Super User
Sankt-Peterburqda Fikrət Əmirovun “Min bir gecə” baleti nümayiş etdirilib
Sankt-Peterburqun Mariinski Teatrında Azərbaycanın dahi bəstəkarı Fikrət Əmirovun “Min bir gecə” baleti nümayiş etdirilib. Bu barədə “Ədəbiyyat və incəsənət” portalı AzərTAC-a istinadən məlumat verir.
Balet Rusiya Federasiyasının Əməkdar incəsənət xadimi, tanınmış xoreoqraf, həmyerlimiz Eldar Əliyevin quruluşunda səhnələşdirilib. Mariinski Teatrının simfonik orkestri və xorunu Azərbaycan Dövlət Akademik Opera və Balet Teatrının baş dirijoru, Azərbaycanın Əməkdar artisti Əyyub Quliyev idarə edib. Baletdə ilk dəfə olaraq Şəhriyar rolunu Azərbaycanın Əməkdar artisti Timur Əsgərov ifa edib. Dahi bəstəkar Fikrət Əmirovun əsrarəngiz musiqisi, səhnə ustalarının təkrarsız ifası Rusiyanın Şimal paytaxtının sənətsevərləri tərəfindən sürəkli alqışlarla qarşılanıb.
Tamaşadan sonra gecədə fəxri qonaq qismində iştirak edən Azərbaycanın Sankt-Peterburqdakı baş konsulu Sultan Qasımov, Macarıstanın baş konsulu Viktor Sederkeni və Tacikistanın baş konsulu Xomidcon Nəzəri xoreoqraf Eldar Əliyevi, dirijor Əyyub Quliyevi və teatrın solistlərini səhnə arxasında uğurlu çıxışları münasibətilə təbrik ediblər. Baş konsul Sultan Qasımov Fikrət Əmirovun dahi əsərinin yeni quruluşda Rusiyanın aparıcı teatrının səhnəsində ifa edilməsini mədəni əlaqələrin inkişafında mühüm hadisə adlandırıb.
Sultan Qasımov Mariinskiy Teatrının rəhbərliyinə və yaradıcı kollektivinə Azərbaycanın dünyaşöhrətli bəstəkarı Fikrət Əmirovun ölməz “Min bir gecə” əsərini yenidən uğurla canlandırdıqlarına görə dərin minnətdarlığını bildirib.
“Ədəbiyyat və incəsənət”
(19.02.2024)
CINEMO mobil film festivalının Qala Gecəsi keçiriləcək
Fevralın 23-də Nizami Kino Mərkəzində
CINEMO mobil film festivalının Qala Gecəsi - Mükafatlandırma Mərasimi baş tutacaq.
Bu barədə “Ədəbiyyat və incəsənət” portalına festivalın rəhbəri Ruslan Sabirli məlumat verib.
Ruslan Sabirli kinoda öncə aktyor kimi parlayıb, o, yazıçı Varisin eyniadlı romanı əsasında səhnələşdirilmiş və “Xəzər” TV-də nümayiş olunan “Sənə inanıram” teleserialında Həmid rolunu məharətlə oynayıb.
Sonradan o, daha çox prodüsser fəaliyyəti ilə diqqət çəkib, kifayət qədər uğurlu Buktreyler festivalı layihəsi ilə ad eləyib.
CINEMO film festivalı Ruslan Sabirlinin növbəti uğurlu layihəsidir.
Xatırladaq ki, festivalın təşkilati dəstəkçiləri arasında AR Mədəniyyət Nazirliyi və AR Kino Agentliyi, informasiya dəstəkçiləri arasında Trend, Milli.az, Day.az saytları var.
Tədbir saat 19.00-da başlayacaq.
“Ədəbiyyat və incəsənət”
(19.02.2024)
Həqiqətən də xalqın sevimlisi olmuş QƏZƏLXAN
Kənan Məmmədli, “Ədəbiyyat və incəsənət”
Bir dəfə Hüseyn Cavid küçə ilə gedəndə Əlağa Vahidi cavanlarla çırtma çalıb meyxana deyən yerdə görür, yaxınlaşıb onu danlayır, deyir, sən axı Əlağa Vahidsən, böyük ustadsan, sənə yaraşarmı, bu səviyyəyə düşəsən?
