​“ASAN Könüllüləri” Təşkilatının “ASAN Məktub” sosial proqramı çərçivəsində “Bilik Karvanı” layihəsinə start verilib.

​“Ədəbiyyat və incəsənət” portalına “ASAN xidmət”dən verilən məlumata görə, Bilik Gününə həsr olunan sosial təşəbbüs həssas qrupdan olan uşaqlara sevinc bəxş etmək, yeni tədris ilinə onları daha da həvəsləndirmək məqsədilə gerçəkləşir.

​Layihənin açılış mərasimində 1, 2 və 3 saylı Uşaq evi sosial xidmət müəssisələrindən 6-14 yaş kateqoriyasındakı 100 uşağa hədiyyələr təqdim olunub.

​Həmçinin iştirakçılar üçün “SİMART” Sağlam İnkişaf Platforması tərəfindən film saatı, “Start IT” şirkəti tərəfindən M-bot futbol, “Bilim Bakı” mərkəzi tərəfindən təbiət mövzusunda laboratoriya və müxtəlif ustad dərsləri təşkil olunub.

 ​ “Bilik Karvanı” layihəsi boyunca Azərbaycanın bir çox bölgəsində 600-dən çox uşağa məktəb çantası, ləvazimətları, kitablar və digər hədiyyələr təqdim olunacaq.

 Xatırladaq ki, “ASAN Məktub” sosial proqramı çərçivəsində indiyədək 10000-dən çox uşağın arzusu reallaşdırılıb. 

 Sponsorlar: “Azərikard” MMC, “Qala Sığorta” ASC;

Dəstəkçilər: Bakı Konqres Mərkəzi, “İnnovasiyalar Mərkəzi”, “SİMART” Sağlam İnkişaf Platforması, “Start IT”, “Bilim Bakı” mərkəzi. 

“Ədəbiyyat və incəsənət”

(05.09.2024)

Azərbaycan Yazıçılar və Jurnalistlər  Birliklərinin, Respublika Qadınlar və Dünya  Türk Qadınları Cəmiyyətinin üzvü, şair-publisist Güləmail Muradın ad günüdür. 

GÜLƏMAİL  MURAD (İsayeva  Güləmayıl  Novruzəli  qızı) 1950-ci ildə Qazax rayonunun Sadıqlı kəndində dünyaya göz açıb. Böyük Kəsik kənd məktəbini 1968-ci ildə fərqlənmə attestatı ilə bitirib və həmin ildə Neft-Kimya İnstitutunun (indiki Azərbaycan Dövlət Neft və Sənaye Universitetinin) neft-mədən fakultəsinə daxil olub. Nümunəvi tələbə kimi Tələbə Elmi Cəmiyyətinə üzv seçilib.

Bədii yaradıcılığa orta məktəb illərindən başlasa da, ilk mətbu şeiri  1969-cu ilin sonlarında Neft-Kimya İnstitutunun “Neft kadrı uğrunda” qəzetində dərc edilib. İlk elmi məqaləsi də  həmin  qəzetdə  dərc olunub.  O məqaləyə görə mükafata layiq görülüb. İlk qonararı da ordan alıb. 1973-cü  ildə ali təhsilini tamamlayıb və əmək fəaliyyətinə başlayıb.  Ali dərəcəli mühəndis-müəllimdir.  

Uzun müddət Gürcüstan Respublikası Qardabani rayonunun  47N-li SPTU-də öz ixtisası üzrə işləyib (1974-1991).  Sonra Bakıya köçüb və müxtəlif elmi müəssisələrdə Ali dərəcəli mühəndis-müəllim kimi fəaliyyət göstərib. Və Azərbaycan Dövlət Neft və Sənaye Universiteti nəzdindəki Neft-Energetika Kollecində ixtisas fənnindən dərs demişdir.

