Gürcüstan paytaxtı Tbilisidə böyük Azərbaycan şairi Əhməd Cavadın anadan olmasının 130-cu ildönümünə həsr olunan “Ölməz qələm cəngavəri” adlı tədbir keçirilib.

AzərTAC xəbər verir ki, xatirə gecəsi Tbilisi Şəhər Şurasında (sakrebulo) təşkil olunub. Tədbirin keçirildiyi səhnədə Azərbaycan xalçaları nümayiş etdirilib.

Tədbir Tbilisi meriyasının dəstəyi, sakrebulo və M.F.Axundzadə adına Azərbaycan Mədəniyyəti Muzeyinin birgə təşkilatçılığı ilə reallaşıb. 

Əvvəlcə gürcü kişi xoru Gürcüstanın və Azərbaycanın dövlət himnlərini ifa ediblər. 

Muzeyin direktoru, Azərbaycanın Əməkdar Mədəniyyət işçisi Leyla Əliyeva qonaqları salamlayıb, tədbirin təşkilinə görə, Tbilisi sakrebuluna təşəkkürünü bildirib. 

Sonra Tbilisi şəhər şurasının üzvü Nino Ruxadze çıxış edərək Əhməd Cavadın Gürcüstanla sıx əlaqələrindən danışıb. O, azərbaycanlı şairin Şota Rustavelinin "Pələng dərisi geymiş pəhləvan" əsərini originaldan Azərbaycan dilinə tərcümə etdiyini xatırladıb. Bildirib ki, Əhməd Cavad tərcüməsi ilə oxucuları Gürcüstan mədəniyyəti və dəyərləri ilə tanış edib, ölkəni qədim mədəniyyətli proqressiv və Avropa sivilizasiyasının bir hissəsi kimi göstərib. 

Sakrebulonun sədri Giorgi Tkemaladze çıxış edərək azərbaycanlı şairin yaradıcılığına nəzər salıb, onun xatirəsinə həsr olunan tədbirə ev sahibliyi etməkdən məmnunluğunu bildirib.

Azərbaycanın Gürcüstandakı səfirinin müşaviri Eldar Bayramov Azərbaycan ilə Gürcüstan arasındakı mədəni əlaqələrindən söz açıb, bu cür tədbirlərin münasibətlərimizin daha da möhkəmlənməsində mühüm rol oynadığını bildirib. O, Tbilisidə Azərbaycan mədəniyyətinin qorunması və saxlanılmasına göstərilən diqqəti yüksək qiymətləndirib. 

Sakrebulonun Təhsil və Mədəniyyət Komissiyası Aparatının rəhbəri, yazıçı İrakli Şamatava Ə.Cavadın yaradıcılığı və fəaliyyəti barədə danışıb. Bildirib ki, şair Acarıstanda da yaşayıb və gürcülərin yaxşı dost olduğunu yazıb. Gənc yazıçı qeyd edib ki, Ə.Cavadın həyat yoldaşı Gürcüstandan olub və əsərlərində gürcü xalqına yaxın və xoş münasibəti aydın görünür.

İ.Şamatava, həmçinin bildirib ki, gələn il Gürcüstan və Azərbaycan ədəbiyyatına həsr olunan ikidilli antologiyanın nəşri nəzərdə tutulub.

İvane Cavaxişvili adına Tbilisi Dövlət Universitetinin (TDU) nümayəndəsi, Qafqazşünaslıq Elmi-Tədris İnstitutunun rəhbəri Merab Çuxua çıxışında Gürcüstanda Azərbaycan ədəbiyyatının tədrisindən söz açıb. O deyib ki, universitetdə Azərbaycanşünasılıq proqramına dil, folklor ilə yanaşı ədəbiyyat da daxil edilib. Ə.Cavadın əsərlərinin də proqrama daxil edilməsi nəzərdə tutulub

Tədbirin bədii hissəsində aşıq Nargilə Mehtiyeva rəhbərlik etdiyi “Meydan” aşıqlar qrupu ilə birgə Əhməd Cavadın sözlərinə yazılmış “Gəncədən gəlirəm” mahnısını ifa edib.

