Super User
MÜTALİƏ MƏDƏNİYYƏTİ – 24. Dahilər və kitab
Kənan Məmmədli, “Ədəbiyyat və incəsənət”
MÜTALİƏ MƏDƏNİYYƏTİNİ NECƏ FORMALAŞDIRMALI?
“Ədəbiyyat və incəsənət” portalının təqdim etdiyi bu silsilə yazılar Azərbaycan Yazıçılar Birliyi Ədəbiyyat Fondunun Azərbaycan Respublikası Mədəniyyət Nazirliyi tərəfindən 2024-cü ildə “Qeyri-hökumət təşkilatları üçün qrant müsabiqəsi” çərçivəsində həyata keçirdiyi “Yeniyetmə və gənclərdə mütaliə mədəniyyətinin formalaşdırılması” layihəsinin tərkib hissəsi olaraq nəşr edilir.
Azərbaycan Ədəbiyyat Fondu@
24.
DAHİLƏR VƏ KİTAB
Bəli, mütaliə hər baxımdan bizə fayda verir. Əsl təhsil yalnız mütaliə ilə əldə edilir. İnsan bütün ömrü boyu mütaliə etməlidir. İnsanın mənəvi dünyasının zənginləşməsində və yetkin şəxsiyyət kimi formalaşmasında mütaliənin rolu əvəzsizdir. Mütaliə insan üçün uğurlu həyat yolunun başlanğıcıdır. Filosof Spenserə görə, bəşəriyyət həmişə ancaq şəxsi mütaliə yolu ilə müvəffəqiyyətlə inkişaf etmişdir. Bütün bunlar bir daha təsdiq edir ki, mütaliə bütün biliklərin əsasıdır. Mütaliə etmədən düşüncə formalaşa bilməz. Əgər bizim uşaqlar bu gün kitab oxumasalar onlar həyatda heç vaxt uğur qazana bilməyəcəklər. Yalnız mütaliə nəticəsində şagirdlər öz fikirlərini sərbəst ifadə edə bilirlər.
Mütaliə şagirdlərdə mədəniyyətin yüksəldilməsinə aparan bir yoldur. Mütaliə biliyi genişləndirməklə bərabər, həm də insana məmnunluq hissləri bəxş edir. İnsan həyatında mütaliənin rolu əvəzolunmazdır. Böyük mütəfəkkir şair Nizami Gəncəvinin əsərlərində mütaliənin əhəmiyyəti haqqında müdrik fikirləri ondan sonra gələn Azərbaycan mütəfəkkirlərinə böyük təsir göstərmişdir. İnsanın ucalığını onun elmi səviyyəsində axtaran Nizami hər hansı bir insanın başqasına üstün gəlməsini qalibin elmi səviyyəsi ilə izah edir:
Elmlə, hünərlə! Başqa cür heç kəs,
Heç kəsə üstünlük eləyə bilməz! - deyən şair kamilliyin mənbəyini elm və bilik axtarışında görür. Kitabı, mütaliəni yüksək qiymətləndirən şairin özü böyük mütaliəçi olmuşdur. Dünya ədəbiyyatının incisi sayılan Nizami Gəncəvi “Xəmsə”si onun müəllifinin mütaliəsinin, elmi axtarışlarının nəticəsidir. Şair beş poemasında kifayət qədər əsər adı çəkir ki, bunlar hamısı onun mütaliə obyekti olmuşdur.
Dünyada nə qədər kitab var belə,
Çalışıb əlləşib, gətirdim ələ,
Oxudum, oxudum sonra da vardım,
Hər gizli xəzinədən bir dürr çıxardım
- deyən şair özünün mütaliəsinin məzmunu haqda aydın təsəvvür yaradır.
Məşhur filosof Sokrata görə mütaliə cəmiyyətin gündəlik vərdişinə çevrilərsə, həmin cəmiyyət xoşbəxt olar. Ona görə də biz mütaliəni sevməli və təkcə sevməli yox, ona vərdiş etməyi bacarmalıyıq. Ona görə də, “Gəlin oxuyaq, dünyamızı, tariximizi, özümüzü kəşf edək”.
Bir sözlə, mütaliə insanların dünyagörüşünün formalaşmasında ən vacib amillərdən biridir. Mütaliəyə ayırdığımız vaxt heç vaxt hədər olmayacaq, əksinə, bizə yeniliklər qazandıracaq. Dahi şəxsiyyətlərin mütaliə və kitabxana haqqında söylədikləri fikirlərə niyə də diqqət etməyək?