Güləmail Murad ədəbi ictimaiyyətin maraqla qarşıladığı “Güldüm  göynəyə-göynəyə” (2002),  “Sənli-sənsiz” (2006),  “Gecələr  ulduzlar  üstümə  tökülür” (2007), “Qarabağ  harayı” (2009),  “Anasızlıq  fəryadı”  (2010), “Qələmim  əlimdə  lələkdən  idi”  (2010),   “Yazmadıqlarım  qapımı  döyür”  (2012),  “Vətən  sağ  olsun!” (2012), “Balaca  müdrik” (2013),  “Dağlarda  şəhid  səsi”  (2014),  “Günəş qürub edəndə” (2015), “Bir damla yaş” (2016), “Ruhumun qanadları” (2016),  “Qayıdış” (2017), “Aprel döyüşləri” (2018), “Yaddaşlardan gələn səslər” (2018), “Qəhrəmanlıq yüksəkliyi” (2018), “Aprel döyüşləri” -  trilogiya  (2018), “Günnüt zəfəri“ (2019), “Canını vətənə sərhəd elədi...”  (2019), “Zəka çırağı” (2019), “Mən bulud gözlü, sən yağış “ (hayku və vakalar, 2019), “Döyüş yolları” (2020),  “”Akula” ləqəbli kəşfiyyatçı” (2021), “Tovuz döyüşləri” (2021), “Zəfərnamə” (2021), “Vətən uğrunda” (2021),” Boyevıye doroqi” (2022), “Qürur dastanı”(2022), “Nuru Paşa dastanı” (2022), “Cənnətim Şuşa” (2022), “Kadirlidə 4 gün” (2022), “Dədə Anar dastanı” (2023),  “Sən Azərbaycansan”, ”Ağdam kəndi-Qəhrəmanlar diyarı” (2023), “Teymurun səsi” (2023) və “Beş  ulduz” kitablarının müəllifidir. 

Şeirləri  bir neçə xarici dilə tərcümə edilib və kitab şəkilində çap olunub.  “Qarabağ fəryadı” (türkcə, 2010), “Sevgi  dastanı”(fransızca, 2013),  “Dostluq  körpüsü” (ingiliscə və ərəbcə), 2013) və “Döyüş yolları” rus dilində, 2022), “Nuru Paşa dastanı” dörd dilə tərcümə edilb,2023)”, həmçinin”Sən Azərbaycansan” kitabı da 4 dilə, “Kadirlidə 4 gün kitabı Özbək dilinə tərcümə edilib...  Sözlərinə  mahnılar, hərbi marşlar bəstələnib. 

Ən böyük uğurlarından biri  hayku və vakalardan ibarət “Mən - bulud gözlü, sən - yağış” kitabıdır. Azərbaycan  ədəbiyyatında ilk xanım yazardır ki,  yapon janrı olan haykuda -  3 misra və 17 hecada  on bəndlik şeirdə söylənə biləcək  sözünü deyə bilir. Vakaları, tankaları da eynilə...

Azərbaycan  Yazıçılar  və  Jurnalistlər  Birliklərinin,  Respublika  Qadınlar  və  Dünya  Türk  Qadınları  Cəmiyyətinin  üzvüdür.  Dünya  Azərbaycanlılarının  Mədəniyyət  Mərkəzinin  İdarə  Heyətinə  üzv  və  həmin  Mərkəzin Qadınlar  Şurasına  sədr  müavini  seçilib (2007).

Avrasiya Sanat Kültür Edebiyat ve Bilim Federasyonunun, Qazaxıstan-Azərbaycan Dostluq Cəmiyyətinin üzvüdür.