Əlağa Vahid pərt olursa da Cavidə heç nə demir. Amma ona məktub göndərir, yazır ki, mən özümü bu cür aparıram ki, həqiqət ürəyimi partlatmasın.
Həqiqət isə anladınız yəqin nəydi, ruslar tərəfindən işğal olunmanın, repressiyanın, millətçiliyin boğulmasının müdhiş təntənəsi!
Bəli, Azərbaycanda, eləcə də Yaxın Şərqdə məşhur qəzəlxan şair kimi şöhrət qazanmış Əlağa Vahidin həyat və yaradıcılığı qırmızı terror illərinə düşmüşdü… Daha azad bir cəmiyyətdə görün bir, o nələr yaradardı…
Vahid milli poeziyanın qədim ənənələrini yeni dövrdə yüksək sənətkarlıqla davam etdirib və qəzəl janrının son dərəcə mükəmməl nümunələrini yaradıb. Şairin dərin lirizmi ilə səciyyələnən diqqətəlayiq zəngin bədii irsi çoxəsrlik Azərbaycan ədəbiyyatı tarixində özünəməxsus bənzərsiz hadisədir.
Fevralın 17-də böyük qəzəlxan Əlağa Vahidin anadan olmasından 129 il ötdü.
“Qəzəl de ki, məşhuri-dövran ola” - Füzulinin bu kəlamından bizi beş əsrlik bir zaman ayırır və qəzəl dünyamızda Füzulidən sonra neçə ustad şair bu janrda hünər göstəriblər. “Böyük Füzulimizin yadigarı mən özüməm”, - deyirdi Vahid. Dahi Füzulini özünün böyük ustadı adlandıran Əlağa Vahid, onun bədii üslubundan, işlətdiyi əruz bəhrlərindən, təsvir və ifadə vasitələrindən, qafiyə və rədiflərindən bilavasitə faydalanaraq öz yaradıcılığında bədii sözün məna dolğunluğuna, ifadə səlisliyinə nail olub. Əlağa Vahid qəzəl yaradıcılığında püxtələşdikcə, klassik qəzəl məktəbinin istedadlı davamçısı kimi öz dəst-xəti ilə seçilib, qəzəlləri və satirik şeirləri xalq arasında sürətlə yayılıb, ürəklərə yol tapıb, sevilib və dillər əzbəri olub. Şair qəzəl janrının mövzu dairəsini xeyli genişləndirib, Vətənə, xalqa məhəbbətini sadə, adi xalq dilində əruzun ritmik bəhrlərində qoşa misralarla uğurla şeirə çevirib.
Əlağa Vahid 1895-ci il fevralın 17-də Bakı şəhərində anadan olub. Mollaxanada oxumağa başlayıb, sonra ehtiyac üzündən təhsilini yarımçıq qoyub, xarratlıq edib. Gənc yaşlarında Bakıdakı “Məcməüş-şüəra” ədəbi məclisində iştirak edib və lirik şeirlər yazıb. Satirik şeirlərində ictimai nöqsanları, mövhumatı, zülm və haqsızlığı ifşa edib. “Tamahın nəticəsi” adlı ilk kitabı nəşr olunub.
İkinci Dünya müharibəsi illərində yazdığı əsərlərdə “Döyüş qəzəlləri”, “Qəzəllər” kitablarında Əlağa Vahid Vətənə məhəbbət, düşmənə nifrət, qələbəyə inam hissləri təbliğ edib.
Əsrlərdən bəri qəzəlin baş mövzusu eşq olub. Amma bu eşq mənaları da birrəngli olmayıb. Vahidin şeirləri Vətən məhəbbətindən, Tanrıdan tutmuş gözələ ülvi hisslərlə doludur:
Mən əsiri eşqiyəm öz xalqımın, öz yurdumun,
Sevməyən öz xalqını, öz yurdunu divanədir.