Azərbaycanlı uşaqlar şairin "Gürcüstan" şeirindən bəndlər söyləyiblər.

Sonda M.F.Axundzadə adına Azərbaycan Mədəniyyəti Muzeyinin direktoru Leyla Əliyeva sakrebulonun sədri G.Tkemaladzeyə Azərbaycan dilində işıq üzü görmüş "Pələng dərisi geymiş pəhləvan" əsərinin yer aldığı nəfis kitab, Azərbaycan-Gürcüstan mədəni əlaqələrinin güclənməsinə verdiyi böyük töhfəyə görə təşəkkürnamə təqdim edib. 

Xatirə gecəsində Azərbaycanın bu ölkədəki səfirliyinin əməkdaşları, Türkiyənin Gürcüstandakı səfiri Fatma Ceren Yazqan, mədəniyyət və incəsənət, eləcə də ictimaiyyət nümayəndələri iştirak ediblər.

Ötən gün - 5 may 2022-ci il tarixində Azərbaycan Respublikasının Mədəniyyət Nazirliyinin və Gəncə şəhər İcra Hakimiyyətinin dəstəyi, Gəncə Regional Mədəniyyət İdarəsinin təşəbbüsü və F.Əmirov adına Gəncə Dövlət Filarmoniyasının təşkilatçılığı ilə Azərbaycanın görkəmli nümayəndəsi, böyük şair, tanınmış maarifçi və ictimai xadim, Azərbaycan Respublikasının Dövlət Himninin sözlərinin müəllifi Əhməd Cavadın 130 illiyinə həsr olunmuş yubiley tədbiri keçirilib.

“Ədəbiyyat və incəsənət” portalı Mədəniyyət Nazirliyinə istinadən məlumat verir ki, yibiley tədbirində Gəncə Şəhər İcra Hakimiyyətinin başçısı Niyazi Bayramov, Türkiyə Cumhuriyyətinin Gəncədəki Baş konsulu Zəki Öztürk, Gəncə Regional Mədəniyyət İdarəsinin rəisi Vasif Cənnətov, Azərbaycan Dövlət Aqrar Universitetinin rektoru İbrahim Cəfərov, Gəncə Dövlət Universitetinin rektoru Yusif Yusifov, “Cavad xan” Tarix Mədəniyyət Fondunun birinci vitse-prezidenti Müzadil Həsənov, şairin nəvəsi Süleyman Axundzadə, şairin nəticəsi onun adını daşıyan Prezident mükafatçısı Cavad Axundzadə, şairin kötücəsi Nərgiz Əhməd qızı və şairin səcərəsindən olan digərləri, eləcə də şəhər ziyalıları, şəhər ictimaiyyətinin nümayəndələri, mədəniyyət incəsənət işçiləri iştirak ediblər.

İlk öncə Azərbaycanın ərazi bütövlüyü, suverenliyi uğrunda şəhadətə yüksələn Vətən övladlarının əziz xatirəsi bir dəqiqəlik sükutla yad olunub. 

Sonra sözləri Əhməd Cavada, musiqisi dahi Azərbaycan bəstəkarı Üzeyir Hacıbəyliyə məxsus olan Azərbaycan Dövlət himni səsləndirilib.

Gəncə Regional Mədəniyyət İdarəsinin rəisi Vasif Cənnətov çıxış edib. O, ölkə rəhbəri İlham Əliyevin şair Əhməd Cavadın 130 illiyinin qeyd edilməsi haqqında sərəncamını diqqətə çatdırıb. Bildirib ki, 2022-ci ilin may ayında Azərbaycan ədəbiyyatının görkəmli nümayəndəsi, böyük şair, tanınmış maarifçi və ictimai xadim Əhməd Cavadın anadan olmasının 130 illiyi münasibətilə Mədəniyyət Nazirliyi tərəfindən müvafiq sərəncama uyğun olaraq silsilə tədbirlər keçiriləcək. 