İran İslam Respublikası Beynəlxalq  şeir  festivalının laureatı olub. Fəxri diplom və ödüllərlə təltif olunub. 2006-cı  ildə  “Sənli-sənsiz”  şeir  kitabı  “İlin  lirika  kitabı”  fəxri  diplomuna, “Oskar-Ozan”  Mükafatı  Fəxri  Diplomuna (2009), Eskişehir Şairlər  Dərnəyinin “Onur  Belgesi” diplomuna (2010),  “Dostluq körpüsü” kitabına görə Misir  Mədəniyyət  Mərkəzi tərəfindən Fəxri  fərmana (2010) və Təşəkkürnaməyə (2012), Gürcüstanın  Qardabani  şəhər  3  saylı   məktəbinin  Fəxri  fərmanına (2011)  və Ağstafa  rayon  Mədəniyyət  və  Turizm  şöbəsinin Fəxri  Fərmanına (2012) layiq görülüb.

17 oktyabr 2012-ci ildə Azərbaycan Sərhəd Mühafizəsinin 93-cü ildönümünə həsr olunmuş müsabiqənin ədəbiyyat nominasiyası üzrə Azərbaycanın Milli Qəhrəmanı Eldar Harun oğlu Məmmədovun xatirəsinə yazılmış «Qəhrəmanlıq dərsi” hekayəsi 2-ci yeri tutub, Güləmail Murad mükafat və Fəxri Diplomla təltif edilib. 

Vətənpərvər şeir müsabiqəsinin qalibi, ADSO Xidmətinin keçirdiyi müsabiqənin Az.TV-nin keçirdiyi Vətənpərvərlik mövzusunda ilin ən yaxşı şeiri müsabiqəsinin lauratı olub.

Azərbaycanın Milli Qəhrəmanı Rafiq Alıcanova həsr edilmiş «Vətən sağ olsun» kitabına görə H.B.Zərdabi diplomuna layiq görülüb. Həmin kitab əsasında çəkilmiş sənədli filmə görə 2017-ci ildə Azərbaycan Respublikası Veteranlar Təşkilatı tərəfindən  «General Əliağa Şıxlinski» yubiley medalı ilə təltif olunmuşdur. “Vətənpərvərlik işində xidmətlərinə görə” medala  (2018),  Ordunun yaranmasının 100 illiyi münasibətilə təsis edilmiş “Milli  Ordu-100”  medalına və “Faşizm üzərində qələbəmizin 75 illiyi” medalına layiq görülüb.

Xocalı soyqırımının təbliğ edilməsində və gənc nəslin vətənpərvər ruhda tərbiyə olunmasında fəal iştirak etdiyinə görə Fəxri Fərmanla təltif olunub (2017).

Aprel döyüşlərinə həsr olunmuş «Qayıdış» kitabına görə Azərbaycan Yazıçılar Birliyi tərəfindən Fəxri fərmana layiq görülüb (2017).

ASKEF-Avrasiya Sanat Kültür Edebiyat və Bilim Federsyonunun üzvü, eyni zamanda,  Fəxri diplomçusudur.

“Demokratik Cəmiyyət və Qadın Hüquqlarının Müdafiəsi” İctimai Birliyi Vətənpərvərlik təbliğatında fəal iştirakına görə Fəxri Fərmanla (2022) təltif olunub.   Uluslararası Kadirli Türk Dünyası Kültür ve Sanat Festivalı  KATILMA BELGESİ  (2022), Kaya Haber Ajansı Okurlarına Görə Yılın “Edebiyat Oskarı” mükafatına layiq görülüb.

Dövri mətbuatda xüsusi olaraq  fərqləndiyinə görə «Qafqaz-Media» İctimai Birliyi və ASKEF-in Milli Mətbuat günü münasibəti ilə «Ustad Qələm Sahibi» diplomu ilə (2017), Dünya Ozanlar, Şairler və Yazarlar Derneyinin  (Bursa) “Onur Belgesi”  (2022) ilə təltif olunub.

 BMT yanında Ümumdünya Sülh Federasiyasının üzvü, Sülh Səfiridir (2017).

