Super User
Bakıda “Fata Morgana" adlı Şərq immersiv şousu təşkil olunacaq
İyulun 26-da “Sea Breeze Event Hall” kurort kompleksinin “White Beach Club” səhnəsində “Fata Morgana” adlı Şərq immersiv milli qastronomiya şousu təşkil olunacaq.
“Fata Morgana” şousu öz tamaşaçılarına rəngarəng Şərq ab-havasına qərq olmaq imkanı yaradır. Şou Azərbaycanın qeyri-adi adət-ənənələrini özündə birləşdirməklə tamaşaçıya unikal Şərq nağılı bəxş edir.
Heyrətamiz qastronomiya, füsunkar musiqi motivləri, başgicəlləndirici yallı və cigit milli rəqsləri, həmçinin oriental rəqslər musiqili axşama xüsusi rəng qatacaq. Bu füsunkar şou Xəzər sahilinin əlamətdar hadisəsinə çevriləcək.
Qeyri-adi axşamda iştirakçılara hamının sevimlisi şah plov, milli qəlyanaltılar və ədviyyatlar, brend aşpazlardan unikal reseptlər üzrə hazırlanmış Azərbaycan yeməkləri, çay, şirniyyat, eləcə də meyvə desertləri təqdim olunacaq.
Biletləri iTicket.az saytı və şəhərin kassalarından əldə etmək mümkündür.
“Ədəbiyyat və incəsənət”
(11.07.2023)
Nazir alim olmalıdırmı?
Vüsal Mətləboğlu, “Ədəbiyyat və incəsənət” üçün
Nazir ilk növbədə menecer olmalıdır, ondan tələb olunan ən vacib kompitensiya idarəetmə bacarığıdır. Son günlər bəzi müzakirələrdə Elm və Təhsil nazirinin elmi araşdırma müəllifi olmaması, elmi jurnallarda məqalələrinin yayımlanmaması barədə arqumentlər məhz bu baxımdan yetkin səslənmir.
Elmi idarəetmə elmi fəaliyyət deyil, menecment işidir. Elmlə elm adamları məşğul olmalı idi, elm iqtisadiyyatı öz ardınca aparmalı, təqdim etdiyi innovativ tapıntılarla inkişafa yön verməli idi, ancaq hardadır?!
AMEA neçə illərdir qulpu qırılmış çemodan kimi idi, nə qoyub getmək olmurdu, nə də sürüyüb aparmaq.
…və bir də bir məsələ - əksəriyyət 20-30 bal toplaya bilməyən müəllimlərin aqibəti ilə maraqlanır, - onlar işsizmi qalacaqlar?
Radikal səslənə bilər, ancaq, bəli, o adamlar işsiz qalmalıdır, ən azı müəllim kimi şagirdlərimizin gələcəyini baltalamamalıdırlar, 60 sualdan 20-30 suala düzgün cavab verə bilməyən müəllim savadsız həkim, savadsız mühəndis, savadsız idarəçi, savadsız nazir yetişdirəcək. Sual əslində, başqa cür qoyulmalıdır – bu müəllimlər hələ də bizim uşaqlarımıza dərs deyəcək?!
P.S. İmtahanlarda 35 faiz müəllim 0-29 bal toplayıb. Belə müəllimlər bizim uşaqlara dərs deməyə davam etsə, biz oxuduğumuzu nəinki başa düşəcəyik, ümumiyyətlə, ola bilər, üzdən oxuya bilməyəcəyik.
Təhsildə güzəşt Vətənə xəyanət hesab olunmalıdır!
“Ədəbiyyat və incəsənət”
(11.07.2023)
Musiqi Akademiyasının tələbə-müəllim heyəti beynəlxalq festivalda uğurla çıxış edib
Gürcüstanın Gürcü Folkloru və Klassik Musiqi İttifaqının təşkilatçılığı ilə Borjomi şəhərində keçirilən Klassik Musiqi İfaçılarının Beynəlxalq Müsabiqə-Festivalı uğurla başa çatıb.
AzərTAC xəbər verir ki, üçüncü dəfə təşkil olunan müsabiqə-festivalın əsas məqsədi müxtəlif ölkələrin milli mədəniyyətlərinin təbliğindən, gənclərin dünya görüşünün və intellektual səviyyələrinin inkişafından, yeni istedadların üzə çıxarılması və gənclər arasında təcrübə mübadiləsindən ibarətdir.
