Paraqvayın paytaxtı Asunsion şəhərində keçirilən UNESCO-nun Qeyri-maddi mədəni irsin qorunması üzrə Hökumətlərarası Komitəsinin 19-cu sessiyasında “Azərbaycanda təndir sənətkarlığı və çörəkbişirmə” adlı milli nominasiya faylının UNESCO-nun Qeyri-maddi Mədəni İrs üzrə Reprezentativ Siyahısına daxil edilməsi qərara alınıb.

“Ədəbiyyat və incəsənət” portalı Mədəniyyət Nazirliyinə istunadən xəbər verirb ki, UNESCO-nun Qiymətləndirici Orqanı tərəfindən müvafiq meyarlar üzrə müsbət rəy alan nominasiya faylına dair qərar dekabrın 3-də elan edilib.

Bununla da, UNESCO-nun Qeyri-maddi Mədəni İrs üzrə Reprezentativ Siyahısında yer alan elementlərimizin sayı 24-ə çatdırılıb.

Qərarın elan edilməsinin ardınca çıxış edən ölkəmizin UNESCO yanında daimi nümayəndəsi, səfir Elman Abdullayev Azərbaycan Respublikası adından UNESCO Qiymətləndirmə Orqanına və Hökumətlərarası Komitəyə xalqımızın mədəni irs nümunəsini dəstəklədiklərinə görə təşəkkür edib.

Sessiyada çıxış edən Azərbaycan mədəniyyət nazirinin müavini Səadət Yusifova, ilk növbədə, müsbət qərarın qəbuluna görə Qiymətləndirici Orqana və Katibliyə təşəkkür edib. Qədim ənənələrə söykənən təndir sənətkarlığının Reprezentativ Siyahıya daxil edilməsinin xalqımız üçün əlamətdar olduğunu vurğulayıb. Sürətlə müasirləşən dünyada mədəni irsin qorunması və gələcək nəsillərə çatdırılmasının xüsusi önəm daşıdığını qeyd edən S.Yusifova bu istiqamətdə Mədəniyyət Nazirliyinin təşəbbüslərindən də danışıb. COP29 çərçivəsində təqdim edilən İqlim üçün Mədəniyyət (C4C) təşəbbüsü haqqında məlumat diqqətə çatdırılıb.

Qeyd edək ki, “Azərbaycanda təndir sənətkarlığı və çörəkbişirmə” adlı nominasiya faylı Mədəniyyət Nazirliyi tərəfindən 2023-cü ildə Xarici İşlər Nazirliyi vasitəsilə UNESCO-ya təqdim edilmişdir. Elementin siyahıya daxil edildiyi 19-cu Sessiyada Mədəniyyət Nazirliyi, UNESCO yanında Daimi Nümayəndəliyimiz və UNESCO üzrə Milli Komissiya təmsil olunur.

Sessiya öz işini 7 dekabra qədər davam edəcək.

 “Ədəbiyyat və incəsənət”

(04.12.2024)

İlhamə Məhəmmədqızı, “Ədəbiyyat və incəsənət”

Bu günlərdə Sumqayıt şəhərində fəaliyyət göstərən Heydər Əliyev Mərkəzinin direktoru Vüsalə Qurbanova ilə görüşüb söhbətləşdik. Ondan rəhbərlik etdiyi Mərkəzin fəaliyyəti barədə bizə məlumat verməsini xahiş etdik. 

Vüsalə xanım söylədi ki, Müstəqil Azərbaycanın qurucusu Ümummilli Liderimiz Heydər Əliyevə ümumxalq təcəssümü olan və onun zəngin həyat yolu, xalqı və vətəni qarşısındakı misilsiz xidmətlərinin dərindən öyrənilməsi istiqamətində iş aparan Sumqayıt şəhər Heydər Əliyev Mərkəzi 2013-cü ilin 3 may tarixindən fəaliyyətə başlamışdır. Respublikamızın Prezidenti cənab İlham Əliyevin ölkəmizin digər bölgələrinə olduğu kimi, şəhərimizə də hər zaman yüksək diqqət və qayğısı daim hiss olunmaqdadır. Bu qayğının bariz nümunəsi Prezidentimizin Sumqayıta mütəmadi olaraq etdiyi rəsmi səfərlərdir. Ölkə başçımız 2016-cı il sentyabrın 27-də şəhərimizə səfəri zamanı buranın hərtərəfli inkişafını əks etdirən açılışlar həyata keçirmişdir. Bu səfər Sumqayıt tarixinə qızıl hərflərlə yazılmışdır. Şəhərimizin ən möhtəşəm memarlıq abidəsi sayılan, Ümummilli Liderimizin adını daşıyan Heydər Əliyev Mərkəzinin yeni binasının açılışı da məhz bu səfər zamanı baş tutmuşdur.  