Yubiley tədbirində iştirak edən şairin nəvəsi Süleyman Axundzadə, nəticəsi Cavad Axundzadə, kötücəsi Nərgiz Əhməd qızı, “Cavad xan” Tarix Mədəniyyət Fondunun birinci vitse-prezidenti Müzadil Həsənov çıxış edərək Əhməd Cavadın həyatı, ədəbi yaradıcılığı, ictimai-siyasi fəaliyyətindən danışdılar. Yubiley tədbirinin musiqi proqramını F.Əmirov adına Gəncə Dövlət Filarmoniyasının “Xəmsə” estrada ansamblı (bədii rəhbər Şəhriyar Tağıyev) təqdim etdi.

Respublikanın Əməkdar mədəniyyət işçisi, Filarmoniyanın solisti Mehparə Cəfərova məşhur “Çırpınırdı qara dəniz” mahnısını, solistlər İlham Vəlioğlu “Gəncədən gəlirəm”, Əli Məmmədov “Şükriyyə”, Pərvanə Rzayeva “Gəncəm hey”, Rüstəm Cəfərov “Can Azərbaycan”, “Sıravi Əhməd”, Gəncə şəhər Uşaq İncəsənət Məktəbinin “Xəmsə” nağaraçalanlar ansamblı “Türk Azərbaycan Qardaşlığı” (bədii rəhbər Sohrab İbrahimov), Filarmoniyanın “Göygöl” Dövlət Mahnı və Rəqs ansamblı (baletmeyster Sənan Cavadov) “Şalaxo”, “İgidlər” rəqslərini ifa ediblər.

Azərbaycan xalqının müstəqillik ideallarına bütün ömrü boyu sadiq qalmış şair Əhməd Cavadın 130 illik yubiley tədbiri Gəncədə böyük təntənə ilə qeyd olunub.

Dünya miqyasında reklam  istehsalçılarının ən nüfuzlu beynəlxalq festivalı 1954-cü ildən bəri hər il Fransanın Kann şəhərində keçirilən “Cannes Lions” hesab olunur. “Ədəbiyyat və incəsənət” portalı Mədəniyyət Nazirliyinə istinadən xəbər verir ki, Mədəniyyət Nazirliyinin dəstəyi ilə festivalın gənc reklam mütəxəssisləri üçün nəzərdə tutulan “Young Lions” adlı mərhələsi bu il ikinci dəfə ölkəmizdə təşkil olunur. Bu müsabiqədə 30 yaşadək yaradıcı şəxslər ikili komanda şəklində iştirak edirlər. Müsabiqəyə “Çap” və “Videoçarx” kateqoriyaları üzrə işlər təqdim olunur.

Müsabiqədə qeydiyyatdan keçən iştirakçılara müsabiqə təşkilatçıları tərəfindən 16 aprel tarixində təlimatlar göndərilib, “Çap” kateqoriyası üçün 24 saat, “Videoçarx” üçün isə 72 saat ərzində yaradıcı məhsul hazırlamaları tələb olunub. Çap kateqoriyası üzrə mövzu “Mədəniyyət naminə sülh”, videoçarx kateqoriyası üzrə isə “İnsanların mədəniyyət müəssisələrinə mütəmadi ziyarətinin təşviq edilməsi” olaraq təyin edilib. İştirakçıların işləri 7 may tarixində Nizami Kino Mərkəzində baş tutacaq tədbirdə beynəlxalq münsiflər heyəti tərəfindən dəyərləndiriləcək, hər kateqoriya üzrə bir komanda olmaqla ümumilikdə 2 qalib komanda müəyyənləşdiriləcək. Müsabiqənin əsas mükafatı hər kateqoriya üçün iki nəfərdən ibarət komandanın Fransanın Kann şəhərində reallaşacaq "Young Lions Competitions 2022" finalında iştirak etmək hüququ olacaq.

Mükafatlandırma mərasimindən əvvəl “TEDx” formatında yerli və xarici spikerlər çıxış edəcəklər.

Yaponiyanın Azərbaycandakı səfiri Vada Cüniçi Beynəlxalq Muğam Mərkəzini ziyarət edib.

Beynəlxalq Muğam Mərkəzinin direktoru, Xalq artisti Murad Hüseynov səfiri mərkəzlə tanış edib, gələcək əməkdaşlıq haqqında müzakirələr aparılıb.