Görkəmli filosofların, dünya liderlərinin, dahi yazarların kitabların insan həyatındakı rolu barədə söylədikləri əlbəttə ki, diqqətdən kənarda qalmamalıdır. Biz kitabımızın əvvəllərində Azərbaycanın ümummilli lideri Heydər Əliyevin, Azərbaycan prezidenti İlham Əliyevin kitablara münasibətlərinə toxunduq. İndisə digər fikirlərə göz yetirək:
*Antik dövrün ən məşhur filosoflarından biri, romalı Mark Tulliy Siseron:
“Kitabsız ev ürəksiz bədəndir”.
*Antik dövrün ən məşhur filosoflarından biri, romalı Lutsiy Anney Seneka:
“Kitabsız yaşamaq kor, kar, lal yaşamaqdır”.
*Fəlsəfə tarixində uca mərtəbələr fəth etmiş alman filosofu Artur Şopenhauer:
“Kitabxanalar insanlığın tək etibarlı və qalıcı olan yaddaşıdır.”
*Türk dünyasının böyük lideri, görkəmli siyasi və hərbi xadim Mustafa Kamal Atatürk:
“Bir neçə qəpiyim olanda mütləq yarısını kitaba xərcləyirdim. Başqa cür etsəydim, Atatürk olmazdım”.
*İngilis siyasi və dövlət xadimi, natiq və yazıçı Vinston Çörçill:
“Kitablar, bütün müxtəlifliyi ilə insan zəkasına sivilizasiyanın zəfərlə irəliləməsi üçün vasitələr təklif edir”.
*Amerika Birləşmiş Ştatlarının 44-cü Prezidenti, 2009-cu ildə isə Nobel Sülh mükafatçısı, akademik, hüquqşünas, memuarçı Barak Obama:
“Oxumaq vacibdir. Oxumağı bilirsənsə, bütün dünya sənin üzünə açılır”.
*ABŞ-nin dövlət xadimi, ABŞ İstiqlal müharibəsi zamanı Kontinental Ordunun baş komandanı, ABŞ-nin ilk prezidenti Corc Vaşinqton:
“Düşünürəm ki, kitablar haqqında bilik, digər biliklərin qurulması üçün əsasdır”.
*Türkiyə siyasətçisi, Türkiyə Respublikasının 12-ci prezidenti Rəcəb Tayyib Ərdoğan:
“Gələcəyimiz, şəhərimiz, ölkəmiz və dünyanın gələcəyi üçün; Hər kəsi öz savadı, sevgisi və gözəlliyi üçün mütəmadi olaraq kitab oxumağı vərdiş halına gətirməyə dəvət edirəm”.
*Dahi alman yazıçısı İohann Vilhelm Höte:
“Mütaliə etməyi öyrənmək üçün nə qədər əmək və nə qədər vaxt sərf olunduğuna şübhə etməyin, mən özüm buna 80 il vaxt sərf etdim və bunu deyə bilərəm ki,məqsədimə tamamilə nail olmuşam”.
*Azərbaycanın tanınmış ədibi, dramaturgiyamızın görkəmli nümayəndəsi Nəcəf bəy Vəzirov:
“Kitablar bizi ötən əsrlərin mənəvi həyatının varisləri edir”.
*Görkəmli rus yazıçısı, maarifçisi Vissarion Belinski:
“Öz kitabxananın kitablarını ona görə çoxaltma ki, sənin çoxlu kitabın var desinlər. Ona çalış ki, öz əqlini görkəmli şəxslərin kitabları ilə zənginləşdirəsən. Öz əqlini də kitablar kimi qiymətli edəsən. Bədii əsərlər canlı mənbədir və insanlıq hissi cəmiyyətə buradan axır”.
*Görkəmli Azərbaycan satiriki Mirzə Ələkbər Sabir:
“Kitab sənin ilk dostundur”.
*Tanınmış rus alimi, tənqidçisi Nikolay Dobrolyubov:
“1849-cu ildə 411 kitab mütaliə etmişəm. Mütaliə etdiyim kitabların müntəzəm qeydiyyatını aparmışam. Mütaliə etmək mənə uşaqlıqdan çox xoş gəlirdi. Odur ki, çox keçmədən mütaliə mənim əsas məqsədim və yeganə sevincim oldu.”
*Azərbaycanın Xalq şairi Səməd Vurğun:
“Kitabsız bir ömrün nə mənası var”.
Növbəti:
25. Oxucu kavlifikasiyası
“Ədəbiyyat və incəsənət”
(24.09.2024)
Türk Mədəniyyəti və İrsi Fondu İstanbulda Türk Dünyası Mədəni İrsinə aid böyük forum keçirir
Habil Yaşar, “Ədəbiyyat və incəsənət”
Baş qərargahı Bakıda yerləşən və türkdilli dövlətlər üzv olduğu beynəlxalq təşkilat olan Türk Mədəniyyəti və İrsi Fondunun təşəbbüsü ilə 23-27 sentyabr 2024-cü il tarixlərində Azərbaycanda fəaliyyət göstərən yüksək səviyyəli menecerlərin iştirakı ilə İstanbulda Ərazi İdarəetmə Təcrübə Paylaşımı Proqramı keçirilir.