Heydər Əliyev Mərkəzi Azərbaycan xalqının Ümummilli Lideri, görkəmli dövlət və ictimai xadim Heydər Əliyevin dövlətçilik fəlsəfəsi və azərbaycançılıq məfkurəsinin dərindən öyrənilməsi, geniş təbliğ olunması, həyatı və fəaliyyəti ilə bağlı materialların elmi cəhətdən öyrənilməsini və hərtərəfli inkişafını təşkil edən, Azərbaycan dili və tarixinin, mədəniyyətinin, milli-mənəvi dəyərlərinin yaşadılması istiqamətində sistemli fəaliyyət göstərən dövlət müəssisəsidir. Mərkəzin fəaliyyətində əsas məqsəd Ulu Öndər Heydər Əliyevin həyat və fəaliyyətinin şəhər ictimaiyyətinə və şəhərə gələn qonaqlara daha dərindən çatdırılmasıdır.

Heydər Əliyev Mərkəzi ümumilikdə 3 mərtəbə, 1 mansard və müxtəlif təyinatlı bölmələrin fəaliyyət göstərdiyi otaqlardan ibarətdir. Mərkəzin birinci mərtəbəsinin foyesində Ümummilli Lider Heydər Əliyevin büstü ucaldılıb, Ulu Öndərin həyatının və çoxşaxəli dövlətçilik fəaliyyətinin müxtəlif dövrlərini əks etdirən sənəd və foto-şəkillər nümayiş etdirilir. Eyni zamanda, fiziki qüsurlu insanların da istifadə edə biləcəyi informasiya xarakterli və Ulu Öndərin həyat və fəaliyyətinin müxtəlif dövrlərinə aid nadir şəkilləri əks etdirən elektron köşklər, elektrik sisteminin yerləşdiyi server otağı mövcuddur. Həmin mərtəbədə respublika və şəhər səviyyəsində müxtəlif tədbirlərin keçirilməsi üçün möhtəşəm 420 nəfərlik müasir avadanlıqlarla təchiz olunmuş akt zalı yerləşmişdir. Müxtəlif təyinatlı bölmələrdən ibarət olan mərkəzin ikinci mərtəbəsində kompüter dərnəyinin keçirilməsi üçün kompüter zalı, Azərbaycanın elektron kitabxana portalı olan Alisa proqramı ilə təchiz olunmuş elektron kitabxana, 50 nəfərlik konfrans zalı, gənclər üçün nikahdan öncə laborator-müayinə otağı, intellektual oyun masaları, Sumqayıt şəhərinin inkişaf mərhələlərini əks etdirən kiçik muzey hissə yerləşir. Mərkəzin üçüncü mərtəbəsində xidməti otaqlar, sərgi zalı, xalçaçılıq dərnəyi, planşet, smart lövhə və digər ən müasir avadanlıqla təchiz olunan smart sinif və linqafon otağı, Azərbaycan Respublikasının İqtisadiyyat Nazirliyinin tabeliyində olan Kiçik və Orta Biznesin İnkişafı Agentliyinin fəaliyyət otağı yerləşir. Nikah zalı mansardda yer alır.  Mərkəzimizdə də bu məqsədlə müvafiq şərait yaradılıb. Nikah zalında həmçinin müxtəlif müəssisə və təşkilatların intellektual, əyləncəli və konsert tipli tədbirlərinin keçirilməsi üçün müvafiq şərait vardır. Eyni zamanda, həmin mərtəbədə foto-studiya, mətbəx-bar, rəsm studiyası Sumqayıt sakinlərinin istifadəsindədir.

İl ərzində mütəmadi olaraq məktəb şagirdlərinin gəlməsi və Heydər Əliyev irsinin təbliği həyata keçirilir. Eyni zamanda, mərkəzdə ümumşəhər tədbirləri də təşkil olunur. Mərkəz əməkdaşları, ümumiyyətlə bütün mədəni kütləvi tədbirlərdə fəal iştirak etməklə yanaşı, mərkəzin özündə də xüsusən tarixi əhəmiyyətli tədbirləri yüksək səviyyədə təşkil edir. Bunlarla yanaşı, mərkəz ideoloji istiqamətdə öz fəaliyyətini daha da təkmilləşdirir. Bütün görülmüş tədbirlər yetişməkdə olan gənclərin vətənpərvərlik hisslərini dərinləşdirir, ölkəmizin zəngin tarixinə və mədəniyyətinə hörmət hissini aşılayır. Qonaqlara Ulu öndər Heydər Əliyevin siyasi irsi, həyat və fəaliyyəti ilə bağlı məlumatlar verilir, mövcud ekspozisiya ilə tanışlıq həyata keçirilir.

