18 may - Beynəlxalq Muzeylər Günü münasibətilə Bülbülün Memorial Muzeyində tədbir keçirilib.

“Ədəbiyyat və incəsənət” portalına muzeydən verilən məlumata görə, tədbiri giriş sözü ilə açan muzeyin direktoru Fərqanə Cabbarova qonaqları salamlayaraq, həmkarlarını və muzeysevərləri bayram münasibətilə səmimi qəlbdən təbrik edib. 

 Tədbirdə Sağlamlıq imkanları məhdud uşaqlar üçün 5№-li Respublika xüsusi internat məktəbinin şagirdləri dünya və Azərbaycan bəstəkarlarının əsərlərindən ibarət konsert proqramı ilə çıxış ediblər.

“Ədəbiyyat və incəsənət”

(20.05.2024)

“Ədəbiyyat və incəsənət” portalı Azərbaycan Yazıçılar Birliyinin üzvü Coşqun Xəliloğlunun “Şəhidlər barədə şeirlər” silsiləsini təqdim edir. Bu gün Kamran Vəlizadəyə həsr edilmiş şeirlə tanış olacaqsınız.

KAMRAN ƏKBƏR OĞLU VƏLİZADƏ

(14.09.1996.-23.10.2020.)

Lənkəran rayonunun Balıqçılar qəsəbəsində doğulmuş, şəhid Elmar Məmmədov adına orta məktəbin və Azərbaycan Dövlət Neft və Sənaye Universitetinin məzunu,  Qarabağın azad edilməsi uğrunda Vətən müharibəsinin şəhidi

Şəhid olduğu yer:  Qubadlı rayonu

Dəfn yeri:  Lənkəran

Allah rəhmət eləsin!

KAMRAN                                    

Taleyinə torpağı azad etmək düşənlər,

Yurd üçün aslan kimi, şir kimi döyüşənlər,

Məkanın bu dünyadan cənnətə dəyişənlər,

Oğulların hər biri bizə doğma, əzizdir.

Söhbət açdığım Kamran gözəl bir məkandandır,

“Balıqçılar” köyündən, bəli, Lənkərandandır.

Vətən sevgisi bizə həm süddən, həm qandandır,

Fərqi yoxdur, çəməndir, bulaqdır, çaydır, düzdür.

Kamrangilin ailəsi zəhmətkeş, halal idi,

Nə qədər xoş arzular, istəklər xəyal idi,

Bu evdə, bu ocaqda, pis niyyətlər lal idi,

Mehribanlıq coşqun çay, məhəbbətsə dənizdir.

Kamran orta məktəbi əlalarla bitirdi,

İmtahanı verərək ali məktəbə girdi,

ADNSU-elm ocağı ona uğur gətirdi,

Bu məbəd şan-şöhrətli ali məktəbimizdir.

Ali təhsilin alıb, işləyirdi mühəndis,

Razı idilər ondan hamı-işçi,  rəis,

İnsan gərək həyatda əməliylə qoysun iz,

Safların əqidəsi, yolu amalı düzdür.

Hərbi xidmətini o, Daşkəsəndə keçirdi,

Ürəyinə nə qədər xatirələr köçürdü,

Doqquz Fəxri Fərmanı, xidmətinə “möhürdü”,

Torpağı geri almaq bizim məqsədimizdir.

Otuz il torpağımız bizdən ayrı düşübsə,

Qüssədən ürəyimiz qubar edib, şişibsə,

“Qarabağ” deyən dillər ağızlarda bişibsə,

Döyüşə getməliyik, Allahdan əmrimizdir.

Atıldı döyüşlərə cəsarət ilə Kamran,

Düşmənlərlə döyüşdü rəşadət ilə Kamran,

Qısa ömrün yaşadı ləyaqət ilə Kamran,

Şəhadətə yetişdi, şəhidlərsə ölməzdir.

Şəhidlik arzusuydu, bu söz deyil, əməldi,

O insan xoşbəxtdir ki, ölümü də gözəldi,

Qubadlıda zirvəyə, ölməzliyə  yüksəldi,

Xatirəsi qəlblərdən heç zaman silinməzdir

Ölməzlər sırasına Kamran, adın yazılıb,

Torpaqlar düşmənlərdən əbədilik alınıb,

Şuşada Xankəndində, zəfər himni çalınıb,

Xalqımız qalib olub, ordumuz yenilməzdir.

