Super User
“Hər qəbir bir günəşin batdığı yerdir” (Cavid Qasımov) - SW ekspertlərinin seçimi
Ədəbiyyatımızın həm ölkə daxilində, həm beynəlxalq miqyasda təbliğinə yönələn, gənc yazarların yaradıcılığına dəstək məqsədi güdən Beynəlxalq Silkway ədəbiyyat festivalının (Silkway International Literary Festival) Azərbaycan turunun final mərhələsinə sayılı günlər qaldı.
Silkway International Writers Union təsisatının təşkilatçılığı, Azərbaycan Respublikası Mədəniyyət Nazirliyi yanında İctimai Şuranın, Dünya Gənc Türk Yazarlar Birliyinin, “Azərkitab” Kitab Təbliğatı Mərkəzinin, “Şahdağ Quba Truskavets” Sanatoriyasının təşkilati dəstəyi, “Ədəbiyyat və incəsənət” portalının informasiya dəstəyi ilə keçirilən və devizi “Sonda ədəbiyyat qalib gələcək” olan festivalın əsas favoritləri ilə oxucuları tanış etməkdəyik.
Cavid Qasımov
1996- cı ilin 28 fevralında Lənkəran rayonunun Şağlaser kəndində anadan olub. Hazırda ADMİU-nin nəznində olan Humanitar kollecin "Bədii yaradıcılıq " fakültəsində 4- cü kurs tələbəsidir. Nigar Həsənzadənin rəhbərlik etdiyi "Söz" ədəbi birliyinin üzvüdür.
Cavid poeziyamızda yeni tapıntıdır. Xüsusən çox adamın cürət etməyib yan keçdiyi qəzələ müraciət etməsi, özü də kifayət qədər uğurla müraciət etməsi onun özəlliyidir.
Pəncərə
Yolum məni bu evə necə gətirdi, Allah?
Bu ev kimin evidir, mən hara bu ev hara?
Bu sahibsiz otaqlar yetimdirlər, elə bil
Az qalır qonağa da getmə deyib yalvara.
Açdım pəncərəsini havasını dəyişsin,
Bir anda pəncərəsi keçmişinə açıldı.
Azyaşlı qız uşağı əlində oyuncaqla
Vətən boyda həyətin ortasında qaçırdı.
Ondan bir az qıraqda atasıyla anası
Masanın ətrafında danışırdı, gülürdü.
Tanrının göylərindən yerə boylanan günəş
Həyət adamlarını şəfəq-şəfəq güdürdü.
Sataşdı gözlərimə məktəbli gündəliyi,
Baxdım, yazılmayıbdır arxada "qan yaddaşı".
İstədim ölkəm boyu sevincimdən qışqıram,
Mənə “sus” dedi evin həm divarı, həm daşı.
Günəşin şəfəqləri o an qana bələndi.
Mərmi-mərmi dəyişdi otağın mənzərəsi.
Allah, Sən olmasaydın xəcalətdən ölərdim,
Məni öldürməsəydi otağın pəncərəsi!
Tapşır
Əgər gedirsənsə, bir xahişim var,
Məni bu sevgini bilənə tapşır.
Taleyi yazana tapşırma məni,
Yazılan taleyi silənə tapşır.
Sənə də bir lənət düşməmiş yeri..
Nə var ki boylanıb baxasan geri..
Olmasın bu eşqin ağlamaq yeri,
Baxıb oğrun-oğrun gülənə tapşır.
Suyu quruyarsa bulaqlarımın,
Çatı səngər olsa dodaqlarımın,
Nəfəsi kəsilsə ayaqlarımın,
Məni yollarında ölənə tapşır.
Tüstü
Bu məhəbbət atəşindən mənə düşdü qarə tüstü,
Məni-bəxtiqarədən də çıxacaq dübarə tüstü.
Ayağı üzüldü yerdən, başı çatdı asimanə,
Çəkilibdi hansı eşqin cavabında darə tüstü?