Bir sözlə, mərkəz mədəni irsimizin təbliğatçısı olaraq Ulu Öndərin dövlətçilik fəlsəfəsi və azərbaycançılıq məfkurəsinin öyrənilməsində, zəngin irsinin tədqiqi və təbliğində böyük rol oynayır.

“Ədəbiyyat və incəsənət”

(04.12.2024)

Nigar Xanəliyeva, “Ədəbiyyat və incəsənət”

Toz və qan qoxusunun içində bir anlıq sükut bürüdü hərşeyi. Döyüş meydanının harayını yarıb keçən o qısa sakitlik anında o mənə tərəf gəldi. Baxışlarında qəribə birşey vardı - nə kədər, nə qorxu. Sadəcə dərin bir qətiyyət və sözlə ifadə edilə bilməyən duyğu. Əlində bir şey tutmuşdu. Mən onu görəndə gözlərimə inanmadım — bu, son patron idi. 

Onlar arasında bir qayda var idi: heç vaxt qadına son patronu verməzlər. Bu, ən dəyərli şeyi, həyatdan sonrakı seçimi paylaşmaq demək idi. Amma o bunu etdi. Barmaqlarını diqqətlə patronun üzərində gəzdirərək, sanki hər hərəkətinə min bir söz gizlədərək onu mənə uzatdı. “Bu sənin üçündür,” — dedi. Onun səsi nə titrədi, nə də çəkinmədən eşidildi. Amma mən anlayırdım, bu yalnız bir patron deyil, bu, sonsuz bir etibar idi. 

Onlar üçün bu patron təkcə döyüş üçün yox, həm də həyatın ən qaranlıq məqamında verilən qərarın rəmzi idi. Bu mərmini kiməsə vermək — öz həyatını, öz taleyini o insana həvalə etmək demək idi. O bunu mənə verdi. Hər bir patron onların ruhundan bir parça idi, son patron isə artıq onların öz ruhu idi. 

O andan sonra döyüş meydanı mənim üçün dəyişdi. Artıq atılan güllələrdən və uçan qəlpələrdən qorxmur, sadəcə, əlində tutduğum kiçik, lakin böyük mənası olan o patrona baxırdım. Bu patron mənə sadəcə sevgi deyil, bir əhd demək idi. Bu, "ölümə qədər mənimsən" demək idi. 

Elə bil ki, bu patron ilə o öz ürəyini mənə əmanət etmişdi. 

Sonra günlər keçdi, döyüşlər bitdi. Amma o patron hələ də mənimlə idi. Mən onu itirmədim, çünki bu patron yalnız bir metal parçası deyildi. O, sevginin, sədaqətin, həyatın hər anına birlikdə dözməyə hazır olmağın rəmziidi. 

O mənim həyatımda həm güllə, həm qalxan oldu. Hər dəfə patrona baxanda onun mənə baxan gözlərini xatırladım. Hər dəfə onu əlimdə tutanda sanki "Mən buradayam" deyirdi. 

Sevdiyim adam mənə öz son patronunu  verdi. Bu, təkcə mənim üçün deyil, onun üçün də bir əhd idi. Bizim sevgimiz elə o patron kimi idi — kiçik, lakin əbədi, sakit, amma güclü, bəlkə də ölümə qədər mənimsən demək üçün yaradılmışdı. Və mən bilirəm, həmin patron mənim taleyimin bir parçasına çevrilmişdi. 

“Ədəbiyyat və incəsənət”

(04.12.2024)

"Atabəylər Şəmsəddin Eldəniz" kitabı Azərbaycanın intibah dövrünü əhatə edir. Orta əsrlər Azərbaycan tarixi ilə əlaqəli çox az material olduğuna görə, bu kitab o zamanın əsas qəhrəmanlarının xarakterlərini özündə əks etdirir.

“Ədəbiyyat və incəsənət” portalı xəbər verir ki, bu sözləri AzərTAC-a açıqlamasında "Atabəylər Şəmsəddin Eldəniz" kitabının müəllifi Əlibala Məhərrəmzadə söyləyib.

"Kitab roman şəklindədir və Orta əsrlərdə baş vermiş saray intriqaları, ümumiyyətlə Şəmsəddin Eldənizin yüksəlişini əks etdirir", - deyə o, qeyd edib.

"Azərbaycan Atabəyləri" bədii-sənədli filmi barədə düşüncələrini paylaşan Ə.Məhərrəmzadə filmin Atabəylər dövlətinin qurulmasının başlanğıcını, Şəmsəddin Eldənizin və Qara Sunqurun şücaətlərini, qəhrəmanlıqlarını özündə əks etdirdiyini söyləyib. O, filmin "Atabəylər Şəmsəddin Eldəniz" kitabının motivləri əsasında serial şəklində davam etdiriləcəyini bildirib.