Azərbaycan, ABŞ, Rusiya, Gürcüstan, Polşa, Qazaxıstan və digər ölkələrdən olan iştirakçıların qatıldığı beynəlxalq “Harmony” müsabiqəsində ölkəmizi Üzeyir Hacıbəyli adına Bakı Musiqi Akademiyasının tələbə-müəllim heyəti müxtəlif nominasiyalar üzrə təmsil edib.
Nümayəndə heyətinin rəhbəri, eyni zamanda, müsabiqənin münsiflər heyətinin üzvü Ü.Hacıbəyli adına Bakı Musiqi Akademiyasının tədris işləri üzrə prorektoru, Əməkdar müəllim, professor Nərminə Quliyeva olub. Onun yüksək peşəkarlıqla apardığı iş fəaliyyətinin nəticəsi olaraq Azərbaycan musiqiçiləri müsabiqədə uğur qazanıblar.
Festival çərçivəsində N.Quliyeva multikulturalizm layihəsi olaraq, Azərbaycan musiqi mədəniyyətinin inkişaf yolundan bəhs edən mühazirə ilə çıxış edib. Həmçinin videoçarx, musiqi nömrələri təqdim olunub.
Müsabiqə çərçivəsində təşkil olunmuş beynəlxalq festivalda Bakı Musiqi Akademiyasının müəllim-tələbə heyəti - “Fortepiano orqan və klavesin” kafedrasının dosenti Tofiyə Cavadova, baş müəllim Lalə Atakişiyeva, “Simli alətlər” kafedrasının baş müəllimi Pərvanə Xanlarova (konsertmeysteri Nigar Məmmədova), “Sabah” qrupunun xoru (bədii rəhbər Dimitri Babayev) və “Fortepiano” fakültəsinin üçüncü kurs tələbələri Fatimə Hacızadə, İlqarə Talıbova, Fidan Yunus uğurla çıxış edərək, Azərbaycan klassik musiqi mədəniyyətinin incilərini təqdim ediblər.
Müsabiqədə Bakı Musiqi Akademiyasının “Fortepiano” fakültəsinin ikinci kurs tələbəsi Aygül Mahmudova ikinci yerə (müəllim Nilufər Tabasaranskaya), birinci kurs tələbəsi Nuray Əliyeva üçüncü yerə (müəllim professor Kəmalə Neymanova), üçüncü kurs tələbəsi Zərifə Hasilova üçüncü yerə (müəllim professor Afaq Rüstəmova) layiq görülüblər.
Qeyd edək ki, müsabiqə onlayn formatda da keçirilib.
“Ədəbiyyat və incəsənət”
(11.07.2023)
Yay düşərgəsində uşaq incəsənət festivalı iştirakçıları həvəslə çalışmaqdadırlar
Xəbər verdiyimiz kimi, ölkəmizdə möhtəşəm Uşaq İncəsənət Festivalı keçirilir və hazırda festivalın ikinci – regional mərhələsi başlanıb.
Ümummilli lider Heydər Əliyevin 100 illik yubileyi münasibətilə Mədəniyyət Nazirliyi, Elm və Təhsil Nazirliyi və Heydər Əliyev Mərkəzinin birgə təşkil etdiyi, “BP Azerbaijan” şirkətinin baş sponsorluğu ilə keçirilən festivalın regional mərhələsi ölkəmizin 14 iqtisadi-coğrafi rayonunun 14 şəhəri üzrə 26 məntəqədə keçirilir.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, festival çərçivəsində iyulun 7-də Göygöl Milli Parkının ərazisində Gəncə-Daşkəsən Regional Mədəniyyət İdarəsinin əhatə etdiyi Gəncə və Naftalan şəhərləri, Daşkəsən, Goranboy, Göygöl və Samux rayonlarından 6 nominasiya üzrə ikinci mərhələyə vəsiqə qazanan 60 nəfər uşaq üçün yay düşərgəsi təşkil edilib.
Düşərgənin keçirilməsində əsas məqsəd uşaqların asudə vaxtlarının səmərəli təşkili, festival iştirakçıları arasında şəbəkələşmənin təmin edilməsi, onların yay tətillərini daha maraqlı və səmərəli keçirmələrinə şərait yaratmaqdır.