Yaradıcılıq uğurlarına görə “Xarıbülbül” poeziya diplomu ilə təltif olunub. Türkmen Edebiyatçı və Yazarlar Birliyinin üzvü,  İLESAM (Türkiye İlim və Edebiyat Eseri Sahipleri Meslek birliyinin), “İrak Türkmen Edebiyatçılar Örgütünün üzvüdür.

Beynəlxalq  “Rəsul  Rza”  ədəbi  mükafatına layiq  görülüb (2013).

İstanbulda “Şiir Fırtınası”nın  iştirakçısı olub və “Türk kültürünə, Türk  Edebiyatına vermiş olduğu xidmətlərinə görə” fəxri diplomu ilə  mükafatlandırılıb (2014). Azərbaycan Sərhəd Mühafizəsinin 102-ci ildönümü münasibətilə “Zəfər yürüşlü sərhədçilər” mövzusunda  keçirilən müsabiqədə  ədəbiyyat nominasiyası üzrə birinci yeri tutmuş və I dərəcəli Diplomla təltif olunmuşdur.

27 avqust 2023- cü ildə Qala gecəsində ilin peşəkar yazarı nominasiyalarında ödül mükafatı və Trend Of The Year” 2023 layihəsində peşakar TREND yazar adı verildi.

Türk Dünyası Araşdırmaları Uluslararası İlimler Akademisi (Ankara) tərəfindən Altın Yıldız Madalyası ilə mükafatlandırılıb.

AYB Hərbi-Vətənpərvərlik Komissiyasının üzvüdür (2022).

Yeni Azərbaycan Partiyasının üzvüdür.

Prezident təqaüdçüsüdür. Hazırda Azərbaycan Yazıçılar Birliyinin əməkdaşıdır. Ailəlidir. Üç övladı, 6 nəvəsi var.

“Ədəbiyyat və incəsənət”

(05.09.2024)

Sentyabrın 5-də Bakıda Türk Mədəniyyəti və İrsi Fondunda qırğız yazıçısı Beqijon Ahmedovun Azərbaycan dilinə tərcümə edilmiş “Dərviş” (“Sərgərdan”) kitabının təqdimat mərasimi keçirilib.

AzərTAC xəbər verir ki, Türk Mədəniyyəti və İrsi Fondunun prezidenti Aktotı Raimkulova qonaqları salamlayaraq rəhbərlik etdiyi strukturun Azərbaycan Prezidenti İlham Əliyevin təşəbbüsü və Qazaxıstan, Qırğızıstan və Türkiyənin dövlət başçılarının dəstəyi ilə yaradıldığını diqqətə çatdırıb. O əlavə edib ki, Fondun nizamnaməsi Türk Şurasının 2012-ci il avqustun 23-də Bişkekdə keçirilən sammitində qəbul edilib.

A.Raimkulova qeyd edib ki, yazıçı-pedaqoq, tarixçi, ictimai xadim, o cümlədən təsəvvüf təriqətinin tədqiqatçısı, milli təhlükəsizlik və terrorizmlə mübarizə məsələləri üzrə ekspert, analitik, ehtiyatda olan polkovnik Beqijon Ahmedov türk tarixi irsinin qorunub saxlanmasına öz töhfələrini verir. Müəllif 10-dan çox kitabın və 300-dən artıq məqalənin müəllifi, Qırğızıstan və Özbəkistan Yazıçılar Birliyinin üzvü, Babur adına Dövlət Universitetinin fəxri professorudur.

“2020-ci ilin ən yaxşı kitabı” nominasiyasının qalibi olmuş “Dərviş” kitabının tərcüməçisi Munisə İsmayılovadır. 