Ürəyim xəyalın i(y)lə o qədər alovlanıb ki,
Verəcəkdi harda olsan evimi işarə tüstü.
Dedilər ki, yandırarsan məni öz cəhənnəmində,
Dedim onda hicr(ı) bitdi, çatacaqdı yarə tüstü.
Üzünü o gah(ı) sağdan öpür indi, gah(ı) soldan,
Bunu xəlq(ı) gördü, sandı, edir istixarə tüstü.
Mən öləndə hamı bir-bir çığırar ki, mö'cüzəymiş,
Hələ kimsə olmamışdı, qoyula məzarə tüstü .
Mənə qarşı ölmüş eşqin qoyulubdu hansı qəbrə,
Olunubdu qarət altı, olunubdu qarət üstü.
Sözün atəşində Cavid isinəndə qış günüydü,
Nə biləydi bəxtiqarə, çıxacaq baharə tüstü.
Vallah
Hər qəbir bir günəşin batdığı yerdir, Vallah.
Günəşin mənzilinə çatdığı yerdir, Vallah.
Gəl gedək mənlə bu dünyadən, əzizim, buralar
Şeytanın adəmi oynatdığı yerdir, Vallah.
Ağ varaqlarda doğulmaqla ölür misralar,
Bu varaqlar əcəlin yatdığı yerdir, Vallah.
Gəzib axtarma görüşçün təzə yer, ən gözəli
Məni öz bəxtimin aldatdığı yerdir, Vallah.
Bu ömür ki dolaşıq düşdü, mən ondan bilirəm
Fələyin çarxını fırlatdığı yerdir, Vallah.
Süpürür yaşlı qadın bir küçədən keçmişini,
Elə bil ki, onun öz atdığı yerdir, Vallah.
Parçalanmış ürəyim sevgimizin səngəridir,
Həm də gizlin məni ağlatdığı yerdir, Vallah.
Torpaq ömrün qoca piştaxtasıdır, bir əcəlin
Can alıb burda sümük satdığı yerdir, Vallah.
Gözlərim hər gecə göydə yanan ulduzlar üçün
Su içib, özlərin islatdığı yerdir, Vallah.
Gözlənilməz qonağın ev qapısın döyməsi də
Ölümü san ki xatırlatdığı yerdir, Vallah.
Uyma, Cavid bu qəzəldə nə qədər and içsə,
Aləmi bir-birinə qatdığı yerdir, Vallah.
Şuşada latviyalı rəssamın “Qarabağ atları” adlı rəsm sərgisi açılıb
Şuşada latviyalı xanım rəssam Dase Ştrausanın “Qarabağ atları” adlı rəsm sərgisinin açılışı olub.
“Ədəbiyyat və incəsənət” portalı ArərTAC-a istinadən xəbər verir ki, sərgi Latviyanın Azərbaycandakı səfirliyi tərəfindən təşkil olunub.
Azərbaycanda səfərdə olan Latviya Respublikasının Baş nazirinin müavini, müdafiə naziri Artis Pabriks sərginin açılışında iştirak edib.
Rəsm sərgisinin açılış mərasimində çıxış edən Latviyanın Azərbaycandakı müvəqqəti işlər vəkili xanım Viya Buşa ölkəsi ilə Azərbaycan arasında əlaqələrin bir çox istiqamətdə, o cümlədən humanitar sahədə inkişaf etdiyini bildirib. Bu əlaqələrin tarixən mövcud olduğunu vurğulayan V.Buşa qeyd edib ki, dünyaşöhrətli latviyalı rəssam Yuli Straume 1907-1923-cü illərdə Şuşada yaşayıb, burada dərs deyib. O, öz əsərlərində Qarabağ ornamentlərindən istifadə edib.
Tədbirdə çıxış edən xanım rəssam Dase Ştrausa Qarabağda, Şuşada olmaqdan məmnunluğunu, Qarabağ atlarının gözəlliyinə heyranlığını bildirib: “Mən bundan sonra da Qarabağ atlarını çəkəcəyəm. Onların gözəlliyini və möhtəşəmliyini bütün dünyaya göstərmək istəyirəm”.