Təcrübə Paylaşma Proqramında Azərbaycan, Qazaxıstan, Qırğızıstan, Türkiyə, Macarıstan, Özbəkistan və Türkmənistandan yüksək səviyyəli menecerlər iştirak edirlər.
Proqram Türk Əməkdaşlıq və Koordinasiya Agentliyi (TİKA), Fatih Bələdiyyəsi, İstanbul Ticarət Universiteti və Türk Dünyası Vəqfinin töhfələri ilə həyata keçirilir.
Proqram çərçivəsində iştirakçılar Türkiyə Cümhuriyyəti Cumhurbaşkanlığı Milli Saraylar Müdirliyi, Vəqflər Ümumi Müdirliyi, Gelibolu Tarixi Ərazi Müdirliyi, Çanaqqala Savaşları Gelibolu Tarixi Ərazi Müdirliyi, İstanbul Tarixi Ərazilər Bölgəsi Müdirliyi, Fatih Bələdiyyəsi və İslam Tarixi, İncəsənəti və Mədəniyyəti Araşdırma Mərkəzi (IRCICA) tərəfindən həyata keçirilən ərazi idarəçiliyi təcrübələri haqqında nəzəri və praktiki biliklər əldə edəcəklər.
27 sentyabr 2024-cü il tarixində İstanbul Ticarət Universitetinin Sütlüce Kampusunda keçiriləcək Təcrübə Paylaşımı Proqramının sonuncu günü səhər sessiyalarının ilkində Türk Dünyası Ərazi İdarəetmə Dərnəyi Vizyon Seminarı iştirakçıları arasında ünsiyyət və qarşılıqlı əlaqənin artırılmasına dair ideyaları müzakirə edəcək. Qurumlarla birlikdə layihələr inkişaf etdiriləcək və ortaq qanunvericilik üzərində çalışılacaq. Bu seminardan sonra iştirakçılar öz ölkələrində mədəni irs və konservasiya təcrübələri haqqında təqdimatlar edəcəklər.
27 Sentyabr 2024-cü il Cümə günü ictimaiyyətə açıq olan proqramın günorta seansları İstanbul Ticarət Universitetinin Sütlüce Kampusunun konfrans zalında saat 14:00-da başlayacaq. Günortadan sonra keçiriləcək ilk sessiyanın moderatorluğu Türk Mədəniyyəti və İrsi Fondunun layihə rəhbəri Nuri Aksu və Yıldız Texniki Universitetindən Prof. Zeynep Gül Ünal, Gürcüstan Universitetindən Prof. James K. Reap və Liverpool Universitetindən Prof. Soumyen Bandyopadhyay-ın məruzəçi olacağı "Türk Dünyasında Mədəni İrs və Qorunma" adlı panel keçiriləcək. Bu paneldən sonra tədbir Türk Mədəniyyəti və İrsi Fondunun prezidenti və beynəlxalq təşkilatların nümayəndələrinin yekun nitqləri ilə yekunlaşacaq.
Türk Mədəniyyəti və İrsi Fondu haqqında:
Azərbaycan Respublikasının Prezidenti cənab İlham Əliyevin təşəbbüsü, Qazaxıstan, Qırğızıstan və Türkiyə prezidentlərinin dəstəyi ilə yaradılmış Türk Mədəniyyəti və İrsi Fondunun əsasnaməsi Türkdilli Dövlətlərin Əməkdaşlıq Şurası (hazırda Türk Dövlətləri Təşkilatı kimi tanınır) Bişkek Zirvə toplantısında 23 avqust 2012-ci ildə qəbul edilmişdir. Fond öz fəaliyyətinə 11 sentyabr 2015-ci ildə Türkdilli Dövlətlərin Əməkdaşlıq Şurasının Astana Zirvə toplantısında səfir Günay Əfəndiyevanın Türk Mədəniyyəti və İrsi Fondunun ilk prezidenti təyin olunması ilə başlayıb. Beynəlxalq təşkilat statusuna malik olan Fondun Katibliyi Bakıda yerləşir. Hazırda Fonda Qazaxıstanın keçmiş mədəniyyət naziri Aktoti Raimkulova rəhbərlik etməkdədir.
Türk Mədəniyyəti və İrsi Fondu layihə və proqramların dəstəklənməsi və həyata keçirilməsi yolu ilə türkdilli xalqların mədəniyyətini və irsini qorumaq, öyrənmək və təbliğ etmək məqsədi daşıyır. Bu məqsədlərə çatmaq üçün Fond müvafiq qurumlarla əməkdaşlıq edir və türk xalqları arasında mədəniyyət, təhsil, elm, insan hüquqları, turizm, informasiya və kommunikasiya sahələrində və digər prioritet sahələrdə fəaliyyətə dəstək verir.