“Ədəbiyyat və incəsənət”

(04.12.2024)

Dekabrın 3-də Heydər Əliyev Mərkəzində “Azərbaycan Atabəyləri” bədii-sənədli filminin qala-premyerası olub.

Azərbaycan Televiziyası, “Şahdağfilm”, Türkiyənin “İkinciYeni Film”, “Patik Prodüksiyon” və “Ernet Grup” prodakşnlarının birgə səyi ilə ərsəyə gələn filmdə Azərbaycan Respublikası Mədəniyyət Nazirliyi, eyni zamanda, Azərbaycan Respublikası Kino Agentliyi (ARKA) rəsmi tərəfdaş qismində yer alır.

“Ədəbiyyat və incəsənət” portalı AzərTAC-a istinadən xəbər verir ki, premyerada rəsmi qonaqlar, filmin yaradıcı heyəti, incəsənət xadimləri və digər şəxslər iştirak ediblər.

Filmin təqdimatından əvvəl "Ernet Grup" prodakşnın rəhbəri Eray Ucuzal AZƏRTAC-a açıqlamasında "Azərbaycan Atabəyləri" bədii-sənədli filminin gələcəkdə serial olaraq davam etdiriləcəyini, bu istiqamətdə hazırlıq işlərinin görüldüyünü bildirib. "Bu film Azərbaycan tarixini anladan gözəl bir layihə oldu. Azərbaycanla bağlı daha böyük layihələrdə yer almağı düşünürük", - deyə o qeyd edib.

"Azərbaycan Atabəyləri" filminin baş rol ifaçısı, idman ustası, məşhur kikboksçu Zabit Səmədov isə filmlə bağlı təəssüratlarını bölüşərək, belə bir məsuliyyətli rolu ifa etməkdən qürur duyduğunu bildirib. O, filmin qısa müddət ərzində uğurla ərsəyə gəldiyini qeyd edib.

Filmdə Zübeydə Xatun rolunu ifa edən tanınmış teleaparıcı Jalə Həsənli filmin çəkilişləri zamanı mövcud atmosferin insanı sanki həmin dövrlərə apardığını bildirib. O, özünün iştirak etdiyi səhnələrin rahat mühitdə çəkildiyini, lakin döyüş səhnələrinin daha ağır və çətin olduğunu söyləyib. J.Həsənli bu filmin ona peşəkar şəxslərlə işləmək imkanı verdiyini, bu rolu ifa etməkdən qürur duyduğunu diqqətə çatdırıb.

Sonra “Azərbaycan Atabəyləri” bədii-sənədli filmi nümayiş olunub. 

Film Orta əsrlərdə yaşamış Türk dünyasının iki böyük tarixi şəxsiyyəti, cəsur sərkərdələr - Qara Sunqur və Atabəylər dövlətinin qurucusu Şəmsəddin Eldənizin hekayəsindən bəhs edir. 

Filmin quruluşçu rejissoru Məcit Güvən, ssenari müəllifləri Sərvər Bayramov, İlqar Mehti, Səxavət Sahil və Ərcan Kayadır. Prodüserlər eyni ilə İlqar Mehti, Sərvər Bayramov və qardaş Türkiyədən “İkinciYeni Fim”i təmsil edən Furkan Bəsli, quruluşçu rəssam isə Zəfər Malkoçdur. 

Orta əsrlər Azərbaycan tarixinin ən parlaq dövrlərini canlandıran bədii-sənədli filmdə dünyaşöhrətli döyüşçü Zabit Səmədov Şəmsəddin Eldəniz obrazını canlandırarkən, İlqar Mehti isə Qara Sunqur kimi ekrana çıxır. 

Digər əsas rollarda isə Xalq artisti Mehriban Zəki (Möminə Xatun), Əməkdar artist Bəhruz Vaqifoğlu (Məhəmməd Cahan Pəhləvan), Jalə Həsənli (Zübeydə Xatun), Günay Əhməd (Laçın), Tural Əhməd (Arslan Şah), İlqar Musayev (Candar Çavlı), Səmimi Fərhad (Vəzir Əl-Xəzni), Samir Qulamov (Gəncər bəy), Salam İsmayılov (Şeyx İmad), Türkay Cəfərli (Şeyx İmadın köməkçisi), Rəşad Kəsəmənli (Sərkərdə), Hidayət Əliyev (Sultan Məsud) və ölkəmizin digər dəyərli sənətçiləri yer alır.

Filmdə 100-dən çox aktyor epizodları canlandırıb, ümumilikdə isə heyətdə 500 nəfərdən çox insan çalışıb.

“Azərbaycan Atabəyləri” bədii-sənədli filminin nümayişindən sonra çıxış edən filmin ssenari müəllifi İlqar Mehti və quruluşçu rejissoru Məcit Güvən filmin ərsəyə gəlməsi barədə danışıb, bu müddət ərzində qarşılaşdıqları çətinliklərdən və maraqlı məqamlardan söz açıblar. Onlar filmdə xidmətləri olan hər kəsə təşəkkür ediblər. 