Latviya Baş nazirinin müavini, müdafiə naziri Artis Pabriks qeyd edib ki, at dostluq, azadlıq və müdriklik rəmzidir. Bu sərgi Azərbaycanın Şuşa şəhərinə qayıdışının, sülhün və sabitliyin göstəricisidir.
Şuşada görülən bərpa-quruculuq işləri ilə tanış olan qonaq deyib: “Burada həyata keçirilən bərpa işləri ilə tanış oldum. Görülən işlər məni valeh etdi”.
Tədbirdə “Vətən” musiqi qrupunun ifası dinlənilib.
Səfər çərçivəsində Latviya Baş nazirinin müavini, müdafiə naziri Artis Pabriksin rəhbərlik etdiyi nümayəndə heyəti Şuşanın tarixi məkanları ilə tanış olub. Qonaqlara Ermənistanın işğalı zamanı dağıdılmış binalar, o cümlədən Xanqızı Xurşidbanu Natəvanın evi barədə məlumat verilib. Latviya nümayəndə heyətinin üzvləri bərpa prosesində olan Gövhər Ağa məscidi, bərpa olunmuş Şuşa qalası, Xalq artisti Bülbülün ev-muzeyinə baxıb və Cıdır düzündə olublar.
AYB-nin yeni mükafatları təqdim olunub
525.az xəbər verir ki, Azərbaycan Yazıçılar Birliyi qədim Qarabağın şanlı tarixinə, işğal illərinin müsibətlərinə, 44 günlük müharibəyə və möhtəşəm zəfərimizə həsr olunmuş bədii əsərlərə veriləcək mükafatlar – poeziya üzrə Əhməd Cavad mükafatı, nəsr və dramaturgiya üzrə İlyas Əfəndiyev mükafatı təsis edib.
Bu il Əhməd Cavad mükafatına «Vətən» poemasının müəllifi şair Ramiz Qusarçaylı, İlyas Əfəndiyev mükafatına Qarabağ mövzusunda povestlərinə görə yazıçı Aqil Abbas layiq görülüb.
Dəyərli ədiblərimizi mükafatlara layiq görülmələri münasibətilə təbrik edir, yeni yaradıcılıq uğurları arzulayırıq.
Xoreoqrafiya Akademiyasının buraxılış hesabat konserti anşlaqla keçib
Bakı Xoreoqrafiya Akademiyası (BXA) orta ixtisas təhsil pilləsinin Azərbaycan Dövlət Akademik Opera və Balet Teatrında buraxılış hesabat konserti keçirilib. Bu barədə “Ədəbiyyat və incəsənət” portalı Mədəniyyət Nazirliyinə istinadən məlumat verir.
Konsertdə Azərbaycanın Rusiyadakı fövqəladə və səlahiyyətli səfiri, Xalq artisti Polad Bülbüloğlu, Mədəniyyət nazirinin müavini Sevda Məmmədəliyeva, Xalq artisti Roza Cəlilova və digər mədəniyyət və ictimaiyyət nümayəndələri, gənc fəallar, media nümayəndələri və tələbələr iştirak ediblər.
