Super User
Serhat Kabaklı: “Yüz illərlə həsrətlə ana vətənim deyib yanan gənclərim Azərbaycana gəlmək istəsə 8 min lirə bilet pulu edir, bunu necə ödəsinlər?”
“Ədəbiyyat və incəsənət” portalının “Ulduz” jurnalı ilə birgə layihəsi olan, Yeni illə bağlı bir gün ertələnən “Şənbə qonağı”ında İntiqam Yaşar bu dəfə sizi Bakıya qonaq gəlmiş məşhur türk şairi, Türkiyə Ədəbiyyatı Vəqfinin başqanı Serhat Kabaklı ilə görüşdürür.
-Salam, hocam, xoş gördük. Vətəninizə xoş gəlmisiniz. Milli Kitab Sərgisinə gəldiniz, sərgidə çıxış etdiniz, bu kimi tədbirlər Türkiyədə də olur, fikirləriniz və təəssüratlarınız necədir?
-Bu tədbirlər Türkiyədə “Kitap Fuarı” adı altında keçirilir. Türkiyədə buradakından10-12 dəfə, bəlkə də daha böyük salonlarda keçirilir. Burada da çox gözəl tədbir keçirildi, gözəl hadisədir. Xüsusi olaraq da yazıçıların bir-birlərinə sevgi, məhəbbət göstərdikləri yerlərdir kitab sərgiləri. Çox gözəl keçdi.
-“Bil, oğlum” şeiriniz bütün Türk dünyasını dolaşmaqdadır. Şeirin tarixcəsini danışsanız xoş olar.
-Bunu bir çox yerlərdə danışmışam, bir daha danışım. Oğlum doğulduğu gün mən çox duyğulandım, bunu elə şeir kimi ifadə etdim. Elə bil mənə kimsə dedi ki, “şeir yaz”. Normalda bir şeir yazılanda bəzi şeyləri düzəldərsən, bəzi səhvlər olar. Amma bu şeirimdə heç bir düzəlişə ehtiyac olmadı. Mətni yenidən redaktə etməyə gərək olmadı.
- Türkiyə Ədəbiyyatı Vəqfinin başqanısınız. Bir az bu vəqfin işləri haqqında danışaq. Nə kimi işlər görürsünüz?
-Biz Türk ədəbiyyatının ən yaxşı, ən yüksək nöqtələrə gəlməsi üçün çalışırıq. Bunun üçün də yaxşı şairlər, yaxşı yazarlar tapmağa çalışırıq. Tapdıqda isə onlarla birlikdə yol gedirik. Amma bizim jurnalımız var, “Türk Ədəbiyyatı” jurnalı adlanır. On beş gün sonra jurnalımızın əlli illiyi olacaq. Bir tərəfdən jurnalı hazırlayırıq, bir tərəfdən də, hər çərşənbə günü “Çərşənbə söhbətləri”adı ilə özü gözəl, elmi gözəl, söhbəti gözəl böyük adamlarla söhbətlər edirik. Ora çoxlu qonaqlar gəlir, sualı olan sualını verir, danışmaq istəyən danışır və bir universitet kimi, fakültə kimi davam edir ora. Təbii ki, son zamanlar biz bir məsələni ürəyimizdə vurduq, bu da Türk dünyasıdır. Bunun üçün də Türk dünyası ilə çox yaxşı əməkdaşlığı olan İmdat Avşarı yanımıza aldıq, təbii ki, siyasət baxımından deyil, mədəniyyət, incəsənət tərəfindən, Türk dünyasının bütünlüyü baxımından əlimizdən gələni etməyə çalışırıq və buraya - Bakıya gəlməyimizin səbəbi də budur. İnşallah, bu fəaliyyətlərimiz, bu tədbirlərimiz davam edəcək.
- Türkiyə Ədəbiyyat Vəqfinin Türkiyə və Azərbaycan arasındakı əlaqələrdə rolu nədən ibarətdir?
-Bunu bizim təyin etməmiz mümkün deyil. Bunu siz təyin edə bilərsiniz. Türk Ədəbiyyat Vəqfi Azərbaycanla Türkiyə arasında qurulan körpüdə pay sahibidir. Bu cümləni demək bizə yox, sizə düşər, elə deyilmi? (Gülümsəyir).
