Super User
“Gəncləşən muğam” layihəsi Gəncədə
Fikrət Əmirov adına Gəncə Dövlət Filarmoniyasında "Gəncləşən muğam” layihəsinin növbəti konserti təqdim edilib.
“Ədəbiyyat və incəsənət” portalına filarmoniyadan verilən məlumata görə, konsertdə layihənin rəhbərləri, Xalq artisti, professor Mənsum İbrahimov, Əməkdar artist Təyyar Bayramov, gənc xanəndələr Elsevər Muradov, Ülviyyə Sədaqət, Pərvaz İbrahimli, Fatimə Hüseynova, Elgiz Əliyev, Ayşən Mediyeva, Valid Abdullayev, Sədəf Budaqova, Xəyal Hüseynov, Xəyalə Qafarzadə, Günay İmamverdiyeva, Nurlan Namazov, Mirəli Sarızadə, Ülkər Abdullayevanın "Mənim Azərbaycanım", "Şuşanın dağları", "Küçələrə su səpmişəm", "Qal sənə qurban", "Axtararsınız", "Sarı Bülbül", "Xudayar təsnifi", "Qarabağ", "Yaşa mənim xalqım" səsləndirilib.
Konsertdə dövlət və hökumət rəsmiləri, mədəniyyət və incəsənət xadimləri, şəhər ictimaiyyəti iştirak ediblər.
Layihə çərçivəsində keçirilən konsert gəncəlilər tərəfindən böyük rəğbətlə qarşılanıb.
“Ədəbiyyat və incəsənət”
(21.05.2024)
TÜRKSOY-un Prezidenti, Qırğız yazıçısı Sultan Rayevin “Dəlixana”sı təqdim ediləcək
Kənan Məmmədli, “Ədəbiyyat və incəsənət”
Mayın 23-ü saat 12:00-da Azərbaycan Yazıçılar Birliyinin “Natəvan” klubunda Qırğızıstan Xaq yazıçısı Sultan Rayevin “XAN Nəşriyyatı”nda çap olunmuş “Dəlixana” romanının təqdimatı keçiriləcək.
Bu kitab Azərbaycan Ədəbiyyat Fondu və Hədəf Şirkətlər Qrupunun birgə layihəsi olan “Türk xalqları ədəbiyyatı” seriyasının ilk kitabıdır. Layihə rəhbərləri Hədəf Şirkətlər Qrupu, eləcə də Azərbaycan Ədəbiyyat Fondunun baş direktorları Şəmil Sadiq və Varisdir.
Azərbaycan Ədəbiyyat Fondundan aldığımız məlumata görə, sözügedən romanın tərcüməçisi Aysel Oğuz, redaktorları Yunus Oğuz və Cavid Qədirdir.
Qeyd edək ki, tədbirdə Azərbaycan ədəbi və elm cameəsinin tanınmış simaları iştirak edəcəklər.
Giriş sərbəstdir.
Əlavə məlumat üçün bildirək ki, romanda yüzlərlə il əvvəl ölmüş tarixi şəxsiyyətlərin ruhunu daşıyan yeddi nəfərin başına gələnlər təsvir olunur. Onlar həm özlərinin, həm də ruhunu daşıdıqları şəxslərin yol verdiyi günahların cəzasını çəkirlər.
Əsərin qəhrəmanları özlərindən də, cəzadan da qaçmaq üçün çöllərə düşür, Müqəddəs torpağın axtarışına çıxır, Musa peyğəmbərin ardıcılları kimi səhrada dolaşmağa başlayırlar...
Bəşər övladının ruhu da, əzabı da əbədidir. Bədən dünyanı tərk etsə də, ruh cəzasını başqa bədənlərdə çəkməyə davam edir.
“Ədəbiyyat və incəsənət”
(20.05.2024)
Salman Mümtazın 140 illiyi münasibətilə Milli Məclisinin Mədəniyyət Komitəsi paylaşım edib
Azərbaycan Respublikası Milli Məclisinin Mədəniyyət Komitəsi görkəmli ədəbiyyatşünas, repressiya qurbanı Salman Mümtazın 140 illiyi münasibətilə paylaşım edib. Paylaşım mətnini diqqətinizə çatdırırıq.