Türk Mədəniyyəti və İrsi Fondu aşağıdakı istiqamətlərdə fəaliyyət göstərir:
* Türk mədəniyyətinin və irsinin qorunması, bərpası və təbliği;
* Türk mədəniyyətinin və irsinin qorunması, bərpası və təbliği ilə bağlı elmi-texniki problemlərin həlli;
* seminarların, treninqlərin, konfransların, konqreslərin və sahə tədqiqatlarıyla sərgilərinin təşkili;
* Dövri nəşrlərin elektron və çap formatında hazırlanması;
* müsabiqələr, festivallar, turnirlər və s. tənzimləmə;
* türkdilli xalqların yaşadığı bölgələrdə ənənəvi və tətbiqi sənətin canlandırılması, dəstəklənməsi və inkişafı;
* Sənətkarlara, rəssamlara və digər yaradıcı sənətçilərə əqli mülkiyyət hüquqlarının qorunmasında köməklik etmək.
“Ədəbiyyat və incəsənət”
(24.09.2024)
Türkiyənin tarixi kitabxanasında Azərbaycan nəşrləri yerləşdiriləcək
Mədəniyyət Nazirliyinin kitab sənayesi şöbəsinin müdiri Akif Marifli və sektor müdiri Xəyal Məmmədov, Türkiyədəki səfirliyimizin nəzdindəki Azərbaycan Mədəniyyət Mərkəzinin direktoru Samir Abbasov ilə Türkiyənin Mədəniyyət və Turizm Nazirliyinin Kitabxanalar və Yayımlar Baş İdarəsinin rəhbəri Taner Beyoğlu və Rami Kitabxanasının rəhbəri Ali Çelik arasında görüş keçirilib.
“Ədəbiyyat və incəsənət” portalına Mədəniyyət Mərkəzindən verilən xəbərə görə, Rami Kitabxanasında baş tutan görüş zamanı Azərbaycan-Türkiyə kitabxanaları arasında əməkdaşlığın genişləndirilməsi və kitabxana işi sahəsində qabaqcıl təcrübələrə dair fikir mübadiləsi aparılıb.
Qeyd olunub ki, müasir kitabxanaçılıq xidməti, “canlı kitabxana” anlayışı ilə İstanbulun elm, incəsənət və mədəni həyatının mərkəzlərindən birinə çevrilən Rami Kitabxanası gələcək nəsillər üçün elm mənbəyi olmaqla yanaşı, qədim bilikləri müasir tədqiqatlarla bir araya gətirir.
Azərbaycan Mədəniyyət Mərkəzinin direktoru Samir Abbasov ilə Rami Kitabxanasının müdiri Ali Çelik arasında əməkdaşlığın genişləndirilməsi, birgə layihələrin reallaşdırılması, burada Azərbaycan klassiklərinin nəşrlərinin təqdimatı və sərgilərin təşkilinə dair razılıq əldə olunub.
Görüşdən sonra kitabxana ziyarət edilib. Özünəməxsus prinsiplər əsasında fəaliyyət göstərən bu elm ocağında təşkil olunan müasir oxu zalları, nadir kitablar fondu, qədim nüsxələrin bərpası prosesi ilə tanışlıq olub.
Qeyd edək ki, 250 illik tarixə malik keçmiş Rami kazarmasının binasında yerləşən kitabxana Türkiyənin Mədəniyyət və Turizm Nazirliyi tərəfindən aparılan əsaslı yenidənqurma işlərindən sonra ölkənin ən böyük canlı kitabxanası olaraq 2023-cü ilin yanvar ayında fəaliyyətə başlayıb.
“Ədəbiyyat və incəsənət”
(24.09.2024)
Bakı Kitab Mərkəzində görkəmli pianoçu Elmira Səfərovanın xatirəsi anılıb
Elmira Səfərova uşaqlıq dövründən musiqiyə həvəs göstərib. Bu sahədə ilk təhsilini Üzeyir Hacıbəyli adına Azərbaycan Dövlət Konservatoriyasının (indiki Bakı Musiqi Akademiyası) nəzdindəki musiqi məktəbində alıb. Kövkəb Səfərəliyeva, Lidiya Yeqorova və digər görkəmli pedaqoqlardan musiqi sənətinin sirlərini mənimsəyib. İllər sonra müsahibələrinin birində o, belə demişdi: “Gələcək həyatımda sənət seçimi ilə bağlı heç bir zaman sual meydana çıxmamışdı. Belə bir təəssürat var idi ki, musiqi mənimlə birgə doğulub və mən öz həyatımı musiqidən kənar heç cür təsəvvür edə bilmirdim...”.
