Super User
Maykl Duqlas Kann Film Festivalında fəxri mükafata layiq görülüb
76-cı Kann kinofestivalı barədə ən son xəbərləri nəzərinizə çatdırmaqdayıq. Hollivud ulduzu, aktyor Maykl Duqlas fəxri “Qızıl palma budağı” mükafatına layiq görülüb. Və mükafatı M.Duqlasa aktrisa Uma Turman və aparıcı Kyara Mastroyani təqdim ediblər.
“Ədəbiyyat və incəsənət” kinopoisk.ru-ya istinadən xəbər verir ki Duqlas mükafatı alarkən söyləyib:
“Bu mükafata və xoş sözlərə görə təşəkkür edirəm. Dünyada yüzlərlə festival mövcuddur, ancaq bunların içində kino sahəsinin tək festivalı Kandır. Bu festivalın 76 yaşı var, amma mən daha da qocalmışam”.
Qeyd edək ki, bu fəxri mükafat sevilən aktyora kino sənətinin inkişafında müstəsna xidmətlərinə görə verilib. Maykl Duqlas film festivalında həyat yoldaşı, dünyaşöhrətli aktrisa Ketrin Zeta-Cons və qızı Karislə birgə iştirak edib.
76-cı Kann Film Festivalı mayın 27-dək davam edəcək.
“Ədəbiyyat və incəsənət”
(19.05.2023)
Kamal Abdullanın “Bir, iki – bizimki” tamaşası növbəti dəfə anşlaq yaratdı
Azərbaycan Dövlət Akademik Milli Dram Teatrının Abbas Mirzə Şərifzadə səhnəsində Xalq yazıçısı Kamal Abdullanın “Bir, iki – bizimki!” pyesi əsasında hazırlanan eyniadlı tamaşa təqdim olunub.
Teatrın mətbuat xidmətindən verilən məlumata görə, səhnə əsərinin quruluşçu rejissoru Əlif Cahangirli, rəssamı Əməkdar mədəniyyət işçisi İlham Elxanoğlu, işıq rejissoru Rafael Həsənov, səs rejissoru Şahanə Səlimova, rejissor assistenti Nərmin Camalovadır.
Bədii rəhbəri Xalq artisti Azər Paşa Nemətov olan tamaşada rolları Əməkdar artist Ayşad Məmmədov, aktyorlar İlahə Həsənova, Ziya Ağa, Xədicə Novruzlu və Davud Arif ifa ediblər.
Səhnə əsərində oyun qəhrəmanın əbədi rahatlıq tapmaq arzusunu təcəssüm etdirir.
Səhnə əsəri iki fərqli dünya insanının söhbəti, bir-birinə təmassız toxunuşları, ehtirası, sevgisi, peşmanlığı, əsəbi, mübahisəsi, yenə də qovuşmaq arzuları üzərində qurulub. Onların dialoqu kişinin xarakteri, kimliyi haqqında geniş düşüncələr yaradır. Bu iki nəfər bir-birini eşitmək istəyir, amma eşitmir, görmək istəyir, amma görmür, duymaq istəyir, amma duymur. Bütün ömürlərini öz ağuşuna alan faciə də məhz budur: bir-birini sevən, bir-birinə can atan insanların bir-birinin dünyalarındakı ayrılıq. Elə birinin ölü, o birinin diri olması da simvolikdir.
Müəllif Kamal Abdulla pyesi 5 şəkildən ibarət, bir-birini anlamaq istəyən və anlamayan, tapmaq istəyən və tapmayan iki nəfərin duyumlar dramı kimi təqdim edir.
Şəkildə: Kamal Abdulla tamaşadan sonra səhnədə
“Ədəbiyyat və incəsənət”
(19.05.2023)
“Yazıçı, şair ədəbiyyatın çölündə olmalıdır ki, içinə nəsə gətirsin” – Anar Adillə müsahibə
“Ədəbiyyat və incəsənət” portalının əməkdaşı Habil Yaşarın şair və qiraətçi Anar Adillə müsahibəsini təqdim edirik.
-Öncə özünüz haqqında məlumat verərdiniz.
-Nəzərəliyev Anar Adil oğlu. Adil kişinin oğlu... Bakı şəhərində anadan olmuşam. Bu qədər.
-İlham mənbəyiniz nədir?
-İnsan daha çox hərislikdən və xəsisliyindən ibarətdir. Təsəvvür edin, xəzinə tapmısınız. Ya onu hara gəldi xərcləyib tez istifadə edəcəksiniz, ya da “nə vaxtsa lazım olar” deyib saxlayacaqsınız. Hər iki halda faydası olmayacaq. İlham mənbəyini də haradan və necə almağı bilmiş olsaq, inanın ki, onu ya bir gecəyə tükədib məhv edəcəyik, ya da sabah - biri gün istifadə edərik deyə - deyə həmin o "mənbə" ni qəbizləşdirəcəyik.