- Sərhad bəy, bir şair olaraq, günümüzdə şeirə qarşı oxucu marağı sizi qane edirmi?
-Əziz İntiqam, bu bir maraq məsələsidir. Kimi var şeirə meyl edir, kimisi də var ki, musiqiyə meyl edir, amma ədəbiyyata marağı olan adamın mütləq şeirə meyli vardır. Mən də bunu düşünürəm ki, şeir ən gözəl əlaqə, ən gözəl münasibət qurmaq halıdır. Yəni ki, bir insanın şeirlə çata bilməyəcəyi heç bir nöqtə yoxdur. Buna görə, baxarıq ki, Azərbaycan ədəbiyyatının içində Nizamidən gələnlər vardır. Türk ədəbiyyatının içində Yunusdan gələn şeirlər vardır və bunlar ölməzdir.
- Azərbaycan yazarları üçün Türkiyə jurnallarında, Türkiyə qəzetlərində çap olunmaq böyük əhəmiyyət daşıyır. Çünki Türkiyə ədəbiyyatı dünyada önəmli yerə sahibdir. Azərbaycan gənclərinə hansı jurnal və qəzetləri məsləhət görərdiniz çap olunmaq üçün?
-Təbii, bunların başında “Türk Ədəbiyyatı” qəzeti gəlir. “Kardeş kalemler” dərgisi də bunlardan biridir. Türk Dünyası Araşdırmaları Vəqfi, Turan Yazqan hocanın vəqfi bura daxildi. Mən bir də bunu deyim; bir vaxtlar Azərbaycana Türkiyədən bəzi adamlar gəlirdi, əllərinə bir çanta alardılar. Onlar fırıldaqçılar idilər. Burdakı insanları aldadıb getdilər. O dönəmdə Türkiyəyə qarşı simpatiya ortadan qalxdı. Mən də deyirəm ki, o simpatiyanı saxlayan jurnallar bunlardı. Bunlardan başqa əlbəttə jurnallar var. Məsəlçün, Kayseridə, Konyada, Bursada nəşr olunan jurnallar var, əlbəttə bu jurnallar da yola çıxıla bilən jurnallardı, amma diqqətli olun, aldanmayın. Bu iş bir könül işidi, pulla olacaq şeylər deyil.
- Türk şeirini bu gün dünya ədəbiyyatında hansı mərtəbədə görürsünüz?
-Türk şeirinin dünya səviyyəsində bəlkə də daha artıq bir hissi, yönü var. Amma Türkiyə türkünü, Azərbaycan türkünü ucaltmaq onların ürəyində yoxdu. Xaricilər bizim şeirimizi ucaltmırlar. Nə zaman ucaldarlar? Azərbaycan türkü vətənini satsa ucaldarlar. Mənim bu səbəblərdən dünya səviyyəsinə qalxmaqda bir iddiam və düşüncəm yoxdu. Azərbaycan məni anlasın, Özbəkistan məni anlasın, Qazaxıstan, Qırğızıstan məni anlasın, mən onları anlayım, bu elə dünya səviyyəsində bir hadisədir mənim üçün. Nə deyir? Deyir: dünya tarixindən türkü çıxarın, dünyanın tarixi qalmaz.
- Türk Dünyasının gənc yazarlarına bir ustad olaraq nə sözünüz var?
-Oxuyacaqlar, oxuyacaqlar, oxuyacaqlar. Yazacaqlar, ustadları onlara olmadı, bir daha yaz deyəcəklər, bir daha yazacaqlar. Bezmədən, yorulmadan ustadlarının sözlərini dinləyəcəklər. Tarixlərini oxuyacaqlar, tarixdən oxuduqlarını öz həyatlarında tətbiq edəcəklər.
- Ustad, mən düşünürəm ki, biz türk dövlətləri bir- birimiz itanıdığımız qədər həm də tanımırıq. Sizcə nə kimi işlər görülməlidir ədəbiyyat sahəsində?