Buraxılış hesabat konsertində BXA-nın tam orta təhsil pilləsinin şagirdlərinin ifasında F.Mendelsonun Marş “Polonez”(müəllim: Əməkdar müəllim Aqallıyay Pellumb), klassik bölmənin məzunu Fərəh Əzimlinin ifasında L.Delibin “Vals”( məllim: Əməkdar artist Rimma İskəndərova), klassik bölmənin məzunları Şahanə Cəfərova və Mansur Məmmədovun ifasında F.Burqmüllerin R.Driqo “Jizel” baletinden Pa De Deux ( müəllim: Əməkdar artist Rimma İskəndərova, Zaur Fətulla), klassik bölmənin məzunu Aliyə Salahovanın ifasında B.Asafyev “Baxçasaray fəvvarəsi” baletindən Zaremanın monoloqu (müəllim: Əməkdar artist Rimma İskəndərova), klassik bölmənin məzunu Aslanə Əliyevanın ifasında R.Qliyerin “Qırmızı Lalə” baletindən Tao Xoa variyasiyası (müəllim: Əməkdar artist Rimma İskəndərova), qızlardan ibarət xalq bölməsinin I, II, III kurs tələbələri, solist Aysun Naibovanın ifasında E.Mansurovun “Qaval ilə rəqs” (müəllim: Əməkdar artist Səbinə Qasımova), klassik bölmənin məzunları Məryam Şabakayeva, Rəşad Rəhimovun ifasında P.Çaykovskinin “Yatmış gözəl” baletindən Pas De Deux (müəllim: Əməkdar artist Rimma İskəndərova, Zaur Fətulla), klassik bölmənin məzunlarının ifasında P.Çaykovskinin “Sonalar gölü” baletindən İspan rəqsi (müəllim: Zaur Fətulla), xalq bölməsinin məzunları Aysun Naibova, Nəzrin Qurbanzadə və Fidan Daşdəmirovanın ifasında E.İbrahimovanın “Sən yadıma düşəndə”( müəllim: Əməkdar artist Səbinə Qasımova), klassik bölmənin məzunları Səbinə Məmmədova və Azərbaycan Dövlət Akademik Opera və Balet teatrının solisti, 2005-ci il məzunu, Əməkdar artisti Makar Ferştandtın ifasında A.Adan “Jizel” baletindən Pas De Deux (müəllim: Əməkdar artisti Rimma İskəndərova), klassik bölmənin məzunu Aslanə Əliyeva və bakalavr təhsil pilləsinin tələbələrinin ifasında “Qaytağı” rəqsi (müllim: Xalq artisti Cəmilə Bayramova), oğlanlardan ibarət xalq bölməsinin I, II, III kurs tələbələri, solist Zeynal Abasovun ifasında “Şələqoy” rəqsi (müəllim: Tuncay Hüseynov), xalq bölməsinin II, III kurs tələbələrinin ifasında Korea rəqsi (müəllim: Əməkdar artist Viktoriya Şahmuradova), klassik bölmənin məzunu Səbinə Məmmədova və SSR-i Xalq artisti, professor Leyla Vəkilovanın 1996-cı il buraxılışının tələbəsi, Əməkdar artist Samir Səmədovun ifasında Dyuk Ellingtonun “Mənim ol” (quruluşçu xoreoqraf: Əməkdar artist Tamilla Məmmədova), xalq bölməsinin II, III kurs tələbələrinin ifasında “Türk rəqsi” ( müəllim: Əməkdar artist Viktoriya Şahmuradova), klassik bölmənin məzunu Nərgiz Abdullayeva, Azərbaycan Dövlət Akademik Opera və Balet teatrının Solisti, 2012-ci il məzunu Timur Oduşev və tam orta təhsil pilləsinin şagirdlərinin ifasında L.Minkusun “Don Kixot” baletindən Qrand Pas (müəllimlər: Əməkdar artisti Rimma İskəndərova və Əməkdar mədəniyyət işçisi Lyudmila Qutlyanskaya), xalq bölməsinin I, II, III kurs tələbələrinin ifasında V.Adıgözəlov, S.Ələsgərov “Bayram suitası” (müəllim: Tuncay Hüseynov), klassik bölmənin I, III kurs tələbələri, solistlər məzun Nərgiz Abdullayeva və I kurs tələbəsi Teymur Nurməmmədovun ifasında S.M.Braverinin “Nəbz” və “Müasir rəqs” kompozisiyası (müəllim: Yelena Çernousova) xalq bölmənin I, II, III kurs tələbələrinin ifasında Ü.Hacıbəylinin “Koroğlu” (müəllim: Xalq artisti Yusif Qasımov) rəqsləri ifa edilib. Konsertin bədii rəhbəri, BXA-da rektor vəzifəsini müvəqqəti icra edən, Əməkdar artist Nailə Məmmədzadədir.