“Ədəbiyyat və incəsənət”

(20.05.2024)

Xalq şairi Hüseyn Arifin anadan olmasının 100 illiyi münasibətilə Sədyar Vəzifə Eloğlunun “Arxada qalan illər” (Hüseyn Arif ilə şeirləşmələrim və xatirələr) kitabı nəşr edilib. 

“Ədəbiyyat və incəsənət” portalı xəbər verir ki, 104 səhifəlik kitabın tərtibçisi, elmi redaktoru və ön sözünün müəllifi AMEA-nın Nizami Cəncəvi adına Ədəbiyyat İnstitutunun aparıcı elmi işçisi, filologiya üzrə fəlsəfə doktoru, dosent Qəndab Haqverdi Əliyevadır.

Ki­tabda Cə­nu­bi Azər­bay­can­da ya­şa­yan, is­te­dad­lı şa­ir və təd­qi­qat­çı Səd­yar Və­zi­fə Eloğ­lu­nun Azər­bay­ca­nın gör­kəm­li şai­ri, mər­hum Hü­seyn Arif ilə olan mə­nə­vi dost­luq və ədə­bi ya­ra­dı­cı­lıq əla­qə­lə­ri­ni əks et­di­rən xa­ti­rə və şeirləşmələri yer alıb. 

Böyük Şəhriyarın “Heydər­ba­baya salam” poemasının sərhədləri aşması ilə dilə gələn yüz­lər­lə qə­ləm əh­li­nin həsrət poeziyası və bir də bu poeziyanın Azər­bay­ca­nın Şi­mal və Cə­nu­bu arasında şeirləşmə forması yarandı. Bu, Gülüstan müqaviləsi bağlanandan bəri o tay bu tay arasında başlanan məktublaşma ənənəsinin bir növ davamı idi və o de­mək­dir ki, Azər­bay­can aşıq ədə­biy­ya­tın­da ol­du­ğu ki­mi mək­tub ədə­biy­ya­tın­da da Azər­bay­can şa­ir­lə­ri bi­ri-bi­ri­nin üzü­nü gör­mə­dən, an­caq əsər­lə­ri­lə tanış­lıq əsa­sın­da şe­ir­lə­şir, ün­siy­yət ya­ra­dır­lar və ədə­bi mü­hit­lə­ri­nə be­lə sə­mi­mi­lik ya­ra­dan tə­sir­lər bu­ra­xır­lar.

“Arxada qalan illər” Azər­bay­can poetik epis­tol­yar ədə­biy­ya­tına aid nəşr olunan ilk kitabdır.

“Ədəbiyyat və incəsənət”

(20.05.2024)

Hər il mayın 18-i Beynəlxalq Muzeylər Günü kimi qeyd edilir. Bu gün Beynəlxalq Muzeylər Şurasının (ICOM) təşəbbüsü ilə 1977-ci ildə təsis edilmiş və əsas məqsədi muzeylərin cəmiyyətin həyatında mühüm rol oynadığını göstərməkdir.

“Ədəbiyyat və incəsənət” portalı Mədəniyyət Nazirliyinə istinadən xəbər verir ki, Beynəlxalq Muzeylər Şurası (ICOM) tərəfindən xalqlar arasında mədəni mübadilə və əməkdaşlığın inkişafına kömək məqsədilə təsis olunmuş bu gün hər il müxtəlif deviz altında keçirilir. Bu il Beynəlxalq Muzeylər Günü “Muzeylərdə təhsil və tədqiqat” mövzusuna həsr olunub.

Beynəlxalq Muzeylər Günü ilə əlaqədar insanların asudə vaxtının səmərəli təşkili, onların muzey müəssisələri vasitəsilə Azərbaycanın zəngin mədəni irsi ilə yaxından tanış olmalarının təmin edilməsi üçün Mədəniyyət Nazirliyinin tabeliyində fəaliyyət göstərən muzeylərdə “Açıq qapı” günü elan olunur. Beləliklə, vətəndaşlar və ölkəmizin qonaqları mayın 18-i ödənişsiz olaraq muzeyləri ziyarət etmək imkanı əldə edəcəklər.

“Ədəbiyyat və incəsənət”

(17.05.2024)

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində olan Naxçıvan regional “ASAN xidmət” mərkəzinin açılışı 18 may 2023-cü ildə baş tutub. Həmin ilin 22 may tarixində isə mərkəz fəaliyyətə başlayıb.

​“ASAN xidmət” mərkəzi Naxçıvan şəhəri Seyid Cəfər Pişəvəri 7 ünvanında inşa edilib. 1 hektar ərazidə inzibati bina və yerüstü avtomobil dayanacağı yaradılıb.