“Ədəbiyyat və incəsənət” portalı AzərTAC-a istinadən bildirir ki, görüşdə mərkəzin beynəlxalq əməkdaşlıq çərçivəsində həyata keçirdiyi layihələr və konsertlərdən söz açılıb, səfirliklə birgə mədəni layihələrin reallaşdırılması ilə bağlı fikir mübadiləsi aparılıb.

Murad Hüseynov səfirin diqqətinə çatdırıb ki, bu günə kimi yapon musiqiçilər bir neçə dəfə BMM-nin səhnəsində çıxış ediblər. 2014-cü ildə “VA-LİQA” qrupunun muğam ifaçıları ilə birgə səhnəni bölüşdükləri konsert proqramı ictimaiyyət tərəfindən də maraqla qarşılanıb. Həmçinin 2018-ci ildə Beynəlxalq Muğam Mərkəzində ənənəvi yapon musiqisi ifaçısı Yosuke İrienin şakuhaçi musiqi alətində ifasından ibarət konserti mədəniyyətlərin bölüşməsi baxımından maraqlı layihələrdən biri olub.

Səfir səmimi qəbula görə təşəkkür edərək son illər iki ölkə arasında dostluq və əməkdaşlıq münasibətlərindən danışıb.

Yaponiyanın Azərbaycanla mədəni əlaqələrin daha da genişlənməsində maraqlı olduğunu bildirən diplomat belə mədəni tədbirlərin əhəmiyyətini vurğulayıb. Mayın 15-də Yaponiya səfirliyi və Yaponiya Mədəniyyət Festivalı Təşkilat Komitəsinin birgə təşkilatçılığı ilə “Yaponiya Mədəniyyət Festivalı”nın keçiriləcəyini diqqətə çatdırıb.

Görüşdə gələcək əməkdaşlıq haqqında müzakirələr aparılıb.

Mayın 5-i Azərbaycanda xalçaçıların peşə bayramı - “Xalçaçı günü” ölkəmizin hər yerində silsilə tədbirlərlə qeyd olunur.

Bu il bu günün ikiqat əhəmiyyəti var. Çünki bu il xalçaçıların bayramı mədəniyyət paytaxtımız, Qarabağın sənət məbədi, xalçaçılıq sənətinin beşiyi Şuşada qeyd olundu.

Heydər Əliyev Fondu və Dövlət Turizm Agentliyinin təşkilatçılığı ilə Azərbaycanın mədəniyyət paytaxtı Şuşada keçirilən Beynəlxalq Kulinariya Festivalı çərçivəsində “Azərxalça” ASC Şuşanı ziyarət edən yerli və xarici qonaqlara özünün xalça toxuma prosesi haqqında “Xalça necə doğulur” adlı interaktiv tamaşa formasını təqdim edib.

“Azərxalça” ASC-dən AzərTAC-a bildirilib ki, tamaşa izləyənlərin böyük marağına səbəb olub, həmçinin turistlər özləri toxuma prosesində iştirak ediblər. Xatırladaq ki, festivalda kulinariya ilə yanaşı, Azərbaycanın mədəniyyət və incəsənət nümunələrinin də geniş təqdimatı baş tutub.

“Xalçaçı günü”ndə “Azərxalça” ASC-nin rəhbərliyi xalçaçılıq sənətinin inkişafı və tərənnümündə rolu olan bütün əməkdaşlarını təbrik edib, gələcək fəaliyyətlərində uğurlar arzulayıb. Müxtəlif rayonlarda fəaliyyət göstərən dövlət qurumlarının nümayəndələri, rayon gəncləri, məktəblilər də emalatxanalara baş çəkərək xalçaçıları təbrik ediblər.

“Azərxalça” ASC müasir Azərbaycanın əsas xalçaçılıq mərkəzidir. Cəmiyyət Azərbaycan Respublikasının Prezidenti İlham Əliyevin 5 may 2016-cı il tarixli Sərəncamı ilə yaradılıb. Ölkəmizdə yüz illərdir xalça toxunsa da, 2016-cı ilə qədər xalçaçıların peşə bayramı olmayıb. Artıq altı ildir ki, “Azərxalça” Açıq Səhmdar Cəmiyyətinin yaradıldığı gün - mayın 5-i “Xalçaçı günü” kimi qeyd olunur.