-Xəyal dünyanızın bu qədər genişlənməsinə səbəb olan hadisələr hansılardır?
-Xəyallarım reallıq tərəfindən işğal olunandan sonra xəyalistlər vətəndaşlıqdan imtina edib oldum realist. Standart, bozumtul xəyallardı.
-Əsərlərinizi ən çox harada yazmağı sevirsiniz?
-Yazının, sözün yazıqlığı tutduğu yerdə.
-Yazmaq sizin üçün nə deməkdir?
-Bəlkə də məndən asılı bir şeydir yazmaq. Bəlkə də asılı deyil. Özünə çatmaq üçün göstərdiyin çabadı bəlkə. Məncə, elə mən də bilmirəm, nə üçün yazıram. Gerçəkliyə məcburi uyğunlaşmadı.
-Yazıçı üçün zaman nədir?
-İnsana yaşamaq üçün təkcə oksigen kifayət etmir. Zaman keçdikcə xatirə ehtiyatından da qidalanmağa başlayırsan. Zaman həm də insana inamın ən yaxşı immunitet olduğunu öyrədir.
-Ümumiyyətlə, hansı janrda kitablar oxuyursunuz və niyə bu janra üstünlük verirsiniz?
-Dram oxuyuram. Dedektivi isə filmdə izləməyi daha çox sevirəm.
-İlk dəfə nə vaxt “yazıçı olacağam” demisiniz?
-Konkret nə vaxtsa şair və yazıçı olacağam deməmişəm .
-Sizcə, kitab oxumaq vərdişini qazanmaq üçün nə etmək lazımdır?
-Bilirsiniz, yazıçı və şairin özünü ədəbiyyatın içi, ədəbi cameəçi hesab etməsi yalnışdır. Yazıçı, şair ədəbiyyatın çölündə olmalıdır ki, içinə nəsə gətirsin. Arı yeşiyinə, arıların iş fəaliyyətinə fikir vermisiniz? İşləri ancaq ağaclardan, çiçəklərdən şirə toplayıb yuvaya gətirməkdi. Texnologiyanın yüksək inkişafı kitaba toxunuşun, oxumağın məhrəmliyini poza bildi. Kitab sərgilərində ən çox xarici yazıçıların, qismən də yerli yazıçıların kitabı alınır. Kitab təqdimatları isə 98 faiz şair və yazıçıların, 2 faiz də oxucunun iştirakı ilə baş tutur. Hələki "heç kim , heç kimin kitabını oxumur"
-Yeni bir kitab yazmaq planınız varmı?
-Üzümüzə gələn ildə düşünürəm.
-Yazıçı olmaq istəyən gənclərə hansı məsləhətləriniz var?
-Əlimdən uğur diləmək gəlir. Hamıya külli miqdarda uğurlar arzulayıram.
“Ədəbiyyat və incəsənət”
(19.05.2023)
Təbiət vurğunu - uşaqlar üçün hekayələr
“Ədəbiyyat və incəsənət” portalı Zahirə Cabirin Ümummilli lider Heydər Əliyevə həsr edilmiş, azyaşlı oxuculara ünvanlanan hekayələrinin dərcini davam edir. Növbəti hekayə ilə tanış olun.
Təbiət vurğunu
Ata-babalarımızın bir müdrik kəlamı var: - Ağac əkmək, bağ salmaq hünər deyil. Gərək onu qoruyub saxlamağı bacarasan. Təbiəti sevmək, onu qorumaq hər bir vətəndaşın borcudur.
Təbiət vurğunu idi. Ağac əkməyi çox sevərdi. O vaxtlar Naxçıvan küçələrində yaşıllıq çox az idi. Tut, göyçə, ərik ağacları əsasən həyətlərdə bitirdi. Şəhərin baş küçəsində isə salxım söyüdlər əkilmişdi.
Bir gün Heydər sinif yoldaşlarını başına yığıb şəhərin yaşıllaşması üçün təşəbbüs göstərdi. Yoldaşları onun təşəbbüsünə qoşuldular. Az keçmədi ki, onlar dağ rayonlarından meşə ağaclarının tinglərini gətirdilər, köməkləşib yolların qırağında əkdilər. Beləcə park və bağlar yaratdılar.