Kitabın Bakıda təqdimatının Türkdilli Dövlətlərin Siyasətinə Dəstək Fondunun Bişkekdəki nümayəndəliyi və Qırğızıstan Yazıçılar Birliyinin dəstəyi ilə keçirildiyini qeyd edən Aktotı Raimkulova deyib: “Son illər bu fond Qırğızıstanla çox sıx və fəal əməkdaşlıq edir”. Qırğızıstan xalqını bu yaxınlarda qeyd olunan Qırğız Respublikasının Müstəqillik Günü münasibətilə təbrik edən Raimkulova ötən il fondun görkəmli qırğız yazıçısı Çingiz Aytmatovun 95 illik yubileyi ilə bağlı tədbirlərdə iştirak etdiyini diqqətə çatdırıb. Belə ki, Beynəlxalq Türk Mədəniyyəti və İrsi Fondu Çingiz Aytmatovun “Ana tarla” kitabının nəşrinə dəstək verib, həmçinin onun Bakıda və Bişkekdə təqdimatını təşkil edib.

Sonra Aktotı Raimkulova “Ana tarla” kitabını Qırğızıstan Yazıçılar Birliyinin sədri, ölkənin keçmiş təhsil və elm naziri Kanıbek İmanaliyevə hədiyyə edib.

O, həmçinin bildirib ki, gələn ilin noyabrında qırğız şairi, dramaturq, tərcüməçi Alıkul Osmanovun kitabının da təqdimatı olacaq: “Bunu bütün türk ölkələrində təbliğ etmək bizim üçün vacibdir”.

Fondun rəhbərinin sözlərinə görə, “Divan Lüğət ət-Türk”ün 950 illik yubileyi UNESCO çərçivəsində qeyd olunacaq. Bununla əlaqədar olaraq Fond bu ilin dekabrında Parisdə əsərin təqdimatını keçirməyi planlaşdırır.

“Dərviş”in Azərbaycan dilinə tərcüməçisi Munisə İsmayılova qeyd edib ki, kitabda iqlim dəyişikliyi məsələlərinə toxunulur, eyni zamanda, bütün türk dünyasının tarixini, adət-ənənələrini ehtiva edir.

Qırğızıstan Yazıçılar Birliyinin sədri Kanıbek İmanaliyev kitabın nəşri münasibətilə müəllifi təbrik edib. O, Beqijon Ahmedovun “Dərviş” əsərinin Rusiyada da böyük maraqla qarşılandığını vurğulayıb. Kitabın redaktoruna və Azərbaycan dilinə tərcüməçisinə də təşəkkür edən K.İmanaliyev qeyd edib ki, Bakıya gələnlər şəhərin necə gözəlləşdiyinin şahidi olurlar.

Tədbirin sonunda “Dərviş” kitabının müəllifi Beqijon Ahmedov deyib: “Qonaqpərvər və təmiz Bakını sevməmək mümkün deyil. Mən bir çox qitələrdə olmuşam, amma belə gözəl şəhər görməmişəm. İstər Azərbaycan, istərsə də bütün dünya oxucuları qarşısında böyük məsuliyyət hiss edirəm”.

Tədbirin sonunda tərcüməçi Munisə İsmayılova fəxri fərmanla təltif edilib.

“Ədəbiyyat və incəsənət”

(05.09.2024)

Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti ilə Türk Mədəniyyəti və İrsi Fondu arasında “Azərbaycan Respublikası ərazisində yerləşən tarix və mədəniyyət abidələrinin qorunması və bərpası sahəsində əməkdaşlığa dair Anlaşma Memorandumu” imzalanıb. Sənədi Dövlət Xidmətinin rəisi Səbinə Hacıyeva və Türk Mədəniyyəti və İrsi Fondunun prezidenti Aktotı Raimkulova imzalayıblar.

Nazirlikdən AzərTAC-a bildirilib ki, anlaşma memorandumunun imzalanması ölkəmizin ərazisində yerləşən və dövlət mühafizəsinə götürülmüş tarix və mədəniyyət abidələrinin qorunub saxlanılması, bərpa və konservasiyası, müvafiq istiqamətdə təlimlərin təşkili, eləcə də mədəni irs sahəsində əməkdaşlığın daha da genişləndirilməsi məqsədini daşıyır.