Bu gün şair, ədəbiyyatşünas, mətnşünas, biblioqraf, orta yüzilliklər əlyazmalarının kolleksiyaçısı, repressiya qurbanı Salman Mümtazın anadan olmasının 140-cı ildönümüdür (Salman Məmmədəmin oğlu Əsgərov; 20.05.1884, Nuxa (Şəki), Azərbaycan – 06.09.1941, Oryol, RF).
Salman Mümtaz 1910-cu ildən "MollaNəsrəddin" və b. dərgilərdə şeirləri, felyetonları ilə dini fanatizm və xürafata qarşı çıxış edib.
O, doğma Azərbaycan dili ilə yanaşı fars, ərəb, rus, urdu və b. dilləri də bilib.
Salman Mümtaz İmadəddin Nəsimi, Qövsi Təbrizi, Molla Pənah Vaqif, Qasım bəy Zakir, Mirzə Şəfi Vazeh və b. Azərbaycan klassiklərinin əsərlərini nəşrə hazırlayıb. 1927-1928-ci illərdə Azərbaycan aşıq poeziyasının örnəklərini iki cilddə nəşr etdirirən də SalmanMümtaz olub.
O, həmçinin Xətai, Füzuli və b. elmi-tənqidi mətnlərini tərtib edib.
Stalin repressiyasının qurbanı olan Salman Mümtaz, 1937-ci ilin oktyabrında həbs olunub və 10 il müddətinə azadlıqdan məhrum edilib. O, həbsdə olarkən - 1941-ci ilin sentyabr ayında Oryol şəhərində güllələnib.
Totalitar rejim mənsubları onun topladığı 270 əlyazmanı məhv edib.
Keçmiş SSRİ Ali Məhkəməsi Salman Mümtaza 17.11.1956-cı ildə (ölümündən sonra) bəraət verib.
Sayğılarla anırıq.
Ruhu şad olsun!
Azərbaycan Respublikası
Milli Məclisinin Mədəniyyət Komitəsi
“Ədəbiyyat və incəsənət”
(20.05.2024)
Azərbaycanlı fotoqraf Beynəlxalq Foto Sənəti Federasiyasına üzv seçilib
Azərbaycanlı gənc fotoqraf Valeh Arifoğlu dünya üzrə nüfuzlu fotoqrafiya təşkilatı olan Beynəlxalq Foto Sənəti Federasiyasının (FIAP) rəsmi üzvlüyünə qəbul edilib.
AzərTAC xəbər verir ki, bu barədə fotoqraf özü məlumat verib.
Qeyd edək ki, Valeh Arifoğlu 2012-ci ildən fotoqraf kimi fəaliyyət göstərir.
Beynəlxalq Foto Sənəti Federasiyası 1946-cı ildə yaranıb və dünyada UNESCO tərəfindən tanınmış yeganə fotoqrafiya təşkilatıdır. Yüzdən artıq ölkənin foto təşkilatlarını bir yerə toplayan FIAP, hazırda dünyanın ən böyük və nüfuzlu foto təşkilatı hesab olunur. Bu qurumun üzvlüyünə qəbul edilmiş federasiya və klublar xüsusi statusa, fotoqraflar isə ömürlük fəxri adlara layiq görülür.
“Ədəbiyyat və incəsənət”
(20.05.2024)
“Hərənin bir xırda yol yazısı var...” - VAQİF BƏHMƏNLİNİN ŞEİRLƏRİ
“Ədəbiyyat və incəsənət” portalının “Ədəbiyyat qəzeti” ilə birgə ƏDƏBİYYATIMIZI SEVDİRƏK layihəsində bu gün sizlərə sevimli şairimiz Vaqif Bəhmənlinin şeirləri təqdim edilir.
İki rübai
Sazda pərdələri aşıq ayırır,
Nigarı əğyardan aşiq ayırır.
İşıq birləşdirir bizi dünyaya,
Bizi bu dünyadan işıq ayırır!
Olara-olmaza "ol" yazısı var,
Pöhrələn, çiçək aç, sol yazısı var.
Bekara söhbətdi alın yazısı,
Hərənin bir xırda yol yazısı var...
Ətək
Meyvə də ağacı unudur,
Gözlə yox, səslə uçur yarasa.