​Əsasən Naxçıvan Muxtar Respublikasında qeydiyyatda olan ümumilikdə 465 mindən çox vətəndaşa xidmət edən Mərkəz ərazi məhdudiyyəti olmadan fəaliyyət göstərir. Mərkəzin fəaliyyəti operativlik, şəffaflıq, nəzakətlilik, məsuliyyətlilik prinsiplərinə və vətəndaş rahatlığına əsaslanıb.

​“Ədəbiyyat və incəsənət” pprtalı “ASAN xidmət”ə istinadən xəbər verir ki, 1 il ərzində Naxçıvan regional “ASAN xidmət” mərkəzində 422 mindən çox vətəndaş müraciəti qeydə alınıb. Mərkəzdə müxtəlif dövlət orqanları, həmçinin özəl şirkət və müəssisələr tərəfindən 400-ə yaxın xidmət həyata keçirilir.

Hazırda 27 "ASAN xidmət” mərkəzi fəaliyyət göstərir. Onlardan 7-si Bakı şəhərində, 2-si Gəncədə, 2-si Sumqayıtda olmaqla digərləri Sabirabad, Bərdə, Qəbələ, Masallı, Quba, Mingəçevir, İmişli, Şəki, Şamaxı, Kürdəmir, Tovuz, Ağcabədi, Balakən, Salyan, Naxçıvan və Lənkərandadır.

Bu günədək “ASAN xidmət” mərkəzlərinə 8 milyon 937 mindən çox vətəndaşın 74 milyona yaxın müraciəti daxil olub.

​Rəy sorğularına əsasən vətəndaşların xidmətlərdən məmnunluq əmsalı 99,8 % təşkil edir.

“Ədəbiyyat və incəsənət”

(17.05.2024)

“NİZAMİ” Kino Mərkəzinin böyük zalında qardaş Türkiyənin və Azərbaycanın bir qrup şəhid ailələrinin, rəsmi şəxslərin,  ictimaiyyət nümayəndələrinin, o cümlədən QHT və KİV təmsilçilərinin, yazarların iştirakı ilə “Şəhidi şəhidimiz, bayrağı bayrağımız” adlı ədəbi-bədii gecə keçirilib. 

“Ədəbiyyat və incəsənət” portalı xəbər verir ki, tədbir qardaş ölkələrimizin bütün dönəmlərdəki şəhidlərinin xatirəsinə sayğı duruşu və Azərbaycan, Türkiyə Dövlət himnlərinin səsləndirilməsi ilə başlayıb.

Tədbirin aparıcısı, şair-publisist Əkbər Qoşalı giriş sözü söyləyərək, ədəbi-bədii gecənin “Regional Hüquqi və İqtisadi Maarifləndirmə” İctimai Birliyi, “Gözəl Yaşam Mərkəzi” və “Kırşəhir Şəhid Ailələri Dərnəyi” İctimai Birliyinin təşkilatçılığı ilə keçirildiyini bildirib.

Əkbər Qoşalı qardaşlıq, dostluq, qonşuluq bağları “Şuşa Bəyannaməsi” ilə ən yüksək səviyyəyə qaldırılan Azərbaycanla Türkiyənin bütün əməli çalışma sahələrində irəliləyişini dədələrimizin ruhunu şad edən, gənc nəslə yol göstərən faktor kimi şərh edib.  

Təşkilatçı qurumlar adından çıxış edən “Regional Hüquqi və İqtisadi Maarifləndirmə” İctimai Birliyinin  (RHİMİB-in) sədri Arzu xanım Bağırova rəhbəri olduğu ictimai birliyin hər zaman şəhid ailələri, qazilər, gənclər, yazarlarla sıx təmasda olduğunu, müxtəlif layihələr, aksiyalar həyata keçirdiyini, çoxsaylı nəşrlərlə çıxış etdiyini vurğulayıb.

O, RHİMİB-in fəaliyyətində yalnız respublikamızın regionlarının əhatə olunmadığını, eləcə də, qardaş ölkələrin regionları, uyğunprofilli qurum və quruluşları ilə işbirliyinə önəm verildiyini deyib.  

RHİMİB-in yaradıldığı ilk gündən könül dostlarının iştirakı ilə çoxsaylı səfərlər təşkil olunduğunu, o cümlədən qardaş ölkələrə səfərlər müddətində, habelə qardaş ölkələrdən Azərbaycana nümayəndə heyətləri təşrif buyurunca keçirilmiş  tədbirlərdən söz açıb.