Sözügedən sənəd əsasında ilk olaraq Füzuli rayonunun işğaldan azad olunmuş Qoçəhmədli kəndində yerləşən məscidin bərpasına dəstək göstərilməsi planlaşdırılır.

İmzalanma mərasimində qardaş türk respublikaları ilə bütün sahələrdə münasibətlərin inkişafı, xüsusilə də mədəni əlaqələrin möhkəmlənməsinin sevindirici hal olduğu vurğulanıb. Qeyd olunub ki, Türk Mədəniyyəti və İrsi Fondu da bu istiqamətdə fəal rol alaraq, türk xalqlarının mədəniyyətinin və mədəni irsinin qorunması, təbliği və tanıdılması sahəsinə töhfələr verməkdədir. Azərbaycanın da bu sahəyə xüsusi dəstək göstərdiyi vurğulanaraq, qarşıdakı illərdə əməkdaşlığın daha da dərinləşəcəyinə inam ifadə olunub.

Tədbirdə qarşılıqlı maraq doğuran məsələlər ətrafında fikir mübadiləsi aparılıb.

“Ədəbiyyat və incəsənət”

(05.09.2024)

Yerli bəstəkarların son dövrlərdə yazdığı əsərlər 2024-2025-ci dərs ilindən başlayaraq musiqi və incəsənət məktəblərinin tədris proqramına daxil ediləcək. Mədəniyyət Nazirliyi və Azərbaycan Bəstəkarlar İttifaqının nümayəndələri arasında keçirilmiş görüşdə bununla bağlı müzakirə aparılıb.

“Ədəbiyyat və incəsənət” Mədəniyyət Nazirliyinə istinadən xəbər verir ki, bu prosesin vaxtaşırı davam etdirilməsi, yeni bəstələrin müvafiq təhlillər aparıldıqdan sonra proqramlara əlavə edilməsi ilə əlaqədar razılığa gəlinib.

Mədəniyyət Nazirliyinin dəstəyi ilə Azərbaycan Bəstəkarlar İttifaqı tərəfindən hazırlanacaq not nümunələri sistemli şəkildə həm elektron daşıyıcılarda, həm də kağız formatında sözügedən məktəblərə təqdim olunacaq.

Proqrama salınacaq nümunələr arasında Firəngiz Əlizadənin "Zəfər marşı", Elnarə Dadaşovanın fortepiano üçün pyesləri, Adilə Yusifovanın fortepiano üçün pyesləri və "Yaz nağılı" kantatası, həmçinin Sərdar Fərəcov, Faiq Nağıyev, Mehriban Əhmədova, Zabitə Məmmədova, Cahangir Zülfüqarov, Pikə Axundova, İlahə Qismət və digər bəstəkarların uşaqlar üçün əsərləri yer alır.

Bu təşəbbüsün əsas məqsədi yeni nəsil musiqiçilərin milli və müasir musiqi üslublarını mənimsəməsini təmin etmək, eyni zamanda müasir dövr bəstəkarların yaradıcılığının təbliğinə dəstək olmaqdır.

Yenilənmiş tədris proqramı sayəsində musiqi və incəsənət məktəblərinin şagirdləri rəngarəng repertuarla tanış olaraq bu sahədə bilik və bacarıqlarını daha da inkişaf etdirəcəklər.

“Ədəbiyyat və incəsənət”

(05.09.2024)

VI çağırış Milli Məclisin Mədəniyyət Komitəsinin sədri Fazil Mustafa Əməkdar incəsənət xadimi, görkəmli şair-dramaturq Hidayət Orucovu 80 illik yubileyi ilə bağlı təbrik edib.

“Ədəbiyyat və incəsənət” xəbər verir ki, təbrik məktubunda deyilir:

“Hörmətli Hidayət müəllim,

Sizi - tanınmış ədəbiyyat, incəsənət və dövlət xadimini 80 illik yubileyinizlə bağlı təbrik edir, möhkəm can sağlığı diləyirəm!

