə gündür ki, pandemiya məhdudiyyətləri əleyhinə əhalinin yürüşləri geniş vüsət almışdır. 

Polis bu yürüşlərin qarşısını almaqda çətinlik çəkir.

Foto: Euronews

Finlandiyanın “https://www.espoo.fi” xəbər saytında bu ölkənin Espoo şəhərində yaşayan gənc soydaşımız Aylin Cabbarovaya həsr olunmuş məqalə dərc olunub.

Diasporla İş üzrə Dövlət Komitəsindən bildiriblər ki, Elli Perttilyanın qələmə aldığı “Məktəb xorundan səsini artistliyədək yazdıran – Aylinin hekayəsi” sərlövhəli məqalədə soydaşımızın peşəkar musiqiçi olmaq arzusundan, 8 yaşında öz dostları ilə birlikdə musiqi qrupu yaratmasından, 12 yaşında olarkən “Səs uşaqlar” (“The Voice Kids”) beynəlxalq musiqi müsabiqəsində uğurlu iştirakından, konsertlərdə çıxışlarından, uzun fasilədən sonra isə pandemiya məhdudiyyətləri dönəmində mahnılar bəstələyib, instaqram səhifəsində paylaşmasından, 2021-ci ildə Aylinin səsyazma şirkəti ilə müqavilə imzalamasından, onun məktəb məzunlarına həsr etdiyi “Kun Etikseen sä astut” (“Siz içəri girəndə”) adlı mahnının populyarlıq qazanmasından bəhs olunub.

Rəsm qalereyası:

Xalq rəssamı Sakit Məmmədovun “Təbiət mənzərəsi” əsəri

Neftçalada yaşayıb yaradan ədəbiyyat xadimi Etibar Əbilov

Türk dünyası ədəbiyyatına üstün xidmətlərinə görə “Altın yıldız” mükafatına layiq görülüb. 

“Ədəbiyyat və incəsənət” portalı xəbər verir ki, Türkiyədə fəaliyyət göstərən Türk Dünyası Araşdırmaları Uluslararsı Elmlər Akademiyasının təsis etdiyi bu mükafat türk dünyası ədəbiyyatına töhfə verən şəxslərə təqdim edilir. Qurumun rəhbəri Hasan Ahmetdir.

Xatırladaq ki, Etibar Əbilov Azərbaycan ədəbiyyatı tarixinin ən görkəmli nümayəndələrindən olan mərhum İmamverdi Əbilovun oğludur. 

İmamverdi müəllimin digər oğlu “Ədəbiyyat qəzeri”nin baş redaktoru Azər Turandır.

Beynəlxalq Muğam Mərkəzinin (BMM) muğam sənətimizin elmi-nəzəri məsələlərinə həsr olunan dəyirmi masa layihəsinin növbəti tədbiri fevralın 11-də keçiriləcək. Dəyirmi masa xanəndə, Qarabağ muğam məktəbinin görkəmli nümayəndəsi, Şuşada dünyaya gələn Bülbülcanın 180 illik yubileyinə həsr olunub. Yeni, musiqili-elmi-nəzəri formatda keçiriləcək tədbirdə xanəndənin həyat və yaradıcılığı, muğam sənətinə verdiyi töhfələrdən söz açılacaq.

Tədbirdə Xalq artisti, bəstəkar Sərdar Fərəcov, Əməkdar incəsənət xadimi Aqil Məlikov, Əməkdar artist, tarzən Valeh Rəhimov, professorlar Vilayət Quliyev, Rafiq Əliyev, tədqiqatçılar, filologiya üzrə fəlsəfə doktoru Gülhüseyn Kazımlı, Mustafa Çəmənli, Bülbülcanın ailə üzvləri Tərlan Zülalov və Anar Hacızadə çıxış edəcək.

Konsert hissəsində BMM-nin solistləri Əməkdar artist İlkin Əhmədov, xanəndələr Vəfa Vəzirova, Nisbət Sədrayeva, Hüseyn Məlikov, Rövşən Bəşirov çıxış edəcək. İfaçıları BMM-nin solistləri, tarzən Rövşən Qurbanovun rəhbərliyi ilə musiqi ansamblı müşayiət edəcək.