İllər keçdi...Həyatının çətin bir anlarında, 1991-ci ildə Naxçıvana gələndə çox pis vaxtlar idi. Demək olar ki, həftələrlə insanlar elektrik enerjisindən məhrum olurdular. Heydər gecələr neft lampası ilə oturub işləyirdi. Evlərə, məktəblərə elektrik, istilik vermək üçün heç bir imkan yox idi. O illərdə insanlar bir-birlərinə olan sədaqətlərini əməlləriylə sübut etdilər. Sübut etdilər ki, öz torpaqlarına, xalqına, millətinə, müqəddəs, müstəqil Azərbaycana sədaqətlidirlər. Heydər də sədaqətli olmağını gördüyü işlərlə onlara çatdırdı.
Naxçıvanın qışı çox şaxtalıdır. Və belə qarlı, şaxtalı bir gündə maşınla Şərura gedirdi. Qarlı yollara baxdıqca yadına bir vaxtlar sinif yoldaşlarıyla əkdiyi ağaclar düşdü. Qar dizə qədər yağmışdı. Uzaqdan onun maşınını görən kişilər hərəsi bir tərəfə qaçır. Heydər qadınların ağacları mişarladığını, kəsdiyini görür. Onlara yaxınlaşıb soruşur: “Ay bacılar, axı nə edirsiniz? Bu ağacları vaxtilə mən sinif yoldaşlarımla əkmişdim. Niyə kəsirsiz?” Dedilər: “Bilirik, bu ağaclar bizə lazımdır, amma biz bu soyuğa dözürük, uşaqlarımız isə dözə bilmir, soyuqdan donurlar. Sizin maşını görəndə kişilər utandıqlarından qaçıb gizləndilər. Onlar ağacları kəsib qızınmaq üçün evlərinə aparırlar”. Heydəri qəhər boğsa da heç nə deyə bilmədi. Baxmayaraq ki, əkilən bu ağaclar uzun illərin bəhrəsi idi. Yalnız, - “eybi yox, təki uşaqlara heç nə olmasın. Hər kəsilən ağacın yerinə on ağac əkərik”, - dedi.
Nə etsinlər?....Blokada... Qaz yox, işıq yox, yanacaq yox, dəmir yolu iflic... Çarə on illərlə boya-başa çatmış ağacları kəsib sobalarda təzəklə birlikdə yandırmağa qalmışdı. Nəinki dağda-daşda, meşələrdə, heç həyətlərdə də kölgəsində daldalanacaq yaşıl ağaclar qalmamışdı. Onlar da insanların ümidi kimi kəsilə-kəsilə gedirdi...
Pis günün ömrü az olar deyərlər. Beləcə iki il ötdü. Ulu öndərin yaxın qonşu ölkələrlə apardığı danışıqlar öz faydasını verdi. Sonralar əməksevər insanların sayəsində keçirilən iməcliklər, yaşıllaşdırma aksiyaları yolu ilə yol kənarlarında on minlərlə ting basdırıldı, minlərlə yaşıllıq zolaqları yaradıldı. Çox keçmədi ki, o yerlər başdan-başa yaşıllığa, gül-çiçəyə büründü.
Birləşmiş Ərəb Əmirliklərinin nüfuzlu “Əl-Fəcr" qəzetinin baş redaktoru Şərif Əl Bəsil öz qəzetində yazmışdı ki, Naxçıvanın iməcilik ənənələrini bütün dünyada vətəni, torpağı sevmək nümunəsi kimi tətbiq etmək lazımdır, yoxsa ekoloji böhran gələcəkdə bəşəriyyəti məhv edər.
“Ədəbiyyat və incəsənət”
(19.05.2023)
Ruslar kino sahəsində kart-blanş götürür
Xəbər verdiyimiz kimi, Rusiya kinematoqrafçıları amerikalı həmkarlarını üstələyərək, film çəkmək üçün ilk dəfə kosmosa yollanıblar. Və kosmosdan bəhs edən "Çağırış" adlı ekran əsəri işıq üzü görüb.
“Ədəbiyyat və incəsənət” portalı Rusiya KİV-nə istinadən xəbər verir ki, sözügedən fiım yerli kassada yeni mərhələyə çatıb. Filmin ümumi kassa gəlirləri 1,5 milyard rublu ötərək ən uğurlu layihələr sırasında yer alıb.
Layihənin ilk istehsal büdcəsinin 900 milyon rubl olduğu təsdiqlənib və nümayişlərdən gələn gəlirlərin hələ də xeyli artacağı proqnozlaşdırılır.
Nəzərə alın ki, 1,5 milyard rubl - 40 milyon manatdır.
"Çağırış" filminin əksər epizodları real kosmosda lentə alınıb. Ekran əsərinin rejissoru Klim Şipenko və baş rol ifaçısı Yuliya Peresild Rusiya kosmik gəmisində orbitə çıxaraq Beynəlxalq Kosmik Stansiyada (BKS) bir neçə epizod lentə alıblar. Onlara rusiyalı ekipaj kömək edib.