Vahidin qəzəlləri poetik dilinin sadəliyi, xəlqiliyi və ahəngdarlığı ilə seçilir, xanəndələrin repertuarında mühüm yer tutub. Nizami, Xaqani, Füzuli, Nəvai və başqalarının qəzəllərini Azərbaycan dilinə tərcümə edib.
İlk şeiri 1914-cü ildə çap olunub. Ona qədər “Məcməüş-şüara”da (Şairlər məclisi) Əbdül Xaliqin şeir gecələrinə gedirdi. Bura cavan şairlər yığışıb, bədahətən onlara verilən qafiyəni ustadların qarşısında böyük qəzələ çevirməli idilər. Vahid öz hazırcavablığı ilə elə seçilir ki, Əbdül Xaliq gənc Əlağaya “sən təbinlə Vahidsən” deyib Vahid ləqəbini ona verir.
Əlağa Vahid 1965-ci il oktyabrın 1-də Bakı şəhərində vəfat edib.
2015-ci ildə Azərbaycan ədəbiyyatının görkəmli nümayəndəsi, böyük şair Əlağa Vahidin anadan olmasının 120 illiyi dövlətimizin başçısının Sərəncamı ilə ölkəmizdə silsilə tədbirlərlə qeyd olunub.
Azərbaycan Respublikası Nazirlər Kabinetinin 7 may 2019-cu il tarixli Qərarı ilə Əlağa Vahid Azərbaycan Respublikasında əsərləri dövlət varidatı elan olunan müəlliflərin siyahısına daxil edilib.
Ruhu şad olsun!
“Ədəbiyyat və incəsənət”
(19.02.2024)
Mədəniyyət naziri Salyanda vətəndaşların müraciətlərini dinləyib
Mədəniyyət naziri Adil Kərimli fevralın 17-də Salyanda vətəndaşları qəbul edib. Bu barədə “Ədəbiyyat və incəsənət” portalı Mədəniyyət Nazirliyinə istinadən məlumat verir.
Qəbuldan əvvəl Ümummilli Lider Heydər Əliyevin Salyan şəhərində ucaldılmış abidəsi önünə gül dəstələri qoyulub, əziz xatirəsi ehtiramla yad olunub.
Salyan rayon Heydər Əliyev Mərkəzində keçirilən qəbulda Salyan, Hacıqabul, Biləsuvar, Neftçala rayonları və Şirvan şəhərindən sakinlər iştirak ediblər.
Vətəndaşların müraciətləri, əsasən, işlə təminat, fəxri adla təltif edilmə, mədəniyyət sahəsi ilə bağlı təklif və mövcud problemlərdən ibarət olub.
Nazirliyin məsul əməkdaşlarının da iştirak etdiyi qəbulda hər bir vətəndaşın müraciətinə həssaslıqla yanaşılması, diqqətlə araşdırılması və qaldırılan məsələlərin qanunvericiliyə uyğun həlli ilə bağlı müvafiq tapşırıqlar verilib.
Qaldırılan məsələlərə vaxtında və obyektiv baxılması məqsədilə hər bir müraciət qeydiyyata alınaraq xüsusi nəzarətə götürülüb.
“Ədəbiyyat və incəsənət”
(19.02.2024)
GÜNEY AZƏRBAYCAN POEZİYASI ANTOLOGİYASInda Vüqar Nemətin “İnsan heç nəyə bənzəməz” şeiri
“Ədəbiyyat və incəsənət” portalının Güney Azərbaycan Poeziyası Antologiyası layihəsində portalımızın Güney təmsilçisi Əli Çağla bu dəfə sizlərə Vüqar Nemətin şeirlərini təqdim edir.
İNSAN HEÇ NƏYƏ BƏNZƏMƏZ
İnsan heç nəyə bənzəməz,
yavrum mənim
Gülü, güldür
Tikanı, tikandır dünyanın.
Amma insan
Özünə belə bənzəməz.
Baxarsan
Adam kimi adam
Əl uzadsan yanar əllərin
Yaxınlaşsan ürəyin üşüyər!..
Qış, qışdır
Yaz da yazdır, bilirsən.
Yaz
İnsan heç nəyə bənzəməz,
mənim gülüm,
Hər şeyə bənzədiyi kimi!..