Daha ayağın yer tutur,
Öz əlin, öz ətəyin varsa,
burax Allah ətəyini.
Dərdlər yığıb, qəmlər dərib -
yanma halsız, nimdaş ələ.
Rəbb əlinin kölgəsində
bir sümük, bir dəri,
minlərcə qərib
ətək növbəsi tutub,
Çarəsiz uzanan ələ yer elə -
burax Allah ətəyini!
Göy üzündən gəlir öyüd,
Yoxmu ağlın düşünəsən -
namxuda, azman kişisən!
Burnundan piltə-piltə
gəlib tökülməmiş süd
ayrıl ana döşündən,
burax Allah ətəyini!
İki dünyanın şərtləri
Dəri çəkmələrim qarda batmırsa,
özünü asıbsa dolabda kürküm,
Bir qədəh şəraba əlim çatmırsa,
barmağım tutmursa nazik "Kent-4"ü:
demək, cəhənnəmin qırağındayam.
Ömür sərt qayadı, toqquş!.. durmadan -
bir qəlpə qoparmaq ehtimalı var.
Qədəhi qədəhə toqquşdurmadan
tərif yağdırırsa ruhuma dostlar,
sözsüz, gor evində vergi yığanam!
Meyvəmin sortunu dəyişibsə yad,
küt bağban söyüdə nar calayırsa,
Yüz ildən sonra da qaldırıb fəryad
Xan Araz yurdumu parçalayırsa,
mərmər sinə daşım çat verib demək!
Pay bölən, fəqiri saymır hesaba,
manat qoparırsa ciyərdən həkim,
Yenə zülm edirsə harın kasıba,
haqsız çıxarırsa haqlını hakim,
demək, inkir-minkir dindiriri məni...
Mən ki, qoşa bürclü qala salmışdım
bəs nədən möhtacam tək bircə cana?
Onları cənnətə yola salmışdım -
çatmırsa hayıma atam, ya anam,
demək, adlayıram qıl körpüsündən!
Leylan sevgilərin sonu puçdursa,
Məcnunlar tutubsa çölün düzünü,
Yanıq könüllərin közü suçdusa,
tüstü acıtmırsa iblis gözünü,
demək, qaynayıram qır qazanında!
Fəlsəfi qoşma
Nə gərək faş sirri açaq təzədən? -
Gündüz insanla xoş... gecə cananla.
Mayamız yoğrulmuş kefdən, məzədən,
Gedəlim fanidən mey dolu camla.
Könüllər tikişi ilahi sapdı -
Bütövə ehtiram düzgün hesabdı!
Kimsənin qəlbinə dəymə, savabdı -
qarşıdan gələnə baş əy, salamla!
İrəli boşluqdu, yol yoxdu geri,
Harayın tutsa lap göyləri, yeri...
Yetməz imdadına özündən qeyri
Canda həvəs yoxsa, səs batar tamda!
Hikmət karvanını nərtək dartsan da,
Qafanı şişirtsə ağıl, artsan da!
Ən dərin laylara lağım atsan da
xəlitə zəngindi, qatqıdı tamlar!
Olsan əsarətdə nadanın qulu,
Namardlar sarısa sağı və solu,
Dövran qəsd eləsə, yumrulsa yolun
Haqqın qəzasına yol vermə amma...
Düşməsə sümüyə çalınan hava,
"Hava, hava," - deyib çıxartma dava!
Gözünü əməlli aç, a binəva -
Neçə ki, şam yanır, istidi şamdan!
Ruhla iynələyib saf suallı su,
Könüldən pas silir tasda fallı su!
Adamdı xilqətin ən insaflısı;
içində qəm nəhri,
gözündə damla...
Bəndəmi günahlı,
Tanrımı çaşıb -
Tutur köhnə suçu çağla yanaşı?
Çoxdan daşa dönüb, kristallaşıb
Həvva nənə dadan lənətli alma...
Dünya pərvazlanıb uçur huşumdan,
Boşluğa uzanır bir yol tuşumdan.
O kimdi gəzinir taxtabuşumda -
Bəlkə, Əzrayıldı göyərçin damda?
Bu da son... Yaradan bilirmi görən?