Qeyd edək ki, kosmosun tədqiqi ilə bağlı elmi-maarifləndirci layihə olan “Çağırış” bədii filmi xüsusi effektlərin köməyi ilə çəkisizlik vəziyyətini simulyasiya edən ənənəvi çəkiliş pavilyonlarında deyil, real kosmosda çəkilmiş ilk filmdir.
İndi söz ABŞ-ındır.
“Ədəbiyyat və incəsənət”
(19.05.2023)
Qəzənfər Paşayev: “Heydər Əliyev muğamatı da, klassik musiqini də, aşıq musiqisini də çox sevirdi...”
“Ədəbiyyat və incəsənət” portalı filologiya elmləri doktoru, professorQəzənfər Paşayevin “HEYDƏR ƏLİYEV VƏ MİLLİ-MƏNƏVİ DƏYƏRLƏRİMİZ” sərlövhəli məqaləsini təqdim edir.
Azərbaycan tarixində bir epoxa olan, xalqın tarixi müqəddəratında həlledici rol oynayan, adı tariximizə qızıl hərflərlə yazılan Heydər Əliyev milli-mənəvi dəyərlərimizin qorunmasına və təbliğinə xüsusi qayğı göstərirdi. Yaradan ona elə bir fitri istedad vermişdi ki, hər sahəni mükəmməl bilirdi. Biz bu yazımızda bu tarixi şəxsiyyətin folklorumuza göstərdiyi diqqət və qayğıdan söz açacağıq.
Öndərimizin folklor haqqında heyrətamiz bələdliklə mülahizələr yürütməsi, məsələnin kökünə nüfuz etməsi onun fitri istedadından və milli-mənəvi dəyərlərimizə tükənməz məhəbbətindən qaynaqlanırdı.
Ulu öndərimiz Heydər Əliyevin folklorumuzun tədqiqi və təbliği yolunda atdığı addımlar müstəsna dəyər kəsb edir.
Şifahi xalq ədəbiyyatımızın zirvəsi, şifahi və yazılı ədəbiyyatımızın başlanğıcı və tükənməz enerji mənbəyi "Kitabi-Dədə Qorqud" o dahi şəxsiyyətin sayəsində layiqli yerini tutdu.
Yaşlı nəsil unutmayıb ki, keçən əsrin 40-50-ci illərində "Kitabi-Dədə Qorqud" yasaq edilmişdi. Həmid Araslı və Məmmədhüseyn Təhmasib akademik V.Bartoldun ruscaya çevirdiyi "Kniqa moeqo Deda Korkuda" kitabını 1950-ci ildə Bakıda Elmlər Akademiyası nəşriyyatında çap etdirdiyinə, Əbüləzəl Dəmirçizadə uşaqlar üçün "Dədə Qorqud" mövzuları əsasında "Qaraca Çoban" pyesi yazdığına görə, Səməd Vurğun şair fəhmi ilə bu ölməz abidənin işıqlı gələcəyini görərək onu "Gələcəyin toy-bayramı" şeirində:
Dədə Qorqud dediyimiz
min bir yaşlı bir ozan da
Qoca vaxtı öz sazını sinəsinə basacaqdır.
Bütün xalqlar və tayfalar
ona qulaq asacaqdır.
– deyə tərənnüm etdiyinə görə başları çox bəlalar çəkmişdi. Əvvəlcə partiya yığıncağında kəskin tənqid olundular, 1951-ci ilin may ayında isə Yazıçılar İttifaqının iclasında "səhv"lərini etiraf etsələr də, az qala onları pantürkist damğası ilə damğalayacaqdılar.
Ulu öndərimiz "Kitabi-Dədə Qorqud" ensiklopediyasına yazdığı ön sözdə göstərir ki, o dövrdə elə bir iclas, elə bir qurultay, elə bir konfrans olmazdı ki, orada "Dədə Qorqud" tənqid olunmasın. Eposa qadağa damğası vurulmuşdu.
"Kitabi-Dədə Qorqud"un elmi-ədəbi fikir dövriyyəsinə daxil olmasında Heydər Əliyevin xidmətləri ölçüyəgəlməzdir. Tədqiqatçıların doğru olaraq qeyd etdiyi kimi, ulu öndərimiz hakimiyyətə yenidən qayıtdıqdan sonra milli düşüncənin bütün sahələrindən daha çox ədəbiyyatda coşqun "Kitabi-Dədə Qorqud" dövrü başladı. Necə deyərlər, milli ədəbi düşüncədə bir "Kitabi-Dədə Qorqud" sevgisi alovlandı.