Dünyanın bir çox ölkəsində xalçaçılıq sənətinin mövcud olmasına rəğmən, belə bayramın qeyd olunması ilk dəfə məhz Azərbaycanda reallaşıb. Bu hadisə Azərbaycanda milli-mənəvi irsimiz hesab olunan xalçaçılığa, bu xalçaları toxuyub ərsəyə gətirən toxuculara verilən qiymətin bariz nümunəsidir.

Bu gün sürətlə inkişaf etməyə can atan “Azərxalça” ASC-nin əsas məqsədi milli-mənəvi, mədəni irsimiz olan xalçaların qorunması, xalçaçılıq işinin təbliği, xalça və xalça məmulatlarının istehsalı, ixracı, ölkə daxilində və xaricdə satışının təşkili, yeni texnologiyaların tətbiqi, maddi-texniki bazanın müasirləşdirilməsi, beynəlxalq sərgi və konfranslarda iştirakının təmini - bir sözlə, Azərbaycanın milli xalça brendinin inkişafı üçün lazım olan bütün tədbirlərin görülməsidir.

“Azərxalça” ASC-nin bir çox xarici ölkələrdə, o cümlədən BƏƏ-də (EKSPO 2020 Azərbaycan pavilyonunda) sərgi davam etdiyi müddətdə, martın 31-dək satış və nümayiş mərkəzi fəaliyyət göstərib. Azərbaycan ilə ərəb ölkələri arasında uzunmüddətli, zəngin və qarşılıqlı əməkdaşlığın 30 illik tarixini qeyd etmək məqsədilə bu il fevralın 18-də xüsusi olaraq “Dubay EKSPO 2020” sərgisi üçün hazırlanmış “Dostluq” adlı xalça Azərbaycan pavilyonunda təqdim olunub. Bu ildən etibarən cəmiyyət tarixində ilk dəfə ipək xalçaların toxunmasına da start verilib.

Müasir dizaynlı evlərində Azərbaycanda toxunmuş, əsl əl işi xalçalarımızı fərqli üslubda görmək istəyən yerli və xarici xalçasevərləri nəzərə alaraq, bazara yalnız klassik deyil, müasir dizaynlı xalçalar da təqdim olunub. Bunun üçün də konseptual, gənc, istedadlı dizaynerlər, rəssam və xalçaçıları işə cəlb edilir.

Yerli rəssamlarla yanaşı “Azərxalça” ASC xarici rəssam və dizaynerlərlə də əməkdaşlıq edir. İsrailli rəssam Rami Meirin əsərlərinin xalçalara köçürülməsi və satışı istiqamətində, o cümlədən, Azərbaycanda fəaliyyət göstərən bir çox xarici ölkə səfirlikləri ilə hər iki ölkədə xalçalarımızın sərgi və satışının baş tutması haqqında da danışıqlar və qarşılıqlı əməkdaşlıq həyata keçirilir.

Mədəniyyət Nazirliyinin sifarişi ilə “Salnaməfilm” studiyasında “Azərbaycanın Milli Qəhrəmanları” silsiləsindən sənədli filmlərin çəkilişi davam etdirilir. Silsilənin növbəti ekran əsəri şəhid Milli Qəhrəman, general-mayor Polad Həşimova (1975-2020) həsr olunan “Poladın izi ilə” sənədli filmidir.

“Ədəbiyyat və incəsənət” portalı Mədəniyyət Nazirliyinə istinadən məlumat verir ki, mayın 4-də Nizami Kino Mərkəzində filmin təqdimat mərasimi keçirildi. Tədbirdə mədəniyyət nazirinin birinci müavini Elnur Əliyev, Türkiyənin ölkəmizdəki səfəri Cahit Bağcı, digər rəsmilər, Milli Qəhrəmanın ailə üzvləri, mədəniyyət, incəsənət xadimləri və digər qonaqlar iştirak edirdilər.