Sentyabrın 23-də Bakı Kitab Mərkəzində görkəmli pianoçu, pedaqoq, Əməkdar incəsənət xadimi, professor Elmira Səfərovanın anadan olmasının 90 illiyi münasibətilə keçirilən tədbirdə də həyatını musiqiyə həsr etmiş bu insan haqqında ürəkdolusu danışılıb, onunla bağlı xatirələr bölüşülüb.
AzərTAC xəbər verir ki, tədbir Üzeyir Hacıbəyli XVI Beynəlxalq Musiqi Festivalı çərçivəsində təşkil olunub.
Bu tədbirin onun üçün mühüm əhəmiyyət daşıdığını bildirən Bakı Kitab Mərkəzinin direktoru Günel Anarqızı Elmira Səfərovanı nəcib insan, bənzərsiz pedaqoq, dəyərli dost, vətənpərvər ziyalı, Azərbaycanı bütöv varlığı ilə sevən bir musiqişünas kimi səciyyələndirib.
Tədbirdə E.Səfərovaya həsr olunmuş videoçarx nümayiş edilib.
Xatirə axşamında Üzeyir Hacıbəyli adına Bakı Musiqi Akademiyasının rektoru, Xalq artisti Fərhad Bədəlbəyli, mədəniyyət nazirinin müavini Murad Hüseynov, sənətşünaslıq üzrə fəlsəfə doktoru, musiqişünas Ülkər Talıbzadə və başqaları çıxış edərək Elmira Səfərovanın yorulmaz pedaqoji fəaliyyətindən, Azərbaycan mədəniyyətinə verdiyi töhfələrdən danışaraq, onunla bağlı xatirələrini bölüşüblər.
Bildirilib ki, 1952-ci ildə Azərbaycan Dövlət Konservatoriyasına qəbul olunan Elmira Səfərova professor Mayor Brennerin sinfində təhsil alıb. Tələbəlik illərindən istedadlı pianoçu kimi tanınıb, konsertlərdə çıxış edib. 1957-ci ildən təhsilini P.İ.Çaykovski adına Moskva Dövlət Konservatoriyasının aspiranturasında davam etdirib. Musiqi ifaçılarının I Zaqafqaziya müsabiqəsində (1960) laureat adını qazanıb.
1961-ci ildən Azərbaycan Dövlət Konservatoriyasının müəllimlik fəaliyyətinə başlayan Elmira Səfərova respublikamızda musiqi sənətinə və fortepiano ifaçılığı üzrə yüksək səviyyəli peşəkarların hazırlanmasına böyük töhfələr verib. O, sonralar məşhurlaşan və bu gün pianoçu kimi Azərbaycan musiqisini uğurla təmsil edən bir çox ifaçıların müəllimi olub. Həmçinin konservatoriyada respublikanın musiqi məktəblərinin müəllimləri üçün ixtisasartırma kurslarında metodiki işlər və mühazirələr aparıb, bir sıra metodik vəsaitlərin, elmi məqalələrin müəllifi olub.
Qeyd edilib ki, pedaqoji fəaliyyəti ilə yanaşı, Elmira xanım konsertlərdə solo və ansambl ifaçısı kimi çıxış edib. Mütəmadi olaraq keçirdiyi tematik açıq sinif konsertləri də böyük marağa səbəb olub. 1995-ci ildə M.Maqomayev adına Azərbaycan Dövlət Filarmoniyasında təşkil etdiyi klassik və müasir musiqi festivalı da Elmira xanımın bu sahədə mühüm xidməti idi.
Diqqətə çatdırılıb ki, 1997-ci ildə dünyasını dəyişən Elmira Səfərovanın yetirmələri bu gün konsert-ifaçılıq və pedaqoji fəaliyyətləri ilə onun yolunu davam etdirirlər.
Tədbirdə tanınmış və gənc musiqiçilərin ifasında Azərbaycan və dünya bəstəkarlarının əsərləri səsləndirlib.
Sonda tədbirin təşkilatçılarına və iştirakçılarına ailəsi adından təşəkkürünü bildirən musiqişünas, akademik Zemfira Səfərova Elmira Səfərovanın uşaqlıq, gənclik, tələbəlik illərindən söz açıb.
Vurğulayıb ki, yüksək insani keyfiyyətlərə malik görkəmli musiqi xadimi, qayğıkeş müəllim Elmira Səfərovanın əziz xatirəsi onu tanıyanların, yetirmələrinin qəlbində və mədəniyyət tariximizdə daim yaşayacaq.
“Ədəbiyyat və incəsənət”
(24.09.2024)
Almaniyada Füzulinin 530 illik yubileyinə həsr olunmuş poçt markası buraxılıb
Azərbaycanın dahi şair və mütəfəkkiri Məhəmməd Füzulinin anadan olmasının 530 illik yubileyi münasibətilə Almaniyada xüsusi poçt markası buraxılıb.