Axirət, yerində qalırmı görən?
Cənnətdə aqillər olurmu görən,
Qonşu düşəcəyəm hansı nadanla?
“Ədəbiyyat və incəsənət”
(20.05.2024)
“Gəl vəzifəmizi dəyişək...”
“Ədəbiyyat və incəsənət” portalı sizlərə Xeyrəddin Qocanın miniatür hekayələrinin təqdimini davam etdirir.
Yalandan deyir...
X.Qocanı yüksək vəzifəli bir şəxslə tanış edirlər. Bu şəxs Türkiyədəki ənənəvi ifadəni işlədir: "Sizinlə tanışlıqdan çox mutlu oldum".
Həmin adam gedəndən sonra Xeyrəddin müəllim dillənir:
-Yalandan deyir də, "mutlu oldu". Mən onun nəyiyəm ki, məni görən kimi mutlu oldu?
Yaxşı vəzifə
Baş konsul Türkiyədə çox darıxırdı, Bakıya qayıtmaq istəyirdi. İstəyirdi məsul bir işdə çalışsın, xalqa, vətənə daha çox xeyir verə bilsin. Hətta, Bakıya qayıtmaq üçün rəhbərliyə dəfələrlə ərizə də yazmışdı.
Bir gün ondan soruşurlar ki, birdən səni işdən çıxardılar, heç bir iş də vermədilər, nə edəcəksən? Cavab verir:
-Mən ərizədə vəzifə istəməmişəm ki! Güman edirəm, yaxşı bir vəzifə verərlər...
Gəl vəzifəmizi dəyişək...
X.Qoca Vətənə qayıtmaq istəməsini Bakıda bir yüksək vəzifəli şəxsə də bildirir. O da başlayır ona izah etməyə ki, bəs, baş konsul vəzifəsi belə şərəfli vəzifədir, elə yüksək vəzifədir və s. və i.a. Xeyrəddin müəllim onun sözünü kəsir:
-Onda gəl, vəzifəmizi dəyişək. Sən mənim vəzifəmə keç, bir az şərəflən!
(Davamı olacaq)
“Ədəbiyyat və incəsənət”
(20.05.2024)
Bu gün II Bakı Müasir Musiqi Günləri başlayır
Mayın 20-dən 26-dək Elm və Təhsil Nazirliyi və Mədəniyyət Nazirliyinin dəstəyi ilə “II Bakı Müasir Musiqi Günləri” festivalı keçiriləcək.
“Ədəbiyyat və incəsənət” portalı xəbər verir ki, festivalda yerli musiqiçilərlə (Cadenza Orchestra, BCMS Ensemble) yanaşı, Avstriya, Almaniya, Macarıstan, Norveç, ABŞ və Rusiyadan dəvət olunmuş ifaçıların da iştirakı nəzərdə tutulur.
Festivalın proqramı səhər, gündüz və axşam sessiyalarından ibarətdir – konsertlərin hamısı ictimaiyyət üçün açıqdır. Həmçinin Azərbaycan Dövlət Mədəniyyət və İncəsənət Universitetində və Beynəlxalq Muğam Mərkəzində ustad dərslərinin, seminarların və mühazirələrin keçirilməsi nəzərdə tutulur.
Eyni zamanda, Beynəlxalq Muğam Mərkəzində və Muzey Mərkəzində “Portretlər” adlı yaradıcılıq gecələri keçiriləcək. Festivalın hər bir günü ya Beynəlxalq Muğam Mərkəzində, ya da Müslüm Maqomayev adına Azərbaycan Dövlət Akademik Filarmoniyasında axşam konserti ilə başa çatacaq.
“Ədəbiyyat və incəsənət”
(20.05.2024)
“Bu yaz davalıdı…” - İnqilab İsaqın vəfatına
Könül, “Ədəbiyyat və incəsənət”
Xəbər verdiyimiz kimi, Azərbaycan Yazıçılar Birliyinin üzvü, şair İnqilab İsaq 71 yaşında dünyasını dəyişib.
İnqilab İsaq "Deməyə sözüm var", "Aləm cənnətə dönsə", "Aydan axan bulaq", "Bir çəmənin çiçəkləri", "Obaları gəzə-gəzə", "Ümidə borclu dünya", "İndi elə təkəm ki” və digər kitabların müəllifidir.