“Ədəbiyyat və incəsənət”
(19.02.2024)
Onlar istəmir ki, Güney Qafqazda sülh olsun - YUNUS OĞUZ
Prezident İlham Əliyevin inaqurasiya mərasimindən sonra onun çıxışına münasibət bildirən yazıçı-publisist, "Olaylar" qəzeti və eyniadlı informasiya agentliyinin rəhbəri, siyasi şərhçi Yunus Oğuz fikirlərini “Ədəbiyyat və incəsənət” portalı ilə bölüşür.
Fevralın 14-də Cənab Prezidentin andiçmə mərasimi keçirildi. İnaqurasiyadan öncə isə iki əsas məsələ daha qabarıq özünü göstərdi Birincisi, fevralın 9-da İlham Əliyev və oğlu Heydər Əliyev Hərbi Hava Qüvvələrinin hərbi obyektlərində oldular və silahlanmaya yeni qəbul edilən "Akıncı" hücum PUA-larının uçuşunu izlədilər. İkincisi isə Azərbaycanla Ermənistanın şərti sərhədində bizim əsgərimizin yaralanması idi ki, buna da dərhal "Qisas" əməliyyatı ilə cavab verildi. Yəni cənab Prezidentin də dediyi kimi, Azərbaycan yeni hədəfinə sakit girmədi. Yeni Prezident seçkiləri, yeni dövr sakit daxil olmadı. Yeni geosiyasi dönəmdə, dünyanın geosiyasi baxımından sülhə yaxın olmaq məsələsində (Münhen konfransında razılaşdırmışdılar - Y.O.), bizim əsgərin yaralanması sülhü pozdu. Çoxları qeyd edir ki, bunu guya Rusiya edib, yarısı Qərbi günahlandırır. Amma elə hər ikisi edib, heç biri istəmir ki, Güney Qafqazda sülh olsun. Rusiya istəyir bölgə onun təsiri altında olsun və mən deyim ki, o terrorçu təşkilat da Rusiyaya bağlı təşkilatdır. Maraqlı bir tərəfi də odur ki, həmin ərazilərdə- Qafan ərazisində Qərbin "binokl diplomatiyası", missiyası var və onlar guya binokl ilə sərhədləri izləyirlər. Hər ikisinin əli var, amma fakt odur ki, nə Rusiya, nə də Qərb Güney Qafqazda sülh istəmir. Amma Azərbaycan bunların təsiri altına düşmür və Prezidentin də dediyi kimi, biz özümüz vasitəçisiz sülh sazişi bağlamağa hazırıq.
“Ədəbiyyat və incəsənət”
(19.02.2024)
Sevgi iman, sevgi ibadət, sevgi əhdinə sadiq qalmaqdır - ESSE
Heyran Zöhrabova, “Ədəbiyyat və incəsənət”
- Dözə bilərsənmi?
-Yox mən dözmərəm.. Səbr edərəm.
- Nə fərqi var ?
-İnsan sevmədiyi şeylərə dözür. Səbr etməksə sevgidir.
Sevgi bəzən cəsarət edib uğruna dünyanı qarşına almaq, sevgi bəzən inandıqların uğruna sonadək mübarizə aparmaq, bəzənsə lazım gəldikdə qorumaq naminə geri çəkilə bilməkdir.
Sevgi bəzən aldanış, bəzən tamamlanmaqdır.
Sevgi hörmət, sevgi sədaqət, sevgi ümid, sevgi güvəndir.
Sevgi bəzən anlayış, bəzən səbr göstərmək, sevgi bəzən qiymətləndirmək, bəzən dostluq, sirdaşlıq, bir ömür yoldaşlıqdır.
Sevgi illər sonra bəzən xatirə, bəzən yaxşı ki, bəzən kaş ki, bəzən peşmanlıqdır.
Sevgi bəzən xatırlamaq, bəzən xatırlanmaq, bəzən bir qəlbdə daimi sakin olmaqdır.
Sevgi bəzən paylaşmaq, sevgi bəzən paxıllıqdır.
Sevgi iman, sevgi ibadət, sevgi əhdinə sadiq qalmaqdır.