Xalq şairi Zəlimxan Yaqub deyirdi ki, "Manas"ın min illik yubileyində Ulu öndərimiz də iştirak edirdi. Təntənəli yığıncaqdan sonra bizə ayrılmış çadırlara yenicə gəlmişdik ki, xəbər gəldi ki, Heydər Əliyev hamımızı öz çadırına çağırır. Getdik. Onun ilk sözü bu oldu: "Kitabi-Dədə Qorqud"un başlanğıc cümləsi necədir? Şübhəmiz yox idi ki, ulu öndər onu bizdən də yaxşı bilirdi. Bununla belə, dedik: "Rəsul Əleyhissəlamın zamanına yaqın Bayat boyundan Qorqud Ata derlər, bir ər qopdu". Bu isə VII əsr idi. Məlum oldu ki, öndərimiz o söhbəti təsadüfi salmamışdı. Bakıya qayıdandan sonra Heydər Əliyev "Kitabi-Dədə Qorqud" eposunun 1300 illiyinin beynəlxalq səviyyədə keçirilməsi barədə 20 aprel 1997-ci il tarixli fərman imzaladı. Dövlət səviyyəsində tədbirlər planı tutuldu. Üç il alimlər, qələm sahibləri çalışdılar. Çox sayda kitablar nəşr olundu. İkicildlik "Kitabi-Dədə Qorqud" ensiklopediyası meydana gəldi.
Dövlət başçısı bu möhtəşəm abidəyə dərin məzmunlu, əhatəli ön söz yazdı. Öndərimiz eposu yüksək dəyərləndirərək ön sözdə yazırdı: "Dünya qorqudşünaslığı "Kitabi-Dədə Qorqud"un istər etnik, mənşə, istər tarixi-coğrafi, ərazi, istərsə də dil və məfkurə baxımından Azərbaycan xalqına mənsub olması fikrini qəti şəkildə təsdiq edir. "Kitabi-Dədə Qorqud"un Azərbaycan tarixi üçün ən böyük, ən əsas və ən birinci xidməti bundan ibarətdir...
Bizim zəngin tariximiz, qədim mədəniyyətimiz və milli-mənəvi dəyərlərimiz "Kitabi-Dədə Qorqud" eposunda öz əksini tapmışdır. Bu epos bizim ümumi sərvətimizdir və hər bir azərbaycanlı onunla fəxr edə bilər... Həqiqətən də, "Kitabi-Dədə Qorqud" dastanı kimi böyük elm, mədəniyyət, ədəbiyyat abidəsi olan xalq öz tarixi ilə fəxr edə bilər...
"Kitabi-Dədə Qorqud" elə bir qüdrətə malikdir ki, özündən sonra gələn söz sənətimiz, ozan-aşıq sənətimiz, yazılı ədəbiyyatımız onun təsirindən kənarda qala bilməmişdir. Ensiklopediya da "Kitabi-Dədə Qorqud"un bu təsir gücünü əyani şəkildə nümayiş etdirir".
Onu da deyim ki, "Kitabi-Dədə Qorqud"un 1300 illik yubileyinin ümumdünya miqyasında keçirilməsi barədə UNESCO-nun qərarı vardı. Yubiley 2000-ci ildə keçirildi. Heydər Əliyev geniş məruzə ilə çıxış etdi. "Kitabi-Dədə Qorqud"un Azərbaycan xalqına məxsus olmasının təsdiqi ulu öndərimizin ən böyük xidmətlərindən biri idi.
Unudulmaz şəxsiyyət Heydər Əliyevin əvəzsiz xidmətlərindən biri də Novruz bayramının dövlət səviyyəsində bayram edilməsinə rəvac verməsi idi. Sovet sisteminin qılıncının dalı da, qabağı da kəsdiyi bir dövrdə bu, çox cəsarətli bir addım idi. Bu, 1979-cu ildə baş verdi. İçərişəhərin Qoşa Qala Qapısı meydanında möhtəşəm Novruz bayramı şənlikləri keçirilirdi. Bayram şənliyini televiziya qarşısında əyləşib izləyirdim. İnsan axını dəniz kimi dalğalanırdı. Gözlənilmədən əlamətdar bir hadisə baş verdi. Ecazkar musiqi, ecazkar sözlər, məlahətli səs hamını ovsunlamışdı. Hamı donub qalmışdı.
Müğənni "Naxçıvanı" aşıq havası üstündə yanğı ilə Azaflı Mikayılın "Ağarmayın, ay saçlarım, amandı" mahnısını oxuyurdu:
Cavanlığın, məhəbbətin eşqinə,
Ağarmayın, ay saçlarım, amandı.
Əhdi-peyman, sədaqətin eşqinə,
Ağarmayın, ay saçlarım, amandı.
Elə həmin vaxt öndərimiz dövlət rəsmiləri və cənab İlham Əliyevlə meydandan keçib gedirdi. Onlar da dayanıb qəlblərə od salan mahnını axıra qədər dinlədilər.