-Bu yolda dövlətlər mütləq dəstək olmalıdırlar. Bir şey deyim, yüz illərlə həsrətlə ana vətənim, ata vətənim deyib yanan gənclərim Azərbaycana gəlmək istəsə 8 min lirə bilet pulu edir, bunu necə ödəsinlər? Bu məqamda dövlətlər bir şey etməlidir, biletlər ucuzlaşmaldır. Bu insanların bir-biri ilə qaynaşmasını, iç-içə olmasını təmin etmək üçün bir şey edilməlidir. Bu artıq dövlətin işidir. Yəni türk dövlətləri topluluğunu qurduq demək asandır, o insanları bir-birinə qovuşdurmadan o topluluğu qura bilməzsən. Ticarət etməyə gedən adama bilet o qiymətə olsun, amma mədəniyyətə görə yola çıxan adamın biletini də onun imkanına görə uyğunlaşdırmaq lazımdır.
-Təşəkkür edirəm, maraqlı söhbət üçün.
- Var olun, uğurlar olsun. Hər bir kəsi də qarşıdan gələn yeni il münasibəti ilə təbrik edirəm!
“Bursa-2022” türk dünyası mədəniyyət paytaxtının loqosu tanıdılıb
Beynəlxalq Türk Mədəniyyəti Təşkilatı (TÜRKSOY) tərəfindən 2022-ci ildə türk dünyasının mədəniyyət paytaxtı elan olunan Bursanın loqosunun təqdimat mərasimi keçirilib.
Mərasimdə Türkiyənin mədəniyyət və turizm naziri Mehmet Nuri Ərsoy, Bursa valisi Yakup Canbolat, Bursa Böyükşəhər bələdiyyəsinin sədri Alinur Aktaş, TÜRKSOY Baş katibinin müavini Bilal Çakıcı və digər rəsmi şəxslər, Türkiyə parlamentinin üzvləri iştirak ediblər.
Çıxışlarda diqqətə çatdırılıb ki, UNESCO-nun Ümumdünya İrs Siyahısına daxil olan Bursa şəhəri Astanada başlayıb Əskişehir, Kazan, Mərv, Şəki, Türküstan, Kastamonu, Oş və Hivədə davam edən türk dünyasının mədəniyyət paytaxtı statusunu əzmlə həyata keçirəcək. Bunun üçün Bursanın bütün imkanları və ortada real böyük təcrübə var.
Heydər Əliyev Mərkəzində “Nəğmə dolu ürək” adlı qala-konsert keçirilib
Heydər Əliyev Mərkəzində “Nəğmə dolu ürək” adlı qala-konsert keçirilib.
AzərTAC xəbər verir ki, konsertdə Əməkdar artist Fuad İbrahimovun dirijorluğu ilə Üzeyir Hacıbəyli adına Azərbaycan Dövlət Simfonik Orkestri və Azərbaycan Dövlət Xor Kapellası çıxış edib.
Konsert Fikrət Əmirovun “1001 gecə” baletindən introduksiya və bayram rəqsi ilə başlayıb. Sonra Xalq artistləri Azər Zeynalov, Fərhad Bədəlbəyli (fortepiano), Murad Adıgözəlzadə (fortepiano), Murad Hüseynov (fortepiano), Yeganə Axundova (fortepiano), Əməkdar artist Ramil Qasımov çıxış ediblər.
Konsertin möhtəşəm keçdiyini qeyd edən dirijor Fuad İbrahimov bildirib ki, ilin sonunda qürur hissi ilə deyiləsi sözlər nəhayət, musiqi ilə ifadə olundu.
Konsertin Üzeyir Hacıbəylinin “Koroğlu” operasından “Çənlibel” xoru ilə bitməsi də təsadüfi olmadı, çünki Çənlibel Şuşadır, Şuşanın Cıdır düzüdür, Şuşanın alınmaz qalasıdır. Repertuarın seçimində Fərhad Bədəlbəylinin böyük rolu olduğunu deyən dirijor bildirib ki, konsertdə səslənən hər bir əsərdə bir mesaj vardı. Azər Zeynalovun ifasında “Ana” mahnısı məhz şəhid analarının yaşadığı hissləri dinləyicilərə çatdırmaq üçün seçilmişdi.