Film dekabrın 5-dən etibarən kinoteatrlarda nümayiş olunacaq.

“Ədəbiyyat və incəsənət”

(04.12.2024)

“Ədəbiyyat və İncəsənət” portalının media dəstəyi ilə Azərbaycan Ədəbiyyat Fondunun  Bakı Şəhəri Üzrə Təhsil İdarəsi ilə birgə keçirdiyi “Bir direktor, bir şagird” adlı layihəsinin məqsədi nümunəvi məktəblərimizi, istedadlı şagirdlərimizi üzə çıxarmaq, onların ədəbiyyata olan marağına diqqət yönəltməkdir. 

Hazırda təqdimatda 2 nömrəli Texniki Humanitar Liseyidir.

Layihəni təqdim edir: Ülviyyə Əbülfəzqızı

 DİREKTOR :

Turanə Məcidli Aslan qızı 08.09.1990 tarixində Bakı şəhərində anadan olmuşdur. 2009-2013-cü illərdə Bakı Dövlət Universitetinin kimya fakültəsinin bakalavr, 2013-2015-ci illərdə Bakı Dövlət Universitetinin Kimya fakultəsinin magistr pilləsini fərqlənmə diplomu ilə bitirmişdir. 2015-ci ildə MİQ müsabiqəsində uğur qazanaraq Səbail rayonu 329 nömrəli tam orta məktəbdə kimya müəllimi fəaliyyətinə başlamışdır.

2020-ci ildə “Landau School ” beynəlxalq məktəbində bir illik ixtisasartırma təlimində iştirak etmiş, ingilis dilində kimya və təbiət fənlərini tədris etmişdir. 2021-2022-ci tədris ilində “Bakı Modern Beynəlxalq məktəbi”ndə Science (Təbiət) müəllimi kimi ingilis dilində tədris aparmışdır.

2022-ci ildə Elm və Təhsil Nazirliyi və ADPU-in birgə layihəsi olan “Məktəb Liderliyi” proqramında iştirak etmişdir. 2022-ci il 5 oktyabr tarixində Bakı şəhər üzrə Təhsil idarəsinin “direktor müavinlərinin işə qəbulu” müsabiqəsində uğur qazanaraq, 106 nömrəli tam orta məktəbə təlim-tərbiyə işləri üzrə direktor müavini vəzifəsinə təyin olunmuşdur.

Azərbaycan Respublikası Elm və Təhsil Nazirliyi tərəfindən 2023-cü il 27 yanvar tarixində 2 nömrəli Texniki Humanitar liseyə direktor vəzifəsinə təyin olunmuşdur.

2023-cü ildə Təhsildə İnkişaf və İnnovasiyalar üzrə VII qrant müsabiqəsində "Bilgə Qarabağ" layihəsi ilə qalib olmuşdur. 2024-cü ildə Project Management Institute Southern Italy institutu ilə online birgə əməkdaşlıq çərçivəsində Project Management Skills for Life təlimində tutor müəllim kimi sertifikat qazanmışdır.

2024/2025-ci tədris ilindən etibarən Azərbaycan Respublikasının Təhsil İnstitutunun "Təhsilin Təşkili və Planlaşdırılması” ixtisası üzrə doktorantura təhsili alır. Müxtəlif yerli və beynəlxalq təlim və layihələrdə iştirak etmişdir.

ŞAGİRD :

Mən, Kouli Melani Nevil qızı 2 nömrəli Texniki Humanitar liseyin 9B sinfində təhsil alıram. 2016-cı ildən bəri rəsm ilə məşğul oluram. 2019-cu ildə Özbəkistan Respublikasında keçirilən "Joys of Tashkent" Biennalesində sertifikata layiq görülmüşəm və Qazaxıstan Respublikasında keçirilən "Kazakhstan through the eyes of the children of the world" beynəlxalq sərgisinin 2-ci yer qalibi diplomu ilə mükafatlandırılmışam. 2021-ci ildə Azərbaycan Respublikasında keçirilən "Nizami Gəncəvi yaradıcılığında iqtisadi motivlər" rəsm müsabiqəsinin 2-ci yer qalibi və Rusiya Federasiyasında keçirilən "Nature of the world" Beynəlxalq müsabiqəsinin sertifikatlarına layiq olmuşam. 2022-ci ildə Azərbaycanda keçirilən "Qarşıla bizi, Şuşa!" müsabiqəsinin 2-ci yer qalibi diplomu ilə mükafatlandırılmışam, Mərakeş Krallığında keçirilən "Morocco through the eyes of young Azerbaijani artists" sertifikatını və Türkiyə Respublikasında keçirilən "Karabağ Azerbaycan`dır" rəsm sərgisinin təşəkkürnaməsini əldə etmişəm. 2023-cü ildə Azərbaycan Respublikasında keçirilən "Hərb tariximizin şah əsəri - Böyük Zəfər" layihəsinin 1-ci yer qalibi diplomu ilə, "Uğurlarımızla 2024-ə" 1-ci yer kuboku ilə, "Milli iradəmizin zəfər çaldığı gün!" rəsm müsabiqəsinin 2-ci yer qalibi sertifikatı ilə, "Ulu Öndəri düşünərkən” rəsm müsabiqəsinin 3-cü yer qalibi sertifikatı ilə və "İdman həftəsi" rəsm müsabiqəsinin 3-cü yer qalibi diplomu ilə mükafatlandırılmışam. 2024-cü ildə "50 milyonun zəfəri" müsabiqəsində qalib sertifikatına layiq görülmüşəm.