Siz 80 il bundan öncə Qərbi Azərbaycanın Meğri elinin Maralzəmi kəndində dünyaya göz açmış, bütün yaradıcılığınız boyu, doğma el-obanın, ümumən Qərbi Azərbaycanda yaşayan soydaşlarımızın duyğu-düşüncələrini, yaşantı və həqiqətlərini bütövlükdə Azərbaycana, dünya azərbaycanlılarına və sonra Türk dünyasına daşımısınız.

Siz 1968-ci ilin iyul ayında C.Cabbarlı adına İrəvan Dövlət Azərbaycan Dram Teatrının direktoru təyin olunmuş, fasiləsiz olaraq 16 il bu sənət ocağına başçılıq etmisiniz.

1984-cü ildə Bakıya köçərək, o dönəmlər öz nüfuz ilə seçilən “Gənclik” nəşriyyatında çalışmış, nəşriyyatın baş redaktor müavini (1984-86), sonra baş redaktoru (1986-1992) vəzifəsində işləmisiniz. Sizin başçılığınız dönəmində “Gənclik”də, böyüməkdə olan nəsillər üçün dəyərli kitablar, o cümlədən Azərbaycan klassik ədəbi irsi, folkloru və s. peşəkarlıqla hazırlanıb, nəşr edilib. Baş redaktor olduğunuz vaxt, “Gənclik” nəşriyyatında 50 cildlik “Dünya Uşaq Ədəbiyyatı Kitabxanası”nın nəşri respublikamızın kitab mədəniyyəti tarixində önəmli hadisə olub. Sizin təşəbbüsünüz, rəhbərliyinizlə 15 cildlik “Azərbaycan folkloru”, 25 cildlik “Macəra və fantastika” və b. çoxcildliklərin, bir sıra önəmli seriyaların nəşrinə başlanılıb.

Siz ədəbiyyat, incəsənət, kitab mədəniyyəti məsələləri, millətlərarası bağlar, din, milli-mənəvi dəyərlər haqqında, habelə tarixi keçmişimiz, türk xalqlarının deportasiyası və soyqırlarımına, çağımızın qayğılarına həsr olunmuş onlarla irihəcmli məqalə ilə çıxış etmisiniz. Sizin “Heydər Əliyev və Azərbaycanda milli siyasət” monoqrafiyanız ingilis, rus, gürcü, ərəb dillərində, qardaş türkcələrdə də yayınlanıb.

Pyesləriniz Azərbaycanda, eləcə də, ölkədışında ünlü teatrların səhnəsində uğurla oynanılır.

Onlarla poeziya, nəsr, publisistika, tərcümə və b. kitablarınız, o cümlədən əsərlərinizin səkkiz cildliyi gün üzü görüb.

Əsərləriniz 30-dan çox dilə çevrilərək, yayınlanıb.

Tərcüməçilik fəaliyyəti Sizin yaradıcılığınızda özəl yer tutur; ingilis, island, rus, şotland, gürcü və b. xalqların, o cümlədən qardaş xalqların ədəbiyyatından çevirdiyiniz poeziya, nəsr, dram örnəkləri dövri mətbuatda, toplularda və ayrıca kitab şəklində gün üzü görüb, böyük maraq doğurub.

Siz Azərbaycan Respublikası Prezidentinin Millətlərarası münasibətlər üzrə müşaviri (01.08.1992–1993), Azərbaycan Respublikasının Milli siyasət məsələləri üzrə Dövlət müşaviri (1993–2005), Milli azlıqlarla və Dini qurumlarla İş üzrə Dövlət müşaviri (2005–2006), Dini qurumlarla İş üzrə Dövlət Komitəsinin sədri (25.07.2006–31.05.2012), Azərbaycan Respublikasının Qırğız Respublikasında Fövqəladə və səlahiyyətli səfiri  (27.12.2012–06.10.2021) kimi önəmli vəzifələr daşımısınız.