“Bəli, biz qürur hissi ilə vurğulayırıq ki, RHİMİB olaraq çalışmalarımız şəhid ailələrimiz, qazilərimiz, gənclərimizlə, eləcə də, maarifləndirmə işi, təhsil, ədəbiyyat, mədəniyyət və sənətlə, habelə Türk dünyası ilə sıx bağlı olub.

Bu gün Kırşəhirli şəhid ailələrini birləşdirən ictimai birliyin rəhbərləri və fəalları bizimlədir. Kırşəhirli qardaş-bacılarımızın bir çoxu Azərbaycana ilk dəfə gəlib. Bir daha xoş gəlib-səfa gətiriblər. Biz “Şəhidi şəhidimiz, bayrağı bayrağımız” adını təsadüfən seçməmişik və demək istəyirik ki, Şəhidlərimiz ölmədi, Vətənlərimiz bölünmədi!

Çıxışımın sonunda, “Kırşəhir Şəhid Ailələri Sosial Yardımlaşma və Dayanışma Dərnəyi” İctimai Birliyinin başqanı Mutlu Kılıçaslana, bu tədbirin təşkilinə mənəvi dəstək göstərən bütün könül dostlarına, buraya təşrif buyurduğunuza görə sizlərin hər birinizə təşəkkür edirəm. Çox sağ olun”!

“Kırşəhir Şəhid Ailələri Sosial Yardımlaşma və Dayanışma Dərnəyi” İctimai Birliyinin başqanı Mutlu Kılıçaslan öz çıxışını tərəfdaş ictimai birliyin rəhbəri Arzu xanım Bağırovaya, bütün Azərbaycanlı dostlarına qonaqpərəvərliyə görə təşəkkürlə başlayıb. O, başqanı olduğu qurumun Azərbaycana ilk dəfə belə bir səfər gerçəkləşdirdiyini bildirib. Kılıçaslan Azərbaycanla sıxlaşan işbirliyinin yalnız onların ailə üzvü olan şəhidlərin deyil, Qafqaz Türk-İslam Ordusunun tərkibində 1918-ci ildə Azərbaycana gəlmiş, döyüşərək şəhid olmuş Kırşəhirli hərbçilərin timsalında bütün dönəmlərdəki şəhidlərimizin ruhunu şad etdiyini söyləyib.

“Kırşəhir Şəhid Ailələri Sosial Yardımlaşma və Dayanışma Dərnəyi” başqanı şəhid ailələrinin birlik və bərabərliyi, qaynaşması, həmrəyliyi üçün çalışmalar zəminində qardaş ölkələrlə işbirliyinə önəm verdiklərini deyib. Şəhid ailələri üçün fərqli layihələr həyata keçirdiklərini vurğulayan Kılıçaslan, qardaş ölkələrin şəhid ailələrinin bir-birini tanımasında, işbirliyində maraqlı olduqlarını qeyd edib.

Sonra millət vəkili Ceyhun Məmmədov, Azərbaycan Mətbuat Şurasının sədri, Yazıçılar Birliyinin sədr müavini Rəşad Məcid, “Yeni Müsavat" Media Qrupunun təsisçisi və rəhbəri Rauf Arifoğlu, "Olaylar"ın baş redaktoru, yazıçı-publisist Yunus Oğuz, Türk Ədəbiyyatı Vəqfinin başqan müavini, yazıçı-publisist İmdat Avşar, "Nəfəs" ictimai birliyinin sədri Firəngiz Balakişiyeva, “Kırşəhir Şəhid Ailələri Sosial Yardımlaşma və Dayanışma Dərnəyi”nin İdarə heyətinin üzvü Müqəddəs xanım Ülkər, Aprel döyüşlərinin şəhidi, polkovnik-leytenant Sənan Axundovun həyat yoldaşı, 34 saylı tam orta məktəbin direktoru Nəcibə xanım Axundova çıxış ediblər. 

Tədbirin bədii bölümündə Xalq artistləri – Gülyanaq və Gülyaz Məmmədova bacıları, Simarə İmanova, hərbi-vətənpərvərlik mahnılarının mahir ifaçısı, tanınmış sənətkar Şəmistan Əlizamanlı, istedadlı gənc ifaçılar – Kamilə Nəbiyeva, Ramal Əzimov, tanınmış sənətçi Fərahim Sadiqin başçılıq etdiyi “Öncə Vətən” qrupu çıxış edib.

Sonda təşkilatçı qurumlar arasında qarşılıqlı hədiyyə bağışı olub, xatirə şəkilləri çəkilib.

“Ədəbiyyat və incəsənət”

(17.05.2024)