ESSE

“Mənim dünyam”

Mənim dünyam... Bu necədir? Mənim dünyam parlaq, rəngarəng və çox canlıdır. Bu dünyada hər qar dənəciyi, yağış damcısı, ot və hər yarpaq canlı insan kimi nəfəs alır. Bu dünya gözəl göy qurşağı rəngləri ilə doludur. Mənə elə gəlir ki, bütün bunları mənim həyatıma rəssamlıq gətirib. Xatırladığıma görə, mən həmişə rəsm çəkmişəm və bu mənə böyük həzz verib.

Mənim üçün rəsm çəkmək meditasiya kimidir, məni sakitlik və xoşbəxtliklə doldurur. Rəng palitrasını seçmək prosesində sanki sonsuz bir okeana qərq oluram. Rəngləri sevirəm, nə qədər qəribə səslənsə də! Mən dünyanı parlaq rənglərlə doldurmağı sevirəm.

Üstəlik, rəsm prosesində məni kənar düşüncələr tamamilə tərk edir. Rəsm çəkərkən, mən elə bil nağıl dünyasına qərq oluram: daxili dialoq dayanır, adi problemlər və qayğılar unudulur. Belə işıqlı vəziyyətdə saatlar keçir. Zaman tamamilə fərq etmədən uçur.

Rəsm çəkmək mənim üçün həm də enerji mənbəyidir. Heç nəyə güc olmayanda, hər şeydən yorulanda, boyalar və rəngli karandaşlarla işləməkdən gözəl nə var?

Bundan başqa rəsm qısamüddətli və uzunmüddətli yaddaşı inkişaf etdirir. Bir vərəqdə bir obyekti təsvir etmək üçün təsvir yaradıcının başında qorunmalıdır. Bu təsvir obyektin silueti, forması, xətlərin meyl bucaqları, kəsişmələr,  rəng və işıq, obyektin mənası haqqında məlumatları saxlayır. Rəsm beynin hər iki yarımkürəsini istifadə edir. Biz adətən daha rasional düşünməyə öyrəşmişik, rəsm isə beynin yaradıcılıqa cavabdeh olan sağ yarımkürəsini də inkişaf  etdirir.

Rəssamlıq mənim üçün təsvirolunmaz gözəlliyi ecazkar olan bir dünyanı açdı. Mən rəsm çəkməyə başlayandan sonra, hər ağacın, kolun və qayanın incəliyini və bənzərsizliyini görməyi öyrəndim. Çoxlarına elə gəlir ki, ağac ağac kimi, körpü körpü kimidir, ağaclar hamısı bir birinə oxşayır, körpülər də eynidir, dağlarda, dərələrdə... Ancaq bu dünyanın bütün unikallığını və incəliyini yalnız yaradıcı insanlar görə bilər.

Çox şadam ki, qarşımda belə gözəl bir dünya açılıb. Bunun üçün mən rəssamlığa və bu dünyanı mənim üçün açan insanlara - valideynlərimə və artıq 8 ildir ki, bu böyük sənətin sirlərinə məni qovuşduran müəllimimə çox minnətdaram.

Hələ də rəsm çəkməyi davam edirəm və istər ölkə daxilində, istərsə də xaricdə keçirilən çoxsaylı müsabiqələrdə iştirak edirəm. Çoxlu mükafatlarım var, amma bu mənim üçün əsas deyil. Mənim üçün əsas odur ki, bu dünyanın sehrli gözəlliyini hər bir insana öz rəsmlərimlə çatdırım, onları enerji, hərarət və bənzərsiz işıqla doldurum. İstəyirəm ki, insanlar rəsm vasitəsilə həyatdan həzz almağı öyrənsinlər.