AzərTAC xəbər verir ki, poçt markası Azərbaycanın Almaniyadakı səfirliyinin təşəbbüsü ilə hazırlanıb.
Xüsusi dizaynda hazırlanmış poçt markasının üzərində görkəmli şairin portreti əks olunub.
Poçt markasının məlumat hissəsində Məhəmməd Füzulinin zəngin yaradıcılığının Azərbaycanla yanaşı, ölkəmizdən kənarda da geniş coğrafiyada ədəbi mühitə böyük təsir göstərdiyi vurğulanıb. Onun bədii-fəlsəfi irsinin Azərbaycan poeziyasını yeni zirvələrə qaldırdığı, ana dilimizin inkişafına töhfələr verdiyi qeyd olunub. Həmçinin Məhəmməd Füzulinin şeirlərinin ahəngdar və ifadəli xarakterinin onları musiqi əsərləri üçün ideal material etdiyi, Avropada çoxlu sayda rəssam və şairlərin yaradıcılığına da təsir göstərdiyi diqqətə çatdırılaraq, şairin aşağıdakı beyti təqdim edilib:
"Aşiq oldur kim, qılır canın fəda cananına,
Meyli-canan etməsin hər kim ki, qıymaz canına".
Poçt markası Azərbaycanın Almaniyadakı səfirliyinin Füzulinin anadan olmasının 530 illik yubileyi münasibətilə sentyabrın 18-də Berlindəki Azərbaycan Mədəniyyət Mərkəzində keçirdiyi “Qəlbimdəki şair” (Der Poet in mir) adlı tədbirdə iştirakçılara təqdim olunub.
“Ədəbiyyat və incəsənət”
(24.09.2024)
Oktyabrın 2-də regionun ən böyük beynəlxalq kitab sərgisi açılacaq
Mədəniyyət Nazirliyinin təşkilatçılığı ilə oktyabrın 2-8-də Bakı Ekspo Mərkəzində X Bakı Beynəlxalq Kitab Sərgisi (Baku International Book Fair – 2024) keçiriləcək.
“Ədəbiyyat və incəsənət” portalı Mədəniyyət Nazirliyinə istinadən xəbər verir ki, builki yubiley sərgisi dahi Azərbaycan şairi və mütəfəkkiri Məhəmməd Füzulinin (1494-1556) anadan olmasının 530 illiyinə həsr edilib.
Hazırda 4 qitəni təmsil edən 19 ölkədən 47 xarici təşkilat, 100-dən artıq yerli nəşriyyat-poliqrafiya və kitab sənəti ilə əlaqəli müəssisə sərgidə iştirak üçün qeydiyyatdan keçib.
Sərgidə Azərbaycanla yanaşı, Türkiyə, İrlandiya, Almaniya, Venesuela və digər ölkələrdən tanınmış yazıçı və şairlər, elm adamları, gənc yazarlar iştirak edəcəklər.
Budəfəki sərgi üçün də zəngin proqram tərtib olunub. Kitab bayramı çərçivəsində uşaqlar və böyüklər üçün ustad dərsləri, inklüzivlik və digər aktual mövzular üzrə kitab təqdimatları, imza günləri, konfranslar, simpoziumlar, müsabiqələr, qiraət və musiqi saatları və kitab sənayesi sektorunun subyektləri arasında əməkdaşlıq platformaları təşkil ediləcək. Sərgi müddətində müxtəlif formatda ümumilikdə 270-dən çox tədbirin təşkili nəzərdə tutulur.
Tədbir gedişində ölkəmizin də üzv olduğu Asiya Hekayəçilik Komitəsinin 16-cı iclası keçiriləcək.
Sərgi zamanı gün ərzində ziyarətçilərin metronun “Elmlər Akademiyası”, “28 May” və “Koroğlu” stansiyalarından Bakı Ekspo Mərkəzinə xüsusi avtobuslar vasitəsilə gediş-gəlişi təmin ediləcək.
Sərgi hər gün səhər saat 10:00-dan axşam saat 20:00-dək ziyarət üçün açıq olacaq. Sərgiyə giriş ödənişsizdir.
“Ədəbiyyat və incəsənət”
(24.09.2024)
Tallində Azərbaycan Mədəniyyəti Günü keçirilib
Estoniya paytaxtında Milli Mədəniyyət Günləri-2024 çərçivəsində Azərbaycan Mədəniyyəti Günü böyük uğurla keçirilib. Tədbir rəssam Rövşən Quliyevin təşəbbüsü ilə “Qarabaşlılar qardaşlığı” Evində təşkil olunub.
AzərTAC xəbər verir ki, bayramın təşkilində İnteqrasiya Fondu, Mədəniyyət və İdman İdarəsi və Azərbaycan Diasporla İş üzrə Dövlət Komitəsi iştirak edib.