Qeyd edək ki, konsert izləyicilər tərəfindən böyük anşlaqla keçib.
"Azerbaijan Design Award" müsabiqəsinə qoşulmaq üçün son 2 gün!
Azərbaycan Respublikası Mədəniyyət Nazirliyinin dəstəyi və Azərbaycan Dizayn Assosiyasiyasının təşkilatçılığı ilə keçirilən "Azerbaijan Design Award" müsabiqəsinə layihələrin qəbulu davam edir.
Layihələrin qəbulu üçün son gün 30 aprel 2022-ci il tarixidir.
Azərbaycanın ən böyük dizayn müsabiqəsi olan “Azerbaijan Design Award” layihəsi ölkənin ən böyük canlı dizayn auditoriyasını özündə cəmləmişdir və ölkədə dizayn sahəsinin inkişafı istiqamətində görülən işlərə böyük töhfə verir.
Yaradıcı şəxslər üçün tamamilə ödənişsiz təşkil olunan müsabiqə ölkədə dizayn bacarıqlarını inkişaf etdirmək və istedadlı şəxsləri üzə çıxarmaq məqsədini daşıyır.
Müsabiqənin şərtləri: https://azerbaijandesignaward.com/about
Qeydiyyat üçün keçid: https://azerbaijandesignaward.com/register
Müsabiqə haqqında ətraflı məlumat: https://azerbaijandesignaward.com/jury
"Ulduz"un aprel sayı “Ədəbiyyat və incəsənət” portalı ilə birgə hazırlanıb
"Ulduz" jurnalının aprel sayı işıq üzü görüb. “Ədəbiyyat və incəsənət" portalı ilə birgə hazırlanmış dərginin bu sayı məşhur italyan psixoterapevt Rafael Morellinin məsləhət və nəsihətləri ilə açılır.
“Üzbəüz" rubrikasında gənc şair İntiqam Yaşarın AYB-nin sədr müavini, şair Rəşad Məcidlə müsahibəsi yer alıb. Yazıçı Varisin "Adajio, Adajio, birdən Alleqro" essesi fəsillərin etüdlərindən ibarətdir. Rüfət Rzayevin tərcüməsində "Ayın enişi"( Moonfall) filmi ilə gündəm qazanan dünyaca məşhur rejissor Ronald Emmerixin müsahibəsi və sensasion "Networking" kitabından bəhs edən yazı təqdim edilir.
Tarixin ən yaxşı filmləri "IMDB"-nin versiyası üzrə tərtib edilib. "Teatr" rubrikasında Bahəddin Salmanın təqdimatında Əməkdar artist Sənubər İsgəndərlinin, "Musiqi" rubrikasında Aysel Kərimin təqdimatında Əməkdar artist, Prezident mükafatçısı Fərqanə Qasımovanın müsahibəsi yer alıb. Bahəddin Salmanın digər müsahibəsində isə gənc impressionist rəssam Nazilə Fərzullayeva söhbətə çəkilir.
“Kitab rəfi" rubrikasında dünyada ən çox oxunan kitabların reytinqtinə nəzər salınır. 260 IQ göstəricisinə malik dünyanın ən ağıllı insanı Uilyam Saydişin faciəli taleyini dərginin "Talelər" rubrikasında oxuya biləcəksiniz. Nərgiz Cabbarlının "Tənhalıq cəhənnəminin qurbanları" başlıqlı yazısı Yaponiya yazıçısı Rünoske Akutaqavanın həyat və yaradıcılığından bəhs edir. Sevgidə uğur qazanmağın yolları Əlibala Məhərrəmzadənin "Sevgidə uğur qazanmaq üçün nə etməli?" motivasiya yazısında geniş təhlil edilib. "Nəsr" rubrikasında Habil Yaşarın "Qaranlığı yazanın gecəsi" adlı hekayəsi ilə, "Poeziya" rubrikasında isə İqbal Nəhmətin şeirləri ilə tanış olacaqsınız.