“Ədəbiyyat və incəaənət”

(04.12.2024)

RƏSSAM MEHRİBAN ALIŞOVANIN RƏNGLƏR DÜNYASINA BİR BAXIŞ

Ülviyyə Əbülfəzqızı, “Ədəbiyyat və incəsənət”

Oskar Vayld çox gözəl söyləyib ki:

"İncəsənət, həyatın təqlidi deyil, həyatın yenidən yaradılmasıdır."

İncəsənət bizlərə gözəlliyi göstərən aynadır.

İncəsənətin hər növü gözəldir.

Rəssamlar duyğularını boyalarla söyləyən istedadlı insanlardır.

Bugünkü qonağımız da öz daxili duyğularını boyalarla söyləyən ixtisasca iqtisadçı, rəssam Mehriban xanım Alışovadır.

Leonordo da Vinçi isə söyləyib ki: "Rəsm, düşüncələrin səssiz musiqisidir."

Biz Mehriban xanımın tablolarına baxarkən o musiqini çox gözəl duyuruq. Rəssamlığın bütün janrlarına müraciət edən Mehriban xanımın əsərlərində üstünlüyü abstrakt janr təşkil etsə də, mifoloji, surrealizm, simvolizm, kollaj, qrafika, dəzgah rəngkarlığının və digər janrların izlərini görmək olar.

Rəssamın özünün xüsusi üslubu var, bu da onun rəsmlərini sevdirən xüsusiyyətlərindəndir.

0nun Ulu Öndərimiz Heydər Əliyevin 100 illiyinə həsr olunmuş " Rənglərin Sehrli İşığı" adlı sərgisi də maraqla qarşılanıb. Üç gün davam edən bu sərgidə insanların sənətə olan sevgisinin şahidi olan Mehriban xanım o günü uzun müddət unutmayıb.

"Ədəbiyyat və İncəsənət" portalı hər zaman yaradıcıların iç dünyasını izləyicilərə təqdim edərək xalq ilə sənətkar arasında mənəvi körpü yaradır.

Beləliklə, Mehriban xanımın öz dilindən bir neçə rəsminin təhlilinə nəzər salaq.

-Xoş gördük, əziz Rəssamımız! İzləyicilərinizə bu sənətə gəlmə tarixçəsindən, rəsmlərinizin gizli aləmindən söz açın.

-Xoş gördük, Ülviyyə xanım. İlk olaraq “Ədəbiyyat və İncəsənət" portalının rəhbəri sevimli yazarımız Varis bəyə və Sizə təşəkkürümü bildirirəm.

Söyləyim ki, mən bu sənəti daxilimdə daşımışam, son beş ildə üzə çıxarmışam. Hal-hazırda 58 yaşım var və bunu gizlətmirəm.

Mənə Azərbaycanda 53 yaşında bu sənətə  gələn inqilabçı qadın da demək olar.

Demək olar ki,  5 il müddətində yetəri qədər rəsm əsərləri yaratdım. Böyük ölçülü rəsm əsərlərini müxtəlif materiallarla bəzəmək, əlbəttə, çox vaxt alır. Amma bütün bunlar qəlbimin səsidir, qəlbimin izləridir. İstəyirəm əsərlərim ildən-ilə solmaz çiçək kimi ötürülsün, axı rəsm əsərləri solmayan, təravətini itirməyən gözəllikdir.

Mən ixtisasca iqtisadçıyam, Xalq Təsərrüfatı İnistutunu bitirmişəm.

Lakin sonradan pandemiya dövründə  özümü daha da təkmilləşdirmək ücün Rusiya Dövlət Humanitar Universitetinin  Bədii tərtibat və muzey texnalogiyaları, İncəsənətin tarixi fakültəsində  distant təhsil aldım..

Azərbaycanda isə rəssamlıq dərslərini  Azərbaycan  Respublikasının  Xalq rəssamı Sakit Məmmədovun tələbəsi Nizar Məmmədovdan almışam.

-Mehriban xanım, izləyicilərinizə bir neçə rəsm əsərlərinizdən danışaqmı?!

-Əlbəttə, böyük məmnuniyyətlə, hər bir rəsm əsəri mənim sevgi və əməyimdən yaranıb. Hər biri bir dünyadır.

Rəsmlərim mənim dünyaya baxışımdır və o rəsmlərdə mənim nəfəsim yaşayır.

--"Ana təbiət" adlı rəsm əsəri diqqətimizi çox çəkdi, nə üçün onu qadın obrazında vermisiniz və çox maraqlıdır ki, bu obrazın üz cizgiləri yoxdur?

-Bəli, bu rəsm əsərini çəkməyə başlayarkən bir gözəl xanım obrazını yaratmağı düşünmüşdüm.

Ümumiyyətlə, söyləyim ki, rəsm əsərlərimi yaradarkən mən öz dünyamda oluram, duyğularım barmaqlarımdan fırçama ötürülür, sanki duyğularım fırçanı çəkir, barmaqlarım deyil. Sonda rənglər dünyamdan qayıdanda barmaqlarım  və gözlərim çəkilmiş rəsm qarşısında heyrətlə donub qalır. Rəngləri, bütün cizgiləri, hər şeyi duyğularım çəkir.