Konsertlə bağlı təəssüratını jurnalistlərlə bölüşən Azərbaycan Dövlət Akademik Opera və Balet teatrının solisti, Əməkdar artist Ramil Qasımov deyib: “Bu gün konsertdən aldığım böyük zövqü, yaşadığım hissləri sözlə ifadə etmək mümkün deyil. Çünki gözəl bir məkanda Üzeyir Hacıbəyli adına Azərbaycan Dövlət Simfonik Orkestrinin müşayiəti ilə möhtəşəm bir konsert təşkil olunub. Görkəmli musiqiçilərimiz, Xalq artistləri Fərhad Bədəlbəyli, Murad Adıgözəlov, Yeganə Axundova, Azər Zeynalov və digərlərinin ifaları misilsiz idi. Bir musiqiçi kimi sevincimin həddi-hüdudu yoxdur. O görə ki, bu möhtəşəm konsert proqramında azərbaycançılıq hiss olunurdu. Burada bir-birindən maraqlı, dünya və Azərbaycan klassiklərinin əsərləri səsləndirildi”.
Qeyd edək ki, qala-konsertdə Üzeyir Hacıbəyli, Fikrət Əmirov, Qara Qarayev, Tofiq Quliyev, Niyazi, Oqtay Zülfüqarov, Elza İbrahimova, Sevil Əliyeva və Sergey Raxmaninovun əsərləri səsləndirilib.
2021-ci ilin may ayının ən parlaq şəkilləri - Euronews-un təqdimatında
2021... Təbii və siyasi kataklizmlərlə dolu, COVİD-19 pandemiyasının qadağaları ilə yadda qalan daha bir il.
Biz pandemiyanı dayandırmaq üçün vaksinlərə və planetimizi xilas etmək üçün siyasi qərarlara böyük ümidlər bəsləyirdik, lakin görülən işlərə baxmayaraq, bütün səylər uğurla nəticələnmədi.
2021-ci illə vidalaşmazdan əvvəl, Euronews sizə son 12 ayın əsas hadisələrini nəzərdən keçirməyi və yada salmağı təklif edir. “Ədəbiyyat və incəsənət” portalı da vasitəci olaraq ilin ən gözəl fotolarını sizlərə təqdim edir.
Bu gün sizə 2021-ci ilin may ayında baş verən əsas hadisələrin fotolarını təqdim edəcəyik.
May 2021-ci il.
1-ci yer
Qəzza bölgəsi
Əl-Şaruk qülləsi tüstüyə bürünüb. İsrail qırıcı təyyarələri indicə bombardman həyata
keçiriblər.
Foto: QUSAY DAWUD/AFP
2-ci yer
İspaniya.
Qırmızı Xaçın əməkdaşı
Seutda qaçqını sakitləşdirir. İspaniyanın bu anklavına 8 min miqrant gəlib.
Foto: Bernat Armangue/AP Photo
3-cü yer
Meksika.
Santa-Mariya-Skatapek bələdiyyəsində gözlənilmədən torpaq çöküb, yaxınlıqdakı evin sakinləri təxliyyə edilib.
Foto: Jose Castanares/AFP
(Davamı olacaq. Növbəti dəfə 2021-ci ilin iyun ayının ən əsas hadisələrinin ən yaxşı fotolarını görəcəksiniz. Buraxılışlarımızı izləyin).
Bakı
Küçələr Yeni il münasibəti ilə libasını dəyişib.
“Mədəniyyət Nazirliyinin bu addımı böyük stimuldur.”
Azərbaycan tarixində ilk dəfə qurulan Naşirlərin birliyi - Azərbaycan Nəşriyyatları Assosiasiyası (ANAİB) bir illiyini təltiflə qarşılayıb. Belə ki, Azərbaycan Respublikasının Mədəniyyət Nazirliyi bir sıra naşir və mədəniyyət xadimini “Nizami Gəncəvinin 880 illiyi” Xatirə nişanı ilə mükafatlandırıb. Mükafata layiq görülən ANAİB üzvləri aşağıdakılardır:
1. Şəmil Sadiq (“Hədəf Group”un baş direktoru);
2. Rafiq İsmayılov (“Altun Kitab” nəşriyyatının direktoru);
3. Rasim Qaraca (“Alatoran Yayınları”nın direktoru);
4. Nurman Tariq (“Parlaq İmzalar” nəşriyyatının direktoru);
5. Fatimə Alxaz (“Ağıllı Bala” nəşriyyatının direktoru);
6. Şöhlət İxtiyaroğlu (“Qədim Qala” nəşriyyatının direktoru);