Düşərgə müddətində uşaqlar üçün maraqlı və əyləncəli oyunlar (futbol, həndbol, estafet oyunları və s.) keçirilib. Əməkdar artist, tarzən Səbuhi Cəfərov, Əməkdar mədəniyyət işçisi, aşıq Samirə Əliyeva, Əməkdar müəllim, xanəndə Qəzənfər Abbasov, rəssam Yusif Mirzə, qiraətçi Hüseynağa Aslanov və rəqqasə Tamilla Əliyeva tərəfindən ustad dərsləri təşkil edilib.
Günün sonunda isə uşaqlar ocaq ətrafında toplaşaraq öz istedadlarını nümayiş etdirəcəklər.
Qeyd edək ki, üç turdan ibarət, 21 nominasiyada üç yaş qrupu (6-9 yaş, 10-13 yaş və 14-17 yaş) üzrə keçirilən festivala respublikamızın bütün rayon və şəhərlərindən, o cümlədən Naxçıvan Muxtar Respublikasından 27 minədək iştirakçı müraciət edib. Peşəkar və həvəskar kateqoriyaları üzrə keçirilən festivalın birinci mərhələsi aprel-iyun aylarını əhatə edib. II mərhələ iyul-avqust aylarında reallaşacaq. Bu mərhələnin qalibləri final mərhələsinə iştirak hüququ əldə edəcəklər.
Final mərhələsinin sentyabr ayında Bakıda keçirilməsi nəzərdə tutulur. Finalın yeri, tarixi və vaxtı festivalın uif.az portalında, eləcə də kütləvi informasiya vasitələrində elan olunacaq.
Festivalın yekununda ən çox nominasiya üzrə iştirak etmiş və fəallıq göstərmiş şəhər və ya rayon növbəti il festivala ev sahibliyi hüququ qazanacaq.
“Ədəbiyyat və incəsənət”
(10.07.2023)
Yazıçı Varis nəyi “KÖKÜNDƏN YANLIŞ” ADLANDIRDI?
“Bütün dərsliklərdə, fəlsəfi təlimlərdə deyirlər ki, insan dünyaya gələndə ağ vərəqdir, valideynlərin, məktəb, dostların, mühit, həyat səni yazır. Bu fikir kökündən yanlışdır”.
“Ədəbiyyat və incəsənət” portalı xəbər verir ki, bu sözləri Çölçü Obasında rejissor Eltən Törəçinin aparıcısı olduğu “Çöldə yaşam öyüdləri” verilişində yazıçı, əməkdar jurnalist Varis deyib.
Niyə orta məktəbdə hamı ona “Məşhur Varis” deyirdi?
Uşaq yaşlarından qarşısına böyük hədəflər qoyan Varis kim olmaq istəyirdi?
Çölçü Obasında özünü Oğuz boylarının tamğaları arasında qədim Türk yurdunda hiss edən yazıçı, valideynlərindən, orta məktəb müəllimlərindən aldığı öyüdlərdən danışaraq, BDU-da oxuduğu illərdə Milli Azadlıq Hərakatına qatılmasını və bu vaxt başı üzərində qaldırdığı 3 rəngli Azərbaycan bayrağını ona anasının tikdiyini xatırlayıb.
Bəs uşaq yaşlarından yazıçılığa marağı olan Varis necə jurnalist oldu?
Yazıçı Varisə Azərbaycanda yazıçı kimi ilk uğuru qazandıran “Sonuncu ölən ümidlərdir” kitabının hansı uğur hekayəsi var?
Çölçü Obasında Eltən Törəçi ilə Türk oxçuluğu bacarıqlarını sınayan yazıçı uğur qazanmağın 4 önəmli düsturunu açıqlayıb.
Xatırladaq ki, Qubada Çölçü Obasında çəkilən “Çöldə yaşam öyüdləri” verilişi Qafqaz TV tərəfindən hazırlanır və Qafqaz TV-dən başqa ölkənin bir neçə efir məkanında yayımlanır.