Sevgi həya, sevgi abır, sevgi mərhəmiyyətdir.
Sevgi bəzən həsrət, bəzən intizar, sevgi bəzən vəfadarlıqdır.
Sevgi təvazökarlıq, sevgi dəyər vermək, sevgi qədr-qiymətə vaqif olmaqdır.
Sevgi bəzən küsmək, sevgi bəzən ummaqdır.
Sevgi sədəqə, sevgi mərhəmət, sevgi qayğıdır.
Sevgi səbat, sevgi iqrar, sevgi hürriyyətdir.
Sevgi bəzən bir pişiyi sığallamaq, sevgi bəzən bir körpəni qucaqlamaqdır.
Sevgi bəzən göyərçinlərə yem atmaq, sevgi bəzən bir uşağın başını oxşamaqdır.
Sevgi bəzən ümid etmək, sevgi dua, sevgi bütün qəlbin və ruhunla inanmaqdır.
Sevgi bəzən doğmalarının yükünü çiyinləmək, sevgi bəzən qayğı çəkmək, sevgi bəzən əzaba qatlaşmaqdır.
Sevgi bəzən qabarlı, qırışlı, əsalı əllər, sevgi bəzən böyüdən, sevgi qucaqlayan, qoruyan qollardır.
Sevgi bəzən kitab oxumaq, sevgi bəzən mavi dalğalarda qərq olmaq, sevgi yol gözləməkdir.
Sevgi bəzən bir ömür yalnızlığı gözə almaq, sevgi bəzən yarım qalmaq, bəzən gəlməyəcək birini gözləmək, sevgi bəzən isti göz yaşlarıyla soyuq torpağı qucaqlamaqdır.
Sevgi bəzən yağış tək yağıb damla-damla torpaqda yox olmaq, sevgi bəzən simurqtək yanıb küllərindən yenidən doğulmaqdır.
Sevgi Rəsulzadənin istiqlal eşqi, hürriyyət həsrəti, sevgi Şükriyyənin ailəsinin namusu, şərəf və ləyaqəti bahasına həbs və ölümü gözə alaraq o məşum kağızı imzalmaqdan imtina etməsidir.
Sevgi Albert vəfası, sevgi bəzən də Fərizənin intihar günahıdır.
Sevgi həzrəti Fatimə səbri, sevgi həzrəti Abbasın suyun bir addımlığında olduğu halda sevdikləri susuzkən, su içməyi özünə sığışdırmamasıdır.
Sevgi ana laylası, sevgi Azərbaycan deyə başlayan himn sədasıdır.
Hər şeyin təməli, özü sevgidir, sevgisiz heç nə yoxdur...
“Ədəbiyyat və incəsənət”
(19.02.2024)
Xoşbəxt donuzun balladası
Sərtyel, “Ədəbiyyat və incəsənət”
1.
GİLEY
Mənə elə gəlir ki, ayda 8-10 min alanlar mənim 64, yaxud 67 yaşımda 200 manat alacağımı müzakirə edərkən, heç də səmimi deyillər.
2.
PROQNOZ
Elə bir gün gələcək ki, 9 xəstə tək sağlam adamın üstünə gedəcək ki, sən xəstəsən, çünki bizim kimi deyilsən.
3.
ÇIXILMAZLIQ
Qadına baxırsan, deyirlər, şorgözdür. Baxmırsan, deyirlər, problemlidir.
4.
SİYASİ LƏTİFƏ
Amerikada demokratiyanın boğulduğu ölkələrin reytinqi dərc edilib. Burada Rusiya birincidir və Şimali Koreya və Venesuela ilə qonşuluq edir.
Rusiyada “Öz reytinqinizlə basın bayıra” adlı reytinq dərc edilib. Burada Amerika birincidir.
5.
GÜLMƏCƏ
Mamed dayı uşaq olanda ata-anasına sual edərdi ki, mən necə peyda olmuşam, ata-anası da deyərdi ki, səni Hacıleylək quşu dimdiyində gətirib, yaxud deyərdilər ki, səni kələmlikdən tapmışıq.