7. Tural Axundov (“Təhsil” nəşriyyatının direktoru);
8. Veysəl Məmmədov (“Libra Kitab” nəşriyyatının direktoru);
9. Bəhram Oruclu (Çinar nəşriyyatının direktoru).
Azərbaycan Nəşriyyatları Assosiasiyasının qurucusu
Şəmil Sadiq təltiflə bağlı “Ədəbiyyat və incəsənət” portalına aşağıdakıları bildirib:
“Naşirlər məhz naşirlik fəaliyyətinə görə təltif edildi, bu ilk idi və möhtəşəm idi. Mən medal həvəskarı deyiləm, amma görülən işə və zəhmətə görə verilən dəyərə sayğı göstərmək və təşəkkür etmək sayğımız da olmalıdır!
Bu və bu kimi addımların Azərbaycan kitabçılığının inkişafına ciddi təsir edəcəyini düşünürəm. Nəşriyyatlar da biznes sektoru kimi qəbul edildikcə, inkişafa məcbur olacaq. Mədəniyyət Nazirliyinin bu addımı böyük stimuldur. Ümud edirəm ki, ANAİB olaraq verdiyimiz digər təkliflər də zaman-zaman öz həllini tapacaq. Çünki həllini tapmayan hələ də çox iş var qarşıda, həm də lap çox iş. Azərbaycan Nəşriyyatları Assosiasiyası bütün əməkdaşlıqlara hazırdır və lazımı gücdədir. Yetər ki, bu əməkdaşlıq Azərbaycan mədəniyyətinə və kitabçılığına xidmət etsin!”
Türkiyədə azərbaycanlı rəssamın sərgisi açılıb
İstanbulda UNESCO-nun nəzdində fəaliyyət göstərən Dünya Rəssamlar İttifaqının üzvü, rəssam Nərminə Nəcəfovanın sərgisi açılıb.
AzərTAC xəbər verir ki, rəssamın ilk fərdi sərgisində 34 rəsm əsəri nümayiş olunub. Esmira Gül, Refik Aziz kimi rəssamlardan dərs alan fırça ustası 2 il ərzində 60-a yaxın əsər çəkib.
Rəssam deyib: “Uzun zamandır sərgi açmaq istəyirdim. Sərgimi fərqli təşkil etmək istədiyimdən heç bir mövzu seçmədim. Hər bir əsərimi çox sevirəm. Onları nümayiş etdirmək, insanlara təqdim etmək çoxdankı arzum idi. Sərgi zamanı yanımda olan, mənə ruh verən hər kəsə, xüsusilə də ailəmə çox təşəkkür edirəm. Dostlarım hər zaman mənə dəstək oldular, çətin zamanlarımda onların verdiyi güclə ilhamlandım və bu rəsmləri ərsəyə gətirdim. İnşallah, Azərbaycanın hər bir bölgəsində sərgi açmaq niyyətindəyəm. Doğma Qarabağda da sərgi keçirmək arzusundayam. Müəllimlərim Refik Aziz, Esmira Gül də mənə çox dəstək oldular, istedadlı olduğumu və bu yolda davam etməyimi istədilər. Onlara sonsuz təşəkkür edirəm”.
Sərgidə iştirak edən Refik Aziz Nərminə Nəcəfovaya UNESCO-nun nəzdində fəaliyyət göstərən Dünya Rəssamlar İttifaqının üzvlük vəsiqəsini təqdim edib.
Qeyd edək ki, sərgidə iş adamları, müxtəlif sənət nümayəndələri iştirak ediblər.
Modelyer Gülnarə Xəlilova “Yeddi gözəl” yaylıq kolleksiyası yaradıb
Azərbaycan Milli Geyim Mərkəzinin rəhbəri, sənətşünaslıq üzrə fəlsəfə doktoru Gülnarə Xəlilova “Nizami Gəncəvi İli”nə və dahi şairin 880 illiyinə həsr olunmuş portret janrında "Yeddi gözəl" ipək yaylıq kolleksiyası yaradıb.