Mədəniyyət nazirinin birinci müavini Elnur Əliyev çıxışında qeyd etdi ki, filmin əsas məqsədi özümüzü tanımaqdan ibarətdir: “Biz ölkə olaraq uzun müddət imperiyanın tərkibində yaşamışıq. Bu dövrdə tariximizi bizə unutdurmaq istəyiblər. Ancaq buna baxmayaraq biz özümüz-özümüzə qayıtdıq. Milli yaddaşın geri qaytarılması, təbii ki, Vətən oğullarının qəhrəmanlığı sayəsində gerçəkləşdi. Tarix həmişə böyük millətlər tərəfindən yazılıb. Həmin millətlərin hər zaman güclü ordusu olub. Güclü ordusu olan millət tarixdə iz buraxıb. Biz tarixi yaddaşımızı 2020-ci ildə yenidən aşkar formada kəşf elədik. Bugünkü filmin qəhrəmanı, əsgərimizin, ordumuzun ən cəsur nümayəndələrindəndir. Biz bu ekran əsərini yalnız Polad Həşimova deyil, onun simasında bütün qəhrəman Vətən oğullarına ithaf olunan film hesab edirik”.

Elnur Əliyev bildirdi ki, Mədəniyyət Nazirliyi olaraq əsas məqsədlərdən biri də bu tarixi davamlılığı bərpa etməkdir: “Bizim çox zəngin mədəniyyətimiz var. Mədəniyyətin vacib ölçüsü Vətən, ailə sevgisidir. Bizim üçün adi gələn bir sıra məlumat və dəyərlər çox yerdə yoxdur. Məsələn, Abbas Səhhətin məşhur “Vətən” şeirində Vətən və onun oğulları arasında bütün münasibətlər var. Şeirdə xüsusi diqqətimi cəlb edən bir misra var. Şair yazır ki, “Vətən əcdadımızın mədfənidir, Vətən övladımızın məskənidir”. Yəni Vətən bizdən əvvəl əcdadlarımızın torpaqları olub və gələcəkdə də bizimdir. Bu misraları yazan mədəniyyət başqa mədəniyyətdir. Ona görə də biz fəxr edirik ki, belə bir mədəniyyətin sahibiyik”.

Türkiyənin ölkəmizdəki səfiri Cahit Bağcı vurğuladı ki, bu Vətən şəhidlərin uğrunda can verdiyi və bizə əmanət etdiyi torpaqdır: “Bu gün ölümsüz olan bir igidin, 30 illik həsrəti şəhadəti ilə azadlığa çevirən bir qəhrəmanın həyat hekayəsini izləyəcəyik. Polad Həşimovla bağlı bildiklərimizlə yanaşı, bilmədiklərimiz də var. Bu film vasitəsilə onları öyrənəcəyik. Polad Həşimovdan sonra Azərbaycanda Vətəni, müstəqilliyi qorumaq üçün minlərlə Polad doğulub. Bu gün filmi izləyənlər arasında Milli Qəhrəmanın anası Səmayə Həşimova da var. Mən Səmayə ananın əllərindən öpürəm. O, təkcə Azərbaycan qəhrəmanlarının anası deyil, bütün Türk dünyasının simvoludur”.

Filmin rejissoru və ssenari müəllifi Zamin Məmmədov Azərbaycanın igid oğullarından biri haqqında film ərsəyə gətirdiyi üçün qürur hissi keçirdiyini söylədi.

Polad Həşimovun anası Səmayə Həşimova filmə görə Mədəniyyət Nazirliyinə təşəkkürünü bildirdi. Söylədi ki, Polad Həşimov öz şəhidliyi ilə Azərbaycan xalqının qələbə ruhunu oyadıb, başını uca edib.

Milli Qəhrəmanın həyat yoldaşı Ofeliya Salmanova qeyd etdi ki, Polad Həşimov Azərbaycanın səngərdə şəhid olan yeganə generalıdır. Bu fakt kifayət edir ki, biz Polad Həşimovun necə bir qəhrəman olduğunu dərk edək.

Çıxışlardan sonra “Poladın izi ilə” sənədli filmi nümayiş etdirildi.