İndi Mamed dayının uşağı ondan soruşur ki, mən necə peyda olmuşam. O da İKT inkişafına rəğmən deyir ki, səni internetdən skaçat eləmişik.
6.
KƏLAM
Dadlı kolbasa ancaq xoşbəxt heyvanların ətindən çıxır.
“Ədəbiyyat və incəsənət”
(19.02.2024)
“İrəvan mətbəxindən nümunələr” layihəsində -Hədik şorbası
Rubrikanı Könül aparır.
“Ədəbiyyat və incəsənət” portalının Azərbaycan Milli Kulinariya Assosiasiyası ilə birgə layihəsində sizlərə hər dəfə İrəvan mətbəxindən nümunələr təqdim edirik. Bu nümunələr Azərbaycanın bu sahə üzrə tanınmış mütəxəssisi, əməkdar mədəniyyət işçisi, tarix üzrə fəlsəfə doktoru, kulinar Tahir Əmiraslanovun gərgin əməyi nəticəsində ortaya çıxmışdır.
Bu gün sizlərə Hədik şorbasının hazırlanma qaydasını təqdim edəcəyik.
DÜSTUR
§ Noxud – 30 qr
§ Qarğıdalı (qurusu) – 30 qr
§ Qaragöz lobya – 30 qr
§ Maş lobya – 30 qr
§ Mərci – 30 qr
§ Lərgə – 30 qr
§ Qırmızı lobya – 30 qr
§ Kərə yağı – 25 qr
§ Soğan – 25 qr
§ Sarıkök – 0,1 qr
§ Cirə – 0,1 qr
§ Duz – 6 qr
§ İstiot – 0,05 qr
Xörək əlavəsi:
§ nanə – 3 qr, mərzə – 3 qr, reyhan qurusu – 3 qr, nar turşusu (məti) – 20 qr
HAZIRLANMASI:
Paxlalar ayrılıqda təmizlənir, yuyulur, isladılır. Noxud və qırmızı lobyanın bişməsi üçün çox vaxt tələb olunduğundan əvvəlcədən bişirilir. Qazana kərə yağı əlavə olunur və xır- da doğranmış soğan qızardılır. Əvvəlcə su, qaynadıqda isə paxlalar bişmə müddətinə görə əlavə olunur. Qarğıdalı, qaragöz, maş, lərgə, bir az son- ra mərci əlavə edilir. Bişmə müddəti 1 saat, noxudla lobyada isə 1,5-2 saatdır. Sonra bunlar da qazana tökülür. Üzərinə duz, istiot, meyvə turşusu (məti), sarıkök, cirə əlavə olunaraq qarışdırılır. Tam bişdikdə bir az yer dəmi alır. Sonra yanında nanə, mərzə, reyhan qurusu, nar turşusu (məti) ilə süfrəyə verilir.
QEYD:
Bişmə müddəti dedikdə bütün xörəklərdə qaynadıqdan sonrakı müddət nəzərdə tutulur. Bu xörək ətli və ətsiz bişirilir. Çox qüvvəli yeməkdir.
Ədəbiyyat və incəsənət”
(19.02.2024)
O, Cabbarlının üzə çıxmayan əsərlərini üzə çıxarıb!
Kənan Məmmədli, “Ədəbiyyat və incəsənət”
AMEA-nın N.Gəncəvi adına Ədəbiyyat İnstitutunun Baş elmi işçisi
Prof.Dr. Asif Rüstəmlinin 70 yaşı tamam oldu. Onu - tanınmış ədəbiyyatşünası, ictimai və elm xadimini 70 illik yubileyi ilə bağlı çoxları təbrik etdilər, yeni uğurlar dilədilər!