Sözügedən yaylıqlardan paltar aksessuarı kimi, eləcə də divara panno kimi istifadə etmək olar.
Proyekt "Yeddi gözəl"in ədəbiyyatımıza, milli-mənəvi dəyərlərimizə, klassik irsimizə olan münasibətindən qaynaqlanır. Layihənin rəhbəri və ideya müəllifi Gülnarə Xəlilova, animasıya müəllifi Ülviyyə Kürçaylı, rəssamı Vüsalə Zeynallıdır.
"Sirlər Xəzinəsi" intellektual müsabiqəsinin qalibləri mükafatlandırılıb
15-19 dekabr tarixlərində baş tutan "Sirlər Xəzinəsi" intellektual müsabiqəsinin qalibləri mükafatlandırılıb.
Fərid Abiyev, Ağaəli İsgəndərov və Həsən Abbaslı qaliblər kimi qiymətli hədiyyələrlə təltif olunublar.
Xatırladaq ki, müsabiqə Azərbaycan Respublikası Nazirlər Kabinetinin “Dahi Azərbaycan şairi və mütəfəkkiri Nizami Gəncəvinin 880 illik yubileyinin qeyd edilməsinə dair Tədbirlər Planı” çərçivəsində Azərbaycan Respublikası Mədəniyyət Nazirliyi və Azərbaycan Respublikasının Gənclər Fondu tərəfindən GəncApp mobil tətbiqi üzərindən təşkil olunmuşdur.
Yubileylər günü
Bu günkü bayramlar günü dörd tanınmış azərbaycanlı alimin yubileyinə təsadüf edir. Qısaca yubilyarlar barədə söz açmaq istəyirik.
Niyazi Səmədov 105.
1971-ci ildə professor elmi rütbəsini alan Niyazı Səmədov 1972-ci ildə Hindistan Beynəlxalq Zoologiya Akademiyasının həqiqi üzvü, 1979-cu ildə SSRİ EA Ümumittifaq Entomologiya Cəmiyyətinin fəxri üzvü, 1980-ci ildə Azərbaycan SSR EA-nın müxbir üzvü seçilib. Niyazi Səmədovun Azərbaycan entomologiya, torpaq zoologiyası, biosenologiya və bitki mühafizəsinə dair aparılan elmi tədqiqat işlərinin təşkili və inkişafı sahəsində, həmçinin elmi kadrların hazırlanmasında böyük xidmətləri olub. Niyazi Səmədov tərəfindən Azərbaycanda 26 fəsiləyə mənsub 2900-dən çox böcək növü aşkar edilib, o, bunların da 30-unu zərərverici kimi ilk dəfə təsdiq edib. O, Azərbaycan Ensiklopedyası və Qırmızı Kitablarının müəlliflərindən biridir. Onun 8 əsəri Avstriya, İngiltərə, Almaniya, Fransa və Çexoslovakiyada çap olunub, rəhbərliyi altında yeddi elmlər doktoru, 40 fəlsəfə doktoru dissertasiyası müdafiə edilib. 1980-ci ildə “Əməkdar elm xadimi” fəxri adına, 1982- ci ildə “Şərəf nişanı” ordeni və səkkiz medalla təltif edilən Niyazi Səmədov 1989-cu il may ayının 23-də Bakıda vəfat edib, ruhu şad olsun.
Ələkbər Süleymanov – 105.