Bu rəsmi də çəkərkən anladım ki, mən təbiətin rəsmini yaradıram və ona görə üz cizgilərini çəkəndə fırçam dayandı, çünki söylədiyim kimi biz təbiətin bir hissəsiyik bu simada hər kəs özünü görməlidir.

Təbiət gözəl olduğu üçün mənim ruhum, duyğum onu gözəl bir xanım obrazında yaratdı.

Qadın gözəllikdir axı, ən gözəl sənət əsəri kimi möhtəşəmdir.

-Mehriban xanım, abstrakt və simvolik İncəsənətdə gözlər mistik anlamlar daşıyan simvol olaraq istifadə olunur. Sizin rəsmlərinizdə də bunu görmək olur. Sizin təxəyyülünüzdə o gözlər nəyi ifadə edir?

--Doğrudur, Ülviyyə xanım, mən də rəsmlərimdə bu simvollardan istifadə etmişəm.

Gözlər qəlbin aynasıdır və biz dünyanı gözlərimizlə görürük. Hər kəs dünyaya öz pəncərəsindən boylanır.

Rəsm əsərlərimin çoxunda gözlərdən istifadə etmişəm, o gözlərin hər birinin öz anlamı var.

Kiminin gözlərində sevgi var o gözlərin sahibi dünyaya sevgi ilə boylanır, mərhəmət dolu qəlbiylə insanlara şəfa verir. Kiminin qəlbi " qara" içindəki "qara duyğular" onun daxilindəki nurun yayılmasını əngəlləyir və bu gözləri də çəkmişəm.

Gərəkdir ki, qəlb gözümüz Yaradanın ilk yaratdığı kimi hər zaman gözəl görsün, bax o zaman baxışlar- gözlər gözəl olub gözəl görəcək.

-- Əziz Rəssamımız, rəsmlərinizdə gözəl xanım obrazlarını görürük, ümumiyyətlə, reallıqda bir xanım obrazı necə olmalıdır?

-- Ülviyyə xanım, mənim üçün əsl xanımın daxili və xarici gözəlliyi vəhdətdə olmalıdır.

Bir xanım kübar olmalı, anlayışlı olmalıdır.

Mənim üçün mənəviyyatı zəngin olan xanım dünyanın ən gözəl xanımıdır. Zənginlik bahalı daş-qaş, brend geyimlə ölçülmür, zəngin bir xanımın təmiz mənəviyyatı elə ən böyük zənginlikdir.

Rəsmlərimdə də o xanımların gözəl auralarını parlaq rənglərlə yaratmışam.

--  Rəsmlərinizdə Simurq obrazı nəyi ifadə edir?

-- Ümumiyyətlə, Simurq obrazı müxtəlif zəngin mənalar daşıyan simvolik bir obrazdır.

Fars mifologiyasında sehirli və müqəddəs bir quş olaraq təsvir olunur.

Simurq öz küllərindən yenidən doğan bir obrazdır.

Bu da insan ruhunun özünü aşaraq yeni bir səviyyə yüksəlişini göstərən bir simvoldur.

Türk mifologiyasında Simurq " Tuğrul quşu" və ya "Zümrüdü Anka" adlanır. O, qələbə, sülh və gücün simvoludur.

Mənim əsərlərimdə Simurq xeyri, bərəkəti, mərhəməti, köməyi ifadə edir.

-- Mehriban xanım, rəngləri əvvəlcədən seçirsiniz, yoxsa, duyğularınız rəsm çəkərkən özü seçir?

-- Söylədiyim kimi mən rəsm çəkərkən fərqli dünyada oluram, mənim barmaqlarımı duyğularım idarə edir, elə duyğular da həmin an rəngləri seçir.

-- Fluid Art texnikası ilə yaratdığınız bir rəsmi gördük.

Bu abstrakt, rəngli naxışlar Mehriban xanım üçün nəyi ifadə edir?

-- Rənglərin axıcılığı, sərbəst harmoniyası çox xoşuma gəlir, mən dünyanı rəngli görürəm, rənglər dünyaya gözəllikdən hazırlanan don kimi yaraşır.

Mən dünyamızı rəngli, gözəl  görürəm.

Həyat gözəldir, bizə həyatı bəxş edənə Şükürlər olsun!

-- Mehriban xanım  rubrikamızın qonağı olduğunuz üçün Sizə minnətdarıq, bizi rənglər dünyasının sehrinə apardığınız üçün Sizə təşəkkür edir, yaradıcılıq uğurları diləyirik.

“Ədəbiyyat və incəsənət”

(04.12.2024)