“Çöldə yaşam öyüdləri” verilişində rejissor Eltən Törəçi ilə yazıçı Varisin söhbətinə aşağıdakı linkdə keçid edərək izləyə bilərsiniz: https://www.youtube.com/watch?v=pvDP3bu3jho&t=2282s
“Ədəbiyyat və incəsənət”
(10.07.2023)
Günün fotosu: Gələn il Avroviziya Malmödə keçiriləcək
Günün fotosu: Gələn il Avroviziya Malmödə keçiriləcək
Gələn il qitənin əsas Mahnı Müsabiqəsi Malmödə keçiriləcək. Beləliklə, İsveçin cənub şəhəri paytaxt Stokholmla bərabərləşir, burada da artıq üç dəfə Avroviziya keçiriləcək.
“Ədəbiyyat və incəsənət” portalı “Euronews”a istinadən xəbər verir ki, 68-ci Avroviziya mahnı müsabiqəsi İsveçin üçüncü ən böyük şəhərində "Malmö Arena" da keçiriləcək. Bu seçimi Krallığın əsas televiziya kanalı SVT və Avropa Yayım Birliyi (AYB) etdi və bunu şəhərdə nümayəndə heyətlərinin, çəkiliş qruplarının və azarkeşlərin yerləşməsi üçün bütün lazımi infrastrukturun olması ilə izah etdi.
“Ədəbiyyat və incəsənət”
(10.07.2023)
Rəsm qalereyası: A. Yans van Ostade, “Emalatxanada avtoportret”
Rəsm qalereyası: A. Yans van Ostade, “Emalatxanada avtoportret”
Güneydən səslər: Əkbər İsmayilidən “Gözlərində ölmək istirəm…”
“Ədəbiyyat və incəsənət” portalında dərc edilən Güney Azərbaycan ədiblərinin ən yaxşı nümunələrini diqqətinizə çatdırmaqdayıq.
Portalımızın Güney Azərbaycan təmsilçisi Əli Çağlanln təqdimatında bu gün Əkbər İsmayili (Qalan) öz şeirləri ilə hüzurunuzdadır.
O, bu dəfə “Gözlərində ölmək istirəm” söyləyəcək.
DURDUQCA UZAQDA!
Durduqca uzaqda, uzaqlaşırsan,
Gözümdən, könlümdən, dünyamdan mənim.
Ayıqkən gəzirdin xəyallarımda,
İndisə qopmusan röyamdan mənim.
Mən səni sevirdim, bunu bilirsən,
Sən məni sevirdin, bilirəm bunu.
Yenildim qürura, sən təkəbbürə,
Amma mən içimdən silirdim bunu.
Mən səni sevirdim, seçməmişdim ki,
Bu üzdən yenə də sevəcəm səni.
Sadəcə qorxuram o gündən ki, mən,
Kənara qoymağa seçəcəm səni.
GÖZLƏRİNDƏ ÖLMƏK İSTİRƏM
Saçların dalğalı,
Dənizə bənzər
Gözlərin!
Gözlərin hər zaman, yaşadır məni
Yanaqların qırmızı,
Al alma kimi.
Qönçə dodaqların aldadır məni
Baxışın sehirli, baxışın ovçu.
Ov kimi bəndinə düşmək istirəm.
Bir ömür könlündə qul tək, əsir tək,
Hər zaman gözlərində ölmək istirəm.
“Ədəbiyyat və incəsənət”
(10.07.2023)
Primorsk teatrının qastrolu başa çatdı
Rusiyanın Vladivostok şəhərində fəaliyyət göstərən Maksim Qorki adına Primorsk Akademik Vilayət Dram Teatrı (bədii rəhbər Rusiyanın Xalq artisti, “Qızıl maska” mükafatı laureatı Yefim Zvenyatski) iyulun 1-dən 9-dək Bakıda qastrolda oldu.
Səfər “Heydər Əliyev İli” çərçivəsində və Azərbaycan peşəkar milli teatrının 150 illiyi münasibətilə Rusiya Federasiyası Primorsk Vilayəti Hökumətinin və Azərbaycan Respublikası Mədəniyyət Nazirliyinin dəstəyi ilə reallaşmışdı.
Primorsk Akademik Vilayət Dram Teatrı da bu il yubileyini, 90 yaşını qeyd edir. Uzaq Şərqdə, Sakit okeanın sahilində klassik rus psixoloji teatrı ənənələrini qoruyub saxlayan qocaman akademik teatrı Səməd Vurğun adına Azərbaycan Dövlət Akademik Rus Dram Teatrının səhnəsində repertuarından seçmə 6 tamaşa göstərdi.