Gecənin xüsusi qonağı Tallin tamaşaçıları üçün ənənəvi Azərbaycan aləti olan sazda melodiyalar ifa etmək üçün Bakıdan gəlmiş Mübariz Əliyev olub. Tədbirdə, həmçinin qarmonda folklor əsərləri ifa edən musiqiçi Elnur İmanov və “Grace” rəqs qrupu çıxış ediblər. Eston milli rəqslərini ifa edən, bununla da iki xalqın dostluğunu və mədəni müxtəlifliyini nümayiş etdirən Estoniyanın “Leesikad” qrupunun çıxışı gecəyə xüsusi ovqat qatıb.
Tədbiri çoxlu sayda tamaşaçı ziyarət edib. Fəxri qonaqlar arasında yer alan Azərbaycan parlament qrupunun sədri Riyna Solman dostluq münasibətləri və mədəni dialoqa göstərilən dəstəyə görə minnətdarlığını bildirib. Tədbirdə, həmçinin Almaniya və Finlandiyadan da qonaqlar iştirak edib ki, bu da bayrama beynəlxalq xarakter verib.
Təşkilatçılar bütün iştirakçıları Azərbaycanın milli yeməkləri və şirniyyatlar, nar şirəsi və şəraba qonaq ediblər.
“Ədəbiyyat və incəsənət”
(24.09.2024)
Milli Məclisin Mədəniyyət komitəsinin sədri Polad Bülbüloğlu seçilib
Xəbər verdiyimiz kimi bu gün Azərbaycan Prezidenti İlham Əliyevin iştirakı ilə yeni tərkibli Milli Məclisin ilk iclası keçirilib. Bu gün həm də Milli Məclisin bütün komitələrinə sədrlər seçilib.
“Ədəbiyyat və incəsənət” portalı xəbər verir ki, Mədəniyyət komitəsinə sədri Polad Bülbüloğlu seçilib. Dünyaşöhrətli müğənni, nazir, səfir indi də millət vəkili və komitə sədri yükünü çəkəcək.
Digər təyinatları təqdim edirik:
– Arzu Nağıyev – Müdafiə, təhlükəsizlik və korrupsiya ilə mübarizə komitəsi sədri
– Zahid Oruc – İnsan hüquqları komitəsinin sədri
– Sadiq Qurbanov – Təbii ehtiyatlar, energetika və ekologiya komitəsi sədri
– Tahir Rzayev – Aqrar siyasət komitəsinin sədri
– Musa Quliyev – Əmək və sosial siyasət komitəsinin sədri
– Əhliman Əmiraslanov – Səhiyyə komitəsinin sədri
– Hicran Hüseynova – Ailə, qadın və uşaq məsələləri komitəsinin sədri
– Şahin İsmayılov – Gənclər və idman komitəsi
– Fazil Mustafa – İctimai birliklər və dini qurumlar komitəsinin sədri
– Səməd Seyidov -Beynəlxalq münasibətlər və parlamentlərarası əlaqələr komitəsinin sədri
– Azər Əmiraslanov – İqtisadi siyasət, sənaye və sahibkarlıq komitəsi sədri
– Əli Hüseynli – Hüquq siyasəti və dövlət quruculuğu komitəsinin sədri
– Anar İskəndərov – Elm və təhsil komitəsinin sədri
– Siyavuş Novruzov – Regional məsələlər komitəsinin sədri
“Ədəbiyyat və incəsənət”
(23.09.2024)
TMİF ilə Əl-Fərabi adına Qazax Milli Universiteti arasında anlaşma memorandumu imzalanıb
Türk Mədəniyyəti və İrsi Fondu ilə Əl-Fərabi adına Qazax Milli Universiteti arasında anlaşma memorandumu imzalanıb.
“Ədəbiyyat və incəsənət” portalına Türk Mədəniyyəti və İrsi Fondundan verilən məlumata görə, fond ilə Əl-Fərabi adına Qazax Milli Universiteti arasında ortaq tarixi köklərə malik Türk ölkələri və xalqlarının mədəni əlaqələrinin genişləndirilməsi, eləcə də Türk dünyasının ədəbi və mədəni irsinin beynəlxalq aləmdə təbliği məqsədilə anlaşma memorandumu imzalanıb.
Sənədi Türk Mədəniyyəti və İrsi Fondunun prezidenti Aktotı Raimkulova və Qazaxıstan Respublikası Milli Elmlər Akademiyasının vitse-prezidenti, Əl-Fərabi adına Qazaxıstan Milli Universitetinin rektoru Janseit Tuymebayev imzalayıblar.
Memorandumun məqsədi tərəflər arasında əməkdaşlığın inkişafına təkan verməkdir.