Asif Rüstəmli Azərbaycan Yazıçılar Birliyinin üzvü (1996), Birliyin Cəfər Cabbarlı Komissiyasının sədri (2015), AMEA Nizami Gəncəvi adına Ədəbiyyat İnstitutunun Elmi Şurasının üzvü (2003-2018), “Folklor Sarayı” Elmi-Mədəni Mərkəzinin (indiki Folklor İnstitutunun) direktoru (1991-1995), institutun Elmi nəşrlər bölməsinin (1995-1999), Mətbuat tarixi və publisistika şöbəsinin (2014-2018) müdiri, BDU Dissertasiya Şurasının üzvü (2013-2018), 2018-ci ilin sentyabr ayından Azərbaycan Respublikası Prezidenti yanında Ali Attestasiya Komissiyası (AAK) Humanitar, ictimai elmlər və sənətşünaslıq, 2020-ci ilin mart ayından 2022-ci ilin oktyabr ayınadəksə Akkreditasiya şöbəsinin müdiri, habelə AAK Kollegiyasının üzvü olaraq məhsuldar ictimai, elmi yaradıcılıq yolu keçib.
Onun elmi fəaliyyətinin əsas yönünü cabbarlışünaslıq təşkil edir. O, Cəfər Cabbarlının kitablarına salınmamış 6 pyesini, 4 hekayəsini, 30-dək lirik və satirik şeirini, 60 ədəbi-tənqidi məqaləsini ilk dəfə toplayıb, ərəb qrafikasından transliterasiya edib, önsöz, qeydlər və şərhlər yazaraq “Ədirnə fəthi” adı ilə 1996-cı ildə “Elm” nəşriyyatında nəşr etdirib.
C.Cabbarlının Azərbaycan Prezidenti İlham Əliyevin 12 yanvar 2004-cü il tarixli Sərəncamı əsasında nəşr olunan 4 cildlik “Əsərləri”nin də tərtibi, önsözü və şərhləri ona məxsusdur. Onin bu nəşrə yazdığı “Bədii həqiqətlər ustası” başlıqlı önsöz yeni faktlarla zəngindir. Sovet senzurasının yersiz redaktələrinə məruz qalmış əsərləri müəllifin əlyazmaları əsasında o bərpa etmiş, bir sıra örnəkləri ilk dəfə çoxcildliyə daxil etmişdir.
“Molla Nəsrəddin” Ensiklopediyası”na (“Elm”, 2020) onun 33 məqaləsu daxil edilib.
O, Ümummilli lider Heydər Əliyevin ədəbiyyat, mədəniyyət və incəsənət mövzusunda 30 illik dönəmi əhatə edən məruzələrini, çıxışlarını söhbətlərini toplayıb tərtib edərək, 2000-ci ildə “Nəcib, mənəvi idealların tərənnümü” (“Ozan”, 2000) başlığı ilə nəşr etdirib.
Elmi məqalələri bir neçə xarici ölkədə yayınlanıb.
O, 15 kitabın, 350-dən çox elmi, publisistik məqalənin və məruzənin müəllifi, 20 kitabın tərtibçisi, 2 kitabın tərcüməçisi, çoxsaylı kitabların redaktoru və rəyçisi olmuş, onlara önsöz yazmışdır.
Onun ssenariləri əsasında “Günəş Şərqdən doğur” (2003), “İstiqlal fədaisi” (2004), “Nurlu gələcək naminə” (2005), “Bir kərə yüksələn bayraq. Azərbaycan Cümhuriyyəti – 100” (2018) sənədli filmləri çəkilib, nümayiş olunub.
O, həmçinin Azərbaycan Dövlət Mədəniyyət və İncəsənət Universitetində Mətnşünaslıq, Redaktənin əsasları, Ədəbi redaktənin əsasları fənlərini tədris edib(1996-2019).
Haqqında “Fədakar tədqiqatçı-alim” adlı məqalələr toplusu gün üzü görüb.
Arif Rüstəmli (Ankara (1991), Bağdad (1994), Tehran (1995), Təbriz (1998), Bəsrə (1999), Urmiya (2004, 2011), Varşava (2007), Tomski (2008), Elazığ (2008, 2012, 2013), Budapeşt (2010), Diyarbəkir (2013), Astana (2014), Balıkəsir (2018) və b. şəhərlərdə) keçirilən bir sıra beynəlxalq elmi konfrans və simpoziumun uğurlu iştirakçısı olub.
Belə ziyalılarımızla qürur duymağa dəyər!
“Ədəbiyyat və incəsənət”
(19.02.2024)