1962-ci ildə “Azərneft” Birliyinin rəisi, 1965-ci ildə Azərbaycan neft və qazçıxarma nazirinin birinci müavini, 1972-ci ildən “Xəzərdənizneft” Birliyinin, 1976-cı ildən 1978-ci ilə qədər “Xəzərdəniz neftqazsənaye” Ümumittifaq İstehsalat Birliyinin baş direktoru, 1980-ci ildən ömrünün sonunadək “Dənizneftqazlayihə” İnstitutunun direktor müavini işləmiş Ələkbər Süleymanov “Neft və qaz yataqlarının işlənməsi və istismarı” ixtisası üzrə professor elmi rütbəsini daşıyıb. O, Xəzər dənizinin neft, qaz və qaz-kondensat yataqlarının işlənməsinin nəzəriyyə və təcrübəsinə böyük töhfələr verib, onun sayəsində çoxlaylı dəniz yataqlarının çoxlu məhsuldar horizontları, ayrı-ayrı tektonik sahə və blokları aşkar edilib. Onun iştirakı ilə həm quruda, həm də dənizdə bir çox böyük neftqaz yataqları – Günəşli, QumDəniz, Bahar, Sanqaçal-dəniz-Xara-Zirə, BullaDəniz, Qarabağlı, Kürsəngə, Muradxanlı, Cənub-1, Cənub-2 və s. açılıb. 1994-cü ildə “Əsrin müqaviləsi”nin hazırlanmasında və həyata keçirilməsində əməyi olub.
Görkəmli neftçi və alim “Şərəf nişanı” ordeninə, “Azərbaycan Respublikası Dövlət Mükafatı”na layiq görülüb, bir sıra medallarla təltif olunub. Ələkbər Süleymanov 2000-ci il iyulun 27-də vəfat edib, ruhu şad olsun.
Tamilla Musayeva – 90.
Azərbaycanda xalq təhsilinin inkişaf tarixinin elmi cəhətdən əsaslandırılmış dövrləşdirilməsi, onun əsas mərhələlərinin müəyyən edilməsi, xalq təhsilinin yaranmasının spesifik xüsusiyyətlərinin təhlili, xalqımızın keçdiyi tarixi yolun xüsusiyyətlərinin öyrənilməsi ilə Tamilla Musayeva Azərbaycan tarixşünaslığına dəyərli töhfə verib. O, həm də Azərbaycan Sovet Ensiklopediyasında nəşr olunmuş bir sıra məqalələrin müəllifidir, üçcildlik “Azərbaycan tarixi” kitabının müəlliflərindən biridir, 2003- cü ildə nəşr olunmuş “Ermənilərin Azərbaycan torpaqlarında törətdikləri əməllər barədə tarixi həqiqətlər” adlı əhəmiyyətli əsərin tərtibçi redaktoru və müəlliflərindən biridir.
Professor Tamilla Musayeva 1984-cü ildə “İnqilab və Azərbaycanda xalq təhsili” monoqrafiyasına görə Azərbaycan SSR Dövlət mükafatı laureatı adına layiq görülüb, 2005-ci ildə “Əməkdar elm xadimi” fəxri adını alıb. O, 2019-cu il yanvar ayının 24-də vəfat edib, ruhu şad olsun.
Ağalar Abbasbəyli – 80.
M.V.Lomonosov adına Moskva Dövlət Univer- sitetinin tələbəsi və aspirantı olmuş, 1980-ci ildə doktorluq dissertasiyasını müdafiə etmiş, 1988-ci ildə tarix və beynəlxalq münasibətlər istiqamətləri üzrə professor elmi rütbəsini almış alimimiz 1974-1976-cı illərdə xarici ölkələrdə Sovet səfirliyində müşavir, 1981-1988- ci illərdə Azərbaycan KP Bakı şəhər Partiya Komitəsinin katibi, Azərbaycan KP Təşviqat Komissiyasının sədr əvəzi vəzifələrində çalışıb, 1987-1988-ci illərdə Azərbaycan Respublikası Təhsil naziri olub, uzun müddət SSRİ Sülh Fondunun sədr müavini və Azərbaycan Respublikası Sülh Fondunun sədri olub, 550 məqalənin, 42 monoqrafiyanın, 55 dərslik və dərs vəsaitinin müəllifidir. 32 elmlər namizədi, 10 elmlər doktoru yetişdirib, o cümlədən Azərbaycan Respublikasında ilk dəfə siyasi elmlər istiqamətində 10 siyasi elmlər namizədi və 3 elmlər doktorunun elmi rəhbəri və məsləhətçisi olub, Beynəlxalq münasibətlər ixtisası üzrə 50 nəfər magistrin ərsəyə gəlməsində mühüm rol oynayıb. 1991-ci ildən BDU-nun Beynəlxalq münasibətlər kafedrasına rəhbərlik edir.