Sənəddə Türk dünyasının maddi-mənəvi dəyərlərinin qorunması və təbliği istiqamətində müxtəlif layihələrin həyata keçirilməsi, həmçinin türkologiya sahəsində əməkdaşlıq kimi vacib məsələlər yer alıb.
“Ədəbiyyat və incəsənət”
(23.09.2024)
Respublika Veteranlar Təşkilatında araşdırmaçı jurnalist, türkoloq Aida Eyvazlı Göytürk ilə görüş keçirilib
21 sentyabr 2024-cü ildə Müharibə, Əmək və Silahlı Qüvvələr Veteranları Təşkilatında məktəblilər, ictimaiyyət nümayəndələri və ziyalılarla araşdırmaçı jurnalist, türkoloq, tərcüməçi, “İpək Yolu” Mədəni və Tarixi Araşdırmalar İctimai Birliyinin sədri Aida Eyvazlı Göytürklə görüş keçirilib.
“Ədəbiyyat və incəsənət” portalı xəbər verir ki, tədbirdən öncə Azərbaycan Respublikasının Dövlət Himni səslənib, Vətən uğrunda canından keçən şəhidlərin ruhu 1 dəqiqəlik sükutla yad edilib.
Yazıçı-publisist, Azərbaycan Ədəbiyyat Fondunun baş direktoru, Əməkdar jurnalist Varis Aida Eyvazlının müstəqilliyimizin ilk illərindəki jurnalist fəaliyyətindən, mübariz qələm adamı kimi, hər zaman yaradıcılığında haqqın-ədalətin yanında olmasından, peşəkar fəaliyyəti ilə və iti qələmi ilə hər zaman uğurlara imza atdığından, türk dünyasının təsis etdiyi önəmli mükafatlarına layiq görülməsindən danışıb.
Tədbirdə çıxış edən Müharibə, Əmək və Silahlı Qüvvələr Veteranları Təşkilatının sədri vəzifəsinin icra edən polkovnik Cəlil Xəlilov, Aida Eyvazlının yaradıcılığına, bu yaradıcılığın türk tarix və mədəniyyətinin tədqiqi baxımından roluna toxunub. Aida Eyvazlının yaradıcılığının əsasən milli-mənəvi dəyərlərimizin, qəhrəmanlıq tariximizin təbliğinə həsr olunduğunu bildirən Cəlil Xəlilov, onun tərcüməçi kimi də böyük uğurlara imza atdığını vurğuladı. Jurnalıistin qələmə aldığı “Qalibiyyət: şahidlər və şəhidlər” ikicildliyi, Abay Kunanbayevin, Platon Oyunskinin, Nursultan Nazarbayevin azərbaycan dilinə tərcümə etdiyi əsərlərin tarixi əhəmiyyətindən danışıb.
“Şəhid ailəlrinə dəstək” İctimai Birliyinin sədri, 2016-cı il aprel döyüşlərinin şəhidi ƏbdülMəcid Axundovun anası Ceyran Həsənova, filologiya elmləri doktoru Şərəf Cəlili, “Ulduz” jurnalının redaktoru, əməkdar jurnalist Qulu Ağsəs, 34 saylı məktəbin direktoru , ictimai xadim, şəhid polkovnik Sənan Axundovun həyat yoldaşı Nəcibə Axundova, Bakı Slavyan Universitetinin doktorantı, qazaxıstanlı alim Altın Tukumbayeva çıxış edərək Aida EyvazlıGöytürkün yaradıcılığı, onun şəhidlərimizə həsr etdiyi kitabları, türk dünyasının şəxsiyyətləri və onun əsərləri barədə etdiyi tərcümələri, yaradıcılığı boyu türk irsi və tarixinə dair apardığı araşdırmalar, yazdığı məqalələr, eləcə də Azərbaycan Televiziyasında müəllifi olduğu “Qızıl alma” proqramının, türk dünyasının mədəni irsinətövhəsindən, Vətənimizin tarixinin və həqiqətlərinin dünyanın bir çox türkdilli ölkələrində yayılmasındakı əhəmiyyətindən, Azərbaycana qazandırdığı dostlardan söhbət açıblar.
Aida Eyvazlı Göytürkə vətənpərvərlik tərbiyəsinin təbliğindəki xidmətlərinə görə Müharibə, Əmək və Silahlı Qüvvələr Veteranları Təşkilatı tərəfindən Fəxri Fərmanla təltif edilib.
Tədbirin sonunda çıxış edən Aida Eyvazlı görüşə gələn qonaqlara təşəkkür edib, yaradıcılıq planları, həyata keçirəcəyi layihələr haqqında məlumat verib.
Görüş hərbi-vətənpərvərlik mahnılarının ifası ilə başa çatıb.
“Ədəbiyyat və incəsənət”
(23.09.2024)