Heydər Əliyev muğamatı da, klassik musiqini də (Filarmoniyada onun vaxtında "Klassik musiqi axşamları"nın keçirilməsi deyilənə sübutdur), aşıq musiqisini də çox sevirdi. Aşıq sənətini yüksək qiymətləndirirdi. Təsadüfi deyildir ki, "Aşıqlar Birliyi" və "Aşıq Pəri məclisi" onun xeyir-duası ilə yaranıb. Aşıq Ələsgərin, Aşıq Alının, Aşıq Şəmşirin yubileylərinin keçirilməsi barədə sərəncamlar imzalamışdı. Aşıq Ələsgərin 150 illiyinin Moskvada "Qurultaylar sarayı"nda keçirilməsi əlamətdar hadisə idi. Aşığın poeziyası Vladimir Qafarov tərəfindən rus dilinə tərcümə edilərək kitab halında çap olundu və rus oxucularına təqdim edildi.
Öndərimiz görkəmli şəxsiyyətlərin yubileylərinin keçirilməsini zəruri sayırdı. Xüsusi vurğulayırdı ki, yubileylərin keçirilməsi bir tərəfdən onların xalq qarşısında xidmətlərinə verilən qiymətdir, digər tərəfdən xalqın zənginliyini nümayiş etdirməkdir.
Ümumxalq məhəbbəti qazanan, hamının intizarla gözlədiyi "Ozan" və "Bulaq" verilişləri də Heydər Əliyevin vaxtında yaranmışdı. "Ozan" televiziya verilişinin Dövlət mükafatına təqdim edilməsi çox mətləblərdən xəbər verirdi.
Ulu öndərimizin folklorumuza olan dərin məhəbbətinin nəticəsi əvvəlcə "Folklor elm mərkəzi"nin (1994), sonralar isə analoqu olmayan "Folklor İnstitutu"nun yaradılması (2003) oldu. Folklor İnstitutunda "Dədə Qorqud" şöbəsi yarandı və "Dədə Qorqud" jurnalı buraxılmağa başlandı.
İndi institutda "Aşıq yaradıcılığı", "Mərasim folkloru", "Türk xalqları", "Folklor və yazılı ədəbiyyat", "Cənubi Azərbaycan folkloru" və başqa şöbələr fəaliyyət göstərir və öndərimizin həmişə diqqət mərkəzində olan milli-mənəvi dəyərlərimizin qorunması və təbliği yolunda müstəsna işlər görülür.
Qədim yunan filosofu Platonun müdrik kəlamı vardır: "Başqalarının xoşbəxtliyinə çalışanlar öz xoşbəxtliklərini qazanırlar".
Heydər Əliyev həyatını bütöv bir xalqın xoşbəxtliyinə həsr etdiyindən xalqın qəlbində əbədi yer qazanmışdır.
“Ədəbiyyat və incəsənət”
(19.05.2023)
Bu gün YARAT-da “Muzey gecəsi” təşkil olunacaq
YARAT Müasir İncəsənət Muzeyində bu gün “Muzey gecəsi” təşkil olunacaq.
YARAT-dan bildirilib ki, “Muzey gecəsi” iştirakçıları immersiv və düşündürücü səyahətə dəvət edəcək.
İlhamını Karl Qustav Yunqun məşhur arxetiplər nəzəriyyəsindən alan tədbir, "kölgə" anlayışına əsaslanıb. Beləliklə, “Kölgə arxasında” şüarı altında təqdim olunan tədbirdə, hər bir iştirakçı özünü anlamağa və ifadə etməyə fürsət əldə edəcək.
“Muzey gecəsi” layihəsi Dənizkənarı Bulvar İdarəsi, “Meatadore” və “iTicket” platformasının dəstəyi ilə həyata keçirilir.
Bütün tədbirlərə giriş ödənişsizdir. Layihə çərçivəsində konsert proqramları və ustad dərslərinin təşkili də nəzərdə tutulur.
İştirak etmək istəyənlər https://iticket.az/ru/events/other/museum-night linkindən qeydiyyatdan keçə bilərlər.
“Ədəbiyyat və incəsənət”
(19.05.2023)
Sabah “Bir dəfə Bağdadda” musiqili komediyası nümayiş olunacaq
Sabah - mayın 20-də Azərbaycan Dövlət Akademik Musiqili Teatrında “Bir dəfə Bağdadda” musiqili komediyası növbəti dəfə nümayiş olunacaq.
Teatrdan bildirilib ki, görkəmli bəstəkar Emin Sabitoğlunun eyniadlı operettası əsasında teatrın rus bölməsində ərsəyə gələn tamaşanın quruluşçu rejissoru Əməkdar incəsənət xadimi Əsgər Əsgərovdur.