Polşa şairəsi Halina Posviatovskanın şeirlərini gənc şair Ümid Nəccari dilimizə çevirib. Mahirə Hüseynovanın "Həqiqət pıçıltılarının poeziyası" sərlövhəli yazısında Hidayət Orucov yaradıcılığının mühüm istiqamət və çalarları diqqətə çatdırılır.
Mediator və yazıçı Zamiq Abdullayevin yazısı özündə mediasiya ilə bağlı mühüm bilgiləri ehtiva edir. Nəhayət, "Dərgidə sərgi" rubrikasını gənc rəssam Ofelya Hüseynzadəni rəsmləri bəzəyir.
Günün fotosu: “Biz SSRİ-ni istəmirik”
Günün fotosu: “Biz SSRİ-ni istəmirik”
Kiyevin meri Viktor Kliçko deyib bu sözləri. Keçmiş idmançı Ukraynanın gələcəyini Avropa Birliyində gördüyünü söyləyib.
Foto: Euronews
Gənc muğam ifaçıları “Şuşa İli”nə həsr olunmuş konsert proqramı təqdim edib
Bakı Şəhər Mədəniyyət Baş İdarəsinin A.M.Şərifzadə adına Mədəniyyət Mərkəzi və H.Abbasov adına Mədəniyyət Mərkəzi birlikdə gənc muğam ifaçılarının iştirakı ilə “Şuşa İli”nə həsr olunmuş tədbirlər keçirib.
İdarədən bildirilib ki, Tədbirdə Baş İdarənin rəisi İbrahim Əliyev, müəssisə rəhbərləri, rayon ictimaiyyətinin nümayəndələri, qəsəbə sakinləri iştirak ediblər.
Konsertdə gənc muğam ifaçıları - Azərbaycan Dövlət Akademik Opera və Balet Teatrının solisti Mütəllim Dəmirov, IV Muğam Müsabiqəsinin qalibi Sərxan Bünyadzadə, IV Muğam Müsabiqəsinin laureatı Nüşabə Kərimli, Asəf Zeynallı adına musiqi kollecinin tələbələri Gəray Qarayev, Daşqın Kürçaylı, Milli Konservatoriyanın müəllimi Nurlan Cəbizadə, Milli Konservatoriyanın tələbəsi Səyyar Teymurov, A.M.Şərifzadə adına Mədəniyyət Mərkəzin əməkdaşı Fərid Babayev çıxış ediblər.
SW festivalı iştirakçılarının çıxış vaxtları müəyyənləşdi – Ayxan Ayvazdan Ümid Nəccariyədək!
Bildiyiniz kimi, aprel ayının 30-da cənnətməkan Qubada ədəbiyyatın həm ölkə daxilində, həm beynəlxalq miqyasda təbliğinə yönələn, gənc yazarların yaradıcılığına dəstək məqsədi güdən Beynəlxalq Silkway ədəbiyyat festivalının (Silkway International Literary Festival) Azərbaycan turunun final mərhələsi başlayacaq.
Silkway International Writers Union təsisatının təşkilatçılığı, Azərbaycan Respublikası Mədəniyyət Nazirliyi yanında İctimai Şuranın, Dünya Gənc Türk Yazarlar Birliyinin, “Azərkitab” Kitab Təbliğatı Mərkəzinin, “Şahdağ Quba Truskavets” Sanatoriyasının təşkilati dəstəyi, “Ədəbiyyat və incəsənət” portalının informasiya dəstəyi ilə keçirilən və devizi “Sonda ədəbiyyat qalib gələcək” olan festivalın final mərhələsinin 32 iştirakçısının Münsiflər heyəti qarşısında çıxış sıralanması bəlli olub. Azərbaycan ədəbiyyatının istedadlı gənc yazarlarını bir araya gətirəcək festivalda ilk çıxış aprelin 30-da saat 15-də Ayxan Ayvazın, son çıxış isə mayın 1-də Ümid Nəccarinin olacaq. Siyahını təqdim edirik:
1. Ayxan Ayvaz. Nəsr. 30 aprel.
2. Aypara Mehmanova (Aypara Ayxan). Poeziya.30 aprel.
3. Bahəddin Salman. Nəsr. 30 aprel.
4. Cavid Qasımov. Poeziya. 30 aprel.
5. Cavid Zeynallı. Nəsr.30 aprel.
6. Elroman Əlizadə (El Roman). Poeziya. 30 aprel.
7. Elvin Əlizadə. Poeziya. 30 aprel.
8. Elvin İntiqamoğlu. Poeziya. 30 aprel.
9. Emin Əlizadə (Eminquey). Poeziya. 30 aprel.
10. Emin Piri. Poeziya. 30 aprel.
11. Ələsgər Əhmədov (Ələsgər Əhməd). Poeziya. 30 aprel.
12. Faiq Hüseynbəyli. Poeziya.30 aprel.
13. Fərid Hüseyn. Poeziya. 30 aprel.
14. Gülmalı Məmmədov (Səddam Laçın). Poeziya, nəsr. 30 aprel.
15. Gülnar Hüseynova (Gülnar Ümid). Poeziya.30 aprel.
16. Gülay Tahirli. Poeziya.30 aprel.
17. Günel Ağayeva (Günel Balakişi). Poeziya. 1 may.
18. Həsən Zeynallı (Həsən Kür). Poeziya. 1 may.
19. İntiqam Cavanşir (İntiqam Yaşar). Poeziya. 1 may.
20. Mehdi Dostəlizadə. Poeziya. 1 may.
21. Murad Muradov. Nəsr. 1 may.
22. Nadir Rzalı (Nadir Yalçın). Nəsr. 1 may.
23. Nərgiz İsmayılova (Nargis). Nəsr. 1 may.
24. Nigar Ağalarova (Nigar Arif). Poeziya. 1 may.
25. Orxan Həsənov (Orxan Həsəni). Nəsr. 1 may.
26. Ramil Əhməd. Poeziya. 1 may.
27. Rəvan Cavid. Poeziya. 1 may.
28. Ruslan Cahangirli (Ruslan Dost Əli). Poeziya. 1 may.
29. Təvəkgül Boysunar. Nəsr. 1 may.
30. Tural Cəfərli. Poeziya. 1 may.
31. Ulucay Məmmədov (Ulucay Akif). Poeziya. 1 may.
32. Ümid Nəccari. Poeziya. 1 may.
Bakı Gənclər Mərkəzində “Qəlblərin harmoniyası” adlı Azərbaycan və dünya rəqsləri festivalı keçirilib
“Uşaq və Yeniyetmələrə Dəstək” İctimai Birliyinin təşəbbüsü ilə Bakı Gənclər Mərkəzində “Qəlblərin harmoniyası” adlı Azərbaycan və dünya rəqsləri festivalı keçirilib.
29 aprel - Beynəlxalq Rəqs Gününə həsr olunmuş festival çərçivəsində ölkədə fəaliyyət göstərən uşaq və gənclərin rəqs kollektivlərinin iştirakı ilə müxtəlif rəqs kompozisiyaları nümayiş olunub. Rəqs kompozisiyaları münsiflər - Xalq artistləri Eldar Mansurov və Cəmilə Bayramova, Əməkdar artist Etibar Zeynalov, Mədəniyyət Nazirliyinin nümayəndəsi Kənan Tağızadə və ritm ifaçısı Cəfər Həsənov, eləcə də rəqqasə-pedaqoq Səbinə İsmayılova tərəfindən qiymətləndirilib.
Qeyd edək ki, birliyin sədri Fərhad Abdulov festivalın təşkilində əsas məqsədin uşaq və gənclərin yaradıcı potensiallarının üzə çıxarılması və stimullaşdırılması, həmçinin rəqs sənətinin mədəni-sosial müxtəlifliyə baxmayaraq insanlar arasında emosional özünüifadə forması olduğuna, eləcə də dil baryerini aşaraq qəlblər arasında harmoniya yaratmasına diqqət çəkmək olduğunu vurğulayıb.