Və istərdik onun ömrünün son dönəmində yazdığı iki şeirini sizlərə təqdim edək:
Səbrsiz oturmuşam...
Gülmə dərdimə, gülmə,
Gül-çiçək bağladıqca.
Göyün üzü nə çəkir,
Yer üzü ağladıqca...
Yollar yoluma ümid,
Yollar qəbrimə açıq.
Buda belə ömürdü
Çəkmir hələ ki, aclıq...
Bu bəxt də qaragünlü,
Günahları ağ olmuş.
Ölə-ölə yerimə,
A dərdləri sağolmuş...
Görmürsən, göz-gözəyik
Tanışammı, yadammı?
Nədən, adam güzgülər
Göstərməyir adamı?...
Məndən xəbər-ətər yox,
Köhnə, təzə yaşımda.
Səbrsiz oturmuşam,
Yenə səbrin daşında...
Bu yaz davalıdı
Çiçəyi çırtlayan çiçək ədası,
Küləyə qoşulub qaçar bir azdan...
Puçurlar çırpınan ətcə quşdumu?
Keçirər ehmalca köçünü yazdan...
Boy-boya barlanan pöhrələrə bax,
Süd daman torpaqda-ana döşündə.
Tövşəyən addımın niyyəti yanlış...
Könül atlandıqca yar görüşünə.
Çiçək havasında adam uçurmuş,
Bənövşə ətrinə salam verməyə.
Quzeydə təklənən qış sınaqları,
Güneydə yer tapmır təslimdi deyə...
Qəlbimdə közərər həsrət nisgili
Bu yaz buludunu çəkər haraya?
Təntidir qanımı Şuşa nəfəsim,
Ayrılıq yolları düşən havaya.
Bu yaz davalıdı, hələ davada,
Tapmayır özünü pozulan səhman.
Qanını üstümə tökmək istəyir,
Lalə yanağında bitirdiyi qan.
Üzər sızıltılar istəklərimi,
Bu bahar beləcə açar çiçəyi...
Cığırlar fikirli, yollar fikirli
Boyum sarılar haçan çiçəyi?
“Bu yaz davalıdı” deyən şair elə yaz ayında dünyasını dəyişdi.
Qeyd edək ki, o, yaşadığı Göygöl rayon Üçtəpə kəndində vəfat edib.
Allah rəhmət eləsin!
“Ədəbiyyat və incəsənət”
(20.05.2024)
Günün fotosu: Brüssel xalçası
Günün fotosu: Brüssel xalçası
Brüsselin mərkəzindən bir görüntü. Gördüyünüz bu xalça canlı çiçəklərdən hazırlanıb. Razılaşın ki, fantastik görüntüdür.
Foto: AP
“Ədəbiyyat və incəsənət”
(20.05.2024)
Korrupsiya əleyhinə korrupsiya
1.
Yüksək ölüm faizini görüb Padşah sərəncam imzaladı:
Məmləkətdə ölmək qadağan edilir. Kim qanunu pozsa edam ediləcək.
2.
-Allah sənə şükür, nə yaxşı ki, mən 18-ci əsrdə doğulmamışam.
-Niyə ki?
3.
-Salam. Siz bizə 1x1.50 ölçüdə qırx ədəd banner hazırlaya bilərsiniz?
-Əlbəttə.
-Neçəyə?
-Hərəsini 17 manata.
-Demək 680 manat. Olsun. Amma bir şərtim var. Olarmı ki, siz 1360 manat hesab yazasız, biz büdcədön o qədər ödəyək, amma siz sonra artıq vurduğum pulu mənə qaytarın.
-Olsun. Bağışlayın, bir şey də soruşum. Posyerlər hata üçündür?
-Korrupsiya əleyhinə mitinq üşün.
4.
Yay cədvəli
Milçəklər: 07.00 - 18.00
Ağcaqanadlar: 18.00 - 06.30
5.
Əgər biz işimizdən məmnunluq duyuruqsa bu, rəhbərlik üçqn bir siqnaldır. Demək, işimiz ağır deyil.
“Ədəbiyyat və incəsənət”
(20.05.2024)