Əsərin süjet xəttindəki hadisələr Bağdadda, xəlifə Harun ər-Rəşidin dönəmində baş versə də, indiki zamanla səsləşir.
Səhnə əsərində Əməkdar artistlər Boris Qrafkin, Svetlana Bulax, aktyorlar Firus Məmmədov, Rauf Babayev, Yuliya Heydərova, Hidayət Əliyev, Mehriban Zaliyeva, Elxan İsmayılov, Nadejda Povelitsina, Telnaz Hüseynova, Murad Əliyev, Əli Kərimov, həmçinin xor və balet heyətlərinin üzvləri iştirak edəcəklər.
Qeyd edək ki, tamaşa ilk dəfə 2018-ci il oktyabrın 12-də oynanılıb.
Səhnə əsərinin quruluşçu dirijoru Əməkdar incəsənət xadimi Fəxrəddin Atayev, səhnə tərtibatçısı Əməkdar rəssam Nabat Səmədova, quruluşçu baletmeysterləri Əməkdar artistlər Zakir və Yelena Ağayevlər, xormeysteri Əməkdar artist Vaqif Məstanov, konsertmeysteri Kamil Həsənov, rejissor assistenti Tamilla Aslanovadır.
Tamaşaya baxmaq istəyənlər biletləri şəhərin bütün teatr-konsert kassalarından və “ASAN Xidmət” mərkəzlərindən, eləcə də “iticket.az” saytından əldə edə bilərlər.
Kollektiv sifarişlər də qəbul olunur.
“Ədəbiyyat və incəsənət”
(19.05.2023)
Kennet Blanşar: “İçimizdə heç kəs təklikdə bizim cəmimizdən ağıllı ola bilməz”
Professor Əlibala Məhərrəmzadə “Ədəbiyyat və incəsənət” portalının oxucuları üçün “Ev tapşırığı: Uğur düsturunu tapacağıq” layihəsini təqdim edir. Uğur şərtləri barədə danışmaqda davam edirik. Burada, əsas yerlərdən birini də kitablar tutur.
Zaman-zaman ən yaxşıların seçimini etməyə ən müxtəlif mənbələr cəhd göstəriblər. Onların ən nüfuzlularını qruplaşdıranda (bu qruplaşmada tiraj, satış həcmi, yayıldığı areal, buraxdığı iz və s. əsas götürülür) kitab mağazalarındakı yüzlərlə rəngbərəng cildlərin içində azmayaraq «nəyi və niyə oxumaq» sualına mütləq cavab tapmaq mümkün olur.
Biz biznesdə, peşə fəaliyyətində uğur qazanmağın yolunu göstərən ən çox tələb olunan kitablardan 10-na nəzər yetirdik. İndi də gəlin, ümumiyyətlə adi insanı uğurlu insana çevirən, insanın düşüncə tərzini, adət və xasiyyətini, xarakterik cəhətlərini dəyişən ən populyar kitablardan 10-na nəzər yetirək.
Bu kitablar, əziz oxucularım, insanlara düzgün istiqamət verir, sürətli və keyfiyyətli dəyişikliklərə bir təkan olur.
Beləliklə, seçdiyim növbəti 10-luğu sizlərə təqdim edirəm.
1-9-cu yerləri ötən günlərdə sizlərə təqdim etmişdik. Bu dəfə 10-cu yerlə tanış olun.
1.Entoni Robbins. «Özündə nəhəngi oyat»
2.Robin Şarma. «Titulsuz lider»
3.Bodo Şefer. «Qaliblərin qanunları»
4.Tom Piters. «Özünü brendə çevir»
5.Con Maksvell. «Uğurlu insanlar necə düşünür”
6.Marşal Qoldsmit. «Başından uca tullan»
7.Brayan Treysi. «Maksimuma çatmaq»
8.Devid C.Şvarts. «Masştablı düşünmək sənəti»
9.Norman Vinsent Pil. «Pozitiv düşüncənin gücü»
----------------------------
10. Kennet Blanşar. «Bir dəqiqəyə menecer olmaq”
Bu kitabı oxuyan milyonlarla insan qarşılarına çıxan ən mürəkkəb sualları və məsələləri həll etməyi öyrənir. Onlar həyatlarındakı streslərdən qaçmağı bacarır, daha az vaxt sərf etməklə daha çox iş görürlər.
Amerikalı motivasiya spikerinin bu əsəri 13 milyon nüsxədə satılıb, 3 dilə tərcümə edilib. Ümumilikdə 30 (!) motivasiya bestselleri müəllifi olan Kennet Blanşar həyat yoldaşı ilə birgə «Ken Blanchard Companies»i təsis edib, O, burada həm konsaltinq xidmətləri göstərir, həm də beynəlxalq səviyyəli idarəetmə kadrları hazırlayır.