Dövlətimiz Sizin uzunmüddətli, səmərəli yaradıcı, ictimai və dövləti xidmətlərinizi yüksək qiymətləndirib; Azərbaycan Respublikası Prezidentinin Fəxri diplomu, “Şöhrət” ordeni, 2-ci dərəcəli “Vətənə xidmətə görə” ordeni ilə, bir sıra digər mükafatlarla, habelə  Gürcüstanın “Ləyaqət” ordeni ilə təltif olunmusunuz.

Sizi yubileyinizlə bağlı bir daha təbrik edir, ən xoş diləklərimizi yetirirəm”!

“Ədəbiyyat və incəsənət”

(05.09.2024)

Antalya Mərkəzi Kitabxanasının Azərbaycan kitabxanaları ilə əməkdaşlığı müzakirə edilib, kitabxanaya Azərbaycana dair nəşrlər hədiyyə edilib. 

Türkiyənin müstəqilliyinin 100-ci ildönümü münasibəti ilə inşa edilən və 2023-cü ildə açılışı reallaşdırılan Antalya Kitabxanası regionunun ən böyük kitabxanasıdır. 1 milyon kitab fonduna və eyni anda 2500 nəfərə xidmət göstərmək imkanlarına malik Antalya Kitabxanası şəhərin tələbə kontingentinin daha çox məskunlaşdığı Akdeniz Universitetinin yaxınlığında yerləşir və müasir kitabxana-informasiya konseptinə uyğun qurulub. 

Türkiyədəki Səfirliyimizin nəzdindəki Azərbaycan Mədəniyyət Mərkəzinin direktoru Samir Abbasov Antalyada keçirilən “Azərbaycan mədəniyyəti və sənəti günü” tədbirləri çərçivəsində bölgənin ən böyük elm, informasiya mərkəzi olan Antalya Kitabxanasını ziyarət edərək, kitabxananın direktoru Oğuzhan Ceylanla görüşüb. 

Mərkəzdən “Ədəbiyyat və incəsənət” portalına verilən məlumata görə, Antalya Böyükşəhər Bələdiyyə başkanı müavini Evrim Yalçın, şəhərdəki Azərbaycan Mədəniyyət və Həmrəylik Dərnəyinin müdiri Azər İsmayıl və Azərbaycan nümayəndə heyətinin digər üzvlərinin də iştirak etdiyi görüşdə Azərbaycan kitabxanaları ilə əlaqələrin qurulması, iki tərəf arasında “qardaşlaşmış kitabxanalar” layihəsinin reallaşdırılması, qarşılıqlı səfərlərinin təşkili, birgə layihələrin həyata keçirilməsi, Antalya kitabxanasında “Azərbaycan fondu”nun, “Türk dünyası guşəsi”nin yaradılması, Azərbaycan mədəniyyətinin tanıdılması məqsədi ilə ilin bir gününün Azərbaycana həsr olunması və kitabxanada “Azərbaycan günü”nün keçirilməsi, Azərbaycan yazarları ilə görüşlərin və onların əsərlərinin təqdimatlarının təşkili və b. məsələrə dair müzakirələr aparılıb, razılıqlar əldə olunub.  

Görüşdə məlumat verilib ki, Antalya şəhərində Kəpəz Bələdiyyəsi sisteminə aid edilən kitabxanada əhalinin bütün təbəqələri, həmçinin fiziki qüsurlu insanlara da xidmət göstərilir. Qeyd edək ki, Antalya kitabxanası ilin 365 günü, günün isə 24 saatını sürüşkən qrafiklə fasiləsiz çalışır. 

Sonda Azərbaycan dövlətçiliyi, tarixi, mədəniyyəti və ədəbiyyatına dair Azərbaycan və Türk dillərində nəşrlər Antalya Kitabxanasına hədiyyə edilib.

“Ədəbiyyat və incəsənət”

(05.09.2024)