2021-ci ildə lentə alınan filmin rejissoru və ssenari müəllifi Zamin Məmmədov, operatoru Fahir İmanquliyev, məsləhətçisi Vüqar Əsgərov, montaj edəni Sabir Əskərzadə, səs rejissoru Mehman Nadirov, prodüseri Nazim Hüseynovdur.

Filmin çəkilişləri Polad Həşimovun doğma yurdu Qəbələdə, yaşadığı Sumqayıtda, hərbi xidmət etdiyi və döyüşdüyü bölgələrdə aparılıb. Ekran işində şəhid generalla düşmənə qarşı birgə döyüşmüş səngər yoldaşları, ailə üzvləri xatirələrini bölüşürlər.

Qeyd edək ki, general-mayor Polad Həşimov 2020-ci il iyulun 14-də Ermənistan ordusunun Azərbaycanın Tovuz rayonu istiqamətində növbəti hərbi təxribatının qarşısını alarkən 7 hərbi qulluqçu ilə birgə qəhrəmancasına şəhid olub. Dövlət başçısının 9 dekabr 2020-ci il tarixli sərəncamı ilə Polad Həşimova ölümündən sonra “Azərbaycanın Milli Qəhrəmanı” adı verilib.

“Ədəbiyyat və incəsənət” portalının Güney Azərbaycan üzrə nümayəndəsi Əli Nurvəş güneyli şairlərin şeirlərini vaxtaşırı oxuculara təqdim edəcək. İlk təqdim edilən şair Dərviş Təbrizli olacaq. Sabah bu qəmli, nisgil dolu şeirlərlə tanış olmağı yaddan çıxarmayın.

Qubada keçirilən Silkway beynəlxalq ədəbiyyat festivalının Azərbaycan turu başa çatsa da təəssüratlar bitib-tükənmək bilmir. Mediada məqalələr, sosial şəbəkələrdə status və fotolar baş alıb gedir.

“Ədəbiyyat və incəsənət” portalı səfalı Quba bölgəsinin gözəlliklərini əks etdirən bu fotoya diqqət yetirmənizi xahiş edir. Fotoda festivalın 32 finalçısından 18-ni görürsünüz. Hamısının sifətində xoş təbəssüm var, sabahkı günə inam nikbinliyi sezilir. 

Soldan sağa bu ardıcıllıqla düzülüblər: Ruslan Dost-Əli, Ümid Nəccari, Təvəkkül Boysunar, Mehdi Dostəlizadə, Səddam Laçın (oturub), Emin Piri, İntiqam Yaşar, Cavid Zeynallı, Eminquey (oturub), Fərid Hüseyn, Ulucay Akif, Nadir Yalçın, Ramil Əhməd, Həsən Kür, Cavid Qasımov, Rəvan Cavid, Ayxan Ayvaz və Faiq Hüseynbəyli.

20-30 ildən sonra Azərbaycan ədəbiyyatının əsas simaları, xalq şairləri və yazıçıları məhz bu sıradan çıxacaq. Buna əmin ola bilərsiniz. 

Ədəbiyyatımızda son dövrlərin ən iddialı gəncliyi yetişir. Bu gənclərə dayaq olmaq, onların kükrəyən istedadlarının qarşısındakı bütün maneələri götürmək lazımdır. Bu, ölkə ədəbiyyatının, mədəniyyətinin taleyini həll edən insanlara bir çağırışdır.

Yaşasın Azərbaycan ədəbi gəncliyi!

Günün fotosu: Bayden Putini təhqir edib

“Səfeh ordusu olan diktator”. ABŞ prezidenti Co Bayden Rusiya prezidenti Vladimir Putini bu sözlərlə xarakterizə edib.

O, bu fikirləri Alabama ştatındakı müdafiə zavodunda çıxışı zamanı səsləndirib. Həmin zavodda tankəleyhinə “Javelin” raketləri hazırlanır ki, həmin raketləri də ABŞ Ukraynaya verir. 

“Diktatorlara cavab vermədikcə onların iştahı artır” deyib Bayden. 

Bu arada Putin isə Emmanuel Makronla telefon danışığında Qərbi Ukraynanı silahlandırmamağa çağırıb, deyib, biz Ukrayna ilə dialoqa hazırıq, “cığallıq” edən onlardır.

Foto: Euronews