Qastrol M.Bulqakovun məşhur romanı əsasında iki il əvvəl, teatrın 88-ci mövsümündə səhnəyə qoyulmuş “Master və Marqarita” tamaşası ilə (1-2 iyul) başladı.
İyulun 4-də Vladivostok teatrı yəhudi yazıçısı Şolom-Aleyxemin əsərləri əsasında hazırlanmış və 20 ildir repertuarda olan “Anma duası”nı, iyulun 5-də A.Çexovun “İvanov” komediyasını (28 ildir repertuardadır) nümayiş etdirdi.
6-7 iyulda əfsanəvi fransız müğənni Edit Piafın həyatından bəhs edən “Edit və onun şeytanları” musiqili-mistik melodramı, 8-də isə ispan dramaturqu Lopa de Veqanın “Nə yardan doyur, nə əldən qoyur” komediyası Akademik Rus Dram Teatrının səhnəsində Bakı tamaşaçılarına təqdim olundu.
Primorsk Akademik Vilayət Dram Teatrının Bakı qastrolu rus yazıçısı V. Pikulun “Kreyserlər” tarixi romanı əsasında tamaşa ilə başa çatdı.
Qeyd edək ki, “Edit və onun şeytanları” və “Kreyserlər” teatrın eksklüziv tamaşalarıdır, üstəlik, ilk dəfə Vladivostok teatrında səhnələşdirilən “Kreyserlər” Rusiya Federasiyası Hökumətinin mükafatına layiq görülüb.
“Master və Marqarita”, “Anma duası” və “Kreyserlər” tamaşalarında teatrın bütün truppası məşğuldur. Ümumilikdə Bakı qastroluna teatrın texniki işçiləri və Uzaq Şərq İncəsənət İnstitutunun tələbələri də daxil olmaqla 100 nəfərdən çox heyət gəlmişdi. Həmçinin bir neçə konteyner dekorasiya, geyim və avadanlıqlar gətirilmişdi. Primorsk Akademik Vilayət Dram Teatrının yaydığı məlumata görə, bu, yaradıcı kollektivin ən irimiqyaslı qastrol səfəri olub.
Şəkildə: “Kreyserlər” tamaşasından səhnə
“Ədəbiyyat və incəsənət”
(10.07.2023)
Musiqili Teatrla bağlı daha bir xəbər: teatr bu gün Şəkidə çıxış edəcək
Bu gün Azərbaycan Dövlət Akademik Musiqili Teatrı Şəki Dövlət Dram Teatrında Ulu Öndər Heydər Əliyevin anadan olmasının 100 və peşəkar milli teatrımızın 150 illiyi ilə əlaqədar "Sən elə bir zirvəsən!..." tamaşası ilə çıxış edəcək.
Teatrın mətbuat xidmətinin məlumatına görə, Mədəniyyət Nazirliyinin dəstəyi ilə həyata keçirilən layihənin rəhbəri teatrın direktoru Əməkdar incəsənət xadimi Əliqismət Lalayev, ssenari müəllifi Əməkdar artist Mübariz Həmidov, quruluşçu rejissoru Cavid İmamverdiyev, quruluşçu dirijoru Əməkdar incəsənət xadimi Fəxrəddin Atayev, xormeysteri Əməkdar artist Vaqif Məstanov, baletmeysteri Əməkdar artist Emin Əliyev, rejissor assistenti Afər Tağıyevadır.
Musiqili tarixi-esse kimi hazırlanan bu səhnə əsərində teatrın solistləri Əməkdar artistlər Fərid Əliyev, Səidə Şərifəliyeva, Prezident mükafatçıları Mehriban Zaliyeva, Səmədzadə Xasiyev, aktyorlar Aydan Həsənova, Hidayət Əliyev, Şaban Cəfərov, Türkel Tariqpeyma, Emin Zeynallı, həmçinin teatrın xor və balet heyətinin üzvləri iştirak edəcəklər.
Xatırladaq ki, Musiqili Teatrın bu tamaşası iyunun 19-da Gəncədə də nümayiş olunub.
“Ədəbiyyat və incəsənət”
(10.07.2023)