Qeyd dəftərimə Kennet Blanşardan da olduqca gözəl kəlamlar seçib yazmışam:
- Rəqibin sizdən ala bilməyəcəyi yeganə şey sizin işçilərlə sizin müştərilərin münasibətidir.
- Problem yalnız o zaman mövcud olur ki, faktiki olaraq baş verənlərlə sizin baş verməsini arzuladığınız şey fərqli olur.
- Məqsədlərdən davranış doğur. Nəticələr davranışı dəstəkləyirlər.
- Hər bir insan potensial qalibdir.
- Səhv buraxarkən özünə gülə bilmək bacarığı çox qiymətli xüsusiyyətdir. O, sənə heç nə olmayıbmış kimi işinə davam etməyə kömək edir.
- Özlərini yaxşı hiss edən insanlar yüksək nəticələr əldə edirlər.
- İçimizdə heç kəs təklikdə bizim cəmimizdən ağıllı ola bilməz.
***
Əziz oxucum. Mən sizə uğur qazanmaq sirlərini açan yüzlərlə, minlərlə kitablar arasında seçdiyim 20 kitabı təqdim etdim. Əsər boyu başqa motivasiya kitablarından da söz açacağam. Onları mütləq oxumağınız məsləhətdir. Ümumiyyətlə, kitab oxumaq vacib bir məşğuliyyətdir. Kitablar insanı kamilliyə aparır. Uğura yol isə, şübhəsiz, kamillikdən başlayır.
Bu yerdə az sonra dəyərli fikirlərindən seçmələr təqdim edəcəyim Robin Şarmadan bir gözəl sitat gətirmək istəyirəm: «Sənin beş ildən sonra necə biri olacağını iki əsas faktor müəyyənləşdirir: sənin ünsiyyətdə olduğun insanlar, bir də sənin oxuduğun kitablar!»
Haydı, kitabxanalara, kitab mağazalarına, əziz oxucularım!
“Ədəbiyyat və incəsənət”
(19.05.2023)
Heydər Əliyevin 100 illiyi münasibətilə “Qızıl Şah" 3-cü Milli Kulinariya Çempionatı keçirilir
Mayın 18-də “INTERFOOD 2023” Beynəlxalq Qida Sənayesi Sərgisi çərçivəsində Ümummilli Lider Heydər Əliyevin 100 illiyinə həsr olunmuş “Qızıl şah” 3-cü Milli Kulinariya Çempionatına start verilib.
Qeyd edək ki, yarışma Azərbaycan Kulinariya Mütəxəssisləri Assosiasiyasının təşkilatçılığı, Dövlət Turizm Agentliyi, Gənclər və İdman Nazirliyi, Azərbaycan Milli Kulinariya Mərkəzi və “CEO Azerbaijan” MMC-nin dəstəyi ilə keçirilir.
İki gün ərzində Milli Kulinariya Çempionatında 100-dən çox iştirakçı “Gənc aşpaz”, “Böyük aşpaz” və “Qənnadçı aşpaz” kateqoriyaları üzrə yarışacaq. Ümummilli Lider Heydər Əliyevin 100 illiyinə həsr olunmuş yarışmanın sonunda ən yaxşı 100 iştirakçının reytinqi müəyyənləşdiriləcək.
Çempionatın münsiflər heyətində İtaliya, Böyük Britaniya, Serbiya, ABŞ, Xorvatiya, Rusiya, Monteneqro və digər ölkələrdən olan Ümumdünya Kulinariya Cəmiyyətləri Birliyinin (“Worldchefs”) hakimləri təmsil olunur.
Bu il "Qızıl Şah" Milli Kulinariya Çempionatı Azərbaycanda ilk dəfə olaraq rəsmi “Worldchefs” çempionatı statusu ilə keçirilir. Bu isə Milli Kulinariya Çempionatının qaliblərinin, yarışmanın nəticələrinin və praktika keçən münsiflərin sertifikatlarının Beynəlxalq Kulinariya Cəmiyyəti tərəfindən birbaşa tanınmasına imkan yaradır.
Qeyd edək ki, Milli Kulinariya Çempionatı çərçivəsində “Worldchefs”dən gələn münsiflər və iştirakçılar üçün müxtəlif mövzularda seminarlar da təşkil edilib. 2019-cu ildən bəri keçirilən Çempionat azərbaycanlı kulinarlara öz peşəkarlıqlarını nümayiş etdirməyə, beynəlxalq səviyyəli yarışlarda iştirak etməyə imkan yaradır.
“Ədəbiyyat və incəsənət”
(19.05.2023)
